ပြည်တွင်းကုန်သွယ်မှုသတင်း

            ပြည်တွင်းမွေးမြူရေးလုပ်ငန်းလုပ်ကိုင်သူများအနေဖြင့် ဥစားကြက်မွေးမြူရေးလုပ်ငန်းများ ပိုမိုကျယ်ပြန့် လာပါသည်။ ယခုအခါ ဥစားကြက်များကို မန္တလေးတိုင်းဒေသကြီး၊ ပြင်ဦးလွင်ခရိုင်တွင် ပိုမိုမွေးမြူလုပ်ကိုင် လျက်ရှိကြောင်းသိရှိရပါသည်။ ဥစားကြက်မွေးမြူတဲ့အခါ“ဥ”ထွက်နှုန်းကောင်းမွန်စေရန် အလွန်အရေးကြီးလှပါသည်။ ဥထွက်နှုန်းတိုးစေရန်အတွက် Ready made အစာအပြင်  အစာစိမ်းများ ကျွေးခြင်းအားဖြင့်လည်း “ဥ”ထွက်နှုန်းကို တိုးစေပါသည်။ ဥစားကြက်များကို စတင်မွေးမြူသည့်ရက်မှစ၍ (၅)လခန့်ကျော်ကျော်အတွင်း စတင် “ဥ” ဥကြောင်းသိရှိရပါသည်။ ဥစားကြက်တစ်ကောင်  “ဥ”ဥပြီးသည့်မှစ၍ (၆)လကျော်သက်တမ်း ထိသာ“ဥ”ကောင်းမွန်စွာ ဥနိုင်ကြောင်းသိရပါသည်။ ဥစားကြက်မတစ်ကောင်လျှင် သက်တမ်း(၁)နှစ်ထိသာ ထားရှိ ပါသည်။ ကြက်စာဈေးနှုန်းအနေဖြင့် တစ်အိတ်လျှင် (၁၂၀၀၀၀)ကျပ်ခန့် ရှိကြောင်းသိရှိရပြီး ပြောင်းဖူး၊ ဆန်ကွဲ၊ ဖွဲနု၊ ပဲဖတ်၊ နှမ်းဖတ်အစရှိသည်များဖြင့်လည်း ရောစပ်၍ ကျွေးနိုင်ပါသည်။ ဥစားကြက်မများကို တစ်နေ့တာ၏  ပူပြင်းသောအချိန်ထက် အေးမြသောအချိန်တွင် အစာကျွေးပါက ပိုမိုအစာဝင်လွယ်၍ ပိုမိုစားသောက်ကြပါသည်။ ဥစားကြက်များသည် အသားစားကြက်များကဲ့သို့ လျှင်မြန်စွာကြီးထွားရန် မလိုအပ်သောကြောင့် အသားစားကြက်များကဲ့သို့ အစာခဲများကျွေးခြင်းထက် အစာမှုန့်များကျွေးခြင်းက ပို၍သင့်တော်ပါသည်။ အစာခဲများကိုကျွေးပါက လျှင်မြန်စွာစားပြီးသောအခါ အချင်းချင်းထိုးဆိတ်တတ်သော အကျင့်ဖြစ်၍ နစ်နာဆုံးရှုံးမှုများ ဖြစ်တတ်သော ကြောင့်ဖြစ်ပါသည်။ ကြက်ဥဈေးကွက်အနေဖြင့် ပြင်ဦးလွင်မြို့နယ်တွင်းရှိ ကြက်ခြံများမှ မန္တလေး၊ ကျောက်ဆည်၊ မိတ္ထီလာမြို့များသို့ တင်ပို့ရောင်းချလျက်ရှိကြောင်း သိရှိရပါသည်။ ကြက်ဥဈေးနှုန်းအနေဖြင့် ကြက်ဥတစ်လုံးလျှင် (၄၀၀)ခန့်မှ(၅၀၀)ခန့်  နီးပါးအထိ အရွယ်အစား အလုံးအကြီးအသေးပေါ်မူတည်၍ ရောင်းချလျက်ရှိပါသည်။ ကြက်ခြံလက်ကားဈေးနှုန်းအနေဖြင့် တစ်ပိဿာလျှင်( ၉၅၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(မန္တလေး)

              မန္တလေးကုန်စိမ်းစျေးကွက်အတွင်းသို့ ဒေသတွင်းစိုက်ပျိုးသည့် ကုန်စိမ်းများ၊ စစ်ကိုင်းတိုင်းဒေသကြီးနှင့်ရှမ်းပြည်နယ်တောင်ပိုင်းဒေသတို့မှ စိုက်ပျိုးသည့်ကုန်စိမ်းများနေ့စဉ် အများအပြား ဝင်ရောက်လျက်ရှိကြောင်း သိရပါသည်။ မန္တလေးမြို့၊ ၄၁လမ်း၊ ကမ်းနားလမ်းကုန်စိမ်းစျေးနှင့် သီရိမာလာကုန်စိမ်းဈေးတို့မှာ ဟင်းသီးဟင်းရွက်ကုန်စိမ်းများ အဓိကထားရောင်းချလျက်ရှိသည့် လက်လီ/ လက္ကားစျေးများဖြစ်ပြီး၊ မြို့ပေါ်ရှိစျေးငယ်များမှတဆင့် ဝယ်ယူရောင်းချကြကြောင်း သိရပါသည်။ ကုန်စိမ်းသီးနှံမျိုးစုံဝင်ရောက်သည့်အမယ်များအနက်  စားဖိုဆောင်ဟင်းလျာတစ်မယ်ဖြစ်သည့် ချဉ်ပေါင်ရွက်နှင့်ချဉ်ပေါင်သီးမှာ အိမ်တိုင်းစားသုံးသည့်ဟင်းတစ်မျိုးဖြစ်ပါသည်။ ချဉ်ပေါင်ပင်မှာ ရာသီမရွေးစိုက်ပျိုးသည့်ဟင်းသီးဟင်းရွက်ဖြစ်ပြီး၊ချဉ်ပေါင်ပင်မှာ တစ်ပင်လုံးအကျိုးရှိရှိသုံးနိုင် ကြောင်း သိရပါသည်။ ချဉ်ပေါင်ပင်မှ အဖူးထွက်သည့်အထိထားရှိသည့် ချဉ်ပေါင်ဖူးအား ဆောင်း ရာသီစာအဖြစ် စားသုံးကြကြောင်း သိရှိရပါတသည်။ ချဉ်ပေါင်ဖူးစားသုံးခြင်းဖြင့် ကယ်လ်ဆီယမ်၊ သံဓာတ်၊ ဗီတာမင် A၊ ဗီတာမင် B1,B2,B3 ၊ ဗီတာမင် C ၊ မဂ္ဂနီဆီယမ်၊ ကာဗိုဟိုက်ဒရိတ်၊ ဖော့ဝင်တို့ ပါဝင်သည့်အတွက်သွားနှင့်သွားဖုံးများကျန်းမာစေခြင်း၊ အရိုးသန်မာစေခြင်း၊ အာရုံကြောအဖွဲ့အစည်း များနှင့်ကြွက်သားများဖွဲ့စည်းမှုတိုးတက်ကောင်းမွန်စေခြင်း၊ကိုယ်ခံအားစနစ်ကိုမြှင့်တင်ပေးနိုင်ခြင်း၊ ရောင်ရမ်းမှုကိုလျော့ကျစေခြင်း၊ ဝမ်းမှန်စေခြင်း၊ အသားအရေကြည်လင်စေခြင်း၊ မောပန်းမှုကို လျော့နည်းစေခြင်း၊သွေးတွင်းအဆီဓာတ်ကိုကျစေခြင်း၊ ဓာတ်တိုးဆန့်ကျင်သည့်အာနိသင်များရှိခြင်း၊ ဟော်မုန်းအပြောင်းအလဲကြောင့်ဖြစ်တတ်သောစိတ်ခံစားချက်များလျော့ကျစေခြင်း၊ ရောင်ကိုင်းခြင်းကို သက်သာစေခြင်းစတဲ့ အကျိုးကျေးဇူးများရရှိစေကြောင်း သိရပါသည်။ ချဉ်ပေါင်ဖူးကို ဟင်းအဖြစ်ကြော်စားခြင်း၊ ချက်စားခြင်း၊ထောင်းစားခြင်း၊အခြောက်ခံ၍ ချဉ်ပေါင်ဖူးရေနွေးကြမ်း အဖြစ်သောက် သုံးခြင်း၊ ယိုထိုးခြင်း၊ ချဉ်ပေါင်ဖျော်ရည်၊ချဉ်ပေါင်ဖူးဂျယ်လီ၊ဖျော်ရည်မှုန့်၊ ရှာလကာရည်၊ဖေျာ်ရည်မှုန့်၊ သောက်‌ဆေးများ၊ ချဉ်ပေါင်ဖူးဝိုင်၊ ချိုချဉ်၊ တော်ဖီ၊ သရေစာမုန့်၊ မျက်နှာပေါင်းတင်မှုန့်တို့ ပြုလုပ်စားသုံးကြကြောင်းသိရပါသည်။ ချဉ်ပေါင်ဖူးများအား စျေးကွက်အတွင်း ပြည်ချိန်ဖြင့်လည်းကောင်း၊ ပိဿာချိန်ဖြင့် လည်းကောင်းရောင်းချလျက်ရှိပြီး၊ဇန်နဝါရီလဒုတိယပတ်တွင် ချဉ်ပေါင်ဖူးစျေးနှုန်း အနေဖြင့် တစ်ပိဿာလျှင် လက္ကားစျေး ၃၅၀ဝိ/- နှင့် ၄၀၀ဝိ/-၊လက်လီစျေး ၄၅၀ဝိ/-နှင့် ၅၅၀ဝိ/-စျေးအသီးသီးဖြင့် ရောင်းချလျက်ရှိကြောင်းသိရပါသည်။သီရိမာလာစျေးကုန်စိမ်းလက်လီ/လက္ကား စျေးသို့ ဟင်းသီးဟင်းရွက်မျိုးစုံဝင်ရောက်မှုအနေဖြင့်  နေ့စဉ် Canter (၆ ဘီး)(၁၂ဘီး) ယာဉ် (၄၀)စီး နှင့်(၆၀)စီးအကြားဝင်ရောက်လျက်ရှိကြောင်းပြီး ရာသီစာချဉ်ပေါင်ဖူးအမယ်မှာ ဇန်နဝါရီလ ဒုတိယ ပတ်အတွင်းအရောင်းသွက်သည့် ကုန်စိမ်းသီးနှံအမယ်တစ်မျိုးဖြစ်ပါကြောင်း ကုန်စိမ်းရောင်းချသည့် ဆိုင်ရှင်တစ်ဦး၏ ပြောပြချက်များအရ သိရှိရပါသည်။

               ကုန်းကန်ဇွန်းဥထွက်ရှိရာဒေသများဖြစ်ကြသည့် တောင်ကြီး၊ ပင်းတယ၊ ကလော၊ အောင်ပန်းနယ်များမှ  ထွက်ရှိသည့်ကန်ဇွန်းဥနှစ်မျိုးရှိသည်။ ရွှေနီကန်ဇွန်းဥနှင့် ခရမ်းရောင်ကန်ဇွန်းဥတို့ဖြစ်ပြီး ရေကန်ဇွန်းဥခေါ် ယာကွန်ဥမှာ အအေးပိုင်းဒေသများဖြစ်သည့် တောင်ကြီးမြို့နှင့် မိုးကုတ်မြို့တို့မှ အများဆုံးထွက်ရှိကြောင်းသိရှိရသည်။ ကန်ဇွန်းဥများကို မန္တလေးပွဲရုံများမှတစ်ဆင့် အနယ်နယ် အရပ်ရပ် ဈေးကလေးမြို့သို့ ဝယ်ယူရောင်းချကြသည်။ ကုန်းကန်ဇွန်းဥကို ပြုတ်၍သော်လည်းကောင်း၊ ဖုတ်၍သော်လည်းကောင်း၊ ကန်ဇွန်းဥယို  ပြုလုပ်၍ သော်လည်းကောင်း၊ အုန်းလုံးကြော်ပြုလုပ်၍သော်လည်းကောင်း ရောင်းချကြပြီး ခရမ်းရောင်ကန်ဇွန်းဥကိုမူပြုတ်၍ရောင်းချခြင်းနှင့် ကန်ဇွန်းဥမုန့်ခြောက်ပြုလုပ်ရာတွင် အသုံးများကြ သည်။ယခင်နှစ်က ရွှေနီကန်ဇွန်းဥတစ်ပိဿာလျှင်-၂၀၀၀ကျပ်၊ ခရမ်းရောင်ကန်ဇွန်းဥ တစ်ပိဿာလျှင်၄၀၀၀ကျပ်အထိရှိကြောင်းသိရှိရသည်။ရေကန်ဇွန်းဥခေါ်ယာကွန်ဥမှာတစ်ပိဿာ လျှင်၁၅၀၀၀မှ၁၆၀၀၀ကျပ်အထိအရွယ်အစားအလိုက်ရောင်းချကြောင်းသိရှိရသည်။ ရေကန်ဇွန်းဥ အသုံးပြုရာတွင် ကုန်းကန်ဇွန်းဥကဲ့သို့ ပြုတ်၍သော်လည်းကောင်း၊ ယိုထိုး၍သော်လည်းကောင်း စားသုံးရန်မဟုတ်ဘဲ အစိမ်းကိုအခွံနွှာပြီး စားကြသည်။ ရေကန်ဇွန်းဥသည် ပဲစိမ်းစားဥကဲ့သို့ အရည်ရွှမ်းပြီး အလွန်ချိုသည်။ရေကန်ဇွန်းဥစားသုံးခြင်းဖြင့် ဝမ်းမှန်/ ဆီးမှန်စေခြင်း၊ ခန္ဓာကိုယ်အတွင်းရှိ မကောင်းသော အဆီဓါတ်များကို ဖယ်ရှားပေးခြင်း၊ သွေးအတွင်းရှိ အချိုဓါတ်များကို လျော့နည်းစေခြင်း၊ အမျှင်ဓါတ်ပါ၍ အူမကြီးကင်ဆာဖြစ်စေခြင်းမှ ကာကွယ်ပေးခြင်းစသည့်အကျိုးကျေးဇူးများရရှိနိုင်ကြောင်းသိရှိရသည်။ ကန်ဇွန်းဥအမျိုးအစားနှစ်မျိုးလုံးကို တောင်ကြီးထွက်ကုန်များနှင့်ရောနှော၍ တစ်ရက်လျှင် ပီနံအိတ် ၃၀/၅၀ ခန့် ဝင်ရောက်လျက်ရှိကြောင်း ရောင်းချသည့်ပွဲရုံများမှ သိရှိရပါသည်။

DOCA(မန္တလေး)

           မိတ္ထီလာမြို့ရှိ   ဘဲကန်ဈေး(သို့)(၈)နာရီလက်ကား ဟင်းသီးဟင်းရွက်ဈေးသည် မိတ္ထီလာခရိုင် အတွင်းရှိ မြို့နယ်များနှင့် မိတ္ထီလာမြို့ရှိ ကုန်စိမ်းရောင်းချသူများ တဆင့်ပြန်လည်ရောင်းချရန် ဝယ်ယူကြသည့်ဈေးဖြစ်ပါသည်။ ဘဲကန်ဈေး(သို့)(၈)နာရီဈေးတွင် မိတ္ထီလာမြို့နယ်ရှိ ဟင်းသီးဟင်းရွက် စိုက်ပျိုးသော ဆည်ကုန်း၊ ချမ်းသာကြီး၊ ကြက်မောက် ရွာတို့မှ လာရောက်ရောင်းချကြပြီး အခြားဒေသများ ဖြစ်သည့် တပ်ကုန်း၊ အောင်ပန်း၊ ပြင်ဦးလွင်မြို့များမှ ဝင်ရောက်သည့် ဟင်းသီးဟင်းရွက်များကိုလည်း ရောင်းဝယ်ဖောက်ကား‌ကြောင်းသိရသည်။

           ယခု ဇန်နဝါရီလ ဒုတိယပတ်တွင် ဘဲကန်ဈေး(သို့)(၈)နာရီဈေးတွင်းရှိ ရောင်းချနေသော ဟင်းသီးဟင်းရွက်ဈေးနှုန်းများမှာ ထောပတ်ပဲ တစ်ပိဿာ (၈၅၀၀) ကျပ်၊ ပဲလိပ်ပြာတစ်ပြည် (၇၀၀၀) ကျပ်၊ ပဲတောင့်ရှည်တစ်ပိဿာ (၂၅၀၀) ကျပ်၊ ခရမ်းချဉ်သီးရှမ်းသီးတစ်ပိဿာ (၂၀၀၀-၃၀၀၀)ကျပ်၊ ကန်စွန်း ရွက်တစ်ပိဿာ(၁၅၀၀) ကျပ်၊ ပြောင်းဖူး(၁၀)ဖူး (၄၀၀၀) ကျပ်၊ မုန့်လာဥ ငါးလုံးပါတစ်တွဲ (၄၀၀) ကျပ်နှင့် ရှမ်းကုန်များဖြစ်သော ခါကြက်ဥတစ်ပိဿာ (၂၅၀၀-၃၀၀၀) ကျပ်၊ဘိုစားပဲသီဂတစ်ပိဿာ (၂၀၀၀-၃၀၀၀) ကျပ်၊ ပန်းဂေါ်ဖီပွင့်တစ်ပွင့် (၁၀၀၀-၁၅၀၀) ကျပ၊ ဂေါ်ဖီထုတ်တစ်ထုပ် (၈၀၀-၁၀၀၀) ကျပ်၊ မုန်ညှင်းဖူး(၁၀)စည်းပါတစ်စည်း (၁၃၀၀) ကျပ်၊ငရုတ်သီးစိမ်းတစ်ပိဿာ (၃၀၀၀)ကျပ်၊ မုန်ညှင်း ထုတ်တစ်ပိဿာ (၁၅၀၀) ကျပ်ဈေးတို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မန္တလေး)

          မိတ္ထီလာမြို့ဈေးကွက်တွင် ဒေသတွင်းထွက်ရှိသော ဗမာခရမ်းချဉ်သီး၊ ထိုင်ဝမ်သီး ခရမ်းချဉ်သီးနှင့် ရှမ်းပြည်နယ်အောင်ပန်းဘက်မှလာသော ရှမ်းသီးများ ရောင်းဝယ်ဖောက်ကား လျက်ရှိပါသည်။ မိတ္ထီလာမြို့နယ်တွင် ခရမ်းချဉ်သီးကို ရွာကန်၊ဂွေ့အိုင်၊ရွာသစ်၊မကျီးကုန်း၊ ကျောက်ဖူး၊ မယ်ဇလီကုန်း၊ ကံတောင်၊ကျေးရွာများတွင် မိသားစုအပိုဝင်ငွေ ရရှိအောင် တစ်နိုင်တစ်ပိုင် စိုက်ပျိုး ရောင်းချကြရာ ယခုအခါ ဈေးကွက်အတွင်း ခရမ်းချဉ် သီးဈေးကောင်းရ၍ ခရမ်းချဉ်သီး (ပြည်ပ) မျိုးများကို တစ်နှစ်သုံးကြိမ် စိုက်ပျိုး ကြောင်းသိ ရပါသည်။ မိုးရာသီ ဇွန်လတွင် စိုက်ပျိုးကြပြီး သြဂုတ်လ နှင့်အောက်တိုဘာ၊ နိုဝင်ဘာလ များတွင်လည်း စိုက်ပျိုးကြကြောင်း၊ ခရမ်းချဉ်သီးစိုက်ပျိုးရာ တွင် ဧကလိုက် စိုက်ပျိုးခြင်းနည်းပြီး တစ်ပိုင်တစ်နိုင်ပျိုးထုတ် အလိုက်စိုက်ပျိုးကြကြောင်း၊ ခရမ်းချဉ် သီးမျိုးများမှ Sungenta ကုမ္ပဏီမှ (111) တံဆိပ်နှင့် ချီရာထိုင်းကုမ္ပဏီမှ (100) တံဆိပ်၊ (909)တံဆိပ်မျိုးများကို အများဆုံးစိုက်ပျိုးကြကြောင်း၊ (111) တံဆိပ်မျိုးစေ့ (5kg) တစ်ထုပ်လျှင် (၃၆၀၀၀) ကျပ် နှင့် (100) တံဆိပ်မျိုးစေ့ (5 kg) တစ်ထုပ်လျှင် (၂၈၀၀၀) ကျပ်၊ (909)တံဆိပ်(5 kg) တစ်ထုပ်လျှင် (၃၃၀၀၀) ကျပ်ဈေးရှိပြီးအပင်ပေါက်နှုန်း(၈၀%)ခန့်ရှိကြောင်းသိရပါသည်။

             ခရမ်းချဉ်သီးစိုက်ပျိုးရာတွင်  မျိုးစေ့တစ်ထုပ်လျှင်မြေ(၀.၁၅)ဧက ပေါ်တွင် ပျိုးပင် (၁၂၀၀) ခန့် စိုက်ပျိုးနိုင်ပြီး ပျိုးပင်(၂၀) ရက်သားခန့်တွင် ပြောင်းရွေ့ စိုက်ပျိုးရပါကြောင်း၊ ပျိုးအိတ် တစ်ပေါင်ခွဲ တစ်ထုပ်လျှင်(၆၃၀၀) ကျပ်ရှိကြောင်း၊ ပြောင်းရွေ့စိုက်ပျိုးရန် ထွန်ယက်ခြင်း၊ မြေပြု ပြင်ခြင်း၊ တန်းဆွဲခြင်း၊ ရေတင်ခြင်း၊ ဘောင်တင်စိုက်ပျိုးခြင်းတို့အတွက် လုပ်သားခ  (၂၂၀၀၀၀)ကျပ်၊ သွင်းအားစု မြေဩဇာကို သုံးကြိမ်ကျွေးရပြီး သွင်းအားစုနှင့် ပိုးသတ်ဆေး၊ မှိုရောဂါကာကွယ်ဆေး၊ အပင်၊ အသီး၊ အပွင့်အားဆေးများ အသုံးပြုခြင်းအတွက် (၂၅၀၀၀၀) ကျပ်၊ ခရမ်းချဉ်သီး တိုင်ထောင် ခြင်းအတွက် တိုင်(၄၅၀)လုံးအသုံးပြုရပြီး တိုင်နှင့်ကြိုးတန်ဖိုး(၁၅၀၀၀၀)ကျပ်၊ ခူးဆွတ်သည့် လုပ်အား ခအနေဖြင့် (၁၀၀၀၀၀) ကျပ်ခန့်ကုန်ကျပြီး စုစုပေါင်း (111) တံဆိပ်မျိုးစေ့ထုပ်တစ်ထုပ်စိုက်ပျိုးလျှင် (၇၆၂၃၀၀) ကျပ် ကုန်ကျစရိတ်ရှိကြောင်းသိရပါသည်။ မျိုးစေ့တစ်ထုပ်လျှင် အပင်ဖြစ်ထွန်းမှု (၁၂၀၀) ပင်ရှိပြီး၊ စတင်စိုက်ပျိုးပြီးရက်ပေါင်း(၇၅)ရက်တွင်စတင်ခူးဆွတ်ရပြီး ခူးဆွတ်ကာလမှ (၂)လခန့်ထိ ခူးဆွတ်နိုင်သဖြင့် မျိုးစေ့တစ်ထုပ် စိုက်လျှင် ခရမ်းချဉ်သီး (၂၀၀၀) ပိဿာထွက်ရှိပါသည်။

           မိတ္ထီလာမြို့ရှိ ခရမ်းချဉ်သီးပွဲရုံများသို့ တင်ပို့ရောင်းချကြပြီး၊ ယခုလက်ရှိတွင် ဒေသတွင်း အောက်တိုဘာလမှ စိုက်ပျိုးသော ခရမ်းချဉ်သီးများဈေးကွက်ဝင်ရောက်လာသဖြင့် ရှမ်းပြည်နယ်ဘက်မှ အဝင်နည်းလာကြောင်း၊ ဒေသထွက် ခရမ်းချဉ်သီးများကို မိတ္ထီလာခရိုင်အတွင်း မြို့နယ်များသို့ ရောင်းချကြပြီး  ပွဲရုံသွင်းဈေး တစ်ပိဿာလျှင် (၁၅၀၀) ကျပ်ခန့်၊ လက်လီဈေးကွက်တွင် ဗမာခရမ်းချဉ်သီးတစ်ပိဿာလျှင် (၂၅၀၀-၃၀၀၀)ကျပ်၊ ထိုင်ဝမ်းသီး တစ်ပိဿာလျှင် (၃၀၀၀-၃၅၀၀) ကျပ်ဈေးခန့်ရှိသဖြင့် ခရမ်းချဉ်စိုက်တောင်သူများလည်း အကျိုးအမြတ်များစွာရရှိကြောင်း ခရမ်းချဉ်စိုက်တောင်သူများထံမှ သိရှိရပါသည်။

DOCA(မန္တလေး)