ပြည်တွင်းကုန်သွယ်မှုသတင်း

       ဖျာပုံမြို့နယ်တွင် နေကြာစိုက်ဧက(၅၇၄)ဧက စိုက်ပျိုးလျက်ရှိပြီး နေကြာပေါ်ချိန်တွင် တစ်ဧက ပျမ်းမျှ(၁၅)တင်းနှုန်းထွက်ရှိကာ တစ်ဧက ကုန်ကျစရိတ်မှာ ကျပ်(၃၀၀၀၀၀)ခန့် ကုန်ကျလျက်ရှိကြောင်း သိရသည်။

  ဖျာပုံမြို့နယ် ဇင်းဘောင်ကျေးရွာအုပ်စု၊ ငုတောကျေးရွာမှ တောင်သူဦးမောင်မောင်စိုး၏      နေကြာစိုက်ပျိုးမှု အခြေအနေအား မေးမြန်းကြည့်ရာ နေကြာစိုက်ဧက(၃၀)ဧက စိုက်ပျိုးပြီး ညီအစ်ကို  သုံးဦးပေါင်း၍ လုပ်ကိုင်သဖြင့် အလုပ်သမားငှားရမ်းခလျော့ချနိုင်ကြောင်း၊ ယခုအထွက်နှုန်းနည်းကြောင်း၊  ရာသီဥတု၊ မျိုးနှင့်ပိုးကျရောက်သဖြင့် အထွက်နှုန်းနည်းခြင်းဖြစ်ကြောင်း၊နေကြာတစ်တင်းကြိတ်ပါက  နေကြာဆီ(၂ / ၃)ပိဿာခန့် ထွက်ရှိပြီး၊   အနိမ့်ဆုံးမှာ(၂)ပိဿာခန့်  ထွက်ရှိကြောင်း၊လာမည့်နှစ်တွင် မျိုးကောင်းမျိုးသန့်ရရှိပြီး ရာသီဥတုကောင်းမွန်မည်ဆိုပါက ယခုနှစ်ထက် ပိုမိုထွက်ရှိမည်ဖြစ် ကြောင်း ၎င်းထံမှ သိရသည်။

    ဖျာပုံမြို့တွင် ဆီစက်တစ်စက်ရှိ၍ နေကြာစိုက်ပျိုးသူ တောင်သူများ အခက်အခဲမရှိစေရေးအတွက် ကြိတ်ခွဲပေးသွားမည်ဖြစ်ပြီး နေကြာများရောင်းမည်ဆိုလျှင်လည်း ကာလပေါက်ဈေးဖြင့်    ဝယ်ယူသွားမည်ဖြစ်ကြောင်း၊ ယနေ့နေကြာဆီ တစ်ပိဿာ ကာလပေါက်ရောင်းဈေးမှာ (၁၆၀၀၀)ကျပ်ရှိကြောင်း သိရှိရပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံး အနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန် စာရင်းတို့ကိုလည်း အပတ်စဉ်၊ လစဉ်တင်ပြလျက်ရှိပါသည်။ ၂၀၂၃ခုနှစ်၊ မတ်လ(တတိယပတ်)အတွင်း ရွှေဘိုမြို့၊ ပဲ၊ နှမ်းကုန်စည်ဒိုင်၏ အရောင်းအဝယ်ဖြစ်သည့်သီးနှံများကို တာဝန်ရှိသူများနှင့် ဆက်သွယ်မေးမြန်းမှုအရ သိရှိရပါသည်။

     ရွှေဘိုခရိုင်အတွင်းရှိ မြို့နယ်များတွင် စိုက်ပျိုးထားသောကုလားပဲများမှာ ဖေဖော်ဝါရီလ(တတိယပတ်)မှစတင်၍ ရွှေဘိုဈေးကွက်သို့ဝင်ရောက်လာပြီး မတ်လ(တတိယပတ်)အထိ အရောင်းအဝယ်ဖြစ်လျက်ရှိကြောင်း၊ ရွှေဘိုဈေးကွက်သို့ မူးမြစ်ဝှမ်းဒေသများဖြစ်သည့် ဝက်လက်မြို့နယ်နှင့် ရွှေဘိုမြို့နယ်တို့၏ အနောက်ဘက်ခြမ်းရှိကျေးရွာများမှ အများဆုံးဝင်ရောက်လျက်ရှိပြီး ယခင်အပတ်ထိ ကုလားပဲ(V2) တစ်မျိုးတည်းသာ အရောင်းအဝယ်ဖြစ်ခဲ့သော်လည်း ယခုအပတ်တွင် ကုလားပဲ(V2)နှင့် ကုလားပဲ(929)တို့ပါ အရောင်းအဝယ်ဖြစ်လျက်ရှိကြောင်း၊  မတ်လ(တတိယပတ်) အတွင်း အရောင်းအဝယ်ဖြစ်သည့်ဈေးနှုန်းမှာ ကုလားပဲ(V2)တစ်တင်းလျှင် (၆၉၀၀ဝိ/-)ကျပ်ဖြစ်၍ အရောင်းအဝယ်ဖြစ်မှုမှာ (၁၁၂၅)တင်း/(၃၅)တန်ဖြစ်ပြီး ကုလားပဲ(929)တစ်တင်းလျှင် (၆၆၆၆ဝိ/-) ကျပ်ဖြစ်၍ အရောင်းအဝယ်ဖြစ်မှုမှာ (၁၅၀၀)တင်း/(၄၇)တန်ဖြစ်ကြောင်း၊ ကုလားပဲသီးနှံအနေဖြင့် ယခင်နှစ်ကာလတူတွင် အရောင်းအဝယ်ဖြစ်ခြင်းမရှိကြောင်း၊  ယခင်အပတ်နှင့် ယခုအပတ် အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်လျှင် ယခင်အပတ်၌ ကုလားပဲ(V2) တစ်တင်းလျှင် (၆၂၃၀ဝိ/-)ကျပ်ဖြင့်သာ အရောင်းအဝယ်ဖြစ်ခဲ့သဖြင့် ယခုအပတ်တွင် ယခင်အပတ်ထက် တစ်တင်းလျှင် (၆၇၀ဝိ/-)ကျပ်ဈေးပိုခဲ့ကြောင်း သတင်းရရှိပါသည်။

DOCA(စစ်ကိုင်း)

     ဇေယျာစစ်ကိုင်းတောင်ရိုးသမိုင်းတွင် ဝါတွင်းဘုရားစဉ်များအရ မှတ်တမ်းပြုစုရာတွင် ပေါရာဏလင်္ကာမင်္ဂလာမှတ်တမ်းအရ “ပုံ-တောင်-ဇေ-ချမ်း-ဥ-နန်း-နံ-လေး-ပ-ထူ-ရှင်-အောင်-အမြှောင်ငါးထပ်ကြီး၊ အပြီးကောင်းမှုတော်”ဟူ၍ စာဆိုပြုခဲ့ကြသည်။ နှစ်စဉ် မြန်မာပြက္ခဒိန်အရ ဝါဆိုလပြည့်နေ့မှစ၍ ပုံ - ပုညရှင်ဘုရား၊ တောင်- တောင်ဖီလာဘုရား၊ ဇေ - ဇေတဝန်ဘုရား၊ ချမ်း - ချမ်းသာကြီးဘုရား၊ ဥ - ဥမင်သုံးဆယ်ဘုရား၊ နန်း - ရှင်ပင်နန်းဦးဘုရား၊ နံ - ရှင်ပင်နံကိုင်းဘုရား၊ လေး - လေးကျွန်းမာန်အောင်ဘုရား၊ ပ - ပတ္တမြားစေတီဘုရား၊ ထူ - ထူပါရုံဘုရား၊ ရှင် - ရှင်ဖြူရှင်လှ ဘုရား၊ အောင် - အောင်မြေလောက ကျောက်စေတီဘုရား၊ “အမြှောင်ငါးထပ်ကြီး” သီတင်းပတ်များမှအပ သီတင်းကျွတ်လဆန်း(၅)ရက်နေ့တွင် မြှောင်၍ပြုလုပ်သော ငါးထပ်ကြီးဘုရားနှင့် “အပြီးကောင်းမှုတော်”၌ ဝါတွင်းဘုရားစဉ်ပွဲတော်များ အပြီးသတ်နောက်ဆုံးနေ့ သီတင်းကျွတ်လပြည့် ကောင်းမှုတော်ဘုရားဟူ၍ ဘုရားပွဲတော် (၁၄)ပွဲ ကျင်းပကြပါသည်။ ကောင်းမှုတော်ဘုရားတွင် တန်ဆောင်မုန်းလပြည့်၌လည်း ဘုရားပွဲတော်တစ်ကြိမ်ထပ်မံကျင်းပသဖြင့် တစ်နှစ်လျှင် ပွဲတော်နှစ်ကြိမ်ကျင်းပသည့် စေတီတစ်ဆူဖြစ်ပါသည်။

     ဘုရားသမိုင်းကြောင်းမှတ်တမ်းများအရ ကောင်းမှုတော်ဘုရားကို သီရိသုဓမ္မရာဇာမဟာဓိပတိ သာလွန်မင်းတရားကြီးသည် မြန်မာသက္ကရာဇ် ၉၉၈ခုနှစ်၊ တော်သလင်းလဆန်း (၁၀) ရက်နေ့တွင် စေတီတော်မြတ်ကြီးတည်ရန် ပန္နက်အုတ်မြစ်ချခဲ့သည်။ သပိတ်တော်၊ စွယ်တော်၊ ဆံတော်နှင့် များစွာသောသရီရဓာတ်တော်မွေတော်တို့ကို ပထမအကြိမ် ဌာပနာပွဲကျင်းပကာ အချိန်(၁၂)နှစ်ကြာ တည်တော်မူခဲ့ရသည်။ ဘုရား၏ဘွဲ့တော်မှာ ရာဇမဏိစူဠာကောင်းမှုတော်ဘုရားဟု ခေါ်တွင်ကြောင်း သိရှိရပါသည်။

     နှစ်စဉ်ကျင်းပသည့် ပွဲတော်ရက်များနှင့် နေ့စဉ်အနယ်နယ်အရပ်ရပ်မှ ဘုရားဖူးလာရောက်သည့်ပြည်သူများအား ကောင်းမှုတော်ဘုရားရိပ်ရှိ ဆိုင်ခန်းများမှ ဒေသထွက်ကုန်သနပ်ခါးများရောင်းချခြင်းဖြင့် အရောင်းအဝယ်ဖြစ်လျက်ရှိကြောင်း သိရပါသည်။ ရောင်းချသည့်သနပ်ခါးများမှာ ပခုက္ကူ၊ ရေစကြိုဒေသထွက်များ၊ အရာတော်၊ ကျောက်မှော်(ယင်းမာပင်)၊ မုံရွာ၊ စစ်ကိုင်း စသည့်ဒေသများမှ သနပ်ခါးများကို အပင်ပြတ်ဝယ်ယူ၍ ရောင်းတန်းဝင်အရွယ်သနပ်ခါးတုံးများ ဖြတ်တောက်ခြင်း၊ ဆေးကြောခြင်း၊ အရောင်တင်ခြင်းများပြုလုပ်၍ သနပ်ခါးထွက်ရှိသော ဒေသနာမည်၊ သနပ်ခါးဆိုင်နာမည်တို့ကို သနပ်ခါးတုံးတွင် တံဆိပ်ရိုက်နှိပ်ပြီး ရောင်းချကြသည်။ ကောင်းမှုတော်ဘုရားရိပ်တွင် သနပ်ခါးတုံးရောင်းသည့် ဆိုင်ခန်းပေါင်း (၅၀)ခန့်ရှိပြီး၊ သနပ်ခါးဈေးနှုန်းများမှာ အရွယ်အစားနှင့် အရည်အသွေးပေါ်မူတည်၍ တစ်တုံးလျှင် အနိမ့်ဆုံးကျပ် (၂ဝဝဝ-/၊ ၃ဝဝဝ/-) မှ အမြင့်ဆုံးကျပ် (၁၅ဝဝဝ/-၊ ၂ဝဝဝဝ/-) ထိ ဈေးအသီးသီးဖြင့် အရောင်းအဝယ်ပြုလုပ်ကြကြောင်း သိရပါသည်။ အနယ်နယ်အရပ်ရပ်မှ ဘုရားဖူးပြည်သူများသည် စစ်ကိုင်းမြို့ရှိ တန်ခိုးကြီးကောင်းမှုတော်ဘုရားအပါအဝင် အခြားတန်ခိုးကြီးဘုရားများစွာကို လာရောက်ဖူးမျှော်ရင်း အရည်အသွေးစစ်မှန်သည့်ဒေသထွက်ကုန်များဖြစ်သော သနပ်ခါးမျိုးစုံတို့ကို လာရောက်ဝယ်ယူနိုင်ပါကြောင်း ဇေယျာရွှေမြေစစ်ကိုင်းမြို့မှ ဖိတ်ခေါ်လိုက်ရပါသည်။

DOCA(စစ်ကိုင်း)

     ၂၀၂၃ခုနှစ်၊ မတ်လ တတိယပတ်အတွင်း ကန့်ဘလူမြို့နယ်တွင် အခြေခံစားကုန်များဖြစ်သော ရွေဘိုပေါ်ဆန်း(အဟောင်း)တစ်ပြည်လျှင် (၃၈၀၀) ကျပ်၊ ဧရာမင်း(အဟောင်း)တစ်ပြည်လျှင် (၃၂၀၀) ကျပ်၊ ယခင်အပတ်ထက် ဧရာမင်း(အဟောင်း)တစ်ပြည်လျှင် (၂၀၀) ကျပ်နှုန်းမြင့်တက်နေကြောင်း၊ ရွှေဘိုပေါ်ဆန်း(အသစ်)တစ်ပြည်လျှင် (၃၀၀၀) ကျပ်၊ ဧရာမင်း(အသစ်)တစ်ပြည်လျှင် (၂၈၀၀) ကျပ်ဖြင့် အရောင်းအဝယ်ဖြစ်လျက်ရှိပါသည်။ ကြက်သွန်နီ မြစ်သားအမျိုးအစား(အသစ်)လက်လီဈေးမှာ (အကြီး)တစ်ပိဿာလျှင် (၁၈၀၀) ကျပ်၊ (အလတ်)တစ်ပိဿာလျှင် (၁၅၀၀) ကျပ်၊ (အသေး)တစ်ပိဿာလျှင် (၁၃၀၀) ကျပ်ဖြစ်ပြီး ကြက်သွန်နီ ရိုးရိုးအမျိုးအစား(အသစ်)လက်လီဈေးမှာ (အကြီး)တစ်ပိဿာလျှင် (၁၅၀၀) ကျပ်၊ (အလတ်)တစ်ပိဿာလျှင် (၁၂၀၀) ကျပ်၊ (အသေး)တစ်ပိဿာလျှင် (၁၀၀၀) ကျပ်နှုန်းဖြင့် အရောင်းအဝယ်ဖြစ်လျက်ရှိပါသည်။ ကြက်သွန်ဖြူလက်လီဈေးမှာ (ဗမာ)အလုံးကြီးတစ်ပိဿာလျှင် (၅၅၀၀) ကျပ်၊ ကြက်သွန်ဖြူလက်လီဈေးမှာ (ဗမာ)အလုံးသေးတစ်ပိဿာလျှင် ကျပ် (၄၃၀၀ မှ  ၅၀၀၀) ထိ၊ ကြူကုတ်တစ်ပိဿာလျှင် ကျပ် (၄၈၀၀ မှ ၅၃၀၀) ထိဖြစ်၍ ယခင်အပတ်ထက် (၃၀၀) ကျပ်မြင့်တက်နေကြောင်း၊ ချင်းတစ်ပိဿာလျှင် (၂၀၀၀) ကျပ်၊ ငရုတ်သီးခြောက်အမျိုးအစားအလိုက် ကျပ် (၁၆၀၀၀ မှ ၂၅၀၀၀) ထိဖြစ်၍ ယခင်အပတ်ထက် (၃၀၀၀) ကျပ်မြင့်တက်နေကြောင်း၊ အာလူးတစ်ပိဿာလျှင် ကျပ် (၂၀၀၀ မှ ၂၃၀၀) ထိဖြစ်၍ ယခင်အပတ်ထက် (၃၀၀) ကျပ်မြင့်တက်နေကြောင်း သိရှိရပါသည်။

     ငရုတ်သီးစိမ်းတစ်ပိဿာလျှင် (၂၅၀၀) ကျပ်ဖြစ်၍  ယခင်အပတ်နှင့်ကွာခြားမှုမရှိကြောင်း၊ ခရမ်းချဉ်သီးတစ်ပိဿာလျှင် (၈၀၀) ကျပ်၊ ခရမ်းသီးတစ်ပိဿာလျှင် (၈၀၀) ကျပ်ဖြစ်၍ ယခင်အပတ်ထက် (၄၀၀) ကျပ်ကျဆင်းနေကြောင်း၊ ပန်းဂေါ်ဖီတစ်ပွင့်လျှင်  ကျပ် (၁၃၀၀ မှ ၁၅၀၀) ထိ၊ ဂေါ်ဖီထုပ်တစ်ထုပ်လျှင်  (၈၀၀) ကျပ်၊ ခါကြက်ဥတစ်ပိဿာလျှင် ကျပ် (၂၅၀၀ မှ ၃၀၀၀) ထိ၊ သံပရာသီး တစ်လုံးလျှင် ကျပ် (၂၀၀ မှ ၃၀၀) ထိ၊ ကန်စွန်းရွက်တစ်စီးလျှင် (၂၀၀) ကျပ်နှုန်းဖြင့် အရောင်းအဝယ်ဖြစ်နေကာ ကုန်စိမ်းများသည် ယခင်အပတ်နှင့်ကွာခြားမှုမရှိကြောင်း ဈေးသည်တစ်ဦးထံမှ သိရှိပါသည်။

     ကြက်ဥလက်လီဈေးနှုန်းမှာ (အကြီး)တစ်လုံးလျှင် (၂၅၀)ကျပ်၊ (အသေး)တစ်လုံးလျှင် (၂၃၀) ကျပ်၊ ဘဲဥတစ်လုံးလျှင် (၃၅၀) ကျပ်ရှိပါသည်။  ကန့်ဘလူမြို့၏ အသားငါးဈေးနှုန်းများမှာ ကြက်သား (cp) တစ်ပိဿာလျှင် ကျပ် (၁၀၀၀၀ မှ ၁၂၀၀၀) ထိ၊ ကြက်သား(ဗမာ)တစ်ပိဿာလျှင် ကျပ် (၁၈၀၀၀ မှ(၂၀၀၀၀) ထိ၊ ဝက်သားတစ်ပိဿာလျှင် ကျပ် (၁၈၀၀၀ မှ ၂၀၀၀၀) ထိ၊ အမဲသားတစ်ပိသာလျှင် ကျပ် (၁၀၀၀၀ မှ ၁၂၀၀၀) ထိ၊ ငါးကြင်းတစ်ပိဿာလျှင် ကျပ် (၆၀၀၀ မှ ၈၅၀၀) ထိ၊ တီလားဗီးယားငါးတစ်ပိဿာလျှင် ကျပ် (၄၀၀၀ မှ ၆၀၀၀) ထိ စသည်ဖြင့် ရောင်းဝယ်နေကြောင်း သိရပါသည်။

    စားသုံးဆီဈေးနှုန်းမှာ မြေပဲဆီသန့်တစ်ပိဿာလျှင် (၁၃၀၀၀) ကျပ်၊ စားအုံးဆီတစ်ပိဿာလျှင် (၇၂၀၀) ကျပ်ဖြစ်၍ ယခင်အပတ်ထက် ယခုအပတ်တွင်  (၃၀၀) ကျပ် ထပ်မံကျဆင်းနေကြောင်း သိရှိရပါသည်။

DOCA(စစ်ကိုင်း)

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ ပတ္တမြားဈေးကြီးတွင် သီးနှံမျိုးစုံအများဆုံးစိုက်ပျိုးထွက်ရှိသော ရေလယ်ကျွန်း၊ သံဇလုံ၊ ချင်တောင်၊ ချောင်းမကြီး၊ မယ်ဇလီကွေ့၊ တူရွင်းမျော၊ ဂွေးပင်ကျေးရွာများမှ အများဆုံးဝင်ရောက်ရောင်းချလျက်ရှိသည့်အပြင် ချောက်၊ ဆင်ဖြူကျွန်း၊ စလင်း၊ ပွင့်ဖြူ၊ ကျောက်ပန်းတောင်း၊ ပုပ္ပါးမြို့များနှင့် ရှမ်းပြည်နယ် အင်းလေးဒေသထွက် ဟင်းသီးဟင်းရွက် သစ်သီးဝလံများဝင်ရောက်လျက်ရှိပြီး ဒေသခံပြည်သူများ ရောင်းဝယ်ဖောက်ကားရာဈေးဖြစ်ပါသည်။

    ဆိပ်ဖြူမြို့၊ ပတ္တမြားဈေးအတွင်း၌ (၂၀၂၃) ခုနှစ်၊ မတ်လ (၁၁) ရက်နေ့မှ (၁၇) ရက်နေ့ထိ အရောင်းအဝယ်ဖြစ်လျက်ရှိသော အခြေခံစားသောက်ကုန်ဈေးနှုန်းများမှာ ခရမ်းချဉ်သီး(၁)ပိဿာလျှင် ကျပ်(၁၂၀၀ မှ ၁၄၀၀)ထိ၊ ခရမ်းသီး(၁)ပိဿာလျှင် ကျပ်(၁၀၀၀ မှ ၁၂၀၀)ထိ၊ အာလူး(၁)ပိဿာလျှင် ကျပ် (၂၃၀၀ မှ ၂၄၀၀)ထိ၊ မျှစ်ပေါက်(၁)ပိဿာလျှင် ကျပ်(၃၅၀၀)၊ ငရုတ်သီး(စိမ်း)(၁)ပိဿာလျှင် ကျပ် (၄၀၀၀)၊ ငရုတ်သီး(ခြောက်)(၁)ပိဿာလျှင် ကျပ်(၁၇၀၀၀ မှ ၁၈၀၀၀)ထိ၊  ဂေါ်ဖီ(၁)ထုပ်လျှင် ကျပ် (၇၀၀ မှ ၁၀၀၀)ထိ၊ မုန်လာဥဖြူ(၁)ဥလျှင် ကျပ်(၁၅၀)၊ သကြားပြောင်းဖူး(၁)ဖူးလျှင် ကျပ်(၄၀၀)၊  ပန်းမုန်လာ(၁)ပွင့်လျှင် ကျပ်( ၇၀၀ မှ ၈၀၀)ထိ၊ ချင်းတက်(၁)ပိဿာလျှင် ကျပ်(၂၀၀၀)၊ ချင်းပေါက်(၁)ပိဿာလျှင် ကျပ်(၁၉၀၀)၊ ကန်စွန်းဥ(၁)ပိဿာလျှင် ကျပ်(၁၀၀၀) ဈေးဖြင့် အရောင်းအဝယ်ဖြစ်လျက်ရှိပါသည်။

   ဆိပ်ဖြူမြို့၏ စားသုံးဆီဈေးနှုန်းများမှာ စားအုန်းဆီ(၁)ပိဿာလျှင် ကျပ်(၆၅၀၀)၊ နှမ်းဆီ(၁)ပိဿာလျှင် ကျပ်(၁၂၀၀၀)၊ စက်ပဲဆီ(၁)ပိဿာလျှင် ကျပ်(၁၂၀၀၀ မှ ၁၃၀၀၀)ထိ၊ ဆုံပဲဆီ(၁)ပိဿာလျှင် ကျပ်(၁၅၀၀၀)၊ ဧရာပဒေသာဆန်(အဟောင်း)(၁)အိတ်လျှင် ကျပ်(၈၅၀၀၀)၊ ဧရာပဒေသာဆန် (အသစ်)(၁)အိတ်လျှင် ကျပ်(၇၅၀၀၀)၊ မနောသုခ(၁)အိတ်လျှင် ကျပ်(၆၀၀၀၀)၊ စင်းသုခ(၁)အိတ် လျှင် ကျပ်(၆၀၀၀၀)၊ သိင်္ဂီပေါ်ဆန်း(၁)အိတ်လျှင် ကျပ်(၁၀၀၀၀၀)ဈေးဖြင့် အရောင်းအဝယ်ဖြစ်ပြီး အသားငါးဈေးနှုန်းများမှာ မွေးမြူရေး CP ကြက်သား(၁)ပိဿာလျှင် ကျပ်(၁၃၀၀၀)၊ ဗမာကြက်သား(၁)ပိဿာလျှင် ကျပ်(၁၆၀၀၀)၊ ဝက်သား(၁)ပိဿာလျှင် ကျပ်(၁၇၀၀၀)၊ ဆိတ်သား(၁)ပိဿာလျှင် ကျပ်(၂၂၀၀၀)နှင့် ငါးကြင်း(၁)ပိဿာလျှင် ကျပ်(၉၀၀၀) ဈေးနှုန်းအသီးသီးဖြင့် အရောင်း   အဝယ်ဖြစ်နေကြောင်း သိရှိရပါသည်။

DOCA(မကွေး)