ပြည်တွင်းကုန်သွယ်မှုသတင်း

           ရှမ်းပြည်နယ်(တောင်ပိုင်း) ဟိုပုံးမြို့နယ်နှင့် တောင်ကြီးမြို့နယ်များရှိ ကျေးရွာများတွင် စတော်ဘယ်ရီခြံများမှ စတော်ဘယ်ရီသီးများ စတင်ထွက်ရှိနေပြီး ဈေးကောင်းရနေတယ် လို့သိရပါတယ်။

          စိုက်ပျိုးထွက်ရှိတဲ့ စတော်ဘယ်ရီသီးများကို တောင်ကြီး၊ ဟိုပုံး၊ အေးသာယာ၊ ရွှေညောင်မြို့များမှတစ်ဆင့် ပြည်တွင်းမြို့များ အသီးသီးသို့ တင်ပို့ရောင်းချလျက်ရှိပြီး အရွယ်အစားပေါ်မူတည်၍ ဒေသသီး၊ ထိုင်ဝမ်သီး၊ ယိုးဒယားသီး တစ်ခြင်းကို ငွေကျပ် ၄၀၀၀ မှ ၅၀၀၀ ကျပ် အထိရောင်းချ၍ ဝင်ငွေကောင်းကာ အဆင်ပြေနေတယ်လို့ စ‌တော်ဘယ်ရီစိုက် တောင်သူများထံက တစ်ဆင့်သိရပါတယ်။

တောင်ကြီးခရိုင်
စားသုံးသူရေးရာဦးစီးဌာန

တောင်ကြီးစျေးကွက်အတွင်း ပြောင်းအဝင်ရှိသလောက် အထွက်များ

           ရှမ်းပြည်နယ် (တောင်ပိုင်း) တောင်ကြီးစျေးကွက်တွင် အစေ့ထုတ်ပြောင်းတွေကတော့ ပိုမိုဝင်ရောက်လာပါတယ်။ မိုးရွာသွန်းမှုကလည်းအတော်နည်းသွားတာဖြစ်တဲ့အတွက် ပြောင်းအဖူးချိုးမှုတွေ မြို့နယ်တိုင်းလိုလိုမှာ ပြုလုပ်နေကြပါတယ်။ လုပ်သားခနေ့တွက်မှာ တစ်ယောက်ကို ၄၀၀၀ ကျပ် ပေးရပါတယ်။ မိုးလင်းလာတာ နဲ့အမျှ နေလှန်းပြောင်းအခြောက်တွေလည်း ဝင်ရောက်လာပြီး လုပ်ငန်းပူတဲ့သူတွေကတော့ တောင်လေးလုံးရှိ မြနဒီနဲ့ ပြောင်းအခြောက်ခံစက်နှင့် မြို့နယ်အတွင်းရှိ ပြောင်းအခြောက်ခံစက်ငယ်တွေမှာ လှော်နေကြဆဲဖြစ်ပါတယ်။ အခြောက်ခံစက်မှာ ပြောင်းလှော်ခနှုန်းတွေကတော့ တစ်ပေါင်း (ပြောင်းတစ်တင်းခွဲဝင် ၇၀-၈၀အိတ်) ကို ၁၅၀၀၀ ကျပ် ပေးရတယ်လို့ဆိုပါတယ်။ အစိုဒီဂရီနှင့် အရည်အသွေးပေါ်မူတည်ပြီး ပြောင်းအစိုတစ်ပိဿာ ၃၀၀-၃၂၀ ကျပ် စျေးအသီးသီးရှိပြီ၊ အခြောက်တစ်ပိဿာ ၄၅၀-၄၇၀ ကျပ်စျေး အသီးသီးရှိတယ်လို့ ဆိုပါတယ်။ ပြောင်းတစ်ဧကအထွက်နှုန်းကတော့ မြေအမျိုးအစားအလိုက် တင်း ၅၀ မှ ၈၀ အထိ ရှိတယ်လို့ သိရပါတယ်။ စျေးကွက်မှာ တစ်ပတ်အတွင်း အရောင်းအဝယ်ဖြစ်မှုကတော့ တင်း (၃၀၀၀၀) ခန့် အရောင်းအဝယ်ဖြစ်တယ်လို့ သိရပါတယ်။ စျေးကွက်ကဝယ်ယူရရှိတဲ့ ပြောင်းတွေကိုတော့ ရန်ကုန်၊ မန္တလေး ဝယ်လက်များသို့ တင်ပို့နေကြတယ်လို့ သိရပါတယ်။ နောက်သီတင်းပတ်မှာတော့ အရောင်းအဝယ် ပိုဖြစ်လာမယ်လို့ ပြောင်းစျေးကွက်က သတင်းရရှိပါသည်။

(စောမောင်)

တောင်ကြီး

စစ်ကိုင်းတိုင်းဒေသကြီးအတွင်း ကြက်သွန်နီစိုက်ပျိုးမှုနှင့် စျေးကွက်အခြေအနေ

          ကြက်သွန်နီသည် နေ့စဉ်စားသုံးသောအစားအစာတို့တွင် မပါမပြီးအလွန်အရေးပါသော စားဖိုဆောင်သီးနှံတစ်မျိုးဖြစ်ပါသည်။ ဟင်းလျာများကိုအနံ့အရသာကောင်းမွန်စေရုံမျှမကစားသုံးသူတို့၏ကျန်းမာရေးကိုလည်းအထောက်အကူဖြစ်စေပါသည်။ မြန်မာနိုင်ငံတွင် ကြက်သွန်နီကိုနှစ်စဉ်စိုက်ဧက (၁.၈)သိန်း ကျော် ရှိကြောင်းသိရှိရပြီးမန္တလေး၊ မကွေး၊ စစ်ကိုင်းတိုင်းတို့တွင် အများဆုံးစိုက်ပျိုးကြောင်းသိရှိရသည်။ စစ်ကိုင်းတိုင်းဒေသကြီးတွင် ကြက်သွန်နီ(မိုး) စိုက်ဧက(၂၄၀၀)ကျော်၊ ဆောင်းစိုက်ဧက (၃၅၀၀၀)ကျော် နှစ်စဉ်စိုက်ပျိုးထုတ်လုပ်လျှက်ရှိပြီးထွက်ရှိမှုမှာပိဿာ သိန်း(၁၅၀၀)ကျော်ခန့် ထွက်ရှိ ပါသည်။ မျိုး၊ အလေအလွင့်၊ စားသုံးမှုနုတ်ပါကနှစ်စဉ်ပိုလျှံမှုပိဿာသိန်း(၉၀၀)ခန့်ရှိပါသည်။တစ်ဧကစိုက်ပျိုးထုတ်လုပ်မှုကုန်ကျစရိတ်မှာ (မိုး)တစ်ဧက(၈)သိန်းခန့်၊ ဆောင်း တစ်ဧက (၁၇)သိန်းခန့် ကုန်ကျပြီးမိုးထွက်ရှိမှုမှာတစ်ဧကပိဿာ(၂၅၀၀)ခန့် ဆောင်းစိုက် တစ်ဧက အထွက် ပိဿာ(၄၅၀၀)မှ (၅၀၀၀)ခန့် ထွက်ရှိကြောင်းသိရပါသည်။ကြက်သွန်နီစိုက်ပျိုးသည့် မျိုးများမှာ မြေနဲမျိုး၊ ရွှေဖလားထိပ်မောက်၊ မြင်းခြံမျိုးများကို အများဆုံး စိုက်ပျိုးကြောင်း သိရှိရပါသည်။

          စစ်ကိုင်းတိုင်းဒေသကြီးမှထွက်ရှိသော ကြက်သွန်နီများမှာ ဒေသတွင်းစျေးကွက်အနေဖြင့် ချင်းတွင်းမြစ်ကြောင်းတစ်လျှောက် ဟုမ္မလင်း၊ ခန္တီး၊ ကချင်ပြည်နယ်နှင့် ရန်ကုန်၊ မန္တလေးစျေးကွက်များသို့ အများဆုံးတင်ပို့ကြောင်း သိရှိရပါသည်။ စီးထွက်မှုအခြေအနေမှာမုံရွာခရိုင်မှ ထွက်ရှိသော ကြက်သွန်နီ များမှာ မုံရွာစျေးကွက်ရှိကြက်သွန်နီပွဲရုံများသို့ ဝင်ရောက်ပြီးမုံရွာပွဲရုံများမှတစ်ဆင့် ဝယ်လိုအားရှိသော မန္တလေး၊ ရန်ကုန်၊ လားရှိုး၊ ပခုက္ကူ၊ မြင်းခြံ၊ မြစ်ကြီးနား၊ ခန္တီးတို့သို့ နေ့စဉ် ပိဿာ(၂၅၀၀၀ မှ ၃၀၀၀၀) တစ်လတန်(၇.၅သိန်းမှ ၈သိန်း)ခန့် ပုံမှန်တင်ပို့လျက် ရှိကြောင်း လေ့လာသိရှိရပါသည်။

          ၂၀၁၇-၂၀၁၈ ခုနှစ် ထွက်ရှိသည့် ကြက်သွန်နီများ၏ စျေးကွက်လက်ကျန်အခြေအနေမှာ (ခန့်မှန်း)၃၀ရာခိုင်နှုန်းခန့် ကျန်ရှိနေသေးကြောင်းလေ့လာသိရှိရပါသည်။ ပိဿာအားဖြင့် သိန်း(၂၅၀)ခန့် ကျန်ရှိနေသေးကြောင်း ပွဲရုံ၊ ကုန်သည်၊ ကြက်သွန်စိုက်တောင်သူများထံမှ လေ့လာသိရှိရပါသည်။ ကာလတူကာလထက် လက်ကျန်အနည်းငယ် လျော့နည်းကြောင်း သုံးသပ်တွေ့ရှိရပါသည်။ ယခုနှစ်စျေးနှုန်းများမှာလည်း တစ်ပိဿာလျှင် ကျပ် (၁၂၀၀ိ/ မှ ၁၄၀၀ိ/) ရှိနေပြီး စျေးနှုန်းအခြေအနေမှာ ယခင်နှစ် တစ်ပိဿာကျပ် (၂၀၀၀ိ/) ထက် လျော့နည်းနေသေးကြောင်း သုံးသပ်ရပါသည်။ ယခင်နှစ်ကထက် စျေးမျှော်လင့်ချက်ဖြင့် ကြက်သွန်နီများစျေးထိန်းရောင်းချမှုကြောင့် ပြည်တွင်းစျေး (၂၅၀၀ိ/) ကျပ်ခန့် လပိုင်းမျှအမြင့်စျေးဖြစ်ပေါ်ခဲ့ကြောင်းသုံးသပ်တွေ့ရှိရပါသည်။

          စျေးကွက်သဘောအရကုန်ပစ္စည်းများသည် နိမ့်ရာမှမြင့်ရာသို့ စီးဆင်းလေ့ရှိသဖြင့် တရုတ် ကြက်သွန်နီများမုံရွာအရောက်စျေးမှာ တစ်ပိဿာ လျှင် ကျပ်(၈၅၀ိ/) ဖြင့် နေ့စဉ်ပိဿာ (၅၀၀၀၀)ခန့် ဝင်ရောက်ခဲ့ကြောင်းဖြစ်စဉ်များရှိသဖြင့် ပြည်ပကြက်သွန်နီများ စျေးကွက်မဝင်ရောက်မီ မိုးကြက်သွန်နီ များများစိုက်၍ သင့်တင့်မျှတသောစျေး (တောင်သူတွက်ခြေကိုက်) ဖြင့် စိုက်ပျိုးမှု၊ ရောင်းချမှု သင့်တင့်မျှတသောစျေးကွက်ကိုဖော်ဆောင်ကြပါလို့ တိုက်တွန်းရေးသားလိုက်ရပါသည်။

ဒေါ်ဝေဝေ

မုံရွာမြို့

          အောင်ပန်းစျေးကွက်မှာတော့ ချင်းသစ်တွေစတင်ဝင်လာပါပြီ၊ စက်တင်ဘာလ လဆန်းမှာ မိုးများပြီး အပင်သေ (သို့မဟုတ်) သိပ်ပုပ်တဲ့အပင်တွေက မဖော်မဖြစ်ဖော်ရတာကြောင့် စျေးကွက်မှာဝင်လာတဲ့ ချင်းသစ်တွေက အနုတွေသာများတယ်လို့လည်း သိရပါတယ်။ အခုအပတ်မှာတော့ ချင်းတက်သစ်တွေက ရင့်လာပြီ ဖြစ်တာကြောင့် ဖော်ရတာလို့ သိရပါတယ်။ ချင်း(စို)အသစ်က ချင်း(ဥမ)ထက် အထားခံတာကြောင့် လှော်လက်တွေကရော ကုန်သည်တွေကပါပိုပြီး သဘောကျနှစ်ခြိုက်ကြတယ်လို့ သိရပါတယ်။ ချင်းတက်က တစ်နှစ်ပတ်လုံးအရောင်းအဝယ်ဖြစ်တဲ့ သီးနှံဖြစ်တာကြောင့် ချင်း(ဥမ) လို ခပ်မြန်မြန် မရောင်းရင်လည်းရတယ်လို့ သိရပါတယ်။

          ဒီတပတ် အောင်ပန်းစျေးကွက်မှာ ချင်းသစ်က တစ်ပိဿ(၅၀၀ိ/-) ပေါက်စျေးရှိပြီး၊ ချင်း(ဥမ) က တစ်ပိဿ (၁၀၀၀ိ/-) စျေးရှိပါတယ်။ ချင်းစိုစျေးကောင်းတဲ့အချိန်ကစပြီး ချင်းခြောက်ကိုလည်း သိပ်ပြီးမလုပ်ဖြစ်ကြာတာကြောင့် ချင်းခြောက်လက်ကျန်နည်းနေပြီး အရောင်းအဝယ်အေးနေတယ်လို့ သိရပါတယ်။ တစ်ပတ်အတွင်း ချင်း(စို) ပိဿချိန်ပေါင်း (၁.၈) သိန်း ပိဿ အရောင်းအဝယ်ဖြစ်ခဲ့သလို ချင်းခြောက်ကလည်း တစ်ပိဿကို ၉၀၀ိ/- ၊ ၁၀၀၀ိ/- စျေးနဲ့ ပိဿချိန်ပေါင်း (၉.၃) သိန်း ပိဿ အရောင်းအဝယ်ဖြစ်ခဲ့တယ်လို့ သိရှိရပါတယ်။

၂၀၁၈ခုနှစ်၊ စက်တင်ဘာလ (၂၈)ရက်

ဧဧခိုင်(တောင်ကြီး)

          ရှမ်းနနွင်းကတော့ ပုံမှန်အရောင်းအဝယ်ဖြစ်နေပါတယ်၊ ဝယ်လက်တွေကတော့ ချင်း (စို) နှင့်အတူ နနွင်းကိုလည်း အနည်းအကျဉ်းဝယ်နေလို့ စျေးကွက်မှာတော့ ပုံမှန်အရောင်းအဝယ် ဖြစ်နေတယ်လို့ သိရပါတယ်။ ပြည်ပကို ပင်လယ်ရေကြောင်းကနေတဆင့်သွားနေသလို နယ်စပ်စခန်းတွေကလည်း သွားနေတယ်လို့ သိရပါတယ်။ဒီနှစ် နနွင်းအရောင်းအဝယ်က အရင်နှစ်တွေလောက် မသွက်ဘူးလို့လည်းသိရပါတယ်။ နနွင်းလက်ကျန်တွေ အတော်ရှိနေပြီး နောက်ရာသီချိန်အထိ ရှိနေနိုင်သေးတယ်လို့ ခန်းမှန်းကြပါတယ်။ ဒီအပတ် အောင်ပန်းစျေးကွက်မှာတော့ နနွင်းတစ်ပိဿစျေးမှာ အနိမ့်ဆုံး ၈၀၀ိ/- မှ အမြင့်ဆုံး ၂၀၀၀ိ/-စျေးရှိပြီး ဟိုပုံးစျေးကွက်မှာတော့ အနိမ့်ဆုံး ၁၀၀၀ိ/- မှ အမြင့်ဆုံး ၁၈၀၀ိ/- စျေးရှိပါတယ်။

ဧဧခိုင်(တောင်ကြီး)