ပြည်ပကုန်သွယ်မှုသတင်းများ

အိန္ဒိယ၌ မြန်မာမတ်ပဲ‌ဈေး အနည်းငယ်ပြန်ကျ

          ယခင်အပတ်က အိန္ဒိယနိုင်ငံ၊ မွန်ဘိုင်းဈေးကွက်၌ မြန်မာမတ်ပဲ FAQ  သည် တစ်ကွမ်တယ်လျှင်  ၆၅၅၀ ရူပီး ရှိခဲ့ပြီး ၅၀ ရူပီးကျဆင်းခဲ့ကြောင်း၊ မြန်မာဘက်၌ မတ်ပဲအထွက်ကောင်းမည်ဟု ခန့်မှန်း ထားသကဲ့သို့  အိန္ဒိယ၌ မတ်ပဲခွဲခြမ်း အဝယ်နည်းနေကာ ပြည်ပမှ အဝင်ပုံမှန်ရှိနေသဖြင့် ပဲ တင်သွင်းခွင့် ကာလကို သက်တမ်းတိုးထားသည့်အပြင် ငွေလည်ပတ်မှုအခက်အခဲလည်းရှိနေ၍ ယခုကဲ့သို့  မတ်ပဲ ဈေး ပြန်အေးသွားခြင်းဖြစ်ကြောင်း၊ မွန်ဘိုင်းကဲ့သို့ ချန်နိုင်းဈေးကွက်၌လည်း မြန်မာမတ်ပဲ FAQ ၊ SQ များ ၇၅ ရူပီးကျဆင်းပြီး  တစ်ကွမ်တယ်လျှင် ၆၂၂၅ - ၆၇၂၅ ရူပီး ဈေးရှိခဲ့ကြောင်း၊ အိန္ဒိယ၊ ဥတာပရာ ဒေ့ရှ်နှင့် မဒ္ဒရာပရာဒေ့ရှ်ပြည်နယ်များက ပုံမှန်အရည်အသွေးရှိသည့်  မတ်ပဲအသစ်များ စတင် ဝင် ရောက်နေပြီး မကြာခင်၌ နောက်ထပ်ပြည်နယ် ၂ ခုမှ မတ်ပဲအသစ်များလည်း စတင်ဝင်ရောက်လာ ဖွယ်ရှိနေကြောင်း၊ မြန်မာဈေးကွက်၌ ပြည်တွင်းဝယ်လိုအားရှိနေ၍ မတ်ပဲ FAQ ၊SQ များ CNF တစ်တန်‌ ပေါက်ဈေးများသည် အမေရိကန်ဒေါ်လာ ၈၀၅- ၉၀၀ မြင့်တက်လာကြောင်း၊အိန္ဒိယနိုင်ငံ၌ ယခင် အပတ်က မတ်ပဲဈေး ကျဆင်းခဲ့သကဲ့သို့  ပြည်တွင်း ဘုရင့်နောင်ကုန်စည်ဒိုင်၌လည်း မတ်ပဲ RC ဈေးနှုန်းက သီတင်းပတ်အစတွင်  တစ်တန်လျှင် ၁၃၆၅၀၀၀ ကျပ်ရှိခဲ့ရာမှ ၁၃၅၁၀၀၀ ကျပ်သို့ ကျဆင်း ခဲ့ကြောင်းသိရှိရပါသည်။

(Source: Current Content)

ပို့ကုန်ပဲများနှင့်အတူ အသစ်ဝင် ပဲမျိုးစုံဈေးမြင့်တက်လာ

          အိန္ဒိယနိုင်ငံ၏ ပဲမျိုးစုံလိုအပ်ချက် ပုံမှန်ရှိနေခြင်းအပြင် လက်ရှိ ပြည်တွင်းငွေလဲနှုန်း မြင့် တက်လာနေသဖြင့် ပို့ကုန်ပဲများအပါအဝင် အသစ်ဝင်ရောက်လာသည့် ပဲမျိုးစုံမှာလည်း ဈေး ကွက် မြင့်တက်လာသည်ဟု ပဲ၊ နှမ်းကုန်သည်များကပြောကြားခဲ့ကြောင်း၊ ပို့ကုန်ပဲများဖြစ်သည့် ပဲစင်းငုံမှာ ၂၀၂၀ ခုနှစ်၊ ဒီဇင်ဘာလဆန်း ပေါက်ဈေးထက် တစ်အိတ်လျှင် ကျပ် ၂၀၀၀၀ ခန့် ထူး ခြားစွာမြင့်တက်လာသကဲ့သို့ မတ်ပဲဈေးမှာလည်း တစ်တင်းလျှင် ကျပ် ၄၀၀၀၀ နှင့်အထက် ရှိ လာရာမှ  ယခုသီတင်းပတ်တွင် တစ်အိတ်လျှင်  ကျပ် ၅၀၀၀၀ နီးပါးအထိ ပေါက်ဈေးရှိလာကာ ၂၀၂၂ ခုနှစ်၊ ဇန်နဝါရီလ ဒုတိယသီတင်းပတ်တွင် အဆိုပါ ပို့ကုန်ပဲများအပြင် အသစ်ဝင်ပဲမျိုးစုံ ဈေးမှာလည်း  မြင့်တက်လာကြောင်း မန္တလေးတိုင်းဒေသကြီး ကုန်သည်များနှင့် စက်မှုလက်မှု လုပ်ငန်းရှင်များအသင်းဒုတိယဥက္ကဋ္ဌ ဦးကျော်သွင်(ရွှေစင်သိန်းပွဲရုံ)ကပြောကြားခဲ့ရာ ပို့ကုန်များ ထဲ၌ ဈေးအကောင်းဆုံး ပဲစင်းငုံမှာ တစ်အိတ်လျှင် ကျပ်(၁၂၇၀၀၀-၁၂၈၀၀၀)ခန့်ဈေး ဖြစ်လာပြီး မတ်ပဲတစ်အိတ်လျှင် ကျပ်(၁၃၄၀၀၀-၁၄၅၀၀၀)ဖြစ်လာကြောင်း၊ ဒေါ်လာ‌ငွေ ဈေးကောင်းလာ နိုင်ချေရှိသဖြင့် ပို့ကုန်ပဲများအပြင် ပြည်တွင်းအသစ်ဝင်ပဲများပါ ဈေးကောင်းလာပြီး မြေပဲလုံးဆံ နှင့်မြေပဲဆီဆံများကို ပြည်တွင်းဆီစက်ပိုင်များအဝယ်ကောင်းနေသဖြင့် အမျိုးအစားအလိုက် တစ် ပိဿာလျှင် ကျပ် ၁၀၀ ခန့်ဈေးတက်လာကြောင်း၊ ပဲဆီပေါက်ဈေးလည်း အရောင်းသွက်လာ၍ အနည်းငယ်ဈေးတက်လာနိုင်ကြောင်း၊မြေထောက်ပဲ၊ပဲထောပတ်များလည်း တစ်အိတ်လျှင်ကျပ် ၁၄၀၀၀၀ ဈေးနှင့် ဝင်သလောက်အဝယ်ရှိနေပြီး ယခင်နှစ်ကာလတူနှင့်နှိုင်းယှဉ်ပါက ပဲမျိုးစုံ ဈေးကွက်၌ အမြင့်ဈေးဖြစ်နေကြောင်း၊ ပြည်တွင်းဒေါ်လာဈေး မြင့်တက်လာခြင်းနှင့်အတူ ဈေး ကွက်အတွင်း ထိပ်စအရည်အသွေးများဝင်ရောက်မှုနည်းလာခြင်းကြောင့်၂၀၂၂ ခုနှစ်၊ဇန်နဝါရီလ ဒုတိယပတ်တွင် နှမ်းနက်ထိပ်စ သုံးတင်းဝင်တစ်အိတ်လျှင်ကျပ်(၂၀၅၀၀၀-၂၁၀၀၀၀)၊ အလတ်စ တစ်အိတ်လျှင် ကျပ်(၁၇၅၀၀၀-၁၈၅၀၀၀) ကြား အရည်အသွေးအလိုက် ဝယ်လိုအားပြန်လည် ကောင်းမွန်လာပြီး နှမ်းဖြူသစ်ရိုးရိုးမှာ တစ်အိတ်လျှင် ကျပ်(၁၄၈၀၀၀-၁၅၃၀၀၀)၊ နှမ်းညိုသစ်မှာ ကျပ်(၁၂၈၀၀၀)အသီးသီး ဈေးနှုန်းမြင့်တက်နေကြောင်း၊  မြေပဲဆံနှင့် မြေပဲဆီဆံပေါက်ဈေးများမှာ အမျိုးအစားအလိုက် တစ်ပိဿာလျှင် ကျပ် ၁၀၀-၁၅၀ ခန့်ဈေးမြင့်လာကြောင်း၊ မူဆယ်နယ်စပ် မှ ပြည်တော်ပြန်မြေပဲလုံးဆံများကို ပြည်တွင်းဆီစက်များမှ ဝယ်ယူမှုကောင်းနေရာ ၂၀၂၂ ခုနှစ်၊ ဇန်နဝါရီလ ၁၂ ရက်တွင် လုံးဆံတစ်ပိဿာ ၃၀၀၀ ကျပ်၊ပြန့်လုံးဆံတစ်ပိဿာလျှင်၂၈၀၀ ကျပ် ၊ အနီလုံးဆံတစ်ပိဿာလျှင်၂၇၇၅ ကျပ်၊ ဆီးဆံတစ်ပိဿာလျှင် ၂၇၅၀ ကျပ် အသီးသီးပေါက်ဈေး ရှိကြောင်း၊လာမည့်ဖေဖော်ဝါရီလ၌အများအပြားထွက်ရှိလာမည့်မြေထောက်ပဲမှာဈေးကွက်အတွင်း လက်ရှိဝင်ရောက်မှုနည်းပါးနေသေးခြင်းကြောင့် သုံးတင်းတစ်အိတ်လျှင် ၁၄၀၀၀၀ ကျပ်ပေါက်ဈေး ရှိနေကြောင်း၊ ပဲဈေးကွက်သို့အသစ်ဝင်ရောက်လာသည့်ပဲများတွင် စွန်တာပြာတစ်အိတ်လျှင် ၁၃၀၀၀၀ ကျပ်၊ ပဲထောပတ်တစ်အိတ်လျှင် ၁၂၅၀၀၀ ကျပ်၊ နိုင်လွန်ပဲ - ပုဂံပဲ တစ်အိတ်လျှင် ၁၄၀၀၀၀ ကျပ်၊ ဘိုကိတ်ပဲတစ်အိတ်လျှင် ၁၄၅၀၀၀ - ၁၅၅၀၀၀ ကျပ်၊ ပဲဇီးကွက်တစ်အိတ်လျှင် ၁၄၅၀၀၀ ကျပ် ပေါက်ဈေးရှိကြောင်းသိရှိရပါသည်။

(Source: Current Content / times of  India)

ကော်ဖီရာသီတွင် တန်ချိန် ၄၅၀ မှ ၅၀၀ ကြား တင်ပို့သွားမည်

          ယခုနှစ်ကော်ဖီရာသီတွင် ပြည်ပနိုင်ငံများသို့ ကော်ဖီ တန်ချိန် ၄၅၀ မှ ၅၀၀ ကြားတင်ပို့ရောင်း ချ သွားမည်ဟု ပြင်ဉီးလွင်မြို့နယ် ကော်ဖီသုတေသနနှင့်နည်းပညာပြန့်ပွားရေးဗဟိုဌာနမှဖော်ပြထား ကြောင်း၊ လက်ရှိအချိန်တွင် ကော်ဖီများစတင်ထွက်ရှိနေပြီး အရည်အသွေးကောင်းကော်ဖီများမှာ ဒီဇင်ဘာလမှမတ်လအတွင်းထွက်ရှိရာ ယခုနှစ်ထွက်ရှိလာမည့်ကော်ဖီများကို အမေရိကန်၊နယ်သာလန်၊ ထိုင်းနှင့်တရုတ်နိုင်ငံများသို့ တန်ချိန်၄၅၀ မှ၅၀၀ ကြား တင်ပို့ရောင်းချသွားမည်ဖြစ်သည်ဟု အဆိုပါ ဗဟိုဌာနမှတာဝန်ရှိသူကပြောကြားခဲ့ကြောင်း၊လက်ရှိအချိန်၌ ကော်ဖီအရည်အသွေး ကောင်းသဖြင့် အပြိုင်အဆိုင်ဝယ်ယူနေကြကြောင်း၊ ကော်ဖီအရည်အသွေးအမျိုးမျိုးရှိပြီး ပြည်တွင်းဈေးနှုန်းအနေ ဖြင့် မက်ထရစ်တစ်တန်လျှင်  ကျပ် သိန်း (၄၀ -၅၀)နှင့် ပြည်ပဈေးနှုန်းအနေဖြင့် ကျပ် သိန်း (၅၀) အထက်တွင်ရှိပြီး ၂၀၂၀ ခုနှစ်တွင် တန်ချိန် ၄၅၀ နှင့် ၅၀၀ ကြားတင်ပို့ခဲ့ကြောင်း၊ ယခုနှစ်ထွက်ရှိ သည့်ကော်ဖီများကို တင်ပို့ရခြင်းမရှိသေးဘဲ ယခုနှစ်တွင်လည်း ယခင်နှစ်ကပမာဏအတိုင်း တင်ပို့ သွားရန်စီစဉ်‌ဆောင်ရွက်နေရာ ကော်ဖီသီးနှံသည် ဈေးကွက်ခိုင်မာမှုရှိသည့်အပြင် ပြည်ပသို့လည်း တင်ပို့နေရသည့်အတွက် ယခုဆိုလျှင် ကော်ဖီကို ပြန်လည်စိုက်ပျိုးလာကြကြောင်း၊ အဆိုပါကော်ဖီ များကိုပြည်ပနိုင်ငံများသို့ နှစ်စဉ်တင်ပို့ရောင်းချလျှက်ရှိရာ ယခုနှစ်ကော်ဖီရာသီချိန်ပြီးပါက ဝယ်လက် များမှ လာရောက်ကာ ကော်ဖီအရည်အသွေးကို စစ်ဆေးစမ်းသပ်မြည့်စမ်းပြီးမှ ဝယ်ယူကြမည်ဖြစ် ကြောင်း၊ တရုတ်နိုင်ငံနှင့်ဘရာဇီးနိုင်ငံတို့တွင် မုန်တိုင်းဖြစ်ပွားခဲ့ခြင်းကြောင့် ကော်ဖီစိုက်ခင်းများ ပျက်စီးမှုဖြစ်ပွားခဲ့သဖြင့် မြန်မာ့ကော်ဖီဈေးနှုန်းမှာ သုံးနှစ်နီးပါးခန့်ကောင်းမွန်နိုင်မည်ဟု မျှော်မှန်း ထားကြောင်းသိရှိရပါသည်။

(Source:Current Content)

ပြောင်းတင်သွင်းမှုစံချိန်တင်များပြား

          တရုတ်နိုင်ငံ၌ ပြောင်း ဈေးနှုန်း တက်ခြင်းနှင့် ထုတ်လုပ်မှုကျဆင်းမှုများကြောင့် ၂၀၂၁ ခုနှစ် အတွင်း တရုတ်၏ ပြည်ပ ပြောင်းတင်သွင်းမှုသည် နှစ်ဆကျော်မြင့်တက်ခဲ့ကြောင်းနှင့် ကမ္ဘာ့ အကြီးဆုံး သီးနှံဈေးကွက်ဖြစ်သော တရုတ်နိုင်ငံသည် ၂၀၂၁ ခုနှစ်အတွင်း ပြောင်းတန်ချိန် ၂၈.၃၅ သန်း အထိတင်သွင်းခဲ့ပြီး ၂၀၂၀ ပြည့်နှစ်က တင်သွင်းမှုတန်ချိန်  ၁၁.၃ သန်းနှင့်နှိုင်းယှဉ်ပါက  ၂ ဆ ကျော်များပြားခဲ့ကြောင်း အကောက်ခွန်ဌာနကထုတ်ပြန်ထားကြောင်း၊ ထိုကဲ့သို့ပင်  ဂျုံတင်သွင်းမှု မှာလည်း ၂၀၂၀ ခုနှစ်၌ တန်ချိန် ၈.၃၈ သန်းသာရှိခဲ့ရာမှ ၂၀၂၁ ခုနှစ်တွင် တန်ချိန် ၉.၇၇သန်းတင်ပို့ နိုင်ခဲ့ကြောင်း၊ ပြောင်းနှင့်ဂျုံကဲ့သို့ပင် ဘာလီတင်သွင်းမှုလည်းမြင့်တက်ခဲ့ကြောင်း၊ တရုတ်နိုင်ငံ သည် ပြောင်းသိုလှောင်မှုကိုအရှိန်မြှင့်လာသကဲ့သို့ ရာသီဥတုဆိုးဝါးခဲ့ခြင်းကြောင့်လည်း ၂၀၂၁ ခုနှစ် ၌ပြောင်းထုတ်လုပ်မှုထိခိုက်လျော့နည်းပြီး ဈေးနှုန်းလည်းစံချိန်တင်မြင့်တက်ခဲ့ကြောင်း၊ ပြည်တွင်း ၌ လိုအပ်ချက်များလာ၍လည်း တရုတ်ဝယ်လက်များသည် ပြည်ပဈေးကွက်များဆီက  ပြောင်းနှင့် ဂျုံများကို တင်သွင်းခဲ့ခြင်းဖြစ်ကြောင်း၊ သို့သော်လည်း ၂၀၂၁ ခုနှစ်၊ ဒီဇင်ဘာလတွင် တရုတ်ပြည်တွင်း၌ ပြောင်းများထွက်ရှိလာပြီး ဈေးနှုန်းလည်းကျဆင်းလာခဲ့သဖြင့် ပြည်ပမှ တင်သွင်းမှု  ပြန်လည် နည်း ခဲ့ကြောင်းသိရှိရပါသည်။

(Source: Current Content)

တရုတ်နိုင်ငံ

ပဲပုပ်စိုက်ပျိုးရန် မျိုးစေ့ပိုင်းဆိုင်ရာ နည်းပညာပြင်ဆင်အသုံးပြုရန် စီစဉ်ထားခြင်း

          တရုတ်နိုင်ငံသည် မျိုးရိုးဗီဇပြုပြင်ထားသော Genetically Modified(GM) အတည်ပြုချက် ရရှိရန် အရှိန်မြှင့်တင်နိုင်မည့် ပဲပုပ်နှင့်အခြားသောဆီထွက်သီးနှံများအား ပြည်တွင်း၌ စိုက်ပျိုးထုတ် လုပ်မှုကိုမြှင့်တင်ရန် ကြိုးပမ်းအားထုတ်လျှက်ရှိပြီး ပဲပုပ်နှင့် အခြားသောဆီထွက်သီးနှံများ တိုးချဲ့ထုတ်လုပ်ခြင်းဖြင့် လာမည့်နှစ်အတွင်း တရုတ်နိုင်ငံ၌ နှံစားသီးနှံနှင့် ပြောင်းထွက်ကုန်များ ထုတ်လုပ်ပံ့ပိုးမှု တည်ငြိမ်ရန်မျှော်မှန်းထားကြောင်း၊ စိုက်ပျိုးရေးထွက်ကုန်များဖြစ်သည့် ပဲပုပ်၊ ပြောင်း၊ မုန်ညင်းစေ့နှင့် ဆီအုန်းဝယ်ယူမှုတွင် တရုတ်နိုင်ငံသည် ကမ္ဘာ့အများဆုံးဝယ်ယူသည့်နိုင်ငံဖြစ်ပြီး ပဲပုပ် ကုန်သွယ်မှုမှာ နိုင်ငံရေး၊ သံတမန်ရေးတို့နှင့်ဆက်စပ်လျက်ရှိကြောင်း၊ ပြည်ပနိုင်ငံများအပေါ် မှီခိုမှု လျှော့ချခြင်းဖြင့် ကုန်သွယ်မှုစေ့စပ်ညှိနှိုင်းရေးအား အထောက်အပံ့ဖြစ်စေကြောင်း၊ တရုတ်နိုင်ငံအနေဖြင့် မျိုးရိုးဗီဇပြုပြင်ထားသော GM သီးနှံများဆိုင်ရာ စည်းမျဉ်းစည်းကမ်းများ ပြင်ဆင်ရန် အဆိုပြု ထားခြင်းမှာ စားနပ်ရိက္ခာဖူလုံရေးအတွက် စိုးရိမ်မှုများမြင့်တက်လျက်ရှိချိန်တွင်  တရုတ်နိုင်ငံ၏ မျိုးစေ့ ထုတ်လုပ်ငန်းအား ပိုမိုအားကောင်းစေမည်ဖြစ်သည်ဟု South China Morning Post သတင်းစာ၌ ဖော်ပြထားရာ အဆိုပါသတင်း၌ ကမ္ဘာလုံးဆိုင်ရာကုန်သွယ်မှု ပြောင်းလဲရန်အတွက် ရာသီဥတုဒဏ် ကြံ့ကြံ့ခံနိုင်သည့်နှံစားသီးနှံများ ပံ့ပိုးဖြည့်ဆည်းမှုမြှင့်တင်နိုင်ရန် ပေကျင်းအနေဖြင့် ကြိုးပမ်းဆောင်ရွက်လျက်ရှိရာ တရုတ်နိုင်ငံအရှေ့မြောက်ပိုင်းဒေသတွင် ဆီထွက်သီးနှံများ စိုက်ပျိုးရန် မူဝါဒများ ပိုမို ပံ့ပိုးဆောင်ရွက်သွားမည်ဖြစ်ကြောင်း၊ တရုတ်နိုင်ငံသည်စားသုံးဆီတင်သွင်းမှုတွင် လိုအပ်ချက်၏ (၂၀%) တင်သွင်းလျှက်ရှိပြီး ကမ္ဘာ့ဒုတိယအများဆုံး တင်သွင်းနေသည့်နိုင်ငံဖြစ်ရာ ပြည်ပနိုင်ငံများမှ  ဆီအုန်းနှင့် ပဲပုပ်များတင်သွင်းရန် မှီခိုအားထားမှု မြင့်မားလျက်ရှိသော်လည်း ပြောင်းနှင့်ပဲပုပ်သီးနှံများအတွက် မျိုးရိုးဗီဇပြုပြင်ထားသောမျိုးစေ့များ စီးပွားဖြစ်ထုတ်လုပ်လာမှုမှာ ပုံမှန် လည်ပတ် လုပ်ကိုင်ဆောင်ရွက်လာကြောင်း ရေးသားဖော်ပြထားသည်ကို သိရှိရပါသည်။

(ရင်းမြစ်- ဟောင်ကောင်မြို့ စီးပွားရေးသံမှူး ပေးပို့သည့်သတင်း)

ဂျပန်နိုင်ငံ

၂၀၂၂ ခုနှစ်တွင် နိုင်ငံ့စီးပွားရေး ဖွံ့ဖြိုးတိုးတက်မှုအလားအလာများရှိကြောင်းမျှော်လင့်

          ဂျပန်စီးပွားရေးလုပ်ငန်းများ၏ ၈၄% ခန့်သည် ၂၀၂၂  ခုနှစ်တွင် ကိုဗစ်-၁၉ ကူးစက်မှုနှုန်း ကျဆင်းသွားပြီး တစ်ဉီးချင်းစားသုံးမှုနှုန်းများလည်း ပြန်လည်မြင့်တက်လာမည်ဖြစ်၍ နိုင်ငံ့စီးပွားရေး ဖွံ့ဖြိုးတိုးတက်မှုအလားအလာများရှိသည်ဟု မျှော့်လင့်နေကြသည်ကို ၂၀၂၂ ခုနှစ်၊ ဇန်နဝါရီလ (၂) ရက် နေ့တွင်ထုတ်ပြန်ခဲ့သော ကျိုဒိုသတင်းဌာနကဆောင်ရွက်သည့် စစ်တမ်းအဖြေများအရ သိရှိရကြောင်း၊ ကုမ္ပဏီပေါင်း(၁၀၆)ခု အပေါ် စစ်တမ်းကောက်ယူခဲ့ရာ၌ ကုမ္ပဏီ(၁၃)ခုကသာ ကူးစက်ရောဂါနှင့်ပတ်သက်၍  စိုးရိမ်မှုများရှိနေပြီး ဂျပန်နိုင်ငံ၏ စီးပွားရေးသည် ဆက်လက်ကျဆင်းမည့် အလားအလာရှိသည်ဟု ခန့်မှန်းထားပြီး ကုန်ကြမ်းပစ္စည်းဈေးနှုန်းများမြင့်တက်လာခြင်း၊ စားသုံးသူများ၏ သုံးစွဲနှုန်း လျော့ကျ နေဆဲဖြစ်သည်ဟုယူဆခြင်းနှင့် လက်ရှိ၌ အိုမီခရွန်ဗိုင်းရပ်စ်မျိုးကွဲသစ် ကူးစက်မှုများ ရှိနေဆဲဖြစ်ခြင်းတို့ကြောင့် နိုင်ငံ့စီးပွားရေးတိုးတက်လာမှုနှုန်း သိသာစွာမြင့်တက်လာနိုင်မည် မဟုတ်ဟုယူဆကြောင်း၊ ကုမ္ပဏီ(၈၄)ခုကမူ ၂၀၂၂ ခုနှစ်အတွင်း နိုင်ငံ့စီးပွားရေးမှာ အလယ်အလတ်နှုန်းထားဖြင့် တိုးတက်လာမည်ဟုမျှော်လင့်ထားပြီး ကုမ္ပဏီ(၅)ခုက ထိုထက်ပို၍ စီးပွားရေးတိုးတက်လာနိုင်သည်ဟု မျှော်လင့်ကြောင်း၊ ဂျပန်နိုင်ငံမှ စားသုံးသူများသည် ကုန်ကြမ်းပစ္စည်းများ ဈေးတက်လာခြင်းနှင့် ဂျပန်ယန်းငွေ တန်ဖိုးကျဆင်းလာခြင်းတို့ကြောင့် နေ့စဉ်အသုံးစရိတ်များ ချွေတာလာကြသည်ကို တွေ့ရကြောင်း၊       ဝန်ကြီးချုပ်၏ အဓိကမူဝါဒရေးရာများနှင့်ပတ်သက်၍ ကျိုဒိုသတင်းဌာနမှ စစ်တမ်းကောက်ယူရာတွင်  ကုမ္ပဏီအားလုံး၏ ၅၄% မှာ ဒစ်ဂျစ်တယ်စနစ်သို့ အသွင်ကူးပြောင်းရေးကိုလက်ခံကြပြီး ၄၈% ကမူ ပြန်လည်ပြည့်ဖြိုးမြဲစွမ်းအင် အသုံးချမှုဆိုင်ရာမူဝါဒကို ထောက်ခံကြောင်း၊ ၂၀၅၀ ပြည့်နှစ်အရောက်တွင် ကာဗွန်ဓါတ်ငွေ့လျှော့ချရေးရည်မှန်းချက်ကို အောင်မြင်စွာဖော်ဆောင်နိုင်ရန် ဂျပန်အစိုးရအနေဖြင့် ပြန်လည်ပြည့်ဖြိုးမြဲစွမ်းအင်အသုံးချမှုကို ၂၀၁၉ ဘဏ္ဍာနှစ်အတွင်းက အသုံးချမှု ၁၈% ထက် နှစ်ဆ ပိုမိုကာ ၂၀၃၀ ဘဏ္ဍာနှစ်အတွင်း ၃၆%မှ ၃၈%သို့ရောက်ရှိရန် ကြိုးပမ်းနေကြောင်းသိရှိရပါသည်။

(ရင်းမြစ်- တိုကျိုမြို့ စီးပွားရေးသံမှူး ပေးပို့သည့်သတင်း)

ထိုင်းနိုင်ငံ

၂၀၂၂ ခုနှစ်တွင် စီးပွားရေးတိုးတက်မှု ၄.၂% ရရှိရန်မျှော်မှန်း

          အစိုးရအနေဖြင့် ၎င်း၏ ၂၀၂၃-၂၀၂၆ အလယ်အလတ် ဘဏ္ဍာရေးမူဝါဒမူဘောင်အရ စီးပွားရေးတိုးတက်မှုနှုန်းကို ၄.၂% အထိရရှိရန် မျှော်မှန်းထားပြီး ထိခိုက်ပျက်စီးလွယ်သော စီးပွားရေးကို အထောက်အကူဖြစ်စေရန်အတွက် ဘတ်ဂျတ်လိုငွေပြမှုကို ထိန်းထားနိုင်ရန် စီစဉ်လျက်ရှိရာ အစိုးရ၏ လက်ထောက်ပြောရေးဆိုခွင့်ရှိ၏အဆိုအရ အစိုးရအဖွဲ့မှ အတည်ပြုခဲ့သော စီးပွားရေးမူဘောင်အရ  စီးပွားရေးတိုးတက်မှုအနေဖြင့် ၂၀၂၃ ခုနှစ်တွင် ( ၃.၂%-၄.၂%)၊ ၂၀၂၄ ခုနှစ်တွင်  ( ၂.၉ %- ၃.၉ %)နှင့် ၂၀၂၅-၂၀၂၆ ခုနှစ်များတွင် (၂.၈%-၃.၈%) ရရှိရန်ဖြစ်ကြောင်း၊ ၂၀၂၃-၂၀၂၆ ခုနှစ်အတွက် အသားတင် ဝင်ငွေမှာ ထိုင်းဘတ်ငွေ (၂.၄၉)ထရီလီယံ၊ (၂.၅၆)ထရီလီယံ၊(၂.၆၄)ထရီလီယံ၊ (၂.၇၂) ထရီလီယံတို့ဖြင့် အသီးသီးရရှိရန် ခန့်မှန်းထားပြီး အသုံးစရိတ်ဘတ်ဂျတ်မှာ ဘတ်ငွေ(၃.၁၉)ထရီလီယံ၊ (၃.၂၇)ထရီလီယံ (၃.၃၆)ထရီလီယံနှင့် (၃.၄၆)ထရီလီယံတို့ဖြင့် အသီးသီးသုံးစွဲရန်ခန့်မှန်းထားကြောင်း၊ ၂၀၂၃-၂၀၂၆ မူဘောင်အရ ဘတ်ဂျတ်လိုငွေပြမှုသည် ထိုင်းဘတ်ငွေ (၆၉၅)ဘီလီယံ၊ (၇၁၀)ဘီလီယံ၊ (၇၂၃)ဘီလီယံ၊ (၇၃၆)ဘီလီယံတို့ဖြင့် အသီးသီးရရှိမည်ဟုခန့်မှန်းထားကြောင်း၊ အဆိုပါမူဘောင်သည် စီးပွားရေးနှင့် လိုက်လျောညီထွေရှိစေရန် အချိန်အခါ အလိုက်ပြင်ဆင်ရန်လိုအပ်ကြောင်း၊ ၂၀၂၂-၂၀၂၅ ခုနှစ်၊ စီးပွားရေးမူဘောင်အရ စီးပွားရေးတိုးတက်မှုမှာ  ၂၀၂၂ ခုနှစ်အတွက်  (၃-၄%)၊ ၂၀၂၃ ခုနှစ်အတွက် (၂.၇-၃.၇%)၊ ၂၀၂၄ ခုနှစ်အတွက် (၂.၉-၃.၉%)ရရှိရန်ဖြစ်ကြောင်းသိရှိရပါသည်။

(ရင်းမြစ်-ဗန်ကောက်မြို့စီးပွားရေးသံမှူးပေးပို့သည့်သတင်း)

         ဘရာဇီးလ် နိုင်ငံ၏ပဲပုပ်ထုတ်လုပ်မှုမှာ ယခင်နှစ်တွင် တန်ချိန် ၁၄၅.၁၁သန်းထိ ထုတ်လုပ်နိုင်ခဲ့ပြီး ယခုနှစ်တွင် တန်ချိန်၁၃၄ သန်းသာ ထုတ်လုပ်နိုင်သည့်အတွက် ယခင်နှစ်ကထက် ၁၁ တန်လျော့ကျခဲ့ရာ ပဲပုပ်အဓိက စိုက်ပျိုးသည့် ဒေသများတွင် မိုးခေါင်ခြင်းမှာ အဓိကအချက်ဖြစ်ကြောင်း ပုဂ္ဂလိကခန့်မှန်းသူများမှ သုံးသပ် ခန့်မှန်းထားကြကြောင်း၊ အမေရိကန်စိုက်ပျိုးရေးဦးစီးဌာန၏ အချက်အလက်များအရ ဘရာဇီးလ်နိုင်ငံ၏ ထုတ်လုပ်မှုမှာ  တန်ချိန် ၁၄၄ သန်း ခန့်မှန်းထားသော်လည်း ပိုမိုလျော့ကျနိုင်ကြောင်း၊ ပဲပုပ်သီးနှံများမှာ စိုက်ပျိုးပြီးစီးသော်လည်း မိုးမရွာသွန်းမှုကြောင့် ၂၀၂၁ခုနှစ်၊ ဒီဇင်ဘာလ ၁၉ ရက်နေ့မှ ၂၅ ရက်နေ့အတွင်း မတ်ဆိုပိုလို၊ စာအိုပိုလိုနှင့် ဥရုဂွေးဒေသများတွင် ရေ ၅ မီလီမီတာထိ လျော့ကျခဲ့ကြောင်း၊  မတ်ဆိုပိုလိုဒေသ၏ ပဲပုပ်သီးနှံ ထုတ်လုပ်မှုအနေဖြင့် ၈ ရာခိုင်နှုန်းဖြစ်ပြီး၊ ပါရန်ဒါနှင့် ရီကာဇန်ဒိုဒေသများအပါအဝင် အခြားဒေသများ၌ ၁၈ ရာခိုင်နှုန်းအထိ ပဲပုပ်များ ထုတ်လုပ်ကြောင်း သိရှိရပါသည်။

          သို့ရာတွင် ဘရာဇီးလ် နိုင်ငံ တောင်ဘက်ပိုင်းတွင် မိုးခေါင်မှု ဖြစ်ပေါ်ခဲ့သော်လည်း မြောက်ဘက်ပိုင်းတွင် ပဲပုပ်သီးနှံအဓိကစိုက်ပျိုးသည့် ဒေသများ၌ မိုးရွာသွန်းခဲ့သည်ဟု USDA၏ အစီရင်ခံစာတွင် ဖော်ပြထားကြောင်း၊ မတ်တိုဂရိုဆို ဒေသသည် ဘရာဇီးလ် နိုင်ငံ၏ အဓိက ပဲပုပ်စိုက်ပျိုးသည့်ဒေသဖြစ်ပြီး တစ်နိုင်ငံလုံး အတိုင်းအတာ၏ ၂၅ ရာခိုင်နှုန်းထိရှိကြောင်း၊ ဘရာဇီးလ်နိုင်ငံသည် ရိတ်သိမ်းမှုမှာ ဖေဖော်ဝါရီလမှစ၍ မေလတွင် ပြီးစီးမည်ဖြစ်ပါကြောင်း၊ ပဲပုပ်ထုတ်လုပ်မှု လျော့နည်းလာခြင်းနှင့်အတူ ပဲဆီတင်ပို့မှုမှာလည်း ၀.၁၉ ရာခိုင်နှုန်း ထိ လျော့ကျခဲ့ကြောင်း သိရှိရပါသည်။

          အာဂျင်တီးနားနိုင်ငံတွင် ဒီဇင်ဘာလ ၁၉ ရက်နေ့မှ ၂၅ ရက်နေ့အတွင်း မမျှော်မှန်းထားသော မိုးရွာသွန်းမှုများကြောင့် ပဲပုပ်အစိုဓါတ် ပါဝင်မှုကို လျော့နည်းရန်အတွက် ဆောင်ရွက်လျက်ရှိကြောင်းသိရှိရပါသည်။ အာဂျင်တီးနားနိုင်ငံ၏ ပဲပုပ် စိုက်ပျိုးရန်မျှော်မှန်းသည့် ဧရိယာမှာ တန်ချိန် ၄၉.၅၀ သန်းဖြစ်ပါကြောင်း၊ CBOT websites တွင် ဖော်ပြထားသည့် ဈေးနှုန်းများအရ US$ 358.60 မှ US$ 411.30 ထိ  မြင့်တက်ခဲ့ရာ 14.76ရာခိုင်နှုန်း ထိ တိုးတက်ခဲ့ကြောင်း သိရှိရပါသည်။        

ရင်းမြစ် - Palm oil analytics

ဘရာဇီးလ်နိုင်ငံ
စတော့ဈေးကွက်များတွင် သကြားဈေးနှုန်း အတက်အကျများ ဖြစ်ပေါ်လျှက်ရှိခြင်း
၂၃-၁၂-၂၀၂၁ရက်နေ့တွင် လန်ဒန်စတော့ဈေးကွက်၌ သကြားကြိုပွိုင့်ဈေးနှုန်းများ(၀.၄၆%) ကျဆင်းခဲ့ကာ သကြားဖြူ (၁) တန်လျှင် အမေရိကန်ဒေါ်လာ(၅၀၀.၆၀)ဖြင့် ရောင်းဝယ်လျှက်ရှိ ကြောင်း၊ နယူးယောက်ဈေးကွက်တွင် (၀.၅၇%)ကျဆင်းခဲ့ပြီး သကြား ၁ ပေါင်လျှင် (၁၉.၁၅)ဆင့် ဖြင့် ရောင်းဝယ်ခဲ့ကြကြောင်း၊ လတ်တလောအချိန်တွင်ဖြစ်ပေါ်နေသည့် အမေရိကန်ဒေါ်လာငွေ တန်ဖိုး မတည်ငြိမ်မှုသည် သကြားဈေးကွက်အပေါ် သက်ရောက်မှုများ ဖြစ်ပေါ်လျှက်ရှိရာ ၂၂-၁၂-၂၀၂၁ ရက်နေ့၌လည်း နယူးယောက်စတော့ဈေးကွက်တွင် (၂.၇၇%) ဈေးနှုန်းမြင့်တက် ခဲ့ပြီး သကြား ၁ ပေါင်လျှင် (၁၉.၂၆)ဆင့်မှ (၁၉.၃၈)ဆင့်ထိ ဈေးနှုန်းများဖြစ်ပေါ်ခဲ့ကြောင်း၊ လန်ဒန် (၂.၁၉%) ဈေးနှုန်းမြင့်တက်ခဲ့ကာ သကြားဖြူ (၁)တန်လျှင် အမေရိကန်ဒေါ်လာ (၅၀၂.၉၀)ဖြင့် အရောင်းအဝယ်ဖြစ်ခဲ့ကြောင်း၊ ကမ္ဘာ့လောင်စာဆီဈေးနှုန်းနှင့် အမေရိကန်ဒေါ်လာတန်ဖိုးတို့၏ ဈေးနှုန်းအတက်အကျများသည် အချိန်နှင့်အမျှ ဖြစ်ပေါ်လျှက်ရှိရာ စတော့ဈေးကွက်ရှိ ဈေးနှုန်းများ မှာလည်းအတက်အကျများလျင်မြန်စွာဖြစ်ပေါ်လျှက်ရှိကြောင်း၊လက်ရှိကာလတွင်ဖြစ်ပေါ်နေသောလောင်စာဆီဈေးနှုန်းမြင့်တက်မှုနှင့် အမေရိကန်ဒေါ်လာတန်ဖိုးကျဆင်းမှုသည် သကြားဈေးနှုန်း များအား ပိုမိုမြင့်တက်စေခဲ့ကြောင်း၊ဒေါ်လာငွေကျဆင်းမှုနှင့်အတူ ပြည်ပပို့ကုန်တင်ပို့မှုလည်း ကျ ဆင်းခဲ့မှုကြောင့် ကမ္ဘာ့ဈေးကွက်တွင် ထုတ်ကုန်ပစ္စည်းတန်ဖိုးများ ဈေးနှုန်း ပိုမိုမြင့်တက်ခဲ့ကြောင်း၊ လောင်စာဆီဈေးနှုန်းသည် စက်ရုံများလည်ပတ်နိုင်မှုအတွက် အဓိကအရေးပါသည့်အပြင် ကိုဗစ်-၁၉ ရောဂါပိုးအသစ်ဖြစ်သည့် အိုမီခရွန်တွေ့ရှိမှုများကလည်း ကမ္ဘာ့ထုတ်လုပ်မှုအပေါ် ပိုမိုထိခိုက် စေလျှက်ရှိကြောင်း၊ ထုတ်လုပ်မှုကျဆင်းခြင်းနှင့်အတူ သကြားဈေးနှုန်းများ ပိုမိုမြင့်တက်ခဲ့ကြောင်း သိရှိရပါသည်။
(ရင်းမြစ်- Brasilia စီးပွားရေးသံမှူးပေးပို့သည့်သတင်း)
ဩစတြေးလျနိုင်ငံ
နိုင်ငံဖြတ်ကျော်ကုန်သွယ်မှုကို ပိုမိုလွယ်ကူစေရန် အစိုးရက ဆောင်ရွက်လျှက်ရှိခြင်း
ဩစတြေးလျအစိုးရသည်စီးပွားရေးလုပ်ငန်းများအတွက် ပို့ကုန်များတင်ပို့ခြင်းနှင့် သွင်းကုန် များတင်သွင်းရာ၌ လွယ်ကူပြီး ဈေးနှုန်းသက်သာစေရေးအတွက် လုပ်ထုံးလုပ်နည်းများကို လွယ်ကူ ရိုးရှင်းစေခြင်း၊ နှစ်ထပ်ဖြစ်မှုများကို လျှော့ချခြင်း၊ ကုန်စည်ရှင်းလင်းမှုအတွက် One-stop Digital System ကို ဖန်တီ‌ပေးခြင်းတို့ဖြင့် ဩစတြေးလျကုန်သွယ်မှုစနစ်ကို ပြန်လည်ပြင်ဆင်ရန် ဆောင် ရွက်ပေးလျှက်ရှိရာ (၄)နှစ်အတွင်း နောက်ထပ် ဩစတြေးလျဒေါ်လာ ၁၃၇.၇ သန်းကို ၂၀၂၁ ခုနှစ်၊ ဒီဇင်ဘာလလယ်တွင် ကတိကဝတ်ပြုလိုက်သည်ဟု ကုန်သွယ်ရေးဝန်ကြီး၊ ပြည်ထဲ‌ရေးဝန်ကြီး၊ ဝန်ကြီးချုပ်နှင့်အစိုးရအဖွဲ့ရုံးမှဝန်ကြီးတို့က ပူးတွဲသတင်းထုတ်ပြန်ထားကြောင်း၊ ကုန်သွယ်ရေး၊ခရီး သွားလုပ်ငန်းနှင့် ရင်းနှှီးမြှုပ်နှံမှုဝန်ကြီးဌာန ဝန်ကြီးက အဆိုပါဆောင်ရွက်ချက်များသည် စီးပွားရေး ခံနိုင်ရည်ကို အားကောင်းစေခြင်းနှင့် ဩစတြေးလျ၏ ကိုဗစ်-၁၉ မှ စီးပွာ‌ရေးပြန်လည်အားကောင်း လာစေခြင်းတို့ဖြင့် ကုန်သွယ်မှုကိုချောမွေ့စေမည်ဖြစ်ကြောင်း၊ စီးပွားရေးလုပ်ငန်းများအတွက် ကုန် သွယ်မှုစနစ် တိုးတက်ကောင်းမွန်လာစေရန် အစိုးရသည် မက်ခရိုစီးပွားရေးတွင် ရင်းနှီးမြှုပ်နှံလျှက် ရှိကြောင်း၊အဆိုပါအစီအမံများသည် နိုင်ငံတကာကုန်သွယ်မှုတွင်ကြုံတွေ့ရလျှက်ရှိသော စီးပွားရေး လုပ်ငန်းအများအပြားအတွက်ရည်ရွယ်သည်ဟုပြောကြားခဲ့ကြောင်း၊ ဩစတြေးလျ စိုက်ပျိုးမွေးမြူ ရေးဝန်ကြီးဌာနနှင့် ဩစတြေးလျမြောက်ပိုင်းဝန်ကြီးက ကုန်စည်ခြေရာခံနိုင်မှု စံချိန်စံညွှန်းများနှင့် ဒေတာများကို ဟန်ချက်ညီစေရန်၊ ဈေးကွက်လိုအပ်ချက်များကို ဖြည့်ဆည်း‌ပေးနိုင်ရန် ပို့ကုန် လုပ် ငန်းရှင်များ၏စွမ်းရည်ကို အကောင်းဆုံးအသုံးချနိုင်ခြင်းနှင့် ၎င်းတို့၏အရည်အသွေးမြင့်ထုတ်ကုန် များအတွက် ဈေးနှုန်းကောင်းများရရှိစေခြင်း စသည်တို့တွင် ရင်းနှီးမြှုပ်နှံမှုများ ပြုလုပ်ခြင်းဖြင့် ဩစတြေးလျစိုက်ပျိုးမွေးမြူရေးထုတ်လုပ်သူများနှင့် တင်ပို့သူများအတွက် နှစ်ဖက်အနိုင်ရရှိသည့် Win-Win အခြေအနေဖြစ်ကြောင်း၊ပြည်ထဲ‌ရေးဝန်ကြီးက ဩစတြေးလျနိုင်ငံသားများသည် နယ်စပ် လုံခြုံရေးနှင့် ကုန်သွယ်မှုလွယ်ကူချောမွေ့စေရေးအကြား မှန်ကန်သောမျှတမှုရှိရန် အစိုးရကို ယုံ ကြည်နိုင်ပါကြောင်း၊နိုင်ငံတကာကုန်သွယ်မှုစနစ်မှ စက္ကူစာရွက်စာတမ်းများကိုဖယ်ရှား၍ ကမ္ဘာကို ဉီး‌ဆောင်ရန် Digital နည်းပညာအသစ်များကို အသုံးပြုခြင်းကြောင့် ကုန်သွယ်မှုကို ပိုမို မြန်ဆန်ထိ ရောက်ပြီး ပိုမိုလုံခြုံစေသည်ဟုပြောကြားခဲ့‌ကြောင်း၊ အဆိုပါအစီအမံများသည် စိုက်ပျိုးမွေးမြူရေး ပို့ကုန်နှင့် သွင်းကုန်စနစ်များနှင့် လုပ်ငန်းစဉ်များခေတ်မီစေရန် အစိုးရ၏ ဆက်လက်ရင်းနှီးမြှုပ်နှံမှု ကို ပံ့ပိုးပေးပြီး ၂၀၃၀ ပြည့်နှစ်တွင် စိုက်ပျိုးမွေးမြူရေးလုပ်ငန်းကဏ္ဍမှ ဝင်ငွေ ဩစတြေးလျဒေါ်လာ ၁၀၀ ဘီလီယံရရှိရေးအတွက် အထောက်အပံ့ပြုပေးမည့် ကတိကဝတ်များနှင့် Commonwealth Biosecurity 2030 အစီအစဉ်များကို ဖြည့်ဆည်းပေးနိုင်မည်ဖြစ်ကြောင်းသိရှိရပါသည်။
(ရင်းမြစ်- ကင်ဘာရာမြို့စီးပွားရေးသံမှူးပေးပို့သည့်သတင်း)

တရုတ်နိုင်ငံ

ကောက်ပဲသီးနှံထုတ်လုပ်မှုတိုးတက်လာစေရေးစီမံကိန်းများချမှတ်ဆောင်ရွက်လျှက်ရှိ

          တရုတ်နိုင်ငံသည် အရည်အသွေးမြင့်မားသည့် ကောက်ပဲသီးနှံများ ထုတ်လုပ်ထွက်ရှိမှု တိုးတက် လာစေမည့်စီမံကိန်း(၆)ခု ချမှတ်ဆောင်ရွက်ခဲ့ကြောင်း၊အစားအသောက် လုံခြုံစိတ်ချရမှု စဉ်ဆက်မပြတ် စေရန်၊၂၀၂၅ ခုနှစ်သို့အရောက်တွင် ကောက်ပဲသီးနှံ အရည်အသွေးနှင့်လတ်ဆတ်မှုကို ထိန်းသိမ်းထား နိုင်ရန်၊ အပူချိန် ထိန်းညှိသိုလှောင်ထားနိုင်ရန်၊ ဓါတုပစ္စည်းအသုံးချမှုလျှော့ချရန်၊ အစားအသောက် ထိန်း သိမ်းရာတွင် လိုက်လျောညီထွေရှိမှုမည့် ပတ်ဝန်းကျင်‌ကောင်းဖန်တီးနိုင်ရန် ရည်ရွယ်လုပ်ဆောင်လျှက် ရှိကြောင်း၊ တရုတ်နိုင်ငံသည် ၂၀၁၇ ခုနှစ်မှစတင်၍ အစားအသောက်အရည်အသွေး မြင့်မားစေမည့် စီမံကိန်းများ ချမှတ်လုပ်ဆောင်လျှက်ရှိရာ ဗဟိုအစိုးရမှ အဆိုပါစီမံကိန်းများအတွက် အမေရိကန် ဒေါ်လာ(၃.၃)ဘီလီယံ ခွဲဝေချထားပေးခဲ့ကြောင်း၊ လက်တွေ့အကောင်အထည်ဖော်နိုင်ရန် ပြည်တွင်း ပုဂ္ဂလိကရင်းနှီးမြှုပ်နှံမှုပမာဏ တရုတ်ယွမ်ငွေ (၆၀)ဘီလီယံအထိ ခွင့်ပြုပေးခဲ့ပြီးဖြစ်သည်ဟု တရုတ် အမျိုးသားအစားအသောက်နှင့်မဟာဗျူဟာအရန်ထားရှိရေးဆိုင်ရာစီမံခန့်ခွဲမှုအဖွဲ့မှပြောကြားခဲ့ကြောင်းသိရှိရပါသည်။

ပြည်ပကုန်သွယ်မှု တည်ငြိမ်စေရန် ကြိုးပမ်းလုပ်ဆောင်သွားမည်ဖြစ်

          တရုတ်နိုင်ငံသည်  ကမ္ဘာပေါ်ရှိနိုင်ငံနှင့်ဒေသစုစုပေါင်း(၂၃၀)နှင့်ကုန်သွယ်မှုဆောင်ရွက်လျှက်ရှိ ကြောင်း၊ တရုတ်နိုင်ငံမှ ပြည်ပနိုင်ငံများသို့ တင်ပို့မှုသည် ကမ္ဘာ့စုစုပေါင်းတင်ပို့မှု၏ ၁၄.၆% ၊ တင်သွင်းမှု သည် ကမ္ဘာ့စုစုပေါင်းတင်သွင်းမှု၏ ၁၂% အသီးသီးပါဝင်လျှက်ရှိရာကြောင်း၊သို့ရာ၌ ကိုဗစ် ၁၉ ကမ္ဘာ့ ကပ်ရောဂါ ဆက်လက်ဖြစ်ပွားလျှက်ရှိခြင်း၊ ကမ္ဘာ့နိုင်ငံများစုအနေဖြင့် မိမိတို့၏ ကိုယ်ကျိုးစီးပွား ကာကွယ်ခြင်း၊ငွေ ဖောင်းပွမှု မြင့်တက်ခြင်း၊ နိုင်ငံတကာစက်မှုလုပ်ငန်းများနှင့် ရောင်းလိုအားတို့အကြား  ချိတ်ဆက်ကူးပြောင်းသည့်ပုံစံ၊ပြောင်းလဲသည့်အရှိန်မြင့်တက်လာခြင်းကြောင့် ပြည်ပနိုင်ငံများနှင့် ကုန် သွယ်မှုဆောင်ရွက်နေသည့် တရုတ်လုပ်ငန်းများအနေဖြင့် အခက်အခဲများစွာကြုံတွေ့နေရကြောင်း၊ ထို့ကြောင့် တရုတ်နိုင်ငံသည် ပြည်ပနိုင်ငံများနှင့်ကုန်သွယ်မှုဆောင်ရွက်နေသည့် တရုတ်လုပ်ငန်းရှင်များ အနေဖြင့် လက်တွေ့ကုန်သွယ်မှုပြုရာတွင် တွေ့ကြုံနေရသည့်အခက်အခဲများအား ကျော်လွှားနိုင်စေရန် အတွက်  ပြည်ပကုန်သွယ်မှု တည်ငြိမ်စေမည့် မူဝါဒပိုင်းဆိုင်ရာစီမံဆောင်ရွက်မှုများအား အချိန်အခါ အလိုက် ထိန်းညှိပေးခြင်း၊ မူဝါဒအသစ်များ ချမှတ်ခြင်းတို့ကို အကောင်အထည်ဖော် ဆောင်ရွက်သွား မည်ဟု တရုတ်နိုင်ငံ ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးက သတင်းစာရှင်းလင်းပွဲတွင် ပြောကြားခဲ့ကြောင်းသိရှိရပါသည်။

(ရင်းမြစ်-ပေကျင်းမြို့ စီးပွားရေးသံမှူးပေးပို့သည့်သတင်း)

အိန္ဒိယနိုင်ငံ

ဆန်ဝယ်ယူမှုအမှာစာများအားလက်ခံရရှိခြင်း

          အိန္ဒိယနိုင်ငံရှိဆန်တင်ပို့သူလုပ်ငန်းရှင်များအနေဖြင့်လက်တင်အမေရိကဈေးကွက်သို့ဘာစမာတီ ဆန်များကို ပထမဉီးဆုံးအကြိမ်အဖြစ် ယခုနှစ်ဒီဇင်ဘာလ မှစတင်၍ တင်ပို့နိုင်တော့မည်ဖြစ်ကြောင်း၊ အိန္ဒိယဆန်တင်ပို့သူလုပ်ငန်းရှင်များအသင်းမှ အမှုဆောင်ဒါရိုက်တာက လက်တင်အမေရိကဒေသရှိ နိုင်ငံများသည် ဆန်ကို ယခင်က အမေရိကန်နိုင်ငံမှသာ ဝယ်ယူတင်သွင်းခဲ့သော်လည်း ယခုအခါ အိန္ဒိယနိုင်ငံသို့ ဉီးလှည့်၍ အမှာစာများပေးပို့လာသည်ဟု ပြောဆိုခဲ့ကြောင်း၊ ယခုကဲ့သို့ ဈေးကွက်အသစ်ရရှိလာမှုသည်  ငွေပေးချေမှုဆိုင်ရာ အခက်အခဲပြဿနာများကြောင့် အဓိကဆန်တင်ပို့ရာ အီရန်နိုင်ငံ၌ ဈေးကွက် ပျောက်ဆုံးမှုနှင့်ရင်ဆိုင်နေရသော အိန္ဒိယကုန်သည်များအတွက်  သက်သာမှုရရှိစေမည်ဖြစ်ကြောင်း၊ နှစ်ကာလများစွာကပင် ဘာစမာတီဆန်များအား တင်ပို့လျှက်ရှိခဲ့သော်လည်း အမေရိကန်နိုင်ငံ၏ အီရန်နိုင်ငံအပေါ် စီးပွားရေးအရအရေးယူမှုက ငွေပေးချေမှုစနစ်ကို ပျက်ယွင်းမှုဖြစ်ပေါ်စေပြီး အိန္ဒိယကုန်သည်များအနေဖြင့် အီရန်ရှိ ၎င်းတို့ကုန်သွယ်ဘက်များထံမှ ကုန်ဖိုးငွေရရှိရန် ကြန့်ကြာမှုများ ကြုံတွေ့ရလျှက်ရှိကြောင်း၊ အီရန်နိုင်ငံနှင့်ကုန်သွယ်ရာတွင် အိန္ဒိယရှိ ရေနံချက်လုပ်သည့် ကုမ္ပဏီများသည် ရေနံစိမ်းများ ဝယ်ယူတင်သွင်းမှုအတွက် ကုန်ဖိုးငွေများကို UCO Bank ၌ ဖွင့်လှစ်ထားသည့် အီရန်နိုင်ငံ၏ ရူပီးငွေ စာရင်းသို့ ပေးသွင်းထားရှိပြီး အိန္ဒိယ၏ ပို့ကုန်များအတွက် ၎င်းငွေစာရင်းမှ ပြန်လည်ခုနှိမ်ပေးချေခြင်းဖြစ်ကြောင်း၊ သို့ရာတွင် အီရန်နိုင်ငံအပေါ် အရေးယူကန့်သတ်မှုအား အမေရိကန်နိုင်ငံက ဖြေလျှော့ပေးထားသည့်ကာလကုန်ဆုံးချိန် ၂၀၁၉ ခုနှစ်၊ မေလ မှစတင်၍ အီရန်နိုင်ငံထံမှ ရေနံများအား ရူပီးငွေဖြင့် ဝယ်ယူခြင်းကို အိန္ဒိယအစိုးရက ရပ်ဆိုင်းခဲ့သည့်နောက်ပိုင်း အိန္ဒိယဘဏ်များ၌ အပ်နှံထားသည့် အီရန်နိုင်ငံ၏ အရန်ရူပီးငွေ လက်ကျန်ပမာဏမှာ လျော့ပါးလာခဲ့ရာ ယခင်က ပြည်တွင်း၌ ဆန်စပါး ရိတ်သိမ်း ထွက်ပေါ်ချိန်တွင် ပြည်ပမှတင်သွင်းမှုကို တားမြစ်လေ့ရှိသည့် ရာသီအလိုက်ကန့်သတ်ချက်အား အီရန် အစိုးရက ပယ်ဖျက်ပေးခဲ့ကြောင်း၊ အိန္ဒိယကုန်သည်များသည် အီရန်နိုင်ငံနှင့်ကုန်သွယ်ရာ၌ ငွေပေးချေမှု အကျပ်အတည်းအား ကျော်လွှားနိုင်မည့်အခြေအနေကို စောင့်ဆိုင်းလျှက်ရှိကြောင်း၊ အိန္ဒိယနိုင်ငံ၌ ယခု နှစ်မိုးနှောင်းကာလ မိုးသည်းထန်မှုများကြောင့် စိုက်ပျိုးထားဆဲ စပါးခင်းများ ထိခိုက်မှုဖြစ်ပေါ်ခဲ့ရာ အရည်အသွေးမြင့် ဘာစမာတီဆန် ထွက်ရှိမှုမှာ ယခင်နှစ်ထုတ်လုပ်မှုနှင့်နှိုင်းယှဉ်ပါက ၁၅ % မှ ၂၀% ထိ ကျဆင်းဖွယ်ရှိပြီး ဈေးနှုန်းများသည်လည်း ၂၀% မှ ၄၀% အထိမြင့်တက်လာခဲ့ကြောင်းသိရှိရပါသည်။

(ရင်းမြစ်-နယူးဒေလီမြို့ စီးပွားရေးသံမှူးပေးပို့သည့်သတင်း)

ဩစတြေးလျနိုင်ငံ

ပို့ကုန်တင်ပို့သူများကို အသိအမှတ်ပြုဆု ချီးမြှင့်ခြင်း

          ကုန်သွယ်ရေး၊ ခရီးသွားလုပ်ငန်းနှင့် ရင်းနှီးမြှုပ်နှံမှုဝန်ကြီးဌာန၊ ဝန်ကြီးသည် အလုပ်အကိုင်များ၊ စီးပွားရေးနှင့်ဒေသခံလူထုများကိုကူညီပံ့ပိုးပေးသည့်အတွက်ဩစတြေးလျပို့ကုန်တင်ပို့သူဆု(Australian  Export Awards )တွင် ပါဝင်သည့် စီးပွားရေးလုပ်ငန်းအားလုံးကို ချီးကျူးဂုဏ်ပြုခဲ့သည်ဟု ဝန်ကြီးဌာန သတင်းထုတ်ပြန်ချက်အရ သိရှိရကြောင်း၊ မြောက်ပိုင်းနယ်မြေစီးပွားရေးလုပ်ငန်း Monsoon Aquatics သည်   နိုဝင်ဘာလကုန်ပိုင်း၌ပြုလုပ်သည့် ၅၉ ကြိမ်မြောက် ဩစတြေးလျပို့ကုန်တင်ပို့သူဆုတွင် ယခုနှစ် အတွက် ပို့ကုန်တင်ပို့သူအဖြစ် ရွေးချယ်ခံခဲ့ရကြောင်း၊ အဆိုပါ Monsoon Aquatics သည် ပညာရေး သုတေသန၊ လူငယ်အလုပ်အကိုင်နှင့် Great Barrier Reef ၏ ကျန်းမာရေးကိုထိန်းသိမ်းခြင်း အပါအဝင် လူမှုရေးနှင့်ဘဘာဝပတ်ဝန်းကျင်ဆိုင်ရာ အစပျိုးလုပ်ဆောင်မှုများတွင် ပါဝင်ကူညီခြင်းဖြင့် ဒေသတွင်း အလုပ်အကိုင်များနှင့် စီးပွားရေးလုပ်ငန်းများကို ပံ့ပိုးပေးလျှက်ရှိကြောင်း၊ ဩစတြေးလျအစိုးရသည်  နိုင်ငံတွင်းမှ စွန့်ဉီးတီထွင်သူများနှင့် စီးပွားရေးလုပ်ငန်းများကို နိုင်ငံတကာကုန်သွယ်မှုနှင့် ထိတွေ့စေပြီး အောင်မြင်မှုရရှိရန် ဆန်းသစ်တီထွင်ပြီးလိုက်လျောညီထွေဖြစ်အောင် ပံ့ပိုးကူညီပေးနေသည်ဟု ပြောကြားထားကြောင်း၊ နိုင်ငံအဆင့်ပေးအပ်သော ဆုအမျိုးအစား(၁၃)မျိုးမှာ အဆင့်မြင့်နည်းပညာ၊ လယ်ယာစီးပွား၊ အစားအသောက်နှင့်အဖျော်ယမကာ၊ တီထွင်ဖန်တီးမှုလုပ်ငန်းများ၊ E-commerce၊ ပေါ်ထွန်းစ ပို့ကုန် တင်ပို့သူ၊ နိုင်ငံတကာပညာရေးနှင့်လေ့ကျင့်ရေး၊ နိုင်ငံတကာကျန်းမာရေး၊ ထုတ်လုပ်မှုနှင့် အဆင့်မြင့်ကုန်ကြမ်းများ၊ ဓါတ်သတ္ထု၊ စွမ်းအင်နှင့်ဆက်စပ်ဝန်ဆောင်မှုများ၊ ကျွမ်းကျင်ပညာရှင်ဝန်ဆောင်မှု၊ ဒေသတွင်း ပို့ကုန်တင်ပို့သူ၊ လုပ်ငန်းငယ်နှင့် ရေရှည်တည်တံ့မှုတို့ဖြစ်ကြောင်း၊ နှစ်စဉ် ဩစတြေးလျ ပို့ကုန်တင်ပို့သူဆုများကို ဩစတြေးလျ ကုန်သွယ်မှုနှင့် ရင်းနှီးမြှုပ်နှံမှုကော်မရှင်(Austrade)နှင့် Australian  Chamber of Commerce and Industry(ACCI)မှ ပြည်နယ်များနှင့်နယ်မြေများပူးပေါင်း၍ ပေးအပ်ခြင်းဖြစ်ကြောင်း သိရှိရပါသည်။

(ရင်းမြစ်-ကင်ဘာရာမြို့ စီးပွားရေးသံမှူးပေးပို့သည့်သတင်း)

တောင်အာဖရိကနိုင်ငံ

ဓါတ်မြေဩဇာဈေးနှုန်းများမြင့်တက်နေခြင်း

          တောင်အာဖရိကနိုင်ငံ၌ လွန်ခဲ့သော ၁၂ လအတွင်း ဓါတ်မြေဩဇာဈေးနှုန်းများ မြင့်တက်ခဲ့မှုကြောင့် စားသောက်ကုန်ဈေးနှုန်းများမြင့်တက်ခဲ့ရကြောင်း၊ ဓါတုဓါတ်မြေဩဇာမျိုးစုံ အမိုးနီးယား၊ ယူရီးယားနှင့် DAPအမျိုးအစား ဓါတ်မြေဩဇာတို့၏ ဈေးနှုန်းများသည် ၂၀၀%၊ ၁၄၅% နှင့် ၉၀% အသီးသီး မြင့်တက်ခဲ့သည့်အပြင်  ဓါတ်မြေဩဇာထုတ်လုပ်မှုတွင် အသုံးပြုသည့် သဘာဝဂတ်စ်ဈေးနှုန်းသည်လည်း ၁၈၀%အထိ မြင့်တက်ခဲ့ကြောင်း၊ ဓါတ်မြေဩဇာဝယ်လိုအားမြင့်တက်မှုနှင့် စိုက်ပျိုးရေးသွင်းအားစုများ ဈေးနှုန်းမြင့်တက်မှုသည် ဓါတ်မြေဩဇာဈေးနှုန်း မြင့်တက်ရသည့်အကြောင်းရင်းများဖြစ်သည့်အပြင် လယ်သမားများအနေဖြင့် ကုန်စည်ဈေးနှုန်းများမြင့်တက်မှုကြောင့် ဝင်ငွေပိုမိုရရှိသည့်အတွက် ဓါတ်မြေဩဇာပိုမိုဝယ်ယူ အသုံးပြုရန်တွန်းအားဖြစ်ခဲ့ကြောင်း၊ ကမ္ဘာ့စက်သုံးဆီဈေးနှုန်းမြင့်တက်လာမှုသည် ဓါတ်မြေဩဇာ ထုတ်လုပ်နေသော စက်ရုံများအား ထုတ်လုပ်မှုကုန်ကျစရိတ် ပိုမိုမြင့်တက်စေသဖြင့် ဓါတ်မြေဩဇာလျော့နည်း ထုတ်လုပ်ရန် (သို့) ထုတ်လုပ်မှုကိုရပ်တန့်ရန် အခြေအနေရှိကြောင်း၊  အမေရိကန်နိုင်ငံ၌ တိုက်ခတ်ခဲ့သော ဟာရီကိန်းလေမုန်တိုင်းကြောင့် Louisiana မြို့ရှိ ဓါတ်မြေဩဇာစက်ရုံများ ပိတ်ထားရခြင်း၊ ယူရီးယား ဓါတ်မြေဩဇာ၊ ဆာလရိတ်နှင့် ဖော့စဖိတ် အဓိကထုတ်လုပ်သော တရုတ်နိုင်ငံ၏ မကြာမီက ဓါတ်မြေဩဇာ တင်ပို့မှုအပေါ်  ပိုမိုတင်းကြပ်သည့် စစ်ဆေးမှုများပြုလုပ်ရန် မူဝါဒချမှတ်ခြင်း၊ မော်ရို့ကိုနှင့် ရုရှားနိုင်ငံအပေါ် ၎င်းတို့အစိုးရ၏ အထောက်အပံ့ဖြင့် ထုတ်လုပ်နေသော ဓါတ်မြေဩဇာအပေါ် တန်ပြန်အခွန် ကောက်ခံခြင်း နှင့် အီးယူက ဘယ်လာရုစ်နိုင်ငံမှ  ပိုတက်ရှ်များတင်သွင်းမှုအား တားမြစ်ခြင်းများသည်  ဓါတ်မြေဩဇာ ထုတ်လုပ်ဖြန့်ဖြူးခြင်း ဈေးကွက်အပေါ် များစွာထိခိုက်လျှက်ရှိကြောင်း၊ ဓါတ်မြေဩဇာဈေးနှုန်းများ မြင့်တက်နေခြင်းနှင့် ထုတ်လုပ်မှုအကျပ်အတည်းများကြောင့် ကမ္ဘာ့စားနပ်ရိက္ခာ ဖူလုံမှုသည် လာမည့်နှစ်တွင် အခက်အခဲဖြစ်နိုင်ကြောင်း၊ ပြောင်းထုတ်လုပ်နေသော ဘရာဇီးလ်နှင့် ဂျုံထုတ်လုပ်နေသော ပြင်သစ်ရှိ လယ်သမားများသည်လည်း လာမည့်နှစ်စိုက်ပျိုးရာသီတွင်  ဓါတ်မြေဩဇာ လုံလောက်စွာမရရှိနိုင်မည်ကို စိုးရိမ်နေကြောင်း၊ ဗီယက်နမ်နိုင်ငံ အပင်ထုတ်လုပ်ရေးဌာနက လယ်သမားများအား စပါးစိုက်ပျိုးမှုတွင်  ဓါတ်မြေဩဇာအသုံးပြုမှု  ထက်ဝက်လျှော့ချရန် တွန်းအားပေးနေမှုကြောင့် စပါးအထွက်နှုန်းလျော့နည်းကာ သီးနှံဈေးနှုန်း မြင့်တက်လာနိုင်ကြောင်း၊ လာမည့် ၆ လအတွင်း စက်သုံးဆီနှင့် သဘာဝဂတ်စ် ဈေးနှုန်းများ လျော့ကျမည့် အရိပ်အရောင်မရှိခြင်းတို့ကြောင့် ဓါတ်မြေဩဇာဈေးနှုန်းကျဆင်းရေးသည် ခန့်မှန်းရန်ခက်ခဲနေ သေးကြောင်း၊ ဓါတ်မြေဩဇာဈေးနှုန်း ဆက်လက်မြင့်တက်နေမှုသည် အနာဂတ်စားသောက်ကုန်ဈေးနှုန်းများ မြင့်တက်လာနိုင်ရန် တွန်းအားပေးနေမည်ဖြစ်ကြောင်း သိရှိရပါသည်။

(ရင်းမြစ်-ပရီတိုးရီးယားမြို့ စီးပွားရေးသံမှူးပေးပို့သည့်သတင်း)