HighLight News

    စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးရှိ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ပဲခူးမြို့နယ်တာဝန်ခံတို့သည် (၂၁-၁၁-၂၀၂၄)ရက်နေ့၊ နေ့လယ်(၁၃:၀၀)နာရီအချိန်တွင် ပဲခူးမြို့အတွင်းရှိ အခြေခံလူသုံးကုန်ပစ္စည်းနှင့် အိမ်သုံးဆေးဝါးများပြတ်လပ်မှုရှိ/မရှိကို ကွင်းဆင်းစစ်ဆေးခြင်းပြုလုပ်ဆောင်ရွက်ခဲ့ကြောင်းသိရှိရသည်။

          အဆိုပါကွင်းဆင်းဆောင်ရွက်မှုတွင် အခြေခံစားသောက်ကုန်(၁၄)မျိုးဖြစ်သော ဆန်၊ ဆီ၊ ငရုတ်၊ ကြက်သွန်၊ အသားငါး၊ ကြက်ဥ၊ ဘဲဥ၊ ကုလားပဲ၊ အာလူး၊ အိမ်သုံးဆေးဝါးများဖြစ်သော အဖျားပျောက်ဆေး၊ နှာစေးပျောက်ဆေး၊ ပိုးသတ်ဆေး၊ အစာအိမ်ဆေး၊ ဓာတ်ဆား၊ လိမ်းဆေးအမျိုးမျိုးနှင့် လူသုံးကုန်ပစ္စည်းများဖြစ်သော သွားတိုက်ဆေး၊ ကိုယ်တိုက်ဆပ်ပြာ၊ ဆပ်ပြာအမျိုးမျိုး၊ တစ်ကိုယ်ရည်သုံးသန့်ရှင်းရေးပစ္စည်းများရောင်းချသော စတိုးဆိုင်များနှင့် အိမ်သုံးဆေးဝါးဆိုင်များအားကွင်းဆင်း၍ ပစ္စည်းများပြတ်လပ်မှုရှိ/မရှိကိုစစ်ဆေးရာ ပြတ်လပ်မှုမရှိပါကြောင်းနှင့် ပုံမှန်အတိုင်းအ‌ရောင်းအဝယ်ဖြစ်နေပါကြောင်းသိရှိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲတာဝန်ခံသည် ၂၀-၁၁-၂၀၂၄ ရက်နေ့၊ နေ့လယ် ၁၄း၀၀ နာရီအချိန်တွင် သစ်သီးဝလံစိုက်ပျိုးထုတ်လုပ်သည့် လုပ်ငန်းရှင်နှင့်တွေ့ဆုံဆွေးနွေးခဲ့သည်။

        ထိုသို့တွေ့ဆုံဆွေးနွေးရာတွင် သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲတာဝန်ခံက စိုက်ပျိုးထုတ်လုပ်သည့် သီးနှံအမျိုးအစားများ၊ တစ်နှစ်ဝင်ငွေ၊ တစ်လကုန်ကျစရိတ်၊ အကျိုးအမြတ်ရရှိမှု၊ ကြုံတွေ့ရသောအခက်အခဲများအားဆွေးနွေးမေးမြန်းရာ လုပ်ငန်းရှင်က ခြံစိုက်ဧက (၀.၈) ဧကစိုက်ပျိုးလျက်ရှိကြောင်း၊ ခြံ၌ စိုက်ပျိုးသောသီးနှံများမှာ ဒူးရင်း၊ ကြက်မောက်၊ ငရုတ်ကောင်း၊ နာနတ်တို့ကိုစိုက်ပျိုးကြောင်း၊ မြေပြုပြင်ခြင်း၊ ပေါင်းရှင်းခြင်း၊ သွင်းအားစုထည့်ခြင်းနှင့် အထွေထွေကုန်ကျစရိတ်မှာ တစ်လလျှင် (၁၅၀၀၀၀) ကျပ်ရှိကြောင်း၊ ခြံလုပ်ငန်းမှ တစ်နှစ်ဝင်ငွေအနေဖြင့် ဒူးရင်းသီးစိုက်ပျိုးခြင်းမှ ကျပ်သိန်း (၁၀၀) ခန့်၊ ကြက်မောက်စိုက်ပျိုးခြင်းမှ ကျပ်သိန်း (၈၀) ကျော်ခန့်၊ နာနတ်စိုက်ပျိုးခြင်းမှ ကျပ်သိန်း (၅၀) ကျော်ခန့်၊ ငရုတ်ကောင်းစိုက်ပျိုးခြင်းမှ ကျပ် (၁၀) သိန်းခန့်၊ စုစုပေါင်း တစ်နှစ်ပျမ်းမျှဝင်ငွေ ကျပ်သိန်း (၂၄၀-၂၅၀) ခန့်ရရှိကြောင်း၊ သီးနှံများကို မွန်ပြည်နယ်အတွင်း ရောင်းချကြောင်း၊ အခက်အခဲအနေဖြင့် မတည်ရင်းနှီးငွေအခက်အခဲရှိကြောင်း ပြန်လည်ဆွေးနွေးခဲ့သည်။

DOCA(မွန်)

              ၁၉.၁၁.၂၀၂၄ ရက်နေ့ နံနက်(၁၀:၀၀)နာရီအချိန်တွင် မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် အင်းစိန်မြို့နယ်၊ လှိုင်သာယာ(အရှေ့ပိုင်း)မြို့နယ်နှင့် လှိုင်သာယာ (အနောက်ပိုင်း)မြို့နယ်များသို့ အသင်းမှသတ်မှတ်ထားသည့်ဆန်ဈေးထက် ဈေးနှုန်းမြှင့်တင်ရောင်းချခြင်းရှိ/ မရှိ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

             ထိုသို့ ဆောင်ရွက်ခဲ့ရာတွင် အင်းစိန်မြို့နယ်၊ အင်းစိန်ဈေးစည်ပင်သာယာ ဝန်ထမ်းများမှ ပူးပေါင်းပါဝင်ခဲ့ပါသည်။ လှိုင်သာယာမြို့နယ်(အနောက်ပိုင်း)မှ ချိုမာဆန်ဆိုင်၊ ရွှေရွက်လှေ (၂)ဆန်ဆိုင်၊ လှိုင်သာယာ(အရှေ့ပိုင်း)မြို့နယ်မှ ဇွဲဆန်ဆိုင်၊ ပွင့်ဖြိုးခိုင်ဆန်ဆိုင်၊ အင်းစိန်ဈေးမှ ဦးကိုကိုကြီးဆန်ဆိုင်၊ ပြည့်ဝဆန်ဆိုင်နှင့် ရွှေဆန်းလွင်ဆန်ဆိုင်များတွင် ရွှေဘိုပေါ်ဆန်း၊ ကျားပျံ၊ ဧည့်မထ၊ ရက်(၉၀)၊ ဇီယာ၊ ပေါ်ဆန်းမွှေး၊ ဖန်သီးသုခ၊ ဆင်းသုခ၊ ဧရာပဒေသာ၊ အညာသား၊ မနောသုခနှင့် ဆင်းသွယ်အမျိုးအစားအားလုံးတို့တွင် အသင်းမှသတ်မှတ်ထားသော ဆန်ဈေးထက်ဈေးနှုန်းမြှင့်တင် ရောင်းချခြင်းမရှိပါကြောင်း စစ်ဆေးတွေ့ရှိရပြီး မိမိတို့ဌာနမှလည်း သတ်မှတ်ထားသောဈေးနှုန်းများအတိုင်း ရောင်းချခြင်းမရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူခြင်းခံရမည်ဖြစ်ကြောင်း ဆွေးနွေးပြောကြားခဲ့ကြောင်းသိရှိရပါသည်။

DOCA(ရန်ကုန်)

        မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ မော်လမြိုင်မြို့နယ်တာဝန်ခံသည် (၂၀-၁၁-၂၀၂၄) ရက်နေ့တွင် မော်လမြိုင်မြို့နယ်ရှိ ဆီကိုယ်စားလှယ်များထံသို့ ရန်ကုန်မြို့ရှိ Zabukantun ကုမ္ပဏီမှ (ယာဉ်အမှတ် 9E-6235) မော်တော်ယာဉ်ဖြင့် စားအုန်းဆီ (၈၁) ပေပါရောက်ရှိလာခဲ့ကြောင်းသိရှိရပါသည်။

       အဆိုပါ စားအုန်းဆီများကို မော်လမြိုင်ခရိုင်၊ မော်လမြိုင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံနှင့် ကွင်းဆင်းစစ်ဆေးရေးအဖွဲ့တို့ သွားရောက်စစ်ဆေးခဲ့ပြီး ခွဲတမ်းရရှိသောစားအုန်းဆီများကို ရည်ညွှန်းဈေး၊ သယ်ယူပို့ဆောင်ကုန်ကျစရိတ်နှင့် ၂% အမြတ်တို့ဖြင့် မော်လမြိုင်မြို့နယ်အတွင်းရှိ ရပ်ကွက်နှင့်ကျေးရွာများရှိ လက်လီ/ လက်ကားဆိုင်ခွဲများသို့ ခွဲဝေရောင်းချပေးသွားမည်ဖြစ်ကြောင်းနှင့် လက်လီ/ လက်ကားဆိုင်များအနေဖြင့်လည်း စားသုံးသူပြည်သူများထံသို့ ၂% အမြတ်ဖြင့် ပြန်လည်ရောင်းချပေးမည်ဖြစ်ကြောင်း စားအုန်းဆီရောင်းချရန်ခွဲတမ်းရရှိသော ကိုယ်စားလှယ်များထံမှသိရှိရပါသည်။

DOCA(မွန်)

       ၂၀၂၄ခုနှစ်၊ နိုဝင်ဘာလ ၂၀ရက်နေ့၊ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှဝန်ထမ်းများ၊ အစားအသောက်နှင့်ဆေးဝါးကြီးကြပ်ကွပ်ကဲရေးဦးစီးဌာန၊ မြို့နယ်စည်ပင်သာယာရေးဖွဲ့နှင့် ဈေးတာဝန်ခံတို့ပူးပေါင်း၍ မော်လမြိုင်မြို့၊ အမှတ်(၁)ဈေးအတွင်းရှိ ဆေးဆိုင်များသို့ ဆေးဝါးပြတ်လပ်မှုရှိ/မရှိနှင့် ဈေးနှုန်းမြှင့်တင်ရောင်းချမှုရှိ/မရှိတို့ကို ဈေးကွက်စောင့်ကြည့်စစ်ဆေးခြင်းများပြုလုပ်ခဲ့ပါသည်။

       ထိုသို့ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချနေသော  ဆေးအရောင်းဆိုင်များတွင် ဆေးဝါးပြတ်လပ်မှုမရှိကြောင်းနှင့် ဈေးနှုန်းမြှင့်တင်ရောင်းချမှုမရှိသည်ကို စစ်ဆေးတွေ့ရှိရကြောင်းသိရှိရပါသည်။ ထို့နောက် ဆိုင်ရှင်အား ဆေးဝါးများကို ဈေးနှုန်းအဆမတန်မြှင့်တင်ရောင်းချပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူခြင်းခံရမည်ဖြစ်ကြောင်းနှင့် ပြစ်မှုနှင့်ပြစ်ဒဏ်များအား အသေးစိတ်ရှင်းလင်းဆွေးနွေးခဲ့ကြောင်းသိရှိရပါသည်။

DOCA(မွန်)