ပြည်တွင်းကုန်သွယ်မှုသတင်း

            မန္တလေးတိုင်းဒေသကြီး ၊ ကျောက်ဆည်ခရိုင်သည် စပါး၊ ပဲမျိုးစုံနှင့်ဆီထွက်သီးနှံများအား အဓိကထားစိုက်ပျိုးလျှက်ရှိရာ ကျောက်ဆည်ခရိုင်အတွင်းရှိ မြို့နယ်များအနက်မှ စဉ့်ကိုင်မြို့နယ် သည်ဆီထွက်သီးနှံတစ်မျိုးဖြစ်သော (မိုးကြို)နေကြာကိုလည်း အဓိကအားထား စိုက်ပျိုးကြပါသည်။ စဉ့်ကိုင်မြို့နယ်တွင် (မိုးကြို)နေကြာစိုက်ဧကမှာ ၂၀၂၂-၂၀၂၃ ဘဏ္ဍာနှစ်တွင်(၁၁၉၉)ဧက စိုက်ပျိုး နိုင်ခဲ့ပြီး နေကြာစိုက်ပျိုးမှုအနေဖြင့် ဧပြီလနှင့်မေလများတွင်စိုက်ပျိုးကြပြီး (မိုးကြို)နေကြာတစ်ဧက လျှင်မျိုးစေ့မှာ(၄-၅)ပြည်ခန့်ကုန်ကျကြောင်း၊မျိုးစေ့စျေးနှုန်းအနေဖြင့်တစ်ပြည်လျှင်(၆၀၀၀/-)ကျပ် စျေးနှုန်းပေးရကြောင်း၊နေကြာစိုက်တောင်သူများသည်မျိုးအနေဖြင့် အထွက်နှုန်းကောင်းမျိုး များဖြစ် သည့်ရေဆင်းစပ်မျိုးနေကြာ ၊ ဆင်းရွှေကြာ(၂)(၃)မျိုးများကိုသာအဓိကထား အများဆုံး စိုက်ပျိုးကြ  ကြောင်း၊၄င်းမျိုးများစိုက်ပျိုးရာတွင် ထုတ်လုပ်မှုစရိတ်နည်းပါးခြင်း၊ အပျက်အစီးနည်းခြင်း၊ အထွက် နှုန်းကောင်းမွန်ခြင်းတို့ကြောင့် တစ်ဧကကုန်ကျစရိတ်အနေဖြင့် သွင်းအားစု၊ လုပ်သားခ၊မျိုး၊ စုစုပေါင်း (၂၅၀၀၀၀/-)ကျပ်ကုန်ကျကြောင်း ၊ (မိုးကြို)နေကြာကို ဇွန်လကုန်မှစတင်၍ ရိတ်သိမ်း လျှက်ရှိရာ (၃၆၂)ဧကရိတ်သိမ်းပြီးဖြစ်ကြောင်း၊ တစ်ဧက အထွက်နှုန်းအနေဖြင့်(၃၆)တင်းခန့် ထွက်ရှိပြီး နေကြာ စျေးနှုန်းအနေဖြင့် ယခင်နှစ်တွင်တစ်တင်းလျှင်(၁၄၀၀၀/-)ကျပ်၊ယခုနှစ်တွင် တစ်တင်းလျှင်(၂၃၀၀၀) ကျပ်စျေးနှုန်းဖြစ်၍ ယခင်နှစ်နှင့်နှိုင်းယှဉ်လျှင် စျေးနှုန်းမြင့်တက်လျှက်ရှိကြောင်း ၊ တောင်သူများအနေဖြင့်နေကြာဆီကြိတ်ပြီးရောင်းချလျှင်နေကြာတစ်တင်းလျှင်ဆီ        (၃-၄)ပိဿာခန့်ထွက်ရှိကြောင်း၊ နေကြာဆီစျေးနှုန်းအနေဖြင့် (၁)ပိဿာလျှင်(၉၀၀၀/-)ကျပ်ရှိပြီး နေကြာဖတ်(၁)ပိဿာလျှင်(၁၃၀၀-၁၅၀၀)ကျပ်စျေးနှုန်းများဖြင့်ရောင်းချရကြောင်း ၊ တောင်သူများအနေဖြင့် ဆီထွက်နေကြာဖြစ်သော (မိုးကြို)နေကြာစိုက်ပျိုးခြင်းဖြင့် ပြည်တွင်းစားသုံးဆီဖူလုံရေး အတွက် အထောက်အကူပြုနိုင်သည့် သီးနှံဖြစ်ပြီးနေကြာဆီစားသုံးခြင်းဖြင့်လည်း ကျန်းမာရေးအတွက်ကောင်းမွန်သောကြောင့် တောင်သူများအကျိုးအမြတ်ရရှိသောသီးနှံဖြစ်သော (မိုးကြို) နေကြာ ကို တိုးချဲ့စိုက်ပျိုးသင့်ပါကြောင်းရေးသား တင်ပြလိုက်ပါသည်။

DOCA(မန္တလေး)

          ပြည်ပဲဈေးကွက်အတွင်း လက်လီ/လက်ကား ပဲမျိုးစုံရောင်းဝယ်လျှက်ရှိရာ ပြည်ပဝယ်လက်ပဲများ ဈေးကောင်းရသလို ပြည်တွင်းလက်လီ/လက်ကားရောင်းဝယ်မှုဖြစ်တဲ့ ပဲသီးနှံများကလည်း ဈေးကောင်းရနေခဲ့ပါသည်။ ပြည်ဈေးကွက်၌ လက်လီရောင်းဝယ်နေသော ပဲသီးနှံထဲတွင် စားတော်ပဲ သီးနှံဟာဆိုလျှင် တစ်တင်း ၁သိန်းကျပ်ဖြင့် ဈေးအမြင့်ဆုံးရောင်းဝယ်လျှက်ရှိခဲ့ပါသည်။ နှစ်စဉ်လိုလို စားတော်ပဲသီးနှံဈေးကောင်းရခဲ့သော်လည်း ယခင်နှစ်က တစ်တင်း ၅သောင်းကျပ်သာ ရခဲ့၍ ယခုနှစ် ဈေးမှာဖြင့် ယခင်နှစ်ဈေးထက် တစ်ဆထပ်မြင့်တက်ခဲ့ပါသည်။ စားတော်ပဲ သီးနှံအနေဖြင့် ပဲဈေးကွက်သို့ နေ့စဉ်ဝင်ရောက်မှု မရသော်လည်း  လှောင်ပဲများရှိသောကြောင့် လက်လီအဝယ်သမားရှိမှုအပေါ် အိတ် ၂၀ကျော် ရောင်းချခဲ့ကြရကြောင်း သိရှိရပါသည်။

DOCA(ပဲခူး)

             မန္တလေးတိုင်းဒေသကြီး ၊ ကျောက်ဆည်ခရိုင်၊ စားသုံးသူရေးရာဦးစီးဌာနမှ ဝန်ထမ်းများသည် တံတားဦးမြို့နယ်၊ စကားအင်းကျေးရွာ၌ အသားတိုးဝက်မွေးမြူရေးလုပ်ငန်းအား လုပ်ကိုင်ဆောင်ရွက်နေသော မွေးမြူရေးဝက်ခြံပိုင်ရှင်နှင့်တွေ့ဆုံ၍ အသားတိုးဝက်မွေးမြူခြင်းဖြင့် ကျေးလက်ဒေသနေပြည်သူများ ပုံမှန်ဝင်ငွေရရှိနေမှုနှင့်ပတ်သက်၍ ကွင်းဆင်းလေ့လာခဲ့ပါသည်။

          တံတားဦးမြို့နယ်၊စကားအင်းကျေးရွာတွင် အသားတိုးဝက်မွေးမြူရေးလုပ်ငန်းကို ယခင်(၂) နှစ်ခန့်မှစတင်မွေးမြူခဲ့ရာ လက်ရှိအချိန်တွင် (၃)နှစ်တာကာလအတွင်း ရောက်ရှိပြီးဖြစ်ကြောင်း၊ ဝက်များအားမွေးမြူရာတွင် ဝက်ခြံများကို ကွန်ကရစ်အခင်းများဖြင့် သန့်ရှင်းသပ်ရပ်စွာ မွေးမြူ ဆောင်ရွက်ထားကြောင်း၊ ဝက်ခြံတစ်ခြံလျှင် ဝက်ကောင်ရေ(၁၀-၁၅)ကောင်အထိ တစ်ပိုင်တစ်နိုင် မွေးမြူထားရှိပြီး ဝက်စာကျွေးခွက်များကိုလည်း ကွန်ကရစ်ဖြင့်ပြုလုပ်ထားပြီး အစာကျွေးခွက်တစ်ခုလျှင် (၅)ကောင်ကျွေးနိုင်ကြောင်း၊အသားတိုးဝက်မွေးမြူရာတွင် မိခင်နို့ခွဲကာစ(၁)လခွဲမှစတင်ဝယ်ယူ ပြီးမွေးမြူရကြောင်း၊ (၁)လခွဲသားဝက်ပေါက်တစ်ကောင်လျှင် (၈၀၀၀၀-၈၅၀၀၀)ကျပ် ဝန်းကျင်ခန့် ဝယ်ယူရပါသည်။ စတင်မွေးမြူရာတွင် (CP-950)အငယ်စာ နှင့်ဖွဲနုရော၍ ကျွေးရကြောင်း၊ ဝက် တစ်ကောင်လျှင်(CP-950)နို့ဆီဗူးတစ်ဝက်နှင့်ဖွဲနု(၃)ဗူးရောပြီး အခြောက်ကျွေးရကြောင်း ၊ နေ့စဉ် ရေ(၂)ကြိမ်ချိုးပေးရပြီး ပုံမှန်ကျွေး၍မွေးမြူလာပြီးနောက် (၂)လခွဲသား ရောက်သည့်အခါ အကြီးစာကျွေးရပါသည်။အကြီးစာကျွေးသည့်အခါ (CP-7512)နှင့် ဖွဲ့နုရောပြီး အခြောက်ကျွေးရပြီးလိုအပ်လျှင် (၁)လတစ်ကြိမ်ဆေးထိုးပေးရပြီး (၄)လပြည့်သောအခါ ရောင်းတန်းဝင် ဝက်တစ်ကောင်သို့ ရောက်ရှိပြီး အရောင်းအဝယ်ပြုလုပ်ကြပါသည်။ (၄)လပြည့်ပြီး ဝက်တစ်ကောင်လျှင်(၄၀၀၀၀၀- ၄၅၀၀၀၀)ကျပ်စျေးနှုန်းများဖြင့် အရောင်းအဝယ်ဖြစ်ပြီး ဝက်တစ်ကောင်လျှင် အစာဘိုးနှင့်ကျွေးမွေးစရိတ်နှုတ်ပြီး ဝက်တစ်ကောင်အကျိုးအမြတ်မှာ(၂၀၀၀၀၀-၃၀၀၀၀၀)ကျပ်နီးပါး အကျိုးအမြတ်ရရှိမည်ဖြစ်ပါသောကြောင့် ကျေးလက်နေ ပြည်သူများအနေဖြင့် အသားတိုးဝက်မွေးမြူရေးလုပ်ငန်းများကို တစ်ပိုင်တစ်နိုင်စီးပွားဖြစ် မွေးမြူသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

        ပြည်ဈေးကွက်တွင် ဩဂုတ်လဒုတိယပတ်တွင် နှမ်းနီဈေးများ ဆက်လက်မြင့်တက်လာခဲ့ပြီး နှမ်းနက်နှင့်စမုံနက်နှမ်းမှာ ဇူလိုင်လနောက်ဆုံးပတ်ထက်စာရင် ဈေးကျလာခဲ့ပါသည်။ ပြည်ဈေး ကွက်သို့ ပန်းတောင်းဘက်မှ နွေနှမ်းများအဝင်ရှိသလို ရွှေတောင်ဘက်မှလည်း မိုးနှမ်းများနေ့စဉ် ဝင်ရောက်လျှက်ရှိပါသည်။ ဆီစက်လုပ်ငန်းရှင်များက နှမ်းနီကိုအဝယ်ရှိသဖြင့် နှမ်းနီဈေးမြင့် တက်လာသည်ဟု သိရပါသည်။ နှမ်းနက်နှင့် စမုံနက်နှမ်းကို မန္တလေး၊ အောင်လံနှင့် ရှမ်းပြည်နယ် လားရှိုးဘက်မှ အဝယ်ရှိသဖြင့် တစ်နေ့လျှင် အိတ် ၁၀၀/၁၅၀ ခန့် အရောင်းအဝယ် ဖြစ်နေသော်လည်း  ဈေးကျလာသည်ကို တွေ့ရှိရပါသည်။ ယခုဩဂုတ်လ ဒုတိယပတ်တွင် နှမ်းနီ(၃)တင်းတစ်အိတ်လျှင် ၁၉၅၀၀၀ကျပ်၊ နှမ်းနက် (၃)တင်းတစ်အိတ်လျှင် ၂၀၀၀၀၀ကျပ်နှင့် စမုံနက်နှမ်း(၃)တင်း တစ်အိတ်လျှင် ၂၂၀၀၀၀ကျပ်ဖြင့် အရောင်းအဝယ်ဖြစ်လျှက်ရှိပါသည်။

DOCA(ပဲခူး)

        ပဲခူးတိုင်းဒေသကြီး၊ ပြည်ခရိုင် ၊ ရွှေတောင်မြို့နယ် ဝါးတောအုပ်စု၊ ဖားအိုင့်ကျေးရွာတွင် မိုးနှမ်းများစတင်ထွက်ပေါ်နေပြီဖြစ်သဖြင့် စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံနှင့် ဝန်ထမ်းများသည် (၁၁.၈.၂၀၂၂)နေ့ နံနက်ပိုင်းတွင် သွားရောက်၍ မိုးနှမ်းများစိုက်ပျိုးထွက်ရှိမှုနှင့် ဈေးနှုန်းဈေးကွက်အခြေများအား သိရှိနိုင်ပါရန် ကွင်းဆင်းလေ့လာခဲ့ပါသည်။

         ရွှေတောင်မြို့နယ်တွင် ယခုနှစ် မိုးနှမ်းစိုက်ဧကမှာ (၂၅၈၉) ဧကရှိပြီး ဝါးတောအုပ်စုတွင် (၁၇)ဧက စိုက်ပျိုးထားကြောင်း သိရှိရပါသည်။ ရွှေတောင်မြို့နယ်၊ ဝါးတောအုပ်စု၊ ဖားအိုင့်ကျေးရွာရှိ မိုးနှမ်းစိုက်ပျိုးသူ တောင်သူ ဦးနေဝင်းနှင့် တွေ့ဆုံ၍ မေးမြန်းရာ နှမ်းနက် (၂)ဧကကို မေလဆန်းတွင် စတင်စိုက်ပျိုးပြီး ဇူလိုင်လကုန်တွင် စတင်ထွက်ရှိပါသည်။ မိုးနှမ်းစိုက်ပျိုး ထုတ်လုပ် ကုန်ကျစရိတ်အနေဖြင့် (၁၈၀၀၀၀)ကျပ်ခန့်ကုန်ကျ၍ တစ်ဧကအထွက်နှုန်းမှာ (၈)တင်း နှုန်းထွက်ရှိသည်ဟု သိရပါသည်။ နှမ်းနက်ဈေးမှာ သန့်ရင်သန့်သလို ဈေးရ၍ ယခုလက်ရှိ ပေါက်ဈေးမှာ တစ်တင်းလျှင် (၇၀၀၀၀)ကျပ်ခန့်ရရှိပါသည်။ တစ်ဧအကျိုးအမြတ်အနေဖြင့် ၃၈၀၀၀၀ကျပ်ခန့် အမြတ်ရှိ၍ (၂)ဧကစိုက်ပျိုးထားသဖြင့် ၇၆၀၀၀၀ကျပ် ရရှိသည်ဟုသိရပါသည်။ ယခင်နှစ်တွင် တစ်ဧကကုန်ကျစရိတ်မှာ (၁၆၀၀၀၀)ကျပ်ခန့်ကုန်ကျပြီး တစ်ဧကအထွက်မှာလည်း (၈)တင်းခန့်ထွက်ရှိ၍ တစ်ဧကအကျိုးအမြတ်မှာ ၂၄၀၀၀၀ကျပ်ခန့် ရရှိသဖြင့် ယခုနှစ်တွင် နှမ်းဈေးများ ကောင်းလာသောကြောင့် အကျိုးအမြတ်များပိုလာသည်ဟုသိရှိရပါသည်။

         မိုးနှမ်းစိုက်တောင်သူများအနေဖြင့် နှမ်းစိုက်ပျိုးရာတွင် ကုန်ကျစရိတ်သက်သာ၍ စိုက်ပျိုးရ လွယ်ကူပြီး အကျိုးအမြတ်လည်းရှိသည့်အတွက်ကြောင့် နောက်လာမည့်နှစ်များတွင် တိုးချဲ့စိုက်ပျိုးသွားမည်ဖြစ်ကြောင်း လေ့လာသိရှိရပါသည်။

DOCA(ပဲခူး)