ပြည်ပကုန်သွယ်မှုသတင်းများ

     ဗီယက်နမ်နိုင်ငံ၏ ကျောက်မီးသွေးတင်ပို့မှုသည် ဧပြီလတွင် ၁၀၉၂၁၉တန်ရှိပြီး အမေရိကန်ဒေါ်လာ ၂၉ဒသမ ၄သန်းတန်ဖိုးရှိခဲ့ကြောင်း၊ ယခင်လနှင့်နှိုင်းယှဉ်ပါက ပမာဏနှင့် တန်ဖိုးအဆတစ်ရာကျော်တိုးလာကြောင်း ဗီယက်နမ်အကောက်ခွန်ဦးစီးဌာန၏ အချက်အလက်များအရသိရသည်။

      အပူစွမ်းအင်အတွက် ဝယ်လိုအားတိုးမြင့်လာခြင်းကြောင့် နိုင်ငံအများအပြားတွင်  ကျောက်မီးသွေးတင်သွင်းမှုအများဆုံးသောနိုင်ငံအဖြစ် ရပ်တည်လျက်ရှိပြီး အမေရိကန်ဒေါ်လာ ၁၂.၄၃သန်းတန်ဖိုးရှိသော ကျောက်မီးသွေး ၅၃၄၀၄တန်ခန့်တင်သွင်းထားပြီးဖြစ်သည်။

       နယ်သာလန်၊ တောင်အာဖရိက၊ ထိုင်း၊ မလေးရှားနှင့် ဖိလစ်ပိုင်နိုင်ငံတို့သည်လည်း ဗီယက်နမ်နိုင်ငံ၏ ကျောက်မီးသွေးအဓိကတင်သွင်းရာနိုင်ငံများဖြစ်ကြသည်။

     ဗီယက်နမ်သည် အရှေ့တောင်အာရှတွင် ကျောက်မီး‌သွေးအသုံးပြုမှုအများဆုံးသောနိုင်ငံ ၅နိုင်ငံအနက် တစ်နိုင်ငံဖြစ်သည်။ ဗီယက်နမ်အကောက်ခွန်ဦးစီးဌာန၏အဆိုအရ နိုင်ငံအတွင်းရှိ ကျောက်မီးသွေးတန်ချိန်မှာ ၅၀ဘီလီယံခန့်ရှိသည်ဟုဆိုသည်။

       Quang Ninh သည် ဗီယက်နမ်နိုင်ငံ၏ အရေးကြီးဆုံးကျောက်မီးသွေးတွင်းဖြစ်ပြီး ၎င်းကို ၁၈၃၉ခုနှစ်တွင် စတင်လုပ်ဆောင်ခဲ့ကာ ကျောက်မီးသွေးတန်ချိန် ၈.၇ဘီလီယံအထိထုတ်လုပ်နိုင်ခဲ့သည်။ နိုင်ငံတကာဈေးကွက်သို့ သွားလာရန်လွယ်ကူ၍ ပင်လယ်‌ရေနှင့်နီးသော တည်နေရာကြောင့် ၎င်းသည် ထိပ်တန်းကျောက်မီးသွေးတူးဖော်ရေးနယ်မြေဖြစ်လာခြင်းဖြစ်သည်။

      စက်မှုနှင့်ကူးသန်းရောင်းဝယ်ရေးဝန်ကြီးဌာန၏အဆိုအရ ကျောက်မီးသွေးဈေးကွက်သည် ယခုမှ ၂၀၃၀ခုနှစ်အထိတိုးလာမည်ဖြစ်ပြီး တစ်နှစ်လျှင် စီးပွားဖြစ်ကျောက်မီးသွေးတန်ချိန် ၄၃သန်းမှ ၄၇သန်းအထိရှိလာမည်ဖြစ်သည်။ ယင်းနောက် ၂၀၃၅ခုနှစ်မှ ၂၀၄၅ခုနှစ်အတွင်း တဖြည်းဖြည်းလျော့နည်းလာမည်ဟု ခန့်မှန်းထားသည်။

      ဘိလပ်မြေ၊ သတ္တုနှင့် ဓာတုဗေဒကဲ့သို့သော စီးပွားရေးကဏ္ဍများတွင် လျှပ်စစ်ဓာတ်အားဝယ်လိုအားမြင့်တက်လာမှုကြောင့် ၂၀၃၀-၂၀၃၅ ခုနှစ်အတွင်း တစ်နှစ်လျှင် ကျောက်မီးသွေးလိုအပ်ချက်မှာ တန်ချိန် ၉၄သန်းမှ ၁၂၇သန်းအထိ အမြင့်ဆုံးသို့ရောက်ရှိမည်ဖြစ်သည်။ ထို့နောက် ၂၀၄၅ခုနှစ်တွင် တစ်နှစ်လျှင် တန်ချိန် ၇၃-၇၆ သန်းအထိ တဖြည်းဖြည်းလျော့ကျသွားမည်ဖြစ်သည်။

       ပြည်တွင်းတွင် စီးပွားဖြစ်ကျောက်မီးသွေးထုတ်လုပ်မှုသည် ၂၀၂၅-၂၀၃၅ ခုနှစ်တွင် တစ်နှစ်လျှင် တန်ချိန် ၄၅သန်းမှ ၄၇သန်းခန့်ရှိမည်ဖြစ်ပြီး ၂၀၄၅ခုနှစ်တွင် တစ်နှစ်လျှင် တန်ချိန် ၄၂သန်းမှ ၄၄သန်းအထိ တဖြည်းဖြည်းလျော့ကျလာမည်ဖြစ်သည်။ ဝယ်လိုအားနှင့်ကိုက်ညီစေရန် ဗီယက်နမ်မှ တန်ချိန် ၅၀သန်းမှ ၈၃သန်းခန့်တင်သွင်းရန် မျှော်မှန်းထားကြောင်းသိရှိရပါသည်။

Source: Vietnamnews.vn

DOCA(ရန်ကုန်)

      အဆင့်သတ်မှတ်ချက်အပြောင်းအလဲများသည် အာရှမော်တော်ကားထုတ်လုပ်သူများအတွက် အဓိကတိုက်ပွဲဖြစ်လာသည်ဟု ဂျပန်အခြေစိုက် အွန်လိုင်းသတင်းမဂ္ဂဇင်းက မှတ်ချက်ပြုခဲ့သည်။

       ကာလကြာရှည်စွာ တတိယနေရာသို့ရောက်ရှိခဲ့သော မလေးရှားနိုင်ငံ၏ ရောင်းအားကိန်းဂဏန်းများသည် ၂၀၂၄ခုနှစ်၊ ဇန်နဝါရီလမှ မတ်လအထိ သုံးလပတ်ဆက်တိုက် ထိုင်းနိုင်ငံ၏ ထိပ်ဆုံးမှရပ်တည်နေကြောင်း အစီရင်ခံစာတွင် ဖော်ပြထားသည်။

       Malaysian Automotive Association ၏ အဆိုအရ ယခုနှစ် ပထမသုံးလပတ်တွင် မော်တော်ယာဉ်ရောင်းအားသည် ၂၀၂၂၄၅ စီးမှ ၅%တိုးလာခဲ့သည်။ ၂၀၂၃ခုနှစ်တွင် ၁၁% တိုးလာပြီးနောက် ကားအစီးရေ ၇၉၉၇၃၁စီး စံချိန်တင်ထုတ်လုပ်ရောင်းချနိုင်ခဲ့သည်။

   ထိုကဲ့သို့ ရောင်းအားများတက်လာခြင်းမှာ မလေးရှားအစိုးရ၏ စီးပွားရေးနှိုးဆွမှုအစီအစဉ်၏ တစ်စိတ်တစ်ပိုင်းဖြစ်သော ပြည်တွင်း၌ထုတ်လုပ်သည့် မော်တော်ယာဉ်များအတွက် အရောင်းအဝယ်ခွန်ကင်းလွတ်ခွင့်ပြုချက်ကြောင့်ဖြစ်ပြီး ဈေးကွက်ဝေစု၏ 60%ကိုပိုင်ဆိုင်ထားသည့် နိုင်ငံတော်ကားအမှတ်တံဆိပ် Perodua နှင့် Proton တို့၏ ရောင်းအားကိုတိုးလာစေသည်။

        တစ်ချိန်တည်းတွင်ပင် ထိုင်းနိုင်ငံ၏ ရောင်းအားသည် ၂၀၂၃ခုနှစ်အစောပိုင်းထက် ယခုနှစ် ပထမသုံးလပတ်တွင် ၂၅%ခန့်သိသိသာသာကျဆင်းသွားခဲ့သည်။

     မော်တော်ယာဉ်ချေးငွေများတွင် NPL(A non-performing loan) တိုးလာခြင်းနှင့် အထွေထွေသုံးစွဲမှုရပ်တန့်ခြင်းတို့ကြောင့် ထိုင်းနိုင်ငံ၏ လစဉ်မော်တော်ယာဉ်ရောင်းချမှုသည် ပြီးခဲ့သည့်ဇွန်လမှစတင်ကာ တစ်နှစ်ထက်တစ်နှစ် ကျဆင်းလာခဲ့သည်။ သို့သော်လည်း တရုတ်ကားထုတ်လုပ်သူများ ဝင်ရောက်မှုကြောင့် လျှပ်စစ်ကားများ၏ အစုရှယ်ယာဝေစုမှာ တိုးလာခဲ့ကြောင်းသိရှိရပါသည်။

Source: Nationthailand..com

DOCA(ရန်ကုန်)

       ဗီယက်နမ်သည် စတီးလ်အကြမ်းထည်ထုတ်လုပ်မှုတွင် ကမ္ဘာပေါ်၌ နံပါတ်(၁၂) နေရာ၌ ရပ်တည်နေကြောင်းသိရပါသည်။ ထုတ်လုပ်မှုကဏ္ဍ လျင်မြန်စွာတိုးတက်လာရုံသာမက ဗီယက်နမ်စတီးလ်ထုတ်ကုန်များသည် တဖြည်းဖြည်းပိုမိုကွဲပြားခြားနားလာကြောင်း ဗီယက်နမ်နိုင်ငံ စတီးလ်အသင်းထံမှသိရပါသည်။ အသင်းဥက္ကဋ္ဌဖြစ်သူ Ngiem Yuam Da က ၂၀၁၅ခုနှစ်မှစ၍ ဗီယက်နမ်နိုင်ငံ၏ စတီးလ်လောကသည် ထုတ်လုပ်မှုကဏ္ဍတွင်သာမက အချောသတ်ထားသော စတီးလ်ထုတ်ကုန်များရောင်းချမှုတွင် အာဆီယံ၏ထိပ်ဆုံးမှ ဦးဆောင်နေသည့်နိုင်ငံများအနက်  တစ်ခုအဖြစ် ရပ်တည်လျက်ရှိကြောင်းပြောကြားခဲ့ပါသည်။ ၂၀၂၃ခုနှစ်တွင် ဗီယက်နမ်နိုင်ငံသည် စတီးလ်အကြမ်းထည်ထုတ်လုပ်မှုတွင် တန်ချိန်သန်း ၂၀ဖြင့် တစ်ကမ္ဘာလုံး၌ နံပါတ်(၁၂)နေရာ၌ ရပ်တည်ခဲ့ခြင်းဖြစ်ကြောင်းသိရပါသည်။ ဗီယက်နမ်နိုင်ငံသည် ၂၀၀၀ပြည့်နှစ်မတိုင်မီက စတီးလ်အကြမ်းထည်ကို တစ်နှစ်လျှင် တန်ချိန် ၁သိန်းသာထုတ်လုပ်နိုင်ခဲ့ပြီး ပြည်တွင်းလိုအပ်ချက်ကိုသာ အဓိကဖြည့်ဆည်းခဲ့ကြောင်းသိရပါသည်။ ၂၀၀၀ပြည့်နှစ်ကျော်သို့ ဝင်ရောက်လာသောအခါ Hoa Phat၊ Hoa Sen၊ Viet Duc စသည့် ပုဂ္ဂလိကစတီးလုပ်ငန်းများ၊ ဗီယက်နမ်နိုင်ငံစတီးအသင်းနှင့်ပူးတွဲဆောင်ရွက်သည့် Vina Kyoei၊ SSSC နှင့် Vinausteel စသည်တို့ပေါ်ပေါက်လာမှုသည် ဗီယက်နမ်စတီးလ်လောကကို သိသိသာသာပြောင်းလဲစေခဲ့ကြောင်းသိရပါသည်။ အဆိုပါစတီးလ်လုပ်ငန်းများသည် ထုတ်လုပ်နိုင်စွမ်းနှင့် စတီးလ်အရည်အသွေးတို့ကိုတိုးတက်စေခဲ့ပြီး အမျိုးအစားမျိုးစုံကို ဈေးကွက်သို့တင်ပို့နိုင်ခဲ့ကြောင်းသိရပါသည်။ အဆိုပါအချိန်တွင် ဗီယက်နမ်နိုင်ငံသည် စတီးလ်အကြမ်းထည် တန် ၀.၅သန်းနှင့် စတီးလ်ထုတ်ကုန်တန်ချိန် ၂သန်းကို တစ်နှစ်ချင်းတင်ပို့နိုင်ခဲ့ပါသည်။ ၂၀၀၁ခုနှစ်တွင် ဗီယက်နမ်စတီးလ်အသင်းသည် လုပ်ငန်းကြီးများတွင် ပူးပေါင်းပါဝင်မှုများပြုလုပ်လာခဲ့ပါသည်။ အသင်းသည် ပူးပေါင်းဆောင်ရွက်မှုများကို စီးပွားရေးလုပ်ငန်းများအကြား ကြေညာခြင်း၊ ယှဉ်ပြိုင်နိုင်စွမ်းများ တိုးတက်အောင်ဆောင်ရွက်ပေးခြင်း၊ ရေရှည်တည်တံ့သော တိုးတက်မှုတို့ရရှိအောင် အရှိန်မြှင့်တင်ပေးခြင်းတို့တွင် အရေးပါသောကဏ္ဍ၌ ပါဝင်ခဲ့ပါသည်။ ၎င်းတို့၏ တည်ထောင်မှုသည် ဗီယက်နမ်စတီးလ်လုပ်ငန်းကို နိုင်ငံတကာအတွေ့အကြုံများရရှိသင်ယူနိုင်စေသည့် အခြေအနေများဖန်တီးပေးခဲ့ပြီး နည်းပညာသစ်များနှင့် ပြည်ပသို့တင်ပို့မှုတို့ကို တိုးချဲ့ရရှိစေခဲ့ပါသည်။ ကြီးမားပြီး ခေတ်မီသော စတီးလ်လုပ်ငန်းများတွင် ရင်းနှီးမြှုပ်နှံမှုသည် အဓိကစက်မှုနယ်ပယ်များဖြစ်သော စက်ပစ္စည်းများထုတ်လုပ်ခြင်း၊ ဆောက်လုပ်ရေးနှင့်ကာကွယ်ရေးနယ်ပယ်များမှ စိတ်ဝင်စားမှုရရှိစေပြီး စတီးလ်အကြမ်းထည် ထုတ်လုပ်နိုင်စွမ်းကို အရှိန်မြှင့်တင်နိုင်ခဲ့ပါသည်။ အဆိုပါ အားထုတ်မှုများကြောင့် ဗီယက်နမ်နိုင်ငံ၏ စတီးလ်ကဏ္ဍသည် ကမ္ဘာ့စတီးလ်လောကတွင် အရေးပါသည့်နေရာတစ်ခု၌ တဖြည်းဖြည်းမြင့်တက်ရပ်တည်လာကြောင်းသိရပါသည်။

Source: Vietnam Plus

DOCA(ရန်ကုန်)        

       ယူကရိန်းနိုင်ငံသည် လွန်ခဲ့သည့်နှစ်က တန်ချိန်သန်း ၈၀ပမာဏရှိသည့် ကောက်ပဲသီးနှံများနှင့် ဆီထုတ်နိုင်သည့်အစေ့အဆံများကို ကောက်ရိတ်သိမ်းနိုင်ခဲ့ပြီး အမေရိကန်ဒေါ်လာ ၂၂ဘီလီယံပမာဏရှိသည့် လယ်ယာထွက်ကုန်များကို ပြည်ပသို့တင်ပို့ခဲ့ကြောင်း ယူကရိန်းနိုင်ငံ၊ စိုက်ပျိုးရေးဝန်ကြီး Taras Vysotskyi က ၂၀၂၄ခုနှစ်၊ မေလ ၁၆ရက်နေ့ကကြေညာခဲ့ပါသည်။ Vysotskyi ၏ ပြောကြားချက်အရ ၈၇ရာခိုင်နှုန်းသော လယ်ယာထွက်ကုန်များကို အိုဒတ်စာမြို့နှင့် ကပ်လျက်ရှိသော ဆိပ်ကမ်းများမှ တင်ပို့နိုင်ခဲ့ခြင်းဖြစ်ကြောင်းသိရပါသည်။ ထို့ပြင် Vysotskyi က ၂၀၂၃ခုနှစ်တွင် ယူကရိန်းလယ်သမားများသည် အမေရိကန်ဒေါ်လာ ၂၂ဘီလီယံတန်ဖိုးရှိသည့် ထုတ်ကုန်များကိုတင်ပို့ခဲ့ကြောင်း၊ အဆိုပါကိစ္စသည် ယူကရိန်းနိုင်ငံက လိုအပ်သည့်နိုင်ငံများအတွက် အစားအစာများကိုထုတ်လုပ်ပေးနိုင်ပြီး ဖြန့်ဝေပေးနိုင်ကြောင်းကို ကမ္ဘာကြီးအတွက် အချက်ပြခြင်းဖြစ်ကြောင်း၊ ကမ္ဘာလုံးဆိုင်ရာ အစားအစာလုံခြုံစိတ်ချမှုရှိစေရေးအတွက် ယူကရိန်း၏ကဏ္ဍသည် အလွန်အရေးပါကြောင်းနှင့် ကောက်ပဲသီးနှံများကို အာရှနှင့်အာဖရိကသို့ တင်ပို့ခဲ့ခြင်းဖြစ်ကြောင်းပြောကြားခဲ့ပါသည်။ ယူကရိန်းနိုင်ငံသည် ၂၀၂၄ခုနှစ်တွင် ပြည်တွင်းအတွက်သာမက နိုင်ငံတကာလိုအပ်ချက်များကိုပါ ဖြည့်ဆည်းပေးနိုင်မည့် ကောက်ပဲသီးနှံများနှင့် ဆီထုတ်နိုင်သည့်အစေ့များကို စိုက်ပျိုးရန် မျှော်လင့်ချက်ရှိကြောင်းသိရပါသည်။ ကောက်ပဲသီးနှံများတင်ပို့မှုသည် မတ်လတွင် မက်ထရစ်တန် ၅.၂သန်းရှိခဲ့ပြီး ဖေဖော်ဝါရီလက မက်ထရစ်တန် ၅.၈သန်းရှိကြောင်း ခန့်မှန်းမှုများအရသိရပါသည်။

Source: The Kyiv Independent

DOCA(ရန်ကုန်)

      ယခုနှစ်တွင် တရုတ်နိုင်ငံမှ လျှပ်စစ်ကားထုတ်လုပ်သူများသည် ထိုင်းနိုင်ငံ၌ ၎င်းတို့၏ထုတ်လုပ်မှုများကို တိုးမြှင့်သွားမည်ဟုသိရပါသည်။ ထိုင်းနိုင်ငံရင်းနှီးမြှုပ်နှံမှုဘုတ်အဖွဲ့၏ ပြောကြားချက်အရ တရုတ်နိုင်ငံမှ ကားထုတ်လုပ်သူများသည် ယခုနှစ် တတိယသုံးလပတ်တာကာလမှစတင်၍ ထိုင်းနိုင်ငံ၌ ထုတ်လုပ်မှုများကိုစတင်သွားမည်ဖြစ်ပြီး ထိုင်းနိုင်ငံကလိုအပ်သည့် ကုန်ကြမ်းပစ္စည်းများကိုလည်း ထောက်ပံ့ပေးသွားမည်ဖြစ်ကြောင်းသိရှိရပါသည်။ BYD နှင့် GAC Aion တို့သည် ယခုနှစ်၏ တတိယသုံးလပတ်နှင့် စတုတ္ထသုံးလပတ်တို့တွင် လျှပ်စစ်ကားထုတ်လုပ်သွားမည်ဖြစ်ပြီး Changan မှာ ၂၀၂ခုနှစ်၊ အစောပိုင်းကာလတွင် ပြည်တွင်း၌ ထုတ်လုပ်တပ်ဆင်မှုများ စတင်သွားမည်ဟု ထိုင်းနိုင်ငံရင်းနှီးမြှုပ်နှံမှုဘုတ်အဖွဲ့၏ အတွင်းရေးမှူးချုပ် Narit Therdsteerasukdi ကပြောကြားခဲ့ပါသည်။ BYD သည် နှစ်စဥ် လျှပ်စစ်ကားအစီးရေ (၁၅၀၀၀၀) ထုတ်လုပ်ရန်စီစဥ်ထားပြီး GAC Aion မှာ နှစ်ဝက်တာကာလတွင် လျှပ်စစ်ကားအစီးရေ (၅၀၀၀၀)ထုတ်လုပ်ရန်ရည်ရွယ်ထားကြောင်း သတင်းမီဒီယာများ၏ အဆိုအရသိရပါသည်။ Changan မှာ တစ်နှစ်လျှင် လျှပ်စစ်ကားအစီးရေ (၁၀၀၀၀၀) ထုတ်လုပ်မည်ဟုကြေညာထားပြီး ဘက်ထရီစွမ်းအင်သုံးယာဥ်အစီးရေ (၃၀၀၀၀)မှ (၅၀၀၀၀) ကို စတင်ထုတ်လုပ်သွားမည်ဟုသိရပါသည်။ Great Wall Motor(GWM)၊ Neta၊ တရုတ်နိုင်ငံနှင့် ထိုင်းနိုင်ငံတို့ဖက်စပ်ထုတ်လုပ်သည့် SAIC Motor-CP တို့သည် ၎င်းတို့၏လျှပ်စစ်ကားများကို ထိုင်းနိုင်ငံရှိစက်ရုံများတွင် စတင်ထုတ်လုပ်နေပြီဟု Mr Narit ကပြောကြားခဲ့ပါသည်။ ဆက်လက်၍ Mr Narit က ပြည်တွင်းစျေးကွက်ရှိ လျှပ်စစ်ကားများအတွက် အစိတ်အပိုင်းများထောက်ပံ့မှုကွင်းဆက်ဖွံ့ဖြိုးတိုးတက်လာသည့်အတွက် လျှပ်စစ်ကားထုတ်လုပ်မှုများ မြင့်တက်လာရန်မျှော်လင့်ကြောင်း၊ ထို့အတွက် ထိုင်းနိုင်ငံသည် ဒေသတွင်း၌ လျှပ်စစ်ကားထုတ်လုပ်သည့် အချက်အချာဒေသဖြစ်လာမည်ဖြစ်ကြောင်း၊ လွန်ခဲ့သည့်သုံးနှစ်အတွင်း ဘုတ်အဖွဲ့သည် လျှပ်စစ်ကားနယ်ပယ်အတွက် ဘတ် (၈၀)ဘီလီယံတန်ဖိုးပမာဏရှိသည့် ရင်းနှီးမြှုပ်နှံမှုများကိုပံ့ပိုးပေးခဲ့ကာ လျှပ်စစ်ကားအစီးရေ (၄၀၀၀၀၀)ထုတ်လုပ်နိုင်ခဲ့ကြောင်းပြောကြားခဲ့ပါသည်။ အဆိုပါပြောကြားမှုကို ၁၅-၅-၂၀၂၄ ရက်နေ့မှ ၁၇-၅-၂၀၂၄ ရက်နေ့အထိကျင်းပပြုလုပ်ခဲ့သော တရုတ်နိုင်ငံမှ အဓိကလျှပ်စစ်ကားထုတ်လုပ်သူများတက်ရောက်သည့် “လျှပ်စစ်ကားထောက်ပံ့မှုကွင်းဆက်ကဏ္ဍ ရင်းနှီးမြှုပ်နှံမှုဘုတ်အဖွဲ့စာတမ်းဖတ်ပွဲ” တွင် ပြောကြားခဲ့ခြင်းဖြစ်ပါသည်။ ရင်းနှီးမြှုပ်နှံမှုဘုတ်အဖွဲ့သည် ဘက်ထရီထုတ်လုပ်ခြင်းနှင့် လျှပ်စစ်ကားအားသွင်းရုံများတည်ဆောက်ခြင်းတို့တွင် ရင်းနှီးမြှုပ်နှံမှုများပြုလုပ်ခဲ့ပြီး ထိုင်းနိုင်ငံလျှပ်စစ်ကားလောကတိုးတက်ရန် မြှင့်တင်မှုများပြုလုပ်ခဲ့ပါသည်။ ဘုတ်အဖွဲ့အဆိုအရ တရုတ်လျှပ်စစ်ကားထုတ်လုပ်သူများသည် လျှပ်စစ်ကားအတွက်လိုအပ်သည့် အစိတ်အပိုင်းများကို ထိုင်းနိုင်ငံထံမှဝယ်ယူရန်ဆုံးဖြတ်ထားပြီး ထိုင်းနိုင်ငံကလည်း လျှပ်စစ်ကားအစိတ်အပိုင်းစုစုပေါင်း၏ (၉၀)ရာခိုင်နှုန်းကျော်ကို ဖြည့်စည်းပေးနိုင်ကြောင်းသိရပါသည်။

Source; Bangkok Post

DOCA(ရန်ကုန်)