ပြည်ပကုန်သွယ်မှုသတင်းများ

အိန္ဒိယနိုင်ငံတွင် ကြက်သွန်နီများ ဈေးကွက်သို့ဝင်ရောက်မှုမှာ လစဉ်အလိုက်၊ နှစ်စဉ်အလိုက် စံချိန်တင်ကုန်အဝင်များ ရှိခဲ့သော်လည်း ဈေးနှုန်းများသည် ယခင်လထက် ၂၈% မြင့်တက်ခဲ့ကြောင်း သိရှိရပါသည်။

အိန္ဒိယစိုက်ပျိုးရေးဝန်ကြီးဌာန၊ Agmarknet ၏ စာရင်းများအရ ကြက်သွန်နီ အဓိက ရောင်းဝယ်သော Lasalgaon ဈေးကွက်၌ ဇူလိုင်လ ၈ ရက်နေ့တွင် တစ်ကွင်တယ် (၁၀၀ ကီလို ဂရမ်) လျှင် ၁၃၄၀ ရူပီးနှုန်း ရှိရာမှ ယခုလတွင် ရူပီး ၁၇၂၅ သို့ မြင့်တက်လာခဲ့ကြောင်း အိန္ဒိယ နိုင်ငံတစ်ဝှမ်းရှိ လယ်ယာထွက်ကုန်ရောင်းချရေးကော်မတီ (APMC) ကုန်စည်ဒိုင်များသို့ ဇူလိုင် ၁ ရက်နေ့နှင့် ဩဂုတ်လ ၇ရက်အကြား ကြက်သွန်နီအဝင်မှာ တန်ချိန် ၂၂.၃၃ သိန်းဖြင့် စံချိန်တင် အဝင်ရှိခဲ့ပြီး ယခင်နှစ်ကာလတူတွင် တန်ချိန် ၁၈.၂၅ သိန်းရှိခဲ့ကြောင်း၊ စိုက်ပျိုးရေးဝန်ကြီးဌာန၏ အချက်အလက်များအရ ယခုဇွန်လတွင် ကုန်ဆုံးခဲ့သော ၂၀၂၂-၂၀၂၃ ခုနှစ် သီးနှံရာသီအတွင်း ကြက်သွန်နီ ထုတ်လုပ်မှုမှာ တန်ချိန် ၃၁.၀၁ သန်းရှိခဲ့ကြောင်း၊ ယခင်နှစ်၌ တန်ချိန် ၃၁.၆၉ သန်း ရှိခဲ့ကြောင်း၊ စားသုံးသူရေးရာဝန်ကြီးဌာန၏ အချက်အလက်များအရ ကြက်သွန်နီဈေးနှုန်းများမှာ ယခင်လ၌ ၁ ကီလိုဂရမ်လျှင် ၂၆.၂၁ ရူပီးနှုန်း ရှိခဲ့သော်လည်း ယခုလတွင် ၂၇.၇ ရူပီးနှုန်းဖြင့် ၅% အထိ မြင့်တက်ခဲ့ကြောင်း၊ နှစ်အလိုက် နှိုင်းယှဉ်ပါက ဈေးနှုန်း ၁၅% မြင့်တက်ခဲ့ကြောင်း Hindu Business Line သတင်းဌာနက ဖော်ပြထားသည်။

ဥယျာဉ်ခြံထွက်ကုန် တင်ပို့သူများအသင်း (HPEA) ၏ ဥက္ကဋ္ဌ Ajit Shah က ပြည်တွင်းဝယ်လိုအား ကောင်းမွန်နေ၍ ယခင်အပတ်ထက် ကြက်သွန်နီ ၁ ကီလိုဂရမ်လျှင် ၃ ရူပီးမှ ၄ ရူပီးနှုန်းဖြင့် ဈေးနှုန်းမြင့်တက်ခဲ့ကြောင်း၊ သိုလှောင်ရုံအတွင်းရှိ ကြက်သွန်နီများ၏ အရည်အသွေးမှာ ကောင်းမွန်သော်လည်း သယ်ယူပို့ဆောင်ရာတွင် ထိခိုက်ပျက်စီးမှုအချို့ရှိကြောင်း ပြောဆိုပါသည်။

လယ်ယာထုတ်ကုန်တင်ပို့သူများအသင်း (ACEA) ၏ ဥက္ကဋ္ဌ  M Madan Prakash ကလည်း ဈေးကွက်သို့ ဝင်ရောက်လာသော ကြက်သွန်နီများမှာ အရည်အသွေး ကောင်းမွန်မှုမရှိသော်လည်း ဈေးနှုန်းများ ကြီးမြင့်နေခြင်းဖြစ်ကြောင်း၊ မဟာရဋ္ဌပြည်နယ်တွင် ဧပြီ - မေလများ၌ မိုးရွာသွန်းမှုများကြောင့် သီးနှံများထိခိုက်ပျက်စီးနိုင်ခြေရှိကြောင်းဖြင့် ပြောကြားခဲ့သည်။

Nashik မှ တင်ပို့သူ Vikas Chaudhary က ယခင်ရက်သတ္တပတ်နှစ်ပတ်အတွင်း မှစ၍ ကြက်သွန်နီ၏ အရည်အသွေးအပေါ်မူတည်၍ တစ်ကွင်တယ်လျှင် ၁၆ ရူပီး မှ ၂၅ ရူပီးအထိ မြင့်တက်ခဲ့ကြောင်း၊ ကြက်သွန်နီ ပြည်ပတင်ပို့ရန် ဝယ်လိုအားမှာ နည်းပါးလျက်ရှိကြောင်း၊ အထူးသဖြင့် ပင်လယ်ကွေ့နိုင်ငံများနှင့် ကိုလံဘို (သီရိလင်္ကာ)ကဲ့သို့ ကမ္ဘာ့ဈေးကွက်များတွင် ဈေးနှုန်း ပြောင်းလဲမှုမရှိကြောင်း၊ ပါကစ္စတန်သည်ပင် ယှဉ်ပြိုင်ဈေးနှုန်းများဖြင့် ရောင်းချလျက်ရှိကြောင်း ယခုလတ်တလောတွင် ပြည်ပဈေးကွက်သို့ တင်ပို့မှုမရှိကြောင်း၊ ကာနာတကာပြည်နယ်၏ ကြက်သွန်နီသီးနှံများ ဈေးကွက်သို့ ဝင်ရောက်ပါက ၁၅ ရက်မှ ၂၀ ရက်ခန့် ရက်အတွင်း ဈေးနှုန်းများ တည်ငြိမ်သွားနိုင်ကြောင်း၊ ယခုနှစ်တွင် စိုက်ပျိုးမှု နောက်ကျ၍ ကုန်အဝင်နောက်ကျနိုင်ကြောင်းဖြင့် ပြောကြားခဲ့သည်။

Agmarknet ၏ အချက်လက်များအရ လက်ရှိကြက်သွန်နီဈေးနှုန်းများမှာ ၂၀၂၁ ခုနှစ်ကအတိုင်း တည်ငြိမ်သောနှုန်းထားများရှိသော်လည်း ၂၀၁၇ ထက် လျော့နည်းလျက်ရှိကြောင်း ဖော်ပြထားသည်။

Source: The Hindu Business Line, 8 Aug 2023

ဗီယက်နမ်နိုင်ငံသည် ထိုင်းနိုင်ငံရှိ အချို့သောသကြားတင်ပို့သည့်ကုမ္ပဏီများမှ တင်သွင်းသော သကြားများအပေါ် စုပုံတင်သွင်းမှုအခွန် (anti-dumping duty) ကို ၂၅.၇၃% မှ ၃၂.၇၅% အထိ ၁၈-၈-၂ဝ၂၃ နေ့မှ ၁၅-၆-၂ဝ၂၆ နေ့အထိ ကောက်ခံမည်ဖြစ်ကြောင်း ဗီယက်နမ် ကုန်သွယ်ရေးဝန်ကြီးဌာနက ၈-၈-၂၀၂၃ နေ့၌ ပြောကြားခဲ့ပါသည်။

 ဗီယက်နမ် ကုန်သွယ်ရေးဝန်ကြီးဌာန၏ ထုတ်ပြန်ချက်တွင် ယှဉ်ပြိုင်မှုကိုဆန့်ကျင်သည့် အပြုအမူများဆောင်ရွက်သည်ဟု စွပ်စွဲချက်များအပေါ် ဂရုတစိုက်ဖြင့် မျှတစွာ စုံစမ်းစစ်ဆေးပြီးနောက် အဆိုပါစုပုံတင်သွင်းမှုအခွန် ကောက်ခံရန် ဆုံးဖြတ်ချက်ကို ချမှတ်ခဲ့ခြင်းဖြစ်ကြောင်း၊ ထိုသို့ ထပ်ဆောင်းအခွန်ကောက်ခံမှု၌ အာရှဒေသတွင် အကြီးမားဆုံး သကြားနှင့် ဇီဝစွမ်းအင် ထုတ်လုပ်သည့် ကုမ္ပဏီဖြစ်သော Mitr Phol Sugar နှင့် ဆက်စပ်ကုမ္ပဏီ ၄ ခုတို့၏ သကြားတင်သွင်းမှုအပေါ် ၃၂.၇၅% ကိုလည်းကောင်း၊ Thai Roong Ouang ကုမ္ပဏီနှင့် ၎င်း၏ လက်အောက်ခံ တွဲဖက်လုပ်ငန်း ၅ ခု၏ သကြားတင်သွင်းမှုအပေါ် စုပုံတင်သွင်းမှုအခွန် ၂၅.၇၃% နှင့် တန်ပြန်အကောက်ခွန် (anti-subsidy tariffs) ၄.၆၅% ကိုလည်းကောင်း ချမှတ်ခြင်းဖြစ်ကြောင်း ဖော်ပြပါသည်။

၂ဝ၂၂ ခုနှစ်တွင် ဗီယက်နမ်နိုင်ငံသည် အရှေ့တောင်အာရှနိုင်ငံ ၅ နိုင်ငံမှ တင်သွင်းသော သကြားထုတ်ကုန်များအပေါ် စုပုံတင်သွင်းမှုအခွန် ၄၇.၆၄% ချမှတ်ခဲ့သော်လည်း ပင်ရင်းဒေသအဖြစ် ထိုင်းနိုင်ငံမှ ထုတ်လုပ်သော သကြားများအတွက်သာ ၄ နှစ်ကြာကောက်ခံခြင်းဖြစ်သည်။ ဗီယက်နမ်နိုင်ငံရှိ သကြားထုတ်လုပ်သူများက ထိုင်းနိုင်ငံမှထွက်ရှိသော သကြားများမှာ အစောပိုင်းကာလက လာအို၊ ကမ္ဘောဒီးယား၊ အင်ဒိုနီးရှား၊ မလေးရှားနှင့် မြန်မာတို့မှတစ်ဆင့် တင်ပို့ခဲ့သဖြင့် စုပုံတင်သွင်းမှုအခွန် (anti-dumping duty) ချမှတ်သင့်ကြောင်း အစိုးရသို့ တိုင်ကြားခဲ့ကြပါသည်။

အဆိုပါ အရှေ့တောင်အာရှဒေသရှိ နိုင်ငံ ၅ ခုမှ သကြားထုတ်ကုန်ကိုတင်သွင်းရာတွင် ၄င်းနိုင်ငံများ၌ စိုက်ပျိုးထုတ်လုပ်ကြောင်း လုံလောက်သောသက်သေပြနိုင်ပါက စုပုံတင်သွင်းမှုအခွန် ကောက်ခံမှုမှ ကင်းလွတ်မည်ဖြစ်ကြောင်း သိရှိရပါသည်။ ဗီယက်နမ်နိုင်ငံသည် ၂ဝ၂ဝ ပြည့်နှစ်တွင် အရှေ့တောင်အာရှနိုင်ငံများမှ တင်သွင်းသောသကြားများအပေါ် အခွန်ကောက်ခံမှုအား အာဆီယံ ကုန်စည်ကုန်သွယ်မှု သဘောတူညီချက်ပါ ကတိကဝတ်များနှင့်အညီ ဖယ်ရှားခဲ့ပါသည်။ သို့ရာတွင် ၎င်းသဘောတူညီချက်ပါ ပြဌာန်းချက်များအရ အာဆီယံနိုင်ငံများအနေဖြင့် ပြည်တွင်းလုပ်ငန်းများ၏ အခွင့်အလမ်းများနှင့် အကျိုးစီးပွားများကို ယှဉ်ပြိုင်မှုဆန့်ကျင်သော အပြုအမူများမှ အကာအကွယ်ပေးနိုင်ရန်အတွက် တင်သွင်းခွန်များ ကောက်ခံခွင့်ရှိကြောင်းသိရှိရပါသည်။

Source: Bangkok Post, 8 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

နီပေါနိုင်ငံ၌ စက်မှု၊ ကူးသန်းရောင်းဝယ်ရေးနှင့် ထောက်ပံ့ရေးဝန်ကြီးဌာနသည် အိန္ဒိယနိုင်ငံထံမှ ဆန်တန်ချိန် ၁ သိန်းနှင့် စပါးတန်ချိန် ၁ သန်းတို့ကို အိန္ဒိယနိုင်ငံထံမှ ဝယ်ယူတင်သွင်းမည်ဖြစ်ကြောင်း ထုတ်ဖော်ပြောကြားခဲ့ပါသည်။

အိန္ဒိယနိုင်ငံက ဆန်တင်ပို့မှု တားမြစ်ပိတ်ပင်သည့် အမိန့်ထုတ်ပြန်ခဲ့ပြီးနောက် နီပေါနိုင်ငံ၌ ဝန်ကြီးချုပ်ရုံးလက်အောက်ရှိ ဗဟိုစောင့်ကြည့် အကဲဖြတ်ရေးကော်မတီသည် အတွင်းဝန်ချုပ် Baikuntha Aryal ဦးဆောင်သော ဝန်ကြီးဌာနများကောင်စီနှင့် ညှိနှိုင်းအစည်းအဝေးတစ်ရပ်ကို ဇူလိုင်လ ၃၁ ရက်နေ့တွင် ခေါ်ယူကျင်းပလျက် ဆန်ဈေးနှုန်းများ မြင့်တက်လာမှုနှင့် ရိက္ခာပြတ်လပ်မှု ဖြစ်ပေါ်နိုင်မည့်အရေးကိစ္စတို့အပေါ် အရေးယူစီမံဆောင်ရွက်မှုများကို တိုးမြှင့်ရန် ဆုံးဖြတ်ခဲ့ကြသည်။ ထို့နောက် ကူးသန်းရောင်းဝယ်ရေး၊ ထောက်ပံ့ရေးနှင့် စားသုံးသူကာကွယ်ရေး ဦးစီးဌာနမှ ညွှန်ကြားရေးမှူးချုပ် Gajendra Prasad Thakur က ဆန်တန်ချိန် ၁ သိန်း၊ စပါးတန်ချိန် ၁ သန်းနှင့် သကြားတန်ချိန် ၅ သောင်းတို့ကို ဝယ်ယူတင်သွင်းရန် ဆောင်ရွက်လျက်ရှိ‌ကြောင်း၊  မည်သည့်နေ့ရက်မှ စတင်၍ တင်သွင်းမည်ကိုမူ သတ်မှတ်ရခြင်း မရှိသေးကြောင်းဖြင့် ၅-၈-၂၀၂၃ နေ့၌ ပြောကြားခဲ့ခြင်းဖြစ်သည်။

အိန္ဒိယက ဆန်တင်ပို့မှု တားမြစ်ခဲ့သည့်နောက်ပိုင်း နီ‌ပေါနိုင်ငံ၌ ဆန်ဈေးနှုန်းများသည် ၂၀ ကီလိုဂရမ် တစ်အိတ်လျှင် နီပေါရူပီးငွေ ၂၀၀ အထိ မြင့်တက်လာခဲ့ကြောင်း၊ ပြည်တွင်း စားနပ်ရိက္ခာ လုံလောက်မှုရှိစေရေးအတွက် အစိုးရအနေဖြင့် အနည်းဆုံး စပါးတန်ချိန် ၁ သန်းကို တင်သွင်းရန် ကုန်သည်များက တောင်းဆိုလျက်ရှိကြကြောင်း၊ အစိုးရ၏ စာရင်းများအရ ပြည်တွင်း ဆန်စားသုံးရန် လိုအပ်ချက်၏ ၂၀% ခန့်အား ပြည်ပမှဖြည့်ဆည်းနေရကြောင်း၊ နှစ်စဉ် ပြည်တွင်းစားသုံးမှု ဆန်တန်ချိန် ၇ သန်းအနက် တန်ချိန် ၁.၅ သန်းခန့်ကို ပြည်ပမှ ဝယ်ယူတင်သွင်းခြင်းဖြစ်ကြောင်း၊ နီပေါနိုင်ငံသည် ပြီးခဲ့သည့်ဘဏ္ဍာနှစ်တွင် နီပေါရူပီးငွေ ၃၄ ဘီလီယံ တန်ဖိုးရှိသော ဆန်နှင့် စပါးများကို အိန္ဒိယထံမှ ဝယ်ယူတင်သွင်းခဲ့ကြောင်း My Republica သတင်းဌာနက ဖော်ပြပါသည်။

Source: My Republica, 5 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ဖိလစ်ပိုင်နိုင်ငံသည် ယခုနှစ်ဇူလိုင်လတွင် ဆန် ၁၁၆၁၉၅ မက်ထရစ်တန် တင်သွင်းခဲ့ပြီး ယခင်လ တင်သွင်းမှုပမာဏ ၂၁၆၆၇၆ တန်အောက် ၄၆.၃၇% ကျဆင်းခဲ့ကြောင်း ဖိလစ်ပိုင် Bureau of Plant Industry (BPI) က ဩဂုတ်လ ၇ ရက်၊ တနင်္လာနေ့တွင် သတင်းထုတ်ပြန်ခဲ့ သည်။

ယခုနှစ်၏ ပထမ ၇ လအတွင်း ဖိလစ်ပိုင်နိုင်ငံ၏ ဆန်တင်သွင်းမှုမှာ တန်ချိန် ၁.၉၅  သန်း ရှိခဲ့ပြီး ယခင်နှစ် အလားတူကာလတွင် တန်ချိန် ၂.၃၃ သန်း တင်သွင်းခဲ့သဖြင့် ၁၆.၃၇ ရာခိုင်နှုန်း ကျဆင်းခဲ့သည်။ အဆိုပါပမာဏတွင် ဗီယက်နမ်နိုင်ငံမှ ဆန်တန်ချိန် ၁.၇၅ သန်းခန့်ဖြင့် စုစုပေါင်းတင်သွင်းမှု၏  ၈၉.၆၇% ပါဝင်ပြီး မြန်မာနိုင်ငံမှ ၈၃၄၆၀ တန်နှင့် ထိုင်းနိုင်ငံမှ ၇၆၂၈၇ တန် တင်သွင်းခဲ့ခြင်းဖြစ်ကြောင်း၊ ယခုနှစ် ဆန်တင်သွင်းမှု အမြင့်ဆုံးပမာဏအနေဖြင့် ဧပြီလတွင် ဆန် ၅၁၃၄၂၅ တန် ဝင်ရောက်ခဲ့ကြောင်း Manila Times သတင်းဌာနက ဖော်ပြပါသည်။

Rizal Commercial Banking Corp. မှ စီးပွားရေးပညာရှင် Michael Ricafort က ဆန်တင်သွင်းမှု လျော့နည်းရခြင်းသည် မိုးရာသီအစတွင် စိုက်ပျိုးမှုနှင့် ရိတ်သိမ်းခြင်း လုပ်ငန်းစဉ်များ ပိုမိုဆောင်ရွက်နိုင်ရန် အထောက်အပံ့ပေးထားရှိမှုအရ ဖိလစ်ပိုင်နိုင်ငံ၌ စိုက်ပျိုးထုတ်လုပ်မှုအခြေအနေများ မိုကောင်းမွန်လာခြင်းကြောင့် ဖြစ်နိုင်ကြောင်း၊ မကြာသေးမီနှစ်များအတွင်း ဦးစားပေးမူဝါဒတစ်ရပ်အနေဖြင့် စပါးဈေးနှုန်းလျော့နည်း ဝယ်ယူခြင်းနှင့် လယ်သမားများ၏ ဝင်ငွေများလျော့ကျခြင်းမှ ကာကွယ်ရန်အတွက် စိုက်ပျိုးရိတ်သိမ်းချိန် ကြားကာလတွင် အများအားဖြင့် ဆန်တင်သွင်းမှုကို လျှော့ချရန် စီစဉ်ခဲ့ကြကြောင်း၊ ဆန်တင်ပို့သည့်နိုင်ငံအချို့၏ နိုင်ငံတကာသို့တင်ပို့မှုကို လျှော့ချခဲ့ခြင်းကလည်း ဈေးနှုန်းများ မြင့်တက်လာစေခဲ့ပြီး ဖိလစ်ပိုင်၏ ဆန်တင်သွင်းမှုကို တစ်စိတ်တစ်ပိုင်း လျော့ကျစေခဲ့ကြောင်း ပြောကြားခဲ့သည်။

ဖိလစ်ပိုင် စိုက်ပျိုးရေးဦးစီးဌာန၏ ဈေးနှုန်းစောင့်ကြည့် လေ့လာချက်များအရ ပြည်ပမှတင်သွင်းလာသော ဆန်ချောများအား တစ်ကီလိုဂရမ်လျှင် ပီဆိုငွေ ၄၅ မှ ၄၆ ကြား ဈေးနှုန်းဖြင့် ရောင်းချလျက်ရှိကြောင်း၊ အထူးနှင့် ပရီမီယံဆန်ဈေးနှုန်းများမှာ တစ်ကီလိုလျှင် ပီဆို ၄၇ နှင့် ၅၈ ကြားရှိကြောင်း သိရသည်။

Source: Manila Times, 8 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

မကြာသေးမီကာလ၌ ဆန်စပါးဈေးနှုန်းများ မြင့်တက်ခဲ့သော်လည်း ဝယ်လိုအားကို ထိန်းသိမ်းနိုင်ရေးအတွက် ပြည်တွင်းရှိ ဆန်တင်ပို့သူများအနေဖြင့် ယင်းတို့၏ ပို့ကုန်စာချုပ်များကို လေးစားလိုက်နာဆောင်ရွက်ကြရန် ဗီယက်နမ်ကုန်သွယ်ရေးဝန်ကြီးက တိုက်တွန်းပြောကြားခဲ့ကြောင်း သိရှိရပါသည်။

အိန္ဒိယနိုင်ငံက ပြည်တွင်းဈေးနှုန်းများကို ထိန်းထားနိုင်ရန်အတွက် ဆန်တင်ပို့မှုကို တားမြစ်သည့် အမိန့်ကို ဇူလိုင် ၂၀ ရက်နေ့တွင် ထုတ်ပြန်ခဲ့ပြီးနောက် ဗီယက်နမ်၏ ဆန်ကွဲ ၅ ရာခိုင်နှုန်း ပါဝင်သည့် ဆန်ဈေးနှုန်းသည် လွန်ခဲ့သည့် သီတင်းပတ်၌ ၁ တန်လျှင် ဒေါ်လာ ၅၅၀ မှ ၅၇၅ ကြား ရှိရာမှ ၁၅ နှစ်တာကာလအတွင်း အမြင့်ဆုံးနှုန်းထားအဖြစ် ၄-၈-၂၀၂၃ ရက်နေ့၊ သောကြာနေ့တွင် ဒေါ်လာ ၅၉၀ မှ ၆၀၀ ကြားအထိ မြင့်တက်လာခဲ့ကြောင်း ကုန်သည်များက ပြောဆိုခဲ့သည်။

အိန္ဒိယ၏ တားမြစ်ပိတ်ပင်မှုသည် ကမ္ဘာ့ဆန်တင်ပို့မှုများကို အကျပ်အတည်းဖြစ်စေပြီး ထိုင်းနိုင်ငံနှင့် ဗီယက်နမ်နိုင်ငံတို့မှ ဆန်တင်ပို့သူအချို့သည် သြဂုတ်လ၌ ဆန်တန်ချိန် ၅ သိန်းခန့်တင်ပို့ရမည့် သင်္ဘောတင်အစီအစဉ်များအတွက် အရောင်းသဘောတူစာချုပ်များကို ပြန်လည်ညှိနှိုင်းလျက်ရှိကြောင်း ကုန်သွယ်ရေး သတင်းရင်းမြစ်နှစ်ခုက ယခုသီတင်းပတ် အစောပိုင်းတွင် ပြောကြားခဲ့သည်။

သို့ဖြစ်ရာ ဗီယက်နမ်ကုန်သွယ်ရေးဝန်ကြီး Nguyen Hong Dien က မိမိတို့၏ ဂုဏ်သိက္ခာကို ကာကွယ်ထိန်းသိမ်းရန်အတွက် စာချုပ်ချုပ်ဆိုထားပြီးဖြစ်သော သဘောတူညီချက်များကို လေးစားလိုက်နာ ဆောင်ရွက်ရန် လိုအပ်ကြောင်း၊ ပို့ကုန်လုပ်ငန်းရှင်များအနေဖြင့် ဆန်အရည်အသွေး ကောင်းမွန်မှုအား ထိန်းသိမ်းနိုင်ရန်နှင့် ပြည်တွင်းစားနပ်ရိက္ခာဖူလုံမှုနှင့် အရန်ဆန်ထားရှိမှုကို ပြည့်မီစေရေးအတွက် ပိုမိုတင်ပို့ခြင်းကို ရှောင်ကြဉ်ရမည်ဖြစ်ကြောင်း၊ ဆန်တင်ပို့သည့်နိုင်ငံတစ်ခုအနေဖြင့် ပြည်တွင်းဆန်ဈေးနှုန်းများ ကြီးမြင့်မှုနှင့် ဈေးကွက်သို့ ထောက်ပံ့ရန်ခက်ခဲမှုများ နှင့် ရင်ဆိုင်ကြုံတွေ့ရသည်ဆိုသည်မှာ လက်ခံဖွယ်ရာမရှိကြောင်းဖြင့် ညီလာခံတစ်ရပ်တွင် ပြောကြားခဲ့ခြင်းဖြစ်သည်။

ဗီယက်နမ် ကောက်ပဲသီးနှံဌာန၏ ၁-၈-၂၀၂၃ နေ့၌ ထုတ်ပြန်ချက်အရ ယခင်နှစ်၌ ဆန်တန်ချိန် ၄၂.၇ သန်းထုတ်လုပ်နိုင်ခဲ့ရာမှ ယခုနှစ်တွင် ဆန်တန်ချိန် ၄၃ သန်းအထိ တိုးမြင့် ထုတ်လုပ်နိုင်မည်ဟု ခန့်မှန်းထားကြောင်း၊ အစိုးရ၏ ကနဦးစာရင်းများအရ ယခုနှစ် ပထမ ၇ လအတွင်း ဗီယက်နမ်နိုင်ငံ၏ ဆန်တင်ပို့မှုမှာ တန်ချိန် ၄.၈၄ သန်းရှိပြီး ယခင်နှစ် ကာလတူထက် ၁၈.၇% တိုးတက်ခဲ့ကြောင်း၊ ယခုနှစ်တွင် ဗီယက်နမ်နိုင်ငံအနေဖြင့် ယခင်နှစ်တင်ပို့မှုထက် တန်ချိန် ၀.၇ သန်းခန့် ပိုမိုလျက် ဆန်တန်ချိန် ၇.၈ သန်းအထိ တိုးမြှင့်တင်ပို့နိုင်ဖွယ်ရှိကြောင်း Bangkok Post သတင်းဌာနက ဖော်ပြထားသည်။

Source: Bangkok Post, 4 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)