သတင်းနှင့် လှုပ်ရှားမှုများ

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသ ကြီး၊ ရွှေဘိုခရိုင်ဦးစီးမှူးရုံးအနေဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်း အမှတ်အသားများ ပြည့်စုံစွာထည့်သွင်းဖော်ပြထားခြင်းရှိ/မရှိ၊ စားသုံးသူများ နေ့စဉ်အသုံးပြုလျက်ရှိသော ကုန်စည်နှင့် ဝန်ဆောင်မှုများ ဘေးအန္တရာယ် ကင်းရှင်းပြီး လုံခြုံစိတ်ချရမှု ရှိစေရေး၊ ကုန်စည်များကို သတ်မှတ်စံချိန်စံညွှန်းများ၊ ညွှန်ကြားချက်များနှင့်ကိုက်ညီမှုရှိ/မရှိ  ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိပါသည်။ ဈေးကွက်စောင့်ကြည့်စစ်ဆေးရာတွင် မိတ်ဘက်ဌာနဆိုင်ရာများနှင့်ပူးပေါင်း၍ သော်လည်းကောင်း၊ စားသုံးသူကာကွယ်ရေးဥပဒေအရ ခန့်အပ်ထားသော စစ်ဆေးရေးအရာရှိများက ဦးဆောင်၍သော်လည်းကောင်း ဆောင်ရွက်လျက်ရှိပါသည်။

     ရွှေဘိုခရိုင်အနေဖြင့် (၄/၂၀၂၄)လအတွင်း ခရိုင်ဦးစီးမှူးမှဦးဆောင်၍ ရွှေဘိုမြို့နယ်တာဝန်ခံ တို့သည် ရွှေဘိုမြို့၊ အမှတ်(၆)ရပ်ကွက်ရှိ ဆီနှင့်ကုန်မျိုးစုံရောင်းဝယ်ရေးဆိုင်အားလည်းကောင်း၊ ဒု-ခရိုင် ဦးစီးမှူးမှဦးဆောင်၍ ရွှေဘိုမြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် စားသုံးသူ ရေးရာဌာနခွဲတာဝန်ခံတို့သည် ရွှေဘိုမြို့၊ အမှတ်(၄)ရပ်ကွက်ရှိ မုန့်မျိုးစုံရောင်းဝယ်ရေးဆိုင်(၁)ဆိုင်နှင့် အမှတ်(၅)ရပ်ကွက်ရှိ ကုန်မျိုးစုံရောင်းဝယ်ရေးဆိုင်(၂)ဆိုင်အားလည်းကောင်း ဈေးကွက်စောင့်ကြည့် စစ်ဆေးခြင်းများဆောင်ရွက်ခဲ့ကြပြီး ဌာန၏ဥပဒေ၊ အမိန့်နှင့် ညွှန်ကြားချက်ပါ အကြောင်းများကို အသိပညာပေးခြင်းများ ဆောင်ရွက်ခဲ့ကြကြောင်း သတင်းရရှိပါသည်။

  DOCA(စစ်ကိုင်း)

          မန္တလေးတိုင်းဒေသကြီး၊ ပြင်ဦးလွင်မြို့နယ်တွင် (၂၆-၄-၂၀၂၄)ရက်နေ့ ၊ နံနက်(၁၀:၀၀) နာရီအချိန်၌ ခရိုင်ပြည်သူ့ကျန်းမာရေးဦးစီးဌာနအစည်းအဝေးခန်းမတွင် မြို့နယ်အတွင်းရှိစားသုံးဆီ လက်လီ၊လက်ကားရောင်းချ ဖြန့်ဖြူးနေသော စားသုံးဆီလုပ်ငန်းရှင်များနှင့် မန္တလေးတိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန(FDA) ၊ စားသုံးသူရေးရာဦးစီးဌာန ၊ ပြည်သူ့ ကျန်းမာရေးဦးစီးဌာန ၊ မြို့နယ်စည်ပင်သာယာရေးအဖွဲ့ တို့နှင့် တွေ့ဆုံဆွေးနွေးခဲ့ပါသည် ။ ဆွေးနွေးပွဲတွင် မန္တလေးတိုင်းဒေသကြီး ၊ အစားသောက်နှင့်ဆေးဝါးကွပ်ကဲရေးဦးစီးဌာန (FDA) ညွှန်ကြားရေးမှူး ဒေါက်တာ ဒေါ်နီနီအေးက အစားအသောက်နှင့်ပတ်သက်၍ GMP စနစ် ၊ မြန်မာ နိုင်ငံအစားအသောက်နှင့်ဆေးဝါးအာဏာပိုင်အဖွဲ့မှ ၂၀၂၄ခုနှစ်၊မတ်လ(၂၅)ရက်နေ့က အမိန့်အမှတ် ၂/၂၀၂၄ ထုတ်ပြန်ချက်တွင် အမျိုးသားအစားအသောက်ဥပဒေ ပုဒ်မ ၃၈ ပုဒ်မခွဲ(ခ)အရ ဟင်းသီး ဟင်းရွက်ဆီများကိုရောနှောဆီ(Biended Oil)အပြင် အစားအသောက် ထုတ်လုပ်ခြင်း၊ သိုလှောင် ခြင်း၊ ဖြန့်ဖြူးခြင်း သို့မဟုတ် ရောင်းချခြင်းနှင့်စပ်လျဉ်း၍ လိုက်နာရန် အမိန့်ထုတ်ပြန်ချက် ကိုအသေးစိတ် ရှင်းလင်းပြောကြားခဲ့ပြီး စားသုံးသူရေးရာဦးစီးဌာန ဦးသက်လွင်ထူး(ဦးစီးအရာရှိ)က မြန်မာနိုင်ငံ စားသုံးသူကာကွယ်ရေးကော်မရှင်မှ ၂၀၁၉ခုနှစ်၊ဒီဇင်ဘာလ(၃)ရက် ၊ ရက်စွဲပါ ညွှန်ကြားချက်အမှတ် (၂/၂၀၁၉)ဖြင့် “ကုန်စည်များတွင် မြန်မာ ဘာသာဖြင့်ဖြစ်စေ၊ မြန်မာဘာသာ နှင့်အခြားဘာသာတစ်ခု တွဲလျှက်ဖြစ်စေ ဖော်ပြရာ၌ စားသုံးဆီ လုပ်ငန်းရှင်များ အနေဖြင့် စားသုံးဆီအမျိုးမျိုးနှင့်စပ်လျဉ်း၍ အမျိုးအမည်၊ အရွယ်အစား၊ အရေအတွက် နှင့်အသားတင် ပမာဏ၊ ထားသိုသိမ်းဆည်းမှုအညွှန်းတို့ကို မဖြစ်မနေဖော်ပြရန်လိုအပ်ကြောင်း ၊ နိုင်ငံတော်မှ စားအုန်းဆီ သတ်မှတ်ရည်ညွှန်းစျေးကို အပတ်စဉ် ထုတ်ပြန်ပေးလျှက်ရှိကြောင်း၊ စားသုံးဆီ ရောင်းချသည့် လုပ်ငန်းရှင်များအနေဖြင့် စျေးကွက်အတွင်း ဖြန့်ဖြူးရောင်းချနေသော စားအုန်းဆီ များကို သတ်မှတ်ရည်ညွှန်းစျေး+သယ်ယူစရိတ်+၂%အမြတ် ဖြင့်ရောင်းချပေးဖို့လိုကြောင်း၊ စားအုန်းဆီများကို စျေးကစားခြင်း၊စျေးနှုန်းကြီးမြင့်စေရန် ရည်ရွယ်ချက်ဖြင့် သိုလှောင်ရောင်း ချခြင်းမျိုး စစ်ဆေးတွေ့ရှိရပါက အရေးကြီးကုန်စည်ဖြင့် အရေးယူခံရမည် ဖြစ်ကြောင်း ရှင်းလင်း ဆွေးနွေးပြောကြားခဲ့ပါသည်။အဆိုပါတွေ့ဆုံဆွေးနွေးပွဲသို့ ပြင်ဦးလွင်မြို့နယ်တွင် စားသုံးဆီ ရောင်းချနေသောလုပ်ငန်းရှင်(၄၈)ဦးတက်ရောက်ခဲ့ပြီး ဆွေးနွေးပွဲကို နေ့လယ်(၁၃:၀၀)နာရီ အချိန်တွင် ရုတ်သိမ်းခဲ့ကြောင်း သတင်းရရှိပါသည်။

  DOCA(မန္တလေး)

     စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ စားသုံးရေးရာဌာနခွဲတာဝန်ခံ၊ ချောင်းဦးမြို့နယ်တာဝန်ခံနှင့် ဝန်ထမ်း (၂)ဦးတို့သည် ၂၀၂၄ခုနှစ်၊ ဧပြီလ  ၂၅ ရက်နေ့၊ နံနက် (၁၀း၀၀) နာရီအချိန်တွင် မုံရွာမြို့၊ မြို့သစ်ရပ်ကွက်ရှိ “စကားဝါ” အာလူးကြော်၊ ပြောင်းဖူးကြော်လုပ်ငန်းရှင်နှင့်တွေ့ဆုံ၍ စားသုံးသူ ကာကွယ်ရေးဥပဒေ (၂၀၁၉)၊ အခန်း(၁၈) အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များသိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေးဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးပြောကြားခဲ့ပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

      စီပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ စားသုံးသူဌာနခွဲတာဝန်ခံ ဦးစီးအရာရှိ ဒေါ်ခိုင်မို့မို့နှင့်ဝန်ထမ်းများသည်  (၂၅-၄-၂၀၂၄)ရက်နေ့၊ နံနက် (၁၀း၀၀) နာရီအချိန်တွင် မုံရွာမြို့၊ ချမ်းမြဝတီရပ်ကွက်သို့သွားရောက်၍  “အောင်ဇမ္ဗူ” ကုန်မျိုးစုံရောင်းဝယ်ရေးလုပ်ငန်းရှင် ဒေါ်စန်းစန်းကြည်နှင့်တွေ့ဆုံ၍ အသိပညာပေးဆွေးနွေးခဲ့ကြောင်းသိရှိရပါသည်။

     ထိုသို့အသိပညာပေးရာတွင် လုပ်ငန်းရှင်အား မိမိတို့အနေဖြင့် ကုန်အညွှန်းအမှတ်အသားပြည့်စုံသော ကုန်ပစ္စည်းများကိုသာရောင်းချရန်၊ ပေါင်မုန့်အစို၊ ကိတ်မုန့်များရောင်းချရာတွင် မှိုတက်ပစ္စည်းမဖြစ်စေရန်အတွက် ခင်းကျင်းရောင်းချသော ကုန်ပစ္စည်းများကို သန့်ရှင်းသပ်ရပ်စွာထားရှိရန်၊ တစ်ဆင့်ရောင်းချသောလုပ်ငန်းရှင်နှင့် ထုတ်လုပ်သောလုပ်ငန်းရှင်များသည် စားသုံးသူကာကွယ်ရေးဥပဒေပါ  အခန်း(၁၈) ကုန်အညွှန်းအမှတ်သားများပြည့်စုံစွာပါရှိရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းအကြောင်းများ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါအကြောင်းများ၊ အသင့်စားမုန့်အမျိုးမျိုးတွင် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓာတ်မတည့်ကြောင်းဖော်ပြချက်တို့ကို မြန်မာဘာသာဖြင့် မဖြစ်မနေဖော်ပြရမည်ဖြစ်ကြောင်း အသိပညာပေးဆွေးနွေးခဲ့ပြီး လုပ်ငန်းရှင်၏ တာဝန်များပါသော အသိပညာပေးလက်ကမ်းစာစောင်ပေးအပ်ခဲ့ကြောင်း သတင်းရရှိပါသည်။

DOCA(စစ်ကိုင်း)

            စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်တာဝန်ခံ ဒုတိယ ဦးစီးမှူးဒေါ်ဌေးဌေးဝင်းသည် MSMEs လုပ်ငန်းများ ဖွံ့ဖြိုးတိုးတက်စေရန်အတွက်(၂၆.၄.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ပွင့်ဖြူမြို့အရှေ့ပိုင်းရပ်ကွက်ရှိ မိသားစု တစ်ပိုင်တစ်နိုင်လုပ်ကိုင်လျက် ရှိသော “လာဘ်ပွင့်”ပေါင်မုန့် ဆီကြော်လုပ်ငန်းသို့ သွားရောက် ကွင်းဆင်းလေ့လာခဲ့ပါသည်။

          “လာဘ်ပွင့်”ပေါင်မုန့် ဆီကြော် လုပ်ငန်းလုပ်ကိုင်သူ ဦးသန်းထိုက်ဦးသည် ပေါင်မုန့်ဆီကြော် လုပ်ငန်းအား မိသားစုတစ်နိုင်တစ်ပိုင် လုပ်ကိုင်လာသည်မှာ (၁)နှစ်နီးပါးရှိပြီးဖြစ်ပါကြောင်း၊ ပွင့်လင်း ရာသီရောက်ရှိပြီဖြစ်ပါသဖြင့် တစ်နေ့လျှင် ဂျုံ(၂၄)ပြည်တစ်အိတ်နှင့် သကြား(၃၀)ပိဿာဝင်(၂)အိတ် ကုန်ပါကြောင်း၊ ဂျုံတစ်အိတ်လျှင် ကျပ်(၁၃၂၀၀၀ မှ ၁၃၅၀၀၀)၊ သကြား တစ်အိတ်လျှင် ကျပ်(၁၄၅၀၀၀ မှ ၁၄၈၀၀၀)၊ ကြက်ဥ(၁)လုံးလျှင် ကျပ်(၂၅၀)ဖြင့် အလုံး(၃၀)အတွက် ကျပ်(၇၅၀၀)ဖြင့် ဝယ်ယူ ရကြောင်း၊ ပေါင်မုန့်ပြုလုပ်ရာတွင် ဂျုံ၊ ကြက်ဥနှင့် ဆားစသည်များထည့်၍ သမအောင်စက်ဖြင့် နယ်ပါကြောင်း၊ ၎င်းနယ်ပြီး ဂျုံသားများအား နာရီဝက်ခန့်နှပ်ထားရပြီး နှပ်ထားပြီး ဂျုံသားများအား လက်ဖြင့် ပုံစံပြုလုပ်၍ကြော်ရကြောင်း၊ ဂျုံတစ်အိတ်လျှင် ဆီပိဿာ(၃၀)နှင့် လောင်စာ အတွက် ကျပ်(၅၀၀၀)ကုန်ကျပါကြောင်း၊ ကြော်ပြီးသော မုန့်များအား သကြားရေထဲတွင် (၂)မိနစ်ခန့်စိမ်ပြီး ၎င်းနောက် ပါကင်အထုပ်များ ထုတ်ပါကြောင်း၊ ဂျုံတစ်အိတ်လျှင် (၆)ခုပါ အထုပ်ရေ(၁၀၀၀)မှ (၁၂၀၀)အထိ ထွက်ရှိပါကြောင်း၊ ဆီကြော် မုန့်(၆)ခုပါ တစ်ထုပ်လျှင် ကျပ်(၅၂၀)ဖြင့် ဖောက်သည်ပေးပြီး ပွင့်ဖြူမြို့ပေါ်နှင့် ကျေးရွာများမှ ကုန်စုံဆိုင်များ၊ စလင်း၊ ဆင်ဖြူကျွန်းနှင့်မင်းဘူး၊ စကုမြို့များရှိ ကုန်စုံဆိုင်များအထိ ကိုယ်တိုင်ဆိုင်ကယ်ဖြင့်ပေးပို့ကြောင်း သိရှိရပါသည်။

 ဌေးဌေးဝင်း( ပွင့်ဖြူ)