ပြည်ပကုန်သွယ်မှုသတင်းများ

     တရုတ်နိုင်ငံသည် ဩစတြေးလျအမဲသားထုတ်လုပ်သည့် စက်ရုံကြီး ၅ခုမှ တင်သွင်းမှုတားမြစ်ချက်ကို ရုပ်သိမ်းလိုက်ပြီဖြစ်ကြောင်းနှင့် ထိုလုပ်ဆောင်ချက်သည် နှစ်နိုင်ငံအကြား ဆက်ဆံရေးပိုမိုကောင်းမွန်လာမည့်လက္ခဏာဖြစ်ကြောင်း မေလ(၃၀)ရက်နေ့၊ ကြာသပတေးနေ့တွင် ဩစတြေးလျအစိုးရက ပြောကြားခဲ့သည်။

         ဩစတြေးလျနိုင်ငံ၏မြို့တော် ကင်ဘာရာတွင် Covid-19 ၏ဇစ်မြစ်ကို စုံစမ်းစစ်ဆေးမှုပြုလုပ်ရန်တောင်းဆိုခဲ့ပြီးသည့်နောက် တရုတ်သည် ၂၀၂၀ပြည့်နှစ်မှ ၂၀၂၂ခုနှစ်အတွင်း ဤကဲ့သို့သော တားမြစ်ပိတ်ပင်မှုများပြုလုပ်ခဲ့ပြီး ဩစတြေးလျနိုင်ငံမှ ကျောက်မီးသွေး၊ သစ်နှင့် ဝိုင်အပါအဝင် အခြားကုန်ပစ္စည်းများတင်သွင်းမှုကိုလည်းတားမြစ်ခဲ့သည်။

         တရုတ်သည် ဩစတြေးလျ၏ ဒုတိယအကြီးဆုံး အမဲသားတင်ပို့သည့်ဈေးကွက်ဖြစ်ပြီး ယမန်နှစ်က ကန်ဒေါ်လာ ၁.၆ဘီလီယံတန်ဖိုးရှိ အမဲသားတန်ချိန်၂၄၀၀၀၀ကို တရုတ်နိုင်ငံသို့ တင်ပို့ရောင်းချနိုင်ခဲ့ကြောင်း ဩစတြေးလျကုန်သွယ်မှုဒေတာဖော်ပြချက်အရသိရသည်။

       လွန်ခဲ့သည့် ၂နှစ်ခန့်က ကင်ဘာရာတွင် အစိုးရပြောင်းပြီးနောက် ဩစတြေးလျနိုင်ငံ၏ ကုန်ပစ္စည်းများတင်ပို့မှုအပေါ်  ချမှတ်ထားသည့်အတားအဆီးအများစုကို ပေကျင်းက ရုပ်သိမ်းခဲ့ သည်။ သို့သော် ဩစတြေးလျမှ ပုစွန်သားပေါက်များတင်သွင်းခွင့်ကို ဆက်လက်ပိတ်ပင်ထားဆဲဖြစ်သည်။

      “ဩစတြေးလျရဲ့ ပုစွန်လုပ်ငန်းအပါအဝင် ကျန်ရှိနေတဲ့ ကုန်သွယ်မှုဆိုင်ရာ အတားအဆီးတွေကိုဖယ်ရှားဖို့ တရုတ်ကို ဆက်လက်ဖိအားပေးနေပါတယ်” ဟု ဩစတြေးလျနိုင်ငံခြားရေး ဝန်ကြီး Penny Wong၊ ကုန်သွယ်ရေးဝန်ကြီး Don Farrell နှင့် စိုက်ပျိုးရေးဝန်ကြီး Murray Watt တို့က ပူးတွဲထုတ်ပြန်ချက်တွင် ပြောကြားခဲ့သည်။

         တရုတ်၏ ကုန်သွယ်မှုအဟန့်အတားမြင့်မားမှုသည် ဩစတြေးလျပို့ကုန်များကို ဩစတြေးလျဒေါ်လာ ၂၀.၆ဘီလီယံ (အမေရိကန်ဒေါ်လာ ၁၃.၆ဘီလီယံ) ထိခိုက်စေခဲ့သည်ဟု ၎င်းတို့က ဆိုသည်။

         ဩစတြေးလျအမဲသားတင်ပို့မှုအား ရပ်ဆိုင်းထားရခြင်းအတွက် တရုတ်နိုင်ငံမှပေးခဲ့သော အကြောင်းပြချက်များမှာ တံဆိပ်ကပ်ခြင်းကိစ္စ၊ ညစ်ညမ်းခြင်းကိစ္စနှင့် အလုပ်သမားများကြားတွင် Covid-19 ဖြစ်ပွားမှုကိစ္စများပင်ဖြစ်သည်။                                    

Source: Reuters

DOCA(ရန်ကုန်)

      ဩစတြေးလျနိုင်ငံတွင် ကြက်ငှက်တုပ်ကွေးဗိုင်းရပ်စ်ကူးစက်မှုလက္ခဏာများတွေ့ရှိရသောကြောင့် ဩစတြေးလျနိုင်ငံ ဗစ်တိုးရီးယားနယ်မှ ကြက်နှင့်ဥထွက်ပစ္စည်းများတင်ပို့မှုကို အမေရိကန်နိုင်ငံက ကန့်သတ်ထားသည်။

         မေလ ၂၂ရက်နေ့တွင် စတင်အသက်ဝင်ခဲ့သော အဆိုပါတားမြစ်ချက်တွင် ကြက်များ၊ စီးပွားဖြစ်ငှက်များ၊ ဥများနှင့် ငှက်ကုလားအုတ်များပါဝင်သည်။ ပြုပြင်မွမ်းမံထားသော ကြက်၊ ငှက်နှင့် ဥထွက်ပစ္စည်းများ၊ မှိုထွက်ကုန်များအပြင် အခြားလတ်ဆတ်သော ကြက်ထွက်ပစ္စည်းများလည်းပါဝင်သည်။

        ဩစတြေးလျနိုင်ငံရှိ ကလေးငယ်တစ်ဦးသည် အိန္ဒိယနိုင်ငံမှ H5N1 ဗိုင်းရပ်စ်ကူးစက်ခံရပြီးနောက် ကြက်ငှက်တုပ်ကွေးကူးစက်ခံရသော ပထမဆုံးလူသားအဖြစ် မှတ်တမ်းဝင်ခဲ့ကာ ပြန်လည်သက်သာလာပြီးနောက် ရက်ပိုင်းအကြာတွင် အဆိုပါကန့်သတ်ချက်ထွက်ပေါ်လာခြင်းဖြစ်သည်။ ထိုရက်သတ္တပတ်အတွင်း၌ပင် H7N3 နှင့် H7N9 ဟုသိကြသော ကြက်ငှက်တုပ်ကွေးမျိုးကွဲများကို ဗစ်တိုးရီးယားကြက်ခြံ(၂)ခြံရှိ ကြက်များတွင် ကူးစက်နေကြောင်ရှာဖွေတွေ့ရှိခဲ့သည်။

         သို့သော် အမေရိကန်လယ်ယာအေဂျင်စီသည် ဗစ်တိုးရီးယားပြည်နယ်မှလွဲ၍ အခြား‌သောဩစတြေးလျနိုင်ငံရှိ ပြည်နယ်များတွင် ကြက်ငှက်တုပ်ကွေးရောဂါမရှိဟုမှတ်ယူထားကာ အိမ်မွေးတိရစ္ဆာန်များနှင့် တိရစ္ဆာန်ရုံမှငှက်များအား ခွင့်ပြုချက်ဖြင့် တင်သွင်းနိုင်ပြီး ပိုင်ယာမီနှင့် နယူးယောက်ရှိ တိရစ္ဆာန်ထိန်းသိမ်းရေးစင်တာများတွင် ရက်(၃၀)ကြာ Quartine ထားရှိရမည်ဖြစ်သည်။

       ထိုသို့ တိရစ္ဆာန်များနှင့်လူများတွင် ဗိုင်းရပ်စ်ဖြစ်ပွားမှုများတိုးလာသော်လည်း ဩစတြေးလျနှင့် အမေရိကန်ကျန်းမာရေးတာဝန်ရှိသူများက အများပြည်သူများအား အန္တရာယ်နည်းပါးကြောင်း ထပ်လောင်းပြောကြားခဲ့သည်။

       ဩစတြေးလျကြက်ငှက်များအား ကမ္ဘာတစ်ဝှမ်းသို့ တင်ပို့မှုအနည်းငယ်သာရှိပြီး ထိုတင်ပို့မှုအများစုမှာ ပါပူဝါနယူးဂီနီနှင့် ဖိလစ်ပိုင်တို့ကဲ့သို့ သမုဒ္ဒရာပိုင်းနိုင်ငံများသို့ တင်ပို့မှုရှိ ကြောင်းသိရသည်။ USDA ၏ အချက်အလက်များအရ လွန်ခဲ့သည့်နှစ်အတွင်း အမေရိကန်သည်  ဩစတြေးလျမှ အမဲသား၊ ဆိတ်၊ သိုးသားအများစုကိုတင်သွင်းခဲ့သည်။

        ကမ္ဘာ့အခြားနေရာများတွင် ကြက်ငှက်တုပ်ကွေးပေါ်ပေါက်လာသည်နှင့်အမျှ အမေရိကန်ပြည်ထောင်စုသည် နို့စားမွေးမြူရေးလုပ်ငန်းရှင်များအတွက် ဇီဝလုံခြုံရေးအစီအစဉ်များချမှတ်ကာ နွားများအား ကြက်ငှက်တုပ်ကွေးဖြစ်ပွားမှုကိုတားဆီးရန် စမ်းသပ်မှုများတိုးချဲ့လုပ်ဆောင်လျက်ရှိသည်။

         မတ်လနှောင်းပိုင်းမှစတင်၍ ပြည်နယ် ၉ခုရှိ နွားအကောင်ရေ ၆၄ကောင်ခန့်တွင် ဗိုင်းရပ်စ်ပိုးတွေ့ရှိခဲ့ကြောင်း  USDA မှသိရသည်။ လွန်ခဲ့သောသီတင်းပတ်က မစ်ရိအန်ပြည်နယ်ရှိ လယ်သမားတစ်ဦးအပါအဝင် လယ်သမားနှစ်ဦးသည် ကြက်ငှက်တုပ်ကွေးကူးစက်ခံခဲ့ရပြီး အပျော့စားမျက်လုံးလက္ခဏာများပြသပြီးနောက် ပြန်လည်သက်သာလာခဲ့သည်။ ထို့နောက် အမေရိကန်နှင့်ဥရောပတို့သည် လယ်ယာအလုပ်သမားများကို ရောဂါကူးစက်ခြင်းမှကာကွယ်နိုင်သည့် ကာကွယ်ဆေးများထုတ်လုပ်ရန် အစီအစဉ်များတိုးမြှင့်ဆောင်ရွက်လျက်ရှိကြောင်းသိရှိရသည်။

Source: agriculturedive.com

DOCA(ရန်ကုန်)

       ဗီယက်နမ်နိုင်ငံမှ စပိန်သို့ ကော်ဖီတင်ပို့မှု ၁၀၀ရာခိုင်နှုန်းမြင့်တက်လာကြောင်း စက်မှုနှင့်ကုန်သွယ်ရေးဝန်ကြီးဌာနအောက်ရှိ နိုင်ငံခြားကုန်သွယ်ရေးအေဂျင်စီ၏ ထုတ်ပြန်ချက်အရသိရပါသည်။ ဗီယက်နမ်နိုင်ငံသည် ဧပြီလတွင် စပိန်သို့ ကော်ဖီစေ့တန်ချိန် ၁၀၇၄၀တန်တင်ပို့ခဲ့ပြီး အမေရိကန်ဒေါ်လာ ၄၂.၆၆သန်းရရှိခဲ့သဖြင့် တင်ပို့မှုပမာဏအားဖြင့် ၁၈.၇ရာခိုင်နှုန်းမြင့်တက်ခဲ့ကြောင်း၊ တန်ဖိုးအားဖြင့် ၁၀၂.၈ရာခိုင်နှုန်းမြင့်တက်လာကြောင်း အေဂျင်စီက အကောက်ခွန်အထွေထွေဌာန၏ အချက်အလက်များကို ကိုးကားပြောကြားခဲ့ခြင်းဖြစ်ပါသည်။

        ဗီယက်နမ်နိုင်ငံမှ စပိန်နိုင်ငံသို့ ယခုနှစ်၏ ပထမလေးလပတ်တွင် ကော်ဖီစေ့တင်ပို့မှုမှာ တန်ချိန်၅၅၃၈၀ရှိခဲ့ပြီး တန်ဖိုးအားဖြင့် အမေရိကန်ဒေါ်လာ ၁၉၃.၁သန်းရှိခဲ့ကြောင်းသိရပါ သည်။ လွန်ခဲ့သည့်နှစ် ပထမလေးလနှင့်နှိုင်းယှဉ်ပါက တင်ပို့မှုပမာဏအားဖြင့် ၅၃.၇ရာခိုင်နှုန်းမြင့်တက်ခဲ့ပြီး တန်ဖိုးအားဖြင့် ၁၃၆.၆ရာခိုင်နှုန်းမြင့်တက်ခဲ့ကြောင်းသိရပါသည်။ စပိန် ဈေးကွက်သို့တင်ပို့သည့် ဗီယက်နမ်ကော်ဖီ၏ ပျမ်းမျှဈေးနှုန်းမှာ တစ်တန်လျှင် အမေရိကန်ဒေါ်လာ၃၄၈၇ရှိကြောင်းသိရပါသည်။ ပြည်တွင်းဈေးကွက်တွင် Robvsta ကော်ဖီဈေးနှုန်းမှာ မြင့်တက်လာကြောင်းသိရပါသည်။ သို့သော် ကောင်းမွန်သည့် ရာသီဥတုအခြေအနေရရှိမှုကြောင့် ထုတ်လုပ်နိုင်စွမ်းမြင့်နေခြင်းနှင့် ငွေလဲလှယ်နှုန်းမတည်ငြိမ်မှုကြောင့် ကော်ဖီဈေးနှုန်းများ ပြန်လည်ကျဆင်းရေးကို ထိန်းချုပ်ရန်ခက်ခဲနေကြောင်းသိရပါသည်။

Source: Vietnam Plus

DOCA(ရန်ကုန်)

    အင်ဒိုနီးရှားနိုင်ငံပိုင် ဝယ်ယူရေးအေဂျင်စီ (Bulog) ၏ မကြာသေးမီက တင်ဒါခေါ်ယူမှုတွင် ဗီယက်နမ်သည် ဆန်ကွဲ ၅% ပါဝင်သော ဆန်ဖြူ တန်ချိန် ၁၅၀၀၀၀ တင်ပို့ရန်အတွက် လေလံ ၆ စောင်ကို အောင်မြင်ခဲ့သည်ဟု ကုန်သွယ်ရေး သတင်းအရင်းအမြစ်များက ပြောဆို ကြောင်း၊ သို့သော် ဗီယက်နမ်၏ ဆန်ဈေးနှုန်းများသည် တင်ဒါရလဒ်ကြေညာမှုမှ အကျိုးအမြတ် ရရှိရန် မျှော်လင့်နိုင်ဖွယ်မရှိကြောင်း S&P Global ဈေးကွက်သုတေသနအဖွဲ့က ဖော်ပြပါသည်။

   တင်ဒါခေါ်ယူရာတွင် Bulog အေဂျင်စီသည် ဗီယက်နမ်အတွက် ယှဉ်ပြိုင်နိုင်သည့် ပမာဏ ကို သတ်မှတ်ပေးထားသဖြင့် ဈေးနှုန်းများအပေါ် သိသာစွာ သက်ရောက်ခြင်းမရှိဟု စင်ကာပူ အခြေစိုက် ကုန်သည်တစ်ဦးက ပြောကြားခဲ့သည်။ ဗီယက်နမ်မှ အနိမ့်ဆုံးထား ကမ်းလှမ်းသည့် ဈေးနှုန်းမှာ သင်္ဘောတင်စရိတ်နှင့် သယ်ယူပို့ဆောင်ခတို့ ပါဝင်သည့် ဆိပ်ကမ်းအရောက် CNF ဈေးနှုန်း ၁ တန်လျှင် ၅၆၄.၅ ဒေါ်လာခန့်ဖြစ်ပြီး အဆိုပါ တင်ဒါတွင် ယှဉ်ပြိုင်နိုင်စွမ်း အမြင့်ဆုံး ဖြစ်သည်။

   ပို့ကုန်အမှာစာ အသစ်ရရှိခြင်း မရှိသောကြောင့် ဗီယက်နမ်ရှိ ဆန်ရောင်းချသူ အချို့သည် ၎င်းတို့၏ ဆန်ဈေးနှုန်းများကို လျှော့ချခဲ့ကြပြီး S&P Global ၏ လက်အောက်ရှိ Platts ဈေးကွက် အချက်အလက် ထောက်ပံ့ရေးဌာန၏ အဆိုအရ ဗီယက်နမ်မှ ဆန်ကွဲ ၅% ပါဝင်သော ဆန်ဖြူ၏ ဈေးနှုန်းသည် ရက်သတ္တတစ်ပတ်အတွင်း ဆန် ၁ တန်လျှင် ၁၀ ဒေါ်လာနှုန်းဖြင့် ကျဆင်းခဲ့ပြီး ၂၃-၅-၂၀၂၄ ရက်နေ့တွင် သင်္ဘောပေါ်အရောက် FOB စျေးနှုန်းမှာ ၁ တန်လျှင် ၅၆၉ ဒေါ်လာနှုန်းသို့ ရောက်ရှိခဲ့သည်။

    ထိုင်းနိုင်ငံအနေဖြင့် တင်ဒါခေါ်ယူသည့် ဆန်တန်ချိန် ၃ သိန်းအနက် တန်ချိန် ၉၀၀၀၀ အတွက် တင်သွင်းခွင့်ရရှိခဲ့သော်လည်း ထိုင်းကုန်သည်များ၏ အနိမ့်ဆုံး ဈေးနှုန်းကမ်းလှမ်းချက် မှာ ဆိပ်ကမ်းအရောက် CNF ဈေးနှုန်း ၁ တန်လျှင် ၆၄၉ ဒေါ်လာနှုန်းရှိပြီး  ဆန်ဈေးနှုန်းကြီးမြင့်မှု ကြောင့်  တင်ဒါအောင်မြင်မှု မရှိကြောင်း၊ Bulog အနေဖြင့် အဆိုပါ အောင်မြင်မှုမရှိသော လေလံ စောင်ရေများအတွက် တင်ဒါများ ပြန်လည်ခေါ်ယူရန် သေချာမှုမရှိကြောင်း သိရှိရသည်။ ယင်း ရလဒ် ထွက်ပေါ်လာပြီး မကြာမီကာလအတွင်း ထိုင်းဆန်ဈေးနှုန်းများသည် ကျဆင်းလာနိုင် ဖွယ်ရှိသည်ဟု ကုန်သည်တစ်ဦးက ပြောကြားခဲ့သည်။

    မြန်မာနိုင်ငံသည် ဆိပ်ကမ်းအရောက် CNF ဈေးနှုန်း ဆန် ၁ တန်လျှင် ၆၂၁ ဒေါ်လာမှ ၆၂၉ ဒေါ်လာအတွင်း ကမ်းလှမ်းမှုများဖြင့် ဆန်တန်ချိန် ၆၀၀၀၀ ရောင်းချရန်အတွက် လေလံ အောင်မြင်ခဲ့ပြီး မြန်မာနိုင်ငံ၏ ပိုမိုယှဉ်ပြိုင်နိုင်စွမ်းရှိသော ကမ်းလှမ်းမှုများကြောင့် ပါကစ္စတန်မှ  တင်ပို့သူများမှာ တင်ဒါကျရှုံးမှု ရှိခဲ့ကြောင်း သိရသည်။

     အင်ဒိုနီးရှားနိုင်ငံသည် ဆန်ကွဲ ၅% ပါဝင်သော ဆန်ဖြူ တန်ချိန် ၃၀၀၀၀၀ ဝယ်ယူရန် တင်ဒါအသစ်အား မကြာသေးမီက ကြေညာခဲ့ခြင်းဖြစ်သည်။ ၂၀၂၄ ခုနှစ်အတွင်း ယခုအချိန်အထိ ဆန်တန်ချိန် ၁.၇ သန်း တင်ဒါ ၅ ကြိမ်ခေါ်ယူ၍ ဝယ်ယူခဲ့ပြီးဖြစ်သည်။ ဗီယက်နမ်၊ ထိုင်း၊ မြန်မာ နှင့် ပါကစ္စတန် တို့သည် ယခုနှစ်တွင် အင်ဒိုနီးရှားနိုင်ငံအတွက် အဓိက ဆန်တင်သွင်းသူများ ဖြစ် ကြသည်။

    Bulog သည် ၂၀၂၄ ခုနှစ်အတွက် ဆန်တန်ချိန် ၃.၆ သန်း တင်သွင်းရန် ခွဲတမ်းသတ်မှတ် ထားသည်။ အယ်လ်နီညိုဖြစ်စဉ်၏ ခြောက်သွေ့သောရာသီဥတု အခြေအနေများက အင်ဒိုနီးရှား နိုင်ငံ၏ ဆန်စပါးထုတ်လုပ်မှုကို ခြိမ်းခြောက်လျက်ရှိခြင်း၊ ကမ္ဘာလုံးဆိုင်ရာ ဆန်ထောက်ပံ့မှု ပိုမို ကျပ်တည်းလာခြင်းတို့အရ အဆိုပါ ဆန်တင်သွင်းမှုခွဲတမ်း သတ်မှတ်ချက်အား အပြည့်အဝ အသုံး ပြုမည့် အလားအလာရှိနေသည်။

Source: S&P Global, 23 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ဘရာဇီးနိုင်ငံ၊ စီးပွားရေးရာဝန်ကြီးဌာန၊ နိုင်ငံခြားကုန်သွယ်မှုကောင်စီ (CAMEX) ၏ လက်အောက်ရှိ စီမံခန့်ခွဲရေးအမှုဆောင်ကော်မတီသည် ဆန်အမျိုးအစား ၃ ခုအပေါ် သွင်းကုန်ခွန် ဖယ်ရှားရန် လယ်ယာစိုက်ပျိုးရေးနှင့် မွေးမြူရေးဝန်ကြီးဌာနနှင့် အမျိုးသားဆန်အရောင်းကုမ္ပဏီ (CONAB) တို့၏ အဆိုပြုချက်ကို ၂ဝ၂၄ ခုနှစ် မေလ ၂ဝ ရက်နေ့၌ သဘောတူခွင့်ပြုခဲ့ပါသည်။

      အဆိုပါ ခွင့်ပြုချက်အရ ပေါင်းဆန်မဟုတ်သော ဆန်အမျိုးအစား နှစ်ခုနှင့် အရောင်တင် ထားသော ဆန်အမျိုးအစား တစ်ခုတို့ကို သာမန်ပြည်ပ အကောက်ခွန်ကင်းလွတ်ခွင့်စာရင်း (List of Exceptions to the Common External Tariff) တွင် ထည့်သွင်းခဲ့ပါသည်။ ထိုကဲ့သို့ ဆန်သွင်းကုန်ခွန် ဖယ်ရှားရခြင်းမှာ ဘရာဇီးနိုင်ငံ၏ ဆန်ထုတ်လုပ်မှုတွင် ၇ဝ% ခန့် ပါဝင်နေသည့် Rio Grande do Sul ဒေသ၌ ရေလွှမ်းမိုးမှု ဖြစ်ပေါ်ခဲ့သည့်အတွက် နိုင်ငံအတွင်း ဆန်ရောင်းချမှုကို ထိခိုက်မှု မရှိစေရန် ဖြစ်ပါသည်။

       ဘရာဇီး ဖွံ့ဖြိုးတိုးတက်မှု၊ စက်မှု၊ ကုန်သွယ်ရေးနှင့်ဝန်ဆောင်မှုဝန်ကြီး Geraldo Alckmin က အစိုးရအနေဖြင့် စားနပ်ရိက္ခာဖူလုံရေးအတွက် အာမခံနိုင်ရန် ကြိုးပမ်းလျက်ရှိကြောင်းနှင့် အကောက်ခွန်နှုန်းထားများကို သုညရာခိုင်နှုန်းသို့ လျှော့ချဖြတ်တောက်ခြင်းဖြင့် နိုင်ငံအတွင်း ဆန်အရောင်းလျော့နည်းမှုကြောင့် ဆန်ပြတ်လပ်ခြင်း သို့မဟုတ် ဆန်ဈေးနှုန်းများ မြင့်တက်ခြင်း အရေးကိစ္စတို့ကို ရှောင်ရှားနိုင်မည်ဟု ယုံကြည်ကြောင်း ပြောကြားခဲ့ပါသည်။

     ဘရာဇီးနိုင်ငံအပါအဝင် မာကိုဆာသဘောတူညီချက်ကို ချုပ်ဆိုထားသောနိုင်ငံများတွင် ကုန်ပစ္စည်းများအတွက် သတ်မှတ်ထားသော Nomenclatura Comum do Mercosul (NCMs) ခေါ် ကုန်စည်အမျိုးအမည် ခွဲခြားမှုစနစ်အရ NCM 1006.10.92 အောက်ရှိ မကြိတ်ခွဲရသေးသော စပါး၊ NCM 1006.20.20 အောက်ရှိ ကြိတ်ခွဲပြီးဆန်လုံးညိုနှင့် NCM 1006.30.21 အောက်ရှိ ကြိတ် ခွဲပြီးဆန်ဖြူများအတွက် အကောက်ခွန်နှုန်းကို ၂ဝ၂၄ ခုနှစ် ဒီဇင်ဘာလ ၃၁ ရက်နေ့အထိ သုည ရာခိုင်နှုန်း လျှော့ချ သတ်မှတ်သွားမည်ဖြစ်ကြောင်း ဘရာဇီးနိုင်ငံတော်ပြန်တမ်း၌ ထုတ်ပြန်ဖော်ပြ ထားပါသည်။ လိုအပ်ပါက အဆိုပါ အကောက်ခွန်လျှော့ချပေးသည့် အချိန်ကာလကို ဘရာဇီး ဖွံ့ဖြိုး တိုးတက်မှု၊ စက်မှု၊ ကုန်သွယ်ရေးနှင့်ဝန်ဆောင်မှုဝန်ကြီးဌာန၊ နိုင်ငံခြားကုန်သွယ်မှု အထွေထွေ အတွင်းရေးမှူးချုပ်ရုံးက ပြန်လည်သုံးသပ်သွားမည်ဖြစ်ပါသည်။

       လက်ရှိကာလတွင် ဘရာဇီးနိုင်ငံသည် မာကိုဆာသဘောတူညီချက်အရ အကောက်ခွန် သုညရာခိုင်နှုန်းအထိ လျှော့ချထားပြီးဖြစ်သော အဆိုပါ မာကိုဆာအဖွဲ့ဝင်နိုင်ငံများထံမှ ဆန်များ ကို အဓိကဝယ်ယူတင်သွင်းလျက်ရှိသည်။ ဘရာဇီးနိုင်ငံ၏ အကောက်ခွန်နှုန်း လျှော့ချမှုအရ ထိုင်း နိုင်ငံကဲ့သို့သော အခြားသောပင်ရင်းဒေသနိုင်ငံများ ထံမှလည်း ဆန်ဝယ်ယူတင်သွင်းမည့် အလား အလာရှိသည်။ ၂ဝ၂၄ ခုနှစ်အတွင်း ဧပြီလအထိ ဘရာဇီးနိုင်ငံ၏  စုစုပေါင်း ဆန်တင်သွင်းမှုတွင် ထိုင်းနိုင်ငံထံမှ ၁၈.၂% ကို ဝယ်ယူတင်သွင်းခဲ့ပါသည်။

Source: SSRiceNews, 24 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)