ပြည်ပကုန်သွယ်မှုသတင်းများ

     ကမ္ဘာ့ကော်ဖီစေ့ဈေးကွက်၌ အကြီးမားဆုံးစိုက်ပျိုးထုတ်လုပ်သူဖြစ်သည့် ဗီယက်နမ်နိုင်ငံမှ ရောင်းလိုအားကျဆင်းမှုနှင့်အတူ အိန္ဒိယပြည်တွင်းဈေးကွက်တွင် ရိုဘတ်စတာကော်ဖီဈေးနှုန်းများမှာ ဆက်လက်မြင့်တက်လျက်ရှိပြီး အာရေးဘီးကား ကော်ဖီစေ့ဈေးနှုန်းများမှာမူ ကောင်းစွာတည်ငြိမ်လျက်ရှိကြောင်း Hindu Business Line သတင်းဌာနက ဖော်ပြပါသည်။

     အိန္ဒိယပြည်တွင်း၌ ကျယ်ပြန့်စွာ ထုတ်လုပ်ရောင်းဝယ်မှုရှိသည့် ပြုပြင်ခြင်း မပြုရသေးသော ခူးဆွတ်ပြီး ရိုဘတ်စတာကော်ဖီ ချယ်ရီစေ့များ၏ ဈေးနှုန်းသည် ၅၀ ကီလိုဂရမ်ဝင် ၁ အိတ် လျှင် ရူပီးငွေ ၁၀၀၀၀ နှုန်းကို မကြာသေးမီက စံချိန်တင်ဖြတ်ကျော်ခဲ့ပြီး လက်ရှိကာလတွင် ရူပီး ၁၀၄၀၀ နှုန်း ဝန်းကျင်ဖြင့် တောင်သူများက ရောင်းချလျက်ရှိသည်။ ရိုဘတ်စတာချယ်ရီစေ့များ၏ ဈေးနှုန်းသည် ဧပြီလ လဆန်းပိုင်းကထက် ၁၀% ခန့်နှင့် ဇန်နဝါရီလ လဆန်းပိုင်းဈေးနှုန်းထက် ၅၀% ကျော် မြင့်တက်လာခြင်းဖြစ်သည်။

    အလားတူ ပြုပြင်သန့်စင်ပြီး အခွံမာ (parchment) ပါရှိသည့် ရိုဘတ်စတာကော်ဖီစေ့၏ ဈေးနှုန်းများသည်လည်း ၅၀ ကီလိုဂရမ်ဝင် ၁ အိတ်လျှင် ရူပီး‌ ၁၈၃၀၀ နှုန်းသို့ စံချိန်တင်မြင့်တက်ခဲ့ပြီး ဇန်နဝါရီလဆန်းပိုင်းရှိ ဈေးနှုန်းထက် ၆၆% ပိုမိုလာခဲ့သည်။ ICE စတော့ဈေးကွက်တွင် ကမ္ဘာ့ရိုဘတ်စတာကော်ဖီ ကြိုတင်အရောင်းဈေးနှုန်းများသည်လည်း ၂၀၂၄ ခုနှစ်၊ နှစ်ဆန်းပိုင်းမှ လက်ရှိကာလအတွင်း ၆၀% ကျော်မြင့်တက်လာကြောင်း တွေ့ရှိရသည်။

     အိန္ဒိယ ကော်ဖီတင်ပို့သူများအသင်း၏ ဥက္ကဋ္ဌ Ramesh Rajah က ရိုဘတ်စတာကော်ဖီ ဈေးနှုန်းများ မြင့်တက်လာရခြင်းမှာ ဗီယက်နမ်နိုင်ငံ၌ ရောင်းလိုအား လျော့နည်းလာခြင်းကြောင့်ဖြစ်ကြောင်း၊ ထို့အပြင် EUDR ခေါ် ဥရောပသမဂ္ဂ၏ သစ်တောပြုန်းတီးမှုဆိုင်ရာ စည်းမျဉ်းများ စတင်သက်ဝင်မှုရှိမည့် နှစ်ကုန်ပိုင်းမတိုင်မီ ဥရောပကုန်သည်များဘက်မှ ဝယ်လိုအား မြင့်တက်မှုကလည်း ဈေးနှုန်းမြင့်တက်စေရန် အထောက်အပံ့ပြုလျက်ရှိကြောင်း၊ ကော်ဖီစေ့ဈေးနှုန်းများ ယခုထက် ပိုမိုမြင့်တက်လိမ့်မည်ဟု ယူဆထားသော တောင်သူအချို့သည် အလျင်စလို ရောင်းချမှုမပြုပဲ ထိန်းသိမ်းထားကြကြောင်း၊ ကော်ဖီစိုက်ပျိုးထုတ်လုပ်မှု စုစုပေါင်း၏ ၇၀% ခန့်မှာ ဈေးကွက်အတွင်းသို့ ရောင်းချထားပြီးဖြစ်ပြီး ကျန်ပမာဏကို စိုက်ပျိုးထုတ်လုပ်သူများက ထိန်းသိမ်းထားဆဲဖြစ်သည်ဟု ယူဆရကြောင်းဖြင့် ပြောကြားခဲ့သည်။

   ၂၀၂၄ ပြက္ခဒိန်နှစ်အတွင်း အိန္ဒိယ၏ ကော်ဖီတင်ပို့မှုမှာ ဇူလိုင်လ ၁၁ ရက်နေ့အထိ တန်ချိန် ၂.၅၃ သိန်းရှိပြီး ယခင်နှစ်ကာလတူ၌ တင်ပို့မှု တန်ချိန် ၂.၂၈ သိန်းအပေါ် ၁၁% တိုးတက်ခဲ့သည် ဟု အိန္ဒိယကော်ဖီလုပ်ငန်းကြီးကြပ်ရေးအဖွဲ့က ဖော်ပြထားသည်။ အဓိကအားဖြင့် ရိုဘတ်စတာ ကော်ဖီချယ်ရီစေ့များ တင်ပို့မှုတိုးတက်ခဲ့ပြီး ဇန်နဝါရီလ ၁ ရက်နေ့မှ ဇူလိုင်လ ၁၁ ရက်နေ့အတွင်း တန်ချိန် ၁.၁၉ သိန်း တင်ပို့နိုင်ခဲ့ရာ ယခင်နှစ် အလားတူကာလ တင်ပို့ခဲ့မှု တန်ချိန် ၁.၀၁ သိန်း အပေါ် ၁၈% တိုးတက်မှုရရှိခဲ့သည်။ ပြန်လည်တင်ပို့ကုန် အပါအဝင် အသင့်သောက်သုံးနိုင်သော ကော်ဖီထုတ်ကုန်များတင်ပို့မှုမှာ ဒုတိယအများဆုံးဖြစ်ပြီး အဆိုပါကာလအတွင်း ၈၂၇၇၁ တန် တင်ပို့လျက် ယခင်နှစ်ကာလတူထက် ၁၁% ပိုမိုခဲ့သည်။

ကော်ဖီတင်ပို့သူများနှင့် ကော်ဖီလှော်သည့်လုပ်ငန်းများထံသို့ ကော်ဖီစေ့ပေးသွင်းခြင်းကို လုပ်ကိုင်လျက်ရှိသော Agrani Coffee and Commodities Ltd မှ လုပ်ငန်းရှင် Praveen Kumar Kolimarla က ဗီယက်နမ်နှင့် အင်ဒိုနီးရှားတို့တွင် ရောင်းလိုအားနည်းပါးမှုကြောင့် ရိုဘတ်စတာ ကော်ဖီဈေးကွက်သည် ကုန်ရလွယ်မှုနှင့် ဈေးနှုန်းများအရ လွန်စွာကျပ်တည်းမှု ဆက်လက်ဖြစ်ပေါ်နေဦးမည် ဖြစ်ကြောင်း၊ ဝယ်ယူသူများထံမှ တောင်းဆိုမှုများပြားနေချိန်တွင် အိန္ဒိယရှိစိုက်ပျိုး ထုတ်လုပ်သူများက ကော်ဖီစေ့များ ပိုမိုထုတ်ရောင်းလာခြင်း၊ လုပ်ငန်းရှင်များအတွက် ငွေဖြစ်လွယ်မှုရှိခြင်း၊ မုတ်သုံရာသီဥတု၏ သက်ဝင်လှုပ်ရှားမှုရှိလာခြင်း စသည့်အခြေအနေများနှင့်အတူ အဆိုပါနိုင်ငံများမှ ကော်ဖီစေ့ရောင်းချနိုင်ခြင်းမရှိတော့သည့် အခြေအနေ၌ အိန္ဒိယအတွက် အခွင့်အလမ်းများရှိနေကြောင်း ပြောဆိုခဲ့သည်။

   Fitch ကုမ္ပဏီလုပ်ငန်းစု၏ ဈေးကွက်သုတေသနအဖွဲ့တစ်ခုဖြစ်သော BMI က မကြာသေးမီကာလ၌ ထုတ်ပြန်ခဲ့သည့် အစီရင်ခံစာတစ်စောင်တွင် အဓိကစိုက်ပျိုးထုတ်လုပ်သည့် ဗီယက်နမ်နိုင်ငံနှင့် ဘရာဇီးနိုင်ငံတို့၌ ရောင်းလိုအား အခက်အခဲများကြောင့် ကော်ဖီဈေးကွက်သည် အလားအလာကောင်းမွန်လျက်ရှိမည်ဖြစ်ကြောင်း၊ ကုန်စည်များ ဆက်လက်စုဆောင်းခြင်းက ၂၀၂၄ ခုနှစ် ဒုတိယနှစ်ဝက်တွင် ဈေးနှုန်းတိုးတက်မှုအပေါ် လေဆန်အတားအဆီးများ ဖြစ်ပေါ်စေနိုင်ကြောင်း၊  ဗီယက်နမ်နိုင်ငံတွင် ၂၀၂၄ နိုဝင်ဘာလမှ ၂၀၂၅ ဖေဖော်ဝါရီလအထိ ရိုဘတ်စတာကော်ဖီ ခူးဆွတ်ထွက်ရှိမှု အမြင့်မားဆုံးကာလမတိုင်မီ မိုးရွာသွန်းမှုနှင့် ဆည်တာတမံများ၌ ရေသိုလှောင်နိုင်မှု အခြေအနေကို စောင့်ကြည့်ရလိမ့်မည်ဖြစ်ကြောင်း၊ ထုတ်လုပ်မှုကျဆင်းခြင်းကို ရှောင်ကြဉ်နိုင်ရန်အတွက် ပြန်လည်အင်အားဖြည့်တင်းမှုမှာ အရေးကြီးကြောင်း ဖော်ပြထားသည်။

    ၂၀၂၃-၂၀၂၄ အယ်လ်နီညိုဖြစ်စဉ်ဆောလျင်စွာ ပျက်ပြယ်ပြီး ၂၀၂၄ ခုနှစ် အောက်တိုဘာ-နိုဝင်ဘာ ကာလများ၌ လာနီညာရာသီဥတုဖြစ်စဉ်ပေါ်ပေါက်နိုင်မှုက အရှေ့တောင်အာရှ‌ဒေသ တွင် မိုးရွာသွန်းမှုကို ကောင်းမွန်စေမည့် အလားအလာရှိနေသည်။ ယင်းမတိုင်မီ၌ ဘရာဇီးနိုင်ငံ၏ ကော်ဖီခူးဆွတ်ရိတ်သိမ်းမှုမှာ ၂၀၂၄-၂၅ ထုတ်လုပ်ရေးနှစ်၏ ရာသီချိန်ပြင်ပသို့ ရောက်ရှိနေမည်ဖြစ်ပြီး ၎င်း၏ နှစ်စဉ်ပြည်တွင်းကော်ဖီထုတ်လုပ်မှု ကျဆင်းခြင်းအရ ဈေးကွက်ကျပ်တည်းမှုဖြစ်ပေါ်နိုင်ကြောင်း BMI အဖွဲ့က ဖော်ပြထားသည်။

Source: The Hindu Business Line, 17 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    အင်ဒိုနီးရှားနိုင်ငံအနေဖြင့် ပြည်တွင်းစိုက်ပျိုးထုတ်လုပ်မှုမှ လုံလောက်စွာ ဖြည့်ဆည်းပေးနိုင်မှုမရှိပါက ၂၀၂၄ ခုနှစ်အတွင်း ဆန်တန်ချိန် ၄.၃ သန်းအထိ တင်သွင်းရနိုင်ကြောင်း အမျိုးသား စားနပ်ရိက္ခာအေဂျင်စီ၏ အတွင်းရေးမှူး Sarwo Edhy က ၂၂-၇-၂၀၂၄ နေ့တွင် ပြောကြားခဲ့သည်။

    အင်ဒိုနီးရှားအစိုးရသည် ယခုနှစ်၌ ဆန်တန်ချိန် ၃.၆ သန်းကို တင်သွင်းရန် စီစဉ်ထားရှိပြီး ဇန်နဝါရီလမှ မေလအတွင်း တန်ချိန် ၂.၂၂ သန်းကို တင်သွင်းခဲ့ပြီး ဖြစ်သည်။ မိုးခေါင်ခြောက်သွေ့မှု၊ ရေကြီးမှုနှင့် ပိုးမွှားအန္တရာယ်တို့ကြောင့် သီးနှံရိတ်သီးမှုကို ထိခိုက်မှုရှိမှသာ နောက်ထပ်တိုးမြှင့် တင်သွင်းရန် လိုအပ်မည်ဖြစ်သည်ဟု အင်တာနက်ကွန်ယက်ဖြင့် တိုက်ရိုက်ထုတ်လွှင့်သည့် သတင်းစာရှင်းလင်းပွဲတစ်ရပ်၌ Sarwo က ပြောဆိုခဲ့ခြင်း ဖြစ်သည်။

     အင်ဒိုနီးရှား စာရင်းအင်းအေဂျင်စီက ယခုနှစ် ဇန်နဝါရီလမှ ဩဂုတ်လအတွင်း ဆန်စပါး စိုက်ပျိုးထုတ်လုပ်မှုမှာ ၂၀၂၃ ခုနှစ် အလားတူကာလနှင့် နှိုင်းယှဉ်ပါက ၉.၅၂% ခန့် ကျဆင်းမည်ဟု ခန့်မှန်းထားသည်။ လူဦးရေ သန်းပေါင်း ၂၇၀ ရှိသော အင်ဒိုနီးရှားနိုင်ငံတွင် ရာသီဥတုဆိုးရွားမှုကြောင့် သီးနှံထွက်ရှိမှု ကျဆင်းခဲ့သဖြင့်  ပြည်တွင်းဈေးကွက်အတွင်း အဓိကစားသုံးကုန်ဖြစ်သည့် ဆန်ဈေးနှုန်းများမှာ ယခင်နှစ် ကာလတူနှင့်နှိုင်းယှဉ်ပါက ယခုနှစ် ဇွန်လ၌ ၁၂% ပိုမို မြင့်တက်လာခဲ့သည်။

Source: Hellenic Shipping News, 23 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ဗီယက်နမ်-ကနေဒါစီးပွားရေးအသင်း (VCBA) သည် လာမည့်နှစ်များတွင် နှစ်နိုင်ငံအကြား စီးပွားရေးပူး‌ပေါင်းဆောင်ရွက်မှုကို အရှိန်မြှင့်တင်ရေးအတွက်ကူညီရန် စီးပွားရေးလုပ်ငန်းများ ချိတ်ဆက်ပေးမှုကိုမြှင့်တင်သွားမည်ဟုသိရပါသည်။ VCBA ကကျင်းပခဲ့သည့် ၂၀၂၄-၂၀၂၇ သက်တမ်းကာလအတွက် ဒုတိယအကြိမ်မြောက်ကွန်ဂရက်အစည်းအဝေးမှာ ကနေဒါနှင့် အခြား နိုင်ငံများမှ အဖွဲ့ဝင်များသာမက နိုင်ငံခြားရေးဝန်ကြီးဌာနလက်အောက် ပြည်ပနိုင်ငံများရှိ ဗီယက်နမ်ရေးရာကော်မတီမှ တာဝန်ရှိသူများနှင့် ကနေဒါနိုင်ငံဆိုင်ရာ ဗီယက်နမ်သံရုံးတို့၏ စိတ်ဝင်စားမှုရရှိခဲ့ကြောင်းသိရပါသည်။ VCBA ၏ ဥက္ကဋ္ဌအသစ်ဖြစ်သူ Chau Tu Cuong က အသင်းအနေဖြင့် နှစ်နိုင်ငံလုပ်ငန်းများအကြား ချိတ်ဆက်မှုနှင့် ပံ့ပိုးပေးမှုတို့တွင် ပိုမိုကောင်းမွန် သည့် စွမ်းဆောင်ရည်ကိုပြသနိုင်ခဲ့ကြောင်းနှင့် အောင်မြင်မှုများရှေ့ဆက်ရရှိရန် ဆက်လက်ဆောင်ရွက်သွားမည်ဖြစ်ကြောင်း အမွှန်းတင်ပြောကြားသွားခဲ့ပါသည်။ နိုင်ငံခြားရေးဝန်ကြီးဌာန၊ ဒုတိယဝန်ကြီး Le Thi Thu Hang ၏ ကွန်ဂရက်သို့‌ပေးပို့ခဲ့သည့် ဂုဏ်ပြုစာတွင်လည်း နိုင်ငံခြားရေးဝန်ကြီးဌာနအနေဖြင့် VCBA ကို ပိုမိုထိရောက်စွာလုပ်ကိုင်နိုင်စေရန်အတွက် ပံ့ပိုးမှုပေးရန် အဆင်သင့်ဖြစ်နေကြောင်းနှင့် ကနေဒါနှင့်ကမ္ဘာတစ်ဝန်းရှိ ဗီယက်နမ်အသိုင်းအဝန်းအားကောင်းမှုကိုမြှင့်တင်ရန် ကူညီသွားမည်ဟု အခိုင်အမာပြောကြားထားကြောင်းသိရပါသည်။ ကနေဒါနိုင်ငံ၊ ဗန်ကူးဗားမြို့တွင် ၂၀၂၂ခုနှစ်၊ ဩဂုတ်လတွင်တည်ထောင်ခဲ့သည့် VCBA ကို နှစ်နိုင်ငံကြားစီးပွားရေးချိတ်ဆက်မှုကိုအရှိန်မြှင့်တင်ရန်၊ နှစ်နိုင်ငံကြားရင်းနှီးမြှုပ်နှံရန်နှင့် စီးပွားရေးလုပ်ဆောင်ရန်ဆန္ဒရှိသည့် ဗီယက်နမ်နှင့်ကနေဒါလုပ်ငန်းများကို အတူတကွချိတ်ဆက်ပေးရန် ရည်ရွယ်ဖွဲ့စည်းခဲ့ခြင်းဖြစ်ကြောင်းသိရပါသည်။ ၎င်းအဖွဲ့သည် ကနေဒါနိုင်ငံအတွင်း လုပ်ငန်း လုပ်ကိုင်ရန် ကနေဒါအစိုးရ၏ တရားဝင်အသိအမှတ်ပြုမှုနှင့် လိုင်စင်ရရှိထားကြောင်းသိရပါသည်။ ၎င်းအချက်သည် အဖွဲ့၏အဖွဲ့ဝင်မှုအရေအတွက်ကို လျင်မြန်စွာမြင့်တက်လာရန်ကူညီခဲ့ပြီး ယခုတွင် အဖွဲ့ဝင်အရေအတွက် ၃၅၀ဖြင့် (၂)ဆအထိတိုးမြှင့်လာကြောင်းသိရပါသည်။ နှစ်နိုင်ငံအကြား အပြန်အလှန်ကုန်သွယ်မှုသည် ၂၀၂၂ခုနှစ်နှင့် ၂၀၂၃ခုနှစ်တို့တွင် အမေရိကန်ဒေါ်လာ ၁၀ဘီလီယံကျော်ရှိခဲ့ကာ ဗီယက်နမ်ကို ကနေဒါနိုင်ငံ၏ အရှေ့တောင်အာရှအကြီးဆုံးကုန်သွယ်ရေးမိတ်ဖက်အဖြစ် ပြောင်းလဲစေခဲ့ကြောင်းသိရပါသည်။

Source: Vietnam Plus

DOCA(ရန်ကုန်)

       အင်ဒိုနီးရှားနိုင်ငံ၊ စက်မှုဝန်ကြီးဌာနက ဂျပန်နှင့်တောင်ကိုရီးယားတို့ပါဝင်သော မြောက်များစွာသည့် နိုင်ငံတကာမှလုပ်ငန်းများသည် အင်ဒိုနီးရှားနိုင်ငံ၌ လျှပ်စစ်ကားစီးပွားရေးလုပ်ငန်းကဏ္ဍများတွင်ပါဝင်ရန် စိတ်ဝင်စားနေကြောင်းပြောကြားခဲ့ပါသည်။ ဝန်ကြီးဌာန၏ စက်မှုသယံဇာတနှင့် နိုင်ငံတကာအခွင့်အလမ်းမြှင့်တင်‌ရေးဦးစီးဌာန၏ ညွှန်ကြားရေးမှူး Syahron Ahmed  က ဂျပန်၊ တောင်ကိုရီးယား၊ ထိုင်ဝမ်နှင့်တရုတ်နိုင်ငံတို့အပြင် အခြားနိုင်ငံများမှလုပ်ငန်းများသည် အင်ဒိုနီးရှား၏ လျှပ်စစ်ကားစီးပွားရေးတွင်ပါဝင်ရန် ဆက်သွယ်လာကြကြောင်း ပြောကြားခဲ့ပါသည်။ ၎င်း၏အဆိုအရ အင်ဒိုနီးရှားအစိုးရသည် အမေရိကန်က တရုတ်မှလျှပ်စစ်ကားများကို အကောက်ခွန် ၁၀၀ရာခိုင်နှုန်းတိုးမြှင့်ခြင်းနှင့် ဥရောပသမဂ္ဂက တရုတ်လျှပ်စစ်ကားများကို အကောက်ခွန် ၃၇ရာခိုင်နှုန်းထိတိုးမြှင့်ခြင်းတို့ပြုလုပ်ပြီးနောက် အင်ဒိုနီးရှားနိုင်ငံတွင် လျှပ်စစ်ကားရင်းနှီးမြှုပ်နှံမှုအခွင့်အလမ်းများကို တက်ကြွစွာအားပေးကြေညာလျက်ရှိကြောင်းသိရပါသည်။ လျှပ်စစ်ကားအဓိကထုတ်လုပ်သည့် တရုတ်နိုင်ငံကလည်း လျှပ်စစ်ကားများကို တူရကီနှင့် အင်ဒိုနီးရှားအပါအဝင် အခြားနိုင်ငံများတွင် ထုတ်လုပ်ရန်စီစဉ်လျက်ရှိပြီး အခြားတရုတ်ကုမ္ပဏီများသည်လည်း အင်ဒိုနီးရှားနိုင်ငံတွင် ၎င်းတို့၏စီးပွားရေးလုပ်ငန်းများလည်ပတ်လျက်ရှိကြောင်းသိရပါသည်။ ဝန်ကြီးဌာနသည် ဂျပန်နိုင်ငံတကာပူးပေါင်းဆောင်ရွက်ရေးအေဂျင်စီ(JICA)နှင့် လျှပ်စစ်ဘတ္ထရီများအပေါ်တွင် ဆန်းစစ်သုံးသပ်ချက်ပြုလုပ်ခဲ့ကြောင်းသိရပါသည်။ သို့သော် ၎င်းသည် ဆန်းစစ်သုံးသပ်ချက်သက်သက်သာဖြစ်ပြီး ကုမ္ပဏီများ နိုင်ငံအတွင်းဝင်ရောက်ရန် ဆုံးဖြတ်ချက်ချကြခြင်းမဟုတ်ကြောင်းသိရပါသည်။ တောင်ကိုရီးယားနိုင်ငံမှ Busan Techno Park  ကမူ အင်ဒိုနီးရှားနိုင်ငံတွင် ဆန်းစစ်စစ်ဆေးရေးစင်တာ တည်ဆောက်ရန် စိတ်ဝင်စားလျက်ရှိကြောင်းသိရပါသည်။ ထို့ပြင် ထိုင်ဝမ်မှကုမ္ပဏီတစ်ခုသည်လည်း Batam မြို့ရှိ စက်မှုဇုန်တွင် စက်ရုံတည်ဆောက်ထားကြောင်းသိရပါသည်။ အဆိုပါစက်ရုံသည် ၂၀၂၄ခုနှစ်၊ စက်တင်ဘာလတွင် ထုတ်လုပ်မှုစတင်နိုင်ရန်မျှော်လင့်ရပြီး ဩဂုတ်လတွင်ကျင်းပမည့် ဖွင့်ပွဲအခမ်းအနားကို စက်မှုဝန်ကြီးအား တက်ရောက်ရန်ဖိတ်ကြားထားကြောင်းသိရပါသည်။ Batam မှစက်ရုံသည် ဘက္ထရီများမှ ကိုဗော့၊ လစ်သီယံနှင့် ကြေးတို့ကိုထုတ်ယူ၍ ပြန်လည်အသုံးပြုနိုင်ရန်ထုတ်လုပ်၍ လျှပ်စစ်ဘတ္ထရီကုမ္ပဏီများကိုရောင်းချမည်ဟု သိရပါသည်။ အင်ဒိုနီးရှားနိုင်ငံသည် လျှပ်စစ်မော်တော်ယာဉ်ဘတ္ထရီများအတွက် နေရာတစ်ခုတွင်ရှိနေကြောင်းသိရပါသည်။

Source: Jakarta Post

DOCA(ရန်ကုန်)

    အင်ဒိုနီးရှားနိုင်ငံ၊ စီးပွားရေးရာညှိနှိုင်းရေးဝန်ကြီး Airlangga Hartarto က အင်ဒိုနီးရှားနိုင်ငံသည် ကမ္ဘာ့စားအုန်းဆီတင်ပို့မှုကိုလွှမ်းမိုးထားပြီး ကမ္ဘာ့စားအုန်းဆီထောက်ပံ့မှု၏ ၅၄ရာခိုင်နှုန်းရှိကြောင်းပြောကြားခဲ့ပါသည်။ ၂၀၂၃ခုနှစ်တွင် အင်ဒိုနီးရှားနိုင်ငံသည် စားအုန်းဆီတန်ချိန် ၅၆သန်းထုတ်လုပ်ခဲ့ပြီး တန်ချိန် ၂၆.၃၃သန်းတင်ပို့ခဲ့ကြောင်းသိရပါသည်။ စားအုန်းဆီသည် အင်ဒိုနီးရှားနိုင်ငံအတွက် မဟာဗျူဟာမြောက်ပို့ကုန်ပစ္စည်းဖြစ်ကြောင်းသိရပါသည်။ ဝန်ကြီးက စားအုန်းဆီလုပ်ငန်းသည် လုပ်သား ၁၆.၂သန်းကို တိုက်ရိုက်ဖြစ်စေ၊ သွယ်ဝိုက်ဖြစ်စေ ပံ့ပိုးထားကြောင်းပြောကြားခဲ့ပါသည်။ စားအုန်းဆီသည် စားအုန်းဆီထုတ်လုပ်သည့်ဧရိယာများအတွက် စီးပွားရေးမောင်းနှင်အားတစ်ခုဖြစ်ပြီး ကျေးလက်ဒေသဖွံ့ဖြိုးတိုးတက်မှုနှင့် ဆင်းရဲနွမ်းပါးမှုအဆင့်ကိုလျှော့ချစေနိုင်ကြောင်း ဝန်ကြီးက ပြောကြားခဲ့ပါသည်။ ထို့ကြောင့် ၎င်း၏ဝန်ကြီးဌာနအနေဖြင့် တန်ဖိုးပိုမြင့်သည့် ကုန်ချောများကိုထုတ်လုပ်ရန်အတွက် စားအုန်းဆီအထွက်နှုန်း ဆက်လက်ဖွံ့ဖြိုးတိုးတက်ရန် လုပ်ဆောင်လျက်ရှိကြောင်းပြောကြားခဲ့ပါသည်။ ဥပမာအနေဖြင့်ဆိုရသော် B40 ဘိုင်အိုဒီဇယ်သည် လောင်စာအဖြစ် စားအုန်းဆီမှတစ်ဆင့် ထုတ်လုပ်ထားခြင်း ဖြစ်ပါသည်။ ဝန်ကြီးဌာနအနေဖြင့်လည်း Indonesia Sustainable Palm Oil(ISPO) ထောက်ခံချက်လက်မှတ်နှင့် The People’s Palm Oil Rejuvenation(PSR) ပရိုဂရမ်များပါဝင်သည့် မူဝါဒများချမှတ်ရန်အားထုတ်နေပြီး တည်ငြိမ်သောစားအုန်းဆီလုပ်ငန်းကဏ္ဍကိုဖန်တီးရန် အာရုံစိုက်လျက်ရှိကြောင်းသိရပါသည်။ IPSO သည် စားအုန်းစိုက်ခင်းနှင့် စီးပွားရေးလုပ်ငန်းကြီးများအတွက် တည်ငြိမ်မှုရှိသောထောက်ခံမှုကို အရှိန်မြှင့်တင်ရန်ရည်ရွယ်ကြောင်းသိရပါသည်။ အစိုးရသည် PSR Program အတွက် စားအုန်းစိုက်ခင်းရန်ပုံငွေစီမံခန့်ခွဲရေးအေဂျင်စီကို ၃၃၁၀၀၇ဟတ်တာဧရိယာအတွက် ရူပီး ၉.၂၅ထရီလီယံထုတ်ပေးခဲ့ကြောင်းသိရပါသည်။

Source: Jokarta Post

DOCA(ရန်ကုန်)