ပြည်ပကုန်သွယ်မှုသတင်းများ

အိန္ဒိယပြည်ပကုန်သွယ်မှုဦးစီးဌာန (DGFT) သည် ၂၀၂၂ ခုနှစ် အောက်တိုဘာလကတည်းက  ရှိနေခဲ့ပြီးသော ကန့်သတ်ချက်များကို ဆက်လက်ထားရှိမည့် သကြားတင်ပို့မှု မူဝါဒများအား အောက်တိုဘာလ ၁၈ ရက်နေ့တွင် ထုတ်ပြန်ခဲ့ကြောင်း၊ မူဝါဒအရ အစိုးရ၏ ကြိုတင်ခွင့်ပြုချက်ဖြင့် တင်ပို့ခွင့်ပြုမည်ဖြစ်သော်လည်း စားနပ်ရိက္ခာဝန်ကြီးဌာနအနေဖြင့် ယခုနှစ်တွင် သံတမန်လမ်းကြောင်းများမှတစ်ဆင့် ညှိနှိုင်းမှုအရ တင်ပို့မည့်ပမာဏမှလွဲ၍ အခြားတင်ပို့မှုများကို ခွင့်ပြုချက် ထုတ်ပေးမည်မဟုတ်ကြောင်းဖြင့် သိရပါသည်။

သကြားကြမ်း၊ သကြားဖြူ၊ သန့်စင်ပြီးသကြားနှင့် အော်ဂဲနစ်သကြားများ တင်ပို့မှုအပေါ် ကန့်သတ်ချက်များမှာ နောက်ထပ်အမိန့်တစ်စုံတစ်ရာ ထုတ်ပြန်ခြင်းမရှိသရွေ့ ၂၀၂၃ ခုနှစ်၊ အောက်တိုဘာလ ၃၁ ရက်နေ့ အလွန်တွင်လည်း ဆက်လက်တည်ရှိနေမည်ဖြစ်ပြီး အခြားသော အခြေအနေများမှာ ပြောင်းလဲမှုမရှိကြောင်းဖြင့် DGFT က ပြောကြားခဲ့သည်။ အမိန့်ကြော်ငြာစာပါ ပို့ကုန်ကန့်သတ်ချက်များသည် သတ်မှတ်လုပ်ထုံးလုပ်နည်းများနှင့်အညီ အခွန်နှုန်းခွဲတမ်းထားများ လျှော့ချလျက် တင်ပို့လျက်ရှိသည့် အမေရိကန်နှင့် ဥရောပသမဂ္ဂသို့ တင်ပို့မည့် သကြားများနှင့် အကျုံးမဝင်ကြောင်းဖြင့် ရှင်းလင်းဖော်ပြထားသည်။

ပြည်တွင်းသကြားဈေးကွက်အတွင်း ရောင်းလိုအားအခြေအနေများ ကျပ်တည်းလာမည်ကို စိုးရိမ်၍ စားနပ်ရိက္ခာဝန်ကြီးဌာနအနေဖြင့် လက်ရှိ အောက်တိုဘာလမှ စက်တင်ဘာလအထိ သကြားတင်ပို့မှုရာသီအတွက် သကြားတင်ပို့မှု မည်သည့်ခွဲတမ်းကိုမဆို ခွင့်ပြုမည့်အလားအလာ မရှိကြောင်း၊ နှစ်စဉ် ခန့်မှန်းဝယ်လိုအား မက်ထရစ်တန်ချိန်မှာ ၂၇.၅ သန်းမှ ၂၈ သန်းထက် ပို၍ များပြားနေသော်လည်း ထုတ်လုပ်မှုတွင် ခန့်မှန်းထားသည့်အတိုင်း ကျဆင်းမှုများရှိခဲ့ကြောင်းဖြင့် သိရပါသည်။

သတင်းအရင်းအမြစ်တစ်ခုအရ အောက်တိုဘာလနှင့် နိုဝင်ဘာလတို့အတွက် ပြည်တွင်း ဝယ်လိုအားမှာ အရန်သကြားအနေဖြင့် တန်ချိန် ၆ သန်းသည် လုံလောက်ရုံမျှသာရှိသဖြင့် လာ မည့်နှစ် ကြံသီးနှံအပေါ် အယ်လ်နီညို၏ ခြိမ်းခြောက်မှုများကြောင့် အစိုးရအနေဖြင့် ၂၀၂၄-၂၀၂၅ ရာသီအတွက် ပြည်တွင်း၌ အများအပြား သိုလှောင်နိုင်ချေရှိကြောင်း၊ ထို့အပြင် အစိုးရအနေဖြင့် ၂၀၂၃-၂၀၂၄ အီသနောရာသီအတွက် ရောစပ်ပမာဏကို ၁၅ ရာခိုင်နှုန်းသတ်မှတ်ခဲ့သဖြင့် ကြံသီးနှံ လိုအပ်ချက်မှာ များပြားလိမ့်မည်ဖြစ်ကြောင်း၊ ၂၀၂၂-၂၀၂၃ ၏ ရောစပ်ပမာဏ ၁၂ ရာခိုင်နှုန်းထက် များပြားခဲ့ကြောင်းဖြင့် သိရသည်။

အိန္ဒိယသကြားစက်ရုံများအသင်းက ၂၀၂၂-၂၀၂၃ သကြားထုတ်လုပ်မှုရာသီတွင် သကြား မက်ထရစ်တန် ၃၂.၈ သန်း ထုတ်လုပ်ခဲ့သော်လည်း ယခုနှစ်တွင် အီသနောအဖြစ် ပြောင်းလဲပြီးနောက် သကြားထုတ်လုပ်နိုင်မှုမှာ တန်ချိန် ၃၁.၆၈ သန်းသို့ ကျဆင်းဖွယ်ရှိကြောင်း သြဂုတ်လ ၂ ရက်နေ့၌ ခန့်မှန်းချက် ထုတ်ပြန်ထားခဲ့သည်။

Source: The Hindu Business Line, 18 Oct 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အိန္ဒိယနိုင်ငံ၌ ဘာစမာတီဆန် တင်ပို့မှုအပေါ် အနိမ့်ဆုံးပို့ကုန်ဈေးနှုန်းကို တစ်တန်လျှင် ဒေါ်လာ ၁၂၀၀ ချမှတ်ထားရာမှ ဒေါ်လာ ၉ဝဝ သို့ လျှော့ချပေးရန် ပို့ကုန်လုပ်ငန်းရှင်များ၏ တောင်းဆိုမှုအား ပြည်ထဲရေးဝန်ကြီး Amit Shah ဦးဆောင်သော ဝန်ကြီးများပါဝင်သည့် ကော်မတီက ပယ်ချခဲ့သော်လည်း ဆက်လက်စဉ်းစားဆောင်ရွက်ရမည့် ကိစ္စရပ်အဖြစ် ထားရှိ ကြောင်း အိန္ဒိယစားနပ်ရိက္ခာဝန်ကြီးဌာနက ပြောကြားခဲ့ပါသည်။

အစိုးရ၏ လယ်ယာထွက်ကုန်တင်ပို့မှု မြှင့်တင်ရေး အဖွဲ့အစည်းဖြစ်သော APEDA သည် ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အရ အင်တာနက်စင်္ကြန်မှ လျှောက်လွှာဖိုင် လက်ခံသည့်စနစ်ကို ပြောင်းလဲမှုများပြုလုပ်ခဲ့ပြီးနောက် ၂၈-၈-၂၀၂၃ နေ့မှစတင်၍ တစ်တန်လျှင် ဒေါ်လာ ၁၂ဝဝ အောက် လျော့နည်းသော ဈေးနှုန်းဖြင့် ချုပ်ဆိုသည့် ဘာစမာတီဆန် ပို့ကုန် စာချုပ်များကို မှတ်ပုံတင်ဆောင်ရွက်ခြင်းမရှိတော့ကြောင်း သိရှိရပါသည်။

အိန္ဒိယစားနပ်ရိက္ခာဝန်ကြီးဌာနက အစိုးရအနေဖြင့် ပြည်တွင်းဆန်ဈေးနှုန်းများကို ထိန်းညှိ နိုင်ရန်နှင့် ပြည်တွင်းစားသုံးသူများအတွက် လုံလောက်သောဆန်များရရှိစေရန်အတွက် နည်းလမ်း များစွာကို ဆောင်ရွက်ခဲ့ကြောင်း၊ အဆိုပါနည်းလမ်းများအနက် ဘာစမာတီဆန် တစ်တန်လျှင် ဒေါ်လာ ၁၂ဝဝ နှင့်အထက် စာချုပ်ချုပ်ဆိုမှုများကိုသာ မှတ်ပုံတင်မှုနှင့် ခွဲတမ်းချထားမှု လက်မှတ် (Registration-cum-Allocation Certificate - RCAC) ထုတ်ပေးသည့် နည်းလမ်းလည်း ပါဝင် ကြောင်း၊ အဆိုပါနည်းလမ်းကိုဆောင်ရွက်ရခြင်းမှာ အစိုးရသည် ဇူလိုင်လ ၂ဝ ရက်နေ့မှ စတင်၍ ဘာစမာတီမဟုတ်သောဆန်ဖြူတင်ပို့မှုကို တားမြစ်ပိတ်ပင်ခဲ့ပြီးနောက် ၎င်းဆန်များကို ဘာစမာ တီဆန်၏ HS code ဖြင့် အမျိုးအစား ပြောင်းလွှဲလျက် တရားမဝင် တင်ပို့နေသည်ဟူသော အစီရင်ခံစာများကို လက်ခံရရှိခဲ့ခြင်းကြောင့်ဖြစ်ကြောင်း ပြောကြားခဲ့ပါသည်။

လက်ရှိကျင့်သုံးနေသော အနိမ့်ဆုံးပို့ကုန်ဈေးနှုန်း သတ်မှတ်မှုအတိုင်း ဆောင်ရွက်ရန် ဆုံးဖြတ်ချက်ကို ဝန်ကြီးများပါဝင်သော ကော်မတီကချမှတ်ခဲ့ပြီး ၁၄-၁၀-၂၀၂၃ နေ့တွင် စားနပ် ရိက္ခာဝန်ကြီးဌာနသည် ကူးသန်းရောင်းဝယ်ရေးဝန်ကြီးဌာနနှင့် APEDA အာဏာပိုင်အဖွဲ့တို့ ထံသို့ ဆက်လက်အကြောင်းကြားခဲ့ခြင်းဖြစ်ပါသည်။

အိန္ဒိယ ဆန်တင်ပို့သူများအသင်း (AIREA) က ၁၄-၁၀-၂၀၂၃ နေ့၌ အကြံပြုစာထုတ်ပြန်ရာ တွင် အစိုးရအနေဖြင့် ဘာစမာတီဆန်စာချုပ်များကို တစ်တန်လျှင် ဒေါ်လာ ၁၂ဝဝ အထက်ဖြင့် သာ RCAC အသိလက်မှတ်ထုတ်ပေးရေးအတွက် မှတ်ပုံတင်ခွင့်ပြုသွားမည်ဟူသည့် ကန့်သတ် ချက်များကို ဆက်လက် ကျင့်သုံးသွားမည်ဖြစ်ကြောင်းနှင့် AIREA အဖွဲ့ဝင်များအနေဖြင့် ဆန် ဝယ်ယူ သိုလှောင်ရာတွင် စီးပွားရေးအကျိုးသက်ရောက်မှုနှင့် ဘာစမာတီဆန်တင်ပို့မှု အလား အလာများကို သတိကြီးစွာထား၍ဆောင်ရွက်သွားကြရန် ဖော်ပြထားသည်။ AIREA ၌ ဥက္ကဌအဖြစ် ဆောင်ရွက်ခဲ့သော Vijay Setia က ဆန်တင်ပို့သူ အများစုသည် အဆိုပါအကြံပြုစာ ထုတ်ပြန်ပြီး သည့်နောက်ပိုင်း ဘာစမာတီဆန် ဝယ်ယူမှုမပြုတော့ကြောင်း ပြောဆိုပါသည်။

စက်တင်ဘာလ ၂၅ ရက်နေ့၌ ကျင်းပပြုလုပ်ခဲ့သော ဘာစမာတီဆန်လုပ်ငန်းရှင်များနှင့် အစည်းအဝေးတွင် ကူးသန်းရောင်းဝယ်ရေးဝန်ကြီး Piyush Goyal က ဘာစမာတီဆန် အနိမ့်ဆုံး ပို့ကုန်ဈေးနှုန်းကို တစ်တန်လျှင် ဒေါ်လာ ၈၅ဝ သို့လျှော့ချသတ်မှတ်သွားရန် သဘောတူညီခဲ့ ကြောင်း၊ APEDA ၏ ကိန်းဂဏန်းများအရ ပို့ကုန်တင်ပို့သူများမှဖော်ပြသည့် ဘာစမာတီဆန် တစ် တန်လျှင် ပျမ်းမျှဈေးနှုန်းများမှာ ၂ဝ၂၂ ခုနှစ် အောက်တိုဘာလတွင် ၁ဝ၄၈.၈၂ ဒေါ်လာ၊ နိုဝင်ဘာ လ၌ ၁ဝ၁၆.၂၉ ဒေါ်လာ၊ ဒီဇင်ဘာလတွင် ၉၉၈.၁၆ ဒေါ်လာနှင့် ၂ဝ၂၃ ခုနှစ် ဇန်နဝါရီလ၌ ၁ဝ၄၅.၂၁ ဒေါ်လာ အသီးသီးရှိခဲ့ကြောင်း၊ အိန္ဒိယ ဆန်တင်ပို့သူများအသင်းမှ ကိုယ်စားလှယ်အဖွဲ့ သည် APEDA အာဏာပိုင်အဖွဲ့၏ ဥက္ကဌနှင့် တွေ့ဆုံပြီး ဘာစမာတီဆန်အနိမ့်ဆုံးပို့ကုန် ဈေးနှုန်း သတ်မှတ်ချက်ကို လျှော့ချသတ်မှတ်ပေးရန် တောင်းဆိုသွားမည်ဖြစ်ကြောင်း သိရှိရသည်။

Source: The Hindu Business Line, 15 Oct 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အယ်လ်နီညို၏ သက်ရောက်မှုကြောင့် ရာသီဥတုခြောက်သွေ့ကာ စပါးအထွက်နှုန်းအပေါ် ထိခိုက်စေခဲ့ရာ ၂၀၂၃ ခုနှစ်တွင် အင်ဒိုနီးရှား၏ ဆန်ထွက်ရှိမှုမှာ ၂ ရာခိုင်နှုန်း လျော့နည်းလျက် မက်ထရစ်တန်ချိန် ၃၀.၉၀ သန်းသို့ ကျဆင်းနိုင်ဖွယ်ရှိကြောင်း အင်ဒိုနီးရှား စာရင်းအင်းဗျူရိုမှ ခေတ္တအကြီးအကဲဖြစ်သူ Amalia Adininggar Widyasanti က ၁၆-၁၀-၂၀၂၃ ရက်နေ့တွင် ပြောကြားခဲ့သည်။

အဆိုပါ ခန့်မှန်းချက်သည် သြဂုတ်လ၏ အထွက်နှုန်းအချက်အလက်နှင့် စက်တင်ဘာလမှ ဒီဇင်ဘာလအတွင်း ရိတ်သိမ်းနိုင်မည့် ခန့်မှန်းချက်တို့ကို အခြေခံထားခြင်းဖြစ်သည်။ ယခင်နှစ်၌ စိုက်ပျိုးဧရိယာ ဟက်တာ ၁၀.၄၅ သန်းမှ စပါးများ ရိတ်သိမ်းနိုင်ခဲ့သော်လည်း ၂၀၂၃ ခုနှစ်အတွက် စပါးရိတ်သိမ်းဧရိယာသည် ဟက်တာ ၁၀.၂ သန်းရှိမည်ဟု ခန့်မှန်းထားသည်။

ဆိုပါ စာရင်းအင်းဗျူရို၏ စာရင်းများအရ အင်ဒိုနီးရှားနိုင်ငံသည် ယခုနှစ် ဇန်နဝါရီလမှ စက်တင်ဘာလအတွင်း ဆန်တန်ချိန် ၁.၇၉ သန်း တင်သွင်းခဲ့ကြောင်း၊ ယခင်နှစ် ကာလတူ၌ တင်သွင်းမှုထက် ဆန်တန်ချိန် ၂၈၈၇၀၇ တန် ပိုမိုခဲ့ကြောင်း၊ ထိုင်းနိုင်ငံထံမှ အများဆုံး ဝယ်ယူခဲ့ခြင်းဖြစ်ပြီး ၎င်း၏နောက်၌ ဗီယက်နမ်၊ အိန္ဒိယ၊ ပါကစ္စတန်နှင့် မြန်မာနိုင်ငံတို့ထံမှ တင်သွင်းခဲ့ကြောင်း၊ ယခုနှစ် အစောပိုင်းက ထုတ်ပြန်ခဲ့သည့် သွင်းကုန်ခွဲတမ်း ဆန်တန်ချိန် ၂.၃ သန်းအပြင် ဆန်တန်ချိန် ၁ ဒသမ ၅ သန်းကို ထပ်မံတင်သွင်းရန်စီစဉ်လျက်ရှိကြောင်း စင်ကာပူ Business Times သတင်းဌာနက ဖော်ပြပါသည်။

Source: Business Times, 16 Oct 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အစိုးရချင်း ညှိနှိုင်းဆောင်ရွက်မှုများအရ အိန္ဒိယအစိုးရသည် ဘာစမာတီမဟုတ်သောဆန် တန်ချိန် ၁၀.၃၄ သိန်းကို နိုင်ငံပေါင်း ၇ နိုင်ငံသို့ အမျိုးသားသမဝါယမပို့ကုန်လီမိတက်မှတစ်ဆင့် တင်ပို့ခွင့်ပြုလိုက်ကြောင်း အိန္ဒိယ ပြည်ပကုန်သွယ်ရေးညွှန်ကြားမှုဦးစီးဌာနက ၁၈-၁၀-၂၀၂၃ နေ့တွင် အမိန့်ကြော်ငြာစာ ထုတ်ပြန်ခဲ့ပါသည်။

အဆိုပါ အမိန့်ကြော်ငြာစာအရ ဖိလစ်ပိုင်သို့ ဆန်တန်ချိန် ၂.၉၅ သိန်း၊ ကင်မရွန်းသို့ တန်ချိန် ၁.၉ သိန်း၊ မလေးရှားသို့ တန်ချိန် ၁.၇ သိန်း၊ ကို့ဒီအိုင်ဗရီသို့ တန်ချိန် ၁.၄၂ သိန်း၊ ဂီနီယာသို့ တန်ချိန် ၁.၄၂ သိန်း၊ နီပေါသို့ တန်ချိန် ၉၅၀၀၀ နှင့် ဆေရှဲလ်သို့ တန် ၈၀၀ အသီးသီးတင်ပို့မည် ဖြစ်ကြောင်း သိရှိရသည်။

ပြည်တွင်းရိက္ခာဖူလုံမှုနှင့် ဈေးနှုန်းသက်သာစေရေးအတွက် အိန္ဒိယအစိုးရသည် ၂၀-၇-၂၀၂၃ နေ့မှစ၍ ဘာစမာတီမဟုတ်သောဆန် တင်ပို့မှုကို တားမြစ်ပိတ်ပင်ခဲ့ကြောင်း၊ သို့ရာတွင် အိမ်နီးချင်းနိုင်ငံများနှင့် စားနပ်ရိက္ခာ ထိခိုက်လွယ်မှုရှိသော နိုင်ငံများမှ တောင်းဆိုလာပါက ဖြည့် ဆည်းပေးမည်ဖြစ်ကြောင်း ပြောဆိုထားရှိချက်နှင့်အညီ  အဆိုပါနိုင်ငံများ၏ ညှိနှိုင်းမေတ္တာရပ်ခံ လာမှုအပေါ် ဆန်တန်ချိန် ၁၀.၃၄ သိန်းတင်ပို့ရန် ခွင့်ပြုခဲ့ခြင်းဖြစ်ကြောင်း၊ အိန္ဒိယအစိုးရအနေဖြင့် ယခုနှစ် စိုက်ပျိုးထုတ်လုပ်မှုမှ ဆန်တန်ချိန် ၁၁၂ သန်းထွက်ရှိရန် မျှော်မှန်းထားကြောင်းဖြင့် Hindu Business Line သတင်းဌာနက ဖော်ပြပါသည်။

Source: The Hindu Business Line, 18 Oct 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အင်ဒိုနီးရှားနိုင်ငံ၊ အမျိုးသားသုတေသနနှင့် တီထွင်ဆန်းသစ်မှုအေဂျင်စီ (BRIN) သည် အယ်လ်နီညိုဖြစ်စဉ်၏ ပူပြင်းခြောက်သွေ့မှုကြောင့် သီးနှံများ ထိခိုက်ပျက်စီးနိုင်မည့် အန္တရာယ်ကို  အဆင့်သုံးဆင့်ဖြင့် ကျော်လွှားရန် လယ်သမားများအား ဖိတ်ခေါ်အသိပေးခဲ့ပါသည်။

BRIN အေဂျင်စီအဖွဲ့၏ စားနပ်ရိက္ခာသီးနှံသုတေသနဗဟိုဌာန၊ အကြီးအကဲ Yudhistira Nugraha ၏ ပြောကြားမှုအရ အဆိုပါအဆင့်သုံးဆင့်မှာ သီးနှံစိုက်ပျိုးမှု အခြေအနေပြ ပြက္ခဒိန်၏ အချက်အလက်စနစ်အား အများဆုံးအသုံးပြုခြင်း၊ ဆန်စပါး စိုက်ပျိုးမှုအစား ရင့်မှည့်မှု မြန်ဆန် သော သီးနှံများကို ပြောင်းလဲစိုက်ပျိုးခြင်းနှင့် ရေကိုအလေအလွင့်မဖြစ်စေဘဲ အသုံးပြုခြင်းတို့ ပါဝင်ကြောင်း၊ အဆိုပါအဆင့် ၃ ဆင့်ကို ထည့်သွင်းဆောင်ရွက်ခြင်းဖြင့် သီးနှံများဖြစ်ထွန်းမှု မရှိခြင်းကို အောင်မြင်စွာ ကာကွယ်နိုင်မည်ဖြစ်ကြောင်းဖြင့် ၆-၁၀-၂၀၂၃ နေ့တွင် ပြောကြားခဲ့ ပါသည်။

ပထမအဆင့် သီးနှံစိုက်ပျိုးမှု အခြေအနေပြ ပြက္ခဒိန် သတင်းအချက်အလက်စနစ်သည် စိုက်ပျိုးရေးဝန်ကြီးဌာနက စီစဉ်ဆောင်ရွက်သည့် ကြိုတင်သတိပေးစနစ်ဖြစ်ကြောင်း၊ တောင်သူ များအား ၎င်းတို့၏မြေယာများ၌ စိုက်ပျိုးနိုင်သည့် အသင့်လျော်ဆုံးအချိန်များကို သတင်းအချက် အလက် ပြန်ကြားပေးနိုင်ရန် ရည်ရွယ်ကြောင်း၊ သို့သော် အင်ဒိုနီးရှားနိုင်ငံရှိ လယ်သမား အများ အပြားသည် မိရိုးဖလာစိုက်ပျိုးနည်းဖြင့် စိုက်ပျိုးကြသောကြောင့် ယခုကဲ့သို့ ပံ့ပိုးပေးသည့် ပထမအဆင့် အစီအစဉ်ကို ပါဝင်ဆောင်ရွက်မှု နည်းပါးကြောင်း သိရှိရသည်။

ဒုတိယအဆင့်တွင် လယ်သမားများသည် ဆန်စပါးနှင့်နှိုင်းယှဉ်ပါက အချိန်တိုအတွင်း ရိတ်သိမ်းနိုင်မည့် အစားထိုးသီးနှံများဖြစ်သည့် ပဲတီစိမ်းနှင့် နှံစားပြောင်း ကဲ့သို့သော သီးနှံများကို ရွေးချယ် စိုက်ပျိုးရမည်ဖြစ်ကြောင်း၊ နောက်ဆုံးအဆင့်နှင့် စပ်လျဉ်း၍ တောင်သူများအနေဖြင့် မိမိတို့၏ ရေပမာဏကို ပိုမိုသတိပြု သိုလှောင်အသုံးပြုရမည်ဖြစ်ကြောင်း၊ စိုက်ပျိုးရန် သတ်မှတ်ထားသည့် အပင်များအတွက် လိုအပ်သောရေပမာဏအတိအကျကို အလေးထား အသုံးပြုရမည် ဖြစ်ကြောင်း၊ ကာလကြာရှည်မည့် ခြောက်သွေ့ရာသီတွင် ရေကို ထိန်းသိမ်းထားရန်မှာ အရေးကြီးသဖြင့် ဆည်မြောင်းစနစ်များကို ပိုမိုထိရောက်အောင် ဆောင်ရွက်နိုင်ရန် လိုအပ်ပါကြောင်းဖြင့် Nugraha က အကြံပြုပြောကြားခဲ့သည်။

Source: Antara News, 7 Oct 2023  (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)