ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံသည် ၂၀၂၄ခုနှစ်၏ ပထမ ၉လတာကာလတွင် အမေရိကန်ဒေါ်လာ ၁၉.၈ ဘီလီယံတန်ဖိုးရှိသည့် ကုန်ပစ္စည်းများကို ပြည်ပသို့တင်ပို့ခဲ့ပြီး ၂၀၂၃ခုနှစ်၏ တူညီသည့်ကာလထက် ၁၇% မြင့်တက်ခဲ့ကြောင်း ကမ္ဘောဒီးယားနိုင်ငံ အကောက်ခွန်နှင့် အခွန်ထွေထွေဦးစီးဌာန၏ တင်ပြချက်အရသိရပါသည်။ တစ်ချိန်တည်းမှာပင် ကမ္ဘောဒီးယားသည် အမေရိကန်ဒေါ်လာ ၂၁ဘီလီယံတန်ဖိုးရှိသည့် ကုန်ပစ္စည်းများအား ပြည်ပဈေးကွက်မှ တင်သွင်းခဲ့ကြောင်း သိရပါသည်။ ထိုအချက်အလက်များအရ ကမ္ဘောဒီးယား၏ စုစုပေါင်းကုန်သွယ်မှုပမာဏသည် အမေရိကန်ဒေါ်လာ ၄၀.၉ ဘီလီယံကျော်ရောက်ရှိခဲ့ပြီး ၂၀၂၃ခုနှစ်၏ တူညီသည့်ကာလထက် ၁၆% မြင့်တက်ခဲ့ကြောင်းသိရပါသည်။ တရုတ်၊ ဗီယက်နမ်နှင့် အမေရိကန်တို့သည် စုစုပေါင်းကုန်သွယ်မှုတန်ဖိုး အမေရိကန်ဒေါ်လာ ၁၁.၁၄ ဘီလီယံ၊ အမေရိကန်ဒေါ်လာ ၇.၈ ဘီလီယံနှင့် အမေရိကန်ဒေါ်လာ ၅.၈ ဘီလီယံ အသီးသီးဖြင့် ကမ္ဘောဒီးယား၏ အကြီးမားဆုံးမိတ်ဖက်များဖြစ်ကြောင်းသိရပါသည်။ အမေရိကန်သည် အမေရိကန်ဒေါ်လာ ၇.၆ ဘီလီယံဖြင့် ကမ္ဘောဒီးယား၏ အကြီးမားဆုံးတင်ပို့ရာဈေးကွက်ဖြစ်ပြီး ဗီယက်နမ်က အမေရိကန်ဒေါ်လာ ၂.၇ ဘီလီယံဖြင့် ဒုတိယ၊ တရုတ်က အမေရိကန်ဒေါ်လာ ၁.၂၇ ဘီလီယံဖြင့် တတိယနေရာတွင် ရပ်တည်နေကြောင်းသိရပါသည်။ ကမ္ဘောဒီးယား၏ တရုတ်၊ တောင်ကိုရီးယားတို့နှင့် လွတ်လပ်သောကုန်သွယ်ရေးသဘောတူညီချက်များနှင့် ဒေသဆိုင်ရာ ကျယ်ပြန့်သောစီးပွားရေးမိတ်ဖက်အဖွဲ့တို့က ကုန်သွယ်ရေးကြီးထွားမှုတွင် သိသာစွာပါဝင်ခဲ့ကြောင်းသိရပါသည်။ ကမ္ဘောဒီးယား၏ အဓိကတင်ပို့သည့်ထုတ်ကုန်များမှ အဝတ်အထည်များ၊ စက်ပစ္စည်းများ၊ လျှပ်စစ်တပ်ဆင်ပစ္စည်းများ၊ ဖိနပ်ထုတ်ကုန်များ၊ သားရေကုန်ပစ္စည်းများ၊ နှံစားသီးနှံများ၊ ပရိဘောဂ၊ ရော်ဘာ၊ သစ်သီးများ၊ ဟင်းသီးဟင်းရွက်များ၊ ပုလဲများ၊ အရုပ်များ၊ အထည်အလိပ်များဖြစ်ကြောင်းသိရပါသည်။ အဓိကသွင်းကုန်များမှာ ဆေးဝါးနှင့် ဖြည့်စွက်စာများ၊ လူသုံးကုန်ပစ္စည်းများ၊ အစားအစာနှင့် အဖျော်ယမကာများဖြစ်ကြောင်းသိရပါသည်။ အဝတ်အထည်၊ ဖိနပ်နှင့် ခရီးသွားအသုံးအဆောင်လုပ်ငန်းသည် အကြီးမားဆုံးနိုင်ငံခြားငွေရရှိရာကဏ္ဍဖြစ်ပြီး စက်ရုံပေါင်း ၁၃၀၀ခန့်ရှိကာ လုပ်သား ၈၅၀၀၀၀ခန့်အပ်ထားကြောင်းသိရပါသည်။ နိုင်ငံတကာငွေကြေးရန်ပုံငွေအဖွဲ့ကလည်း ၂၀၂၄ခုနှစ်တွင် ကမ္ဘောဒီးယား၏ စီးပွားရေးကို ၅.၅% တိုးချဲ့နိုင်မည်ဟု ခန့်မှန်းထားကြောင်းသိရပါသည်။ Source: Kbmer Times DOCA(ရန်ကုန်)

ထိုင်းနိုင်ငံစီးပွားကူးသန်းဝန်ကြီးဖြစ်သူ Pichai Naripthaphan နှင့်လာအိုနိုင်ငံစက်မှုမှုနှင့် စီးပွားကူးသန်းဝန်ကြီးဖြစ်သူ Malaythong Kommmasith တို့၏ အပြန်အလှန်ဆွေးနွေးပွဲအပြီးတွင် နှစ်နိုင်ငံသည် အပြန်အလှန်စီးပွားရေးနှင့်ကုန်သွယ်ရေးပူပေါင်းဆောင်ရွက်ရေး၊ အထူးသဖြင့် နယ်စပ်ဖြတ်ကျော်ကုန်သွယ်ရေးပူးပေါင်းဆောင်ရွက်ရေးတို့တွင် ပိုမိုအားကောင်းရန် သဘောတူညီခဲ့ကြပြီး ၂၀၂၅ခုနှစ်တွင် အပြန်အလှန်ကုန်သွယ်မှုပမာဏကို အမေရိကန်ဒေါ်လာ ၁၁ဘီလီယံထိရောက်ရှိရန် ပစ်မှတ်ထားနေကြောင်းသိရပါသည်။ ထိုင်းနိုင်ငံသည် လာအိုနိုင်ငံ၏ အဓိကကုန်သွယ်ရေးမိတ်ဖက်နိုင်ငံဖြစ်ပြီး ၂၀၂၃ခုနှစ်တွင် အပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၇.၆၃ ဘီလီယံရှိခဲ့ကြောင်းသိရပါသည်။ Mr.Pichai က ထိုင်းကုန်ပစ္စည်းများကို လာအိုနိုင်ငံသို့ သယ်ယူပို့ဆောင်ရာတွင် လွယ်ကူချောမွေ့စေရန် ကိုဗစ်ကာလမှစတင်၍ပိတ်ထားသည့် နယ်စပ်စစ်ဆေးရေးဂိတ် ၄ခုကိုပြန်လည်ဖွင့်ပေးရန် Mr. Malaythong ကိုတောင်းဆိုခဲ့ကြောင်းပြောကြားခဲ့သည်။ ယာယီအကူးအပြောင်းကုန်သွယ်ရေးနှင့်ပတ်သက်၍ Mr.Pichai က R3A၊ R9 နှင့် R12 လမ်းကြောင်းနှင့် လာအို-တရုတ် ရထားလမ်းတို့မှတစ်ဆင့် ထိုင်းကုန်ပစ္စည်းများအား နယ်စပ်ဖြတ်ကျော်၍ တရုတ်နှင့်ဗီယက်နမ်သို့ တင်ပိုရာတွင် လွယ်ကူချောမွေ့စေရေးအတွက် လာအိုကိုတောင်းဆိုခဲ့ကြောင်းသိရပါသည်။ Mr.Pichai က ထိုင်းမှထရပ်ကားများ လာအိုကိုဝင်ရောက်၍ တရုတ်သို့ သစ်သီးများတင်ပို့ရန်ခွင့်ပြုရာတွင် အကောက်ခွန်လုပ်ငန်းစဉ်များကို ဖြေလျှော့ပေးသည့်အတွက် လာအိုအစိုးရကို ကျေးဇူးတင်စကားပြောကြားခဲ့ပါသည်။ ထို့ပြင် Mr.Pichai က နယ်စပ်စစ်ဆေးရေးဂိတ်အားလုံး၌ သယ်ယူပို့ဆောင်ခွင့်ပြုရန် လိုင်စင်အတွက်ကာလကို ၁၅ရက်မှ ၃၀ရက်အထိတိုးမြှင့်ပေးရန် လာအိုအာဏာပိုင်များကိုတောင်းဆိုခဲ့ကြောင်းသိရပါသည်။ လာအိုအစိုးရကလည်း လမ်းကြောင်း ၃ခုလုံးတွင်နယ်စပ်ဖြတ်ကျော်နှင့် ယာယီအကူးအပြောင်းကုန်သွယ်ရေးနှစ်ခုလုံးတွင် လွယ်ကူချောမွေ့စေရန်နှင့် သယ်ယူပို့ဆောင်ခွင့်လိုင်စင်အတွက် ကာလကိုတိုးမြှင့်ပေးရန် ကတိပြုခဲ့ကြောင်းသိရပါသည်။ ထိုဆွေးနွေးပွဲသည် အာဆီယံ၏ ဒစ်ဂျစ်တယ်စီးပွားရေးမူဘောင်သဘောတူညီချက် (DEFA) ပြီးမြောက်ရေး တွန်းအားပေးဆောင်ရွက်ရန်နှင့် ၂၀၂၄ခုနှစ်တွင် ဆွေးနွေးမှု၏ ၅၀ရာခိုင်နှုန်းပြီးမြောက်ရန် ရည်ရွယ်ကြောင်းလည်းသိရပါသည်။ ထိုကနဦးစတင်မှုသည် လာအို MSME လုပ်ငန်းများ e-commerce သို့ ပိုမိုဝင်ရောက်နိုင်မည်ဖြစ်ကာ လာအို၏ကုန်သွယ်မှုတန်ဖိုးမြင့်တက်ရန် ကူညီပေးနိုင်မည်ဟုသိရပါသည်။ Mr.Pichai က ထိုင်းနိုင်ငံသည် လာအိုနိုင်ငံအား စိုက်ပျိုးရေးထုတ်ကုန်များ၊ ကုန်သွယ်မှုမြှင့်တင်ခြင်းနှင့် စိုက်ပျိုးရေးကဏ္ဍတွင် နည်းပညာထောက်ပံ့ခြင်းတို့တွင် ကူညီပံ့ပိုးသွားမည်ဟုပြောကြားခဲ့ပါသည်။ နှစ်နိုင်ငံလုံးသည် လာအို၏ကုန်သွယ်ရေးလိုငွေပြမှုကိုဖြေရှင်းရာတွင် ကူညီရန် လာအိုထုတ်ကုန်များ ဝယ်ယူမှုမြှင့်တင်ခြင်း၏အရေးပါမှုနှင့် လာအိုတွင် ပြည်တွင်းထုတ်လုပ်မှုကိုတွန်းအားပေးရန် အရေးထားခဲ့ကြကြောင်းသိရပါသည်။ Source: Bangkok post DOCA(ရန်ကုန်)