ပြည်တွင်းကုန်သွယ်မှုသတင်း

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ရောင်းချလျက်ရှိသည့် ကြက်ဥ၊ ဘဲဥများကို ကန့်ဘလူမြို့နယ်အတွင်းရှိ ကြက်ခြံများနှင့် မန္တလေးမြို့မှ ဝင်ရောက်လျက်ရှိ ကြောင်း၊ ၂၀၂၅ ခုနှစ်၊ ဩဂုတ်လ တတိယပတ်အတွင်း ကန့်ဘလူမြို့မဈေးတွင် ကြက်ဥအကြီး (၁)လုံးလျှင် (၆၀၀)ကျပ်၊ အသေး(၁)လုံးလျှင် (၅၇၀)ကျပ်၊ လက်ကား(၁၀)လုံးလျှင် (၅၅၀)ကျပ် တို့ဖြင့်ရောင်းချကြောင်း၊ ဩဂုတ်လ တတိယပတ်အတွင်း ဘဲဥ(၁)လုံးလျှင် (၇၀၀)ကျပ်နှင့် ငုံးဥ (၇)လုံးလျှင် (၁၀၀၀)ကျပ်ဖြင့်ရောင်းချကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း ကြက်ဥ(၁)လုံးလျှင် (၅၀)ကျပ် ဈေးနှုန်းကျဆင်းသွားကြောင်း၊ ကြက်ဥလက်လီ /လက္ကားရောင်းချသည့် လုပ်ငန်းရှင်များထံမှ သိရှိရပါသည်။

DOCA (စစ်ကိုင်း)

           မြင်းခြံမြို့နယ်ရှိ အေးမြသီတာဈေးတွင် ဟင်းသီးဟင်းရွက်မျိုးစုံ ရောင်းချလျက်ရှိရာ ဂျူးဖူးများကို ရှမ်းပြည်နယ်တောင်ပိုင်း၊ အောင်ပန်းမြို့မှ မှာယူရောင်းချကြောင်းသိရှိရသည်။ ၂၀၂၅ ခုနှစ်၊ ဩဂုတ်လ နောက်ဆုံးပတ်တွင် ရောင်းချနေသော ဂျူးဖူး တစ်စည်းလျှင် ၇၀၀ ကျပ်၊ ပေါက်ဈေးများဖြင့် ရောင်းချလျက်ရှိကြောင်း၊ အာဟာရဓာတ် ကြွယ်ဝသောကြောင့် ဈေးကွက်တွင် အရောင်းအဝယ်ဖြစ်လျက်ရှိကြောင်း၊ နေ့စဉ် ဂျူးဖူးအစည်းအရေအတွက် (၅၀-၁၂၀)စည်းခန့် ရောင်းချရကြောင်း၊ စားသောက်ဆိုင်များ သို့လည်းဖောက်သည် ပေးရကြောင်း၊ အရောင်းအဝယ်ကောင်းကြောင်း ကုန်စိမ်းရောင်း ချသူတစ်ဦး၏ ပြောပြချက်အရသိရှိရသည်။ ဂျူးဖူးတွင်ပါဝင်သော အာဟာရဓာတ်များသည် အမျှင်ဓာတ်ကြွယ်ဝစွာပါဝင်ပြီး အစာချေစနစ်ကို ကောင်းမွန်စေကြောင်း၊ ခန္ဓာကိုယ်အတွင်ပိုင်းက အဆိပ်အတောက်များကို ဖယ်ရှားပေးကြောင်း၊ ဖောလစ်အက်ဆစ် ပါဝင်သောကြောင့် ကိုယ်ဝန်ဆောင်သည်အမျိုးသမီးများ စားသုံးသင့်ကြောင်း၊ ဗီတာမင်အေပါဝင်သောကြောင့် အမြင်အာရုံနှင့် အဆုတ်ခံတွင်း ကင်ဆာမဖြစ်အောင် ကာကွယ်ပေးကြောင်း၊ ဂျူးဖူးသည်လူကြိုက်များပြီး ချက်ပြုတ်ရာတွင် လွယ်ကူမြန်ဆန်သဖြင့် စားသုံးမှုများပြားကြောင်း သိရှိရပါသည်။

DOCA(မန္တလေး)

           မြင်းခြံကုန်စည်ဒိုင်တွင် အရောင်းအဝယ်ဖြစ်လျက်ရှိသော ၂၀၂‌၅ခုနှစ်၊ ဩဂုတ်လ စတုတ္ထပတ်၌ လယ်ယာထွက်ကုန်သီးနှံ ဈေးနှုန်းများမှာ  ပဲစဉ်းငုံနီတစ်တင်းလျှင် (၈၀၈၀၀) ကျပ်၊ မတ်ပဲ တစ်တင်းလျှင် (၆၀၀၀၀) ကျပ်၊ ပဲဇီးကွက် တစ်တင်းလျှင် (၉၀၀၀၀)ကျပ်၊ ထောပတ်ပဲဖြူ တစ်တင်းလျှင် (၇၀၃၀၀) ကျပ်၊ ကုလားပဲV2 တစ်တင်းလျှင် (၈၅၁၅၀)ကျပ်၊ ကုလားပဲ 929 တစ်တင်းလျှင် (၈၄၄၀၀) ကျပ်၊ ကုလားပဲဝါအထွက်တိုးတစ်တင်းလျှင် (၈၁၇၀၀) ကျပ်၊ ပဲပုပ်တစ်တင်းလျှင် (၁၂၂၄၀၀) ကျပ်၊ ပဲဘိစပ်တစ်တင်းလျှင် (၃၄၀၀၀) ကျပ်၊ စီပီပြောင်း တစ်တင်းလျှင် (၂၅၇၄၀)ကျပ်၊ နှမ်းညိုတစ်တင်းလျှင် (၉၀၀၀၀)ကျပ်၊ မြေပဲ S1လုံးဆံ(ဟောင်း) တစ်တင်းလျှင် (၁၀၃၆၀၀) ကျပ် ပေါက်ဈေးများဖြင့် အရောင်းအဝယ်ဖြစ်လျက်ရှိကြောင်း၊ နေ့စဉ်သီးနှံမျိုးစုံ အိတ်အရောင်း  အဝယ်အနေဖြင့် အိတ်(၁၀၀-၃၀၀) အထိအရောင်းအဝယ် ဖြစ်လျက်ရှိကြောင်း၊ ပဲမျိုးစုံပြောင်း တင်ပို့မှုအနေဖြင့် ရန်ကုန်ဘုရင့်‌နောင်ပွဲရုံ၊ လှိုင်သာယာ၊ ရွှေပြည်သာမြို့များသို့ တင်ပို့ကြောင်း၊ နှမ်းတင်ပို့မှုအနေဖြင့် မကွေးမြို့သို့လည်း တင်ပို့ကြောင်း သိရှိရသည်။

DOCA(မန္တလေး)

           မြင်းခြံမြို့မှာ ရောင်းချလျက်ရှိသော မုန့်တီ၊ မုန့်ဟင်းခါး၊ နန်းကြီးသုပ်၊ ခေါက်ဆွဲသုပ်၊ ရွှေတောင် ခေါက်ဆွဲ၊ အုန်းနို့ခေါက်ဆွဲ၊ နို့စိမ်းခေါက်ဆွဲတွေမှာ မပါမဖြစ် နေရာယူထားသည့် အရသာဆိမ့်ဆိမ့် ကြွပ်ကြွပ်ရွရွ ပါဝင်ပစ္စည်းတစ်မျိုးမှာ မုန့်ကြွပ်ကြော်ဖြစ်သည်။ မုန့်ကြွပ်ကြော်ကို နံနက်ခင်းနှင့် ညနေခင်းတို့တွင် ရောင်းချသည့် မြင်းခြံမြို့ရှိ မုန့်တီ၊ မုန့်ဟင်းခါး၊ ခေါက်ဆွဲဆိုင်များမှ အများအပြားလာရောက်ဝယ်ယူကြကြောင်း သိရှိရသည်။

         မုန့်ကြွပ်ကြော်လုပ်ငန်းလုပ်ကိုင်ရာတွင် ခေါက်ဆွဲအစိုကို ဂျုံမှုန့်အနည်းငယ်ဖြူးကာ ဆီဒယ်အိုးထဲသို့ ခေါက်ဆွဲအစိုကို ဆီမြှုပ်အောင်နှစ်ပြီးကြော်ရပါသည်။ ခေါက်ဆွဲအစို (၁၅)ပိဿာခန့်ကြော်လျှင်၊ မု့န်ကြွပ်ကြော်(၃၀)ပိဿာ ထုတ်လုပ်ရရှိကြောင်းသိရသည်။ ပုံမှန်အားဖြင့် (၂)ရက်လျှင်တစ်ကြိမ် လုပ်ငန်းလုပ်ကိုင်လျက်ရှိပြီး အလှူပွဲ၊ မွေးနေ့ပွဲ၊ အခြားအထိမ်းအမှတ်ပွဲများ ကျင်းပကြသည့်နေ့ရက်များနှင့် အော်ဒါမှာ ယူမှုရှိသည့် နေ့ရက်များတွင် လာရောက်ဝယ်ယူမှုများပြားသဖြင့် မုန့်ကြွပ်ကြော် လုပ်ငန်းကို နေ့စဉ်လုပ်ကိုင်ဆောင်ရွက်ရကြောင်း သိရှိရသည်။ ရောင်းချရာတွင် (၅)ကျပ်သား၊ (၂၅)ကျပ်သား၊ (၅၀)ကျပ်သားနှင့် တစ်ပိဿာထုပ်များ ထုပ်ပိုးရောင်းချလျက်ရှိပြီး ဈေးနှုန်းအနေဖြင့် တစ်ပိဿာ လျှင်(၂၃၀၀၀)ကျပ်နှုန်းဖြင့် ရောင်းဝယ်လျက်ရှိကြောင်း၊ အခြားမြို့များသို့ တင်ပို့ရောင်းချခြင်းမရှိဘဲ မြင်းခြံမြို့အတွင်းမှသာ လာရောက်ဝယ်ယူလျက်ရှိကြောင်း မုန့်ကြွပ်ကြော်လုပ်ငန်း လုပ်ကိုင်လျက်ရှိသည့် လုပ်ငန်းရှင်တစ်ဦး၏ ပြောကြားချက်အရ သိရှိရသည်။ ထို့အပြင် မြင်းခြံမြို့၌သာ မှာယူရရှိစားသုံးနိုင်သည့် ထူးထူးခြား ခြား စားဖွယ်တစ်ခုဖြစ်သော “ပလာတာသုပ်”တွင်လည်း မုန့်ကြွပ်ကြော်သည် မပါမဖြစ် တွဲဖက် စားသုံး လေ့ရှိသည့် ပါဝင်ပစ္စည်း တစ်မျိုးဖြစ်ပေသည်။ နံနက်စာ၊ ညနေစာ စားသုံးလေ့ရှိကြသည့် အစားအစာများတွင် မုန့်ကြွပ်ကြော်သည် စားသုံးသူများအကြိုက် နေရာယူလျက်ရှိပြီး မုန့်ကြွပ်ကြော်လုပ်ငန်း လုပ်ကိုင်လျက်ရှိသည့် MSME လုပ်ငန်းရှင်များအနေဖြင့် စီးပွားရေးအဆင် ပြေလျက်ရှိကြောင်း သိရှိရပါသည်။

DOCA(မန္တလေး)

            စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ ၂၂-၈-၂၀၂၅ရက် နေ့တွင် ထုတ်ပြန်ထားသည့် စက်သုံးဆီတစ်လီတာ၏ သတ်မှတ်ရည်ညွှန်းဈေးများမှာ 92 Octance (၃၀၃၀)ကျပ်၊ 95 Octance(၃၁၀၅)ကျပ်၊ ရိုးရိုးဒီဇယ်(၂၆၅၀)ကျပ်၊ ပရီမီယမ်ဒီဇယ် (၃၂၅၅)ကျပ် ဖြစ်ကြောင်း  သိရှိရသည်။

            ညောင်ဦးမြို့နယ်တွင် စက်သုံးဆီအရောင်းဆိုင်(၁၇)ဆိုင်မှ စက်သုံးဆီများကို နေ့စဉ်ပုံမှန် ဖွင့်လှစ်ရောင်းချလျက်ရှိရာ ၂၀၂၅ခုနှစ်၊ဩဂုတ်လ(၂၂)ရက်နေ့ စက်သုံးဆီတစ်လီတာ အရောင်းဈေးနှုန်းများအနေဖြင့် 92 Octance(၃၀၆၅)ကျပ်၊ 95 Octance(၃၁၉၀)ကျပ်၊ ရိုးရိုးဒီဇယ် (၂၆၉၀)ကျပ်၊ ပရီမီယမ် ဒီဇယ်(၃၃၁၀)ကျပ်နှုန်း ဝန်းကျင်ဖြင့် ရောင်းချလျက်ရှိကြောင်း သိရှိရသည်။ သတ်မှတ်ရည်ညွှန်းဈေးများသည် ယခင်အပတ်ထက် တစ်လီတာလျှင် 92 Octanceတွင်(၂၀)ကျပ်၊ 95 Octance တွင်(၃၅)ကျပ်များတက်ခဲ့ပြီး ရိုးရိုးဒီဇယ်တွင်(၇၅)ကျပ်နှင့် ပရီမီယမ်ဒီဇယ်တွင်(၉၅)ကျပ် ဈေးနှုန်းကျဆင်းခဲ့ကြောင်း သိရှိရပါသည်။

DOCA(မန္တလေး)