ပြည်ပကုန်သွယ်မှုသတင်းများ

အင်ဒိုနီးရှားနိုင်ငံတွင် အရန်ဆန်များ သိုလှောင်ထားရှိရန် စီစဉ်ဆောင်ရွက်နေမှုကြောင့် ၂ဝ၂၃ ခုနှစ် ပထမ ၈ လအတွင်း ယခင်နှစ်ကာလတူနှင့် နှိုင်းယှဉ်ပါက ဆန်တင်သွင်းမှုမှာ အများအပြားမြင့်တက်လာခဲ့ကြောင်း အင်ဒိုနီးရှားစာရင်းအင်းဌာနက ဖော်ပြပါသည်။

အင်ဒိုနီးရှားနိုင်ငံသည် ၂ဝ၂၃ ခုနှစ် ဇန်နဝါရီလမှ ဩဂုတ်လအထိ ဆန်တန်ချိန် ၁.၅၉ သန်း တင်သွင်းခဲ့ပြီး ၂ဝ၂၂ ခုနှစ် တစ်နှစ်လုံးစာ တင်သွင်းမှုထက် တန်ချိန် ၄၂၉ဝဝဝ တန် ပိုမိုခဲ့ကြောင်း၊ ၂ဝ၂၃ ခုနှစ် ပထမ ၈ လအတွင်း ထိုင်းနိုင်ငံမှ ဆန်တန်ချိန် ၈ဝ၂ဝဝဝ နှင့် ဗီယက်နမ်နိုင်ငံမှ ဆန်တန်ချိန် ၆၇၄ဝဝဝ တင်သွင်းခဲ့ခြင်းဖြစ်ကြောင်း စာရင်းအင်းဌာနအကြီးအကဲ Amalia Adininggar Widyasanti က ပြောကြားခဲ့ပါသည်။

၂ဝ၂၃ ခုနှစ်အတွင်း အယ်လ်နီညိုရာသီဥတုဖြစ်စဉ်ကြောင့် ဆန်ထုတ်လုပ်မှု ထိခိုက်နိုင်ဖွယ်ရှိသဖြင့် ဆန်ဈေးနှုန်းတည်ငြိမ်အောင် ထိန်းသိမ်းနိုင်ရန်အတွက် ဆန်တင်သွင်းခွင့် ခွဲတမ်းကို  တန်ချိန် ၂.၃ သန်းခွင့်ပြုရန် အင်ဒိုနီးရှားအစိုးရက ချမှတ်ခဲ့သည်။

အင်ဒိုနီးရှားနိုင်ငံအနေဖြင့် ဆန်တင်သွင်းရာတွင် အိန္ဒိယနိုင်ငံအပါအဝင် အခြားနိုင်ငံများ၏ တင်သွင်းမှုကန့်သတ်ချက်များကို ရင်ဆိုင်နေရပြီး ယခင်ကာလများနှင့်မတူဘဲ အခက်အခဲကြုံ တွေ့နေရကြောင်း အင်ဒိုနီးရှားနိုင်ငံသမ္မတ Joko Widodo က ၁၅-၉-၂၀၂၃ နေ့တွင် ပြောကြားခဲ့သည်။ ပြည်တွင်း၌ ဆန်ဈေးနှုန်းများကျဆင်းစေရန်အတွက် သိုလှောင်ထားသော အရန်ဆန်များကို ဖြန့်ဝေသွားရန် သမ္မတ Widodo က အကြီးမားဆုံး နိုင်ငံပိုင် ထောက်ပံ့ပို့ဆောင်ရေးကုမ္ပဏီ ဖြစ်သည့် Bulog သို့ ညွှန်ကြားထားသည်။ အင်ဒိုနီးရှား အမျိုးသားစားနပ်ရိက္ခာ‌အေဂျင်စီ၏ အချက်အလက်များအရ ၁၅-၉-၂၀၂၃ ရက်နေ့တွင် နိုင်ငံတစ်ဝန်း၌ ဆန်ပျမ်းမျှဈေးနှုန်းများမှာ အင်ဒိုနီးရှား ရူပီးငွေ ၁၄၄၉ဝ (ဝ.၉၄ ဒေါ်လာ) ရှိပြီး ယခင်နှစ်ကာလတူနှင့် နှိုင်းယှဉ်ပါက ၁၆ ရာခိုင်နှုန်း မြင့်တက်လာခဲ့ကြောင်း သိရှိရပါသည်။

Source: Jakarta Post, 15 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

တရုတ်နိုင်ငံ၌ ယူနန်ပြည်နယ် Mengzi ရှိ သရုပ်ပြအခြေစိုက်စခန်းတွင် ပညာရှင် Yuan Longping ၏ နည်းပညာဖြင့် တီထွင်မျိုးပွားထားသော စပ်မျိုးစပါးကို စိုက်ပျိုးထားရှိသည့် ဧရိယာ ၆.၇ ဟက်တာအား စက်တင်ဘာလအစောပိုင်း၌ ရိတ်သိမ်းခဲ့ရာ အထွက်နှုန်းသည် တစ်ဟက်တာလျှင် ၁၇.၈ မက်ထရစ်တန်အထိ စံချိန်တင်ထွက်ရှိခဲ့ကြောင်း Hunan Hybrid Rice Research Center က ဖော်ပြပါသည်။

တစ်ချိန်တည်းတွင် Gejiu အခြေစိုက်စခန်း၌ စိုက်ပျိုးထားရှိသည့် အဆိုပါစပ်မျိုးစပါး စိုက်ခင်းမှလည်း တစ်ဟက်တာလျှင် အထွက်နှုန်း ၁၇.၅ တန်ကျော် စံချိန်တင်ထွက်ရှိခဲ့ကြောင်း၊ ၎င်းစပ်မျိုးစပါး စိုက်ပျိုးထုတ်လုပ်မှုများကို ယူနန်စိုက်ပျိုးရေးတက္ကသိုလ်၊ ယူနန်စိုက်ပျိုးရေးသိပ္ပံ အကယ်ဒမီ၊ Jiangsu စိုက်ပျိုးရေးသိပ္ပံအကယ်ဒမီနှင့် Yangzhou တက္ကသိုလ်တို့မှ ပညာရှင်များက  တိုင်းတာအကဲဖြတ်ခဲ့ကြကြောင်း သိရှိရသည်။

Yuan သည် ၂၀၂၀ ပြည့်နှစ်တွင် ၎င်း၏ စူပါစပ်မျိုးစပါးကို တစ်ဟက်တာလျှင် ၁၈ တန်အထိ စံချိန်တင်ထွက်ရှိရန် သတ်မှတ်လျာထားခဲ့ပြီး ယူနန်ပြည်နယ် Gejiu မြို့ရှိ ကုန်းပြင်မြင့် မွေးမြူရေးသရုပ်ပြအခြေစိုက်စခန်းကို တာဝန်ပေးအပ်လျက် စမ်းသပ်စိုက်ပျိုးခဲ့သည်။ ၎င်းကုန်းပြင်မြင့်ဒေသသည် ပင်လယ်ရေမျက်နှာပြင်မှ အမြင့်ပေ ၁၂၈၇ မီတာတွင် တည်ရှိပြီး နှစ်စဉ်ပျမ်းမျှအပူချိန် ၂၀ ဒီဂရီ စင်တီဂရိတ်နှင့် မိုးရေချိန် ၇၀၀ မှ ၉၀၀ မီလီမီတာရရှိ၍ အားသာချက်အနေဖြင့်  ကြီးမားသော ဆည်မြောင်းစနစ်ပါဝင်ခြင်းနှင့် မြေပြန့်ဒေသဖြစ်သောကြောင့် အခြေခံအားဖြင့် အထွက်နှုန်းမြင့်မားနိုင်သည့် အခြေအနေများရှိကြောင်းသိရပါသည်။

Hunan Hybrid Rice Research Center ၏ အတွင်းရေးမှူး Xu Jingbo က လူဦးရေ များပြားပြီး စိုက်ပျိုးနိုင်သည့်မြေနည်းပါးသော နိုင်ငံအတွက် မြင့်မားသောအထွက်နှုန်းများရရှိရန် စဉ်ဆက်မပြတ် လေ့လာသွားရမည်ဖြစ်ပြီး  အရည်အသွေးမြင့်မားမှုနှင့် မှန်ကန်ထိရောက်သည့် ဖွံ့ဖြိုးတိုးတက်မှုတို့ရရှိရန် အကောင်အထည်ဖော် ဆောင်ရွက်ကြရမည်ဖြစ်ကြောင်း၊ စပါး အထွက်နှုန်းတိုးတက်စေရေးအတွက် နည်းပညာအသစ်များကို လယ်သမားများအား နည်းစနစ်ကျ သင်ကြားပေးခြင်းအားဖြင့် မြန်မြန်ဆန်ဆန် အသုံးချနိုင်မည် ဖြစ်ပါကြောင်း ပြောကြားခဲ့ပါသည်။

တရုတ်နိုင်ငံသည် ကမ္ဘာ့ထွန်ယက် စိုက်ပျိုးနိုင်သောမြေ၏ ၉ ရာခိုင်နှုန်းအောက်သာ ရှိသော်လည်း စပ်မျိုးစပါးနည်းပညာ၏ ကျေးဇူးကြောင့် ကမ္ဘာ့လူဦးရေ ၂၀ ရာခိုင်နှုန်းခန့်အတွက် စားနပ်ရိက္ခာ ဖြည့်ဆည်းပေးနိုင်မှုရှိကြောင်း ECNS သတင်းဌာနက ဖော်ပြပါသည်။

Source: ECNS.cn, 19 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

မလေးရှားနိုင်ငံ၌ ဆန်ဈေးနှုန်းမြင့်တက်မှုနှင့် ရောင်းလိုအား ပြတ်တောက်မှုများအပေါ် စိုးရိမ်မှုများ ဖြစ်ပေါ်လျက်ရှိရာ အိန္ဒိယနိုင်ငံ၏ ဆန်တင်ပို့မှု ကန့်သတ်ချက်များနှင့်စပ်လျဉ်း၍ အကောင်းဆုံးဖြေရှင်းမှုတစ်ရပ်ကို ရှာဖွေနိုင်ရန် အိန္ဒိယအစိုးရနှင့် ဆွေးနွေးမည်ဟု မလေးရှားနိုင်ငံ စိုက်ပျိုးရေးဝန်ကြီး မိုဟာမက်ဆာဘူက ၁၈-၉-၂၀၂၃ ရက်၊ တနင်္လာနေ့တွင် ပြောကြားခဲ့သည်။

မလေးရှားနိုင်ငံရှိ နိုင်ငံပိုင် ဆန်တင်သွင်းသည့် အဖွဲ့အစည်းဖြစ်သော Bernas သည်လည်း ဗီယက်နမ်၊ ထိုင်းနှင့် ကမ္ဘောဒီးယားတို့ကဲ့သို့ အခြားသောဆန်တင်ပို့ပေးသွင်းသူများနှင့် ညှိနှိုင်းသွားမည်ဖြစ်ကြောင်း ဝန်ကြီးက လွှတ်တော်သို့ ပြောကြားခဲ့သည်။

ပူပြင်းသော ရာသီဥတု၏ စပါးရိတ်သိမ်းခြင်းအပေါ် ခြိမ်းခြောက်မှုနှင့်အတူ ထိပ်တန်းဆန် တင်ပို့သူ အိန္ဒိယဦးဆောင်သော နိုင်ငံများ၏ ငွေကြေးဖောင်းပွမှုကို တားဆီးရန်နှင့် စားနပ်ရိက္ခာ ဖူလုံစေရန် တင်ပို့မှုများကို ကန့်သတ်ခြင်းတို့က အာရှရှိ အခြားနိုင်ငံများကဲ့သို့ပင် မလေးရှားသည်လည်း မကြာသေးမီရက်သတ္တပတ်များအတွင်း ရောင်းလိုအားအပိုင်း နည်းပါးလာပြီး ဆန်ဈေးနှုန်းများ မြင့်တက်လာမှုကို ကြုံတွေ့ရလျက်ရှိသည်။ 

မလေးရှားနိုင်ငံတွင်းရှိ ဆန်စက်များအနေဖြင့် ၎င်းတို့၏ လစဉ်ထုတ်လုပ်မှုကို ၁ နှစ်အတွင်း ၂၀ ရာခိုင်နှုန်း တိုးမြှင့်ရန် တိုက်တွန်းထားကြောင်း၊ လက်ရှိ ပြည်တွင်း ဆန်ပြတ်လပ်မှုကို တစ်လအတွင်း ဖြေရှင်းနိုင်မည်ဟု မျှော်လင့်ထားကြောင်း၊ မလေးရှားနိုင်ငံ၏ လက်ရှိ အရန်ဆန်သိုလှောင်ထားရှိမှုမှာ မက်ထရစ်တန်ချိန် ၉၀၀၀၀၀ ရှိပြီး လေးလမှ ငါးလအတွက် ဆန်လိုအပ်ချက်ကို ဖြည့်ဆည်းပေးရန် လုံလောက်မှုရှိကြောင်းဖြင့် မလေးရှားစိုက်ပျိုးရေးဝန်ကြီး မိုဟာမက်က ပြောကြားခဲ့သည်။

Source: Economic Times, 14 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

တရုတ်နိုင်ငံ အကောက်ခွန်အထွေထွေအုပ်ချုပ်ရေးအဖွဲ့ (GACC) ၏ ထုတ်ပြန်ကြေညာ ချက်အရ တရုတ်အကောက်ခွန်ဌာနသည် ၁၈-၉-၂၀၂၃ ရက်နေ့မှ စတင်၍ ကမ္ဘောဒီးယားနိုင်ငံမှ လတ်ဆတ်အုန်းသီးများနှင့် ဗင်နီဇွဲလားနိုင်ငံမှ ထောပတ်သီးများကို တင်သွင်းခွင့်ပြုခဲ့ကြောင်းနှင့် စက်တင်ဘာလအတွင်း ကမ္ဘောဒီးယားနှင့် ဗင်နီဇွဲလားခေါင်းဆောင်များသည် တရုတ်နိုင်ငံသို့ တရားဝင်ခရီးစဉ် သွားရောက်ခဲ့ပြီးနောက် ယခုကဲ့သို့ သိသာထင်ရှားသော ရလဒ်များ ထွက်ပေါ်လာခဲ့ကြောင်းဖြင့် Khmer Times သတင်းစာဌာနက စက်တင်ဘာလ ၂၀ ရက်နေ့တွင် ဖော်ပြ ထားသည်။

ကမ္ဘောဒီးယားဝန်ကြီးချုပ် Hun Manet သည် တရုတ်နိုင်ငံသို့ စက်တင်ဘာလ ၁၄ ရက်နေ့မှ ၁၆ ရက်နေ့အထိ တရားဝင်ခရီးစဉ် သွားရောက်ခဲ့ကြောင်း၊ အဆိုပါခရီးစဉ်အတွင်း တရုတ်နှင့် ကမ္ဘောဒီးယားနိုင်ငံတို့သည် ၎င်းတို့၏ ဆယ်စုနှစ်များစွာ ကြာမြင့်ခဲ့သော ချစ်ကြည်ရင်းနှီးမှုကို ပိုမို ခိုင်မာစေခဲ့ပြီး သဘောတူညီချက်များဖြင့် အနာဂတ်ကိုမျှဝေခံစားမည့် လူမှုပတ်ဝန်းကျင်တစ်ရပ် တည်ဆောက်နိုင်ရေး ကြိုးပမ်းသွားရန် ကတိပြုခဲ့ကြကြောင်း၊ နိုင်ငံရေးပူးပေါင်းဆောင်ရွက်မှု၊ ထုတ်လုပ်မှုစွမ်းရည်၊ စိုက်ပျိုးရေး၊ စွမ်းအင်၊ လုံခြုံရေးနှင့် ပြည်သူအချင်းချင်း ဖလှယ်ရေးဆိုင်ရာ ကဏ္ဍစုံပါဝင်သည့် "Diamond Hexagon" ခေါ် ပူးပေါင်းဆောင်ရွက်မှု မူဘောင်အပေါ် အခြေခံ၍ နှစ်နိုင်ငံအကြား ပူးပေါင်းဆောင်ရွက်မှုကို မြှင့်တင်ရန် သဘောတူညီခဲ့ကြောင်းဖြင့် ဆင်ဟွာသတင်းအေဂျင်စီကို ကိုးကားလျက် ဖော်ပြထားသည်။

ကမ္ဘောဒီးယား၊ အကောက်ခွန်ဌာန၏ အချက်အလက်များအရ ၂၀၂၃ ခုနှစ်၏ ပထမ(၈)လတွင် နှစ်နိုင်ငံကုန်သွယ်မှုသည် အမေရိကန်ဒေါ်လာ ၈.၀၉ ဘီလီယံဖြင့် နှစ်စဉ်  ၁.၁ ရာခိုင်နှုန်းအထိ မြင့်တက်လာခဲ့ကြောင်း၊ တရုတ်နိုင်ငံသို့ တင်ပို့သော ကမ္ဘောဒီးယား၏ ပို့ကုန်ပမာဏသည် အမေရိ ကန်ဒေါ်လာ ၉၄၀ သန်းဖြင့် ၁၆. ၈ ရာခိုင်နှုန်းအထိ တိုးတက်ရောက်ရှိခဲ့ကြောင်းဖြင့် သိရသည်။ ကမ္ဘောဒီးယား လယ်ယာထွက်ကုန်များကို တရုတ်ဈေးကွက်သို့ ပိုမိုတင်ပို့နိုင်ခဲ့ခြင်းကြောင့် တရုတ်နိုင်ငံသည် ကမ္ဘောဒီးယား၏ ဆန်၊ ငှက်ပျောသီး၊ သရက်သီးနှင့် Longan ခေါ် လေချူသီး တို့အတွက် အဓိကပို့ကုန်ဈေးကွက်ကြီးတစ်ခုဖြစ်သည်။

ဗင်နီဇွဲလားသမ္မတ Nicolás Maduro Moros သည်လည်း စက်တင်ဘာလ ၈ ရက်နေ့မှ ၁၄ ရက်နေ့အထိ တရုတ်နိုင်ငံသို့ တရားဝင်ခရီးစဉ် သွားရောက်ခဲ့ရာ  နှစ်နိုင်ငံအကြား ပူးပေါင်းဆောင်ရွက်ရေး သဘောတူညီချက်များကို လက်မှတ်ရေးထိုးခဲ့ကြပြီး ရပ်ဝန်းနှင့်လမ်းမ (Belt and Road) ဆိုင်ရာ ပူးပေါင်းဆောင်ရွက်မှုနှင့် ကုန်သွယ်မှု၊ ပညာရေး၊ ခရီးသွားလုပ်ငန်း၊ အာကာသ၊ မြို့ပြလေကြောင်း၊ သိပ္ပံနည်းပညာနှင့် စာနယ်ဇင်းကဏ္ဍများတွင် ပိုမိုနီးကပ်စွာ မိတ်ဖက် ဆောင်ရွက်သွားရန် သဘောတူညီမှုများ ရရှိခဲ့ကြောင်း တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ Mao Ning က ၁၄-၉-၂၀၂၃ နေ့တွင် ပြောကြားခဲ့ကြောင်း သိရှိရသည်။

Source: Khmer Times, 20 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အောက်တိုဘာလမှ စတင်မည့် ၂၀၂၃-၂၄ ခုနှစ် သီးနှံရာသီတွင် ကမ္ဘာ့သကြားထုတ်လုပ်မှု မှာ ၁.၂၁ ရာခိုင်နှုန်း ကျဆင်းလျက် ဈေးကွက်အတွင်း သကြားတန်ချိန် ၂.၁၁၈ သန်းအထိ လိုအပ်ချက် ဖြစ်ပေါ်နိုင်မည်ဟု အပြည်ပြည်ဆိုင်ရာ သကြားအဖွဲ့အစည်း (ISO) က ခန့်မှန်းထားပါသည်။

လက်ရှိ သကြားရာသီကာလတွင် ထုတ်လုပ်နိုင်မှုတန်ချိန်မှာ ၁၇၇.၀၂ သန်းရှိသော်လည်း ၂၀၂၃-၂၄ ခုနှစ်၌ ကမ္ဘာ့သကြားထုတ်လုပ်မှုသည် တန်ချိန် ၁၇၄.၈၄ သန်းခန့်သာရှိနိုင်ကြောင်း၊ သို့ရာတွင် ကမ္ဘာ့သကြားစားသုံးမှုမှာ တန်ချိန် ၁၇၆.၅၃ သန်းမှ ၁၇၆.၉၆ သန်းသို့ မြင့်တက်လာ ဖွယ်ရှိကြောင်း၊ ထို့ကြောင့် ယခုနှစ်၌ ကမ္ဘာ့သကြားဈေးကွက်အတွင်း တန်ချိန် ၀.၄၉၃ သန်း ပိုလျှံမှု ရှိသော်လည်း ရှေ့လာမည့်နှစ်တွင် တန်ချိန် ၂.၁၁၈ သန်းခန့် လိုအပ်ချက် ဖြစ်ပေါ်နိုင်ကြောင်း ISO အဖွဲ့၏ ခန့်မှန်းချက်အရ သိရှိရသည်။

ISO အဖွဲ့မှ အမှုဆောင်ဒါရိုက်တာ Jose Orive က သကြားကုန်ကြမ်း ဈေးနှုန်းများသည် ၁ ပေါင်လျှင် ၂၅ ဆင့်ခန့် (၁ တန်လျှင် အိန္ဒိယရူပီးငွေ ၄၅၉၅၀ ခန့်) ဖြင့် ခိုင်မာမှုရှိမည်ဟု ခန့်မှန်းထားသည်။ နယူးယောက်မြို့ရှိ InterContinental Exchange စတော့ဈေးကွက်တွင် သကြားကုန်ကြမ်းဈေးနှုန်းများမှာ ၁၂ နှစ်တာအတွင်း အမြင့်ဆုံးအဖြစ် ၁ ပေါင်လျှင် ၂၇.၄၄ ဆင့် (၁ တန် လျှင် ၅၀၄၂၅ အိန္ဒိယရူပီး) သို့ ရောက်ရှိခဲ့သည်။

အိန္ဒိယနိုင်ငံရှိ AgriMandi မှ အမှုဆောင်အရာရှိချုပ် Uppal Shah က ဘရာဇီးနိုင်ငံ၌ သကြားအထွက်ပမာဏ မြင့်တက်မည်ဟု ခန့်မှန်းရသော်လည်း ရေနံစိမ်းဈေးနှုန်းများ ကြီးမြင့်မှုက ထုတ်လုပ်ရရှိသော သကြားများကို အီသနောလောင်စာအဖြစ် ပြောင်းလဲသုံးစွဲမှုသို့ ဦးတည်စေနိုင်ကြောင်း၊ စက်တင်ဘာနှင့် အောက်တိုဘာလများအတွင်း အိန္ဒိယနိုင်ငံ၌ ရရှိနိုင်မည့် မိုးရေချိန်အခြေအနေနှင့် ရှေ့လာမည့်သီးနှံရာသီအတွင်း ကြံစိုက်ပျိုးထုတ်လုပ်မှုအပေါ် သက်ရောက်နိုင်မှုတို့က ကမ္ဘာ့သကြားထုတ်လုပ်မှုတွင် စောင့်ကြည့်ရမည့်အချက်များပင်ဖြစ်ကြောင်း၊ အစောပိုင်းနေ့ရက်များ၌ သကြားတင်ပို့မှုကို လျော့ချမည့် သတင်းများထွက်ပေါ်ခဲ့သော်လည်း ၂၀၂၄ ခုနှစ် ဇန်နဝါရီလသည် ကျန်ရှိမည့်ရာသီကာလအတွက် အဆုံးအဖြတ်ပေးရန် အကောင်းဆုံးအချိန် ဖြစ်ကြောင်း ပြောကြားပါသည်။

အိန္ဒိယနိုင်ငံ၏ ကြံစိုက်ပျိုးထုတ်လုပ်မှု လျော့ကျခြင်းသည် ကမ္ဘာ့သကြားအထွက်ပမာဏ ကို ISO အဖွဲ့က လျော့ချခန့်မှန်းစေသည့် အကြောင်းအရင်းတစ်ရပ်ဖြစ်ပြီး ယခုနှစ်ထုတ်လုပ်နိုင်မှုတန်ချိန် ၃၂.၉ သန်း၏အောက်သို့ လျော့ကျလျက် အိန္ဒိယ၏ လာမည့်နှစ် သကြားထုတ်လုပ်မှုမှာ တန်ချိန် ၃၀.၄ သန်းခန့်သာရှိနိုင်ကြောင်း အိန္ဒိယသကြားစက်လုပ်ငန်းရှင်များအသင်း (ISMA) က ခန့်မှန်းထားသည်။

သို့ဖြစ်ရာ စာရင်းဖွင့်လက်ကျန် တန်ချိန် ၅.၇ သန်းနှင့်အတူ ရှေ့လာမည့် ရောင်းဝယ်ရေး ရာသီတွင် အိန္ဒိယ၏ သကြားရောင်းလိုအားမှာ စုစုပေါင်း တန်ချိန် ၃၆.၁ သန်းခန့်ရှိမည်ဟု ခန့်မှန်းရကြောင်း၊ ဝယ်လိုအားအပိုင်း၌ ပြည်တွင်းစားသုံးမှု တန်ချိန် ၂၈.၁ သန်းနှင့် ပြည်ပတင်ပို့မှု တန်ချိန် ၁ သန်းခန့် ရှိနိုင်ပြီး လာမည့်နှစ်တွင် စာရင်းပိတ်အားဖြင့် သကြားတန်ချိန် ၇ သန်းခန့် ကျန်ရှိမည်ဟု ခန့်မှန်းရကြောင်း၊ မဟာရဋ္ဌပြည်နယ်၌ ကိုယ်စားလှယ်များစေလွှတ်ထားရှိသည့် လုပ်ငန်းရှင်အချို့၏ ပြောကြားချက်အရ ဩဂုတ်လအတွင်း မိုးရေချိန်နည်းပါးမှုကြောင့် အဆိုပါပြည်နယ်တွင် ကြံစိုက်ခင်းများ ခြောက်သွေ့ပျက်စီးမှုဖြစ်ပေါပြီး သကြားအထွက်ကို ထိခိုက်မှုရှိမည်ဖြစ်ကြောင်း Hindu Business Line သတင်းဌာနက ဖော်ပြထားပါသည်။

Source: The Hindu Business Line, 20 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)