သတင်းနှင့် လှုပ်ရှားမှုများ

       ကလေးမြို့တွင် အောက်တိုဘာလပိုင်းအစရောက်ပြီဆိုတာနဲ့ ကလေး-ကလေးဝ ကားလမ်းမပေါ်ရှိ ဦးလေးကြီး ပေါင်းတင်း ( ခေါ် ) ကောက်ညှင်းကျည်တောက် ဆိုင်ကလေးမှာ စတင်ရောင်းအား ကောင်းလာပြီဖြစ်ပါတယ်။

      ရာသီစာ ပေါင်းတင်း ( ခေါ် ) ကောက်ညှင်းကျည်တောက် ရောင်းချနေသည့် ဦးလေးကြီးနှင့် တွေ့ဆုံမေးမြန်းရာတွင် မိမိအနေဖြင့် အောက်တိုဘာလဆန်းပိုင်းမှစတင်၍ ကောက်ညှင်းဆန်ဟောင်းများဖြင့် စတင်ပြုလုပ်ကာရောင်းချလျက်ရှိပြီး ကောက်ညှင်းဆန်သစ်ပေါ်ချိန် နိုဝင်ဘာလတွင် ပိုမိုရောင်းအားကောင်းကြောင်းကို ပြောကြားခဲ့ပါသည်။

       ပေါင်းတင်း ( ခေါ် ) ကောက်ညှင်းကျည်တောက် ပြုလုပ်ပုံအဆင့်ဆင့်အား မေးမြန်းရာတွင် ကောင်းညှင်းဆန်(ငချိတ်) တစ်အိတ်လျှင် ( ၈၅၀၀၀ ) ကျပ်၊  ကောက်ညှင်းဆန် (ဖြူ) တစ်အိတ်လျှင် ( ၈၀၀၀၀ ) ကျပ်၊ တင်းဝါး ( ၅ ) ဆစ်ပါ တစ်ပင်လျှင် ( ၁၀၀၀ ) ကျပ်၊ ထင်း ( ၁ ) တန်လျှင် ( ၇၅၀၀၀ ) ကျပ်ပေး၍ ဝယ်ရပါကြောင်း၊  ပထမဦးစွာ ကောက်ညှင်းဆန်များကို သန့်စင်ပြီး ရေစင်အောင်ဆေး ကာ ရေစိမ် ( တစ်ညသိပ် ) ပြီး ရေပြန်ဆေးကာ တင်းဝါးထဲသို့ ကောက်ညှင်း ဆန်များသွတ်၍ ထင်းကောင်းကောင်း၊ မီးကောင်းကောင်းဖြင့် ဖုတ်ရပြီး ဝါးကျွမ်းပြီးအကြေးလှန်အောင် လှည့် ကာ ဖုတ်ရပါကြောင်း၊ ကောက်ညှင်းဆန်ဟောင်းဖြင့် ပေါင်းတင်းဝါး ဖုတ်ရာတွင် ဆန်များအကျက်မညီ ဖြစ်တတ်သောကြောင့် သတိထား၍ ဖုတ်ရပါကြောင်း သိရသည်။

       ရောင်းအားအနေဖြင့် ကောက်ညှင်းဆန် ( ၂၄ ) ပြည် တစ်အိတ်လျှင် ( ၃ ) ရက်ခန့်သာ အသုံးပြုရပြီး တစ်ရက်လျှင် ( ၈ ) ပြည်ခန့် အသုံးပြု၍ အကြီး၊ အသေးပေါ်မူတည်၍ အချောင်း ( ၅၀ ) ခန့် ရရှိ ပါကြောင်း၊ ပေါင်းတင်း တစ်ချောင်းလျှင် ( ၂၅၀၀ ) ကျပ်၊ ( ၂၀၀၀ ) ကျပ်၊ ( ၁၅၀၀ ) ကျပ်၊ ( ၁၀၀၀ ) ကျပ် စသည်ဖြင့် မိသားစု တစ်နိုင်တစ်ပိုင်ဖြင့် နှစ်စဉ် ဝင်ငွေရရှိကာ ဦးလေးကြီး ပေါင်းတင်းဆိုပြီး နာမည်တွင်နေသော ရာသီစာ ပေါင်းတင်း ( ခေါ် ) ကောက်ညှင်းကျည်တောက် ဖြစ်ပါကြောင်းနှင့် ဖြန့်ဖြူးရောင်းချမှုအနေဖြင့် ယခုအခါတွင် မြို့နယ်တွင်းသာ ရောင်းချရပြီး လမ်းပန်း ဆက်သွယ်ရေး ကောင်းမွန်ပါက မုံရွာမြို့၊ မန္တလေးမြို့၊ ရန်ကုန်မြို့အထိပါ တင်ပို့ရောင်းချရပါကြောင်း  သိရှိရပါသည်။

DOCA(စစ်ကိုင်း)

       မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး နှင့် ခရိုင်ဦးစီးမှူး တို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စားသုံးသူကာကွယ်ရေးဥပဒေပါ စားသုံးသူအခွင့် အရေးများ ၊ စီးပွားရေးလုပ်ငန်းရှင်၏တာဝန်နှင့် တားမြစ်ချက်များ ၊ စီးပွားရေးကျင့်ဝတ်နှင့်အညီ လုပ်ကိုင်ဆောင်ရွက်ပြီး တာဝန်ယူမှု၊ တာဝန်ခံမှုရှိသော စီးပွားရေးလုပ်ငန်းရှင်များဖြစ်လာစေရန် ရည်ရွယ်၍ အောက်တိုဘာလ(၅)ရက်နေ့၊ နံနက်(၁၀:၃၀)အချိန်တွင်   ဦးစီးအရာရှိ ဒေါ်မွန်မွန်စိုး နှင့် ဒု-ခရိုင်ဦးစီးမှူး ဦးဇော်ထွန်းဦး ဦးဆောင်သောဝန်ထမ်းများအဖွဲ့သည် ကုန်အညွှန်းအမှတ်အသား ဖော်ပြချက်များ ပြည့်စုံစွာပါဝင်မှုရှိစေရန် သွားရောက်တွေ့ဆုံ အသိပညာပေးဆွေးနွေးခဲ့ပြီးဖြစ်သော ပခုက္ကူမြို့ အမှတ်(၁၄)၊ အမှတ်(၁၅)ရပ်ကွက်ရှိ ပဲကြော်အမျိုးမျိုး၊ စားသောက်ကုန်များထုတ်လုပ် ဖြန့်ဖြူးရောင်းချသောလုပ်ငန်းရှင်များနှင့် ကိတ်နှင့်မုန့်မျိုးစုံထုတ်လုပ်သော လုပ်ငန်းရှင်များဆီသို့ ကုန်အညွှန်းအမှတ်အသားများ ပြည့်စုံစွာပါဝင်စေရေးအတွက် ထပ်မံသွားရောက်၍ အသိပညာပေး ဆွေးနွေးခဲ့ပါသည်။

        ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ပြည့်စုံစွာဖော်ပြခြင်းဖြင့် ဈေးကွက် အတွင်းရှိ  မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်းစေခြင်း၊ အာမခံချက်ပေးခြင်း၊ သတင်းအချက်အလက်များ ပြည့်စုံမှန်ကန်စွာ ထည့်သွင်းခြင်းတို့ကြောင့် စားသုံးသူများအနေဖြင့် စီးပွားရေးလုပ်ငန်းရှင်များအပေါ်  ယုံကြည်မှုများရရှိလာပြီး အကျိုးစီးပွားများပိုမိုရရှိ လာနိုင်မည်ဖြစ်ကြောင်း ရှင်းလင်းဆွေးနွေးပြီး ဒု-ခရိုင်ဦးစီးမှူး ဦးဇော်ထွန်းဦးက စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်(၂/၂၀၁၉)ပါ ကုန်စည် အုပ်စု(က)ရှိ အစားအသောက်တွင်  မြန်မာ ဘာသာဖြင့် ထည့်သွင်းရမည့်အချက်များ၊ ကုန်အညွှန်း အမှတ် အသားဖော်ပြခြင်းနှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်း သိရှိလိုက်နာစေရန်ဆွေးနွေးခဲ့ပြီး စီးပွားရေးလုပ်ငန်းရှင်များသည် ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့ တင်ပြစိစစ် လျှောက်ထားနိုင်ပါကြောင်း၊ ကုန်အမှတ်တံဆိပ်စိစစ်ခွင့်ပြုချက်များအား ပြုလုပ်ဆောင်ရွက်ထားစေလိုကြောင်း၊ ကုန်အညွှန်းအမှတ်အသားများ ပြည့်စုံမှုမရှိသည့် ကုန်စည်များတွေ့ရှိလာပါက ဥပဒေအရ အရေးယူ ဆောင်ရွက်သွားမည်ဖြစ်သဖြင့် လုပ်ငန်းရှင်များ လိုက်နာဆောင်ရွက်စေလိုကြောင်း ထပ်မံ အသိပေး အသေးစိတ်ဆွေးနွေးခဲ့ပါသည်။

DOCA(မကွေး)

      မ‌ကွေးတိုင်းဒေသကြီး၊ တောင်တွင်းကြီးမြို့နယ် ဒေသခံတောင်သူများသည် ငမင်ဆည်၊ ကန်တော်ကြီးကန်၊ ကင်ပွန်းတောင်ဆည်၊ ယင်းမလည်ဆည်၊ ကျောက်မိချောင်း ရေလွှဲဆည်၊ ဘန်းကုန်းဆည်၊ ရန်ပယ်ဆည်နှင့် အစိုးရဆည်ငယ်ကန်ငယ်တို့မှ မြေအောက်ရေစုပ်စက်ဖြင့် မိုးစပါး သီးနှံစိုက်ပျိုးလျက်ရှိရာ လျာထားချက် (၉၇၇၉၂)ဧက ပြည့်မီကျော်လွန်စေရေးအတွက် ဇွန်လ (၂၀)ရက်မှ စ၍ စတင်စိုက်ပျိုးခဲ့ပြီး အောက်တိုဘာလဆန်းအထိ မိုးစပါးသီးနှံ (၉၇၉၇၅)ဧက စိုက်ပျိုးပြီးစီးကြောင်းနှင့် သတ်မှတ်လျာထားဧကထက် (၁၈၃)ဧက ပိုမိုစိုက်ပျိုးနိုင်ကြောင်း သိရှိရပါသည်။

     စိုက်ပျိုးသည့် စပါးမျိုးများမှာ ရတနာတိုးစပါးနှင့် မနောသုခစပါးမျိုးတို့ကို ဧက(၄၀၀၀၀) ကျော်စီနှင့် ဧရာမင်း(ဧရာပဒေသာ) စပါးဧက (၂၀၀၀၀)ခန့်စိုက်ပျိုးခဲ့ကြောင်း၊ မိုးနှောင်း မိုးရွာသွန်းမှုူ များသည့်အတွက် စပါးခင်းများ ဖြစ်ထွန်းအောင်မြင်လျက်ရှိသည့်အပြင် ရေလိုအပ်ပါကလည်း ဆည် တာတံမံများမှ ပေးသွင်းနိုင်ရန် စီစဉ်လျက်ရှိသည့်အတွက် အထွက်နှုန်းကောင်းမွန်မည်ဟု ယူဆကြောင်း ဓါတ်မြေဩဇာ၊ ပိုးသတ်ဆေး ကြီးမြင့်မှုရှိသည့်အတွက်လည်း သဘာဝမြေဩဇာ၊ ငါးအမိုင်နို အက်စစ်တို့ကို ပြုလုပ်၍ ပတ်ဖျန်းအသုံးပြုသွားနိုင်ရေး စိုက်ပျိုးရေးဦးစီးဌာနမှ နည်းပညာဖြန့်ဖြူး ပေးလျက်ရှိကြောင်း မိုးစပါးစိုက်တောင်သူတစ်ဦးထံမှ သိရှိရပါသည်။

DOCA(မကွေး)

         တနင်္သာရီတိုင်းဒေသကြီး၊ စားသုံးသူရေးရာဦးစီးဌာနမှ ကော့သောင်းခရိုင်ဉီးစီးမှူးနှင့် ဝန်ထမ်းများသည် စည်ပင်သာယာရေး ဈေးတာဝန်ခံနှင့်အတူ (၁၃.၁၀.၂၀၂၂) ရက်နေ့၊ နံနက် (၁၀:၀၀) နာရီအချိန်တွင် ကော့သောင်းမြို့ပေါ်ရှိ လေဟာပြင်ဈေးတွင် စားသောက်ကုန်ပစ္စည်း အရောင်းဆိုင်များ သို့ ကွင်းဆင်း၍ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့သည်။

          ကွင်းဆင်းစစ်ဆေးရာတွင် ကော့သောင်းမြို့၊လေဟာပြင်ဈေးရှိ စားသောက်ကုန်ပစ္စည်းအရောင်းဆိုင်ပိုင်ရှိများအား အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားပြည့်စုံစွာ ဖော်ပြထားသောကုန်စည်များကိုသာ ရောင်းချဖြန့်ဖြူးရန်နှင့် ကုန်စည်ပေါ်တွင် မြန်မာဘာသာဖြင့်ဖြစ် စေ၊မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေရေးသားဖော်ပြရမည့်အချက်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို ရှင်းလင်းဆွေးနွေးခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာသတ်မှတ်ချက်များနှင့် ကိုက်ညီသည့် စားသောက်ကုန်များကို ရောင်းချစေရေးတို့ကို အသိပညာပေးဆွေးနွေးပြောကြားခဲ့ကြောင်း သိရှိရပါသည်။

DOCA(တနင်္သာရီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာမြို့နယ်တာဝန်ခံ ဦးမြင့်ဌေး သည် (၁၁.၁၀.၂၀၂၂)ရက်နေ့ နံနက်(၁၀:၀၀)နာရီက  မြို့နယ်စည်ပင်သာယာရေးအဖွဲ့နှင့် ပူးပေါင်း၍ လပွတ္တာမြို့နယ်၊ အမှတ်(၅)ရပ်ကွက်၊ ဘုရားလမ်းရှိ မုန့်မျိုးစုံဆိုင်များတွင် ရောင်းချနေသော မုန့်များ၌ ကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/မရှိကွင်းဆင်း၍ ဈေးကွက်စောင့် ကြည့်စစ်ဆေးခဲ့ပါသည်။

      ထိုသို့ကွင်းဆင်းစစ်ဆေးဆောင်ရွက်ရာတွင် လပွတ္တာမြို့နယ်တာဝန်ခံမှ အမှတ်(၅)ရပ်ကွက် ဘုရားလမ်းအတွင်းရောင်းချနေသော မုန့်မျိုးစုံဆိုင်ပိုင်ရှင်များအား စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေဥပဒေ ၂၀၁၉ ပါ ပြဌာန်းချက် များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ တားမြစ် ချက်များ၊ ပြစ်မှုပြစ်ဒါဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်း အမှတ်အသား ဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ (ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြစ်စေ၊ အခြားဘာသာ တစ်ခု (သို့)တစ်ခုထက်ပို၍ တွဲလျှက်ဖြစ်စေ၊ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် ထုတ်ပြန်ထားသည့်ဥပဒေ ညွှန်ကြားချက်များအား လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင်ကုန်အညွှန်း အမှတ်အသားပြည့်စုံမှုရှိ/မရှိ ဌာနမှဈေးကွက်စောင့်ကြည့်စစ်ဆေးမှုများ စဉ်ဆက်မပြတ် ဆောင်ရွက်သွားမည်ဖြစ်ကြောင်း သိရှိရပါသည်။

DOCA(ဧရာဝတီ)