ပြည်ပကုန်သွယ်မှုသတင်းများ

         ဗီယက်နမ်နိုင်ငံအနေဖြင့် ဖိလစ်ပိုင်နိုင်ငံကို အရေးပါသော ဆန်တင်သွင်းသူအဖြစ် ရှုမြင်ပါကြောင်း ဗီယက်နမ် စက်မှုနှင့် ကုန်သွယ်ရေးဝန်ကြီး Nguyen Hong Dien က ဖိလစ်ပိုင် စိုက်ပျိုးရေးဌာန အတွင်းဝန် Francisco Tiu Laurel Jr. နှင့်တွေ့ဆုံစဉ် ပြောကြားခဲ့သည်။

          လက်ရှိကာလ၌ ဗီယက်နမ်နိုင်ငံ၏ ကုန်သွယ်ဖက်နိုင်ငံများအနက် ဖိလစ်ပိုင်နိုင်ငံသည် အာဆီယံတွင် အဆင့် ၆ နေရာ၌ရှိနေပြီး ကမ္ဘာ့အဆင့်တွင် နံပါတ် ၁၆ နေရာ၌ တည်ရှိနေသည်။ ဖိလစ်ပိုင်သည် ဗီယက်နမ်၏ ဆန်အများဆုံးဝယ်ယူသူအဖြစ်လည်း ဆက်လက်တည်ရှိနေသည်။ ၂၀၂၃ ခုနှစ်အတွင်း နှစ်နိုင်ငံ အပြန်အလှန်ကုန်သွယ်မှုမှာ အမေရိကန်ဒေါ်လာ ၇.၈ ဘီလီယံအထိ ရောက်ရှိခဲ့ပြီး ၀.၁ ရာခိုင်နှုန်းသာ ကျဆင်းခဲ့သည်။

          ဖိလစ်ပိုင်နိုင်ငံသမ္မတ Ferdinand Romualdez Marcos Jr. ၏ ဗီယက်နမ်နိုင်ငံသို့ ဇန်နဝါရီလ ၂၉ ရက်နှင့် ၃၀ ရက်နေ့တို့တွင် သွားရောက်ခဲ့သည့် နိုင်ငံတော်ခရီးစဉ်အတွင်း ဗီယက်နမ် စက်မှုနှင့်ကုန်သွယ်ရေးဝန်ကြီးဌာနနှင့် ဖိလစ်ပိုင်စိုက်ပျိုးရေးဌာနတို့အကြား ဆန်ကုန်သွယ်မှုဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးခဲ့ကြသည်။

          အဆိုပါနားလည်မှုစာချွန်လွှာ၌ လာမည့် ၅ နှစ်အတွင်း ဆန်ကုန်သွယ်မှုတွင် ပူးပေါင်း ဆောင်ရွက်မှု မြှင့်တင်နိုင်ရေး အဓိကဆောင်ရွက်ရန် ချမှတ်ထားပြီး နှစ်နိုင်ငံအကြား ချစ်ကြည် ရင်းနှီးမှုနှင့် ကောင်းမွန်သော ပူးပေါင်းဆောင်ရွက်မှုတို့ကို မှတ်ကျောက်တင်စေနိုင်မည်ဖြစ်ပြီး နှစ်နိုင်ငံစီးပွားရေးကိုလည်း အကျိုးဖြစ်ထွန်းစေမည်ဖြစ်ပါသည်။

          ဗီယက်နမ်ဝန်ကြီး Dien က အဆိုပါ နားလည်မှုစာချွန်လွှာကို လက်မှတ်ရေးထိုးပြီးနောက် အကောင်အထည်ဖော်ရန်အတွက် အစီအမံတစ်ရပ်ကို နှစ်ဦးနှစ်ဘက် တည်ထောင်သွားရန် အကြံ ပြုခဲ့ပြီး အသီးအနှံနှင့် အသားထွက်ပစ္စည်းများတွင် အစားအစာ ဘေးအန္တရာယ်ကင်းရှင်းရေးနှင့် တိရစ္ဆာန်နှင့်အပင်များ ပိုးမွှားရောဂါကင်းရှင်းမှုဆိုင်ရာ စီမံဆောင်ရွက်မှု SPS လုပ်ငန်းစဉ်များ ဆောင်ရွက်ရာတွင် ဖိလစ်ပိုင်ရှိ သက်ဆိုင်ရာအာဏာပိုင်အဖွဲ့အစည်းများ အနေဖြင့် ဗီယက်နမ် စိုက်ပျိုးရေးနှင့် ကျေးလက်ဖွံ့ဖြိုးရေး ဝန်ကြီးဌာနနှင့် အနီးကပ် ပူးပေါင်း ဆောင်ရွက်ပေးစေလိုကြောင်း တိုက်တွန်းခဲ့ပါသည်။

          ဖိလစ်ပိုင်စိုက်ပျိုးရေးအတွင်းဝန် Laurel က ဖိလစ်ပိုင်နိုင်ငံ၌ တင်သွင်းသည့် ဆန်ပမာဏ စုစုပေါင်း၏ ၈၅ ရာခိုင်နှုန်းမှာ ဗီယက်နမ်နိုင်ငံထံမှ ရယူခြင်းဖြစ်ကြောင်း၊ ဗီယက်နမ်နိုင်ငံ၏ ယခု နှစ် ဆန်စပါးထွက်ရှိမှု ခန့်မှန်းချက်အား မျှဝေမှုနှင့်အတူ ဖိလစ်ပိုင်နိုင်ငံသို့ ဆန်ထောက်ပံ့မှုကို ထိန်းသိမ်းထားစေလိုပါကြောင်းဖြင့် ပြောကြားခဲ့သည်။

          ဗီယက်နမ်ဝန်ကြီး Dien က နှစ်နိုင်ငံပူးပေါင်းဆောင်ရွက်ရေးယန္တရား အထူးသဖြင့် ဗီယက်နမ် - ဖိလစ်ပိုင် ပူးတွဲကုန်သွယ်မှု ဆပ်ကော်မတီကို နှစ်ဖက်လုံးက ပိုမိုကောင်းမွန်အောင် ဆောင်ရွက်သင့်ပါကြောင်းနှင့် ဖိလစ်ပိုင်နိုင်ငံသို့ ကာလရှည် ဆန်ထောက်ပံ့ရန် အသင့်ရှိပါကြောင်း အတည်ပြုပြောကြားခဲ့သည်။

Source: Vietnam Plus, 30 January 2024

     အီဂျစ်နိုင်ငံအနေဖြင့် နိုင်ငံတကာ တင်ဒါခေါ်ယူမှုစနစ်ဖြင့် မည်သည့်ပင်ရင်းနိုင်ငံထံမှမဆို ရာနှုန်းပြည့် ကြိတ်ခွဲထားပြီးဖြစ်သည့် ဆန်လုံးပုများကို ဝယ်ယူရန် ကြိုးပမ်းလျက်ရှိကြောင်း နိုင်ငံပိုင် ကုန်စည်များထောက်ပံ့မှုဆိုင်ရာ အထွေထွေ အာဏာပိုင်အဖွဲ့ (General Authority for Supply Commodities - GASC) က ၂၈-၁-၂၀၂၄ ရက် တနင်္ဂနွေနေ့တွင် ပြောကြားခဲ့သည်။

     ဝယ်ယူမည့်ဆန်များ အီဂျစ်နိုင်ငံဆိပ်ကမ်းသို့ ဆိုက်ရောက်ရမည့်ရက်သည် မတ်လ ၁၅ ရက် နေ့မှ ဧပြီလ ၁၅ ရက်နေ့ထိဖြစ်ပြီး GASC အနေဖြင့် ဖေဖော်ဝါရီ ၁၀ ရက်နေ့ကို တင်ဒါကမ်းလှမ်း ချက်များ တင်သွင်းရမည့် နောက်ဆုံးရက်အဖြစ် သတ်မှတ်ထားကြောင်း၊ ကမ်းလှမ်းချက်များသည် ဖေဖော်ဝါရီ ၁၇ ရက်အထိသာ တရားဝင်မည်ဖြစ်ကြောင်း ပြောကြားခဲ့ပါသည်။

     ဝယ်ယူမည့်ဆန်၏ အဆင့်အတန်းသတ်မှတ်ချက်မှာ ဆန်ကွဲပါဝင်မှု ၁၀% ရှိသော ၂၀၂၃-၂၀၂၄ ခုနှစ်ထွက် သီးနှံဖြစ်ရန်လိုအပ်ကြောင်း၊ ၅၀ ကီလိုဂရမ် (၁၁၀.၂၃ ပေါင်) ဝင် အိတ်များဖြင့် ထုပ်ပိုးထားရှိရမည်ဖြစ်ကြောင်း၊ ငွေပေးချေမှုစနစ်မှာ သင်္ဘောတင်ကုန်ကျစရိတ်၊ အာမခံကြေးနှင့် သယ်ယူပို့ဆောင်စရိတ်တို့ ပါဝင်ပြီးဖြစ်သော ဆိပ်ကမ်းအရောက် CIF တန်ဖိုးအပေါ် အခြေခံမည် ဖြစ်ပြီး အမေရိကန်ဒေါ်လာ သို့မဟုတ် အီဂျစ်ပေါင်ငွေဖြင့် ရက်ပေါင်း ၁၈၀ နှင့် ၂၇၀ အတွင်း၌ ငွေလွှဲစာတမ်း (letters of credit) ပေးပို့ဆောင်ရွက်မည်ဖြစ်ကြောင်း သိရှိရသည်။

     ကုန်ပေးသွင်းမည့်သူများသည် အနိမ့်ဆုံးပမာဏ ဆန်မက်ထရစ်တန် ၂၀၀၀၀ ကို ၁၀% အတိုးအလျှော့ထားရှိလျက် အဆိုပြုကမ်းလှမ်းရမည်ဖြစ်ကြောင်း၊ မက်ထရစ်တန် ၁ တန်လျှင် ကုန်ကျမည့် အကောက်ခွန်ရှင်းလင်းမှု၊ ကုန်ချစရိတ်နှင့် သယ်ယူပို့ဆောင်ရေးစရိတ်များကို အီဂျစ် ပေါင်ငွေဖြင့် ပေးချေမည်ဖြစ်ကြောင်း၊ အဆိုပါကုန်ကျစရိတ်တွင် အီဂျစ်နိုင်ငံ Holding Company မှ သတ်မှတ်ထားသော သိုလှောင်ရုံအတွက်အပါအဝင် ထပ်တိုးတန်ဖိုးအခွန်လည်း ပါဝင်ကြောင်း GASC မှ ပြောကြားထားသည်။

     တင်ဒါတင်သွင်းသူများသည် ကနဦးစပေါ်ငွေ ဒေါ်လာ ၇၅၀၀၀ သို့မဟုတ် အဆိုပါငွေနှင့် ညီမျှသော အီဂျစ်ပေါင်‌ငွေပမာဏကို ကနဦးစပေါ်ငွေအဖြစ် ပေးသွင်းရမည်ဖြစ်ပြီး GASC အတွက် အာမခံစာတမ်းတစ်စောင်လည်း ပါဝင်ရမည်ဖြစ်သည်။ ထို့အပြင် တင်ဒါအဆိုပြုလွှာ တင်သွင်းရာ တွင်  ရောင်းချမည့်ဆန်၏ အလေးချိန် ၂ ကီလိုဂရမ်ရှိသော နမူနာသုံးခုနှင့်အတူ ၎င်းတို့၏ အသေး စိတ်အချက်များကို ရက်စွဲနှင့်တကွ ပေးပို့ရမည်ဖြစ်ကြောင်း GASC မှ ပြောကြားခဲ့သည်။

    တင်ဒါအောင်မြင်သူများသည် ရောင်းချသည့်ဆန်များကို အီဂျစ်စားသောက်ကုန်လုပ်ငန်း ဦးပိုင်ကုမ္ပဏီ (Holding Company For Food Industries) က သတ်မှတ်ထားသည့် သိုလှောင်ရုံ များသို့ ပေးပို့အပ်နှံရမည်ဖြစ်ကြောင်း သိရှိရသည်။

Source: NASDAQ, 28 January 2024

     တောင်ကိုရီးယားနိုင်ငံ၏ ဆန်အခြေခံထုတ်ကုန်များ တင်ပို့မှုသည် ကမ္ဘာ့စားနပ်ရိက္ခာ ဝယ်လိုအားတက်လာချိန် ၂၀၂၃ ခုနှစ်၌ စံချိန်တင်မြင့်တက်ခဲ့ကြောင်း ၂၉-၁-၂၀၂၄ ရက် တနင်္လာနေ့တွင် ထုတ်ပြန်ခဲ့သော အစိုးရဌာနဆိုင်ရာနှင့် ဆန်ထုတ်ကုန်လုပ်ငန်းနယ်ပယ် သတင်းအရင်းအမြစ် များအရ သိရှိရသည်။ ပြည်ပသို့တင်ပို့သော ဆန်အခြေခံထုတ်ကုန်များတွင် အသင့်စားထမင်းဘူး၊ အေးခဲထားသော ရေညှိထမင်းလိပ်နှင့် တော့ပိုကီများပါဝင်ပြီး တင်ပို့မှုတန်ဖိုးအနေဖြင့် ၂၀၂၃ ခုနှစ်တွင် အမေရိကန်ဒေါ်လာ ၂၁၇.၂ သန်း တင်ပို့နိုင်ခဲ့ကြောင်း ကိုရီးယားစိုက်ပျိုးမွေးမြူရေးနှင့် အစားအစာကုန်သွယ်မှု ကော်ပိုရေးရှင်း၏ ဖော်ပြထားချက်အရ သိရှိရသည်။

   နောက်ဆုံးရရှိထားသော ကုန်သွယ်မှုကိန်းဂဏန်းသည် ၂၀၂၂ ခုနှစ်တွင် တွက်ချက်ခဲ့သော အမေရိကန်ဒေါ်လာ ၁၈၁.၈ သန်းထက် ၁၉.၅ ရာခိုင်နှုန်းတိုးလာကာ ပထမဆုံးအကြိမ်အနေဖြင့် ဒေါ်လာသန်း ၂၀၀ စံသတ်မှတ်ချက်အား ကျော်လွန်ခဲ့ပါသည်။ နှစ်စဉ်ပြည်ပသို့ ဆန်အခြေခံ ထုတ်ကုန်များ တိုးတက်တင်ပို့မှုလမ်းကြောင်းသည် ၂ဝ၁၅ ခုနှစ်မှစတင်ကာ မပြောင်းလဲပဲ တစ်သမတ်တည်း ရှိနေခဲ့ပြီး ကုန်သွယ်မှုကိန်းဂဏန်းများအရ ၂၀၁၅ ခုနှစ်၌ ဒေါ်လာ ၅၄.၃ သန်းမှ ၂၀၁၈ ခုနှစ်တွင် ဒေါ်လာ ၈၉.၄ သန်းအထိ မြင့်တက်လာခဲ့သည်။

   အထူးသဖြင့် ၂၀၁၉ ခုနှစ်တွင် ဆန်အခြေခံထုတ်ကုန်များ တင်ပို့မှုတန်ဖိုးသည် ဒေါ်လာ ၁၈၅.၉ သန်းသို့ နှစ်ဆတိုးလာခဲ့ပြီး ပထမဆုံးအကြိမ်အဖြစ် ဒေါ်လာသန်း ၁၀၀ စံသတ်မှတ် ချက်အား ကျော်လွန်ခဲ့ပါသည်။

   နိုင်ငံအလိုက် ဆန်အခြေခံထုတ်ကုန်များ တင်ပို့မှုအနေဖြင့် ၂၀၂၃ ခုနှစ်တွင် အမေရိကန်နိုင်ငံသို့ တန်ဖိုးအားဖြင့် ဒေါ်လာ ၁၁၄.၈ သန်း တင်ပို့ခဲ့ပြီး စုစုပေါင်း ပြည်ပတင်ပို့မှု၏ ၅၂.၈ ရာခိုင်နှုန်းရှိခဲ့ကြောင်း၊  ၎င်း၏နောက်၌  ဗီယက်နမ်သို့ ဒေါ်လာ ၁၅ သန်း၊ ဥရောပသမဂ္ဂနှင့် ဗြိတိန် သို့ ဒေါ်လာ ၁၄.၉သန်း၊ ဂျပန်နိုင်ငံသို့ ဒေါ်လာ ၁၂.၆ သန်းနှင့် သြစတြေးလျသို့ ဒေါ်လာ ၇.၁ သန်း အသီးသီးတန်ဖိုးရှိသော ထုတ်ကုန်များ တင်ပို့နိုင်ခဲ့ကြောင်း သိရှိရသည်။

   ဆန်အခြေခံထုတ်ကုန်များ၏ ကျန်းမာရေး အကျိုးကျေးဇူးများနှင့် အသင့်စားသုံးနိုင်မှု စသည့်အချက်များသည် အသင့်စားထမင်းဘူးနှင့် အေးခဲ‌ရေညှိထမင်းလိပ်ကဲ့သို့သော ထုတ်ကုန် များအပေါ် ကမ္ဘာတစ်ဝှမ်း၌ လူကြိုက်များ ရေပန်းစားစေကြောင်း၊ အထူးသဖြင့် ကိုဗစ်-၁၉ ကပ် ရောဂါ ဖြစ်ပေါ်နေချိန်ကာလနှင့် ယင်းကာလနောက်ပိုင်းတို့တွင် ကမ္ဘာအနှံ့ အတိုင်းအတာအထိ အားပေးမှုကို ရရှိထားကြောင်းဖြင့် စိုက်ပျိုးရေး၊ အစားအစာနှင့် ကျေးလက်ရေးရာဝန်ကြီးဌာနမှ တာဝန်ရှိသူတစ်ဦးက ပြောကြားခဲ့သည်။ စားသုံးသူများ၏ အားပေးမှု အခိုင်အမာရရှိထားခြင်း သည် အဆိုပါထုတ်ကုန်များအား လွယ်ကူသောနည်းဖြင့် အဆင့်ဆင့်ချက်ပြုတ်နိုင်ခြင်းနှင့် ထားသို သိမ်းဆည်းနိုင်သော နည်းလမ်းများကြောင့် ဖြစ်သည်ဟု သိရှိရသည်။

  အဆိုပါအောင်မြင်မှုအပေါ် အခြေခံ၍ တောင်ကိုရီးယားအစိုးရသည် ဆန်အခြေခံထုတ်ကုန်များကို ပြည်ပသို့တင်ပို့မှုအား အရှိန်အဟုန် မြှင့်တင်ရန်အတွက် ၂၀၂၈ ခုနှစ်တွင် အမေရိကန် ဒေါ်လာသန်း ၄၀၀ အထိ တင်ပို့နိုင်ရေး အစီအစဉ်ကို ဆောင်ရွက်မည်ဟု ဇန်နဝါရီလ ၂၃ ရက် နေ့တွင် ထုတ်ဖော်ပြောကြားခဲ့ကြောင်း သိရှိရသည်။

Source: Korea Herald, 29 January 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   ဩစတေးလျနိုင်ငံမှ ထွက်ရှိသော ပဲမျိုးစုံကို စူးအက်တူးမြောင်းအား ဖြတ်သန်းသယ်ဆောင်သည့် ပုံမှန်လမ်းကြောင်းအတိုင်း သင်္ဘောဝမ်းပုံစနစ်ဖြင့် အီဂျစ်နိုင်ငံသို့ အရှိန်မပျက် တင်ပို့လျက်ရှိ ကြောင်း သိရှိရပါသည်။

   ဩစတေးလျကုန်သည်များသည် Faba Beans ခေါ် တောင်ကြီးပဲများကို အီဂျစ်နိုင်ငံသို့ တင်ပို့လျက်ရှိရာ လက်ရှိကာလတွင် ဝမ်းပုံစနစ်ဖြင့် သယ်ယူပို့ဆောင်သည့် သင်္ဘော ၃ စီးသည် ပင်လယ်နီဒေသသို့ ရောက်ရှိနေပြီး နောက်ထပ်သင်္ဘောတစ်စီးသည်လည်း ဇန်နဝါရီလ နောက်ဆုံး အပတ်အတွင်း ဩစတေးလျတောင်ပိုင်းရှိ Port Adelaide ဆိပ်ကမ်းမှ ထွက်ခွာခဲ့ပြီးဖြစ်သည်။

    ပင်လယ်နီဒေသ၌ ဟူသီလက်နက်ကိုင်အဖွဲ့များ၏ တိုက်ခိုက်မှုမှာ ဝမ်းပုံစနစ်ဖြင့် သယ်ယူ ပို့ဆောင်မှုအပေါ် အနှောင့်အယှက်ဖြစ်ဖွယ် မရှိသော်လည်း အာရှဒေသမှ ကုန်သေတ္တာတင် သင်္ဘောများစွာသည် လမ်းကြောင်းပြောင်းလဲ၍ သယ်ပို့လျက်ရှိကြောင်း၊ ဩစတေးလျမှ ကုန် သေတ္တာဖြင့် တင်ပို့သည့် သင်္ဘောအချို့သည်လည်း အာဖရိကတောင်ဘက်စွန်း Good Hope အငူ ကို ကွေ့ပတ်လျက် မြေထဲပင်လယ်နှင့် အတ္တလန်တစ် ဆိပ်ကမ်းများသို့ သယ်ယူပို့ဆောင်မှုပြု လျက်ရှိကြောင်း သိရှိရသည်။

   ဩစတေးလျဈေးကွက်တွင် ဆိပ်ကမ်းမှ တောင်ကြီးပဲ တင်ပို့မှုဈေးနှုန်းများမှာ ၁ တန်လျှင် ဩစတေးလျဒေါ်လာ ၅၀၀ ခန့်ရှိပြီး ယခင်လဈေးနှုန်းအောက် ၁ တန်လျှင် ဩစတေးလျဒေါ်လာ ၅၀ ကျဆင်းခဲ့ခြင်းဖြစ်သည်။ အီဂျစ်နိုင်ငံသည် ဩစတေးလျ၏ တောင်ကြီးပဲနှင့် ပဲနီလေးတို့ကို အဓိကတင်ပို့ရာ ဈေးကွက်ဖြစ်ပြီး အီဂျစ်ကုန်သည်များဘက်မှ ကုန်သေတ္တာဖြင့်တင်ပို့ရန် တောင်း ဆိုမှုများ ရှိသော်လည်း ပင်လယ်နီဒေသ အကျပ်အတည်းက အတားအဆီးဖြစ်ပေါ်လျက်ရှိသည်။ Agri-Oz Exports ကုမ္ပဏီမှ မန်နေးဂျင်းဒါရိုက်တာ Francois Darcas က အနောက်အာဖရိက ဒေသကို ကွေ့ပတ်၍ သယ်ယူပို့ဆောင်ရသည့် စရိတ်စက မြင့်မားမှုကြောင့် အီဂျစ်သို့ ကုန်သေတ္တာ ဖြင့်တင်ပို့ရန် ဝယ်လိုအားမှာ ထိခိုက်ကျဆင်းမှုများ ဖြစ်ပေါ်လျက်ရှိကြောင်း ပြောကြားခဲ့သည်။

   ဩစတေးလျ လယ်သမားများသည် ကုလားပဲ၊ တောင်ကြီးပဲနှင့် ပဲနီလေး တို့ကို ကုန်သည်များနှင့် ပို့ကုန်လုပ်ငန်းရှင်များထံသို့ ဈေးနှုန်းအတက်အကျပြောင်းလဲမှု နည်းပါး စွာဖြင့် ပမာဏအသင့်အတင့် ရောင်းချလျက်ရှိကြောင်း၊ သီးနှံရာသီအသစ်၌ အသုံးပြုရန် လိုအပ် သော သွင်းအားစုများ ဝယ်ယူနိုင်ရေးအတွက် တောင်သူများက ကုန်လက်ကျန်များကို ရောင်းချမှု လုပ်ဆောင်လာမည့် မတ်လခန့်ကျမှသာ  ဩစတေးလျ ပဲမျိုးစုံဈေးကွက်သည် အရောင်းအဝယ် သွက်လက်လာမည်ဟု ခန့်မှန်းရကြောင်း၊ မိုးရွာသွန်းမှုရှိခဲ့သော ကွင်းစလန်ပြည်နယ်တွင် ပဲတီစိမ်း စိုက်ပျိုးမှုကို စတင်လုပ်ကိုင်နေပြီဖြစ်ကြောင်း၊ ဩစတေးလျ တောင်ပိုင်းနှင့် အရှေ့ပိုင်း ဒေသများ တွင် နိုဝင်ဘာလမှစတင်၍ မိုးရွာသွန်းမှုကောင်းမွန်ခဲ့သဖြင့် လာမည့်ဆောင်းသီးနှံ စိုက်ပျိုးထုတ် လုပ်မှုမှာ တိုးတက်ဖွယ်ရှိကြောင်း Grain Central သတင်းဝက်ဘ်ဆိုက်၌ ဖော်ပြထားပါသည်။

    ရာမာဒန်ဥပုသ်ကာလမတိုင်မီ ပြည်ပတင်ပို့ရန် ဝယ်ယူစုဆောင်းမှုများ နှေးကွေးလျက်ရှိရာ ဩစတေးလျဈေးကွက်၌ ကုလားပဲဈေးနှုန်းများသည်လည်း ယခင်လဈေးနှုန်းအောက် ၁ တန်လျှင် ဩစတေးလျဒေါ်လာ ၁၀ မှ ၂၀ ခန့်အထိ ကျဆင်းခဲ့သည်။ ဆိပ်ကမ်းများ၌ ထိပ်တန်းအဆင့် CHKP1 ကုလားပဲ ၁ တန်လျှင် ဩစတေးလျဒေါ်လာ ၈၂၀ ခန့်ရှိပြီး CHKPM အဆင့် ကုလားပဲမှာမူ ၁ တန်လျှင် ဩစတေးလျဒေါ်လာ ၇၅၀ - ၇၆၀ ခန့်ရှိသည်။

   တောင်အာရှဈေးကွက်အတွင်း ဘင်္ဂလားဒေ့ရှ်၊ ပါကစ္စတန်နှင့် အိန္ဒိယတို့တွင် ကုလားပဲ စိုက်ပျိုးမှုသည် ဖေဖော်ဝါရီ - မတ်ကာလများ၌ ရိတ်သိမ်းထွက်ပေါ်မည်ဖြစ်ပြီး ဝယ်လက်များအနေဖြင့် ဒေသတွင်းမှသာ ဝယ်ယူဖွယ်ရှိခြင်း၊ အိန္ဒိယနိုင်ငံ၌ ဈေးနှုန်းသက်သာသော စားတော်ပဲ ကို ကိုတာသတ်မှတ်ချက်မရှိပဲ အခွန်ကင်းလွတ်ခွင့်ဖြင့် မတ်လကုန်အထိ တင်သွင်းခွင့်ပြုထားခြင်းစသည့် အခြေအနေများအရ ဩစတေးလျကုလားပဲအပေါ် ဝယ်လိုအားမှာ လျော့နည်းကျဆင်းလျက်ရှိကြောင်း သိရှိရသည်။

Source: Grain Central, 31 Jan 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ဂျပန်နိုင်ငံမှ စီးပွားရေးခေါင်းဆောင်များကိုယ်စားလှယ်အဖွဲ့သည် တရုတ်နိုင်ငံစက်မှုနှင့် သတင်းအချက်အလက်နည်းပညာဝန်ကြီးနှင့် ဇန်နဝါရီ ၂၆ရက်နေ့၌ ဘေဂျင်းမြို့တွင် တွေ့ဆုံခဲ့ပြီး နယ်စပ်ဖြတ်ကျော်မော်တော်ကားကဏ္ဍနှင့် တစ်ပိုင်းလျှပ်ကူးပစ္စည်းကဏ္ဍပူးပေါင်းဆောင်ရွက်မှုတို့အတွက် တွေ့ဆုံဆွေးနွေးခဲ့ကြောင်းသိရပါသည်။

    တရုတ်နိုင်ငံသည် ကြီးမားသည့်ဈေးကွက်နှင့် ကောင်းမွန်စွာဖွံ့ဖြိုးတိုးတက်နေသော စက်မှုလုပ်ငန်းဆိုင်ရာစနစ်ကိုပိုင်ဆိုင်ထားပြီး ဂျပန်နိုင်ငံမှာ မြင့်မားသည့်နည်းပညာများပိုင်ဆိုင်ထားကြောင်းနှင့် အနာဂတ်တွင် တရုတ်နိုင်ငံနှင့် ဂျပန်နိုင်ငံကြား စက်မှုလုပ်ငန်းပူးပေါင်းဆောင်ရွက်နိုင်ရန်အတွက် ကြီးမားသည့်အလားအလာရှိကြောင်း ဝန်ကြီးက ပြောကြားခဲ့ပါသည်။

      တစ်ပိုင်းလျှပ်ကူးပစ္စည်း၊ မော်တော်ကားများ၊ ရေနံဓာတု၊ ဒစ်ဂျစ်တယ်နည်ပညာနှင့် စွမ်းအင်သစ်ကဏ္ဍများမှာ ပူးပေါင်းဆောင်ရွက်ရန် အလားအလာအများဆုံးကဏ္ဍများဖြစ်ကြောင်းသိရပါသည်။

     ဂျပန်နိုင်ငံကုန်သည်များနှင့် စက်မှုလုပ်ငန်းရှင်များအသင်းသည် တရုတ်နိုင်ငံသို့ ၁၉၇၅ခုနှစ်မှစတင်၍ နှစ်စဉ်နီးပါး ကိုယ်စားလှယ်အဖွဲ့ကို အလည်အပတ်ခရီးစေလွှတ်လေ့ရှိပြီး ကိုဗစ်ရောဂါကြောင့် ၂၀၁၉ခုနှစ်မှစတင်ကာ အလည်အပတ်ခရီးများရပ်တန့်ခဲ့ခြင်းဖြစ်ပါသည်။

     ယခုအစည်းအဝေးသည် တရုတ်နိုင်ငံစက်မှုဝန်ကြီးတက်ရောက်သည့် ပထမဆုံးအစည်းအဝေးဖြစ်ပြီး အမေရိကန်နိုင်ငံနှင့်တင်းမာမှုများမှာ ဆက်လက်မြင့်တက်နေမှုကြောင့် တရုတ်နိုင်ငံ သည် ဂျပန်ကုမ္ပဏီများနှင့်ပူးပေါင်းဆောင်ရွက်ရန် ဆန္ဒရှိကြောင်းသိရပါသည်။

DOCA(ရန်ကုန်)