ပြည်ပကုန်သွယ်မှုသတင်းများ

        မလေးရှားနိုင်ငံ ရင်းနှီးမြှုပ်နှံမှု၊ ကုန်သွယ်ရေးနှင့်စက်မှုဝန်ကြီးဌာန (MITI) က မလေးရှားနိုင်ငံသည် အမေရိကန်ဒေါ်လာ ၇၁၇သန်းတန်ဖိုးရှိသည့်ပို့ကုန်များကို ဗီယက်နမ်နိုင်ငံသို့တင်ပို့ရန် အလားအလာရှိနေကြောင်း ဇူလိုင်လ ၁၁ရက်နေ့က ကြေညာခဲ့ပါသည်။ ကြေညာချက်သည် MITI ဝန်ကြီး Utama Zafrul Tengku Abdul ၏ ဗီယက်နမ်နိုင်ငံသို့ ဇူလိုင်လ ၈ရက်နေ့မှ ၁၀ရက်နေ့အထိ သွားရောက်ခဲ့သည့်ခရီးစဉ်နောက်တွင် ထွက်ပေါ်လာခြင်းဖြစ်ကြောင်းသိရပါသည်။ MITI က ဗီယက်နမ်ကုမ္ပဏီ ၁၄ခုမှာ လျှပ်စစ်နှင့်အီလက်ထရောနစ်ပစ္စည်းများ၊ စားအုန်းဆီ၊ ဓာတုပစ္စည်းများ၊ ရေနံဓာတုပစ္စည်းများ၊ သံနှင့်စတီးလ်၊ အစားအသောက်၊ အဖျော်ယမကာနှင့် စားသုံးကုန်ပစ္စည်းများပါဝင်သည့် မလေးရှားထုတ်ကုန်များးကိုတင်သွင်းရန် အခိုင်အမာကတိပြုခဲ့သည်ဟု ပြောကြားခဲ့ကြောင်းသိရပါသည်။ အဆိုပါကတိပြုမှုသည် ဗီယက်နမ်လုပ်ငန်းများနှင့် မလေးရှားဝန်ကြီးတို့၏ ဆွေးနွေးပွဲများအပြီးတွင် ထွက်ပေါ်ခဲ့ခြင်းဖြစ်ကြောင်းသိရပါသည်။

         ဝန်ကြီး Zafrul က မလေးရှားနိုင်ငံသည် အမေရိကန်ဒေါ်လာ ၇၁၇သန်းတန်ဖိုးရှိပမာဏကို ဗီယက်နမ်နိုင်ငံသို့တင်ပို့ရန် အလားအလာရှိကြောင်းနှင့် MITI သည် ပြည်တွင်းအသားတင်ထုတ်လုပ်မှုတန်ဖိုး (GDP) ကိုပံ့ပိုးရန်နှင့် ပြည်သူများအတွက် အလုပ်အကိုင်အခွင့်အလမ်းများဖန်တီးပေးရန် ကတိပြုမှုကိုအာမခံကြောင်းပြောကြားခဲ့ပါသည်။ ထို့ပြင် ဝန်ကြီးက ခရီးစဉ်၏ရလဒ်များသည် နှစ်နိုင်ငံအကြား စီးပွားရေးချည်နှောင်မှုအရှိန်အဟုန်ကြီးထွားမှုနှင့် ၎င်းတို့၏ စီးပွားရေးအသိုင်းအဝန်းအတွက် နှစ်ဦးနှစ်ဖက်အကျိုးရှိသော အခွင့်အလမ်းများရရှိမည်ဟု ပြောကြားခဲ့ကြောင်းသိရပါသည်။ MITI ၏ ဇူလိုင်လ(၁)ရက်နေ့ထုတ်ပြန်ချက်အရ ဝန်ကြီး၏ဗီယက်နမ်ခရီးစဉ်အတွင်း Zafrul သည် ဗီယက်နမ်နိုင်ငံ၏ ဝန်ကြီးချုပ်၊ စီမံကိန်းနှင့်ရင်းနှီးမြှုပ်နှံမှုဝန်ကြီး၊ စက်မှုနှင့်ကုန်သွယ်‌ရေးဝန်ကြီးတို့နှင့် အစည်းအဝေးများပြုလုပ်ခဲ့ကြောင်းသိရပါသည်။ ထို့ပြင် Zafrul နှင့် ဗီယက်နမ်စက်မှုနှင့် ကုန်သွယ်ရေးဝန်ကြီးသည် ဇူလိုင်လ(၉) ရက်နေ့က ဟနွိုင်းမြို့တွင် စတုတ္ထအကြိမ်မြောက် မလေးရှား-ဗီယက်နမ် ပူးတွဲကုန်သွယ်ရေး ကော်မတီအစည်းအဝေးကို ပူးတွဲသဘာပတိအဖြစ် ကျင်းပပြုလုပ်ခဲ့ကြောင်းသိရပါသည်။ လွန်ခဲ့သည့်နှစ်တွင် ဗီယက်နမ်သည် မလေးရှား၏ (၁၁)နိုင်ငံမြောက် အကြီးဆုံးကုန်သွယ်ဖက်နိုင်ငံဖြစ်ပြီး မလေးရှားသည် ဗီယက်နမ်၏ (၁၀)နိုင်ငံမြောက် အကြီးဆုံးကုန်သွယ်ဖက်နိုင်ငံဖြစ်ခဲ့ ကာ နှစ်နိုင်ငံအကြား အပြန်အလှန်ကုန်သွယ်မှုတန်ဖိုးမှာ စုစုပေါင်းအမေရိကန်ဒေါ်လာ ၁၇.၃၈ဘီလီယံရှိကြောင်း သိရပါသည်။ ဗီယက်နမ်သည် မလေးရှားနိုင်ငံအတွက် အထူးသဖြင့် အိမ်၊ ခြံ၊ မြေ၊ ငွေကြေးဝန်ဆောင်မှုနှင့် ကုန်ထုတ်လုပ်မှုတို့တွင် အရေးပါသည့် ရင်းနှီးမြှုပ်နှံမှုနေရာဖြစ်ကြောင်းသိရပါသည်။ ၂၀၂၃ခုနှစ်တွင် မလေးရှားနိုင်ငံသည် စုစုပေါင်းရင်းနှီးမြှုပ်နှံမှုတန်ဖိုး အမေရိကန်ဒေါ်လာ ၁၃.၁ဘီလီယံတန်ဖိုးရှိသည့် စီမံကိန်း ၇၁၇ခုကို မှတ်ပုံတင်နိုင်ခဲ့ကြောင်းသိရပါသည်။

Source: Vietnam Plus

DOCA(ရန်ကုန်)

       ဗီယက်နမ်သည် ၂၀၂၄ခုနှစ်၏ ပထမနှစ်ဝက်တွင် ကန်ဒေါ်လာ ၆၃၄.၂သန်းတန်ဖိုးရှိသော ငရုတ်ကောင်း ၁၄၂၅၈၆တန်တင်ပို့ခဲ့ပြီး တစ်နှစ်ထက်တစ်နှစ် တန်ဖိုး ၃၀.၅%မြင့်တက်လာခဲ့သည်။ ထိုသို့ တန်ဖိုးမြင့်တက်လာသော်လည်း တင်ပို့မှုပမာဏသည် တစ်နှစ်ထက်တစ်နှစ် ၆.၈%ကျဆင်းခဲ့ကြောင်း ဗီယက်နမ်ငရုတ်ကောင်းနှင့် ဟင်းခတ်လုပ်ငန်းရှင်များအသင်း၏ထုတ်ပြန်ချက်မှသိရသည်။

       အမေရိကန်သည် ဗီယက်နမ်ဟင်းခတ်အမွှေးအကြိုင် ၃၇၄၃၅တန်ဖြင့် တင်သွင်းမှုအများဆုံးနိုင်ငံဖြစ်ပြီး ဈေးကွက်ဝေစု၏ ၂၆.၃%သည် တစ်နှစ်ထက်တစ်နှစ် ၄၄.၆%သို့မြင့်တက်လာခဲ့သည်။ ပို့ကုန်တန်ဖိုးများသည် ဂျာမနီနိုင်ငံဈေးကွက်သို့ ၁၀၆.၇%၊ နယ်သာလန်ဈေးကွက်သို့ ၅၂.၁%၊ အိန္ဒိယဈေးကွက်သို့ ၄၅.၇%နှင့် ယူအေအီးဈေးကွက်သို့ ၁၅.၂% စသည်ဖြင့် အသီးသီးအရှိန်အဟုန်ဖြင့် မြင့်တက်လာခဲ့သည်။ ပြီးခဲ့သည့်ခြောက်လအတွင်း ငရုတ်ကောင်းဈေးနှုန်းများ ဆက်တိုက်မြင့်တက်မှုအခြေအနေများကြောင့် ပျမ်းမျှပို့ကုန်ဈေးနှုန်းများသည် ယခင်နှစ်၏ အလားတူကာလထက် တစ်တန်လျှင် အမေရိကန်ဒေါ်လာ၁၀၀၀မြင့်တက်ခဲ့ကြောင်း စီးပွားရေးလုပ်ငန်းရှင်များက သုံးသပ်ခဲ့ကြသည်။ ငရုတ်ကောင်းအဖြူအနက် ပျမ်းမျှတင်ပို့မှုဈေးနှုန်းမှာ တစ်တန်လျှင် ကန်ဒေါ်လာ၄၃၀၀နှင့် ကန်ဒေါ်လာ၆၀၀၀ကျော်ရှိသည်။ ဘရာဇီး၊ ကမ္ဘောဒီးယားနှင့် အင်ဒိုနီးရှားနိုင်ငံတို့သည် ဗီယက်နမ်နိုင်ငံမှ ငရုတ်ကောင်းအများဆုံးတင်သွင်းနေသော နိုင်ငံများဖြစ်သည်။

Source : Vnexpress

DOCA(ရန်ကုန်)

      ၂၀၂၄ခုနှစ်အတွက် ထိုင်းနိုင်ငံအမျိုးသားဟာလာလုပ်ငန်းကော်မတီ(NHIC) ပထမဆုံးအစည်းအဝေးကို ထိုင်းနိုင်ငံစီးပွားရေးအရှိန်မြှင့်တင်ရန်နှင့် ဟာလာအစားအစာထုတ်ကုန်များအတွက် ဈေးကွက်အသစ်များဖွင့်လှစ်ရန် ကျင်းပပြုလုပ်ခဲ့ပါသည်။ အဆိုပါ ကနဦးဆွေးနွေးပွဲသည် နယ်စပ်ဒေသတောင်ဘက်ခြမ်းမှ စီရင်စုများပါဝင်သော နိုင်ငံတကာဈေးကွက်များတွင် ဟာလာအစားအစာထုတ်ကုန်များအတွက် ဈေးကွက်တိုးချဲ့ရန် ရည်ရွယ်ခဲ့ခြင်းဖြစ်ကြောင်းသိရပါသည်။ အစည်းအဝေးကို ဦးဆောင်ကျင်းပခဲ့သည့် ဝန်ကြီးချုပ် Sretha Thavisin က ထိုင်းနိုင်ငံ၏ အားကောင်းပြီး တည်ငြိမ်သောအစားအစာကဏ္ဍကို အသားပေးပြောကြားခဲ့ပြီး အစည်းအဝေး၏အရေးပါမှုကို ပြောကြားခဲ့ပါသည်။ Serttha က နိုင်ငံတော်၏ တောင့်တင်းသော ထောက်ပံ့မှုကွင်းဆက်၊ သင့်လျော်သောရာသီဥတု၊ အားထားရသောလုပ်သားထုနှင့် သယ်ယူပို့ဆောင်ရေးကဏ္ဍတို့ကို ရှင်းလင်းပြောကြားခဲ့ပါသည်။

       NHIC ဖွဲ့စည်းမှုသည် ဈေးကွက်အသစ်များတွင် ထိုင်းနိုင်ငံထုတ်ကုန်များတိုးချဲ့ရန် အရေးပါသောခြေလှမ်းတစ်ရပ်အဖြစ် ရှုမြင်ရကြောင်းသိရပါသည်။ အဆိုပါ အစည်းအဝေးသည် ထိုင်းနိုင်ငံစက်မှုဝန်ကြီး Pimpatra Utichaikul က မလေးရှားဝန်ကြီးချုပ် Anwar Ibrahim နှင့် ဘရူနိုင်းနိုင်ငံ၏ ဘုရင်ကဲ့သို့သော အစ္စလာမ်ဘာသာကိုးကွယ်မှုများပြားသည့် နိုင်ငံ့ခေါင်းဆောင်များနှင့်ဆွေးနွေးမှုအပြီးတွင် ပြုလုပ်ခဲ့ခြင်းဖြစ်ကြောင်းသိရပါသည်။

          ဝန်ကြီးချုပ် Srettha သည် သက်ဆိုင်ရာအေဂျင်စီများအား နိုင်ငံတကာတွင် ထိုင်းဟာလာအစားအစာထုတ်ကုန်များကို ဈေးကွက်မြှင့်တင်ရန်နှင့် ထုတ်လုပ်သူများအတွက် ဆန်းသစ်တီထွင်ခြင်းနှင့် နည်းပညာများထောက်ပံ့ရန် တိုက်တွန်းခဲ့သည်။ အဆိုပါဆောင်ရွက်မှုသည် နယ်စပ်ဒေသတောင်ပိုင်းစီရင်စုများကို အလုပ်အကိုင်များဖန်တီးပေးပြီး ဝင်ငွေများမြင့်တက်ကာ လူနေမှုအဆင့်အတန်းတိုးတက်လာစေရန် ရည်ရွယ်ကြောင်းသိရပါသည်။

Source : Vietnam Plus

DOCA(ရန်ကုန်)

     ရုရှားနိုင်ငံသည် တရုတ်နိုင်ငံသို့ ပဲစေ့အများဆုံးတင်ပို့သော ထိပ်တန်းနိုင်ငံဖြစ်လာခဲ့ပြီး ရုရှားနိုင်ငံ၏ သါင်းကုန်စုစုပေါင်း၏ ထက်ဝက်နီးပါးသည် ကန်ဒေါ်လာ ၁ ဘီလီယံဈေးကွက်သို့ ဝင်ရောက်ပြီးနောက် နှစ်နှစ်အတွင်း ကနေဒါနိုင်ငံအား ကျော်တက်သွားခဲ့ကြောင်း ရုရှားဆန် တင်ပို့သူများသမ္မဂ္ဂ က အင်္ဂါနေ့တွင်ပြောကြားခဲ့သည်။ သမ္မဂ္ဂ၏ အချက်အလက်များအရ ရုရှားသည် ၂၀၂၃-၂၀၂၄ စိုက်ပျိုးရာသီတွင် ပဲတန်ချိန် ၁.၁၃ သန်း တရုတ်နိုင်ငံသို့ တင်ပို့နိုင်ခဲ့ပြီး ဈေးကွက်ဝေစု ၁၉.၁% ရရှိခဲ့သည်။ ကနေဒါနိုင်ငံ၏ ရှယ်ယာများသည် ယခင်နှစ်များက တရုတ် နိုင်ငံသို့ ပဲတင်သွင်းမှု၏ ၉၅%ခန့်ရှိပြီး အသာစီအနေအထားမှ ၄၄.၆%သို့ ကျဆင်းသွားခဲ့သည်။ အထူးသဖြင့် တရုတ်နှင့် အနောက်နိုင်ငံများကြားကုန်သွယ်ရေးတင်းမာမှုများ အရှိန်အဟုန် မြင့်တက်နေသည့်အချိန်တွင် ရုရှားနိုင်ငံသည် လယ်ယာထွက်ကုန်တင်သွင်းမှု ဈေးကွက်ဝေစု မည်မျှလျှင်မြန်စွာ ရရှိနေသည်ကို နောက်ဆုံးပဲတင်သွင်းမှု အချက်အလက်များက ပြသနေ သည်။

     တရုတ်နိုင်ငံသည် အခြားအသီးအနှံပရိုတင်းများကဲ့သို့ အာနိသင်ရှိပြီး လူကြိုက်များလျက် ရှိသော အစားအသောက်ထုတ်ကုန်များတွင် ပါဝင်ပစ္စည်းအဖြစ် အသုံးပြုနေသည့် ပဲပရိုတင်းကို ထုတ်လုပ်ရန် ပဲစေ့များအား ယခုကဲ့သို့ တင်သွင်းအသုံးပြုနေခြင်းဖြစ်သည်။ တရုတ်နိုင်ငံသည် ၎င်း၏ ပဲပရိုတင်းအများစုအား ကမ္ဘာတစ်ဝှမ်းရှိ ဈေးကွက်များသို့ တင်ပို့ရောင်းချလျက်ရှိသည်။ အမေရိကန်ပြည်ထောင်စုကုန်သွယ်ရေးဌာနမှ တရုတ်နိုင်ငံသည် အမေရိကန်ဈေးကွက်တွင် ပဲပရိုတင်းများအား ဈေးလျှော့ရောင်းချမှုအတွက် အပြစ်ရှိကြောင်းတွေ့ရှိခဲ့ပြီး ဇွန်လ ၂၇ ရက်နေ့တွင် တရုတ်နိုင်ငံမှ တင်သွင်းသော ပဲပရိုတင်းများအား ၁၂၇% မှ ၆၂၆% အထိ အခွန်ကောက်ခံ မည်ဖြစ်ကြောင်း ကြေညာခဲ့သည်။ ရုရှားနိုင်ငံ၏ ပဲပရိုတင်းထုတ်လုပ်မှုသည် ၂၀၂၁ ခုနှစ်မှ စတင်၍ တစ်နှစ်ထက်တစ်နှစ်မြင့်တက်လာခဲ့ပြီး စံချိန်တင်ထားသော်လည်း ပဲပရိုတင်းထုတ်လုပ်ရန်အတွက် ကိုယ်ပိုင်စက်ရုံများနည်းပါးလျက်ရှိသည်။ ပဲပရိုတင်းကို အဓိက ထုတ်လုပ်သည့် တရုတ်နိုင်ငံသည် ရုရှားနိုင်ငံအား ၂၀၂၂ ခုနှစ်၊ အောက်တိုဘာလမှစ၍ ၎င်းတို့၏ ဈေးကွက်အတွင်းသို့ ဝင်ရောက်ခွင့်ပေးခဲ့သည်။

     ယူကရိန်းနှင့် ဖြစ်ပွားနေသော ပဋိပက္ခအပေါ် အနောက်နိုင်ငံများ၏ ပိတ်ဆို့အရေးယူမှုများနှင့် ရင်ဆိုင်နေရသော ရုရှားနိုင်ငံသည် အာရှ၊ အရှေ့အလယ်ပိုင်း၊ အာဖရိကနှင့် လက်တင် အမေရိကန်နိုင်ငံများဆီသို့ ၎င်း၏ ကုန်သွယ်မှုကို ကွဲပြားစေရန်နှင့် ကုန်သွယ် စီးဆင်းမှုများ ပြန်လည်ဦးမော့လာစေရန် ကြိုးပမ်းလျက်ရှိသည်။ ရုရှားနိုင်ငံသည် တရုတ်နိုင်ငံသို့ စပါးတန်ချိန်၂ သန်းကျော်တင်ပို့ခဲ့ပြီး မုယောစပါးတင်ပို့မှုမှာ ၃၇၁၅၀၀ တန်အထိ တိုးတက်လာကြောင်း ရုရှား စိုက်ပျိုးရေးစောင့်ကြည့်ရေးအဖွဲ့၏ အချက်အလက်များအရ သိရသည်။ ထို့အပြင် ရုရှားသည် တရုတ်နိုင်ငံ ဝက်သားတင်သွင်းမှု၏ ၁၀% ဝေစုကိုလည်း အာရုံကျလျက်ရှိကြောင်း ရုရှားနိုင်ငံ၏ ဝက်သားထုတ်လုပ်သူများအမျိုးသားသမ္မဂ္ဂ၏ အဆိုအရ သိရသည်။

DOCA(ရန်ကုန်)

     ကမ္ဘောဒီးယားအစိုးရသည် မကြာသေးမီက ကြေညာထားသည့် EV ဖွံ့ဖြိုးတိုးတက်ရေး မူဝါဒအရ ၂၀၃၀ ခုနှစ်တွင် လမ်းများပေါ်၌ လျှပ်စစ်ကားအစီးရေ ၈၀၀၀၀ ရှိလာရန် ရည်မှန်း ချက်ကို ထုတ်ဖော်ပြသခဲ့သည်။

   ၂၀၂၄-၂၀၃၀ လျှပ်စစ်ယာဉ်များဖွံ့ဖြိုးတိုးတက်ရေးဆိုင်ရာ အမျိုးသားမူဝါဒအရ ဖွံ့ဖြိုးတိုးတက်သော စက်မှုလုပ်ငန်းများဆီသို့ ဒေသတွင်းနှင့် ကမ္ဘာလုံးဆိုင်ရာ ခေတ်ရေစီးကြောင်း နှင့်အညီ ပတ်ဝန်းကျင် စီးပွားရေး၊ စွမ်းအင်လုံခြုံရေးနှင့် နည်းပညာသစ်များလက်လှမ်းမီမှုကို တိုးတက်စေရန် ကူညီပေးမည်ဖြစ်သည်။

   အဆိုပါမူဝါဒသည် ကမ္ဘောဒီးယားနိုင်ငံ၏ EV ကဏ္ဍဖွံ့ဖြိုးတိုးတက်ရေးနှင့် လျှပ်စစ်ကားများ အသုံးပြုမှုတွင် ကဏ္ဍအလိုက် ရင်းနှီးမြှုပ်နှံသူများအား ဆွဲဆောင်နိုင်စေရန် အထောက် အကူဖြစ်စေမည်ဖြစ်သည်။

     လျှပ်စစ်ကားများအသုံးပြုခြင်းသည် ဆီစားသက်သာသော ကားများအသုံးပြုခြင်းထက် ပိုမိုသက်သာပြီး ဓါတ်ဆီအင်ဂျင်များထက် များစွာထိရောက်မှုရှိပြီး စွမ်းအင်ကို ရွေ့လျားမှုအဖြစ်သို့ ပြောင်းလဲပေးသည့်အတွက် စရိတ်စကလည်း များစွာသက်သာမှုရှိကြောင်း သိရသည်။

      စီးပွားရေးအရ ထိုမူဝါဒသည် ကမ္ဘောဒီးယားနိုင်ငံ၏ ဖွံ့ဖြိုးတိုးတက်ရေးအတွက် အခွင့်အလမ်းသစ်များကို ဖွင့်လှစ်ပေးရန် ကြိုးပမ်းပေးသည်။ EV စက်မှုလုပ်ငန်းသည် လျှင်မြန်စွာ ကြီးထွားလာနေသော ကဏ္ဍတစ်ခုဖြစ်ပြီး ကမ္ဘောဒီးယားနိုင်ငံသည် ထိုကဏ္ဍတွင် ရင်းနှီးမြှုပ်နှံမှုများ ပြုလုပ်ရန်အတွက် အသင့်ရှိကြောင်းသိရသည်။

      ကမ္ဘာဒီးယားတွင် ၂၀၂၄ ဇွန်လအထိ လျှပ်စစ်ကား ၁၆၁၄ မှတ်ပုံတင်ထားကြောင်း ပို့ဆောင်ရေးဝန်ကြီးဌာန၏ အစီရင်ခံစာအရ သိရသည်။ ၎င်းတို့တွင် ကမ္ဘောဒီးယားတွင် လူကြိုက်အများဆုံး EV ကားအမှတ်တံဆိပ်မျာဖြစ်သော BYD ၆၅၈ စီး၊ Toyota ၂၆၁ စီးနှင့် Telsa EV ၁၈၆ စီးပါဝင်သည်။

    ဝန်ကြီးဌာန၏အဆိုအရ စကူတာ ၉၁၄ စီးနှင့် သုံးဘီးလျှပ်စစ်ယာဉ် ၄၄၀ စီးကိုလည်း မှတ်ပုံတင်ထားကြောင်း သိရသည်။ လက်ရှိတွင် EV အားသွင်းစခန်းများကို နိုင်ငံအတွင်းရှိ နေရာ ၁၈ ခုတွင် ထားရှိထားသည်။

Source : Khmertimeskh

DOCA(ရန်ကုန်)