ပြည်တွင်းကုန်သွယ်မှုသတင်း

    ကရင်ပြည်နယ်၊ ဘားအံမြိုနယ်၊ ပေါ့ထော်ကျေးရွာသို့  ၈-၃-၂၀၂၃ ရက်နေ့ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ ပြည်နယ်ဦးစီးမှူးဦးသန်းဦးနှင့်ဝန်ထမ်းများသည် ဒေသတွင်း စားသုံးဆီဖူလုံပိုလျှံစေရေးနှင့် ပြည်တွင်းကုန်သွယ်မှုဖွံ့ဖြိုးတိုးတက်စေ‌ရေးတို့အတွက် ဒေသတွင်း စိုက်ပျိုးထားရှိသော နေကြာပင် စိုက်ခင်းသို့ သွားရောက်လေ့လာခဲ့ကြောင်း သတင်းရရှိသည်။

      နေကြာပင်ကို မြေသားနက်၍ မွပြီးမြေဆီအာဟာရသန်သောမြေနှင့် နှုန်းမြေတွင် စိုက်ပျိုးနိုင်ပါသည်။ နေကြာပင်သည်ရေမကြိုက်ပါ။ နေကြာပင်ကို.မိုးနှောင်းပိုင်းတွင်စိုက်ပျိုးနိုင်ပါသည်။ နေကြာသီးနှံစိုက်ပျိုးခြင်းသည် စိုက်ပျိုးစရိတ်နည်းပါးခြင်း၊ အပျက်အစီးနည်းခြင်း၊ တစ်ဧကအထွက်နှုန်း ကောင်းခြင်းတို့ကြောင်း ပြည်တွင်းစားသုံးဆီဖူလုံစေရေးအတွက် အထောက်အကူပြုနိုင်သည့် သီးနှံဖြစ်ပါသည်။ နေကြာတစ်ကျင်းကို အစေ့ ၄ စေ့ ၅ စေ့ ချပေးရပြီး လေး၊ ငါးရက်အတွင်း အပင်ပေါက်သည်။ ၎င်းအပင်ပေါက်များ အရွက်ထွက်လာသောအခါ အကောင်းဆုံးအပင်ကိုချန်ထားပြီး ကျန်အပင်တွေကိုနှုတ်ပေးရပါသည်။ နေကြာပင်ကို သဘာဝမြေသြဇာဖြစ်သည့် နွားချေးနှင့် မြေဆွေးကို ထည့်ပေးနိုင်သည်။ နွားချေးမြေသြဇာထည့်ပါက တစ်ဧက နွားချေးတင်း ၁၀၀ မှ ၂၀၀ ထိ ထည့်ပေးနိုင်သည်။ နေကြာပင်ပေါက်ပြီး ရက်ပေါင်း ၃၀ မှ ၄၀ ရက် သားလောက်တွင် ပေါင်းမြက် များကိုနုတ်ခြင်း၊ ဘောင်တင်ခြင်းတို့ကို ပြုလုပ်နိုင်ပါသည်။ နေကြာပင်၌ ရောဂါပိုးမကျအောင်လည်း ဂရုစိုက်ရပါသည်။ နေကြာပင်၏ပုံသဏ္ဍာန်မှာ ညိုဝါရောင်ပြောင်းလာပြီးဆို အစေ့များ အောင်ပြီဖြစ်၍ စတင်ရိတ်သိမ်းနိုင်ပါသည်။ ရိတ်သိမ်းရာတွင်လည်း အစေ့တွင်အစိုဓာတ် (၅.၆) ရာခိုင်နှုန်း ရရှိရန် နှစ်ရက် သုံးရက် နေလှန်း၍ လေလုံအောင်သိုလှောင်ရမည်ဖြစ်ကြောင်း လေ့လာသိရှိရသည်။

     ကရင်ပြည်နယ်တွင် နေကြာသီးနှံစိုက်ပျိုးမှုမှာ ယခင် ၁၆၄ ဧက ရှိခဲ့ရာမှ ယခုအခါ ၁၃၇၂ ဧက ထိ တိုးချဲ့စိုက်ပျိုးနိုင်လာကြောင့်နှင့် ပြည်နယ်အတွင်းရှိစိုက်ပျိုးနိုင်သော မြေလွတ်/ မြေရိုင်းများ၊ ရေမရနိုင်သော နေရာများသို့ ရေရရှိနိုင်ရေး၊ သီးထပ်/ သီးညှပ် စနစ်များဖြင့် စီမံလျာထားချက်များ ချမှတ်ကာ ထပ်မံတိုးချဲ့ စိုက်ပျိုးသွားမည်ဖြစ်ကြောင်း သိရသည်။

  ထို့ကြောင့် မြန်မာနိုင်ငံတစ်ဝှမ်းမှာ ဆီစက်လုပ်ငန်းရှင်များ၊ စိုက်ပျိုးတောင်သူများနှင့်စိုက်ပျိုး ရေးဝါသနာရှင်များအနေဖြစ် ‌ဒေသတွင်းစားသုံးဆီဖူလုံပိုလျှံစေရေးနှင့် ပြည်တွင်းကုန်သွယ်မှုဖွံ့ဖြိုးတိုး တက်စေရေးအတွက် ကရင်ပြည်နယ်၊ ဘားအံမြို့၊ ပေါ့ထော်ကျေးရွာရှိ တစ်နိုင်တစ်ပိုင် စီးပွားရေးထက် ပိုမိုစိုက်ပျိုးအောင်မြင် ဖြစ်ထွန်းနေသော နေကြာပင်စိုက်ခင်းအကြောင်း တစ်စေ့တစ်စောင်း ဖော်ပြလိုက်ရပါသည်။

DOCA(ကရင်)

    ကင်းမွန်သည် ရေငန်တွင်အသက်ရှင်နေထိုင်လျက်ရှိပြီး အချို့က ပြည်ကြီးငါးဟုလည်း ခေါ်ကြပါသည်။ ရေငန်ပိုင်းနေ ကျောရိုးမဲ့၊ အခွံမဲ့ ရေနေသတ္တဝါများဖြစ်သော ကင်းမွန်နှင့် ပြည်ကြီးငါးများမှာ ပုံသဏ္ဍာန်တူသည်ဟု ထင်ရသော်လည်း ကင်းမွန်၏ ခန္ဓာကိုယ်ပုံပန်းသဏ္ဍာန်မှာ ရှည်မျောမျောရှိပြီး ပြည်ကြီးငါး၏ ခန္ဓာကိုယ်ပုံပန်းသဏ္ဍာန်မှာ လုံးဝန်းလျက်ရှိပါသည်။

    ဆိုင်တစ်ဆိုင်တွင် ပင်လယ်စာဟုဆိုလျှင်  မပါမဖြစ်သည့်အမျိုးအစားတစ်မျိုးမှာ ကင်းမွန် ဖြစ်ပါသည်။ ကင်းမွန်ဟာ ပရိုတင်း အသားဓာတ်နှင့် သတ္တုဓာတ်တွေ ကြွယ်ဝသည့်အပြင် အဆီရော၊ ကယ်လိုရီရော နည်းသောကြောင့် ကျန်းမာရေးအတွက် စားသုံးရန်သင့်သော အစားအစာတစ်မျိုးဖြစ်ပါသည်။

   ကင်းမွန်သည်တစ်နှစ်ပတ်လုံး သားပေါက်လေ့ရှိကြပြီး အများအားဖြင့် ရေအပူချိန်တိုး လာချိန်များ၌ ပိုပြီးသားပေါက်ကြပါသည်။ အသေးဆုံးကင်းမွန်များသည် တစ်နှစ်အရွယ်တွင် မျိုးအောင်ကြပြီး ခန့်မှန်းအားဖြင့် ကင်းမွန်များ၏သက်တမ်းမှာ(၃)နှစ်သာ ရှိပါသည်။ ကင်းမွန်အမမှာ ဥပေါင်း (၁)သိန်းကျော်ထိ ဥ ဥနိုင်ကြပါသည်။ ဧပြီ၊ မေလများသည် ကင်းမွန်များ သားပေါက်ရာသီဖြစ်သောကြောင့် ထိုကာလ၌ ကင်းမွန်ဖမ်းခြင်းကို ရပ်ဆိုင်းထားပြီး သတ်မှတ်ကာလမှအပ ကင်းမွန်များကို အများအားဖြင့် လပြည့်ကျော် (၄)ရက်နေ့မှစ၍  ဖမ်းဆီးကြပါသည်။ အဓိကအားဖြင့် ဆောင်းဦးအစမှ နွေဦးပေါက်သည်အထိ ဖမ်းဆီးရမိမှုမှာ ပိုမိုများပြားလျက်ရှိပါသည်။

   ကင်းမွန်ကို တနင်္သာရီ၊ ရခိုင်ကမ်းရိုးတန်းဒေသနှင့် မြိတ်ကျွန်းစုတို့တွင် အများဆုံး တွေ့ရှိရပြီး မွန်ပြည်နယ်တို့တွင်လည်းဖမ်းဆီရမိကြသည်။ မြိတ်ဒေသတွင်ဖမ်းဆီးရမိသည့် ကင်းမွန်အရွယ်အစားမှာ ၁လက်မအရွယ်မှ ၁၀ လက်မအရွယ်ခန့်ရှိပြီး ဖမ်းဆီးရမိသည့် ကင်းမွန်များကို ပြည်တွင်း နေရာအနှံ့အပြားသို့ ပို့ဆောင်လျက်ရှိကြပါသည်။ ကင်းမွန်ကို စျေးကွက်တွင် အရွယ်(၃)မျိုး ခွဲခြားလျက်ရှိပြီး ၂ လက်မနှင့်အောက်ကို ကင်းမွန်အခြောက်ပြု လုပ်၍ရောင်းချပြီး ၃ လက်မနှင့် အထက်ကင်းမွန်များကို ရေခဲရိုက်၍သော်လည်းကောင်း၊ သန့်စင်၍ အကွင်းလိုက်ပြုလုပ်၍သော်လည်းကောင်း ရောင်းချလျက်ရှိပါသည်။ အကွင်းလိုက်ပြုလုပ်ထားသော ကင်းမွန်များကို  တရုတ်နိုင်ငံမှအများဆုံးဝယ်ယူကြပြီး အကောင်လိုက် ရေခဲရိုက်ထားသောကင်းမွန်များကို ထိုင်းနိုင်ငံသို့ အများဆုံး တင်ပို့ရောင်းချလျက်ရှိ ကြပါသည်။

   ယခင်က စျေးကွက်ဝင် ကင်းမွန်တစ်ပိဿာလျင် ၁၅၀၀၀ကျပ်ခန့်ရှိရာမှ  ယခုအချိန်တွင် စက်သုံးဆီစျေးနှုန်းမြင့်မားလာခြင်းနှင့် ကင်းမွန်ရရှိမှုနည်းပါးခြင်းတို့ကြောင့် စျေးကွက်ဝင် ကင်းမွန် တစ်ပိဿာလျှင် ၂၅၀၀၀ကျပ်ခန့်ထိ စျေးပိုမိုမြင့်မားလာခြင်းဖြစ်ကြောင်း ကင်းမွန်လုပ်ငန်းလုပ်ကိုင်သူတစ်ဦး၏ ပြောကြားချက်အရ ရေးသားတင်ပြလိုက်ပါသည်။

DOCA(တနင်္သာရီ)

    မန္တလေးတိုင်းဒေသကြီး၊ မိတ္ထီလာခရိုင်အတွင်း ပြည်တွင်းစားသုံးဆီဖူလုံပိုလျှံရေးအတွက် ၂၀၂၂-၂၀၂၃ ခုနှစ်တွင် ဆီထွက်သီးနှံတစ်မျိုးဖြစ်သည့် နေကြာသီးနှံကို  မိတ္ထီလာ၊ သာစည်၊မလှိုင်၊ ဝမ်းတွင်းစသည့်မြို့နယ်များတွင် မိုး‌/ဆောင်းရာသီနှစ်မျိုးစလုံးတွင် ပိုမိုစိုက်ပျိုးခဲ့ရာ စီမံကိန်းလျာထားချက်ကျော်လွန်ပြီး စိုက်ပျိုးနိုင်သည့်အပြင် တိုးချဲ့စိုက်ဧက မိုးနေကြာ(၃၇၂၃)ဧကနှင့် ဆောင်းနေကြာ(၉၇၂၀)ဧက စိုက်ပျိုးနိုင်ခဲ့ပြီး စိုက်ပျိုးသည့်နေကြာမျိုးကွဲများမှာ ဆင်းရွှေကြာ-၂၊ ရေဆင်း ၁ စပ်မျိုး နှင့် Black Sunflower  မျိုးများကို သီးသန့်စိုက်ခင်းများဖြင့်လည်းကောင်း ၊အခြားသီးနှံများနှင့်ရော၍ ပင်ကြား၊ တန်းကြား သီးညှပ်စိုက်ပျိုးခြင်းကိုလည်းကောင်း၊  စိုက်ပျိုးရေးဦးစီးဌာန၏ နည်းပညာ၊ မျိုးကောင်းမျိုးသန့်များ ထောက်ပံ့ပေးမှုဖြင့် စိုက်ပျိုးကြောင်း သိရပါသည်။

     တောင်သူများအနေဖြင့် မိုးနေကြာကို မိုးဦးကာလ မေ၊ဇွန်လများတွင် စိုက်ပျိုးကြသော်လည်း ယခုနှစ်တွင် မိုးနှောင်ကာလ သြဂုတ်၊စက်တင်ဘာလများအထိ တိုးချဲ့စိုက်ပျိုးကြပါသည်။ နေကြာ စိုက်ပျိုးထုတ်လုပ်မှုကုန်ကျစရိတ်မှာ တစ်ဧကလျှင် ကျပ်(၂)သိန်းခန့်သာကုန်ကျပြီး တစ်ဧကအထွက်နှုန်းမှာ တင်း(၂၀)ကျော်ခန့် ထွက်ရှိပြီး လက်ရှိနေကြာစျေးနှုန်းမှာလည်း တစ်တင်းလျှင် (၃၅၀၀၀) ကျပ်ခန့် ရောင်းချရကြောင်း၊ ဆီကြိတ်ရောင်းလျှင်လည်း နေကြာဆီတစ်ပိဿာလျှင်(၁၂၀၀၀) ကျပ်၊ နေကြာဖတ် တစ်ပိဿာလျှင် (၁၅၀၀)ကျပ်ခန့်ရရှိသဖြင့် စီးပွားရေးအရတွက်ခြေကိုက်၍ အကျိုးအမြတ်များစွာ ရရှိသဖြင့် လာမည့်နှစ်များတွင်လည်း နေကြာသီးနှံကို ပိုမိုတိုးချဲ့စိုက်ပျိုးသွားမည်ဖြစ်ကြောင်း စိုက်ပျိုးလုပ်ကိုင်သူတောင်သူများထံမှ သိရပါသည်။

DOCA(မန္တလေး)

      မိတ္ထီလာစျေးကွက်သို့ ဆန်သစ်များ အဝင်လှိုင်လာသော်လည်း ဆန်ဟောင်းများ စျေးငြိမ်လျက်ရှိပါသည်။ မိတ္ထီလာခရိုင်တွင် မိုးစပါးကိုအများဆုံးစိုက်ရာ စိုက်ပျိုးရာတွင်လည်း ဒေသရာသီဥတုနှင့် လျော်ညီကာစျေးကွက်ဝင်သည့် မနောသုခကိုသာ အများဆုံးစိုက်ပျိုးကြပါသည်။ ယခုအခါ  ကျောက်ဆည်၊ မြစ်သားမျိုးဖြစ်သည့် ဧရာပဒေသာမှာ စျေးကောင်းရသဖြင့် ဝမ်းတွင်းမြို့နယ်တွင် ၎င်းမျိုးကို စိုက်ပျိုးမှုများပြားလာပါသည်။

   မိတ္ထီလာစျေးကွက်သို့ ဆန်သစ်များမှာ ဇန်နဝါရီလမှစ၍ ဝင်ရောက်လာပြီး ယခုအခါအဝင်လှိုင်လာခြင်းကြောင့် လှောင်လက်သမားများဝယ်ယူမှုများပြားပါကြောင်း၊ မတ်လဆန်းရှိဆန်စျေးမှာ မိတ္ထီလာစျေးကွက်တွင် တစ်အိတ်လျှင် မနောသုခ (ဟောင်း) တစ်အိတ်လျှင် ၆၅၀၀၀ ကျပ်၊ အနောသုခ (သစ်) တစ်အိတ်လျှင် ၅၈၀၀၀ ကျပ်၊ ဧရာပဒေသာ (ဟောင်း) တစ်အိတ်လျှင် ၇၈၀၀၀ ကျပ်၊ ဧရာပဒေသာ တစ်အိတ်လျှင် (သစ်) ၇၀၀၀၀ ကျပ်၊ ရွှေဘိုပေါ်ဆန်း (ဟောင်း) တစ်အိတ်လျှင် ၉၅၀၀၀ ကျပ်၊ ရွှေဘိုပေါ်ဆန်း (ဟောင်း) တစ်အိတ်လျှင် ၉၅၀၀၀ကျပ် ၊ ရွှေဘိုပေါ်ဆန်း (သစ်) တစ်အိတ်လျှင် ၈၀၀၀၀ကျပ်ဖြင့် ယခင် ဖေဖော်ဝါရီလလယ် စျေးဖြင့် စျေးငြိမ်နေပါကြောင်း၊ စျေးငြိမ်နေရခြင်းမှာ ဆန်သစ်များ အဝင်လှိုင်သကဲ့သို့ စျေးကွက်အတွင်း ဆန်လက်ကျန်များလည်းရှိနေခြင်းကြောင့် ဖြစ်ပါကြောင်းနှင့် စပါးစျေးမှာလည်း ယခင်ဖေဖော်ဝါရီလ တတိယပတ်နည်းတူ မနောသုခ တင်း (၁၀၀) လျှင် ၁၇၀၀၀၀၀ ကျပ်၊ ဧရာပ‌ဒေသာ တင်း (၁၀၀) လျှင် ၁၈၀၀၀၀၀ ကျပ် စျေးဖြင့် စျေးငြိမ်နေကြောင်း သိရှိရပါသည်။

DOCA(မန္တလေး)

    မြန်မာနိုင်ငံစက်သုံးဆီ တင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် တိုင်းဒေသကြီး/ပြည်နယ်အလိုက် မြို့ကြီးများ၏ စက်သုံးဆီရည်ညွှန်းလက်ကားစျေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

   မကွေးမြို့ပေါ်တွင် စက်သုံးဆီဆိုင် (၂၁)ဆိုင်ရှိရာ ပုံမှန်ဖွင့်လှစ်ရောင်းချလျက်ရှိကြပြီး ၂၀၂၃ခုနှစ်၊ ဖေဖော်ဝါရီလ(စတုတ္ထအပတ်)စက်သုံးဆီစျေးနှုန်းများမှာ ဒီဇယ်(ရိုးရိုး)(၁)လီတာလျှင် (၂၂၄၅)ကျပ်၊ ဒီဇယ်(ပရီမီယမ်)(၁)လီတာလျှင် (၂၃၂၅)ကျပ်၊ ဓာတ်ဆီ(92)(၁)လီတာလျှင် (၂၁၅၅)ကျပ်နှင့် ဓာတ်ဆီ (95)(၁)လီတာလျှင် (၂၂၃၅)ကျပ်တို့ဖြစ်ကြပြီး ၂၀၂၃ခုနှစ်၊ မတ်လ(ပထမအပတ်)တွင် ဒီဇယ်(ရိုးရိုး)(၁)လီတာလျှင် (၂၂၇၀)ကျပ်၊ ဒီဇယ်(ပရီမီယမ်)(၁)လီတာလျှင် (၂၃၅၀)ကျပ်၊ ဓာတ်ဆီ(92)(၁)လီတာလျှင် (၂၁၈၀)ကျပ်နှင့် ဓာတ်ဆီ(95)(၁)လီတာလျှင် (၂၂၆၅)ကျပ်နှုန်းတို့ရှိရာ ဒီဇယ်(ရိုးရိုး)(၁)လီတာလျှင် (၂၅)ကျပ်၊ ဒီဇယ်(ပရီမီယမ်)(၁)လီတာလျှင် (၂၅)ကျပ်၊ ဓာတ်ဆီ(92)(၁)လီတာလျှင် (၂၅)ကျပ်၊ ဓာတ်ဆီ(95)(၁) လီတာလျှင် (၃၀)ကျပ် စသည်ဖြင့် အသီးသီးစျေးနှုန်းများ အနည်းငယ်မြင့်တက်လာကြောင်း လေ့လာသိရှိရပါသည်။

DOCA(မကွေး)