ပြည်တွင်းကုန်သွယ်မှုသတင်း

            ပဲခူးတိုင်းဒေသကြီး၊တောင်ငူခရိုင်၊ ဖြူးမြို့တွင် ယခုရက်အတွင်း ပေါ်ဆန်းဆန်ဈေးနှုန်းမှာ တစ်အိတ်လျှင် ၈၅၀၀၀ ကျပ်၊ ဧည့်မထဆန်ဈေးနှုန်းမှာ တစ်အိတ်လျှင် ၅၄၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းပြောင်းလဲမှုမရှိပဲ တည်ငြိမ်လျှက်ရှိပါသည်။

              ပဲဆီမှာ တစ်ပိဿာလျှင် ၁၃၀၀၀ ကျပ်ဈေးနှုန်းဖြင့် ယခင်အပတ်ကအတိုင်း ဈေးနှုန်းတည်ငြိမ်လျက်ရှိပါသည်။ စားအုန်းဆီ တစ်ပိဿာလျှင် ယခင်အပတ်က တစ်ပိဿာ ၆၅၀၀ ကျပ် ဈေးနှုန်းရှိပြီး ယခုအပတ်တွင်မူ တစ်ပိဿာ ၇၁၅၀ ကျပ်ဈေးနှုန်းရှိကာ ဈေးနှုန်းအနည်းငယ်မြင့်တက်လျက်ရှိပါသည်။

              ကြက်သွန်နီ တစ်ပိဿာလျှင် ယခင်အပတ်က ၁၂၀၀ ကျပ်မှ ယခုအပတ်တွင် ၁၃၀၀ ကျပ်၊ ကြက်သွန်ဖြူ တစ်ပိဿာလျှင် ယခင်အပတ်က ၅၀၀၀ ကျပ်မှ ယခုအပတ်တွင် ၆၀၀၀ ကျပ် ဖြင့် ဈေးနှုန်း အနည်းငယ်မြင့်တက်လျက်ရှိပါသည်။

              ငရုပ်သီးခြောက် (အရှည်) တစ်ပိဿာလျှင် ယခင်အပတ်က ၁၂၀၀၀ ကျပ်ဈေးနှုန်းဖြစ်ပြီး ယခုအပတ်တွင် ၁၁၀၀၀ ကျပ်ဈေးနှုန်းရှိရာ အနည်းငယ်ကျဆင်းသွားပါသည်။ အာလူး တစ်ပိဿာ လျှင် ယခင်အပတ်က ၂၀၀၀ ကျပ်ဈေးနှုန်းမှ ယခုအပတ်တွင် ၂၄၀၀ ကျပ်ဖြင့် ဈေးနှုန်း အနည်းငယ် မြင့်တက်ပါသည်။

              မြေပဲဆံ တစ်ပိဿာလျှင် ယခင်အပတ်က ၇၅၀၀ ကျပ်ဈေးနှုန်းဖြစ်ပြီး ယခု အပတ်တွင် (၇၉၀၀) ကျပ်နှုန်းဖြင့် ဈေးနှုန်းအနည်းငယ်မြင့်တက်ပါသည်။ ကုလားပဲခြမ်း တစ်ပိဿာလျှင်ယခင် အပတ်က (၄၈၀၀)ကျပ်ဖြင့် ယခင်အပတ်ကအတိုင်း ဈေးနှုန်းပြောင်းလည်းမှုမရှိကြောင်း၊  ဖြူးမြို့ စည်ပင်သာယာဈေးကြီးအတွင်း ဖြစ်ပေါ်နေသော အခြေခံကုန်ဈေးနှုန်းများ၏ ဈေးနှုန်း အပြောင်းအလဲများအား လေ့လာသိရှိခဲ့ခြင်းအား တင်ပြလိုက်ပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်အနေဖြင့် ဆောင်းပဲတီစိမ်းစိုက်ပျိုးဧကမှာ (၁၉၈၄၃)ဧက စိုက်ပျိုးထားပြီးဖြစ်ပါသည်။ ရွှေတောင်မြို့နယ်အနေဖြင့် ဆောင်းပဲတီစိမ်း (၈၃၂)ဧကစိုက်ပျိုးပြီး မီးလောင်အုပ်စုတွင် (၃၈)ဧကစိုက်ပျိုးထားရှိကြောင်း သိရှိရပါသည်။

   စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံ ဦးအောင်နိုင်ဦးနှင့် ဝန်ထမ်းများသည် (၂၈.၂.၂၀၂၃) နေ့ နေ့လယ် (၁:၀၀)နာရီ အချိန်တွင် ရွှေတောင်မြို့နယ် မီးလောင်အုပ်စု၊ ဝါးလည်ကျေးရွာရှိ ပဲတီစိမ်းစိုက်ပျိုးသော တောင်သူဦးတင်ရွှေနှင့် သွားရောက်တွေ့ဆုံပြီး ပဲတီစိမ်း စိုက်ပျိုးထွက်ရှိမှု ကုန်ကျစရိတ်နှင့် အကျိုးအမြတ်များအား တွေ့ဆုံမေးမြန်းဆွေးနွေးခဲ့ပါသည်။ ပဲတီစိမ်းစိုက်ပျိုးသူတောင်သူမှ ပဲတီစိမ်းဒေသမျိုး(၅)ဧက စိုက်ပျိုးထားပြီး ယခင်နှစ်ကလည်း အလားတူ စိုက်ပျိုးထားပါသည်။ ပဲတီစိမ်း တစ်ဧက စိုက်ပျိုး ထုတ်လုပ်ကုန်ကျ စရိတ်အနေဖြင့် (၂၂၀၀၀၀) ကျပ်ခန့် ကုန်ကျသည်ဟုသိရှိရပြီး တစ်ဧကအထွက်နှုန်းအနေဖြင့် (၁၂)တင်းခန့် ထွက်ရှိသည်ဟု သိရှိရပါသည်။ ယခင်နှစ်တွင်လည်း ပဲတီစိမ်းစိုက်ပျိုး ထုတ်လုပ်ကုန်ကျစရိတ်နှင့် အထွက်နှုန်းမှာ ယခုနှစ်ကအတိုင်း တူညီနေသည်ဟု သိရှိိရပါသည်။ ယခုနှစ်လက်ရှိ ပဲတီစိမ်းပေါက်ဈေးမှာ ပိဿာ(၂၀)တစ်တင်းလျှင် (၅၅၀၀၀)ကျပ်ဖြင့် ရောင်းချရပြီး ယခင်နှစ်တွင် ပဲတီစိမ်း တစ်တင်းလျှင် (၄၅၀၀၀)ကျပ်ဖြစ်ခဲ့၍ ယခုနှစ်တွင် တစ်သောင်းကျပ်ခန့် ဈေးပိုလာသဖြင့် တောင်သူများ အကျိုးအမြတ်ပိုမိုဖြစ်ထွန်းလာမည်ဟု သိရှိရပါသည်။

    ပဲတီစိမ်းစိုက်ပျိုးသူတောင်သူများအနေဖြင့် ယခုနှစ်တွင် ပဲတီစိမ်းများထွက်ပေါ်ချိန်တွင် ယခုလက်ရှိပေါက်ဈေးအတိုင်း ရရှိနိုင်မည်ဆိုပါက အကျိုးအမြတ်များ ရရှိနိုင်မည်ဖြစ်ကြောင်း ရေးသားတင်ပြလိုက်ရပါသည်။

DOCA(ပဲခူး)

    သံပုရာပင်ကို မြန်မာနိုင်ငံအနှံ့အပြားတွင် စိုက်ပျိုးကြသလို ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်တွင်လည်း အများအပြားစိုက်ပျိုးကြပါသည်။ ပြည်မြို့နယ်အတွင်းရှိ ကျေးရွာများတွင် တစ်နိုင်တစ်ပိုင် စိုက်ပျိုးကြသလို၊ စီးပွားဖြစ်လည်း စိုက်ပျိုးကြပါသည်။ သံပုရာသီးကို လူအများ အသုံးပြုကြသဖြင့် စိုက်ပျိုးမှုများပြားလာပါသည်။

သံပုရာပင်စိုက်ပျိုးထွက်ရှိမှု

     သံပုရာပင်ကို အများအားဖြင့် အစေ့ကိုစိုက်ပျိုး၍လည်းကောင်း၊ မြေထုပ်စည်း၍လည်းကောင်း စိုက်ပျိုးကြပါသည်။ မြေထုပ်စည်း၍ စိုက်ပျိုးခြင်းဖြင့် အပင်ကြီးထွားမှုနှုန်းမြန်၍ အသီးသီးရာတွင်လည်း မြန်ကြောင်းသိရှိရပါသည်။ သံပုရာပင်မှာ နှစ်ရှည်သီးပင်ဖြစ်၍ မြန်မာသံပုရာမျိုးသည် ရေမြေရာသီဥတုအပေါ်မူတည်ပြီး အောင်မြင်ဖြစ်ထွန်းပါသည်။ မြန်မာနိုင်ငံတွင် သံပုရာပင်ကို မိုးရာသီဖြစ်သော ဇွန်လနှင့် ဇူလိုင်လတွင်စိုက်ပျိုးနိုင်ပြီး ရေပေးသွင်းနိုင်ပါက နှစ်ပတ်လည် စိုက်ပျိုးနိုင်ပါသည်။ သံပုရာပင်ကို နေ့စဉ်ရေလောင်းပေးနိုင်ပါက တစ်နှစ်ပတ်လုံး အသီးများ သီးနိုင်ပါသည်။ သံပုရာပင်စိုက်ပျိုးရာတွင် တစ်ပင်နှင့် တစ်ပင် (၁၅)ပေခန့်ခွာ၍ စိုက်ပျိုးမှသာ အသီးများစွာ သီးနိုင်ပါသည်။ တစ်ဧကလျှင် သံပုရာပင်ပေါင်း (၂၅၀-၃၀၀)ခန့်အထိ စိုက်ပျိုးနိုင်ပါသည်။ သံပုရာသီးမှာ မိုးသံပုရာနှင့် နွေသံပုရာ ဟူ၍ (၂)မျိုးရှိပြီး မိုးရာသီတွင်သီးသော သံပုရာသီးမှာ အလုံးချောပြီး အသီးအားကောင်း၍ နွေသီးမှာ အလုံးအနည်းငယ်သေး၍ အသီးနှုန်းအားနည်းပါသည်။ မိုးသံပုရာသီးကို မိုးလများဖြစ်သော ဇွန်လမှ အောက်တိုဘာလအထိ အသီးအလှိုင်ဆုံးအချိန်ဖြစ်ပါသည်။ သံပုရာပင်စိုက်ပျိုးပြီး (၄-၅)နှစ်အကြာတွင် အသီးများစတင် ခူးဆွတ်ရပါသည်။ သံပုရာပင် တစ်ပင် လျှင် ပျမ်းမျှအသီးလုံးပေါင်းမှာ အသီးအားကောင်းလျှင် ကောင်းသလို (၄၀-၅၀)လုံးခန့်သီးသည်ဟု သိရှိရပါသည်။

သံပုရာပင်တစ်ဧကစိုက်ပျိုးထုတ်လုပ်ကုန်ကျစရိတ်နှင့် အကျိုးအမြတ်

    သံပုရာပင်တစ်ဧက စိုက်ပျိုးထုတ်လုပ်ကုန်ကျစရိတ်မှာ မိသားစုလုပ်အားခပါလျှင် (၄-၅) သိန်းခန့် ကုန်ကျပြီး မိသားစုလုပ်အားခမပါလျှင် (၆-၇)သိန်းခန့် ကုန်ကျသည်ဟု သိရှိိရပါသည်။ မိုးသံပုရာသီးမှာ အသီးလုံးချောပြီး သီးအားကောင်းသောကြောင့် ဈေးမှာတစ်လုံးလျှင် (၅၀-၆၀) ကျပ်ခန့်ဈေးရှိ၍ နွေရာသီတွင်သီးသောသံပုရာသီးမှာ အသီးလုံးညှက်ပြီး မိုးသံပုရာလောက် မသီးပေမယ့် ဈေးနှုန်းမှာ တစ်လုံးလျှင် (၁၅၀-၂၀၀)ကျပ်ခန့် ရှိပါသည်။ သံပုရာစိုက်ပျိုးသော တောင်သူများအနေဖြင့် တစ်ဧကစိုက်ပျိုးထားလျှင် အသီးများစတင်သီးချိန်မှစ၍ တစ်နှစ်ပတ်လုံး ဝင်ငွေများ ရရှိပြီး တစ်လလျှင် ပျမ်းမျှ ဝင်ငွေမှာ (၅)သိန်းကျပ်ဝန်းကျင် ခန့်ရရှိသည်ဟု သိရှိရပါသည်။

သံပုရာသီးနှင့်ကျန်းမာရေး

   သံပုရာသီးစားသုံးခြင်းဖြင့် သွေးတွင်းရှိ အဆီများကျဆင်းစေပြီး သွေးတိုးလည်းကျစေပါ သည်။ သံပုရာသီးကို တိုင်းရင်ဆေးထုတ်လုပ်ရာတွင် အသုံးပြုရသလို အစာမကြေ၊ လေနာ၊ သလိပ်နာ ရောဂါများအပြင် ရောဂါအတော်များများလည်းပျောက်ကင်းစေပါသည်။ သံပုရာသီးစား သုံးခြင်းဖြင့် ကျန်းမာရေးအတွက်သာမက အလှအပရေးရာအတွက်လည်း အထောက်အကူပြု ပါသည်။ သံပုရာသီးအခွံကို ဆားဖြင့်ရော၍ သွားများကိုတိုက်ပေးပါက သွားများဖြူဖွေးစေပါသည်။ တံတောင်ဆစ်မည်းနေလျှင်လည်း သံပုရာသီးကို ထက်ခြမ်းခြမ်း၍ပွတ်ပေးပါက မည်းနေတာများ ပျောက်ကင်းသလို ဆံပင်ကျွတ်လျှင် အုန်းရည်ထဲသို့ သံပုရာရည်ရောကာ တစ်ပတ်လျှင် တစ်ကြိမ်ခန့် လိမ်းပေးခြင်းဖြင့် သက်သာပျောက်ကင်းနိုင်သည်ဟု သိရှိရပါသည်။ သွေးတိုး၍ မူးမော်လာပါက သံပုရာရည်ဖျော်၍လည်း သောက်သုံးနိုင်ပါသည်။ ထိုကြောင့် သံပုရာသီးသည် လူအတော်များ များသုံးစွဲကြသော သီးနှံတစ်မျိုးဖြစ်ပြီး အုန်းနို့ခေါက်ဆွဲ၊ မုန့်ဟင်းခါး နှင့် အသုတ်များထဲတွင်ထည့်၍ စားသုံးကြသဖြင့် ခံတွင်းရှင်းပြီး အအီလည်းသက်သာစေသည့်အပြင် ကျန်းမာရေးအတွက်လည်း အထောက်အကူပြုပါသည်။

    သံပုရာသီးကို  လူတိုင်းအသုံးပြုကြသဖြင့် ယခုအချိန်တွင် သံပုရာသီးကို ပြည်မြို့ရှိ ကျေးရွာအတော်များများတွင် စိုက်ပျိုးလာကြပါသည်။ သံပုရာပင်စိုက်ပျိုးရာတွင်  စိုက်ပျိုးရန် လွယ်ကူ၍ စိုက်ပျိုးစရိတ်လည်းသက်သာသဖြင့် စိုက်ပျိုးလာကြပါသည်။ ထွက်ရှိလာသော သံပုရာသီးများကို ပြည်ဈေးကွက်သို့တင်ပို့ရောင်းချပြီး ထိုမှတစ်ဆင့် ပိုလျှံသောသံပုရာသီးများကို ရန်ကုန်မြို့ရှိ ဒညင်းကုန်းဈေးနှင့် သီရိမင်္ဂလာဈေးများသို့ တင်ပို့ရောင်းချပါသည်။ ထို့ကြောင့် သံပုရာပင်စိုက်ပျိုးသူ တောင်သူများအနေဖြင့် နေ့စဉ်လစဉ်ဝင်ငွေများရရှိနိုင်ပြီး ပိုမိုတိုးချဲ့ စိုက်ပျိုးနိုင်မည်ဆိုပါက ပိုမို အကျိုးအမြတ်များရရှိလာနိုင်မည်ဖြစ်ကြောင်း ရေးသားတင်ပြလိုက်ပါသည်။

DOCA(ပဲခူး)

   ပြည်ကုန်စည်ဒိုင်၏ အရောင်းအဝယ်ဖြစ်လျက်ရှိသော ပဲဈေးများ၏ ဈေးနှုန်းနှင့် အရောင်းအဝယ်ဖြစ်မှုအခြေအနေကို အောက်ပါအတိုင်းနှိုင်းယှဉ်လေ့လာ သိရှိရပါသည်။

  ပြည်ကုန်စည်ဒိုင်၏ ဖေဖော်ဝါရီလဒုတိယအပတ်တွင် မတ်ပဲတစ်တင်းကို (၆၁၀၀၀-၆၁၅၀၀) ကျပ်ဖြင့် တစ်ရက်လျှင်အိတ် (၂၀၀/၃၀၀)ခန့် အရောင်းအဝယ်ရှိခဲ့ပါသည်။ တတိယပတ်တွင် မတ်ပဲ တစ်တင်းလျှင် (၆၂၀၀၀)ကျပ်ဖြင့် တစ်ရက်လျှင်အိတ် (၄၀၀/၅၀၀)ခန့်လှောင်သမားနှင့် ရန်ကုန် အဝယ် ရှိခဲ့ပါသည်။

   ပြည်ကုန်စည်ဒိုင်တွင် ပဲစင်းငုံတစ်တင်းလျှင် (၆၅၀၀၀)ကျပ်ဖြင့် တစ်ရက်ကို ရန်ကုန်အဝယ် အိတ် (၄၀၀/၅၀၀)ခန့် ရှိခဲ့ပါသည်။ ဖေဖော်ဝါရီတတိယပတ်တွင် ပဲစင်းငုံတစ်တင်းကို (၆၆၀၀၀) ကျပ်ဖြင့် လှောင်သမားနှင့် ရန်ကုန်အဝယ်တစ်ရက်လျှင် အိတ် (၅၀၀/၆၀၀)ခန့် အဝယ်ရှိပါသည်။ ဖေဖော်ဝါရီတတိယပတ်တွင် ပဲစင်းငုံတစ်တင်းလျှင် (၁၀၀၀)ကျပ်ခန့် ဈေးတက်ခဲ့ပါသည်။

   ဖေဖော်ဝါရီ ဒုတိယပတ်တွင် ကုလားပဲ(HL)တစ်တင်းလျှင် (၆၅၀၀၀)ကျပ်၊ ကုလားပဲ (မြကြေးမှုံ) တစ်တင်းလျှင် (၆၂၅၀၀-၆၃၀၀၀)ကျပ်ဖြင့် တစ်ရက်လျှင် အိတ် (၃၀၀/၄၀၀)ခန့် ခွဲစက်သမားနှင့် ရန်ကုန်အဝယ်ရှိခဲ့ပါသည်။ တတိယပတ်တွင် ကုလားပဲ (HL) တစ်တင်းလျှင် (၆၆၀၀၀-၆၆၅၀၀)ကျပ် ကုလားပဲ(မြကြေးမှုံ)တစ်တင်းလျှင် (၆၆၀၀၀-၆၆၅၀၀)ကျပ်ဖြင့် တစ်ရက်လျှင် အိတ် (၄၀၀/၅၀၀) ခန့် ခွဲစက်သမားနှင့် ရန်ကုန်အဝယ်ရှိခဲ့ပါသည်။

   ဖေဖော်ဝါရီ ဒုတိယပတ်တွင် ပဲကြီး (ရွှေကျွန်း)တစ်တင်းလျှင် (၈၃၀၀၀-၈၅၀၀၀)ကျပ်ဖြင့် ပဲကြော်သမားများ မြို့တွင်းအဝယ်ရှိခဲ့ပါသည်။ ဖေဖော်ဝါရီတတိယပတ်တွင် ပဲကြီး(ရွှေကျွန်း) တစ်တင်းလျှင် (၈၀၀၀၀-၈၁၀၀၀)ကျပ်ဖြင့် ပဲကြီးဈေးကျလာခဲ့ပါသည်။ ပဲကြီး (ရွှေကျွန်း)အဝယ် တစ်ရက်လျှင် အိတ် (၃၀၀/၄၀၀)ခန့် မြို့တွင်းအဝယ်ရှိခဲ့ပါသည်။

   ဖေဖော်ဝါရီ ဒုတိယပတ်တွင် ဘိုကိတ်ပဲတစ်တင်းလျှင် (၄၈၀၀၀-၄၈၅၀၀)ကျပ်ဖြင့် မြို့တွင်း အဝယ်တစ်ရက်လျှင် အိတ် (၁၀၀)ခန့် အဝယ်ရှိခဲ့ပါသည်။ တတိယပတ်တွင် ဘိုကိတ်တစ်တင်းလျှင် (၄၇၀၀၀)ကျပ်ဖြင့် ဘိုကိတ်ဈေးကျလာခဲ့ပြီး မြို့တွင်းအဝယ်တစ်ရက်လျှင် (၁၀၀/၁၅၀)ခန့် ရှိခဲ့ ပါသည်။

   ပြည်ကုန်စည်ဒိုင်တွင် ပြည်ပပို့ကုန်ရှိသောပဲဈေးမှာ အနည်းငယ်တက်လျက်ရှိပြီး၊ မြို့တွင်း အဝယ်ရှိသောကုလားပဲဈေးမှာလည်းမြင့်လာခဲ့ကြောင်း သိရှိရပါသည်။

DOCA(ပဲခူး)

          ပြည်ခရိုင်အတွင်းတွင် ပဲမျိုးစုံစိုက်ပျိုးလျက်ရှိရာ မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ သီးနှံများကို အများအပြားစိုက်ပျိုးလျက်ရှိပါသည်။

          ပဲစင်းငုံသီးနှံကို ပြည်ခရိုင်တွင်စိုက်ပျိုးဧက (၁၄၇၅၈) ဧကစိုက်ပျိုးလျက်ရှိပါသည်။ ထွက်ရှိမှုမှာ တစ်ဧကကို (၁၄)တင်းနှုန်းခန့်ထွက်ရှိပါသည်။ ပဲစင်းငုံရိတ်သိမ်းပြီးစီးမှုအနေဖြင့် ဧက(၁၅၂၀) ဧက ခန့်ရိတ်သိမ်းပြီးဖြစ်ပါသည်။

         ယခုနှစ်ဖေဖော်ဝါရီ ပထမပတ်တွင် ပဲစင်းငုံတစ်တင်းကို (၆၀၅၀၀)ကျပ်ဖြင့် အရောင်းအဝယ်ရှိခဲ့ပါသည်။  ပဲသစ်များလည်းဝင်နေပြီဖြစ်ကာ ပဲစင်းငုံအသစ်တစ်တင်းကို (၆၀၀၀၀) ကျပ်ဖြင့် ဈေးဖွင့်ခဲ့ပြီး ပန်းတောင်း၊ ကံမ၊ မင်းတုန်းနှင့်ပေါက်ခေါင်းဘက်မှ အဝင်ရှိခဲ့ပါသည်။ ယခင်နှစ်ဖေဖော်ဝါရီပထမပတ်တွင် ပဲစင်းငုံတစ်တင်းကို (၄၂၀၀၀)ကျပ်ဖြင့် အရောင်းအဝယ်ဖြစ်ခဲ့ပါသည်။ ပဲတစ်တင်းကို ယခုနှစ်(၁၈၅၀၀)ကျပ်ခန့် ဈေးပိုရခဲ့ပါသည်။

        ယခုနှစ်ဖေဖော်ဝါရီ ဒုတိယပတ်တွင် ပဲစင်းငုံတစ်တင်းကို (၆၃၅၀၀-၆၄၀၀၀)ကျပ်ဖြင့် တစ်ရက်ကိုအိတ် (၄၀၀/၅၀၀) ခန့် လှောင်သမားနှင့်ရန်ကုန်အဝယ်ရှိခဲ့ပါသည်။ ယခင်နှစ် ဖေဖော်ဝါရီ ဒုတိယပတ်တွင် ပဲစင်းငုံတစ်တင်းကို (၄၁၀၀၀)ကျပ်ဖြင့် အဝယ်ရှိခဲ့ပါသည်။ ယခုနှစ်ဖေဖော်ဝါရီ ဒုတိယပတ်တွင် ပဲစင်းငုံဈေးမှာ တစ်တင်းကို (၂၃၀၀၀)ကျပ် ဈေးပိုရခဲ့ပါသည်။

         ယခင်နှစ်ဖေဖော်ဝါရီ တတိယပတ်တွင် ပဲစင်းငုံတစ်တင်းကို (၆၆၀၀၀)ကျပ်ဈေးဖြင့် တစ်ရက် ကို အိတ် (၂၀၀/၃၀၀) ခန့် အဝယ်ရှိခဲ့ပါသည်။ ယခုနှစ်ဖေဖော်ဝါရီလတတိယပတ်တွင် ပဲစင်းငုံ တစ်တင်းကို (၄၂၀၀၀)ကျပ်ဈေးဖြင့် အရောင်းအဝယ်ရှိခဲ့ပါသည်။ ယခင်နှစ်ကထက် ပဲစင်းငုံ တစ်တင်းကို (၂၄၀၀၀)ကျပ် ဈေးပိုရပြီး ရန်ကုန်အဝယ်လည်း ရှိခဲ့ပါသည်။

          ပဲစင်းငုံတစ်တင်းဈေးမှာ ဈေးကောင်းလျက်ရှိပြီး အိန္ဒိယတွင် ပဲစင်းငုံအထွက်နည်းနေ၍ ပြည်ပသို့တင်ပို့သောကြောင့် ပဲစင်းငုံဝယ်ယူမှုများသဖြင့် ပဲစင်းငုံဈေးမြင့်လျက်ရှိကြောင်း သိရှိရပါ သည်။

DOCA(ပဲခူး)