ပြည်တွင်းကုန်သွယ်မှုသတင်း

    မန္တလေးတိုင်းဒေသကြီး၊ ကျောက်ဆည်ခရိုင်တွင် စားဖိုဆောင်သီးနှံမျိုးစုံနှင့် ပြောင်းအမျိုးမျိုးတို့းစိုက်ပျိုးသည့်အပြင် နှံစားပြောင်းသီးနှံများကိုလည်းစိုက်ပျိုးလျက်ရှိပါသည်။ (၂၀၂၃-၂၀၂၄) ဘဏ္ဍာနှစ်တွင် နှံစားပြောင်းစိုက်ဧက (၃၁၇၇)ဧက အောင်မြင်စွာစိုက်ပျိုးပြီးစီးပြီဖြစ်ကြောင်း သက်ဆိုင်ရာဌာန၏ စာရင်းများအရသိရှိရပါသည်။ ကျောက်ဆည်မြို့နယ်၊ တောင်တော်ကျေးရွာ၊  နောင်ခမ်းကျေးရွာနှင့် ကင်းကျေးရွာတို့ရှိ ကုန်းကွက်များ၌ အများဆုံးစိုက်ပျိုးလျက်ရှိကြောင်း၊ စိုက်ပျိုးပြီး (၃-၄) လအကြာတွင် ရိတ်သိမ်းပြီးစီးပြီဖြစ်ကြောင်း၊ နှံစားပြောင်းသီးနှံစိုက်ပျိုးမှုတစ်ဧကမျိုးအနေဖြင့် (၄)ပြည်စိုက်ပျိုးရကြောင်း၊ စိုက်ပျိုးသောမျိုးများမှာ ထွက်တိုးနီနှင့်ထွက်တိုးဖြူမျိုးများစိုက်ပျိုးကြကြောင်း၊ မျိုး(၁)ပြည်လျှင် (၃၀၀၀)ကျပ်ပေးရကြောင်း၊  ပြောင်းစိုက်ပျိုးမှု(၁)ဧကလျှင် ကုန်ကျစရိတ်အနေဖြင့် (၂၀၀၀၀၀)ကျပ်ကုန်ကျကြောင်း၊ ယခင်နှစ်စိုက်ပျိုးမှုတွင် (၁)ဧကရိတ်သိမ်းခြွေပြီးသည်အထိ (၃၀၀၀၀၀)ကျပ်ကုန်ကျပြီး အထွက်နှုန်းအနေဖြင့် (၃၅)တင်းထွက်ရှိခဲ့ပြီး ပြောင်းတစ်တင်းလျှင် (၂၂၀၀၀)ကျပ်ဖြင့် ရောင်းချရသဖြင့် အကျိုးအမြတ်မှာ (၄၀၀၀၀၀)ကျပ်ခန့်ရရှိကြောင်း၊ နှံစားပြောင်းဖြတ်ပြီး ကျန်ရှိသောပြောင်းရိုးကိုရောင်းချပါက တစ်ဧကလျှင် (၁၀၀၀၀၀)ကျပ်ရောင်းရကြောင်း၊ နွားစာကျွေးမွေးရန်အတွက် လာရောက်ဝယ်ယူသူများလည်းရှိသဖြင့် ပြောင်းရိုးရောင်းချမှုဖြင့် မျိုးဖိုးပြန်လည်ရကြောင်း၊ နှံစားပြောင်းစိုက်ပျိုးမှုတွင် ကုန်ကျစရိတ်သက်သာပြီး အကျိုးအမြတ်များရရှိသဖြင့် နှံစားပြောင်းသီးနှံကို တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

     မန္တလေးတိုင်းဒေသကြီး၊ ကျောက်ဆည်ခရိုင်တွင် စားဖိုဆောင်သီးနှံများဖြစ်သော ခရမ်းချဉ်သီး၊ ငရုတ်သီးများအပြင် ကြက်သွန်သီးနှံလည်းစိုက်ပျိုးလျက်ရှိပြီး ခရိုင်အတွင်း ကြက်သွန်နီစိုက်ဧက (၁၉၉၄)ဧကစိုက်ပျိုးရန် လျာထားလျက်ရှိကြောင်း သက်ဆိုင်ရာဌာန၏ စာရင်းများအရသိရှိရပါသည်။ ၂၀၂၃ခုနှစ်၊ စက်တင်ဘာလ တတိယအပတ်မှစ၍ ကြက်သွန်နီများကို မြစ်သားမြို့နယ်အတွင်းရှိ ကသဲကုန်းကျေးရွာ၊ ထနောင်းကုန်းကျေးရွာနှင့် ရွှေကြာအင်းကျေးရွာများ၌ စတင်စိုက်ပျိုးလျက်ရှိပါသည်။ တစ်ဧကလျှင် စိုက်ပျိုးမှုမှာ (၁၅၀၀၀၀၀) ကျပ်ခန့်ကုန်ကျကြောင်း၊ မျိုးအနေဖြင့် ရွှေဖလားမျိုး၊ ရွှေဖလားထိပ်မောက်မျိုးများကို အများဆုံးစိုက်ပျိုးကြကြောင်း၊ ပျိုးထောင်စိုက်ပျိုးသူများရှိပြီး ပျိုးထောင်ချိန်မရသောတောင်သူများမှာလည်း မျိုးများဝယ်ယူ၍ စိုက်ပျိုးရကြောင်း၊ ပျိုးတစ်ပေါင်လျှင် (၂၀၀၀၀၀)ကျပ်ဖြင့် ဝယ်ယူစိုက်ပျိုးရကြောင်း၊ ရာသီဥတုအနေဖြင့် မိုးဖွဲဖွဲလေးများကျရောက်သဖြင့် ကြက်သွန်နီစိုက်ပျိုးမှုအတွက် အထောက်အကူဖြစ်သဖြင့် ကြက်သွန်နီစိုက်ပျိုးမှုအကောင်းဆုံးအချိန်ဖြစ်ကြောင်း စိုက်ပျိုးသူတောင်သူတစ်ဦး၏ပြောပြချက်အရ သိရှိရပါသည်။

DOCA(မန္တလေး)

     တောင်ငူမြို့နယ်၊ ငါးဖယ်အင်းကျေးရွာအုပ်စု၊ မင်းလမ်းကျေးရွာရှိ ဦးမြဝင်း၏ CP အသားတိုးဝက်နှင့် CP မျိုးစပ် ဝက်ကောင်ပေါက်များကို ဝယ်ယူနိုင်ရရှိနိုင်ပါသည်။ ၄၅ ရက်သား အသားတိုး ဝက်ပေါက်တစ်ကောင်လျှင် ၁၅၀၀၀၀ ကျပ်ပေးရပြီး နောက် ရက်ပေါင်း ၆၀ ကြာလျှင် ရောင်းတန်းဝင် ဝက်ကြီးတစ်ကောင်အဖြစ် ရောင်းချနိုင်ပါသည်။

       CP ဝက်စာ (ပိဿာ ၂၀)အိတ် တစ်အိတ်၊ ဆန်ကွဲ (ပိဿာ ၃၀ အိတ်) နှစ်အိတ်နှင့် ဖွဲနု (ပိဿာ ၂၀ အိတ်)တစ်အိတ်ကို‌ ရောစပ်ပြီး တစ်နေ့ကို သုံးကြိမ်ကျွေးရပါသည်။ ဝက်ပေါက်အစာ တစ်အိတ်လျှင် ၂၅၀၀၀ ကျပ်၊ ဝက်လတ်အစာ တစ်အိတ်လျှင် ၃၅၀၀၀ ကျပ်နှင့် ဝက်ကြီးအစာ တစ်အိတ်လျှင် ၅၀၀၀၀ ကျပ် ပေးရပါသည်။

   ရောင်းတန်းဝင် ဝက်ကြီးတစ်ကောင်ကို အချိန် တစ်ပိဿာလျှင် ၁၁၀၀၀ ကျပ်ဖြင့် ဝက်ဒိုင်များက ခြံအရောက်လာရောက်ဝယ်ယူပါသည်။ ယခင်က အသားတိုး CP ဝက်မွေးမြူရေးမှာ တွက်ချေကိုက်သော်လည်း ယခုအခါ အစာဈေးမြင့်တက်မှုကြောင့် အကျိုးအမြတ်နည်းပါးလာပါသည်။

     အသားတိုးဝက်မွေးမြူခြင်းထက် CP မျိုးစပ် ဝက်မမွေး၍ အကောင်ပေါက်ရောင်းချခြင်းက ပိုမိုအကျိုးအမြတ်ရရှိပါသည်။ CP မျိုးစပ် ၄၅ ရက်သား ဝက်ပေါက်တစ်ကောင်လျှင် ၁၅၀၀၀၀ ကျပ် ရောင်းချရကြောင်း သိရပါသည်။

DOCA(ပဲခူး)

     တောင်ငူမြို့တွင်  ရွှေဘိုပေါ်ဆန်းမှာ တစ်အိတ်လျှင် ၁၄၀၀၀၀ ကျပ်၊ ဖျာပုံပေါ်ဆန်းမှာ ယခင်အပတ်က တစ်အိတ်လျှင် ၁၃၀၀၀၀ ကျပ်၊ ဒေသပေါ်ဆန်းမှာ တစ်အိတ်လျှင် ၁၂၀၀၀၀ ကျပ် ဖြင့် ဈေးနှုန်းတည်ငြိမ်နေပါသည်။ ဧည့်မထ (မိုးဆန်)မှာ ယခင်အပတ်က တစ်အိတ်လျှင် ၈၇၀၀၀ ကျပ်ရှိရာမှ ယခုအပတ်တွင် ၈၃၀၀၀ ကျပ်၊ ဧည့်မထ(နွေဆန်)မှာ ယခင်အပတ်က တစ်အိတ်လျှင် ၆၇၀၀၀ ကျပ်ရှိရာမှ ယခုအပတ်တွင် ၆၀၀၀၀ ကျပ်ဖြင့် ဈေးနှုန်းအနည်းငယ်ကျဆင်းပါသည်။  

      မိုးစပါး တင်း ၁၀၀ လျှင် ၂၃၀၀၀၀၀ ကျပ်၊ နွေစပါး တင်း ၁၀၀ လျှင် ၂၀၀၀၀၀၀ ကျပ်၊ ဆန်ကွဲကြီး တစ်အိတ်လျှင် ၄၈၀၀၀ ကျပ်၊ ဆန်ကွဲသေး တစ်အိတ်လျှင် ၄၅၀၀၀ ကျပ်၊ ဖွဲနုမှာ ၂၉၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

    မတ်ပဲ(၃၀ ပိဿာအိတ်) ယခင်အပတ်က တစ်အိတ်လျှင် ၁၂၃၇၀၀ ကျပ်ရှိရာမှ ယခုအပတ်တွင် ၁၁၇၀၀၀ ကျပ်ဖြင့် ဈေးပြန်လည်ကျဆင်းပါသည်။ ပဲလွန်းဖြူနှင့် ပဲတီစိမ်းမှာ အရောင်းအဝယ်မရှိကြောင်း သိရပါသည်။

DOCA(ပဲခူး)

    မာလကာပင်သည် မြန်မာပြည်တွင် နေရာအနှံ့အပြားဆိုသလို ပေါပေါများများ တွေ့မြင်ရပါသည်။  အမျိုးအစားပေါ်မူတည်၍ မာလကာသီး၏ အတွင်းပိုင်းအသားသည် အဖြူရောင် (အူဖြူသီး)နှင့် ပန်းရင့်ရောင်(သို့မဟုတ်) ကြက်သွေးပျော့ရောင် (အူနီသီး)ဟူ၍ နှစ်မျိုး ရှိပါသည်။ မာလကာပင်များသည် တစ်နှစ်ပတ်လုံး အသီးသီးပြီး နွေနှင့် မိုးရာသီများတွင် အသီးဖြိုင်ဖြိုင်ထွက်၍ ဆောင်းရာသီတွင် အသီးထွက်နည်းကြောင်း သိရပါသည်။

     လတ်ဆတ်သော မာလကာသီးသည် အသားချို၍ ကြွပ်ဆတ်ရနံ့မွှေးပါသည်။ အသီးမှည့်သွားသောအခါ အတွင်းထဲရှိ အသားမှာ ပျော့အိကာပိုချိုပြီး ပိုလည်းမွှေးလာပါသည်။ အသီးထဲတွင် အလွန်မာသော အစေ့လေးများစွာပါရှိပါသည်။ မာလာကာသီးများကို သူ့ချည်းဘဲ သက်သက် အဆာပြေ၊ အချိုပွဲအဖြစ် စားလေ့ရှိသလို အခွံနွှာ၊ အစိတ်လှီးပြီး ဆား၊ နွယ်ချိုမှုန့် တို့ဖြင့်လူးနယ်၍လည်း စားကြပါသည်။

    အိမ်ခြံဝင်းများတွင် သဘာဝအတိုင်းပေါက်ရောက်သည့် မာလကာသီးများရှိသလို စီးပွားဖြစ် စနစ်တကျစိုက်ပျိုးထားသည်များလည်း ရှိပါသည်။ တောင်ငူတက္ကသိုလ်အနီး ညောင်ကိုင်းရွာတွင် ကီလိုမာလကာသီးဟုခေါ်သည့် အစေ့ထုတ်၍ ကြွပ်ရွနေသော အခွံကိုသာ စားသုံးကြသည့် မာလကာပင်များကို စိုက်ပျိုးထားပါသည်။

    ၎င်းမာလာကာပင်မှ အသီးများကို အလုံးအသေးအကြီးပေါ်မူတည်၍ တစ်လုံးလျှင် ၁၀၀ ကျပ်မှ ၃၀၀ ကျပ်အထိ တောင်ငူမြို့ သစ်သီးဆိုင်များသို့ ရောင်းချရကြောင်း သိရပါသည်။

DOCA(ပဲခူး)