Main menu

ပြည်ပကုန်သွယ်မှုသတင်းများ

Powered by Drupal

CCF မှ ကမ္ဘောဒီးယားသို့ တင်သွင်းလာသောဒူးရင်းသီးအချို့အား ဓာတုပစ္စည်းတစ်မျိုးတွင် စိမ်ထားသည်ကိုတွေ့ရှိ

ပြည်ပကုန်သွယ်မှုသတင်းများ

     ကမ္ဘောဒီးယားနိုင်ငံ၏ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူကာကွယ်ရေးနှင့် လိမ်လည်မှုတိုက်ဖျက်ရေးအထွေထွေဦးစီးဌာန (CCF)မှ ဒူးရင်းသီးရောင်းချသည့် ကုန်သည်များအနေဖြင့် စိုက်ပျိုးရေးအရင်းအမြစ်ကို လွဲမှားစွာသုံးစွဲခြင်းမပြုရန် ရိုးရိုးသားသားလုပ်ကိုင်ကြရန် ဒူးရင်းသီးရောင်းချသည့် ကုန်သည်များထံ တောင်းဆိုထားကြောင်းသိရှိရပါသည်။

     ဇွန်လ ၂၁ ရက်နေ့က CCF ထုတ်ပြန်ချက်အရ ကမ္ဘောဒီးယားဈေးကွက်တွင် အိမ်နီးချင်းနိုင်ငံများမှ ဒူးရင်းသီးများ တင်သွင်းရောင်းချသည့်ကိစ္စနှင့် ပတ်သက်၍ ဒူးရင်းသီးစိမ်ရန် ဓါတုပစ္စည်းများအသုံးပြုထားကြောင်းကို သတင်းစာများလူမှုကွန်ရက်စာမျက်နှာများတွင် ကြေညာထားကြောင်းသိရှိရပါသည်။

    အထက်ပါအချက်အလက်များခိုင်လုံစွာရရှိပြီးနောက် CCF အထွေထွေဦးစီးဌာနမှ ကျွမ်းကျင်အရာရှိများအား ကမ္ဘောဒီးယားနယ်စပ်ကုန်သွယ်ရေးလမ်းကြောင်း အချို့တွင် ဈေးကွက်အတွင်းသို့ဝင်ရောက်လာသော ဒူးရင်းသီးများအား သုတေသနလုပ်ငန်းများအမြန်ဆုံး လုပ်ဆောင်နိုင်ရန် ညွှန်ကြားခဲ့သည်။

   ပဏာမသုတေသနရလဒ်များအရ ဒူးရင်းရောင်းချသူများ ပြသသော ဒူးရင်းသီးများမှာ Kampot, Kampong Chan, Battumbong, Thong Khmum စသည့် ဒေသများမှထွက်သော ကမ္ဘောဒီးယားဒေသထွက်ကုန်များဖြစ်ကြသည်။ ထို့အပြင် အိမ်နီးချင်းနိုင်ငံများမှ တင်သွင်းသောဒူးရင်းသီးများလည်းပါဝင်ကြောင်း သုတေသနပြုချက်များတွင် ပုံငယ်များဖြင့် ဖော်ပြထားသည်။

    တစ်ချိန်တည်းမှာပင် CCF မှ စုံစမ်းစစ်ဆေးသူများသည် တင်သွင်းလာသော ဒူးရင်းသီးအချို့ကို တာဝန်ရှိသူများက ဖော်ထုတ်နိုင်ခြင်းမရှိသေးဘဲ စားသုံးသူများ၏ကျန်းမာရေးကို ထိခိုက်စေလျက်ရှိကြောင်း သိရသည်။

     CCF အထွေထွေဦးစီးဌာနသည် သက်ဆိုင်ရာဝန်ကြီးဌာနများ အဖွဲ့အစည်းများနှင့် ပူးပေါင်းရန် ဓါတုဗေဒပစ္စည်းများပါဝင်မှုကို ဖော်ထုတ်သိရှိနိုင်စေရန်ဆက်လက်၍ သုတေသနလုပ်ငန်းများအား ပြုလုပ်ဆောင်ရွက်သွားမည်ဖြစ်ကြောင်းပြောကြားခဲ့ပါသည်။

DOCA(ရန်ကုန်)

တရုတ်ဝန်ကြီးချုပ်နှင့် ပိုလန်သမ္မတတို့တွေ့ဆုံ

ပြည်ပကုန်သွယ်မှုသတင်းများ

      တရုတ်ဝန်ကြီးချုပ်  Li Quiang သည် ပိုလန်သမ္မတ Ahdrzej Duda နှင့် တနင်္လာနေ့၊ (၂၄)ရက်နေ့က ပေကျင်းတွင်တွေ့ဆုံခဲ့ပြီး ပိုလန်နှင့်ဖွံ့ဖြိုးတိုးတက်ရေးဆိုင်ရာ မဟာဗျူဟာများ တိုးမြှင့်ရန် တရုတ်နိုင်ငံအနေဖြင့် အဆင်သင့်ရှိကြောင်း ထုတ်ဖော်ပြောကြားခဲ့သည်။

       တရုတ်နိုင်ငံနှင့်ပိုလန်နိုင်ငံတို့ကြား ဘက်စုံမဟာဗျူဟာမြောက် မိတ်ဖက်ဆက်ဆံရေးကို (၂၀၁၆)ခုနှစ်တွင် ထူထောင်ပြီးကတည်းက နယ်ပယ်အသီးသီးတွင် ကူးလူးဆက်ဆံမှုများနှင့်ပူးပေါင်းဆောင်ရွက်မှုများအရှိန်အဟုန်ဖြင့် ဖွံ့ဖြိုးတိုးတက်လာကာ နှစ်နိုင်ငံပြည်သူများအတွက် မြင်သာထင်သာသောအကျိုးကျေးဇူးများကို ဆောင်ကြဉ်းပေးခဲ့ကြောင်း Li Quiang ကပြောကြားခဲ့သည်။

         တရုတ်နိုင်ငံသည် နှစ်နိုင်ငံခေါင်းဆောင်များ၏ မဟာဗျူဟာလမ်းညွှန်မှုကိုလိုက်နာရန်၊ အစဉ်အလာချစ်ကြည်ရင်းနှီးမှုကို ဆက်လက်ထမ်းဆောင်ရန်၊ နိုင်ငံရေးအရ အပြန်အလှန်ယုံကြည်မှုကိုတိုးမြှင့်ရန်၊ အပြန်အလှန်အကျိုးရှိသော ပူးပေါင်းဆောင်ရွက်မှု အားကောင်းခိုင်မာစေရန်နှင့် နှစ်နိုင်ငံဘက်စုံမဟာဗျူဟာမြောက် မိတ်ဖက်ဆက်ဆံရေးပိုမိုဖွံ့ဖြိုးတိုးတက်လာစေရန် တွန်းအားပေးဆောင်ရွက်သွားရန်လိုလားကြောင်း Li Quiang ကပြောကြားခဲ့သည်။

         တရုတ်နိုင်ငံ၊ ပိုလန်နိုင်ငံနှင့် ဖွံ့ဖြိုးတိုးတက်ရေးဆိုင်ရာ မဟာဗျူဟာများချမှတ်ရာတွင် ခိုင်မာစေရန် အဆင်သင့်ဖြစ်ပါကြောင်း၊ စီးပွားရေးနှင့်ကုန်သွယ်မှုဆောင်ရွက်မှုမြှင့်တင်ရေးလမ်းညွှန်မှုအဖြစ် Belt and Road ပူးပေါင်းဆောင်ရွက်မှုကိုမြှင့်တင်ရန်၊ မျှတသောဖွံ့ဖြိုးတိုးတက်မှုကို မြှင့်တင်ရန်အဆင်သင့်ရှိကြောင်း ၎င်းကပြောကြားခဲ့သည်။

         ပိုလန်သည် တရုတ်ဈေးကွက်သို့ အရည်အသွေးမြှင့်ပိုလန်ထုတ်ကုန်များကိုတင်ပို့နိုင်ပြီး တရုတ်စီးပွားရေးလုပ်ငန်းများအတွက် တရားမျှတ၍ ခွဲခြားမှုမရှိသော စီးပွားရေးပတ်ဝန်းကျင်ကိုပံ့ပိုးပေးမည်ဟုမျှော်လင့်ကြောင်း Li Quiang ကပြောကြားခဲ့သည်။

Source: English w.w.w gov.mm  

DOCA(ရန်ကုန်)        

ထိုင်းနိုင်ငံတွင် ဘတ် ၂.၈ ဘီလီယံတန် စက်ရုံတည်ဆောက်မည့် Harman ကုမ္ပဏီ

ပြည်ပကုန်သွယ်မှုသတင်းများ

    အမေရိကန်နိုင်ငံအခြေစိုက် Harman ကုမ္ပဏီသည် ၎င်းတို့၏ပထမဆုံး အရှေ့တောင်အာရှစက်ရုံတည်ဆောက်ရန်နေရာအတွက် ထိုင်းနိုင်ငံကိုရွေးချယ်ခဲ့ပြီး ကားများအတွက် အီလက်ထရောနစ်ထုတ်ကုန်များ တင်ပို့ရန်အတွက်ထုတ်လုပ်ရာ အခြေစိုက်နေရာအဖြစ် အသုံးပြုသွားမည်ဟု သိရပါသည်။ Harman ကုမ္ပဏီ စီမံအုပ်ချုပ်မှုအကြီးအကဲ Sami Krimi က ထိုင်းနိုင်ငံသည် မော်တော်ကားနှင့် ဆက်စပ်နယ်ပယ်များတွင် စိတ်ချရသော အတွေ့အကြုံရှိ သောကြောင့် ရင်းနှီးမြှုပ်နှံမှုပြုလုပ်ရန် စွဲဆောင်နိုင်ခဲ့ကြောင်းနှင့် ထိုင်းနိုင်ငံကို ဒေသတွင်း ပြည်ပသို့တင်ပို့ရာစက်ရုံအဖြစ် အသုံးပြုသွားမည်ဖြစ်ကြောင်း ပြောကြားခဲ့ပါသည်။ အဆိုပါ စီးပွားရေးအစီအစဉ်၏ ပထမအဆင့်အနေနှင့် ဘတ် ၂.၈ ဘီလီယံ တန်ကြေးရှိသည့် စက်ရုံကို Chon Buri စီရင်စု Laem Chabeng မြို့ရှိ ၄၇၀၀၀ စတုရန်းမီတာ ရှိသည့် မြေနေရာတွင် တည်ဆောက်မည်ဟုသိရပါသည်။ Harman ကုမ္ပဏီသည် စက်ရုံသစ်က အလုပ်အကိုင်အခွင့်အလမ်း ၁၂၀၀ ဖန်တီးပေးနိုင်မည်ဟု မျှော်လင့်လျက်ရှိပါသည်။ Harman ၏ ဥက္ကဌ Christian Sobottka က စက်ရုံတည်ဆောက်ရေးလုပ်ငန်းများမှာ ၂၀၂၅ ခုနှစ်၊ ဒုတိယ ၃ လပတ် ကာလတွင် ပြီးဆုံးရန် အချိန်ဇယားဆွဲထားပြီး ၂၀၂၆ ခုနှစ်၊ ပထမ ၃ လပတ်ကာလတွင် ထုတ်ကုန်များကို ဝယ်ယူသူများထံ ပေးအပ်နိုင်မည်ဟု ပြောကြားခဲ့ပါသည်။ ကုမ္ပဏီသည် ကားစပီကာ၊ အသံချဲ့စက်နှင့် မော်တော်ကားနှင့်ဆိုင်သော အသံစနစ်များပါဝင်သော အီလက်ထရောနစ်ထုတ်ကုန် ၁၀ မျိုးခန့်ကို ထုတ်လုပ်ရန် စီစဉ်ထားသည်။ Harman ၏ ယခုကဲ့သို့ ထိုင်းနိုင်ငံတွင် စီးပွားရေးချဲ့ထွင်လာမှုသည် ထိုင်းဝန်ကြီးချုပ် Mr.Srettha ၏ လွန်ခဲ့သည့် နှစ်က အမေရိကန်ခရီးစဉ်အပြီးတွင် ပေါ်ပေါက်လာခြင်း ဖြစ်ကြောင်း သိရပါသည်။ Mr.Sobrttka သည် လတ်တလောတွင် Mr.Srettha နှင့် တွေ့ဆုံခဲ့ပြီး Harman ၏ ထိုင်းနိုင်ငံ၌ စီးပွားရေး အစီအစဉ်များနှင့် ထိုင်းနိုင်ငံတွင် ရင်းနှီးမြှုပ်နှံရန် ယုံကြည်ချက်ရှိကြောင်းတို့ကို ဆွေးနွေးပြောကြားခဲ့ကြောင်း သိရပါသည်။ ကုမ္ပဏီသည် ဒုတိယအဆင့်အနေဖြင့် ၂၀၂၇ ခုနှစ်နှင့် ၂၀၂၈ ခုနှစ်ကြားတွင် ကားများအတွက်ဖျော်ဖြေရေးစနစ်များ ပြုလုပ်သွားရန်စီစဉ်နေကြောင်း ကုမ္ပဏီ၏ ကမ္ဘာလုံးဆိုင်ရာထုတ်လုပ်မှု ဒုတိယဥက္ကဌ Daniel Jonas ကပြောကြားခဲ့ကြောင်းသိရှိရပါသည်။

DOCA(ရန်ကုန်)

Foxconn သည် ဗီယက်နမ် Circut Board စက်ရုံတွင် အမေရိကန်ဒေါ်လာ (၃၈၃)သန်းရင်းနှီးမြှုပ်နှံမည့်ဟု နိုင်ငံပိုင်မီဒီယာကဖော်ပြ

ပြည်ပကုန်သွယ်မှုသတင်းများ

      Foxconn  Singapore သည် ဗီယက်နမ်တွင် ပုံနှိပ် circuit board များထုတ်လုပ်ရန်အတွက် စက်ရုံတစ်ခုတွင် အမေရိကန်ဒေါ်လာ (၃၈၃)သန်းရင်းနှီးမြှုပ်နှံရန် လိုင်စင်ရရှိထား ကြောင်း နိုင်ငံပိုင်မီဒီယာက တနင်္လာနေ့တွင်ထုတ်ပြန်ခဲ့သည်။

       Foxconn  သည် (၂၀၀၀)ခုနှစ်များတွင် အရှေ့တောင်အာရှနိုင်ငံများသို့ စတင်ဝင်ရောက်ကတည်းကပင် ဗီယက်နမ်တွင် အမေရိကန်ဒေါ်လာ(၃.၂)ဘီလီယံကျော်ရင်းနှီးမြှုပ်နှံမှုပြုလုပ်ခဲ့သည်။  ၎င်း၏ကုန်ထုတ်စက်ရုံအများစုသည် ဗီယက်နမ်မြောက်ပိုင်း ပြည်နယ်များဖြစ်သော  Bac Ninh နှင့် Bac Giang တို့တွင်တည်ရှိသည်။

         Bac Ninh စက်ရုံသည် (၁)နှစ်လျှင် ထုတ်ကုန်(၂.၇၉)သန်းထုတ်လုပ်လျက်ရှိသည့်ဟု Cong Thung သတင်းစာကဖော်ပြသည်။

       ယခုလအစောပိုင်းက ဗီယက်နမ်နိုင်ငံပိုင် မီဒီယာ၏ ဖြေကြားချက်အရ Foxconn သည် Bac Giang တွင် Nokia အတွက် 5G Airscale ကိရိယာများကို ထုတ်လုပ်မည်ဖြစ်ကြောင်းသိရသည်။

        ကမ္ဘာ့အကြီးဆုံး အီလက်ထရောနစ်ပစ္စည်းများထုတ်လုပ်တပ်ဆင်သော Foxconn သည် Reuter အစီရင်ခံစာအတွက် မှတ်ချက်ပေးရန်တောင်းဆိုချက်ကို ချက်ချင်းတုံ့ပြန်ခဲ့ခြင်းမရှိပေ။

Source: Reuters

DOCA(ရန်ကုန်)

စံချိန်တင်ပမာဏရှိသည့် နေကြာဆီများကိုဝယ်ယူခဲ့သည့် အိန္ဒိယနိုင်ငံ

ပြည်ပကုန်သွယ်မှုသတင်းများ

     အိန္ဒိယနိုင်ငံသည် ဇွန်လအတွက်စံချိန်တင် (၅၀၀၀၀၀)မက်ထရစ်တန်ရှိသည့် နေကြာဆီများကိုဝယ်ယူခဲ့ပြီး အဓိကထောက်ပံ့သည့် ရုရှားနိုင်ငံနှင့် ယူကရိန်းနိုင်ငံတို့ကြား ယှဉ်ပြိုင်မှု ကလည်း နေကြာဆီကို ပဲပိစပ်ဆီနှင့်စားအုန်းဆီတို့ထက် ဈေးသက်သာစေကြောင်း အကောက်ခွန်မှ တာဝန်ရှိသူတစ်ဦးက ပြောကြားခဲ့ပါသည်။ အမည်မဖော်လိုသော ထိပ်တန်းဝယ်ယူသူ တစ်ဦးက နေကြာဆီကို ပဲပိစပ်ဆီနှင့် စားအုန်းဆီတို့ထက် ဈေးနှုန်းလျော့ချကာ ကုန်သွယ်လျက်ရှိနေသည့်အတွက် အိန္ဒိယနိုင်ငံတောင်ပိုင်းပြည်နယ်များမှ ဝယ်လိုအားအလွန်မြင့်မားနေသည့် ဝယ်ယူသူများကိုဆွဲဆောင်လျက်ရှိနေကြောင်း ကြေညာခဲ့ပါသည်။

      လွန်ခဲ့သည့် ရက်သတ္တပတ်အနည်းငယ်က နေကြာဆီစိမ်း(၁)မက်ထရစ်တန်ကို ကုန်ကျစရိတ်များအားလုံးအပါအဝင် အမေရိကန်ဒေါ်လာ(၉၄၀)ဖြင့်ရရှိခဲ့ပြီး ပဲပိစပ်ဆီနှင့် စားအုန်းဆီတို့မှာ(၁)တန်ကို အမေရိကန်ဒေါ်လာ(၁၀၁၅)နှင့် (၉၅၀)အသီးသီးရှိခဲ့ကြောင်း ကုန်သည်များ၏ ပြောကြားချက်အရသိရပါသည်။

      နေကြာဆီသည် ပုံမှန်အားဖြင့် ပဲပိစပ်ဆီနှင့် စားအုန်းဆီတို့ထက် (၁)တန်ကို အမေရိကန်ဒေါ်လာ(၁၀၀)ဈေးပိုကြောင်းသိရပါသည်။ Hyderabad တွင်အခြေစိုက်သည့် အခြားဝယ်ယူသူ တစ်ဦးက နေကြာဆီအဓိကထုတ်လုပ်သည့် ရုရှား၊ ယူကရိန်းနှင့် အာဂျင်တီးနားတို့သည် အပြင်းအထန်ယှဉ်ပြိုင်နေလျက်ရှိကြပြီး နေကြာဆီကို အခြားဆီများထက် ဈေးလျော့ရောင်းချပေးရန် ကမ်းလှမ်းလျက်ရှိကြောင်းနှင့် ၎င်းသည်လည်း နေကြာဆီဝယ်ယူရန်အတွက် စားအုန်းဆီနှင့် ပဲပိစပ်ဝယ်ယူမှုကို လျော့ချနေကြောင်းပြောကြားခဲ့ပါသည်။

         ရုရှားနှင့်ယူကရန်းနိုင်ငံတို့သည် ကမ္ဘာလုံးဆိုင်ရာ နေကြာဆီတင်ပို့မှု၏ (၇၀)ရာခိုင်နှုန်းခန့်နေရာယူထားကြောင်းသိရပါသည်။ အိန္ဒိယနိုင်ငံသည် လွန်ခဲ့သည်နှစ်တွင် လစဉ်ပျမ်းမျှ နေကြာဆီ(၂၅၀၀၀၀)တန်ဝယ်ယူခဲ့ပြီး အဓိကအားဖြင့် ရုရှားနှင့်ယူကရိန်တို့ရှိသည့် ပင်လယ်နက်ဒေသဝယ်ယူခဲ့ခြင်းဖြစ်ကြောင်းသိရပါသည်။ အိန္ဒိယနိုင်ငံသည် စားအုန်းဆီကို အဓိကအားဖြင့် အင်ဒိုနီးရှား၊ မလေးရှားနှင့် ထိုင်းနိုင်ငံတို့မှတင်သွင်းပြီး ပဲပိစပ်ဆီများကို အာဂျင်တီးနား၊ ဘရာဇီးနှင့် အမေရိကန်တို့မှ တင်သွင်းကြောင်းသိရပါသည်။

Source: Bangkok post

DOCA(ရန်ကုန်)

ဆော်ဒီအာရေဗျနိုင်ငံတွင် စတင်ဖွင့်လှစ်သည့် Spinneys Super Market ၌ ဗီယက်နမ် နဂါးမောက်သီးများရောင်းချ

ပြည်ပကုန်သွယ်မှုသတင်းများ

      UAE နိုင်ငံအခြေစိုက်သည့် Spinneys Super Market ၏ ဆော်ဒီအာရေဗျနိုင်ငံတွင် ပထမဆုံးဖွင့်လှစ်သည့် ဆိုင်ခွဲဖွင့်ပွဲတွင် ဗီယက်နမ်နိုင်ငံမှတင်ပို့သည့် နဂါးမောက်သီးများကို ရောင်းချလျက်ရှိကြောင်းသိရပါသည်။

     အဆိုပါ Market သည် ဆော်ဒီအာရေဗျနိုင်ငံတွင် ပထမဆုံးအနေဖြင့် ဗီယက်နမ်နဂါးမောက်သီးရောင်းချခြင်းဖြစ်ကြောင်းသိရပါသည်။ ဆော်ဒီအာရေဗျနိုင်ငံဆိုင်ရာ ဗီယက်နမ် သံအမတ်ကြီး Dong Xuan Dung က ဆော်ဒီအာရေဗျနိုင်ငံတွင် ဗီယက်နမ်နိုင်ငံမှတင်ပို့သည့် စိုက်ပျိုးမွေးမြူရေးထွက်ကုန်များ၊ ပင်လယ်စာများ၊ စည်သွပ်ဖျော်ရည်များ ရောင်းချမှုကြီးထွားလာကြောင်းပြောကြားခဲ့ပါသည်။

        ထို့ပြင် သံအမတ်ကြီးက Spinneys သည် ဗီယက်နမ်ထုတ်ကုန်များရောင်းချမှုကို တိုးချဲ့ရန်မျှော်လင့်ကြောင်းနှင့် သံရုံးအနေဖြင့်လည်း နှစ်ဦးနှစ်ဖက်ကုန်သွယ်ရေးပိုမိုအားကောင်းလာ စေရန်အတွက် Super Market နှင့် ဗီယက်နမ်တင်ပို့သူများအကြား ထောက်ပံ့မှုကွင်းဆက်ချိတ်ရေးအတွက် အပြည့်အဝပံ့ပိုးပေးသွားမည်ဟု ကတိပြုပြောကြားခဲ့ပါသည်။

         Spinneys ၏ CEO ဖြစ်သူ Sunil Kumar က ဆော်ဒီအာရေဗျနိုင်ငံတွင် ထပ်မံတိုးချဲ့မည့်အစီအစဉ်များကို ထုတ်ဖော်ပြောကြားခဲ့ပါသည်။ ယခုနှစ်တွင် Super market (၃)ဆိုင်ကို Riyadh နှင့် Jeddah တို့တွင် ထပ်မံဖွင့်လှစ်ရန်အဆိုပြုထားပြီး လာမည့်(၅)နှစ်မှ (၁၀)နှစ်အတွင်း နှစ်စဉ် အနည်းဆုံး ဆိုင်(၄)ဆိုင်ဖွင့်လှစ်သွားမည်ဟုသိရပါသည်။ Sunil Kmar က Spinneys သည် လက်ရှိတွင် UAE နိုင်ငံတစ်ဝှမ်း၌ ဆိုင်ပေါင်း(၁၅၀)ကျော်ဖွင့်လှစ်ထားပြီး အိုမန်နိုင်ငံ၌လည်းဖွင့်လှစ်ထားကြောင်းနှင့် ဗီယက်နမ်ထုတ်ကုန်များကို Spinneys ဆီသို့  ရောက်ရှိစေမည့် တိုက်ရိုက်လမ်းကြောင်းတစ်ခုဖန်တီးရန်အတွက် ဗီယက်နမ်နိုင်ငံတွင် ကိုယ်စားပြုရုံးထူထောင်ရန် စီစဉ်ထားကြောင်းပြောကြားခဲ့ပါသည်။

         ဗီယက်နမ်နိုင်ငံအကောက်ခွန်အထွေထွေဦးစီးဌာန၏ အဆိုအရ ဗီယက်နမ်နိုင်ငံသည် ယခုနှစ်၏ ပထမ(၅)လတာကာလတွင် အမေရိကန်ဒေါ်လာ (၆၁၅.၃)သန်းပမာဏကို ဆော်ဒီအာရေဗျနိုင်ငံသို့တင်ပို့ခဲ့ပြီး ယခင်နှစ်တူညီသည့်ကာလထက် (၄၈.၅)ရာခိုင်နှုန်းမြင့်တက်လာခဲ့ကြောင်းသိရပါသည်။ အများအားဖြင့် ဆန်၊ ပင်လယ်စာ၊ သီဟိုဠ်စေ့၊ ငရုတ်ကောင်း၊ သစ်ပရိဘောဂ၊ ဖျော်ရည်၊ အဝတ်အထည်၊ ခြေအိတ်၊ စက်ပစ္စည်းများ၊ ကားအစိတ်အပိုင်းများ၊ အီလက်ထရောနစ်အစိတ်အပိုင်းများ၊ ကွန်ပျူတာများနှင့် ဖုန်းများတင်ပို့ခဲ့ကြောင်းသိရပါသည်။

      ဆော်ဒီအာရေဗျနိုင်ငံမှ အမေရိကန်ဒေါ်လာ(၅၄၉.၇)သန်းပြန်လည်တင်သွင်းခဲ့ကာ လွန်ခဲ့သည့်နှစ်ထက် (၁၆.၁)ရာခိုင်နှုန်းကျဆင်းခဲ့ကြောင်းသိရပြီး အဓိကအားဖြင့် ပလတ်စတစ် ပစ္စည်းများ၊ ဓာတုပစ္စည်းများနှင့် ရေနံတို့ကို အဓိကတင်သွင်းခဲ့ကြောင်းသိရပါသည်။ ထို့ကြောင့် နှစ်နိုင်ငံအပြန်အလှန်ကုန်သွယ်မှုပမာဏသည် အမေရိကန်ဒေါ်လာ(၀.၁၆)ဘီလီယံရောက်ရှိ ခဲ့ပြီး လွန်ခဲ့သည့်နှစ်တူညီသည့်ကာလထက် (၉.၂)ရာခိုင်နှုန်းကြီးထွားလာကြောင်းသိရပါသည်။

Source: Vietnamplus

DOCA(ရန်ကုန်)

 

ကော်ဖီတင်ပို့မှုမှအမေရိကန်ဒေါ်လာ(၃)ဘီလီယံရရှိခဲ့သည့်ဗီယက်နမ်နိုင်ငံ

ပြည်ပကုန်သွယ်မှုသတင်းများ

    ဗီယက်နမ်နိုင်ငံသည် ယခုနှစ်တွင် ကော်ဖီတင်ပို့မှုမှ အမေရိကန်ဒေါ်လာ(၃)ဘီလီယံရရှိ ခဲ့ကြောင်းသိရပါသည်။ ဗီယက်နမ်နိုင်ငံ အကောက်ခွန်ဌာနချုပ်၏ အချက်အလက်များအရ ဗီယက်နမ်နိုင်ငံသည် ၂၀၂၄ ခုနှစ်၏ ပထမငါးလတာကာလတွင် ကော်ဖီတန်ချိန်(၈၆၂၄၀၀)တန် တင်ပို့ခဲ့ပြီး လွန်ခဲ့သည့်နှစ် တူညီသည့်ကာလနှင့်နှိုင်းယှဥ်ပါက ပမာဏအားဖြင့် (၃၈)ရာခိုင်နှုန်းတိုးတက် ရရှိခဲ့ကြောင်းသိရပါသည်။ စျေးနှုန်းတွင် ဗီယက်နမ်နိုင်ငံ၏ ပြည်ပသို့တင်ပို့သည့် ပျမ်းမျှကော်ဖီစျေးနှုန်းမှာ မေလတွင် တစ်တန်ကို(၄၂၇၅)အမေရိကန်ဒေါ်လာရှိပြီး ဧပြီလထက် (၁၄)ရာခိုင်နှုန်း မြင့်တက်ခဲ့ကာ လွန်ခဲ့သည့်နှစ်တူညီသည့်ကာလထက် (၆၆)ရာခိုင်နှုန်းမြင့်တက် ခဲ့ကြောင်းသိရပါသည်။ ဇွန်လအစောပိုင်းရက်များတွင် ပြည်တွင်းစျေးကွက်ရှိ Robusta ကော်ဖီ‌စျေးနှုန်းမှာ မေလကုန်နှင့်နှိုင်းယှဥ်ပါက မြင့်တက်လာကြောင်းသိရပါသည်။ ဗီယက်နမ် နိုင်ငံစိုက်ပျိုးမွေးမြူရေးနှင့် ကျေးလက်ဖွံ့ဖြိုးရေးဝန်ကြီးဌာန၏အဆိုအရ လတ်တလောတွင် ပြည်တွင်းစျေးကွက်၌ ကော်ဖီကုန်လက်ကျန် အနည်းငယ်သာရှိတော့ကြောင်းသိရပါသည်။ လတ်တလောရှည်ကြာလှသည့် ပူပြင်းသည့်ရာသီဥတုကြောင့် ဗဟိုကုန်းမြင့်ဒေသများတွင် ကော်ဖီထွက်ရှိမှုကျဆင်းလာပြီးလာမည့် ကောက်ရိတ်သိမ်းနှစ်တွင် ကော်ဖီထွက်ရှိမှုမှာ (၂၀) ရာခိုင်နှုန်းထိကျဆင်းနိုင်မည်ဟု ခန့်မှန်းမှုများရှိနေပါသည်။ဗီယက်နမ်နိုင်ငံ ကော်ဖီကို ကိုးအသင်း (Vicofa) က လတ်တလောတွင် ကော်ဖီစျေးနှုန်းများမြင့်တက်လျှက်ရှိကြောင်း ထို့ကြောင့် ကော်ဖီတင်ပို့မှုမှာကျဆင်းနိုင်ကြောင်း ပြောကြားခဲ့ပါသည်။ အသင်းသည် ယခုနှစ်တွင် ကော်ဖီတင်ပို့မှုမှ အမေရိကန်ဒေါ်လာ (၄.၅ မှ ၅) ဘီလီယံရရှိရန်မျှော်လင့်လျှက်ရှိကြောင်းသိရှိရပါသည်။

DOCA(ရန်ကုန်)

ဗီယက်နမ်နှင့် ကမ္ဘာဒီးယား နှစ်နိုင်ငံကုန်သွယ်မှုပမာဏ အမေရိကန်ဒေါ်လာ ၂၀ဘီလီယံရောက်ရှိရန် မျှော်မှန်းလျက်ရှိ

ပြည်ပကုန်သွယ်မှုသတင်းများ

      ဗီယက်နမ်နှင့် ကမ္ဘောဒီးယား နှစ်နိုင်ငံဆက်ဆံရေးတွင် ကုန်သွယ်ရေးကဏ္ဍသည် တောက်ပစွာတည်ရှိလျက်ရှိပြီး လွန်ခဲ့သည့်ဆယ်စုနှစ်တစ်ခုအတွင်း အထင်ကြီးစရာကြီးထွားမှုရှိခဲ့ကာ နှစ်နိုင်ငံကုန်သွယ်မှုပမာဏ အမေရိကန်ဒေါ်လာ ၂၀ဘီလီယံရောက်ရှိရန် မျှော်မှန်းလျက်ရှိနေကြောင်းသိနေရပါသည်။

       ကမ္ဘောဒီးယားနိုင်ငံသည် ဗီယက်နမ်စက်မှုနယ်ပယ်အတွင်း များစွာသောကုန်ကြမ်းပစ္စည်းများ (အထူးသဖြင့် ‌ရော်ဘာ) ပံ့ပိုးပေးရာ အရင်းအမြစ်တစ်ခုဖြစ်ပြီး ဗီယက်နမ်ထုတ်ကုန်များဖြစ်သည့် သံ၊ စတီးလ်၊ ဆောက်လုပ်ရေးပစ္စည်းများ၊ ပြုပြင်ထားသောအစားအစာများနှင့် စားသုံးကုန်ပစ္စည်းများကို အဓိကဝယ်ယူသည့် နိုင်ငံလဲဖြစ်ကြောင်းသိရပါသည်။

      ဗီယက်နမ်နိုင်ငံ၏ စက်မှုဝန်ကြီးဌာနနှင့် အာရှ-အာဖရိက ဈေးကွက်ကုန်သွယ်ရေးဌာန၏ အချက်အလက်များအရ နှစ်နိုင်ငံကုန်သွယ်ရေးသည် ၂၀၁၀ခုနှစ်မှ ၂၀၁၅ခုနှစ်အတွင်း နှစ်စဉ်ပျမ်းမျှ ၁၈.၅%နှင့် ၂၀၁၆ခုနှစ်မှ ၂၀၂၀ခုနှစ်အတွင်း ၁၇%ကြီးထွားလာပြီး ၂၀၁၆ခုနှစ်တွင် နှစ်နိုင်ငံကုန်သွယ်မှုပမာဏမှာ အမေရိကန်ဒေါ်လာ ၂.၉၂ဘီလီယံရှိခဲ့ရာမှ ၂၀၂၀ခုနှစ်တွင် အမေရိကန်ဒေါ်လာ ၅.၃၁ဘီလီယံထိရောက်ရှိခဲ့ကြောင်းသိရပါသည်။

        ၂၀၂၂ခုနှစ်တွင် အမေရိကန်ဒေါ်လာ ၁၀.၅၇ဘီလီယံဖြင့် ၁၁%ရာခိုင်နှုန်းမြင့်တက်ခဲ့ပြီး ၂၀၂၄ခုနှစ်၏ ပထမ ၅လတွင် အမေရိကန်ဒေါ်လာ ၄.၆ဘီလီယံဖြင့် ၁၃.၄%မြင့်တက်ခဲ့ကြောင်း သိရပါသည်။

         ဗီယက်နမ်နိုင်ငံသည် ၂၀၂၄ခုနှစ်၏ ပထမနှစ်ဝက်တွင် ကမ္ဘောဒီးယားနိုင်ငံသို့တင်ပို့ခ၏ ခန့်မှန်းတန်ဖိုးမှာ အမေရိကန်ဒေါ်လာ ၂.၅ဘီလီယံတင်ပို့ခဲ့ပြီး အဓိကအားဖြင့် သံ၊ စတီးလ်၊ အဝတ်အထည်၊ ရေနံနှင့် ဆီတို့တင်ပို့ခဲ့ခြင်းဖြစ်ကြောင်းသိရပါသည်။

         ဗီယက်နမ်နိုင်ငံသည် ကမ္ဘောဒီးယားနိုင်ငံထံမှ ခန့်မှန်းတန်ဖိုး အမေရိကန်ဒေါ်လာ ၂.၉ဘီလီယံပမာဏတင်သွင်းခဲ့ပြီး သီဟိုရ်စေ့၊ ရော်ဘာ၊ သစ်သီးများနှင့် ဟင်းသီးဟင်းရွက်များကို အဓိကတင်သွင်းကြောင်းသိရပါသည်။

          ကမ္ဘောဒီးယားနိုင်ငံဆိုင်ရာ ဗီယက်နမ်သံအမတ်ကြီး Nguyen Huy Tang က နှစ်နိုင်ငံသည် ၂၀၂၄ခုနှစ်အလွန်တွင် လက်ရှိတည်ရှိပြီး သဘောတူညီချက်များ၊ နားလည်မှုသဝဏ်လွှာများ၊ နယ်စပ်ကုန်သွယ်ရေးနှင့် ၂၀၂၃-၂၀၂၄ နှစ်ဦးနှစ်ဖက် ကုန်သွယ်ရေးမြှင့်တင်ရန် သဘောတူညီချက်များအား နားလည်သဘောပေါက်ရန် ဆက်လက်ညှိနှိုင်းသင့်ကြောင်းပြောကြားခဲ့ပါသည်။

         ဗီယက်နမ်နိုင်ငံ၏ စီးပွားရေးလုပ်ငန်းများသည် ကမ္ဘောဒီးယားနိုင်ငံမှ စားသုံးသူများကိုဆွဲဆောင်ရန် အရည်အသွေးမြင့်မားပြီး ယှဉ်ပြိုင်နိုင်သောဈေးနှုန်းရှိသည့် ထုတ်ကုန်များနှင့် ဝန်ဆောင်မှုများကိုအာရုံစိုက်ရန် တိုက်တွန်းခြင်းခံထားရပါသည်။

         ကမ္ဘောဒီးယားနိုင်ငံတွင် ကျယ်ပြန့်ပြီး တည်ငြိမ်သော ဖြန့်ချိရေးကွန်ရက်တည်ဆောက်ခြင်းသည် ရှေ့ဆက်အောင်မြင်မှုများရရှိရန် အဓိကခြေလှမ်းတစ်ရပ်ဖြစ်ကြောင်းသိရှိရပါသည်။

Source: Vietnamplus

DOCA(ရန်ကုန်)

Can Tho ဒေသသည် ပထမအသုတ်အဖြစ် သရက်သီးစိမ်းများကို ဩစတြေးလျနှင့် အမေရိကန်သို့တင်ပို့

ပြည်ပကုန်သွယ်မှုသတင်းများ

   မဲခေါင်မြစ်ဝကျွန်းပေါ်ဒေသ Can Tho သည် ဩစတြေးလျနှင့် အမေရိကန်ဈေးကွက်များသို့ သရက်သီးစိမ်းများအား ပထမအသုတ်တင်ပို့ရောင်းချခဲ့ကြောင်း ကြေညာသည့် အခမ်းအနားတရပ်ကို ကျင်းပခဲ့သည်။

    အခမ်းအနားကို CO DO ခရိုင်၊ ပြည်သူကော်မတီနှင့် ပို့ကုန်ကုမ္ပဏီတို့ ပူးပေါင်း၍ မြို့တော်စိုက်ပျိုးရေးနှင့် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ကျင်းပခဲ့ကြောင်းသိရှိရပါသည်။

    Loc Hung စိုက်ပျိုးရေးသမဝါယမ၊ CO DO ခရိုင်နှင့် Vina T & T ကုမ္ပဏီတို့အကြား စာချုပ်ချုပ်ဆိုပြီးနောက် သရက်သီးစိမ်း ၂ တန် တင်ပို့ခဲ့သည်။ ၁ တန်ကို ဩစတြေးလျသို့ တင်ပို့မည်ဖြစ်ပြီး ၁ တန်ကို အမေရိကန်သို့ တင်ပို့ရန်အတွက် ဧရိယာကုတ်ဖြင့် ခွဲဝေပေးခဲ့သည်။

    Can Tho မြို့တွင် လက်ရှိသရက်သီးခြံ ၃၃၇၆ ဟက်တာ ရှိပြီးစုစုပေါင်း သစ်သီးစိုက်ပျိုးဧရိယာ၏ ၁၃% ရှိပြီး နှစ်စဉ် သစ်သီးတန်ချိန် ၁၇၅၀၀ ထွက်ရှိသည်။ သရက်သီးစိုက်ပျိုးဧရိယာ ဟက်တာ ၂၁၀၀ ကျော်ရှိသော CO DO သည် ဒေသအတွင်းတွင် သရက်သီးအများဆုံးစိုက်ပျိုးသည့် ခရိုင်ဖြစ်သည်။ Thoi Hung ဒေသတစ်ခုတည်းတွင် သရက်သီးစိုက်ပျိုးဧရိယာ ၁၉၇၈ ဟက်တာ ရှိပြီး ၎င်းမှ သရက်သီးစိမ်း ၂၁ ဟက်တာတွင် စိုက်ပျိုးဧရိယာကုတ် ရှိပြီဖြစ်သည်။

     ၂၀၂၁ ခုနှစ် သီးနှံစိုက်ပျိုးထုတ်လုပ်ရေးဌာန၏ အချက်အလက်များအရ ဗီယက်နမ်နိုင်ငံ၏ သရက်သီးဧရိယာသည် ဟက်တာ ၁၁၅၀၀၀ ခန့်ရှိပြီး ၁ နှစ်လျှင် တန်ချိန် ၁ သန်းခန့် ထွက်ရှိသည်။

   လက်ရှိတွင် ဗီယက်နမ်သည် ကမ္ဘာပေါ်တွင် ၁၃ နိုင်ငံမြောက် သရက်သီးအများဆုံး စိုက်ပျိုးထုတ်လုပ်သောနိုင်ငံဖြစ်သည်။ ဗီယက်နမ်သရက်သီး၏ အားသာချက်မှာ တစ်နှစ်ပတ်လုံး ရိတ်သိမ်းနိုင်ပြီး အဓိက ရိတ်သိမ်းရာသီမှာ မတ်လမှ ဇူလိုင်လအထိ ဖြစ်သော်လည်း နောက်နှစ် ဩဂုတ်လမှ ဖေဖော်ဝါရီလအထိ ရိတ်သိမ်းနိုင်သည်။

      ဩစတြေးလျမှ ၂၀၁၇ ခုနှစ်တွင် ဗီယက်နမ်သရက်သီးတင်သွင်းမှုကို ခွင့်ပြုခဲ့ပြီး ၂၀၁၉ ခုနှစ်တွင် အမေရိကန်ဈေးကွက်သို့ သရက်သီးများကို ပထမဆုံးအကြိမ်တင်ပို့ခဲ့သည်။ အဆိုပါ ဈေးကွက်ဖွင့်ချိန်မှစ၍ သရက်သီးအပါအဝင် လကတဆတ်သောသစ်သီးဝလံများကို ဝယ်လိုအား များသော ဈေးကွက်များသို့ တင်ပို့ရောင်းချမှုမှာ ပိုမိုအားကောင်းလာခဲ့သည်။

DOCA(ရန်ကုန်)

Oracle နည်းပညာကုမ္ပဏီသည် စပိန်တွင် Cloud Computing နှင့် AI နည်းပညာများအတွက် ၁ ဘီလီယံရင်းနှီးမြှုပ်နှံ

ပြည်ပကုန်သွယ်မှုသတင်းများ

    စပိန်နိုင်ငံအတွင်း၌ ၎င်း၏ဝန်ဆောင်မှုများအတွက် လိုအပ်ချက်ကို ဖြည့်ဆည်းရန်ကြိုးပမ်းနေသောကြောင့် ဉာဏ်ရည်တု(AI) နှင့် Cloud Computing တွင် လာမည့် ၁၀ နှစ်အတွင်း ဒေါ်လာ ၁ ဘီလီယံကျော် ရင်းနှီးမြှုပ်နှံမည်ဟု ဇွန်လ ၂၀ ရက်နေ့ (ကြာသပတေးနေ့) ကပြောကြားခဲ့ကြောင်းသိရှိရပါသည်။

   သုံးစွဲသူများသည် ၎င်းတို့၏ဒေတာစင်တာများမှ အလုပ်တာဝန်များကို Oracle Cloud Infrastructure သို့ ရွှေ့ပြောင်းနိုင်စေမည့် Cloud ဒေသအသစ်ကိုထူထောင်ရန်အတွက် ရင်းနှီးမြှုပ်နှံမှုပြုလုပ်မည်ဖြစ်သည်။ European Outsourcing Guideline ကဲ့သို့သော စည်းမျည်းများကို ကိုင်တွယ်ဖြေရှင်းရန် ကူညီပေးမည်ဖြစ်သည်။

     ၎င်းသည် Madrid ရှိ Oracle ၏ တတိယမြောက် Cloud ဒေသဖြစ်ပြီး ကုမ္ပဏီသည် စီမံကိန်းအတွက် Telefonica Espana နှင့် ပူးပေါင်းဆောင်ရွက်မည်ဖြစ်သည်။ ပထမဆုံး Cloud ဒေသကို ၂၀၂၂ ခုနှစ်တွင် စတင်ဖွင့်လှစ်ခဲ့ကြောင်းသိရှိရပါသည်။

   အရွယ်အစားပေါင်းစုံပါဝင်သော စပိန်အဖွဲ့အစည်းများနှင့် စက်မှုလုပ်ငန်းများအား ကူညီပေးရန် ကတိကဝတ်ကို ထပ်လောင်းအတည်ပြုပြီး လုပ်ငန်းစွမ်းဆောင်ရည်မြှင့်တင်ရန် Cloud နည်းပညာများကို အရှိန်မြှင့်တင် လုပ်ဆောင်နေကြောင်း Oracle Spain မှ Albert Triola က ပြောကြားခဲ့ပါသည်။

   ထိုရင်းနှီးမြှုပ်နှံမှုသည် စပိန်စီးပွားရေးလုပ်ငန်းများနှင့် အစိုးရကဏ္ဍအဖွဲ့အစည်းများအား AI ဖြင့် ဆန်းသစ်တီထွင်ပြီး ဒီဂျစ်တယ်အသွင်ပြောင်းရေး လမ်းကြောင်းပေါ်တွင် ဆက်လက်ချီတက်နိုင်ရန် အကူအညီပေးလိမ့်မည်ဟု စပိန်ဒီဂျစ်တယ်အသွင်ပြောင်းရေးနှင့် ပြည်သူ့အုပ်ချုပ် ရေးဆိုင်ရာ ဝန်ကြီး Jose Luis Escrivea က ပြောကြားခဲ့ပါသည်။

   Oracle သည် ၎င်း၏ AI စွမ်းအင်သုံး Cloud ဝန်ဆောင်မှုများအတွက် ခိုင်မာသောဝယ်လိုအားညွှန်ပြပြီး သုတေသီများ၏ခန့်မှန်းချက်များထက် ဂဏန်းနှစ်ဆဖြင့်တိုးလာမည့် ဘဏ္ဍာရေးနှစ် ၂၀၂၅ ခုနှစ်အတွက် ဝင်ငွေကို ပြီးခဲ့သည့်အပတ်က ခန့်မှန်းထားကြောင်းသိရှိရပါသည်။

DOCA(ရန်ကုန်)

Pages

Subscribe to RSS - ပြည်ပကုန်သွယ်မှုသတင်းများ