ပြည်တွင်းကုန်သွယ်မှုသတင်း

            မန္တလေးတိုင်းဒေသကြီး၊ဝမ်းတွင်းမြို့နယ်တွင် လျှော်ဖြူ (ခေါ်) ဆေးကုလားမစိုက်ဧကစုစုပေါင်း (၂၄၁၉) ဧက စိုက်ပျိုးထားရှိပြီး ရိုးစုံကျေးရွာတွင် သစ်တောဦးစီးဌာနပိုင်မြေ၌ CF စနစ်ဖြင့် ငှားရမ်း၍ လျှော်ဖြူစိုက်တောင်သူအစုအဖွဲ့ဝင် (၁၂၁) ဦးမှ စိုက်ဧက (၄၈၀) စိုက်ပျိုးထုတ်လုပ်လျက်ရှိပါသည်၊၊ လျှော်ဖြူတစ်ဧကလျှင် ၁၅ ပေခြားဖြင့် (၁၉၄) ပင် ဝင်စိုက်ပျိုးလေ့ရှိသည်။ ၂၀၀၄ ခုနှစ် နိုဝင်ဘာလတွင် စတင်တည်ထောင်စိုက်ပျိုးခဲ့ပြီး ယခုအခါ (၄၈၀) ဧက အားလုံးအစေး ထုတ်ယူနိုင်ပြီဖြစ်ပါသည်။ လျှော်ဖြူပင်သည် နှစ်ရှည်ပင်အမျိုးအစားဖြစ်ပြီး အစေးထုတ်ယူနိုင်သည့် ကာလမှာ ဇူလိုင်လမှ ဖေဖော်ဝါရီလ(၈)လဖြစ်သော်လည်း အစေးအထွက် ကောင်းသည့်ကာလမှာ စက်တင်ဘာလမှ ဒီဇင်ဘာထိ (၄) လဖြစ်ကြောင်းနှင့် အထွက်ကောင်းသည့်ကာလတွင် တစ်ရက်လျှင် တစ်ဧက (၂) ပိဿာမှ (၃) ပိဿာအထိ ထွက်ရှိကြောင်း၊ ကျန် (၄)လတွင် တစ်ရက်လျှင် တစ်ဧက (၂၅) ကျပ်သားမှ ၅၀ ကျပ်သားခန့်သာထွက်ရှိပြီး တစ်နှစ်လျှင် တစ်ဧကပျမ်းမျှ (၂၅၀) ပိဿာခန့်ထွက်ရှိကြောင်း သိရှိရပါသည်။ လျှော်ဖြူစိုက်ပျိုးရာတွင် ကုန်ကျစရိတ်အနေဖြင့် ပထမနှစ်တွင် တစ်ဧက ၅ သိန်းကျပ်၊ ဒုတိယ၊ တတိယ၊ စတုတ္ထ၊ ပဉ္စမနှစ်များတွင် ကျပ် (၃) သိန်းစီဖြင့် စုစုပေါင်းကျပ်(၁၇) သိန်း ကျော်ကုန်ကျခဲ့ကြောင်း၊ ၅နှစ်တာကာလကျော်၍ အပင်များအစေး ထုတ်ယူချိန်တွင် တစ်ဧကအတွက် တစ်နှစ်ပျှမ်းမျှ ကျပ် (၂၀) သိန်းကျော် ကုန်ကျကြောင်းသိရှိရပါသည်။ အကျိုးအမြတ်အနေဖြင့် ယခင်နှစ်များတွင်တစ်ဧကပျမ်း မျှ (၂၅/၃၀) သိန်းခန့် အသားတင်အမြတ် ရရှိခဲ့သော်လည်း ယခုနှစ်တွင် လျှော်ဖြူ ၁ ပိဿာလျှင် ၆၀၀၀ ကျပ်မှ ၆၅၀၀ ကျပ်သာရှိ၍ အကြောင်းအမျိုးမျိုးကြောင့် ကျပ် (၁၀)သိန်းခန့်သာ အကျိုးအမြတ်ရရှိကြောင်း သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒု-ဦးစီးမှူး ဒေါ်မြင့်မြင့်သန်းသည် တိုင်း/ခရိုင်ဦးစီးမှူးတို့၏ လမ်းညွှန်ချက်အရ ပြည်တွင်းကုန်သွယ်မှုနှင့် ပြည်ပပို့ကုန်ကဏ္ဍမြှင့်တင်နိုင်ရေးအတွက် (၆.၂.၂၀၂၂)ရက်နေ့၊  နံနက်(၀၉:၃၀)နာရီအချိန်တွင် ဆိပ်ဖြူမြို့ပေါ်ရှိ ကုန်စည်ဒိုင်အသင်းဝင် ကုန်သည်ပွဲစားလုပ်ငန်းရှင် နှင့်တွေ့ဆုံပြီး ဇန်နဝါရီလအတွင်း ကုန်စည်ဒိုင်တွင် မိုးစိုက်(ဥစိုက်) ကြက်သွန်နီ(အသစ်)များ ဝင်ရောက်လာမှုနှင့် ပြန်လည်ရောင်းချဖြန့်ဖြူးခြင်း၊ ဈေးနှုန်းဈေးကွက်အခြေအနေအား ကွင်းဆင်း လေ့လာမေးမြန်းခဲ့ပါသည်။

                ကုန်စည်ဒိုင်အသင်းဝင်မှ ကြက်သွန်နီကို မြန်မာ နိုင်ငံအလယ်ပိုင်း၊ မကွေးတိုင်း၊ မန္တလေးတိုင်း၊ စစ်ကိုင်းတိုင်းတို့တွင် အဓိကထားပြီး စိုက်ပျိုးကြောင်း ၊ မကွေးတိုင်း၊ ပခုက္ကူခရိုင်တွင် ပခုက္ကူ၊ ပေါက်၊ ရေစကြို၊ ဆိပ်ဖြူမြို့နယ်တို့တွင် စိုက်ပျိုးကြောင်း၊ ဆိပ်ဖြူမြို့နယ်မှ ကြက်သွန်နီကို အဓိကထားစိုက်ပျိုးကြောင်း၊ မိမိတို့ဒေသထွက် ကြက်သွန်နီနှင့် အခြားသီးနှံမျိုးစုံ ရောင်းဝယ်ဖောက်ကားမှုပြုလုပ်ရာတွင် လွယ်ကူစေရန်အတွက် ဆိပ်ဖြူမြို့တွင် ကုန်စည်ဒိုင်ကို(၂၀၁၁)ခုနှစ်၊ စက်တင်ဘာလ(၁၁)ရက်နေ့တွင် အသင်းဝင်(၇၀)ဦးခန့်ဖြင့် ဖွဲ့စည်း ထားကြောင်း၊ ဆိပ်ဖြူကုန်စည်ဒိုင်သည် ရောင်းဝယ်ဖောက်ကားမှုပြုလုပ်ရာတွင် ပြည်တွင်းသာမက ပြည်ပအထိ အရောင်းအဝယ်ပြုလုပ်သော ကုန်စည်ဒိုင်ဖြစ်ကြောင်း၊ ကြက်သွန်နီသီးနှံတစ်မျိုးတည်း သာအရောင်းအဝယ်ဖြစ်ကြောင်း၊ ဆိပ်ဖြူကြက်သွန်နီသည် မြန်မာ့ကြက်သွန်နီဈေးကွက်တွင် ထုတ်ကုန်အရည်အသွေးအနေဖြင့် ဒုတိယအဆင့်တွင်ရှိကြောင်း၊ ဆိပ်ဖြူကြက်သွန်နီဟုဆိုလျှင် စားသုံးသူတိုင်းသိရှိပြီး ဈေးကွက်တွင် အခိုင်အမာရပ်တည်လျက်ရှိကြောင်း သိရှိရပါသည်။

          ဆိပ်ဖြူမြို့အနောက်ပိုင်းရပ်ကွက်ရှိ ကြက်သွန်နီအရောင်းအဝယ်ဖြစ်လျက်ရှိသော ကုန်စည်ဒိုင်သို့ ကြက်သွန်နီ မိုးစိုက်(ဥစိုက်)အသစ်များ သီးနှံပေါ်စ ဇန်နဝါရီလဆန်းပိုင်းမှစ၍ တစ်ရက်လျှင် ပျမ်းမျှကြက်သွန်နီအသစ်ပိဿာ(၅၀၀၀၀)ခန့် စီးဝင်လျက်ရှိကြောင်း၊ တစ်လအတွင်း ပိဿာ(၁၅) သိန်း ဝန်းကျင်ခန့် စီးဝင်ကြောင်း၊ ဆိပ်ဖြူမြို့နယ် ကြက်သွန်နီစိုက် တောင်သူအချို့သည် ကုန်စည်ဒိုင်သို့ လာရောက်ရောင်းချခြင်းမရှိဘဲ တောင်သူ(၅)ဦးခန့်စုပြီး ရန်ကုန်(ဘုရင့်နောင်)ပွဲရုံသို့ တိုက်ရိုက်ရောင်းချလျက်ရှိကြောင်း သိရှိရပါသည်။

                 ကုန်စည်ဒိုင်သို့ ကြက်သွန်နီ(အသစ်)များ အဓိကစီးဝင်လာသည့်ဒေသများမှာ စိုက်ဧကများသော ဧရာဝတီမြစ်ကမ်းနံဘေးရှိ မြို့ပေါ်(၄)ရပ်ကွက်နှင့် ကိုးတောင့်၊ ရေလယ်ကျွန်း၊ သံဇလုံ၊ ဇီးကပ်၊ ရွာသာအေး၊ ချင်းတောင်၊ အောက်ဆိပ်၊ ဂွေးပင်ချောင်း၊ ဆူးလေကုန်းစသည့် ကျေးရွာများနှင့် ချောက်မြို့နယ်၊ ပဒေသာကျွန်း ကျေးရွာများမှ ဝင်ရောက်လျက်ရှိကြောင်းသိရှိရပါသည်။ဇန်နဝါရီလအတွင်း ကုန်စည်ဒိုင်တွင် အရောင်းအဝယ်ဖြစ်သော ကြက်သွန်နီဈေးနှုန်း ဈေးကွက်များမှာ သီးနှံအရည်အသွေးလိုက်၍ ဈေးနှုန်းမှာမတူညီကြောင်း၊ သီးနှံပေါ်စ ဇန်နဝါရီလ ပထမပတ်တွင် ထိပ်စအမြင့်ဈေး (၆၅၀)ကျပ်၊ အနိမ့်ဈေး(၁၀၀)ကျပ်၊ တတိယပတ်ဈေးနှုန်းမှာ တစ်ပိဿာလျှင် ထိပ်စ(၅၀၀)ကျပ်၊ အနိမ့်စ(၁၀၀)ကျပ် ဈေးနှုန်းများရှိကြောင်း၊ ဇန်နဝါရီလအတွင်း ပျမ်းမျှကြက်သွန်နီ(အသစ်) တစ်ပိဿာရောင်းဈေးမှာ ထိပ်စအမြင့်ဈေး(၅၅၀)ကျပ်နှင့် အနိမ့်ဈေး (၁၀၀)ကျပ်ဖြင့် ဆိပ်ဖြူမြို့နယ် ကြက်သွန်နီရောင်းဝယ်ရေး ကုန်စည်ဒိုင်မှာ အရောင်းအဝယ်ဖြစ်ကြောင်းသိရှိရပါသည်။

                ယခင်နှစ် ဇန်နဝါရီလအတွင်း ကုန်စည်ဒိုင်တွင် အရောင်းအဝယ်ဖြစ်သော ဈေးနှုန်းဈေးကွက်မှာ ကြက်သွန်နီ(အသစ်) တစ်ပိဿာလျှင် ထိပ်စအမြင့်ဈေးမှာ (၂၀၀)ကျပ်မှ အသေးနုပ်အနိမ့်စ (၅၀)ကျပ်ဈေးနှုန်းဖြစ်ကြောင်း၊ တစ်ရက်လျှင် ပျမ်းမျှကြက်သွန်နီ(အသစ်) ပိဿာ(၁၀၀၀၀၀) ခန့် စီးဝင်လျက်ရှိရာ ယခင်နှစ်နှင့် ယခုနှစ်နှိုင်းယှဉ်လျှင် ဝယ်လိုအားနည်း၍ ဈေးကွက်ကောင်းမွန်မှု မရှိခြင်းကြောင့် ယခင်နှစ်ထက် စီးဝင်ရောက်မှုထက်ဝက်နီးပါး ခန့်လျော့နည်းသွားကြောင်း လေ့လာသုံးသပ်ရပါသည်။

             ကုန်စည်ဒိုင်သို့ ဇန်နဝါရီလအတွင်း စီးဝင်လျက်ရှိသော မိုးစိုက်(ဥစိုက်) ကြက်သွန်နီ(အသစ်) များကို တင်ပို့ဖြန့်ဖြူးရာတွင် ရန်ကုန်(ဘုရင့်နောင်)ပွဲရုံ၊ ပြည်၊ ပုသိမ်၊ မော်လမြိုင်၊ မြဝတီ၊ စစ်တွေ မြို့များသို့ တင်ပို့လျက်ရှိပြီး ပို့ကုန်အများဆုံးအနေဖြင့် ရန်ကုန်(ဘုရင့်နောင်)ပွဲရုံသို့ တင်ပို့လျက်ရှိကြောင်း၊ ဇန်နဝါရီလအတွင်း ဆိပ်ဖြူကုန်စည်ဒိုင်မှ ဈေးဖြတ်ပြီး ကုန်သည်ပွဲစားများမှ ဝယ်ယူ၍ ထိုမှတစ်ဆင့် ပြည်တွင်းနေရာအနှံ့အပြားသို့ (၃၅)ပိဿာဝင်အိတ် (၄၂၈၁၇)အိတ်၊ (၂၄၄၉)တန်ခန့် ကို (၁၂)ဘီး/(၆)ဘီး မော်တော်ယာဉ်များဖြင့် စီးထွက်လျက်ရှိကြောင်း သိရှိရပါသည်။

                ယခုနှစ်ကြက်သွန်နီ  (အသစ်)ဈေးနှုန်းမှာ သင့်တင့်မှုရှိသော်လည်း စိုက်ပျိုးရာတွင် သွင်းအားစုစရိတ် ကြီးမြင့်ခြင်းတို့ ကြောင့် အကျိုးအမြတ်ရရှိမှု နည်းပါးကြောင်း၊ ရောင်းလိုအားကောင်းသော်လည်း ဝယ်လိုအားနည်း၍ ဈေးကွက်နည်းကြောင်း၊ တောင်သူလယ်သမားအကျိုးစီးပွားကို ကာကွယ်မြှင့်တင်ခြင်းဖြင့် ကြက်သွန်နီ အခြေခံရည်ညွှန်းဈေးနှုန်းကို အမြန်ဆုံးသတ်မှတ်ပေးနိုင်ပါက စိုက်ဧကရာခိုင်နှုန်းများလာပြီး ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်လာမည်ဖြစ်ကြောင်း စိုက်ပျိုးတောင်သူ၏ ပြောကြားချက်အရသိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

        မကွေးတိုင်းဒေသကြီး၊ အောင်လံကုန်စည်ဒိုင်တွင် နှမ်းဈေးနှုန်းမှာ ယခင်အပတ်(၂.၂.၂၀၂၂)နေ့နှင့် ယခုအပတ် (၉.၂.၂၀၂၂)နေ့ ဈေးနှုန်းများနှိုင်းယှဉ်ပါက ပြောင်းလဲမှုမရှိပဲ ပုံမှန်အရောင်းအဝယ်ဖြစ်လျက်ရှိပါသည်။ အရောင်းအဝယ်များမှာ နှမ်းနက်(စမုံ)တစ်တင်းခွဲအိတ်(၁၁၅၀)အိတ်၊ နှမ်းပြာ(၃၅၀)အိတ်၊ နှမ်းနီ(၂၇၀) အိတ်တို့ အရောင်းအဝယ်ဖြစ်လျက်ရှိပြီး ပဲစဉ်းငုံမှာ ယခင်အပတ်(၄၂၅၀ဝိ/-)မှ ယခုအပတ် (၄၀၃၀ဝိ/-)ဖြစ်သည့်အတွက် (၂၂၀ဝိ/-)လျော့၊ မတ်ပဲတွင်လည်း ယခင်(၄၀၅၀ဝိ/-)မှ ယခု (၃၇၀၀ဝိ/-) ဖြစ်သည့်အတွက် (၃၅၀ဝိ/-)လျော့၊ ကုလားပဲ(H.L) ယခင်(၄၂၅၀ဝိ/-) ယခု(၄၁၀ဝိ/-) ဖြစ်သည့်အတွက် (၁၅၀ဝိ/-)လျော့၊ ဘိုကိတ်အပြာ ယခင်(၃၄၀၀ဝိ/-) ယခု(၃၀၀၀ဝိ/-) ဖြစ်သည့်အတွက် (၄၀၀ဝိ/-)လျော့ကျခဲ့ပြီး ကျန်ပဲအမျိုးအစားများမှာ ယခင်အပတ်ဈေးနှုန်းအတိုင်း ပုံမှန်အရောင်းအဝယ်ရှိလျက်ရှိကြောင်း သိရပါသည်။

        ပဲကြီးအသစ်များ စတင်ပေါ်လာပြီး ရွှေကျွန်းအသန့်(အသစ်)ဈေး (၈၅၀၀ဝိ/-)ဈေးဖြင့် စတင်ဝယ်ယူနေပြီး ပဲကြီးအဟောင်းဈေးမှာ (၈၀၀၀ဝိ/-)ခန့်ရှိပါသည်။ အရောင်းအဝယ်ဖြစ်သည့် ပမာဏအနေဖြင့် ပဲစဉ်းငုံနီ တစ်တင်းခွဲအိတ် (၇၉၀)အိတ်၊ ပဲတီစိမ်း(၉၀၀)အိတ်၊ ဘိုကိတ်ပြာ(၅၃၀) အိတ်နှင့် ပဲကြီး(၁၅၀)အိတ်တို့ဖြစ်ပါ သည်။ မြေပဲဆံအနေဖြင့် ယခင်အပတ် လုံးဆံ(အနီ) (၂၉၀ဝိ/-) ဈေးရှိခဲ့ပြီး ယခုအပတ် (၂၉၇၅/-) ဖြစ်သည့်အတွက်(၇၅/-)ဈေးမြင့်ခဲ့ပြီး လုံးဆံ(အဖြူ)မှာ ယခင် အပတ် (၃၂၅ဝိ/-)ရှိခဲ့ပြီး ယခုအပတ်(၃၂၀ဝိ/-) ဖြစ်၍ (၅ဝိ/-)ဈေးကျခဲ့ပါသည်။ (၂၅)ပိဿာဝင် လုံးဆံ (အနီ)အိတ် (၄၅၀)အိတ်၊ လုံးဆံ(အဖြူ) (၇၀၀)အိတ် အရောင်းအဝယ်ဖြစ်ပြီး ဝါသီးနှံမှာ ယခင်အပတ်(၁၈၀ဝိ/-)မှ (၁၈၅ဝိ/-)ဈေးရှိပြီး ယခုအပတ်(၁၇၀ဝိ/-) (၁၈၀ဝိ/-)ရှိသည့်အတွက် (၁၀ဝိ/-) ဈေးလျော့ကာ ပိဿာချိန်(၃၀၀၀၀)ခန့် အရောင်းအဝယ်ဖြစ်ခဲ့ကြောင်း ကုန်သည်ထံမှ သိရှိခဲ့ရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

               မကွေးတိုင်းဒေသကြီးသည် မြန်မာနိုင်ငံအလယ်ပိုင်း မိုးနည်းရေရှားရပ်ဝန်းတွင် တည်ရှိပြီး ဆီထွက်သီးနှံ အများအပြား စိုက်ပျိုးထွက်ရှိသော်လည်း ရေ၊ မြေ၊ ရာသီဥတု အခြေအနေအရ စပါးစိုက်ဧကနည်းသဖြင့် ဒေသတွင်း ဆန်စားသုံးမှုကို ဖူလုံအောင် စိုက်ပျိုးနိုင်မှုမရှိခြင်းကြောင့် ဆန်လို တိုင်းဒေသကြီးတစ်ခုဖြစ်ပါသည်။ စပါးစိုက်ပျိုးမှုနှင့် ပတ်သက်၍ ဧရာဝတီမြစ်၏ အနောက်ဘက်ခြမ်း ဒေသဖြစ်သော မင်းဘူးခရိုင်၊ ပွင့်ဖြူမြို့နယ်နှင့် စလင်းမြို့နယ်တို့တွင် ဆည်ရေသောက်ဧရိယာရှိခြင်း၊ စပါးစိုက်ရန် မြေဆီမြေနှစ်ရှိသော လယ်မြေများ အသင့်အတင့်ရှိခြင်းကြောင့် အရည်အသွေးကောင်းမွန်သော ဧရာပဒေသာစပါးများ စိုက်ပျိုးလျှက်ရှိပါသည်။ အဆိုပါ ဒေသမှ ထွက်ရှိသော ဧရာပဒေသာ ဆန်အမျိုးအစားမှာ အရည်အသွေးကောင်းမွန်ပြီး ပြည်တွင်း စားသုံးမှုတွင် လူကြိုက်များသဖြင့် ဒေသတွင်း စားသုံးမှုအပြင် မန္တလေးတိုင်းနှင့် နေပြည်တော်၊ တပ်ကုန်းဒေသများအထိပါ ဈေးကွက်ရောက်ရှိပြီး လူအများ နှစ်သက်သော ဆန်အဖြစ် ဈေးကောင်း ရရှိလျှက်ရှိပါသည်။

              မကွေးတိုင်းဒေသကြီးအတွင်း ၂၀၂၁-၂၀၂၂ ခုနှစ်တွင် ဧရာပဒေသာ စပါးစိုက်ဧက (၁၈၆၀၅၁) ဧက စိုက်ပျိုးလျှက်ရှိရာ မကွေးခရိုင်၊ မြို့သစ်၊ တောင်တွင်းကြီးမြို့နယ်၊ မင်းဘူးခရိုင်၊ မင်းဘူး (စကု) ၊ ပွင့်ဖြူ၊ စလင်းမြို့နယ်များတွင် အဓိကစိုက်ပျိုးလျှက်ရှိပါသည်။ ဧရာပဒေသာစပါးကို ဆည်ရေရရှိသည့် ဒေသများ၌သာ စိုက်ပျိုးနိုင်ခြင်းဖြစ်ပြီး ဧရာပဒေသာ စိုက်ဧကမှာ ဆည်ရေသောက်ဧရိယာများအားလုံး စိုက်ပျိုးနိုင်ခြင်းမရှိကြောင်း၊ ဧရာပဒေသာစပါး၏ သက်တမ်း မှာ ရက် (၁၄၀) မှ (၁၅၀) အထိရှိပြီး ရာသီစပါးဖြစ်သောကြောင့် ဇူလိုင်လတွင် ပျိုးထောင်ပြီး နိုဝင်ဘာလတွင် ပန်းပွင့်ရကြောင်း၊ သက်တမ်းရှည်စပါးဖြစ်၍ မိုးတွင်း၌သာ စိုက်ပျိုးနိုင်ပြီး နွေစပါးအဖြစ် စိုက်ပျိုး၍ မရကြောင်း၊ မိုးတွင်း၌ပင် ဆည်ရေပေးသွင်း၍ စိုက်ပျိုးရကြောင်း သိရှိရ ပါသည်။

              ဧရာပဒေသာဆန်သည် ၂၀၁၁ ခုနှစ်မှစ၍ ဈေးကွက်ထိုးဖောက်ခဲ့ပြီး တစ်နှစ်ထက်တစ်နှစ် အရည်အသွေးကောင်းမွန်လာသည့်အတွက် စပါး/ ဆန်ဈေးနှုန်းမှာလည်း မြင့်တက်လာပြီး ဆီးချို/ သွေးချိုရှိသူများမှလည်း ပေါ်ဆန်းနေရာတွင် အစားထိုး စားသုံးလာသည့်အတွက် စားသုံးမှုမြင့်တက် လာကြောင်း၊ လက်ရှိ ဧရာပဒေသာ မိုးစပါး (အဟောင်း ) (၁) တင်းလျှင် (၁၂၀၀၀) ကျပ်၊ မိုးစပါး (အသစ်) (၁) တင်းလျှင် (၁၀၀၀၀) ကျပ်၊ ဧရာပဒေသာဆန် (အဟောင်း) (၁) အိတ်လျှင် (၅၁၀၀၀) ကျပ်၊ (အသစ်) (၁) အိတ်လျှင် (၄၁၀၀၀) ကျပ် ပေါက်ဈေးရှိကြောင်း ဈေးကွက်အတွင်းမှ လေ့လာ သိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

          အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဖေဖော်ဝါရီလ (၃)ရက်နေ့မှ ဖေဖော်ဝါရီလ (၁၀)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊ မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၁၀၀၀ မှ ၂၄၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၆၀၀ မှ ၂၀၀၀အတွင်း၊ ပန်းဂေါ်ဖီ(ထုပ်)ကျပ် ၅၀၀ မှ ၂၁၀၀ အတွင်း၊ အာလူး(ပိဿာ)ကျပ် ၁၂၅၀ မှ ၂၃၀၀ အတွင်း၊ မုန်လာဥနီ(ပိဿာ) ကျပ် ၁၇၀၀ မှ ၂၀၀၀အတွင်း၊ ရွှေဖရုံသီး(လုံး)ကျပ် ၁၀၀၀ မှ ၁၃၀၀ အတွင်း၊ ဗူးသီး(လုံး) ကျပ် ၉၀၀ မှ ၁၂၀၀ အတွင်း၊ မုန်ညှင်း(ထုပ်)(ပိဿာ) ကျပ် ၁၀၀၀ မှ ၁၂၀၀အတွင်း၊ ကြက်သွန်နီ(ဆိပ်ဖြူ) ကျပ် ၉၀၀ မှ ၁၂၀၀အတွင်း၊ ကြက်သွန်ဖြူ(ရှမ်း)(ပိဿာ) ၂၅၀၀ မှ ၃၅၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၄၀၀ မှ ၃၆၀၀ အတွင်း၊ ချင်း(ပိဿာ)ကျပ် ၁၀၀၀ မှ ၁၈၀၀ အတွင်း၊ ဆလပ်ရွက်(စီး) ကျပ် ၂၀၀ မှ ၃၅၀ အတွင်း၊ ချဉ်ပေါင်ရွက်(စီး) ကျပ် ၁၀၀ မှ ၁၅၀ အတွင်း၊ ခရမ်းသီး(ရှည်)(လုံး)ကျပ် ၁၀၀ မှ ၁၂၀ အတွင်း၊ သံပရာသီး(လုံး)ကျပ် ၁၀၀ မှ ၁၅၀ အတွင်း၊ ငရုတ်သီးစိမ်း(ကျောက်စိမ်း)(ပိဿာ) ၉၀၀ မှ ၁၁၀၀ အတွင်း၊ ဖရဲသီး(အကြီး၊ အလတ်၊ အသေး) ကျပ် ၁၇၀၀ မှ ၅၀၀၀ အတွင်း ဖြစ်ကြောင်း သိရှိရပါတယ်။ တညင်းကုန်း လက်ကား ဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၁၇၁၀၀)ကျော်၊ ခရမ်းသီး(ရှည်)(လုံး) (၁၅၆၀၀) ကျော်၊ ဗူးသီးအလုံးပေါင်း (၁၄၃၀၀)ကျော်၊ရွှေဖရုံသီးအလုံးပေါင်း (၁၁၂၀၀)ကျော်၊ ဂေါ်ဖီထုပ်ပေါင်း (၁၅၆၀၀)ကျော်၊ပန်းဂေါ်ဖီထုပ်ပေါင်း (၁၅၃၅၀)ကျော်၊ မုန်ညှင်းထုပ်(ပိဿာ)ပေါင်း (၈၁၀၀)ကျော်၊ ဖရဲသီးလုံးပေါင်း(၂၃၂၀၀)ကျော် အသီးသီးကုန်အဝင်ရှိကြောင်း သိရပါတယ်။

စားသုံးသူရေးရာဦးစီးဌာန

ရန်ကုန်တိုင်း‌ဒေသကြီး