ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ဟင်းသီးဟင်းရွက်များ၊ အသား၊ ငါးမျိုးစုံ ရောင်းချလျက်ရှိရာ တစ်နိုင်တစ်ပိုင် အသေးစားစီးပွားရေး လုပ်ငန်းအနေဖြင့် ကြက်ကင်၊ ငါးကင်နှင့် အခြားအကင်မျိုးစုံ စသည်ဖြင့် ရောင်းချနေကြောင်း၊ ကြက်သားနှင့် ငါးတို့ကို ကန့်ဘလူ မြို့မဈေးမှ ဝယ်ယူရကြောင်းသိရှိရသည်။

   ၂၀၂၅ခုနှစ်၊ အောက်တိုဘာလ တတိယပတ်အတွင်း ကန့်ဘလူမြို့တွင် ရောင်းချနေသော အကင်ဈေးနှုန်းများမှာ အရွယ်အစားနှင့် အမျိုးအစားပေါ်မူတည်၍ ကွာခြားမှုရှိပြီး ငါးကင်အသေး တစ်ကောင်လျှင်(၅၀၀၀)ကျပ်၊ အကြီးတစ်ကောင်လျှင် (၈၀၀၀မှ ၁၃၀၀၀)ကျပ်၊ ကြက်ပေါင် (၁)ကင်လျှင် (၅၀၀၀)ကျပ်၊ ကြက်ရင်ပုံ(၁)ကင်လျှင် (၈၀၀၀)ကျပ်၊ ကြက်သဲမြစ်(၃)ချောင်း (၂၀၀၀) ကျပ်၊ ကြက်ခြေထောက်(၁)ချောင်း (၇၀၀)ကျပ်၊ ရုံးပတီသီး(၁)ကင် (၅၀၀)ကျပ်နှင့် အသားတုကင် (၆)ချောင်း (၁၀၀၀)ကျပ်ဈေးနှုန်းဖြင့် နေ့စဉ်အရောင်းအဝယ်ဖြစ်လျက်ရှိကြောင်း လုပ်ငန်းရှင်ထံမှ သိရှိရသည်။

DOCA (စစ်ကိုင်း)

     မုန်ညင်းဖူးသည် အပွင့်ဝါဝါလေးများနှင့်အရွက်စိမ်းစိမ်းရှိကာ အရွက်ထက်ပင်စည်ရိုးတံကို ကြော်စားလေ့ရှိပြီး ငါးပိရည်အတို့အမြှုပ်အဖြစ် မုန်ညင်းဖူးကို ပြုတ်စားခြင်း၊ ချဉ်ရည်ဟင်းအဖြစ် ချက်စားခြင်းတို့ ပြုလုပ်စားသုံးနိုင်ပါသည်။ မုန်ညင်းဖူးသည် အအေးကြိုက်သော သီးနှံဖြစ်သော ကြောင့် မေလမှ ဒီဇင်ဘာလအထိ စိုက်ပျိုးနိုင်ပြီး စိုက်ပျိုးပြီးအချိန်မှစ၍ ရက်ပေါင်း ၂၅ ရက်မှ ရက် ၅၀ အတွင်းစားသုံးနိုင်ပါသည်။ မုန်ညင်းဖူး အဓိကပေါ်ချိန်သည် အောက်တိုဘာလမှ ဖေဖော်ဝါရီလလောက်အထိဖြစ်ပြီး ထိုကာလများတွင် တွေ့ရသော မုန်ညင်းဖူးသည် ပို၍ လတ်ဆတ်ကာအရသာချိုမြပါသည်။

     တောင်ငူမြို့နယ်အတွင်းရှိ ညောင်ပင်လေးဈေးတွင် မုန်ညင်းဖူး ၁ စည်းလျှင် ၇၀၀ ကျပ် ဖြင့် ရောင်းချနေပြီး ယခုအောက်တိုဘာလသည် မုန်ညင်းဖူးများ စတင်ပေါ်ချိန် ဖြစ်သောကြောင့် ဈေးကောင်းလျက်ရှိနေပြီး နောက်ပိုင်းကာလများတွင် ဈေးနှုန်းကျဆင်းနိုင်ကြောင်း သိရသည်။

DOCA(ပဲခူး)   

           စစ်ကိုင်းတိုင်းဒေသကြီးသည် မြန်မာအမျိုးသမီးများ ကြိုက်နှစ်သက်စွာ အသုံးပြုနေကြသည့် သနပ်ခါးပင်များ စိုက်ပျိုးထွက်ရှိရာ ဒေသတစ်ခုဖြစ်ကြောင်း သိရသည်။ မြန်မာ့သနပ်ခါးသည် ကဗျာ၊ သီချင်းများ စပ်ဆိုရသည်အထိ ထင်းရှားပြီး၊ ရှေးယခင်ကပင် သနပ်ခါးကို နန်းတွင်းအလှကုန်အဖြစ် အသုံးပြုခဲ့ကြောင်း၊ မြန်မာ့ရိုးရာ အလှတရားတွင် သနပ်ခါးသည် အရေးပါသောအခန်းကဏ္ဍတွင် ပါဝင်ပြီး အမျိုးသမီးများသည် မျက်နှာကိုသနပ်ခါးဖြင့် အလှဆင်လေ့ရှိကြောင်း သိရှိရပါသည်။

     မြန်မာနိုင်ငံတွင် သနပ်ခါးသည် သဘာဝအလှကုန်ပစ္စည်းအဖြစ် ဈေးကွက်တွင် အရေးပါပြီး နိုင်ငံတကာတွင်လည်း စိတ်ဝင်စားမှုများလာကြောင်း၊ သနပ်ခါးသည် ကျန်းမာရေးနှင့် အလှအပတို့ အတွက် တန်ဖိုးမဖြတ်နိုင်သော သဘာဝလက်ဆောင်တစ်ခုဖြစ်ပြီး၊ ကန့်ဘလူမြို့မဈေးတွင် ရောင်းချ နေသော သနပ်ခါးတုံးများသည် ကန့်ဘလူခရိုင်အတွင်းမှ ထွက်ရှိသလို၊ ရွှေဘိုမြို့ရှိ လက်လီ၊လက္ကား သနပ်ခါးတုံး အရောင်းဆိုင်များမှလည်း ဝယ်ယူရောင်းချကြောင်း၊ အောက်တိုဘာလ တတိယပတ် အတွင်း မြန်မာ့ရိုးရာသနပ်ခါး(၁)တုံးလျှင် (၅၀၀၀မှ ၈၀၀၀)ကျပ်၊ အသေး(၁)တုံးလျှင် (၂၀၀၀)ကျပ် နှင့် (၃)တုံးလျှင် (၅၀၀၀)ကျပ်ဈေးနှုန်းဖြင့် ရောင်းချလျက်ရှိရာ အရွယ်အစားနှင့် အရည်အသွေးပေါ် မူတည်၍ ဈေးနှုန်းများကွာခြားကြောင်း လုပ်ငန်းရှင်များထံမှ သတင်းရရှိပါသည်။

DOCA (စစ်ကိုင်း)

       စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်၌ မြို့ပေါ်ရပ်ကွက်များနှင့် နတ်ပေး ကျေးရွာတွင် ဘူးပင်များစိုက်ပျိုးရောင်းချပြီး မိသားစုဝင်ငွေများ ရရှိလျက်ရှိကြောင်း၊ ဘူးပင်သည် ပူနွေးသော ရာသီဥတုကို ကြိုက်နှစ်သက်ပြီး အအေးဒဏ်ကို အသင့်အတင့်ခံနိုင်ရည်ရှိကြောင်း၊ ပုံသဏ္ဍန်ကိုလိုက်၍ ဘူးသပိတ်၊  ဘူးရှည်နှင့် ဘူးရေမှုတ်ဟူ၍ အမျိုးမျိုးရှိကြောင်း သိရှိရသည်။

        ကန့်ဘလူမြို့နယ်တွင် ဘူးပင်ကိုမိသားစုတစ်နိုင်တစ်ပိုင် စိုက်ပျိုးကြကြောင်း၊ ဈေးကွက် အနေဖြင့် ဘူးသီးများကို ကန့်ဘလူမြို့မဈေးတွင် ရောင်းချလျက်ရှိရာ အောက်တိုဘာလ တတိယ ပတ်တွင် ဘူးသီးအကြီးတစ်လုံးလျှင် (၃၀၀၀)ကျပ်၊ အသေးတစ်လုံးလျှင် (၂၀၀၀)ကျပ်နှင့် ဘူးသီး(၁) စိတ်လျှင် (၅၀၀မှ ၁၀၀၀)ကျပ်ဖြင့်လည်းကောင်း၊ ဘူးညွှန့်(၁)စီးလျှင် (၅၀၀)ကျပ်နှင့် (၅)စည်းလျှင် (၂၀၀၀)ကျပ်ဖြင့်ရောင်းချရကြောင်း၊ ဘူးသီးကို အကြော်ဆိုင်များမှ အဓိကဝယ်ယူပြီး စားသောက် ဆိုင်များနှင့် ထမင်းဆိုင်များကလည်း ဝယ်ယူကြောင်း ကုန်စိမ်းရောင်းချသည့် လုပ်ငန်းရှင်ထံမှ သတင်းရရှိပါသည်။

DOCA (စစ်ကိုင်း)

       ပဲခူးတိုင်းဒေသကြီး၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဂန်ကျေးရွာရှိ တောင်သူ ဦးတင်အောင်၏ တိုင်ထောင်ပဲစိုက်ခင်းသို့ (၁၃.၁၀.၂၀၂၅)ရက်နေ့၊ နံနက် (၁၀:၀၀)နာရီတွင် သွားရောက် ကွင်းဆင်းလေ့လာခဲ့ပါသည်။ မြားနီမျိုးဖြစ်သော တိုင်ထောင်ပဲများကို စက်တင်ဘာလအတွင်း စတင်စိုက်ပျိုး၍ အောက်တိုဘာ၊ ဒုတိယပတ်တွင် စတင်ခူးဆွတ်ရပါသည်။ စိုက်ဧက(၁) ယောက်စိုက်ဖြစ်ပြီး တိုင်အရေအတွက်မှာ ၅၀၀ ကျော်ရှိပါသည်။ တစ်ခါခူးဆွတ်လျှင် အတောင့် ၃၅၀၀ ကျော် ခူးဆွတ်ရောင်းချရပါသည်။ ရွာမှ ပွဲစားများမှ တစ်ထောင့်လျှင် (၁၀)ကျပ်နှုန်းဖြင့် လာရောက်ဝယ်ယူပြီး ရန်ကုန်မြို့သို့ တင်ပို့ရောင်းချကြပါသည်။ စတင်စိုက်ပျိုးချိန်မှ ခူးဆွတ်ချိန်ထိ စုစုပေါင်း ကုန်ကျစရိတ်မှာ (၃)သိန်းခန့်ရှိပြီး အကျိုးအမြတ်မှာ ခန့်မှန်း(၆)သိန်းကျော်ရရှိနိုင်ကြောင်း သိရှိရပါသည်။

DOCA(ပဲခူး)