သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မြစ်ကြီးနားခရိုင်းဦးစီးမှူးရုံးမှ စစ်ဆေးရေးမှူး ဦးဘောမ်ဇုန်းသည် ၂၀.၄.၂၀၂၃ ရက်နေ့၊ (၁၂း၀၀) နာရီအချိန်တွင် ရွှေစက်ရပ်ကွက်အတွင်းရှိ လက်လီ၊လက်ကား ကုန်စုံဆိုင် များသို့ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှပပျောက်စေ‌ရေးနှင့် စားသုံးသူကာကွယ်ရေးဥပဒေပါကုန်အညွှန်း အမှတ်အသားဖော်ပြခြင်းနှင့် ပတ်သက်၍ ကိုက်ညီမှု ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

         ဈေးကွက်စောင့်ကြည့်စစ်ဆေးရာတွင် Magic အမှတ်တံဆိပ်(စင်းဒွစ်ခရင်ခရက်ကာ) အသင့်စား မုန့်အား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ရာ ကုန်အညွှန်းအမှတ်အသား ဖော်ပြချက်ပြည့်စုံမှုရှိကြောင်း စစ်ဆေးတွေ့ရှိရပြီး  လုပ်ငန်းရှင်များအနေဖြင့် ကုန်အညွှန်းအမှတ်အသားဖော်ပြချက်များနှင့်ကိုက်ညီမှုရှိသည့် ကုန်စည်များကိုသာ ဈေးကွက်အတွင်း၌ ဖြန့်ဖြူးရောင်းချရန် ဆွေးနွေးခဲ့ပါ သည်။

DOCA(ကချင်)

     စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်ကျော်ဦးသည် ၂၀.၄.၂၀၂၃ ရက်နေ့၊ (၁၃း၀၀) နာရီအချိန်တွင် ဗန်းမော်ခရိုင်ဦးစီးမှူးရုံး၌ ဗန်းမော်မြို့အတွင်းရှိ ကုန်မျိုးစုံ ရောင်းဝယ်သော စီးပွားရေးလုပ်ငန်းရှင်များနှင့် တွေ့ဆုံဆွေးနွေးခဲ့ပါသည်။

  ထိုသို့ ဆွေးနွေးရာတွင် ခရိုင်ဦးစီးမှူးက စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းအရ ကုန်စည် အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့် အချက်(၈)ချက်နှင့် စီးပွားရေးလုပ်ငန်းရှင်၏ တာဝန်များဖြစ်သည့် စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံခြင်း၊ စီးပွားရေးလုပ်ငန်းလုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ စားသုံးသူနစ်နာဆုံးရှုံးမှုဖြစ်ပွားစေမည့် ကုန်စည် သို့မဟုတ် ဝန်ဆောင်မှုကို တိုက်ရိုက်‌ရောင်းချခြင်း သို့မဟုတ် သွယ်ဝိုက်ရောင်းချခြင်းကို ရှောင်ကြဉ်ခြင်း၊ ကုန်စည်နှင့်စပ်လျဉ်း၍ အာမခံချက်ပေးခြင်း၊ ကုန်စည်များကို ကုန်အညွှန်းအမှတ်အသားပြည့်စုံစွာဖော်ပြမှသာ ဈေးကွက်တွင် ရောင်းချခွင့်ရှိမည် ဖြစ်ကြောင်းတို့ကို ရှင်းလင်းဆွေးနွေးခဲ့ပြီး ကုန်အညွှန်းအမှတ်အသားဆိုင်ရာ အသိပညာပေး လက်ကမ်းစာစောင်များ ဖြန့်ဝေပေးခဲ့ပါသည်။

DOCA(ကချင်)

      ကရင်ပြည်နယ်၊ ဘားအံခရိုင်၏၂၀၂၃-၂၀၂၄ဘဏ္ဍာရေးနှစ်၊ ဒေသန္တရစီမံကိန်းရည်မှန်းချက်များ တာဝန်ပေးအပ်ပွဲအခမ်းအနားကို ဘားအံခရိုင်၊ အထွေထွေအုပ်ချုပ်ရေးဦးစီးဌာန၊  အစည်းအဝေးခန်းမ၌ ၂၁-၄-၂၀၂၃ ရက်နေ့ (၁၄:၀၀) နာရီအချိန်တွင် ကျင်းပခဲ့ကြောင်း သိရသည်။

       ဘားအံခရိုင်၏၂၀၂၃၂-၂၀၂၄ ဘဏ္ဍာရေးနှစ်၊  ဒေသန္တရစီမံကိန်းရည်မှန်းချက်များကို နိုင်ငံတော်၏ ရှေ့လုပ်ငန်း စဉ် ( ၅ ) ရပ်၊ ဦးတည်ချက် (၁၂ ) ရပ် ၊ ပြည်နယ်၏ ရှေ့လုပ်ငန်းစဉ်များအညီ ခရိုင်၏ ဒေသဖွံ့ဖြိုးရေးကို  အထောက်အကူ ပြုစေရေး၊ သာယာဝပြောရေးနှင့် စားရေးရိက္ခာ ဖူလုံရေး၊ ပြည်သူ့လူမှု ဘဝတိုးတက်စေရေးနှင့် ပြည်သူကိုဗဟိုပြု၍ အားလုံးပါဝင်နိုင်သော ရေရှည်ဖွံ့ဖြိုးတိုးတက်မှုရရှိစေရေးအတွက် မျှော်မှန်းရေးဆွဲဆောင်ရွက်ထားခြင်းဖြစ်ကြောင်း  သိရသည်။

   ဘားအံခရိုင်၏၂၀၂၃၂-၂၀၂၄ဘဏ္ဍာရေးနှစ်၊  ဒေသန္တရစီမံကိန်းတွင် ပါဝင်သည့် ဌာနအဖွဲ့အစည်းများအနေဖြင့် ဦးစားပေးဆောင်ရွက်ရမည့် လုပ်ငန်းစဉ်များနှင့် စီမံကိန်းဆိုင်ရာရည်မှန်းချက်များအား အပြည့်အဝ အောင်မြင်အောင် အကောင်အထည်ဖော်ဆောင်ရွက်ရေးနှင့် သတ်မှတ်ကာလအတွင်း အချိန်မီပြီးစီးစေရေး၊ နိုင်ငံတော်ဘဏ္ဍာရန်ပုံငွေများ အလေ့အလွင့်မရှိစေရန်အတွက် သက်ဆိုင်ရာဌာနများမှ ကြိုးပမ်းဆောင်ရွက်ကြရန် ခရိုင်စီမံအုပ်ချုပ်ရေးကောင်စီ ဥက္ကဋ္ဌမှ တိုက်တွန်းပြောကြားခဲ့ပြီး စီမံကိန်းတွင်ပါဝင်သည့် သက်ဆိုင်ရာဌာနများသို့ စီမံကိန်းရည်းမှန်းချက်လွှာများကို ပေးအပ်ခဲ့ကာ အခမ်းအနားကို (၁၅:၀၀) နာရီအချိန်တွင် ရုပ်သိမ်းခဲ့သည်။ အခမ်းအနားသို့ ခရိုင်စီမံအုပ်ချုပ်ရေးကောင်စီဥက္ကဋ္ဌနှင့် အဖွဲ့ဝင်များ၊ စားသုံးသူရေးရာဦးစီးဌာန အပါအဝင် ခရိုင်အဆင့် ဌာနဆိုင်ရာများ၊ မြို့နယ်အဆင့်ဌာနဆိုင်ရာများ တက်ရောက်ခဲ့ကြောင်း သတင်းရရှိသည်။

DOCA(ကရင်)

        စားသုံးသူရေးရာဦးစီးဌာန ၊ ပဲခူးခရိုင် ၊ ပဲခူးမြို့နယ်တာဝန်ခံ ဦးစိုးဝင်းသည် တိုင်းဒေသကြီး ဦးစီးမှူးရုံးမှ တာဝန်ရှိသူများနှင့်အတူ ကလိရပ်ကွက်၌ ဧပြီလ၁၉ရက်နေ့ နံနက်ပိုင်းက  စားသုံးသူကာကွယ်ရေးဆိုင်ရာ    သိကောင်းစရာများကို ရှင်းလင်းပြောကြားခဲ့ပါသည်။

      မြို့နယ်တာဝန်ခံ ဦးစိုးဝင်းက စားသုံးသူအခွင့်အရေးနှင့် နစ်နာဆုံးရှုံးမှု မရှိစေရေးအတွက် စားသုံးသူပြည်သူများနှင့် စီးပွားရေး လုပ်ငန်းရှင်များအား အသိပညာပေး ဆောင်ရွက်နေမှုများနှင့် ဈေးကွက်စောင့်ကြည့်လေ့လာခြင်းများကို လည်းကောင်း ၊ မြန်မာနိုင်ငံ စားသုံးသူကာကွယ်ရေး ကော်မရှင်က ညွှန်ကြားချက်အမှတ် ၂/၂၀၁၉ ဖြင့် ညွှန်ကြားထားပြီးဖြစ်သဖြင့် ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည်များကို လည်းကောင်း ၊ စားသုံးသူကာကွယ်ရေး ဥပဒေပေါ်ပေါက်လာပုံ ၊ ဥပဒေပါ အကြောင်းအရာများထဲမှ စားသုံးသူ အခွင့်အရေးများ နစ်နာဆုံးရှုံးလျှင် တိုင်ကြားနိုင်မည့် နည်းလမ်းများ ၊ စားသုံးသူ‌ရေးရာဦးစီးဌာနအနေဖြင့် ဈေးကွက်အတွင်း ဘေးအန္တရာယ်ရှိသည်ဟု ယူဆရသော ကုန်ပစ္စည်းများ ပ‌ပျောက်စေရေးအတွက် ဌာနရှိ စစ်ဆေးရေးအရာရှိများက အပတ်စဉ်ဈေးကွက်စောင့်ကြည့်စစ်ဆေးခြင်း လုပ်ငန်းစဉ်များကို လုပ်ဆောင်နေခြင်းများကို ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ပဲခူး)

      စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် မိမိဝန်ကြီးဌာန၏ ဆောင်ပုဒ်ဖြစ်သော ဖွံ့ဖြိုးကုန်သွယ်နိုင်ငံကြွယ် ဆောင်ပုဒ်နှင့်အညီ နိုင်ငံတကာ ကုန်သွယ်မှုလုပ်ငန်းများကို ယနေ့အထိ ခေတ်အဆက်ဆက် တိုးတက်အောင်မြင်အောင် ဆောင်ရွက်လျက်ရှိပါသည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် နိုင်ငံတော်၏ အမျိုးသား အကျိုးစီးပွားတိုးတက်မြင့်မားရေးအတွက် ထိရောက်သည့် ကုန်သွယ်ရေးမူဝါဒများ ချမှတ်ဆောင်ရွက်ပေးခြင်းနှင့် ဈေးကွက်စီးပွားရေးစနစ်နှင့်အညီ ပုဂ္ဂလိကအခန်းကဏ္ဍ ဖွံ့ဖြိုးတိုးတက်အောင် အားပေးမြှင့်တင်ကိုလည်း ဆောင်ရွက်ပေးလျက်ရှိပါသည်။ မြန်မာနိုင်ငံ၏ စီးပွားရေးဂေဟစနစ် ဖွံ့ဖြိုးတိုးတက်စေရန် ခေတ်မီကောင်းမွန်သည့် မူပိုင်ခွင့်စနစ် တစ်ရပ်ကိုလည်း ဆောင်ရွက် ပေးလျက်ရှိပါသည်။ မျက်မှောက်ကာလနှင့် လိုက်လျောညီထွေ ဖြစ်သည့် ဒစ်ဂျစ် တယ်ကုန်သွယ်မှု (Digital Trade) ကို အကောင်အထည်ဖော် ဆောင်ရွက် လျက်ရှိပါသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ကုန်သွယ်ရေးဝန်ကြီးဌာန ခေတ် အချိန်ကပင် နိုင်ငံတော်၏ ရည်မှန်းချက်များ၊စီးပွားရေးမူဝါဒ၊ မျှော်မှန်းချက်၊ ရည်မှန်းချက် တာဝန် များအပြင်ဝန်ကြီးဌာနမှကျင့်သုံးလျှက်ရှိသော ကုန်သွယ်ရေးမူဝါဒ(၅)ရပ်၊ ဥပဒေများ၊ စားသုံးသူ ရေးရာ ဦးစီးဌာန၏ မူဝါဒများ၊ မြန်မာနိုင်ငံ ကုန်စည်အမှတ်အသားများ အက်ဥပဒေ၊ အရေးကြီးကုန်စည်နှင့်ဝန်ဆောင်မှုဥပဒေ၊ ပို့ကုန်၊ သွင်းကုန်ဥပဒေ၊ ယှဉ်ပြိုင်မှုဥပဒေ၊ စားသုံးသူ ကာကွယ်ရေးဥပဒေ၊ မြန်မာအထူးစီးပွားရေးဇုန်ဥပဒေများကို ကျင့်သုံးလျက်ရှိပါသည်။ နိုင်ငံခြားသားကုမ္ပဏီ၊ မြန်မာနိုင်ငံသားနှင့် နိုင်ငံခြားပေါင်းစည်းဆောင်ရွက်သည့် ကုမ္ပဏီများ အား ပြည်တွင်းတွင် လက်လီ၊ လက်ကားရောင်းချခွင့်ပြုခြင်း၊ စီးပွားရေးနှင့် သက်ဆိုင်သော ဌာန/ အဖွဲ့အစည်းများ၊ နိုင်ငံပိုင်ဘဏ်များ၊ ပုဂ္ဂလိကဘဏ်များ၊ ဘဏ်ရုံးခွဲများနှင့် အခြားစီးပွားရေး လုပ်ငန်းအသီးသီးတို့တွင် စီးပွားရေးလုပ်ငန်းများ လွယ်ကူစွာ ဆောင်ရွက်နိုင်ရန်၊ တိုးတက်မှုများ ရရှိနိုင်စေရန်အတွက် ပုဂ္ဂလိက ကဏ္ဍဖွံ့ဖြိုးတိုးတက်ရေးကော်မတီ၏ လမ်းညွှန်မှုနှင့်အညီ ဆောင်ရွက်လျက်ရှိပါသည်။ မြန်မာအထူးစီးပွားရေးဇုန်နှင့် ပတ်သက်၍ ကျောက်ဖြူ၊ ထားဝယ်၊ သီလဝါဟူ၍ ဇုန်(၃)ဇုန် တာဝန်ထား ဆောင်ရွက်လျက်ရှိပြီး တောင်သူလယ်သမားများ နည်းပညာ အပြည့်အဝရရှိစေရေး၊ သွင်းအားစုနှင့် ထုတ်လုပ်မှု လုပ်ငန်းဆိုင်ရာများ လွယ်ကူလျင်မြန်စွာ ပံ့ပိုးပေးနိုင်ရေးနှင့် လယ်ယာထုတ်ကုန်များ ရောင်းချရာတွင် သင့်တင့်မျှတသော ဈေးကွက်နှင့် ဈေးနှုန်းရရှိရေးတို့ကို အကောင်အထည် ဖော်ဆောင်ရွက်နိုင်ရန် လယ်ယာထုတ်ကုန်စီမံခန့်ခွဲရေးအဖွဲ့၊ ဆန်စပါးဝယ်ယူရေးကြီးကြပ်မှုလုပ်ငန်းအဖွဲ့၊ ဆန်စပါးဈေးကွက်နှင့် ဈေးနှုန်းဆိုင်ရာ သုံးသပ်အကြံပြု တင်ပြရေးလုပ်ငန်းကော်မတီများ ဖွဲ့စည်းဆောင်ရွက်လျက်ရှိပါသည်။ တိုင်းဒေသကြီး/ ပြည်နယ်များတွင် အချိုးကျမျှတစွာ ဖွံ့ဖြိုးတိုးတက်ရေး မူဝါဒဖြင့် ကာလတို/ ကာလရှည် လုပ်ငန်းစီမံကိန်းများ၊ အမျိုးသား ဘက်စုံဖွံ့ဖြိုးတိုးတက်မှု စီမံကိန်း၊ ဒေသန္တရဘက်စုံဖွံ့ဖြိုးတိုးတက်မှု စီမံကိန်းများကို ရေးဆွဲဆောင်ရွက်လျက်ရှိပါသည်။ ပြည်တွင်းကုန်သွယ်ရေးဖွံ့ဖြိုးမှုအတွက် နိုင်ငံတော်၏ စီးပွားရေးမူဝါဒများ၊ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း(MSDP)လုပ်ငန်းစဉ်များနှင့် အညီ စနစ်တကျ ထိရောက်စွာ အကောင်အထည်ဖော်ဆောင်ရွက်နိုင်ရန်နှင့် ကုန်သွယ်မှု ကဏ္ဍစဉ် ဆက်မပြတ်ဖွံ့ဖြိုးတိုးတက်ရန် ဆောင်ရွက်လျက်ရှိပါသည်။ ပြည်တွင်း အခြေခံစားကုန်၊ ပြည်ပတင်ပို့ သည့် ပဲမျိုးစုံ၊ နှမ်းနှင့် အစေ့ထုတ်ပြောင်းဈေးနှုန်း/ ဈေးကွက်များ၊ ကုန်စည် ဒိုင်များသို့ ကွင်းဆင်း၍ စာရင်းကောက်ယူစိစစ်ပြုစု၍ နိုင်ငံတော်အကြီးအကဲများထံ တင်ပြခြင်း၊ စစ်ရုံးများ၊ မိမိဌာနနှင့် လုပ်ငန်းဆက်စပ်မှုရှိသည့် ဝန်ကြီးဌာနများသို့ ပေးပို့ဆောင်ရွက်လျက်ရှိပါသည်။ ပြည်သူလူထု၏ လူမှုစီးပွားရေး ဘဝမြှင့်တင်နိုင်ရန် ကြိုးပမ်းဆောင်ရွက်လျက်ရှိပြီး လက်ရှိအခြေအနေနှင့် ကိုက်ညီ သည့်အခွင့်အလမ်းများ၊ နည်းလမ်းသစ်များကို ရှာဖွေဖော်ထုတ်နိုင်ရန်၊ လူမှုစီးပွားရေးကို အကျိုး ပြုမည့် သတင်းအချက်အလက်နှင့် စီးပွားရေး အခြေအနေများကို Website များတွင် ဖော်ပြနိုင်ရန်၊ တစ်ရွာထုတ်ကုန်တစ်မျိုးထွက်ကုန်များကို လေ့လာပြုစု၍ ရှေ့အလားအလာကောင်း ရှိနိုင်သော စီးပွားရေးဆိုင်ရာ အခြေအနေများ၊ အချက်အလက်များကို ပြည်သူများထံ သတင်းပေး ဆောင်ရွက် ရှိပါသည်။ ထို့အပြင် စားသုံးသူရေးရာဦးစီးဌာန၏ www.doca.gov.mm Website ကို ၂၀၁၈ ခုနှစ် မတ်လ ၁၅ ရက်နေ့တွင် စတင်လွှင့်တင်ခဲ့ပြီး ဌာန၏အကြောင်း၊ မြန်မာနိုင်ငံစားသုံးသူကာကွယ်ရေးကော်မရှင်၊ စားသုံးသူများ၊ လုပ်ငန်းရှင်များ၊ ပြည်တွင်းကုန်သွယ်မှုဖွံ့ဖြိုးရေး၊ သတင်းနှင့် လှုပ်ရှားမှုများ၊ ကုန်ပစ္စည်းသတိပေးချက်များစသည့် ကဏ္ဍ(၇)ချက်အပြင် စားသုံးသူရေးရာဦးစီးဌာနသို့ တိုင်ကြားရန်(Complaint System) တို့ဖြင့် စားသုံးသူပြည်သူများ၏ နစ်နာဆုံးရှုံးမှုများကို ဖြေရှင်းဆောင်ရွက်ပေးလျက်ရှိရာ နိုင်ငံ့အကျိုးကို တစ်ထောင့်တစ်နေရာမှ အားပေးကူညီ အကောင် အထည်ဖော်ဆောင်ရွက်လျက်ရှိပါကြောင်း တင်ပြလိုက်ရပါသည်။

DOCA(ရန်ကုန်)