ပြည်ပကုန်သွယ်မှုသတင်းများ

     နိုင်ငံရပ်ခြားရင်းနှီးမြုပ်နှံမှု လုပ်ငန်းများနှင့် ဆွေးနွေးပွဲကို ယခုနှစ် သြဂုတ်လတွင် မြို့တော် ဟနွိုင်း ပြည်သူ့ကော်မတီကကြီးမှူးကျင်းပမည်ဖြစ်သည်။

   အဆိုပါ ညီလာခံတွင် ကိုယ်စားလှယ် ၁၅၀ မှ ၂၀၀ ခန့် တက်ရောက်ကာ မြို့တွင်းရှိ နိုင်ငံခြား ရင်းနှီးမြုပ်နှံမှုလုပ်ငန်းများနှင့် နိုင်ငံခြား ရင်းနှီးမြုပ်နှံသူများအတွက် အတားအဆီးများ ဖယ်ရှားရန် ရည်ရွယ်၍ ကိစ္စရပ်းများကိုဆွေးနွေးသွားမည်ဖြစ်သည်။

   စီးပွားရေးလုပ်ငန်းများ၊ နိုင်ငံခြားရင်းနှီးမြုပ်နှံသူများနှင့် မြို့တော်၏နိုင်ငံတော်စီမံခန့်ခွဲရေး အေဂျင်စီများအကြား အဆက်အသွယ်ဖလှယ်နိုင်ရန် အခွင့်အလမ်းများဖန်တီးပေးမည်ဖြစ်ပြီး တစ်ချိန်တည်းတွင်နိုင်ငံခြားစီးပွားရေးလုပ်ငန်းများနှင့် နိုင်ငံခြားရင်းနှီးမြုပ်နှံသူများအတွက် ရင်းနှီး မြုပ်နှံမှု၊ ထုတ်လုပ်မှုနှင့် လုပ်ငန်းချဲထွင်ရန်အတွက် မူဝါဒဆိုင်ရာ အချက်အလက်များကို ပိုမိုပေး အပ်သွားမည်ဖြစ်ကြောင်းသိရသည်။

   ဟနွိုင်းစာရင်းအင်းဌာန၏အဆိုအရ ပြီးခဲ့သောမေလတွင် မြို့တော်အတွင်း၌ အသစ်တည်ထောင်ထားသောစီးပွားရေးလုပ်ငန်း ၃၂၄၈ ခုအား အသိအမှတ်ပြုလက်မှတ်များထုတ်ပေးခဲ့ပြီး မှတ်ပုံတင်မတည်ရင်းနှီးငွေ ဗီယက်နမ်ဒေါ်လာ ၂၈.၂ ထရီလီယမ်အား အသုံးပြုခဲ့ကြောင်း သိရသည်။

    ၂၀၂၄ ခုနှစ်ပထမငါးလပတ်အတွင်း မှတ်ပုံတင်မတည်ရင်းနှီးငွေစုစုပေါင်း ဗီယက်နမ် ဒေါ်လာ ၁၂၄.၃ ထရီလီယမ်‌‌ ဖြင့် အသစ်တည်ထောင်သည့်စီးပွားရေးလုပ်ငန်း ၁၂၉၀၀ ခန့်အား အသိအမှတ်ပြုလက်မှတ်များထုတ်ပေးခဲ့ပြီး ၂၀၂၃ ခုနှစ်အလားတူကာလနှင့် နှိုင်းယှဥ်ပါက လုပ်ငန်းအရေအတွက်မှာ ၂ ရာခိုင်နှုန်းကျဆင်းခဲ့ကာ မှတ်ပုံတင်မတည်ရင်းနှီးငွေ ၃.၅ ရာခိုင်နှုန်း ကျဆင်းခဲ့သည်။

    မြိုတော်အတွင်းရှိလုပ်ငန်းပေါင်း ၁၇၀၀ အား ဖျက်သိမ်းခဲ့ပြီး ယာယီရပ်ဆိုင်းရန် စာရင်းသွင်းထားသော လုပ်ငန်းပေါင်း ၁၆၂၀၀ နီးပါးရှိခဲ့သည်။ တစ်ချိန်တည်းတွင် စီးပွားရေးလုပ်ငန်းပေါင်း ၅၄၀၀ အား ပြန်လည်ဖွင့်လှစ်နိုင်ခဲ့ကြောင်း သိရသည်။

Source : Vietnamnews

DOCA(ရန်ကုန်)

     ကမ္ဘောဒီးယားနိုင်ငံ စိုက်ပျိုးမွေးမြူရေး၊ သစ်တောနှင့်ငါးလုပ်ငန်းဝန်ကြီးဌာနသည်  ကမ္ဘောဒီးယားဒူးရင်းသီးများကို တရုတ်နိုင်ငံသို့တင်ပို့နိုင်ရန်အတွက် နားလည်မှု သဝဏ်လွှာ (MOU) လက်မှတ်ရေးထိုးခွင့်ရရန် ကြိုးစားလျက်ရှိကြောင်း သိရပါသည်။ နိုင်ငံတစ်ဝှမ်းလုံးရှိ ဒူးရင်းသီး စိုက်ပျိုးသူများနှင့်ရောင်းချသူများသည် အကယ်၍ တရုတ်ဈေးကွက်သို့ ဒူးရင်းသီး တင်ပို့ရန် အဆိုပြုချက် အကောင်အထည်ပေါ်လာပါက ၎င်းတို့ပိုမိုဝင်ငွေရရှိမည်ဟု မျှော်လင့်လျက်ရှိပါသည်။ စိုက်ပျိုးမွေးမြူရေး၊ သစ်တောနှင့်ငါးလုပ်ငန်းဝန်ကြီးဌာန၏ ပြောရေးဆိုခွင့်ရှိသူ Khim Finan က ဝန်ကြီးဌာနအနေဖြင့် ကမ္ဘောဒီးယားဒူးရင်းသီးများကို တရုတ်နိုင်ငံသို့ တင်ပို့ခွင့် ရရန် ဆွေးနွေးနေသော်လည်း လတ်တလောတွင် ဆွေးနွေးဆဲအဆင့်သာရှိသေးကြောင်း၊ ထို့ပြင် ယခင်ကလည်း အခြားသီးနှံများကိုတင်ပို့ရန် ဆွေးနွေးမှုများရှိခဲ့ပြီး အုန်းသီးစိမ်းသာ တရုတ်သို့ တင်ပို့ရန် ခွင့်ပြုချက်ရခဲ့ကြောင်းနှင့် ဒူးရင်းသီး၊ နာနတ်သီးနှင့် ပိန္နဲသီးတို့ကို ခွင့်ပြုချက်ရရန် စောင့်ဆိုင်း လျက်ရှိနေကြောင်း ပြောကြားခဲ့ပါသည်။ အဆိုပါ သီးနှံများကိုတင်ပို့ရန်အတွက် MOU ရေးထိုးသည့်အဆင့်များမှာ ကျယ်ပြန့်ကြောင်း သိရပါသည်။ အဘယ်ကြောင့်ဆိုသော် အသီးအမျိုးအစား တစ်ခုချင်းစီအတွက် ညှိနှိုင်းဆွေးနွေးရသည့် သတ်မှတ်ချက်အခြေအနေများမှာ ကွဲပြားသောကြောင့်ဖြစ်သည်ဟု သိရပါသည်။ ကမ္ဘောဒီးယားနိုင်ငံမှ ဒူးရင်းသီးစိုက်ပျိုးရောင်းချသူ Khim Bunlene က ကမ္ဘောဒီးယားနိုင်ငံမှ ဒူးရင်းသီးစိုက်ပျိုးသူအများစုသည် ဒူးရင်းသီးများကို ပြည်ပသို့ တင်ပို့နိုင်ရန်အတွက် တရားဝင်ဈေးကွက်ဖွင့်ပေးရန်အလိုရှိကြောင်း၊ အထူးသဖြင့် တရုတ်ဈေးကွက်သို့ တင်ပို့ချင်ကြကြောင်း၊ အကယ်၍ ကမ္ဘောဒီးယားအစိုးရသည် တရုတ်ဈေးကွက်ဖွင့် ‌ပေးနိုင်ပါက စိုက်ပျိုးရေးသမားများကို ပိုမိုယုံကြည်ချက်ပေးစွမ်းနိုင်မည်ဖြစ်ကြောင်း ပြောကြားခဲ့ကြသည်။ ထို့ပြင် Khim Bunlene က ကမ္ဘောဒီးယားဒူးရင်းသီးများကို တရုတ်ဈေးကွက်သို့ တိုက်ရိုက်တင်ပို့နိုင်မည်ဆိုပါက အကျိုးကျေးဇူးများစွာရရှိမည်ဖြစ်ကြောင်း၊ စိုက်ပျိုးရေးသမားများအတွက် ကောင်းမွန်သည့်ဈေးနှုန်းနှင့် ဈေးကွက်ကိုရရှိမည်ဖြစ်ကြောင်း၊ ရင်းနှီး မြှုပ်နှံမည့်သူများကို စွဲဆောင်နိုင်ပြီး တိုက်ရိုက်ပြည်တွင်းဝင်ငွေရရှိမည်ဖြစ်ကြောင်း၊ ကမ္ဘောဒီးယား လူမျိုးများအတွက်လည်း အလုပ်အကိုင်များ ပိုမိုဖန်တီးပေးနိုင်မည်ဖြစ်ကြောင်း ပြောကြားခဲ့ပါသည်။

Source: Khmer Times

DOCA(ရန်ကုန်)

   ပြင်းထန်သည့်ရာသီဥတုအခြေအနေ၊ တင်ပို့သည့်ဈေးနှုန်းများနှင့်စပ်လျဉ်း၍ ယှဉ်ပြိုင်ရသည့် ဖိအား၊ မြင့်မားသည့် အချက်အလက်ဖြည့်သွင်းရသည့် ကုန်ကျစရိတ်များနှင့် ပစ္စည်း ပြတ်လပ်မှုများစသည့် စိန်ခေါ်မှုများရှိနေသော်လည်း ဗီယက်နမ်နိုင်ငံ၏ ဇန်နဝါရီလမှ ဇွန်လအထိ ရေထွက်ကုန်တင်ပို့မှုမှာ အမေရိကန်ဒေါ်လာ ၄.၄ ဘီလီယံရောက်ရှိရန် မျှော်လင့်ရပြီး လွန်ခဲ့သည့်နှစ် တူညီသည့်ကာလထက် ၆ ရာခိုင်နှုန်း မြင့်တက်လာနိုင်ကြောင်း ဗီယက်နမ်နိုင်ငံ ပင်လယ်စာတင်ပို့ သူများနှင့် ထုတ်လုပ်သူများအသင်း အဆိုအရ သိရပါသည်။ ဗီယက်နမ်နိုင်ငံ သည် ၂၀၂၄ ခုနှစ်၏ ပထမ(၅)လဖြစ်သည့် ဇန်နဝါရီလမှ မေလအထိ ခန့်မှန်းတန်ဖိုးမှာ အမေရိကန်ဒေါ်လာ ၃.၆ ဘီလီယံ ပမာဏရှိသည့် ရေထွက်ကုန်များကို ပြည်ပသို့တင်ပို့ခဲ့ပြီး လွန်ခဲ့သည့်နှစ် တူညီသည့် ကာလထက် ၆.၅ ရာခိုင်နှုန်း မြင့်တက်ခဲ့ကြောင်း သိရပါသည်။ တင်ပို့မှု ဈေးကွက်သည် ဝယ်လိုအားတွင်သာမက ‌ဈေးနှုန်းတွင်ပါ ပြန်လည်နာလန်ထူလာသည့် လက္ခဏာ များ ပြသခဲ့ပြီး မေလတွင်  ဂျပန်၊ တောင်ကိုရီးယားနှင့် ဥရောပသမဂ္ဂဈေးကွက်သို့ တင်ပို့မှုမှာ အပေါင်းလက္ခဏာဆောင်သည့် ၅ ရာခိုင်နှုန်းမှ ၂၆ ရာခိုင်နှုန်းထိ ကြီးထွားလာကြောင်း သိရပါသည်။ ၂၀၂၄ ခုနှစ်၏ ပထမ(၅)လ တွင် အမေရိကန်နိုင်ငံသို့ အမေရိကန်ဒေါ်လာ ၆၃၅ သန်း ပမာဏရှိသည့် ရေထွက်ကုန်များ တင်ပို့ခဲ့ပြီး ရာခိုင်နှုန်းအားဖြင့် ၁၃ ရာခိုင်နှုန်း တိုးတက်လာကြောင်း သိရပါသည်။ တစ်နှစ်လုံးစာအတွက် ရည်မှန်းထားသည့် ရေထွက်ကုန်တင်ပို့မှုမှတစ်ဆင့် အမေရိကန်ဒေါ်လာ ၁၀ ဘီလီယံရရှိရန်အတွက် ဗီယက်နမ်နိုင်ငံစိုက်ပျိုးမွေးမြူရေးနှင့် ကျေးလက်ဖွံ့ဖြိုးရေးဝန်ကြီးဌာနက ဒေသခံများအနေဖြင့် လုပ်ငန်းများ၊ အသင်းများနှင့် လက်တွဲကာ ဈေးကွက်ဖွံ့ဖြိုးတိုးတက်ရေးကို မျက်ခြေမပြတ်စောင့်ကြည့်ရန်နှင့် ကျိုးကြောင်းသင့်သည့် ထုတ်လုပ်ရေးအစီအစဉ်များထားရှိရန် တောင်းဆိုခဲ့သည်။ ထို့ပြင် လုပ်ငန်းများအနေဖြင့်လည်း ဈေးကွက်ချဲ့ထွင်ရန်၊ ဈေးကွက်စည်းမျဉ်းများကို လိုက်နာရန်၊ တင်ပို့မှုများ လွယ်ကူချောမွေ့ စေရန်အတွက် မူဝါဒများကို ပြင်ဆင်ထုတ်ပြန် အဆိုပြုရန်အတွက် အတူတကွ လက်တွဲ သင့်ကြောင်းနှင့် ထုတ်လုပ်မှုကုန်ကျစရိတ် လျှော့ချ‌ရေးအတွက် နည်းပညာမြင့်များတွင် ရင်းနှီးမြှုပ်နှံမှုပြုရန်၊ ချိတ်ဆက်ဆောင်ရွက်မှုမြှင့်တင်ရန်နှင့် နည်းပညာပိုင်းဆိုင်ရာ အတားအဆီးများကို ဖယ်ရှားရန် တိုက်တွန်းခဲ့ကြောင်း သိရပါသည်။

Source: Vietnam Plus

DOCA(ရန်ကုန်)

     တရုတ်နိုင်ငံဘေဂျင်းမြို့မှ စည်းကြပ်ခွန်များရုတ်သိမ်းပြီးနောက် တစ်လအတွင်း သြစတြေလျဝိုင်ထုတ်လုပ်သူများသည် တရုတ်နိုင်ငံသို့ သြစတြေးလျဒေါ်လာ ၈၆ သန်းတန်ဖိုးရှိသော ဝိုင်များအားတင်ပို့ခဲ့ကြောင်း သြစတြေလျကုန်သွယ်ရေးဝန်ကြီးဌာန၏ ပြောကြားချက်အရ သိရသည်။

    ၂၀၂၀ ခုနှစ်နိုဝင်ဘာလအထိ တရုတ်နိုင်ငံသည် စည်းကြပ်ခွန်များချမှတ်၍ သြစတြေးလျ နိုင်ငံ၏ဝိုင်တင်သွင်းမှုကို ပိတ်ဆို့ထားခဲ့ပြီး ကုန်သွယ်မှုကိုပြိုလဲသွားစေခဲ့သည်။ ထို့နောက်တရုတ် နိုင်ငံသည် ၎င်းတို့၏စည်းကြပ်ခွန်များအား ၂၀၂၄ မတ်လ ၂၉ ရက်မှစတင်ကာ ရုတ်သိမ်းခဲ့သည်။

  သြစတြေးလျ၏ဝိုင်စျေးကွက်ကို တရုတ်နိုင်ငံတွင်းသို့ အပြည့်အဝပြန်လည်ဝင်ရောက်နိုင်လိမ့်မည်ဟု ယုံကြည်ထားကြောင်း အချက်အလက်အထောက်အထားများအရ တရုတ်စျေးကွက်အတွင်း၌ သြစတြေးလျနိုင်ငံ၏ ဝိုင်ဝယ်လိုအားများတိုးတက်လျက်ရှိကြောင်း သြစတြေးလျကုန် သွယ်ရေးဝန်ကြီး Don Farrell က သြစတြေးလျတောင်ပိုင်း ဝိုင်စက်ရုံရှိ ဝိုင်စည်ပိုင်းများ ရှေ့တွင်ရပ်ကာ ပြောကြားခဲ့သည်။

      ဧပြီလတွင်တရုတ်နိုင်ငံသို့တင်ပို့ရောင်းချသည့်ဝိုင်များသည် စျေးသက်သာသော စျေးကွက်ထုတ်ကုန်ဝိုင်များထက်ပို၍ သာလွန်ကောင်းမွန်သော ပရီမီယာအဆင့်ဝိုင်များဖြစ်ကြောင်း Don Farrell ကဆက်လက်ပြောကြားခဲ့သည်။

     တရုတ်အမေရိကန်နှင့် ဂျပန်နိုင်ငံတို့တွင် အရောင်းမြင့်တင်နိုင်ရန်အတွက် ဝိုင်ထုတ်လုပ်သောလုပ်ငန်းများအား‌ ဒေတာအချက်အလက်နှင့် စျေးကွက်ရှာဖွေရာရေးကဏ္ဍများအား တိုးတက်လာအောင် ထောက်ပံ့ပေးနိုင်ရန်အတွက် အစိုးရမှဝိုင်လုပ်ငန်းများအား သြစတြေးလျန်‌ ဒေါ်လာ ၃.၅ သန်းအား ထောက်ပံ့ပေးသွားမည်ဖြစ်ကြောင်း ဇွန်လ ၅ ရက်နေ့ (ဗုဒ္ဓဟူးနေ့) က ထုတ်ပြန်ခဲ့သည်။

Source : Marketscreener.com

DOCA(ရန်ကုန်)

    ဖိလစ်ပိုင်နိုင်ငံတွင် အယ်လ်နီညိုရာသီဥတုဖြစ်စဉ်သည် ၂ဝ၂၄ ခုနှစ် ဇွန်လအတွင်း  အားလျော့လာခဲ့သော်လည်း ပူပြင်းခြောက်သွေ့သော အခြေအနေများကြောင့် ဆန်၊ ပြောင်းနှင့် အခြားတန်ဖိုးမြင့်မားသည့် သီးနှံများကဲ့သို့သော စားသောက်ကုန်စည်များအပေါ် အကျိုးသက်ရောက်မှု များ ကျန်ရှိနေသေးကြောင်းနှင့် ဇွန်လ ၆ ရက်နေ့အထိ လယ်ယာစိုက်ပျိုးမှုဧရိယာ ၁၇ဝ၄၆၉ ဟက်တာကို ထိခိုက်ခဲ့ပြီး ပီဆိုငွေ ၉.၈၉ ဘီလီယံကျော် (အမေရိကန်ဒေါ်လာ ၁၆၈.၇၁ သန်းခန့်) ဆုံးရှုံးမှု ဖြစ်ပေါ်ခဲ့ကြောင်းဖြင့် သဘာဝဘေးအန္တရာယ်လျော့နည်းရေးနှင့် စီမံခန့်ခွဲမှုဌာနမှတစ်ဆင့် ဖိလစ်ပိုင်လယ်ယာစိုက်ပျိုးရေးဦးစီးဌာနက အစီရင်ခံတင်ပြခဲ့ပါသည်။

   အယ်လ်နီညိုသက်ရောက်မှုခံရသော လယ်ယာထွက်ကုန်သီးနှံများအနက် ဆန်စပါးကဏ္ဍ မှာ ထိခိုက်မှုအများဆုံးဖြစ်ပြီး ဆုံးရှုံးမှု ၄၈% နှင့် တန်ဖိုးအားဖြင့် ပီဆို ၄.၇၅ ဘီလီယံ၊ ပြောင်းမှာ ဆုံးရှုံးမှု ဒုတိယအများဆုံးဖြစ်ကာ ၃၄% နှင့် တန်ဖိုးအားဖြင့် ပီဆို ၃.၃၇ ဘီလီယံနှင့် တန်ဖိုးမြင့် သီးနှံများမှာ ၁၇% နှင့် တန်ဖိုးအားဖြင့် ပီဆို ၁.၇ ဘီလီယံ  ရှိခဲ့ကြောင်း သိရှိရပါသည်။ ငါးလုပ်ငန်း ကဏ္ဍတွင် ပျက်စီးဆုံးရှုံးမှုမှာ ပီဆို ၅၇.၇ သန်းရှိခဲ့ပြီး တီလားပီးယား၊ ငါးကြင်း၊ ဘန်းဂက်စ်၊ ငါးခူ၊ ပုစွန်ဆိတ်၊ ပင်လယ်ရေမှော်နှင့် ပင်လယ်အာချင် (sea urchins) ထုတ်လုပ်မှုလုပ်ငန်းများ ပါဝင်ပါသည်။

တိရစ္ဆာန်မွေးမြူရေးနှင့် ကြက်ဘဲမွေးမြူရေးကဏ္ဍတို့တွင် ဆုံးရှုံးမှုမှာ ပီဆို ၁ဝ.၄၇ သန်း ရှိခဲ့ကြောင်းနှင့် လယ်သမားနှင့် ရေလုပ်ငန်းလုပ်ကိုင်သူဦးရေ ၂ဝဝဝဝဝ ခန့်မှာ အယ်လ်နီညိုကြောင့် ဆိုးရွားသောထိခိုက်မှုများဖြစ်ခဲ့ပြီး စုစုပေါင်း လယ်ယာကဏ္ဍဆုံးရှုံးမှုမှာ ပမာဏအားဖြင့် ၄၄၁၈ဝ၁ မက်ထရစ်တန်ရှိခဲ့ကြောင်း သိရှိရပါသည်။ လယ်ယာစိုက်ပျိုးရေးကဏ္ဍတွင် ပူပြင်းသော ရာသီဥတုကြောင့် ထိခိုက်ခဲ့သော လယ်ယာမြေ ၁၂၁၃၆၇ ဟက်တာ၏ ၇၁% ခန့်မှာ ပြန်လည်ဆယ်တင် ရရှိနိုင်မည့် အခွင့်အရေးရှိပါသည်။

   ဖိလစ်ပိုင်အစိုးရသည် နိုင်ငံတစ်ဝန်းရှိ တောင်သူများနှင့် ငါးမွေးမြူရေးလုပ်ငန်း လုပ်ကိုင်သူများသို့ ပီဆို ၈.၅၉ ဘီလီယံရှိသော ငွေသားထောက်ပံ့ခြင်း၊ ပီဆို ၆၅၉.၁၇ သန်း တန်ဖိုးရှိသည့် ဓာတ်မြေဩဇာနှင့် စိုက်ပျိုးရေးလုပ်ငန်းသုံးပစ္စည်းများ ထောက်ပံ့ခြင်း၊ အယ်လ်နီညိုကြောင့် ထိခိုက်ဆုံးရှုံးခဲ့သည့် တောင်သူ ၂ဝ၃၇၂ ဦးအတွက် သီးနှံအာမခံကြေး ပီဆို ၁၇၇.၁၂ သန်း ပေးအပ် ခြင်း၊ ပီဆို ၈ သန်း တန်ဖိုးရှိသည့် ဆန်စက်ပစ္စည်းနှင့် စက်ကိရိယာများထောက်ပံ့ခြင်း၊  ပြန်လည် ထူထောင်ရေးချေးငွေ ပီဆို ၉၉.၃၈ သန်းပေးအပ်ခြင်း၊ ပီဆို ၅.၁၉ သန်း တန်ဖိုးရှိသောအုန်းသီး မျိုးစေ့များကို ဖြန့်ဝေခြင်း၊ ပီဆို ၃၅၉ သန်း တန်ဖိုးရှိသည့် ဆည်မြောင်းစီမံကိန်းများကို အကောင်အထည်ဖော်ခြင်း၊  ငါးဖမ်းသမားများနှင့် တိရစ္ဆာန်မွေးမြူရေးလုပ်ငန်းများသို့ ပီဆို ၈.၉၉ သန်း တန်ဖိုးရှိသည့် စက်ပစ္စည်းများနှင့် စက်ကိရိယာများ ထောက်ပံ့ခြင်း၊ Magat ဆည်သို့ ရေစုဆောင်းနိုင်ရေး မိုးရွာသွန်းမှုအတုဖန်တီးခြင်း စသည်တို့ကို ဆောင်ရွက်မည်ဖြစ်ကြောင်း The Philippine Star သတင်းဌာနက ဖော်ပြထားပါသည်။

Source: The Philippine Star, 11 Jun 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)