HighLight News

စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ခရိုင်ဦးစီးမှူး ဒေါ်သန်းသန်းတင်သည် စစ်ကိုင်းခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၌ အောက်တိုဘာလ ၁၅ရက်နေ့တွင် အွန်လိုင်းစနစ်ဖြင့် ရောင်းချခြင်းအကြောင်းသိကောင်းစရာများကို အသိပညာပေး Talk Show ပြုလုပ်ခဲ့ပါသည်။
အဆိုပါအသိပညာပေး Talk Show တွင် ခရိုင်ဦးစီးမှူး၊ လက်ထောက်ညွှန်ကြားရေးမှူး ဒေါ်သန်းသန်းတင်က အွန်လိုင်းစနစ်ဖြင့် ရောင်းချခြင်းလုပ်ငန်းနှင့် ဆက်စပ်နေသော အရေးကြီးကုန်စည်နှင့်ဝန်ဆောင်မှုဥပဒေအကြောင်း ပထမဦးစွာ ပြောကြားလိုကြောင်း၊ အရေးကြီးကုန်စည်နှင့် ဝန်ဆောင်မှုဥပဒေကို ၂၀၁၂ခုနှစ်၊ ဩဂုတ်လ ၁၀ရက်နေ့ ပြည်ထောင်စုလွှတ်တော်ဥပဒေအမှတ် ၁၃ဖြင့်ပြဋ္ဌာန်းခဲ့ရာ အခန်း ၅ခန်းနှင့် ပုဒ်မ၁၂ခုပါရှိကြောင်း၊ အခန်း ၁ အမည်နှင့်အဓိပ္ပါယ်ဖော်ပြချက်တွင် အရေးကြီးကုန်စည်ဆိုသည်မှာ ဤဥပဒေအရ ဝန်ကြီးဌာနတစ်ခုခုက အခါအားလျော်စွာ သတ်မှတ်သော သက်ရှိကုန်စည်တစ်မျိုးမျိုးကိုဆိုသည်ဟု အဓိပ္ပါယ် ဖွင့်ဆိုထားကြောင်း၊ အရေးကြီးဝန်ဆောင်မှုဆိုသည်မှာ ဤဥပဒေအရ ဝန်ကြီးဌာနတစ်ခုခုက အခါအားလျော်စွာ သတ်မှတ်သော ဝန်ဆောင်မှုတစ်မျိုးမျိုးကို ဆိုသည်ဟု အဓိပ္ပါယ်ဖွင့်ဆိုထားကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ၁၁၊ ပုဒ်မခွဲ(ခ)အရ အွန်းလိုင်စနစ်ဖြင့်ရောင်းချခြင်းလုပ်ငန်းနှင့်စပ်လျဉ်း၍ အမိန့်ကြော်ငြာစာ၊ အမိန့်နှင့်ညွှန်ကြားချက်များထုတ်ပြန်ခွင့်ကို ကုန်သွယ်ရေးဦးစီးဌာနအား ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာ(၄၉/၂၀၂၃)ဖြင့် အပ်နှင်းခဲ့ကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ၄၊ ပုဒ်မခွဲ (ဂ)အရ အပ်နှင်းထားသော လုပ်ပိုင်ခွင့်ကိုကျင့်သုံး၍ ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာအမှတ်(၅၀/၂၀၂၃)ဖြင့် အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်ထုတ်ပြန်ခဲ့ပြီး၊ ၎င်အမိန့်တွင် မည်သူမဆို အွန်လိုင်းစနစ်ဖြင့် ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဟု ပြဋ္ဌာန်းခဲ့ကြောင်းပြောကြားခဲ့ပါသည်။
အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ခြင်းဆိုင်ရာအမိန့်ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာအမှတ်(၅၁/၂၀၂၃)ဖြင့်ထုတ်ပြန်ခဲ့ကြောင်း၊ ၎င်းအမိန့်ကြော်ငြာစာတွင် အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်လိုသူသည် ဦးစီးဌာနက သတ်မှတ်သော လျှောက်လွှာပုံစံတွင်ဖြည့်သွင်း၍ အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည်ဖြစ်ကြောင်း၊ မှတ်ပုံတင်ကြေးနှင့် အွန်လိုင်းဝန်ဆောင်ခကို ဦးစီးဌာနကသတ်မှတ်သည့် ဒီဂျစ်တယ်ငွေပေးချေမှုဖြင့် ပေးရမည်ဖြစ်ပြီး၊ အွန်လိုင်းမှတစ်ဆင့် မှတ်ပုံတင်လက်မှတ်ထုတ်ပေးမည်ဖြစ်ကြောင်း၊ မှတ်ပုံတင်လက်မှတ်၏သက်တမ်းသည် စတင်ထုတ်ပေးသည့်နေ့ရက်မှ နှစ်နှစ်တိတိပြည့်မြောက်သည့်နေ့အထိဖြစ်ပြီး၊ မှတ်ပုံတင်လက်မှတ်၏ သက်တမ်းမကုန်မီ ရက်ပေါင်း ၆၀ကြိုတင်၍ မှတ်ပုံတင်လက်မှတ်သက်တမ်းတိုးလျှောက်ထားရမည်ဖြစ်ကြောင်း၊ သက်တမ်းတိုးလျှောက်ထားခြင်းမရှိပါက မှတ်ပုံတင်လက်မှတ်သက်တမ်းကုန်ဆုံးသည့်နေ့ရက်တွင် အလိုအလျောက်ပျက်ပြယ်ပြီးဖြစ်ကြောင်း၊ မှတ်ပုံတင်လက်မှတ်မရှိဘဲ အွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက်ပါက အရေးကြီးကုန်စည်နှင့်ဝန်ဆောင်မှုဥပဒေပုဒ်မ ၅အရ အနည်းဆုံးထောင်ဒဏ် ၆လမှ အများဆုံးထောင်ဒဏ် ၃နှစ်ထိချမှတ်နိုင်သည့်အပြင် ကျပ်ငါးသိန်းထက်မပိုသော ငွေဒဏ်လည်းချမှတ်ခြင်းခံရမည်ဖြစ်ကြောင်း၊ သို့ဖြစ်ပါ၍ အွန်လိုင်းစနစ်ဖြင့် ရောင်းချခြင်းလုပ်ငန်းလုပ်ကိုင်သူများအနေဖြင့် မှတ်ပုံတင်လက်မှတ်လျှောက်ထားကြရမည်ဖြစ်ကြောင်း အသိပညာပေးဆွေးနွေးခဲ့ပါသည်။
DOCA(စစ်ကိုင်း)

စားသုံးသူရေးရာဦးစီးဌာန၊ အင်္ဂပူမြို့နယ်တာဝန်ခံသည် (၁၅.၁၀.၂၀၂၄)ရက်နေ့ နံနက်(၁၀:၀၀) နာရီအချိန်တွင် အင်္ဂပူမြို့နယ်၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre)ခန်းမ၌ အွန်လိုင်းစနစ်ဖြင့်ရောင်းချခြင်းလုပ်ငန်း မှတ်ပုံတင်ခြင်းဆိုင်ရာ Talk Show အစီအစဉ်ကိုဆောင်ရွက်ခဲ့ပါသည်။
အဆိုပါ အစီအစဉ်တွင် မြို့နယ်တာဝန်ခံ ဦးဘိုဘိုက စီးပွားရေးလုပ်ငန်းရှင်များသည် အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်ပါက အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည်ဖြစ်ကြောင်း ရှင်းလင်းပြောကြားခဲ့ပါသည်။ ထိုသို့ပြောကြားရာတွင် မှတ်ပုံတင်လက်မှတ် လျှောက်ထားသူသည် လူပုဂ္ဂိုလ်ဖြစ်ပါက ပြည်ထောင်စုသမ္မတမြန်မာနိုင်ငံတော်အတွင်း အခြေချနေထိုင်လျက်ရှိပြီး အသက်(၁၈)နှစ် ပြည့်ပြီးသူဖြစ်ရမည်။ ထုတ်ပြန်ချက်ပါ သတ်မှတ်ချက်များကို လိုက်နာနိုင်သူ၊ လုပ်ငန်းလုပ်ကိုင်ဆောင်ရွက်မည့်နေရာကို တင်ပြနိုင်သူ၊ အစိုးရအဖွဲ့အစည်းတရပ်ရပ်က အမည်ပျက်ကြေညာထားသော ပုဂ္ဂိုလ်များမဖြစ်ရဟု ဖော်ပြထားပါသည်။ ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက တည်ဆဲဥပဒေတစ်ရပ်ရပ်ဖြင့် ဖွဲ့စည်းတည်ထောင်ထားသော၊ ကိုယ်ပိုင်သတ်မှတ်ချက်ဖြင့် တရားဝင်ဝက်ဘ်ဆိုဒ်ရရှိထားပြီး အွန်လိုင်းစနစ်ဖြင့် ရောင်းချခြင်းလုပ်ငန်း လုပ်ကိုင်ဆောင်ရွက်မည့်နေရာ တင်ပြနိုင်သောအဖွဲ့အစည်းဖြစ်ရပါမည်။ မှတ်ပုံတင်လက်မှတ်လျှောက်ထားရာတွင် ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက အဖွဲ့အစည်းရှိ တာဝန်ခံပုဂ္ဂိုလ်၏ရောင်စုံဓါတ်ပုံ၊ လူပုဂ္ဂိုလ်ဖြစ်ပါက ယင်း ပုဂ္ဂိုလ်၏ ရောင်စုံဓါတ်ပုံ၊ နိုင်ငံသားစိစစ်ရေးကတ်ပြားမိတ္တူ၊ လုပ်ငန်းအမှန်တကယ်တည်ရှိကြောင်း သက်ဆိုင်ရာအစိုးရဌာန၊ အစိုးရအဖွဲ့အစည်း သို့မဟုတ် ရပ်ကွက်/ ကျေးရွာအုပ်ချုပ်ရေးမှူး၏ထောက်ခံချက်၊ အွန်လိုင်းစနစ်ဖြင့်ရောင်းချမည့် ကုန်စည် (သို့မဟုတ်) ဝန်ဆောင်မှု အမျိုးအစားစာရင်း၊ အချက်အလက်နှင့် အာမခံချက်၊ ကုန်စည်နှင့်စပ်လျဉ်း၍ မည်သည့်နိုင်ငံမှ တင်သွင်းကြောင်း (သို့မဟုတ်) ပြည်တွင်း၌ ထုတ်လုပ်ကြောင်း ဖော်ပြထားသည့်အချက်အလက်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ သက်ဆိုင်ရာအစိုးရဌာန၊ အစိုးရအဖွဲ့အစည်းကခွင့်ပြုထားသော အထောက်အထားများရှိပါက ယင်းတို့နှင့်စပ်လျဉ်းသည့် အထောက်အထားများပါ ပူးတွဲတင်ပြ၍ အွန်လိုင်းမှတ်ပုံတင်လက်မှတ်လျှောက်ထားရမည်ဟု ဖော်ပြထားကြောင်း အသိပညာပေး ရှင်းလင်းခဲ့ကြောင်းပါသည်။
DOCA(ဧရာဝတီ)

         တိုက်ကြီးမြို့နယ်တွင် ကုမ္ပဏီများမှရရှိသော စားအုန်းဆီခွဲတမ်း(၁၀၅)ပေပါကို ကုမ္ပဏီ(၄)ခုမှ တာဝန်ယူဖြန့်ဖြူးရောင်းချပေးလျက်ရှိပါသည်။ လန်းလန်းဆန်းဆန်းကုမ္ပဏီမှ (၂၅)ပေပါ၊ မဟာဘုန်းလက်ရုံးမှ (၁၁)ပေပါ၊ လွင်မောင်မောင်ကုမ္ပဏီမှ (၃၂)ပေပါ၊ အောင်ဦးသာကုမ္ပဏီမှ (၃၇)ပေပါအသီးသီးရရှိကြပြီး တိုက်ကြီး (၁၀)ဦး၊ ဥက္ကံ (၂)ဦး၊ အဖျောက်(၅)ဦး  စသည့်ကိုယ်စားလှယ်များက ရပ်ကွက်/ ကျေးရွာအုပ်စုများ၊ ဈေးတွင်း/ ဈေးပြင်ရောင်းချသူများ၊ စားသောက်ဆိုင်နှင့် ဝန်ထမ်းများအား စနစ်တကျရောင်းချပေးလျက်ရှိပြီး အဓိကအားဖြင့် စားအုန်းဆီရောင်းချရာ၌ ဈေးနှုန်းမြှင့်တင်ရောင်းချခြင်း၊ သိုလှောင်ခြင်းများမပြုရန်တို့အတွက် ပူးပေါင်းဌာနများနှင့်အတူ အချိန်နှင့်တပြေးညီ ပူးပေါင်းဆောင်ရွက်လျက်ရှိကြောင်းသိရှိရပါသည်။

DOCA(ရန်ကုန်)

         (၁၅-၁၀-၂၀၂၄)ရက်နေ့၊ နံနက်(၁၁:၀၀)နာရီအချိန်တွင် မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် ရွှေပြည်သာ၊ မင်္ဂလာဒုံ၊ လှိုင်သာယာ(အနောက်ပိုင်း) မြို့နယ်များသို့ အသင့်စားခေါက်ဆွဲခြောက်အမျိုးမျိုးနှင့်ပတ်သက်၍ ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

        ထိုသို့စစ်ဆေးခဲ့ရာတွင် ကုန်စုံဆိုင်(၃)ဆိုင်တွင်ရောင်းချနေသော အသင့်စားခေါက်ဆွဲခြောက်အမျိုးမျိုး၌ စားသုံးသူကာကွယ်ရေးဥပဒေတွင်ပြဋ္ဌာန်းထားသည့် ကုန်အညွှန်းအမှတ်အသားဖော်ပြခြင်းဆိုင်ရာ အချက်များနှင့်ကိုက်ညီမှုရှိ /မရှိစစ်ဆေးခဲ့ရာ ကုန်အညွှန်းအမှတ်အသားပြည့်စုံစွာဖော်ပြထားသည်ကိုတွေ့ရှိရပြီး ဆိုင်ရှင်များအနေဖြင့်လည်း ကုန်အညွှန်းအမှတ်အသားဖော်ပြခြင်းတွင် ကိုက်ညီမှုရှိသောကုန်စည်များကိုသာ စားသုံးသူပြည်သူများလက်ဝယ်အရောက် ဘေးကင်းလုံခြုံစွာဖြန့်ဖြူးရောင်းချရမည်ဖြစ်ပြီး စီးပွားရေးလုပ်ငန်းရှင်လိုက်နာရမည့်အချက်များကိုလည်း လိုက်နာဆောင်ရွက်သွားရန် အသိပညာပေးပြောကြားခဲ့ကြောင်းသိရှိရပါသည်။

DOCA(ရန်ကုန်)

         ၁၅-၁၀-၂၀၂၄ ရက်နေ့၊ နံနက် (၁၀:၀၀) နာရီအချိန်တွင် မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် လှိုင်သာယာ(အနောက်ပိုင်း)မြို့နယ်ရှိ Regency စက်သုံးဆီဆိုင်သို့ သွားရောက်ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

         ထိုသို့ ဆောင်ရွက်ရာတွင် Regency စက်သုံးဆီဆိုင်မှ တာဝန်ခံ ဦးအောင်နိုင်ဦး ပူးပေါင်းပါဝင်လျက် ဆိုင်တွင် LED ဘုတ်၌ ဈေးနှုန်းတင်ထားခြင်းရှိ/ မရှိ၊ ချင်တွယ်ရာတွင်လည်း လီတာများပြည့်ဝမှုရှိ/ မရှိ၊ သတ်မှတ်ထားသော ရည်ညွှန်းဈေးများဖြင့် ရောင်းချခြင်းရှိ/ မရှိ၊ စက်သုံးဆီဘောင်ဆာအဝင်ရှိ/ မရှိတို့ကိုစစ်ဆေးခဲ့ရာ ဈေးနှုန်း LED ဘုတ်တင်ထားပြီး လီတာများလည်းပြည့်ဝမှုရှိကြောင်း၊ သတ်မှတ်ထားသောဈေးနှုန်းဖြင့် ရောင်းချလျက်ရှိပြီး ဘောက်ဆာကားအဝင်များလည်းရောက်ရှိလျက်ရှိပြီး သက်ဆိုင်ရာဌာနများသို့ စာရင်းပေးပို့လျက်ရှိကြောင်း ကွင်းဆင်းစစ်ဆေးချက်အရသိရှိရပါသည်။

DOCA(ရန်ကုန်)