ပြည်ပကုန်သွယ်မှုသတင်းများ

     နှစ်နိုင်ငံမဟာဗျူဟာမြောက်ပူးပေါင်းဆောင်ရွက်ရေးနှင့် မိတ်ဖက်ဆက်ဆံရေးကို တိုးမြင့်ရန်သဘောတူညီခဲ့ကြပြီး ရလဒ်ကောင်းများရရှိနိုင်ရန် တရုတ်ဝန်ကြီးချုပ် Li Qiang နှင့် ပါကစ္စတန်ဝန်ကြီးချုပ် Shebbaz Sharif တို့သည် ဘေကျင်းမြို့တွင် ဇွန်လ ၈ရက်နေ့ကတွေ့ဆုံဆွေးနွေးခဲ့ကြသည်။

       တရုတ်နိုင်ငံသည် ၎င်း၏အိမ်နီးချင်းသံတမန်ဆက်ဆံ‌ရေးတွင် ပါကစ္စတန်ကို အမြဲဦးစားပေးခဲ့ပြီး ၎င်းတို့၏အစဥ်အလာချစ်ကြည်ရင်းနှီးမှုကို မြှင့်တင်ရန် အပြန်အလှန်အကျိုးရှိသော ပူးပေါင်းဆောင်ရွက်မှုတို့ကိုချဲ့ထွင်ရန်နှင့် တရုတ်ပါကစ္စတန်အသိုက်အဝန်းတည်ဆောက်ရေးကို အရှိန်မြှင့် တင်ရန်အတွက် ပါကစ္စတန်နှင့်လက်တွဲဖို့အသင့်ရှိကြောင်း Li က ပြောကြားခဲ့သည်။

    တရုတ်နိုင်ငံသည် ၎င်း၏နိုင်ငံတော်အချုပ်အခြာအာဏာ၊ လွတ်လပ်‌ရေးနှင့် နယ်မြေပိုင်ဆိုင်မှုကိုကာကွယ်ရန်နှင့် စည်းလုံးညီညွတ်ရေး၊ တည်ငြိမ်ရေး၊ လုံခြုံရေးနှင့်သာယာဝပြောရေးတို့ရရှိရန် ပါကစ္စတန်အား အခိုင်အမာထောက်ခံကြောင်း ဝန်ကြီးချုပ်က ဆက်လက်ပြောကြားခဲ့သည်။

     တရုတ်-ပါကစ္စတန်စီးပွားရေးစင်္ကြန် (CPEC) အဆင့်မြှင့်တင်ရေး၊ ဘုံဖွံ့ဖြိုးတိုးတက်ရေးအတွက် ကုန်သွယ်မှုနှင့်ရင်းနှီးမြှုပ်နှံမှုပူးပေါင်းဆောင်ရွက်မှုများ တိုးချဲ့လုပ်ဆောင်ရန်နှင့် စက်မှုလုပ်ငန်းဆိုင်ရာ ပူးပေါင်းဆောင်ရွက်မှုကိုမြှင့်တင်ရန် တရုတ်နိုင်ငံအနေဖြင့် ပါကစ္စတန်နှင့်ပူးပေါင်းဆောင်ရွက်သွားရန်ဆန္ဒရှိပြီး စိုက်ပျိုး‌ရေး၊ အာကာသ၊ သတင်းအချက်အလက်နည်းပညာ၊ ဂေဟစနစ်နှင့် သဘာဝပတ်ဝန်းကျင်ကာကွယ်‌ရေး အစရှိသောအခန်းကဏ္ဍများတွင် ပူးပေါင်းဆောင်ရွက်သွားမည်ဖြစ်ကြောင်းသိရသည်။

      တရုတ်နိုင်ငံသည် ပါကစ္စတန်နိုင်ငံမှ အရည်အသွေးမြင့်ကုန်ပစ္စည်းများကိုတင်သွင်းလိုပြီး ပါကစ္စတန်တွင်ရင်းနှီးမြှုပ်နှံရန် အရည်အချင်းပြည့်မီသော တရုတ်လုပ်ငန်းများကိုပံ့ပိုးကူညီရန်ဆန္ဒရှိကြောင်း LI က ပြောကြားခဲ့သည်။

     တရုတ်နိုင်ငံသည် ပါကစ္စတန်၏ အယုံကြည်ရဆုံးမိတ်ဖက်နိုင်ငံဖြစ်ပြီး ပါကစ္စတန်၏ စီးပွားရေးနှင့်လူမှုရေးဖွံဖြိုးတိုးတက်မှုတွင် တရုတ်နိုင်ငံ၏ကူညီပံ့ပိုးမှုအား ကျေးဇူးတင်ရှိကြောင်း ပါကစ္စတန်ဝန်ကြီးချုပ်က ပြောကြားခဲ့သည်။

         Belt and Road ပူးပေါင်းဆောင်ရွက်မှုမူဘောင်အရ CPEC ၏ တည်ဆောက်ရေးကိုတိုးတက်စေရန် ပါကစ္စတန်အနေဖြင့် တရုတ်နိုင်ငံနှင့်လက်တွဲဆောင်ရွက်လိုကြောင်း၊ စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ စိုက်ပျိုးရေးနှင့် ယဥ်ကျေးမှု စသည့်နယ်ပယ်များတွင် ဖလှယ်မှုနှင့်ပူးပေါင်းဆောင်ရွက်မှုအားကောင်းလာစေရန်မျှော်လင့်ကြောင်း ပါကစ္စတန်ဝန်ကြီးချုပ်က ပြောကြားခဲ့သည်။

          ဆွေနွေးပြောကြားပြီးနောက် ဝန်ကြီးချုပ် Li နှင့် ဝန်ကြီးချုပ် Shehbez တို့သည် သယ်ယူပို့ဆောင်ရေး၊ စက်မှုလုပ်ငန်း၊ စိုက်ပျိုးရေး၊ စျေးကွက်စည်းမျဉ်း၊ အသက်မွေးဝမ်းကျောင်းမှု၊ စွမ်းရည်မြှင့်တင်ရေး၊ ရုပ်ရှင်နှင့် ရုပ်မြင်သံကြား စသည့်ကဏ္ဍများတွင် နှစ်နိုင်ငံပူးပေါင်းဆောင်ရွက်ရေးဆိုင်ရာစာရွက်စာတမ်းများ လက်မှတ်ရေးထိုးပွဲအခမ်းအနားသို့တက်‌‌ရောက်ခဲ့ကြသည်။

Source : Xinhua

DOCA(ရန်ကုန်)

     ၂၀၂၄ ခုနှစ်ပထမလေးလတွင် ထုတ်လုပ်မှုလျှော့ကျခဲ့သော်လည်း ထိုင်းနိုင်ငံမော်တော် ဆိုင်ကယ်ထုတ်လုပ်မှုပမာဏသည် ယခုနှစ်အတွက်ရည်မှန်းချက်ဖြစ်သည့်အစီးရေ (၂.၁၂)သန်း ကို ရောက်ရှိရန်မျှော်လင့်ရကြောင်း ထိုင်းနိုင်ငံစက်မှုလုပ်ငန်းအဖွဲ့ချုပ်(FTI) ပြောကြားခဲ့ပါသည်။ နိုင်ငံတွင် အိမ်ထောင်စုအကြွေးနှုန်းမြင့်တက်လာမှုကြောင့် ဘဏ်များမှာငွေချေးရာတွင် ပိုမိုစိစစ်လာမှုကြောင့် ကားထုတ်လုပ်သူများကဲ့သို့ မော်တော်ဆိုင်ကယ်ထုတ်လုပ်သူများမှာ စားသုံးသူများ၏ ဝယ်ယူနိုင်စွမ်းအားနည်းသည့်ပြသနာနှင့် ရင်ဆိုင်နေရကြောင်း သိရပါသည်။ FTI ၏ ဒုတိယ ဥက္ကဌနှင့် မော်တော်ယာဥ်စက်မှုလုပ်ငန်းအသင်း၏ ပြောခွင့်ရပုဂ္ဂိုလ်ဖြစ်သူ Surapong Paisitpatanapong က စျေးကွက်အတွင်း ဝယ်လိုအားရှိနေသည်ဟု ယုံကြည်သောကြောင့် ၎င်းတို့ ၏ ၂၀၂၄ ခုနှစ်အတွက်ထုတ်လုပ်မှုရည်မှန်းချက်ကို ထိမ်းသိမ်းထားကြောင်း ပြောကြားခဲ့ပါသည်။ ထို့ပြင် Surapong က ရောင်းချမှုများသည် မော်တော်ဆိုင်ကယ် မော်ဒယ်အသစ်များ ဖြန့်ချိမှု၊ လျှပ်စစ်ဆိုင်ကယ်များနှင့် အရောင်းပြပွဲများကျင်းပခြင်းတို့ကြောင့် အဆင်ပြေနိုင်မည်ဟု ပြောကြားခဲ့ပါသည်။ အသင်းသည် ယခုနှစ်အတွက်မော်တော်ဆိုင်ကယ် ထုတ်လုပ်မှုမှာ ပြည်တွင်းစျေးကွက်အတွက်အစီးရေ(၁.၇)သန်း၊ ပြည်ပစျေးကွက်အတွက်အစီးရေ (၄၂၀၀၀၀) ရှိမည်ဟု ခန့်မှန်းထားပါသည်။ ဇန်နဝါရီလမှဧပြီလထိ မော်တော်ဆိုင်ကယ်ထုတ်လုပ်မှုပမာဏမှာ အစီးရေ (၈၂၁၆၉၅)စီးဖြင့် လွန်ခဲ့သည့်နှစ်တူညီသည့်ကာလထက် (၃.၉၄)ရာခိုင်နှုန်းလျှော့ကျခဲ့ကြောင်းနှင့် ရောင်းချရမှုပမာဏသည်လည်းလျှော့ကျခဲ့ကြောင်း သိရပါသည်။ ပြည်ပစျေးကွက်သို့ တင်ပို့မှုမှာလည်း အစီးရေ(၅၂၇၇၀)စီးဖြင့် (၁၆.၇) ရာခိုင်နှုန်းကျဆင်းခဲ့ကြောင်း သိရပါသည်။

Source; Bangkok Post

DOCA(ရန်ကုန်)

    ဒတ်ချ်နိုင်ငံ၏ တစ်ပိုင်းလျှပ်ကူးပစ္စည်းများ ရေးဆွဲထုတ်လုပ်သည့် NXPကုမ္ပဏီနှင့် ထိုင်ဝမ် တစ်ပိုင်းလျှပ်ကူးပစ္စည်းထုတ်လုပ်သော TSMC ကုမ္ပဏီ၏ကျောထောက်နောက်ခံပြု Vanguard International တို့သည်မော်တော်ယာဥ်၊ စက်မှုလုပ်ငန်း၊ လူသုံးကုန်နှင့်မိုဘိုင်းကုန် စျေးကွက်များ ကိုဖြည့်ဆည်းပေးနိုင်ရန်အတွက် အမေရိကန်ဒေါ်လာ ၇.၈ဘီလီယံတန်ဖိုးရှိသော တစ်ပိုင်းလျှပ်ကူးပစ္စည်းထုတ်လုပ်မှုစက်ရုံကို စင်ကာပူနိုင်ငံတွင် တည်ဆောက်ရန် ဖက်စပ်ပူးပေါင်းဆောင်ရွက် မည်ဖြစ်ကြောင်း ကုမ္ပဏီများက ဇွန်လ ၅ ရက်နေ့ (ဗုဒ္ဓဟူးနေ့) က ထုတ်ပြန်ခဲ့သည်။

    Vanguard သည် ဖက်စက်လုပ်ငန်းတွင်ရှယ်ယာ ၆၀ ရာခိုင်နှုန်းဖြင့် အမေရိကန်‌ဒေါ်လာ ၂.၄ ဘီလီယံရင်းနှီးမြှုပ်နှံမည်ဖြစ်ပြီး NXP သည်အမေရိကန်‌ဒေါ်လာ ၁.၆ ဘီလီယံရင်းနှီးမြှုပ်နှံမည်ဖြစ်ပြီး ဖက်စပ်လုပ်ငန်း၏ရှယ်ယာ ၄၀ ရာခိုင်နှုန်းကို ကိုင်ထားကြောင်း ထုတ်ပြန်ချက်တွင် ဖော်ပြထားသည်။ကုမ္မဏီများသည် စက်ရုံ၏ရေရှည်စွမ်းဆောင်ရည်ကို ပံ့ပိုးရန်အတွက် နောက်ထပ် အမေရိကန်ဒေါ်လာ ၁.၉ ဘီလီယံကိုလည်း ပံ့ပိုးပေးမည်ဖြစ်သည်။

     စက်ရုံကို ၂၀၂၄ ခုနှစ် ဒုတိယနှစ်ဝက်တွင် စတင်တည်ဆောက်ရန် မျှော်မှန်းထားပြီး ၂၀၂၇ ခုနှစ်တွင် ကနဦးထုတ်လုပ်မှုကိုဖောက်သည်များထံသို့ချပြသွားမည်ဟုကုမ္မဏီများက ပြောကြားခဲ့သည်။ စည်းမျဥ်းစည်းကမ်းများ အတည်ပြုပြီးပါက ကနဦးဆောက်လုပ်မည့်အဆင့်ကို စတင်မည် ဖြစ်သည်။

     TSMC သည် တရုတ်နှင့်တင်းမာမှုများတိုးလာချိန်တွင် ထိုင်ဝမ်မှ၎င်း၏ထုတ်လုပ်‌ရေး စက်ရုံများကို ရွေ့ပြောင်းရန်ရှိမရှိပက်သက်၍ ၎င်း၏ဖောက်သည်များနှင့်ဆွေးနွေးမှုများ ပြုလုပ်ခဲ့သည်။ ထိုသို့သောအပြောင်းအလဲသည် မဖြစ်နိုင်သေးကြောင်း ကုမ္မဏီအကြီးတန်းအမှုဆောင် အရာရှိတစ်ဦးက အင်္ဂါနေ့တွင် ပြောကြားခဲ့သည်။

     NXP နှင့် TSMC တို့လုပ်ဆောင်မည့် ဖက်စပ်လုပ်ငန်းသည် စင်ကာပူနိုင်ငံတွင် အလုပ်အကိုင်ပေါင်း ၁၅၀၀၀ ခန့်ကိုဖန်တီးပေးနိုင်ရန် မျှော်လင့်ထားကြသည်။

      ယခုနှစ်အစောပိုင်းတွင် United Microelectronics Corp (UMC) သည် စင်ကာပူရှိ မိုက်ခရိုချစ်ပ်စက်ရုံအသစ်တွင် အမေရိကန်ဒေါ်လာ ၅ ဘီလီယံရင်းနှီးမြှုပ်နှံထားသေးကြောင်း သိရှိရပါသည်။

Source : Reuters    

DOCA(ရန်ကုန်)

    ရုရှားနိုင်ငံသည် PPP (Purchasing Power Parity) သတ်မှတ်ချက်အရ ဂျပန်နိုင်ငံကို ကျော်တက်ကာ ကမ္ဘာ့စတုတ္တအကြီးဆုံးစီးပွားရေးနိုင်ငံဖြစ်လာကြောင်း ဇွန်လအစတွင်ထုတ်ပြန်ခဲ့သည့် ကမ္ဘာ့ဘဏ်မှပြန်လည်ပြင်ဆင်ထားသော အချက်အလက်များအရ သိရသည်။

    ၂၀၂၃ ခုနှစ်သြဂုတ်လတွင် bne Intellinews ၌ ဖော်ပြခဲ့သည့်အတိုင်း ရုရှားသည် ပြုပြင်ပြောင်းလဲထားသောစည်းမျဥ်းများဖြင့် ပဥ္စမမြောက်အကြီးဆုံးစီးပွားရေးနိုင်ငံဖြစ်လာရန် ဂျာမနီကို ကျော်တက်သွားခဲ့ပြီဖြစ်သည်။ မကြာသေးမီကာလက ဖြစ်ပေါ်ခဲ့သော စီးပွားရေး ပြသာနာအချို့နှင့် ရုရှားနိုင်ငံမှစျေးပေါသော ဓာတ်‌ငွေ့တင်သွင်းမှုအား ဖြတ်တောက်ခြင်းခံခဲ့ ရသောဂျာမနီနိုင်ငံသည် ယခုအခါတွင် အဆင့်ခြောက်နေရာသို့ ကျဆင်းသွားခဲ့သည်။

    ကမ္ဘာ့ဘဏ်သည် ၎င်း၏အချက်အလက်များကို ပြန်လည်သုံးသပ်ပြီးနောက် ရုရှား၏ အဆင့်ကို မြှင့်တင်ခဲ့ပြီး ရုရှားသည် ၂၀၂၁ ခုနှစ်တွင်ဂျပန်နိုင်ငံကို အမှန်တကယ် ကျော်တက်ကာ ထိုအချိန်မှစ၍ ၎င်း၏ နံပါတ် ၄ နေရာကို ဆက်လက်ထိန်းသိမ်းထားကြောင်း ပြောကြားခဲ့သည်။ ၎င်း၏ယခင် တွက်ချက်မှုများကို ၂၀၁၇ ‌ဒေတာပေါ်တွင် အခြေခံထားသော်လည်း ယခု ၂၀၂၁ ကိန်းဂဏန်းများကို ထင်ဟပ်စေရန်မွမ်းမံထားခြင်းဖြစ်ကြောင်း သိရသည်။

     ယူကရိန်းစစ်ပွဲမစတင်မီတွင် ရုရှား၏ စီးပွားရေးတိုးတက်မှုသည် ပျမ်းမျှနှုန်းထက် နောက်ကျနေပြီးတုံ့ဆိုင်းလုနီးပါးရှိနေပြီဖြစ်သည်။ သို့သော်လည်း ၂၀၂၂ ခုနှစ်တွင် ယူကရိန်းနိုင်ငံ ကိုကျူးကျော်ဝင်ရောက်ပြီးနောက် စီးပွားရေးသည် Keynesianism စစ်ရေးမူဝါဒ (Keynesianism စစ်ရေးမူဝါဒသည် စီးပွားရေးတိုးတက်မှုကိုမြင့်တင်ရန်အတွက် အစိုးရ၏စစ်ရေး အသုံးစရိတ်ကို မြှင့်တင်သင့်သည့်အနေအထားပေါ်အခြေခံသည့် စီးပွားရေးမူဝါဒဖြစ်သည်။) ကို အသုံးပြု၍လက် ရှိတွင် ကမ္ဘာပေါ်ရှိ မည်သည့်အဓိကစီးပွားရေးတွင်မဆို အလျှင်မြန်ဆုံးကြီးထွားလာနေသည်။

       Bne Intellinews တွင်အကျယ်တဝင့်ဖော်ပြခဲ့သည့်အတိုင်း ရုရှားသည် ၎င်း၏ စီးပွားရေးပုံစံကို ပြောင်းလဲခဲ့ပြီး ဆယ်စုနှစ်များစွာကြာခြိုးခြံခြွေတာမှု ပြုလုပ်ပြီးနောက်ပိုင်းတွင် ကြီးကြီးမားမား ရင်းနှီးမြှုပ်နှံရန်စတင်ခဲ့ပြီး စီးပွားရေးတိုးတက်မှုကို တွန်းအားပေးခဲ့သည်။ တစ်ချိန်တည်းမှာပင် စစ်ဘက်ဆိုင်ရာစက်မှုဇုန်များအတွင်းသို့ ရင်းနှီးမြှုပ်နှံမှုများဝင်ရောက်လာခြင်းနှင့် ပူတင်သည် အရပ်ဘက်စီးပွား‌ရေးတွင် ရင်းနှီးမြှုပ်နှံရန် National project 2.1 ကိုလည်းစတင်ခဲ့ပြီး ရုရှားနိုင်ငံသားများ၏ လူနေမှုဘဝမြှင့်တင်ရေးကိုလည်း ဆောင်ရွက်လျက်ရှိကြောင်း သိရသည်။

     PPP သတ်မှတ်ချက်များအရ လက်ရှိတွင် တရုတ်နိုင်ငံသည် နံပါတ် ၁ နေရာတွင်ရပ်တည်နေပြီး အမေရိကန်နိုင်ငံက နံပါတ် ၂ နေရာနှင့် အိန္ဒိယနိုင်ငံက နံပါတ် ၃ နေရာတွင်ရပ်တည်လျက်ရှိသည်။

Source : BneIntelliNews    

DOCA(ရန်ကုန်)

   ထိုင်းနိုင်ငံ၌ စားအုန်းဆီကြိတ်ခွဲထုတ်လုပ်သည့် စက်ရုံလုပ်ငန်းရှင်များအနေဖြင့် တောင်သူများထံမှ ဆီအုန်းသီး တစ်ကီလိုဂရမ်လျှင် အနည်းဆုံး ဘတ်ငွေ ၄ ဒသမ ၅၀ နှုန်းဖြင့်ဝယ်ယူရန် ညွှန်ကြားချက်ကို ပြည်တွင်းကုန်သွယ်ရေးဦးစီးဌာန၊ ညွှန်ကြားရေးမှူးချုပ် Mr. Wattanasak Suriam က လက်မှတ်ရေးထိုးပြီး စားအုန်းဆီ ကြိတ်ခွဲထုတ်လုပ်ရေးအသင်း၏ ဥက္ကဋ္ဌထံ ၂၉-၅-၂၀၂၄ ရက်၊ ဗုဒ္ဓဟူးနေ့တွင် ပေးပို့လျက် ထုတ်ပြန်ထားကြောင်း The Nation Thailand သတင်းဌာနက ဖော်ပြပါသည်။

    ပြည်တွင်းကုန်သွယ်ရေးဦးစီးဌာနမှ တာဝန်ရှိသူများသည် ဆီအုန်းအများအပြား စိုက်ပျိုးထုတ်လုပ်သည့် ခရိုင်တစ်ခုသို့ ၂၈-၅-၂၀၂၄ ရက်နေ့တွင် သွားရောက်လျက် ဆီအုန်းစိုက်ပျိုးသူများ၊ ကြားခံဆီအုန်းဝယ်သူများနှင့် ဆီအုန်းကြိတ်ခွဲထုတ်လုပ်သည့်စက်ရုံများမှ ကိုယ်စားလှယ်များနှင့် တွေ့ဆုံဆွေးနွေးခဲ့ကြောင်း၊ ကြားခံပွဲစားများအနေဖြင့် ဆီအုန်းစိုက်ပျိုးသည့် တောင်သူများထံမှ ဆီအုန်းအသီး တစ်ကီလိုဂရမ်လျှင် အနည်းဆုံး ဘတ်ငွေ ၄ ဒသမ ၅၀ ဖြင့် ဝယ်ယူရန် အဆိုပါ ဆွေးနွေးပွဲမှ ဖော်ထုတ်ခဲ့ကြောင်း၊ သီးနှံအရည်အသွေးသည် ပရီမီယံအဆင့်ရှိပါက အရည်အသွေးကောင်းမွန်သည့်အတိုင်း ဈေးနှုန်းတိုးမြှင့်ပေးရမည်ဖြစ်ကြောင်းဖြင့် Mr. Wattanasak က ပြောကြားခဲ့ပါသည်။

    အဆိုပါသတ်မှတ်ထားသည့် ဈေးနှုန်းအောက် လျှော့ချဝယ်ယူသည့် မည်သူမဆို အမြင့်ဆုံး ထောင်ဒဏ် ခုနစ်နှစ် သို့မဟုတ် အမြင့်ဆုံးဒဏ်ငွေ ဘတ် ၁၅၀,၀၀၀ သို့မဟုတ် ဒဏ်နှစ်ရပ်လုံးကို ချမှတ်ခံရနိုင်သည်ဟု ၎င်းအမိန့်စာတွင် ဖော်ပြထားကြောင်း၊ ထို့အပြင် ဆီကြိတ်ခွဲထုတ်လုပ်သည့် စက်ရုံလုပ်ငန်းရှင်များသည် ၎င်းတို့၏ လုပ်ငန်းဆောင်ရွက်မှုများကို ဦးစီးဌာနသို့ နေ့စဉ်အစီရင်ခံ တင်ပြရန်လိုအပ်ကြောင်း၊ ယင်းသို့အစီရင်ခံတင်ပြရာတွင် လုပ်ငန်းရှင်များအနေဖြင့် ဆီအုန်းသီး ဝယ်ယူမှုပမာဏ၊ ဝယ်ယူသည့်ဈေးနှုန်းနှင့် ကြိတ်ခွဲထုတ်လုပ်သည့် ဆီပမာဏတို့ကို ဖော်ပြရမည် ဖြစ်ကြောင်း သတင်းရရှိပါသည်။

Source: The Nation Thailand, 29 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)