ပြည်တွင်းကုန်သွယ်မှုသတင်း

     ရန်ကုန်တိုင်းဒေသကြီး၊ မင်္ဂလာတောင်ညွှန့်မြို့နယ် သိမ်ဖြူဈေးကြီးအတွင်း ကြက်သွန်ဖြူ၊ ကြက်သွန်နီများအား ကား၊ ရထားတို့ဖြင့် ဘုရင့်နောင်ကုန်စည်ဒိုင်နှင့် ရှမ်းပြည်နယ်တို့မှ နေ့စဉ် ဝင်ရောက်လျက်ရှိပြီး လက်လီလက်ကား ပြန်လည်ရောင်းချလျက်ရှိရာ ၂.၃.၂၀၂၃ မှ ၈.၃.၂၀၂၃ ရက် အထိ ကြက်သွန်နီ(ဆိပ်ဖြူ)အဝင် (၃၆၀၀၀)ပိဿာနှင့် ကြက်သွန်ဖြူ(ကြူကုတ်) (၁၁၀၀၀) ပိဿာ ဝင်ရောက်ခဲ့ပြီး ကြက်သွန်နီ(ဆိပ်ဖြူ)လက်ကားဈေးမှာ ၁ပိဿာလျှင် ၁၆၅၀ ကျပ်မှ ၁၉၀၀ ကျပ် ထိ ဖြစ်၍ ကြက်သွန်ဖြူ(ကြူကုတ်) လက်ကားဈေးမှာ ၁ပိဿာလျှင် ၃၇၀၀ ကျပ်မှ ၃၈၀၀ ကျပ်ထိလည်းကောင်း၊ ၉.၃.၂၀၂၃ မှ ၁၅.၃.၂၀၂၃ ရက်အထိ ကြက်သွန်နီ(ဆိပ်ဖြူ)အဝင် (၃၅၂၀၀) ပိဿာနှင့် ကြက်သွန်ဖြူ(ကြူကုတ်) (၁၁၆၀၀) ပိဿာ ဝင်ရောက်ခဲ့ပြီး ကြက်သွန်နီ(ဆိပ်ဖြူ) လက်ကားဈေးမှာ ၁ပိဿာလျှင် ၁၅၀၀ ကျပ်မှ ၁၉၀၀ ကျပ်ထိဖြစ်၍ ကြက်သွန်ဖြူ(ကြူကုတ်) လက်ကားဈေးမှာ ၁ပိဿာလျှင် ၃၉၀၀ ကျပ်မှ ၄၄၀၀ ကျပ်ထိရှိခဲ့ပြီး ၁၆.၃.၂၀၂၃ မှ ၂၂.၃.၂၀၂၃ ရက် အထိ ကြက်သွန်နီ(ဆိပ်ဖြူ)အဝင် (၃၄၄၀၀)ပိဿာနှင့် ကြက်သွန်ဖြူ(ကြူကုတ်) (၁၀၇၀၀) ပိဿာ ဝင်ရောက်ခဲ့ပြီး ကြက်သွန်နီ(ဆိပ်ဖြူ)လက်ကားဈေးမှာ ၁ပိဿာလျှင် ၁၉၀၀ ကျပ်မှ ၂၂၀၀ ကျပ်ထိဖြစ်၍ ကြက်သွန်ဖြူ(ကြူကုတ်) လက်ကားဈေးမှာ ၁ပိဿာလျှင် ၄၃၀၀ ကျပ်မှ ၄၄၀၀ ကျပ်ထိဖြစ်ပြီးကြက်သွန်နီအသစ်များ လှိုင်လှိုင်ပေါ်၍ အဝင်များနေသော်လည်း ဈေးနှုန်းအနည်းငယ် တက်လာပြီး ကြက်သွန်ဖြူဈေးနှုန်းများမှာ မြင့်တက်လျက်ရှိကြောင်း ဈေးတာဝန်ခံရုံးမှ သတင်း ရရှိပါသည်။

DOCA(ရန်ကုန်)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးကြီးသည် သီးနှံမျိုးစုံအများဆုံးစိုက်ပျိုးထွက်ရှိသော ပခုက္ကူကျွန်းကျေးရွာများ၊ မြစ်ခြေ၊ ကမ္မ၊ ကျောက်ပန်းတောင်း၊ ပုပ္ပါးထွက်သီးနှံများ အများဆုံးဝင်ရောက်ရောင်းဝယ်ဖောက်ကားရာဈေးဖြစ်ပါသည်။

      ပခုက္ကူမြို့မဈေးကြီးအတွင်း၌ (၂၀၂၃) ခုနှစ်၊ မတ်လ (၁၁) ရက် မှ (၁၇) ရက်နေ့ထိ အရောင်းအဝယ်ဖြစ်လျက်ရှိသော အခြေခံစားကုန်ဈေးနှုန်းများမှာ ခရမ်းချဉ်သီး (၁) ပိဿာလျှင် ကျပ် (၁၂၀၀ မှ ၁၄၀၀) ထိ၊ ခရမ်းသီး (၁)ပိဿာလျှင် ကျပ် (၁၀၀၀ မှ ၁၂၀၀) ထိ၊ အာလူး (၁) ပိဿာလျှင် ကျပ်(၂၁၀၀ မှ ၂၂၀၀) ထိ၊ ငရုတ်သီး (စိမ်း) (၁) ပိဿာလျှင် ကျပ် (၄၀၀၀)၊ ငရုတ်သီးခြောက်(အရှည်) (၁) ပိဿာလျှင် ကျပ် (၁၅၀၀၀ မှ ၁၆၀၀၀) ထိ၊ ငရုတ်သီးခြောက် (အပု) (၁) ပိဿာလျှင် ကျပ် (၁၆၀၀၀)၊ ကြက်သွန်နီ (၁) ပိဿာလျှင် ကျပ် (၈၀၀ မှ ၁၆၀၀) ထိ၊ ကြက်သွန်ဖြူ (ရှမ်းစ) (၁) ပိဿာလျှင် ကျပ် (၅၈၀၀ မှ ၆၃၀၀)၊ ကြက်သွန်ဖြူ (ကြူကုတ်) (၁) ပိဿာလျှင် ကျပ် (၆၀၀၀)၊ ဂေါ်ဖီ (၁) ထုပ်လျှင် ကျပ် (၇၀၀ မှ ၈၀၀) ထိ၊ ပဲတောင့်ရှည် (၁) ပိဿာလျှင် ကျပ် (၁၅၀၀ မှ ၁၇၀၀) ထိ၊ ပဲရာဇာ (ပဲနီလေး) (၁) ပြည်လျှင် ကျပ် (၈၅၀၀ မှ ၉၀၀၀) ထိ၊ ကန်စွန်းရွက် (၃) စည်းလျှင် ကျပ် (၂၀၀)၊ မုန်လာဥဖြူ (၁ ) ဥလျှင် ကျပ်(၁၀၀ မှ ၁၅၀) ထိ၊ သကြားပြောင်းဖူး (၃) ဖူးလျှင် ကျပ်(၁၀၀၀)၊ ကန်စွန်းဥ (၁) ပိဿာလျှင် ကျပ် (၉၀၀ မှ ၁၀၀၀) ထိ၊ ပန်းမုန်လာ (၁) ပွင့်လျှင် ကျပ် (၇၀၀ မှ ၁၀၀၀) ထိ၊ ချင်းတက်/ပေါက် (၁) ပိဿာလျှင် ကျပ် (၁၉၀၀ မှ ၂၀၀၀) ထိ၊ သက်ရက်(သခွား)သီးစိမ်း (၃) လုံးလျှင် ကျပ်(၁၀၀)၊ မန်ကျည်းသီးမှည့် (အစေ့လွတ်) (၁) ပိဿာလျှင် ကျပ် (၃၅၀၀ မှ ၄၀၀၀) ထိ၊ မြေပဲဆံ (၁) ပိဿာလျှင် ကျပ် (၆၆၀၀ မှ ၇၀၀၀) ထိ၊ ကုလားပဲခြမ်း (၁) ပြည်လျှင် ကျပ် (၅၅၀၀ မှ ၅၆၀၀) ထိနှင့် ဆား (၁) ပိဿာလျှင် ကျပ် (၆၀၀) စသည်ဖြင့် အသီးသီးအရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

    ပခုက္ကူခရိုင်အတွင်းရှိ မြစ်ခြေမြို့တွင် ပြောင်းစိုက်ဧက (၄၀)၊ ရေစကြိုမြို့နယ်တွင် ဧက (၉၀၀၀) ကျော်၊ ပေါက်မြို့နယ်တွင် ဧက (၅၀၀၀) ကျော်ဖြင့် (CP) ပြောင်း အများဆုံးစိုက်ပျိုးထွက်ရှိ သောနေရာများဖြစ်ပါသည်။ အစေ့ထုတ်ပြောင်း (CP) ကို ပြည်တွင်းသုံးစွဲမှုအနေဖြင့် မွေးမြူရေးလုပ်ငန်းအတွက် တိရိစ္ဆာန်အစားအစာအဖြစ် အသုံးပြုကြသည့်အပြင် ပြည်ပသို့ပါတင်ပို့နိုင်သဖြင့် ယခုအချိန်တွင် အရောင်းအဝယ်များစွာဖြစ်လျက်ရှိပါသည်။ ပခုက္ကူကုန်စည်ဒိုင်တွင်လည်း နေ့စဉ်ဝင်ရောက်လျက်ရှိပြီး တစ်နေ့လျှင် (၃၀) ပိဿာဝင် အိတ်ရေ (၉၀၀) မှ (၁၀၀၀ )ကြား အရောင်းအဝယ်ဖြစ်လျက်ရှိပါသည်။ အောက်တိုဘာမှစတင်၍ အရောင်းအဝယ်ဖြစ်ခဲ့ပြီး ယခုအချိန်တွင် လှိုင်လှိုင်ဝင်ရောက်လျက်ရှိကြောင်း၊ ယခင်ပေါ်စအချိန်တွင်(၃၀)ပိဿာဝင် တစ်အိတ်လျှင် ကျပ် (၁၇၅၀၀) ရှိသော်လည်း ယခု ၂၀၂၃ခုနှစ်၊ မတ်လ (ဒုတိယ) ပတ်တွင် (၃၀) ပိဿာဝင် တစ်အိတ်လျှင် ကျပ် (၂၀၂၀၀) ထိဈေးတက်နေပြီး ဝင်ရောက်သမျှ အရောင်းအဝယ်ဖြစ်လျက်ရှိကြောင်း ကုန်စည်ဒိုင်မှ သိရှိရပါသည်။

     ကုန်စည်ဒိုင်တွင် အရောင်းအဝယ်ဖြစ်နေသကဲ့သို့ စိုက်ပျိုးသူတောင်သူများကလည်း အကျိုးအမြတ်များရရှိကြောင်း၊ ပြောင်းစိုက်ဧက (၅)ဧကစိုက်ပျိုးလျက်ရှိကြောင်း၊ တစ်ဧကကုန်ကျစရိတ်မှာ သွင်းအားစုများဈေးမြင့်လာသောကြောင့် (၅)သိန်းဝန်းကျင်ခန့်ကုန်ကျသော်လည်း တစ်ဧကအထွက်နှုန်းမှာ (၆၂) တင်းဝန်းကျင်ထွက်ရှိသောကြောင့် တစ်ဧကလျှင် အကျိုးအမြတ်မှာ (၆)သိန်းနီးပါးရရှိပြီး ယခုအခါတွင် အစေ့ထုတ်ပြောင်း (CP) သီးနှံကို များစွာတိုးချဲ့စိုက်ပျိုးနေကြောင်း တောင်သူတစ်ဦးထံမှ သိရှိရပါသည်။

     အစေ့ထုတ်ပြောင်း (CP) ကို ပြန်လည်ဖြန့်ဖြူးရာတွင် ဒေသတွင်းအနေဖြင့် မွေးမြူရေးအစာကုန်ကြမ်းထုတ်လုပ်သော ကြိတ်ခွဲစက်များနှင့် ရန်ကုန်မြို့သို့ တင်ပို့လျက်ရှိကြောင်း၊ ရန်ကုန်မြို့မှတစ်ဆင့် ပြည်တွင်းဒေသအနှံ့အပြားနှင့် ထိုင်း၊ တရုတ် စသည့် ပြည်ပနိုင်ငံများသို့ တင်ပို့လျက်ရှိကြောင်း သိရှိရပါသည်။အစေ့ထုတ်ပြောင်း (CP) သီးနှံအနေဖြင့် ယခုအခါတွင် ဈေးကောင်းရရှိပြီး ဈေးကွက်ခိုင်မာမှုရှိသည့်အပြင် ပြည်ပနိုင်ငံများသို့ပါ တင်ပို့နေရသောကြောင့် တောင်သူများအနေဖြင့် တိုးချဲ့စိုက်ပျိုးသင့်ကြောင်း တင်ပြလိုက်ရပါသည်။

DOCA(မကွေး)

     တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

     ဆိပ်ဖြူမြို့နယ်၊ ရွာသစ်ရပ်ကွက်ရှိ စိုက်တောင်သူများသည် နှစ်စဉ် ကိုင်းကျွန်းမြေများတွင် သီးနှံမျိုးစုံကိုစိုက်ပျိုးလျက်ရှိရာ ယခုနှစ်တွင် ဈေးကွက်ခိုင်မာလျက်ရှိသော ဂျပန်ပဲယင်း(နီ)ကို တောင်သူများ တစ်နိုင်တစ်ပိုင်စတင်စိုက်ပျိုးကြကြောင်း ဒေသခံတောင်သူထံမှသိရပါသည်။

    တောင်သူ ဦးမြင့်ကိုက ယခုနှစ်တွင် ဂျပန်ပဲယင်း(နီ) (၀.၅)ဧကခန့်စိုက်ပျိုးထားရှိကြောင်း၊ စိုက်ပျိုးရာတွင်လွယ်ကူပြီး ကုန်ကျစရိတ်သက်သာ၍ ပဲယင်း(နီ)ကို စိုက်ပျိုးထားခြင်းဖြစ်ကြောင်း၊ ယခင်နှစ်များက စိုက်ပျိုးခဲ့ခြင်းမရှိခဲ့ကြောင်း၊ ယခုနှစ်တွင် နယ်မြေဒေသရာသီဥတုနှင့်ကိုက်ညီမှုရှိခြင်းကြောင့် ပဲယင်း(နီ)ကို ကြက်သွန်နီသီးနှံအား အစားထိုးစိုက်ပျိုးကြောင်း၊ ဂျပန်ပဲယင်း(နီ)မျိုးများကို အောက်တိုဘာလတွင် စိုက်ပျိုးပြီး မတ်လတွင် ရိတ်သိမ်းကြောင်း၊ (၀.၅)ဧကလျှင် ပဲယင်း(နီ) နှစ်ပြည်ခန့်ကုန်ကျကြောင်း၊ မျိုးစေ့တစ်တင်းလျှင် ကျပ်(၁၂၀၀၀၀)ဖြင့် ဝယ်ယူရကြောင်း၊ စိုက်ပျိုးရာတွင်လွယ်ကူပြီး အလုပ်သမားငှားရမ်းရမှုနည်းခြင်း၊ သွင်းအားစုနှင့် ပိုးသတ်ဆေးပက်ဖျန်းခြင်းများမပြုလုပ်ရကြောင်း၊ ကုန်ကျစရိတ်နည်းပါးကြောင်း၊ ဂျပန်ပဲယင်း(နီ)တစ်ဧကအထွက်နှုန်းမှာ တင်း(၃၀ မှ ၄၀)ထိထွက်ရှိကြောင်း၊ (၀.၅)ဧကစိုက်ပျိုးထားပြီး ရေမြေရာသီဥတုကောင်းမွန်ခြင်းကြောင့် ပဲယင်းမှာ တင်း (၂၀) ခန့်ထွက်ရှိကြောင်း၊ တစ်တင်းလျှင် သီးနှံပေါ်စ၌ ဒေသပေါက်ဈေးမှာ ကျပ်(၇၀၀၀၀)ဖြင့် ရောင်းချခဲ့ရ၍ ကျပ်(၁၄)သိန်းခန့်ရရှိပြီး ကုန်ကျစရိတ်မှာ ကျပ်(၂၀၀၀၀၀)ဝန်းကျင်ခန့်ကုန်ကျခဲ့၍ ကျပ်(၁၂)သိန်းခန့်အကျိုးအမြတ်ရရှိခဲ့ကြောင်း၊ ယခုနှစ်တွင် ဂျပန်ပဲယင်း(နီ)စိုက်ပျိုးခြင်းဖြင့် စိုက်တောင်သူများ အကျိုးအမြတ်ရရှိနေကြပါကြောင်း ဒေသခံတောင်သူ ဦးမြင့်ကိုထံမှ သိရှိရပါသည်။

     ဂျပန်ပဲယင်း(နီ)သီးနှံသည် ပြည်တွင်းစားသုံးမှုနည်းသော်လည်း ပြည်ပပို့ကုန်အဖြစ် တင်ပို့လျက်သောသီးနှံဖြစ်၍ ဈေးကွက်ခိုင်မာမှုရှိပြီး စိုက်ပျိုးရာတွင် လွယ်ကူပြီး ကုန်ကျစရိတ်သက်သာစွာဖြင့် အလွယ်တကူရရှိသောသီးနှံဖြစ်၍ စိုက်တောင်သူများ နှစ်စဉ်စိုက်ပျိုးသင့်ပါကြောင်း သုံးသပ်တင်ပြအပ်ပါသည်။

DOCA(မကွေး)