နှစ်စဉ်ပုံမှန်ဝင်ငွေရရှိနေသော ပွင့်ဖြူမြို့နယ် ငှက်ပျောဈေးကွက် အခြေအနေ
မကွေးတိုင်းဒေသကြီး၊ ပွင့်ဖြူမြို့နယ် မုန်းချောင်းဘေးတစ်လျှောက်ရှိ ကျေးရွာများမှ ဒေသခံတောင်သူများသည် မဲဇလီရေလွှဲဆည်ရေဖြင့် စပါး၊ နှမ်း၊ မြေပဲ၊ ပဲထောပတ်၊ ပဲတီစိမ်း၊ စိုက်ပျိုးကြပြီး မြေနုကျွန်းနှင့်ကိုင်းမြေများတွင် ဟင်းသီးဟင်းရွက် စားပင်သီးနှံမျိုးစုံနှင့် နှစ်ရှည်သီးနှံများကို စီးပွားဖြစ် စိုက်ပျိုးလုပ်ကိုင်ကြကြောင်း သိရသည်။ အချို့သောဒေသခံ တောင်သူများသည် ရေလွှဲဆည်ရေများနှင့် မြေအောက်ရေများကို အမှီပြု၍ ငှက်ပျောစိုက်ပျိုးရေးလုပ်ငန်းကို နှစ်စဉ်စီးပွားဖြစ် စိုက်ပျိုးလုပ်ကိုင်ကြပြီး ယခုနှစ်တွင် ငှက်ပျောစိုက်ခင်းများ အောင်မြင်ဖြစ်ထွန်းလျက်ရှိကာ ငှက်ပျောအထွက်နှုန်း ကောင်းမွန်ကြောင်း သိရသည်။
ပွင့်ဖြူမြို့နယ်ရှိ ဒေသခံအချို့မှာ ဥယျာဉ်ခြံမြေများစိုက်ပျိုးကြပြီး ဖီးကြမ်းငှက်ပျော၊ ငှက်ပျောချဉ်၊ သီးမွှေးငှက်ပျော၊ ရခိုင်ငှက်ပျောတို့ကို စီးပွားဖြစ် စိုက်ပျိုးလုပ်ကိုင်ကြကြောင်းသိရသည်။ ပွင့်ဖြူဒေသတွင် အများဆုံးစိုက်ပျိုးသော ငှက်ပျောမှာ ဖီးကြမ်းငှက်ပျောဖြစ်သည်။ ဖီးကြမ်းငှက်ပျောသည် စားသုံးသူများအကြိုက်တွေ့ကာ လူမျိုးဘာသာ ဆင်းရဲချမ်းသာမရွေး ဝယ်ယူစားသုံးနိုင်သောကြောင့် ရောင်းချသူများအနေဖြင့်လည်း တစ်နှစ်ပတ်လုံး ရောင်းချ၍ အဆင်ပြေသည့် သီးနှံတစ်မျိုးဖြစ်ပါသည်။ စတင်စိုက်ပျိုးစဉ်က မြေတစ်ဧကကို ငှက်ပျောပင်(၃၀၀)လောက် စမ်းသပ်စိုက်ပျိုးခဲ့ပြီး ယခုနှစ်တွင် ငှက်ပျောတစ်ဧကလျှင် အပင်(၈၀၀ မှ ၁၀၀၀)ခန့် စိုက်ပျိုးကြကြောင်း သိရသည်။ ဈေးကွက်အတွင်း ဖီးကြမ်းငှက်ပျောသီး(အဖီးလှလှ)တစ်ဖီးလျှင် ငွေကျပ်(၁၀၀၀ မှ ၁၂၀၀) နှုန်း၊ ဖီးကြမ်းငှက်ပျောသီး (ပုံမှန်အဖီး)တစ်ဖီးလျှင် ငွေကျပ် (၈၀၀ မှ ၁၀၀၀)နှုန်းဖြင့် အရောင်းအဝယ်ဖြစ်လျှက်ရှိပြီး ပွင့်ဖြူဒေသထွက်ငှက်ပျောသီးများကို မကွေး၊ မင်းဘူးနှင့် အခြားမြို့ကြီးများသို့လည်း တင်ပို့ရောင်းချလျက်ရှိကြောင်း သိရှိရပါသည်။
DOCA(မကွေး)
