ပြည်တွင်းကုန်သွယ်မှုသတင်း

             ယခုအချိန် ရာသီပေါ်သီးနှံတစ်မျိုးဖြစ်သည့် နာနတ်သီးများလှိုင်လှိုင်ပေါ်ထွက်နေသည့်အတွက် ဗန်းမော်မြို့ရှိ ဈေးကွက်အတွင်းသို့ စတင်ဝင်ရောက်လျက်ရှိနေပြီ ဖြစ်ပါသည်။ ယခင်နှစ်တွင် နာနတ်သီး ဈေးကွက်မှာ ကိုဗစ်-၁၉ရောဂါအခြေအနေကြောင့် အရောင်းအဝယ်များမကောင်းသဖြင့် နာနတ်သီး စိုက်တောင်သူများ အရှုံးပေါ်ခဲ့ရပြီး ယခုနှစ်ရာသီပေါ်စတွင် နာနတ်သီးများဈေးကောင်းရလျက်ရှိနေ ပါသည်။ နာနတ်သီးများကို ဗန်းမော်မြို့နယ်ရှိ ကျေးရွာများတွင်အများဆုံးစိုက်ပျိုးလျက်ရှိပြီး ထွက်ရှိလာသော နာနတ်သီးများကို ဗန်းမော်မြို့၊ စည်ပင်သာယာဈေး၊ ကမ်းနားလမ်းဈေးများ၊ မိုးမလင်း ဈေးများတွင် သုံးဘီးများ၊ ထော်လာဂျီများဖြင့် သယ်ယူကာ စည်ကားစွာရောင်းချလျှက်ရှိပါသည်။ နာနတ်သီးများသည် အလှူမင်္ဂလာပွဲများတွင် အချိုပွဲများ၊ ဒေသတွင်းစားသုံးရန် နာနတ်သီးယိုများ၊ နာနတ်ဝိုင်များအဖြစ် လူကြိုက်များသောသီးနှံဖြစ်သည့်အတွက် တစ်လုံးလျှင်(၅၀၀)ကျပ်မှ (၇၀၀)ကျပ် အထိ အလုံးအရွယ်အစားပေါ်မူတည်၍ ဈေးနှုန်းရရှိသည့်အပြင် မန္တလေးသစ်သီးပွဲရုံသို့လည်း တင်ပို့ရောင်းချရသောကြောင့် နာနတ်သီးစိုက်ပျိုးထုတ်လုပ်သူများ အကျိုးအမြတ်ရရှိလျှက်ရှိကြောင်း တင်ပြလိုက်ရပါသည်။

DOCA(ကချင်)

          ရွှေဘိုခရိုင်အတွင်းရှိ မြို့နယ်များ၌ ဇူလိုင်လ ပထမဆုံးပတ်တွင် စပါး /ဆန်ဈေးနှုန်းမှာ တည်ငြိမ်နေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ဇွန်လ နောက်ဆုံးပတ်တွင် ရန်ကုန်သို့ အိတ်ရေ ၃၇၀၀၀ ၊ မန္တလေးသို့ အိတ်ရေ ၄၉၀၀၀၊ နေပြည်တော်သို့ အိတ်ရေ ၉၀၀၀၊ ရှမ်း(တောင်)သို့ အိတ်ရေ ၆၅၀၀၊ ရှမ်း(မြောက်)သို့ အိတ်ရေ ၆၅၀၀၊ပခုက္ကူသို့ အိတ်ရေ ၁၀၀၀၊ စုစုပေါင်းအိတ်ရေ ၁၀၉၀၀၀၊ တန်အားဖြင့် ၅၄၅၀တန် စီးထွက်ခဲ့ပါသည်။ယခုအပတ်တွင် ရွှေဘိုခရိုင်မှ အခြား တိုင်းဒေသကြီးများသို့ ဆန်စီးထွက် မှုမှာ ရန်ကုန်သို့ အိတ်ရေ ၃၇၀၀၀၊ မန္တလေးသို့ အိတ်ရေ ၄၂၄၀၀၊ နေပြည်တော်သို့ အိတ်ရေ၁၀၀၀၀ ၊ ရှမ်း(တောင်)သို့ အိတ်ရေ၇၅၀၀ ၊ ရှမ်း(မြောက်)သို့ အိတ်ရေ ၇၅၀၀၊ပခုက္ကူသို့ အိတ်ရေ၁၀၀၀ ၊ စုစုပေါင်းအိတ်ရေ ၁၀၅၄၀၀ ၊ တန်အားဖြင့် ၅၂၇၀တန် စီးထွက်ခဲ့သည့် အတွက် ယခင်အပတ်နှင့် နှိုင်းယှဉ်လျင် ယခုအပတ်အတွင်း အိတ်ရေ ၃၆၀၀၊ တန်အားဖြင့် ၁၈၀တန် လျော့၍ စီးထွက်ခဲ့ပါသည်။

          ရွှေဘိုမြို့၏ ဇူလိုင်လ ပထမဆုံးပတ်တွင် ဖြစ်ပေါ်နေသော စပါး/ဆန်  ဈေးနှုန်း များမှာ ရွှေဘိုပေါ်ဆန်းစပါး တင်း၁၀၀လျှင် ကျပ်၁၆၀၀၀၀၀၊ ရွှေဘိုပေါ်ဆန်း ဆန်၂၄ပြည်ပါ တစ်အိတ်လျှင် ကျပ်၅၅၀၀၀၊ ဧရာမင်းစပါး တင်း၁၀၀လျှင် ကျပ်၁၀၅၀၀၀၀၊ ဧရာမင်းဆန် ၂၄ပြည်ပါတစ်အိတ်လျှင် ကျပ် ၄၄၀၀၀၊ ၂၀၂၁-၂၀၂၂ခုနှစ်ထွက် နွေစပါး ရွှေဝါထွန်းစပါး တင်း၁၀၀လျှင် ကျပ် ၆၅၀၀၀၀၊ ‌ရွှေဝါထွန်းဆန် ၂၄ပြည်ပါ တစ်အိတ်လျှင် ကျပ် ၂၉၀၀၀၊ ၇၄၇စပါး တင်း ၁၀၀လျှင် ကျပ် ၆၇၀၀၀၀၊ ၇၄၇ ဆန် ၂၄ပြည်ပါ တစ်အိတ်လျှင် ကျပ် ၂၉၀၀၀ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(စစ်ကိုင်း)

           ပဲခူးတိုင်းဒေသကြီးအစိုးရအဖွဲ့အနေဖြင့် တိုင်းဒေသကြီးအတွင်း စိုက်ပျိုးမွေးမြူရေးနှင့်ကုန်ထုတ် လုပ်ငန်းများ ပိုမိုဖွံ့ဖြိုးတိုးတက်လာစေရေး တွန်းအားပေးဆောင်ရွက်လျက် ရှိပါသည်။ မိမိတို့ဌာနအနေဖြင့်လည်း စားသုံးသူရေးရာလုပ်ငန်းများအပြင် ပြည်တွင်းကုန်သွယ်မှု ဖွံ့ဖြိုးတိုးတက်ရေး လုပ်ငန်းများကိုလည်း ဆောင်ရွက်လျက်ရှိရာ စိုက်ပျိုးမွေးမြူရေးနှင့်ကုန်ထုတ်လုပ်မှုဖွံ့ဖြိုးတိုးတက်ရေး လုပ်ငန်းစဉ်များတွင် ခရိုင်အတွင်း မြို့နယ်အလိုက် သက်ဆိုင်ရာဌာနများနှင့်ပူးပေါင်းပါဝင် ဆောင်ရွက်ပေးလျက် ရှိပါသည်။

          ယခုအခါ ပြည်ခရိုင်၊ ပြည်မြို့၊ ငါးရွာအုပ်စုကျေးရွာရှိ ဦးသိန်းစိုး၏ လယ်ဧက(၄၀)တွင် တစ်ရာသီ (၃)သီးရရှိအောင် စိုက်ပျိုးလျက်ရှိကြောင်း သိရှိရပါသဖြင့် ပြည်ခရိုင်ဦးစီးမှူးနှင့် အဖွဲ့သည် အဆိုပါလယ်သို့(၃၀.၆.၂၀၂၂)ရက်နေ့၌ သွားရောက်လေ့လာ ဆောင်ရွက်ခဲ့ပါသည်။ လေ့လာရရှိမှု အခြေအနေအား အောက်ပါအတိုင်း တင်ပြအပ်ပါသည် -

(က)      တည်နေရာ။          တစ်ရာသီ(၃)သီးစိုက်ပျိုးလျက်ရှိသော လယ်မြေမှာ ပြည်မြို့၊ ငါးရွာကျေးရွာအုပ်စု၌ တည်ရှိပြီး ဦးသိန်းစိုးပိုင်ဆိုင်၍ ဧက(၄၀)ခန့်ရှိပါသည်။

(ခ )       စိုက်ပျိုးသည့်သီးနှံများ။      တစ်ရာသီး(၃)သီးရရှိအောင် စိုက်ပျိုးလျက်ရှိသော သီးနှံများမှာ လတ်တလောအနေဖြင့် စပါး၊မတ်ပဲနှင့် ပဲတီစိမ်းရွှေဝါသီးနှံများကို စမ်းသပ် စိုက်ပျိုးလျက်ရှိကြောင်း သိရှိရပါသည်။

( ဂ)      စိုက်ပျိုးမှုကာလ။       တစ်ရာသီအတွင်း (၃)သီးရရှိနိုင်ရန်အတွက် ပထမသီးနှံအဖြစ် စပါးသီးနှံကို ဇူလိုင်လဆန်းမှ အောက်တိုဘာလကုန်အထိ (၁၂၀)သက်တမ်းရှိ စပါး မျိုးကိုလည်းကောင်း၊ ဒုတိယသီးနှံမတ်ပဲကို နိုဝင်ဘာလဆန်းမှ ဇန်နဝါရီလကုန် အထိ လည်းကောင်း၊ တတိယသီးနှံအဖြစ် မိုးကြိုပဲတီစိမ်းကို မတ်လလယ်မှ ဇွန်လလယ်ထိ လည်းကောင်း စမ်းသပ်စိုက်ပိုးလျက်ရှိရာ အောင်မြင်မှုရရှိပါကြောင်း သိရှိရပါသည်။

(ဃ)        စပါးစိုက်ပျိုးခြင်း။      ပထမသီးနှံစပါးကို ဇွန်လအတွင်း ပျိုးဗမ်းဖြင့် ပျိုးထောင်၍ ဇူလိုင် လဆန်းတွင် စိုက်ပျိုးပါသည်။ လယ်တစ်ဧက စိုက်ပျိုးသည့်မျိုးမှာ ချမ်းမြေ့မေ စပါး မျိုးဖြစ်ပြီး မျိုး(CS)အဖြစ် စိုက်ပျိုးထုတ်လုပ်ကြောင်းသိရှိရပါသည်။ တစ်ဧကတွင် တင်း(၁၀၀)နီးပါးထွက်ရှိ၍ သက်ဆိုင်ရာ မျိုးပေးထားသည့် ကုမွဏီမှလည်း ပြန်လည် ဝယ်ယူပါသည်။ တစ်တင်းလျှင် (၁၈၀၀၀)ကျပ်နှန်းဖြင့် ပြန်လည်ရောင်းချ၍ ဝင်ငွေအနေဖြင့်( ၁၈)သိန်း ကျပ်ခန့်ရရှိပြီး တစ်ဧကစိုက်ပျိုးထုတ်လုပ်မှု ကုန်ကျစရိတ် (၇)သိန်းခန့် ကုန်ကျပြီး (၁၁)သိန်းကျပ်ခန့် အကျိုးအမြတ် ရရှိကြောင်း သိရှိရပါသည်။

( င)       မတ်ပဲစိုက်ပျိုးခြင်း။            မတ်ပဲကို ရေဆင်းမျိုးများကိုသာ စိုက်ပျိုးပြီး တစ်ဧက ပျှမ်းမျှ အထွက်(၁၆)တင်းခန့်ထွက်ရှိ၍ ယခုနှစ်အနေဖြင့် မတ်ပဲဈေးကောင်းမွန်ခဲ့ပြီး တစ်တင်းလျှင် (၄၇၀၀၀)ခန့် ရောင်းချရ၍ (၇)သိန်းခွဲခန့် ဝင်ငွေရရှိပါသည်။ တစ်ဧက ကုန်ကျစရိတ်အနေဖြင့် ပျှမ်းမျှ (၂)သိန်းခန့်ကုန်ကျသည့်အတွက် အကျိုးအမြတ်အနေဖြင့် တစ်ဧကလျှင် (၅)သိန်းခွဲခန့် ရရှိကြောင်း လေ့လာသိရှိရပါသည်။

( စ)       ပဲတီစိမ်းစိုက်ပျိုးခြင်း။         ပဲတီစိမ်းကို ဒေသမျိုးများကိုသာ စိုက်ပျိုးပြီး တစ်ဧက လျှင်(၁၂)တင်းခန့် ထွက်ရှိပါသည်။ တစ်တင်းလျှင် (၄၀၀၀၀)ကျပ်နှုန်း ရောင်းချရ၍ တစ်ဧကလျှင် ဝင်ငွေ(၄)သိန်း(၈)သောင်းခန့်ရရှိပါသည်။ တစ်ဧကကုန်ကျစရိတ် အနေဖြင့် (၂)သိန်းကျော် ကုန်ကျ၍ အကျိုးအမြတ်အနေဖြင့် (၂)သိန်းကျော်ခန့် ရရှိကြောင်းသိရှိရပါသည်။

(ဆ)      သွင်းအားစုလိုအပ်ချက်။      စိုက်ပျိုးသီးနှံများ၏ လိုအပ်သော သွင်းအားစုများဖြစ် သည့် ဓါတ်မြေဩဇာ၊ ပိုးသတ်ဆေးတို့ကို အပြည့်အဝသုံးစွဲပြီး အဓိက လိုအပ်ချက် ဖြစ်သည့် စိုက်ပျိုးရေကို ဒေသသဘာဝအရ ရေလျှံတွင်းများမှ ရရှိပြီး ရေသွင်း ရေထုတ် လိုအပ်သလို စီမံဆောင်ရွက်လျက်ရှိကြောင်း လေ့လာသိရှိရပါသည်။

၃။      ပြည်မြို့ရှိ ဦးသိန်းစိုး၏ လယ်ဧက(၄၀)၌ ဆောင်ရွက်နေသည့် တစ်ရာသီ (၃)သီးစိုက်ပျိုးခြင်း လုပ်ငန်းစဉ်အား လေ့လာရာတွင် ပုံမှန် စပါး၊မတ်ပဲ (၂)သီးစိုက်ပျိုးခြင်းထက် (၃)သီးစိုက်ပျိုးပါက တစ်ဧက အကျိုးအမြတ်များစွာ ရရှိကြောင်း၊ မျိုးကောင်းမျိုးသန့်များ အသုံးပြုလျက်ရှိပြီး သွင်းအားစု များ စနစ်တကျ ထည့်သွင်း အသုံးပြုကြောင်း၊ သွင်းအားစု ထည့်သွင်းအသုံးပြုရာတွင် ပထမသီးနှံဖြစ်သည့် စပါးတွင် အသုံးပြုထားသော သွင်းအားစုများသည် လယ်မြေအတွင်း အာဟာရဓါတ် ကျန်ရှိနေမှုကြောင့် နောက်သီးနှံများအတွက် အကျိုးရရှိပြီး နောက်သီးနှံများတွင် အနည်းငယ်သာ အသုံးပြုရသည့်အတွက် သီးနှံတစ်ခုချင်းအလိုက် သွင်းအားစုသုံးစွဲရမှုထက် ပိုမိုသက်သာမှုရှိကြောင်း၊ ရေလိုအပ်ချက်အတွက် ယခုလယ်မြေတွင် သဘာဝရေလျှံတွင်းရှိ၍ အဆင်ပြေသော်လည်း သုံးသီးစိုက်ပျိုးနိုင်ရန်အတွက် စိုက်ပျိုးမြေ လယ်အနီးသဘာဝ မြစ်ချောင်း ဆည်မြောင်းလက်တံနှင့် ကိုယ်ပိုင် အဝီစိတွင်းများရှိရန် လိုအပ်ကြောင်း၊ သီးနှံအားလုံးသည် သဘာဝရာသီဥတုကို မှီခိုစိုက်ပျိုးခြင်းဖြစ်၍ မိုးခေါင်ခြင်း၊ မိုးများ၍ ရေကြီး၊ ရေလျှံခြင်းများနှင့် အခြားသဘာဝဘေးအန္တရာယ်များ ကျရောက်ပါက ဆုံးရှုံးမှုရှိနိုင်ကြောင်း၊ သုံးသီးစိုက်ပျိုးရန်အတွက် စိုက်ပျိုးမြေနေရာသည် ရေတော် မိုးတော်ဖြစ်၍ ရေလိုအပ်ခြင်း၊ သဘာဝရေ အရင်းအမြစ် သို့မဟုတ် ဆည်မြောင်းလက်တံရှိသည့် နေရာဖြစ်ရန် လိုအပ်ပါကြောင်း သုံးသပ်ရရှိပါသည်။

၄။      တစ်ရာသီ (၃)သီးစိုက်ပျိုးနိုင်ရန်အတွက် လေ့လာရရှိမှုအရ အထက်ပါ သုံးသပ်ရရှိမှုအပေါ် အခြေခံ၍ သုံးသီးစိုက်ပျိုးခြင်းနှင့်ပတ်သက်၍ သက်ဆိုင်ရာ စိုက်ပျိုးရေးဌာနမှ နည်းပညာနှင့် စိုက်နည်းစနစ်များ ပညာပေးခြင်းနှင့် သရုပ်ပြလယ်ကွက်များဖြင့် တောင်သူများသို့ လက်တွေ့ပြသ၍ စိုက်ပျိုးလာစေရန် စည်းရုံးဆောင်ရွက်ခြင်း၊ ဆည်မြောင်းလက်တံဘေးရှိ လယ်ယာများနှင့် သဘာဝရေ အရင်းအမြစ်ရှိသည့် လယ် ယာများတွင် (၃)သီးစိုက်သည့် အလေ့အထကို ဆောင်ရွက်စေခြင်း၊ လိုအပ် သည့် သက်လတ်၊ သက်ငယ် အထွက်နှုန်းကောင်း ဈေးကွက်ဝင်မျိုးများ လိုအပ်ခြင်း၊ သုံးသီးစိုက်ပျိုးသည့် တောင်သူများသို့ နိုင်ငံတော်မှလည်း လိုအပ်သည်များ ပံ့ပိုးဆောင်ရွက်ပေးခြင်း၊ ထွက်ရှိလာမည့် သီးနှံများအတွက် ဈေးကွက်ရရှိရေး ဖော်ဆောင်ပေးခြင်းတို့ လိုအပ်လျက်ရှိပါကြောင်း တွေ့ရှိရပါသည်။

          တစ်ရာသီ ပုံမှန်နှစ်သီးစိုက်ပျိုးခြင်းထက် သုံးသီးစိုက်ပျိုးခြင်း၏ တစ်ဧက အကျိုးအမြတ်များစွာ ရရှိသည့်အတွက် စိုက်ပျိုးသူတောင်သူများအနေဖြင့် တွက်ခြေလည်းကိုက်၍ ပြည်တွင်းကုန်သွယ်မှု လုပ်ငန်းများလည်း ပိုမိုဖွံ့ဖြိုးတိုးတက်လာမည်ဖြစ်ပါသောကြောင့် တောင်သူများ နှစ်သီးမှသည် သုံးသီးဆီသည့် ပြောင်းလဲစိုက်ပျိုးသင့်ပါကြောင်း လေ့လာသိရှိရပါသည်။

DOCA(ပဲခူး)

            ပြည်မြို့ဓါတ်မြေဩဇာဈေးကွက်၌ ပုံမှန်အရောင်းအဝယ်ဖြစ်လျှက်ရှိသော ဓါတ်မြေဩဇာနှင့် ပိုးသတ်ဆေးများ၏ ယခုတစ်ပတ် ဈေးနှုန်းများမှာ အာမို(ပုလဲ)တံဆိပ်မြင်းပျံလုံးကြီးမှာ ၈၈၀၀၀ ကျပ်၊ အာမို ၁၅ပတ်လည် ၉၇၀၀၀ကျပ်၊ ရွှေနင်္ဂါး Top(1) မှာ ၉၆၀၀၀ကျပ်၊ (TTT) တံဆိပ် MC ၁၅ပတ်လည်မှာ ၉၁၀၀၀ကျပ် ၊ အာမိုဓါတ်ဆားမှာ ၆၅၀၀၀ကျပ်၊ ပိုးသတ်ဆေးဈေးနှုန်းများမှာ ဂလိုင်ဖောက် (ဝိစာရ) ၄၇၅၀၀ကျပ်၊ အာမိုဂလိုက်တာ ၄၈၅၀၀ကျပ်၊ မင်းမဟော်တံဆိပ် သိုင်းရှင်း ပိုးသတ်ဆေးမှာ ၄၇၅၀၀ကျပ်တို့ဖြင့်သည်။ ဘိလပ်မြေဈေးမှာ ပုံမှန်ဖြစ်ပြီး ကြံနှစ်ကောင်(အနီ) တံဆိပ် ၇၈၀၀ကျပ်၊ အပါချီတံဆိပ် ၇၆၅၀ကျပ်၊ အယ်ဖာတံဆိပ် ၇၆၅၀ကျပ်ဖြစ်၍ ပုံမှန် အရောင်းအဝယ်ဖြစ်ကြောင်း သိရပါသည်။

DOCA(ပဲခူး)

              ပြည်မြို့တွင်ရောင်းချနေသော ပုဇွန်ခြောက်များမှာ ရခိုင်ဘက်မှလာသော ပုဇွန်ခြောက်များ ရှိသလို ပုသိမ်ဘက်မှလာသော ပုဇွန်ခြောက်များလည်းရှိကြောင်းတွေ့ရှိရပါသည်။ ယခုလို မိုးရာသီ အချိန်တွင် အသား၊ ငါးများပေါများသော်လည်း ပုဇွန်ခြောက်ကတော့ ပုံမှန် အရောင်းအဝယ် ဖြစ်နေပါသည်။ ပုဇွန်ခြောက်ဈေးနှုန်းများမှာ ဝင်သည့်ဒေသပေါ်မူတည်၍ ဈေးနှုန်းများ ကွာခြား ပါသည်။ ဈေးနှုန်းအနေဖြင့် အရည်အသွေးကိုလိုက်၍ ကွာခြားလျှက်ရှိပြီး ယခုတစ်ပတ်တွင် ပုဇွန်ခြောက် အကောင် ကြီးရှယ် တစ်ပိဿာလျှင် ၇၅၀၀၀ကျပ်၊ အလတ်တစ်ပိဿာလျှင် ၆၅၀၀၀ကျပ်နှင့် အသေး တစ်ပိဿာလျှင် ၅၅၀၀၀ကျပ်ဈေးဖြင့် အရောင်းအဝယ်ဖြစ်ကြောင်း သိရှိရပါသည်။ ပုဇွန်ခြောက် အသေး (ကြပ်တင်ခြောက်)များအနေဖြင့်  တစ်ပိဿာလျှင် ၃၀၀၀၀ ကျပ်ရှိကြောင်း သိရှိရပါသည်။

DOCA(ပဲခူး)