ပြည်တွင်းကုန်သွယ်မှုသတင်း

၁၇.၁၂.၂၀၂၄

                               မန္တလေးတိုင်းဒေသကြီးသည် ဆီထွက်သီးနှံစိုက်ပျိုးဖြစ်ထွန်းသော တိုင်းတစ်ခုဖြစ်ပြီး မြေပဲ၊ နှမ်း၊ နေကြာတို့ကို တိုင်းအတွင်းရှိ ခရိုင်များအားလုံးတွင်စိုက်ပျိုးမှုရှိပါသည်။ ၂၀၂၃-၂၀၂၄ ခုနှစ် အတွင်း ဆီထွက်သီးနှံ စိုက်ဧက (၁၉) သိန်းကျော် စိုက်ပျိုး၍ အထွက်တင်း သိန်းပေါင်း (၃၈၄) သိန်းကျော်ထွက်ရှိခဲ့ရာ မျိုး၊အလေအလွင့်နှင့်အခြားသုံးစွဲမှုများ နှုတ်ပယ်ကာ ဆီကြိတ်ခွဲ ထုတ်လုပ်မည်ဆိုပါက ဆီတန်ချိန် (၁၄၀၄၁၆) တန် ထွက်ရှိမည်ဖြစ်ပါသည်။ လူတစ်ဦးဆီစားသုံးမှု (၉.၃၉) ပိဿာနှင့် တွက်ချက်ပါက မန္တလေးတိုင်း ဒေသကြီး၏ လူဦးရေ (၆၇) သန်းအတွက် တစ်နှစ်စားသုံးရန် ဆီလိုအပ်ချက်မှာ (၁၀၂၇၉၁) တန်ဖြစ်၍ ဆီတန်ချိန် (၃၇၆၂၅) တန် ပိုလျှံမည်ဖြစ်ပြီး ၁၃၆.၇၂ % ဖူလုံမှုရှိပါသည်။ထို့အပြင် အထွက်နှုန်းကောင်း သောမျိုးများ ရွေးချယ်စိုက်ပျိုးခြင်း၊ ဆီထွက်သီးနှံ မျိုးကောင်း မျိုးသန့်များ ရရှိစိုက်ပျိုးလာစေရန် ကူညီပေးခြင်း၊ နည်းပညာပေးမှုများ ဆောင်ရွက်ပေးခြင်းဖြင့် တောင်သူများဝင်ငွေပိုမိုတိုးတက်လာမည်ဖြစ် ပါသည်။

                          တိုင်းဒေသကြီးတွင်း ဆီစက်ပေါင်း (၅၈၃) စက်ရှိရာ  ဒေသတွင်းစက်များ၏ ဆီကြိတ်ခွဲ နိုင်မှုအရ ဆီထွက်ရှိနိုင်မှုမှာ (၆၁၇၄၇) တန်ရှိပြီး တိုင်းအတွင်းလူဦးရေ (၆၇)သန်း စားသုံးရန် အတွက် (၈)နာရီ တစ်ဆိုင်းနှုန်းဖြင့်ကြိတ်ခွဲမည်ဆိုပါကဆီလိုအပ်ချက် (၄၁၀၄၄) တန်လိုအပ်မည် ဖြစ်ရာ (၈)နာရီ(၂)ဆိုင်းလည်ပတ်မည်ဆိုပါက ဆီထွက်ရှိမှု အနေဖြင့်(၁၂၃၄၉၄) တန် ထွက်ရှိမည်

ဖြစ်၍ (၂၀၇၉၂ ) တန်ပိုလျှံလာမည်ဖြစ်ပါသည်။ ဒေသတွင်း စားသုံးဆီဈေးနှုန်းများ တည်ငြိမ်မှု  ရှိစေရေးနှင့်ဆီစက်လုပ်ငန်းများပိုမိုထုတ်လုပ်နိုင်စေရန် အတွက် ခေတ်မီဆီသန့်စက် (Refine) စက်များ တိုးချဲ့တပ်ဆင်ထုတ်လုပ်ပါက ပြည်တွင်းစားသုံးမှု ဖူလုံစွာထုတ်လုပ်လာနိုင်ပြီး ပြည်သူများအနေနှင့်လည်းဈေးနှုန်းသက်သာစွာဖြင့် ဝယ်ယူစားသုံးနိုင်ရုံသာမက မွေးမြူရေး အစာများလည်း ဖူလုံလာမည်ဖြစ်ပါသည်။                          

             မန္တလေးဈေးကွက်အတွင်း ဖြစ်ပေါ်နေသော ဆီထွက်သီးနှံ(တစ်ပိဿာ)ဈေးနှုန်းများမှာ မြေပဲလုံးဆံနီ (၈၅၀၀) ကျပ်၊ S1 လုံးဆံ (၈၄၀၀-၈၈၀၀) ကျပ်၊ S1 ဆီဆံ (၈၂၀၀-၈၃၀၀)ကျပ်၊ အနီဆီဆံ(၈၁၀၀-၈၂၀၀)ကျပ်၊ပဲဆီ(၁၅၀၀၀-၁၅၅၀၀)ကျပ်၊ ပဲဖတ်(၆၃၀၀)ကျပ်၊ နှမ်းဖြူ (၈၈၈၉) ကျပ်၊ နှမ်းညိ(၇၀၀၀-၇၁၁၁) ကျပ်၊နှမ်းနက်စမုံ (၁၄၄၄၄-၁၅၀၀၀)ကျပ်၊ နှမ်းဆီ (၁၄၅၀၀)ကျပ်၊ နှမ်းဖတ် (၄၄၀၀-၄၄၂၀) ကျပ်ရှိကြောင်း ပွဲစားကုန်သည်စက်ပိုင်များ မဟာကထိန်တော်အသင်းမှ သိရှိရပါသည်။

DOCA(မန္တလေး)                   

 ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်မှ စပါး စိုက်ပျိုးနေပြီး မအူပင်ခရိုင် အနေဖြင့် မြို့နယ်များအပါအဝင် ဆန်စက်အလုံးရေ (၁၀၇)လုံး ရှိပြီး စိုက်ပျိုးပြီး စပါးများကို ဝယ်ယူကြိတ်ခွဲလျက်ရှိသည်။ ဆန်နှင့် ဆန်ကွဲ ကြိတ်ခွဲထွက်ရှိမှုများကို ရန်ကုန်တိုင်းဒေသကြီးသို့ အဓိကထား၍ တင်ပိုနေပြီး ရန်ကုန်မှတဆင့်  အခြား ဒေသများသို့ (စီးထွက်)လျက်ရှိသည်။  ရန်ကုန်သို့ ဆန်စီးထွက်မှုမှာ ၂၀၂၄ ခုနှစ် နိုဝင်ဘာလ ၁လတွင်း မအူပင်ခရိုင်မှ ဆန်အတင် (၂၅၇၄၃၁)အိတ် တင်ပို့ခဲ့ပြီး၊ ပျမ်းမျှ ဆန်တန်အားဖြင့် ၁၂၈၇၁.၅၅ တန် စီးထွက်ကြောင်း မြို့နယ်စစ်ဆေးရေး စာရင်းများ အရ သိရသည်။  

            ထို့ပြင် ဆန်ကွဲကို ရန်ကုန်မြို့သို့ တင်ပိုမှုအနေဖြင့် မအူပင်မြို့နယ်မှ    ဆန်ကွဲ နိုဝင်ဘာလ ၁လ အတွင်း (၂၈၇၇၉)အိတ် တန်အားဖြင့် ၁၄၃၈.၉၅ တန်စီးထွက်ကြောင်းသိရသည်။  ဆန်/ဆန်ကွဲများ ကို ရန်ကုန် ရွှေပြည်သာ၊ လှိုင်သာယာ၊ မရမ်းကုန်း၊ အလုံဆိပ်ကမ်း၊ ကြီးမြင်တိုင်ဆိပ်ကမ်း၊ သီလဝါ စက်မှုဇုန်၊ တို့ကိုသာ တင်ပိုကြောင်း သိရသည်။

            ယနေ့ ဒီဇင်ဘာလ ၁ရက်မှ ၁၉ ရက်အတွင်း ဆန်အိတ် (၁၃၇၀၃၂)အိတ် တန်အားဖြင့် ၆၈၅၂တန်နှင့် ဆန်ကွဲ (၃၁၉၃၂)အိတ် တန်အားဖြင့် ၁၅၉၆ တန် တင်ပို့ခဲ့ကြောင်း တိုင်းဒေသကြီး နယ်စပ်ဖြတ်ကျော် ပန်တိုင်စုပေါင်းစစ်ဆေးရေးဂိတ် စာရင်းများအရ သိရှိရသည်။

            အဆိုပါ စီးထွက်မှုမှာ ၂၀၂၄ခုနှစ် အောက်တိုဘာလ နှင့် နိုဝင်ဘာလ စီးထွက်မှုကို နှိုင်းယှဉ်ပါက စီးထွက်မှု ဆန်အိတ်(၁၇၄၃၀၇)အိတ်၊ တန်အားဖြင့် ၂၅၃၂၇၅ တန် ပိုမိုတင်ပို့ကြောင်းနှင့်  ဆန်ကွဲ အိတ်(၁၈၉၀၈)အိတ်၊ တန်အားဖြင့် ၉၄၅ တန်ပိုမို စီးထွက်ခဲ့ကြောင်း သိရှိရပါသည်။

DOCA(ဧရာဝတီ)

         ပြည်မြို့နယ်တွင် ငရုတ်ပင်ကို နေရာအနှံအပြားတွင်စိုက်ပျိုးကြသလို တစ်နှစ်ပတ်လုံးလည်း ထွက်ရှိပါသည်။ နေရာဒေသကိုလိုက်၍ ငရုတ်သီးထွက်ပေါ်ချိန်နှင့် အထွက်နှုန်းသာကွာခြားပါသည်။ ပြည်ခရိုင်အနေဖြင့် ငရုတ်စိုကိုဦးစားပေး၍ စိုက်ပျိုးကြသဖြင့် မိုးငရုတ်သီးစိမ်းစိုက်ဧကမှာ (၆၇၅) ဧကရှိပြီး အထွက်းနှုန်းမှာ ပျမ်းမျှ ပိဿာ ၁၃၀၀ကျော်ထွက်ရှိကြောင်း သိရပါသည်။ ယခုအချိန်တွင် ဆောင်းငရုတ်စိုများစိုက်ပျိုးလျှက်ရှိပြီး စိုက်ဧကမှာ (၁၀၃)ဧကရှိစိုက်ပျိုးထားကြောင်း သိရှိရပါ သည်။ ငရုတ်စိုကို စိုက်ပျိုးပြီး (၂-၃)လအကြာတွင် ငရုတ်သီးများစတင်ခူးဆွတ်ရပါသည်။ ငရုတ်သီးခူးဆွတ်ရာတွင် တစ်ဧကလျှင် ငါးရက်တစ်ကြိမ်ခူးဆွတ်ရပါသည်။ ငရုတ်သီးစိမ်းအမျိုးမျိုးရှိပြီး ကျောက်စိမ်းငရုတ်၊ ပီနန်ငရုတ်၊ ပီနန်ယောက်ဖ၊ ကုလားအော်သီး၊ မိုးမျှော်ငရုတ်သီးဟူ၍ အမျိုးအစားပေါင်းများစွာရှိပါသည်။ ငရုတ်သီးစိမ်းအရောင်မှာလည်းကွဲပြားပါသည်။ အဖြူရောင်၊ ဆင်စွယ်ရောင်၊ အဝါနုရောင်၊ အဝါရင့်ရောင်၊ အစိမ်ရောင်ဆိုပြီး အရောင်အမျိုးမျိုးရှိပြီး ရင့်မှည့်လျှင် အနီရောင်နှင့် အဝါဖျော့ဖျော့အရောင်များလည်းရှိပါသည်။

           ပြည်မြို့နယ်တွင် ငရုတ်သီးစိမ်းကို ခွေးရဲကျေးရွာ၊ မှော်ဇာကျေးရွာတို့အပြင် အချို့သောကျေးရွာအတော်များများမှာလည်း စီးပွားဖြစ်စိုက်ပျိုးကြပါသည်။ ငရုတ်သီးစိမ်းဈေးကွက်အနေဖြင့် ထွက်ရှိလာသောငရုတ်သီးစိမ်းများကို ပြည်ဈေးကွက်သို့တင်ပို့ရောင်းချပြီး ပြည်ဈေးကွက်မှတစ်ဆင့် ရန်ကုန်မြို့နှင့် အခြားနယ်မြို့များသို့ တင်ပို့ရောင်းချကြောင်းသိရပါသည်။ ဈေးနှုန်းများအနေဖြင့် ပီနန်ငရုတ်သီးစိမ်းတစ်ပိဿာလျှင် (၁၂၀၀၀)ကျပ်ဈေးဖြင့် ရောင်းချသလို ကျောက်စိမ်း ငရုတ်သီးတစ်ပိဿာလျှင် (၉၀၀၀)ကျပ်ဖြင့်ရောင်းဝယ်လျက်ရှိပါသည်။

          ငရုတ်သီးစိုက်ပျိုးသူတောင်သူများအဖို့ ငရုတ်သီးဈေးမှာ ယခင်နှစ်ထက် ကောင်းမွန်လာသဖြင့် တိုးချဲ့စိုက်ပျိုးလာကြသလို အမြတ်အစွန်းများလည်းပိုမိုရရှိလာမည်ဖြစ်ပါသည်။ ငရုတ်သီးဝယ်လိုအားများလာလျင် စိုက်ပျိုးမှုများလာသဖြင့် ဝယ်လိုအားအနည်းအများပေါ်မူတည်၍နေကြောင်း သိရပါသည်။ ငရုတ်သီးကို မျိုးကောင်းမျိုးသန့်ရွေးခြယ်စိုက်ပျိုးပြီး၊ နည်းပညာများဖြင့် မှိုရောဂါကင်းပြီး အရည်အသွေးပြည့်မီလျင် ပြည်ပဝယ်လိုအားကောင်းလာမည်ဖြစ်ပြီး အကျိုးအမြတ်များပိုမိုရရှိလာနိုင်မည်ဖြစ်ကြောင်း သိရှိရပါသည်။

DOCA(ပဲခူး)

            ပြည်ခရိုင်တွင် ပဲမျိုးစုံအရောင်းအဝယ် ဖြစ်လျက်ရှိရာ ယခုဒီဇင်ဘာလ တတိယပတ်တွင် ပဲတီစိမ်းနှင့် ဘိုကိတ်ပဲအသစ်များ ပန်းတောင်း၊ ကံမဘက်မှ ဝင်ရောက်လာပြီး ဘိုကိတ်အဝင် တစ်ရက်ကိုအိတ် (၂၀၀-၃၀၀)ခန့်အဝင်ရှိပါသည်။ ဘိုကိတ်ပဲသစ်တစ်တင်းကို ၉၀၀၀၀ကျပ် ဈေးဖြင့်ဈေးစဖွင့်ခဲ့ပါသည်။ ဘိုကိတ်ပဲသီးနှံကို မြို့တွင်းအဝယ်နှင့် ရန်ကုန်တစ်ရက်ကို အိတ်(၁၀၀-၂၀၀)ခန့်အရောင်းအဝယ်ရှိခဲ့ပါသည်။ ဒီဇင်ဘာလဒုတိယပတ်တွင် ပဲတီစိမ်းအသစ်များမှလည်း ပန်းတောင်း၊ ကံမဘက်မှ အဝင်ရှိပြီး ပဲတစ်တင်းကို ၉၇၀၀၀-၉၈၀၀၀ကျပ် ဈေးဖြင့် အရောင်းအဝယ်ဖြစ်လျက်ရှိပါသည်။ ပဲတီစိမ်းအဝင်မှာ တစ်ရက်ကို အိတ်(၅၀၀-၆၀၀)ခန့် အဝင်ရှိပြီး အရောင်းအဝယ်ဖြစ်မှုမှာ တစ်ရက်ကို အိတ်(၅၀၀-၆၀၀)ခန့် အရောင်းအဝယ်ဖြစ်လျက်ရှိပါသည်။ ပြည်ခရိုင်၊ ပြည်မြို့သည် ဒေသအချက်အချာကျသော မြို့ဖြစ်၍ ပဲအရောင်းအဝယ်ဖြစ်မှုမှာလည်း သွက်လျက်ရှိကြောင်းသိရှိရပါသည်။

DOCA(ပဲခူး)

            ၂၀၂၄ ခုနှစ်၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မြို့မစည်ပင်သာယာဈေး ကွက်အတွင်းသို့ ဒေသထွက်ခရမ်းချဉ်သီးများနှင့်ရှမ်းပြည်နယ် အောင်ပန်းတို့မှထွက်ရှိသော ခရမ်းချဉ်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

         ခရမ်းချဉ်သီးများသည် ယခုအချိန်အခါကာလဖြစ်သည့် ဆောင်းရာသီတွင် မိမိတို့ဒေသထွက် ခရမ်းချဉ်သီးများ ဈေးကွက်အတွင်းသို့ ဝင်ရောက်ကာ လှိုင်လှိုင်ထွက်ရှိလာသည့်အတွက် ဒေသတွင်းခရမ်းချဉ်သီးများကိုသာ မှာယူရောင်းချရပါသည်။ ဒေသထွက် ခရမ်းချဉ်သီးမှာ အချိန်ကြာမြင့်စွာထားလျင် ပုတ်လွယ်ပြီး အထားမခံသည့်အတွက် အကြိုက်နည်းကြပြီး ဈေးနှုန်းသက်သာကြောင့် ဒေသထွက်ခရမ်းချဉ်သီးများကိုသာ လှိုင်လှိုင်ဝယ်ယူရောင်းချလျက်ရှိကြောင်း၊ ယခင် နိုဝင်ဘာလတွင် ခရမ်းချဉ်သီးဈေးနှုန်းများမှာ တစ်ပိဿာလျှင် (၈၀၀၀/၁၀၀၀၀)ကျပ် ဈေးနှုန်ုးတို့ ဖြစ်ခဲ့ကြောင်း သိရှိရပါသည်။

             ယခု ဒီဇင်ဘာလ တတိယအပတ်တွင် ဒေသထွက်ခရမ်းချဉ်သီး ဈေးနှုန်းအနေဖြင့် ထိုင်ဝမ်အမျိုးအစား ခရမ်းချဉ်သီးနှင့် ရိုးရိုးဗမာ အမျိုးအစား ခရမ်းချဉ်သီးဟူ၍ နှစ်မျိုးပေါ်လာပြီး ရိုးရိုးဗမာခရမ်းချဉ်သီး တစ်ပိဿာလျှင်(၈၀၀၀)ကျပ်၊ ၂၅ကျပ်သားလျှင်(၂၀၀၀)ကျပ်နှင့် ထိုင်ဝမ်ခရမ်းချဉ်သီး အလုံးအကြီး/ အသေး ပေါ်မူတည်၍တစ်ပိဿာလျှင်(၅၀၀၀/၆၀၀၀)ကျပ် ဖြစ်ပြီး (၂၅)ကျပ်သားလျှင် (၁၅၀၀)ကျပ် ဈေးနှုန်းဖြင့် အရောင်းအဝယ်ဖြစ်လျက်ရှိပြီး ယခင် ဒီဇင်ဘာလ ဒုတိယပတ်နှင့် နှိုင်းယှဉ်ကြည့်မည့်ဆိုပါက  ခရမ်းချဉ်သီး ဈေးနှုန်း အနည်းငယ်ဈေးကျလျက်ရှိကြောင်း ကန့်ဘလူမြို့ ကုန်စိမ်းသီးနှံ အရောင်းအဝယ်လုပ်နေသူများထံမှ သိရှိရပါသည်။

DOCA(စစ်ကိုင်း)