HighLight News

     (၁၃.၆.၂၀၂၄) ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံနှင့် ဝန်ထမ်းများသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ မြို့နယ်လူထုအခြေပြုဗဟိုခန်းမ၌ ကုန်စည်ဝန်ဆောင်မှုနှင့် ပတ်သက်၍ အာမခံပေးခြင်းဆိုင်ရာ အသိပညာပေး (Talk Show) ကိုပြုလုပ်ခဲ့ကြောင်း သိရှိရပါသည်။

       အဆိုပါ Talk Show တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုဦးစီးမှူးဒေါ်ဝင်းဝင်းချောက Talk Show ပြုလုပ်ရခြင်း၏ ရည်ရွယ်ချက်ကိုရှင်းလင်းပြောကြားပြီး ချောင်းဆုံမြို့နယ်တာဝန်ခံဒေါ်ထက်ထက်နွေဦးမှ ကုန်စည်ဝန်ဆောင်မှုနှင့် ပတ်သက်၍ အာမခံပေးခြင်းဆိုင်ရာကိစ္စရပ်များ၊ စီးပွားရေးလုပ်ငန်းရှင်သည် စားသုံးသူအပေါ်ဝန်ဆောင်မှုပေးခြင်းနှင့် စပ်လျဉ်းသည့် ဖော်ပြရမည့်အာမခံချက်များအကြောင်း၊  ကုန်စည်၊ ဝန်ဆောင်မှုများနှင့်စပ်လျဉ်း၍ အာမခံပေးခြင်းအပေါ် စားသုံးသူကတောင်းဆိုနိုင်သည့်အခွင့်အရေးများ၊ စားသုံးသူများနစ်နာဆုံးရှုံးမှုများအတွက် တိုင်ကြားနိုင်သည့်နည်းလမ်းများကို ရှင်းလင်းဆွေးနွေးခဲ့ကြောင်းသိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ ခရိုင်ဦးစီးမှူးရုံး၊ ညောင်တုန်းမြို့နယ်ဦးစီးမှူးရုံးမှ တာဝန်ရှိသူများသည်     (၁၁-၆-၂၀၂၄) ရက်နေ့၊ နံနက်(၁၀:၀၀)နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာနမှ တာဝန်ရှိသူများနှင့်အတူ ညောင်တုန်းမြို့နယ်၊ စားသုံးသူရေးရာဦးစီးဌာန၊ အစည်းအဝေးခန်းမတွင် ဆီကုန်သည်လုပ်ငန်းရှင်(၄၇)ဦးအား စားသုံးဆီနှင့် စားသုံးသူအခွင့်အရေးအသိပညာပေးဟောပြောဆွေးနွေးပွဲကျင်းပပြုလုပ်ခဲ့ပါသည်။

    အဆိုပါဟောပြောမှုတွင် ညောင်တုန်းမြို့နယ်ဦးစီးမှူး ဦးအောင်လွင်က စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း၊ စားသုံးသူပြည်သူများသည် စားသုံးဆီသုံးစွဲမှုများပြားလာပြီး လုံလောက်မှုနည်းပါးနေသေးသည့်အတွက် ပြည်ပမှ စားသုံးဆီကိုတင်သွင်းနေရသည်ဖြစ်ပါကြောင်း၊ ပြည်တွင်း၌ စိုက်ပျိုးထုတ်လုပ်မှုတိုးတက်လာသည်နှင့်အမျှ ဒေသခံတောင်သူများ၊ ကျေးလက်ဒေသများအတွက် အလုပ်အကိုင်အခွင့်အလမ်းများသာမက ဝင်ငွေတိုးတက်မှုများရှိလာမည်ဖြစ်ကြောင်း၊ ပြည်တွင်း၌ အရည်အသွေးပြည့်ဝသော စားသုံးဆီထုတ်လုပ်နိုင်အောင် ဆီကုန်သည်နှင့်ဆီလုပ်ငန်းရှင်များအနေဖြင့် ဝိုင်းဝန်းကြိုးပမ်းဆောင်ရွက်ခြင်းဖြင့် ပို့ကုန်များတို့မြင့်ဆောင်ရွက်နိုင်ဖို့ အခွင့်အလမ်းများပေါ်ပေါက်လာနိုင်မည်ဖြစ်ကြောင်း၊ ပြည်တွင်းထုတ်လုပ်မှုဖွံ့ဖြိုးတိုးတက်မှသာ ဆီထွက်သီးနှံများပိုမို ထုတ်လုပ်နိုင်ပြီး၊ ဆီစက်လုပ်ငန်းများလည်းဖွံဖြိုးတိုးတက်ရေးအတွက် လုပ်ဆောင်ဖို့လိုအပ်ကြောင်း၊ ဆီရောင်းချသူလုပ်ငန်းရှင်များအနေဖြင့်လည်း စားသုံးဆီနှင့် စားသုံးသူအခွင့်အရေးယှဉ်တွဲကာ လေ့လာသုံးသပ်ပြီး စီးပွားရေးလုပ်ငန်းရှင်များက ဥပဒေတာဝန်များကို လေးစားလိုက်နာဆောင်ရွက်ကြရန်၊ စားသုံးသူကာကွယ်ရေးဥပဒေများ၊ ညွှန်ကြားချက်များကို အလေးထားလိုက်နာဆောင်ရွက်ကြရန် အသိပညာပေးဆွေးနွေးခဲ့ပြီး ဆီလုပ်ငန်းရှင်များက သိရှိလိုသည်များ မေးမြန်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်အတွင်းရှိ ဒေသခံပြည်သူများ စားသုံးဆီများဝယ်ယူစားသုံးမှုအဆင်ပြေစေရန်နှင့် စားသုံးဆီဈေးနှုန်းတည်ငြိမ်မှုရှိစေရန်ရည်ရွယ်၍ (၁၀-၆-၂၀၂၄)ရက်နေ့၊ နံနက် (၀၉:၃၀)နာရီအချိန်တွင် စားသုံးသူရေးရာဦးစီးဌာနနှင့် ဌာနဆိုင်ရာတာဝန်ရှိသူများပူးပေါင်းအဖွဲ့သည် စည်ပင်သာယာဈေးများနှင့် မြို့ပေါ်ရပ်ကွက်များရှိ စားသုံးဆီအရောင်းဆိုင်များသို့သွားရောက်ကာ စားသုံးဆီများဖြန့်ဖြူးရောင်းချရာ၌ သတ်မှတ်ဈေးနှုန်းထက် ဈေးမြင့်တင်ရောင်းချခြင်းရှိ/မရှိ ကြပ်မတ်စစ်ဆေးအသိပညာပေးခြင်းများပြုလုပ်ဆောင်ရွက်ခဲ့ကြောင်းသိရသည်။

     ထိုသို့ကွင်းဆင်းစစ်ဆေးရာတွင် ဓနုဖြူမြို့နယ်တာဝန်ခံရုံးမှ ဦးခိုင်လွမ်းမိုး၊ ဝန်ထမ်းများနှင့် ပူးပေါင်းစစ်ဆေးရေးအဖွဲ့သည် ဓနုဖြူမြို့နယ်ဒေသခံပြည်သူလူထုစားသောက်ရေးအတွက် မရှိမဖြစ်လိုအပ်သော စားသုံးဆီများကို အဆင်ပြေစွာဝယ်ယူစားသုံးနိုင်ရေး၊ စားသုံးဆီဈေးကွက်တည်ငြိမ်မှုရှိစေရန် စည်ပင်သာယာဈေးနှင့် မြို့ပေါ်ရပ်ကွက်များရှိ စားသုံးဆီအရောင်းဆိုင်များသို့ သွားရောက်ကွင်းဆင်းကာ စားသုံးဆီများ ဖြန့်ဖြူးရောင်းချရာ၌ သတ်မှတ်ထားရှိသည့် ဈေးနှုန်းများအတိုင်း အမှန်တကယ်ရောင်းချပေးခြင်းရှိ/မရှိ ၊ အချင်အတွယ်မှန်ကန်မှုရှိ/မရှိတို့ကို လိုက်လံကြည့်ရှုစစ်ဆေးခဲ့ကြသည်။ ဓနုဖြူမြို့နယ်အတွင်းရှိ စားအုန်းဆီအရောင်းဆိုင်များသည် စားသုံးဆီများကို ဈေးနှုန်းသက်သာစွာဖြန့်ဖြူးရောင်းချပေးလျက်ရှိကြောင်းနှင့် မိမိတို့လုပ်ငန်းရှင်များအနေဖြင့်လည်း ပြည်သူများအား စားသုံးဆီများကို ဖြစ်သင့်ဖြစ်ထိုက်သော သတ်မှတ်ဈေးနှုန်းများအတိုင်း စနစ်တကျရောင်းချပေးသွားရန်နှင့် ဈေးနှုန်းမြင့်တင်ရောင်းချခြင်းမပြုရေး အလေးထားလိုက်နာဆောင်ရွက်သွားရန် အသိပညာပေးဆွေးနွေးမှာကြားခဲ့သည်။ ကိုယ်တိုင်စိုက်ပျိုးမွေးမြူထုတ်လုပ်သူများအဖွဲ့က ယာယီအရောင်းဆိုင်ဖွင့်လှစ်၍ ဆန်၊ ဆီ၊ ဆား၊ ကြက်ဥ၊ ဟင်းသီးဟင်းရွက် အစရှိသည့် အခြေခံစားသောက်ကုန်ပစ္စည်းများကို သက်သာသောဈေးနှုန်းဖြင့် စနစ်တကျရောင်းချပေးလျက်ရှိကြောင်း သတင်းရရှိပါသည်။

DOCA(ဧရာဝတီ)

      မအူပင်ခရိုင်အတွင်းရှိ စားသုံးသူပြည်သူများ ဘေးအန္တရာယ်ကင်းရှင်းရေးအတွက် ပန်းတနော်မြို့နယ်၊ မြို့မဈေးကြီးနှင့် အရှေ့ပိုင်းရပ်ကွက်ဈေး၊ အနောက်ပိုင်းရပ်ကွက်ဈေးနှင့် မြို့ပေါ်ရှိ လက်ကားဆီအရောင်းဆိုင်တို့တွင် ရောင်းချလျက်ရှိသည့် စားသုံးဆီအမျိုးမျိုးတို့အား မိတ်ဖက်ဌာနဆိုင်ရာများနှင့်အတူ (၁၀-၆-၂၀၂၄)ရက်နေ့၊ နံနက် (၀၉း၀၀) နာရီအချိန်တွင် ဈေးကွက်စောင့်ကြည့်စစ်ဆေးခဲ့ကြပါသည်။

      ထိုသို့ဆောင်ရွက်ရာတွင် မြို့နယ်စားသုံးသူရေးရာဦးစီးဌာနမှူးရုံးမှ မအူပင်ခရိုင်ဦးစီးမှူး ဦးဇော်မင်းနှင့်ဝန်ထမ်းများ၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်စည်ပင်သာယာ‌ရေးအဖွဲ့တို့မှ တာဝန်ရှိသူများပူးပေါင်းကာ စျေးအတွင်းရောင်းချနေသည့်ဆိုင်များရှိ စားသုံးဆီအမျိုးမျိုးတို့မှာ ဘေးအန္တရာယ်ရှိ/မရှိ၊ ကုန်အညွှန်းအမှတ်အသားပြည့်စုံစွာဖော်ပြရမည့်အချက်များပါဝင်မှုရှိ/မရှိ စသည်တို့ကို စားသုံးသူကာကွယ်ရေးဥပဒေနှင့်အညီ စစ်ဆေးဆောင်ရွက်ရာတွင် စားသုံးသူရေးရာဦးစီးဌာနအနေဖြင့် စားသုံးသူများ ဘေးအန္တရာယ်ကင်းရှင်းစေရေးအတွက် ဒေသတွင်းအသုံးပြုလျက်ရှိသည့် ကုန်စည်များနှင့်စပ်လျဉ်း၍လည်းကောင်း၊ ကုန်ဈေးနှုန်းတည်ငြိမ်ရေးအတွက်လည်းကောင်း၊ အထက်ဌာနများ၏ အချိန်နှင့်တပြေးညီ ထုတ်ပြန်လျက်ရှိသော ညွှန်ကြားချက်များနှင့်အညီ ဆောင်ရွက်လျက်ရှိရာ လုပ်ငန်းရှင်များသိရှိလိုက်နာစေရန် ရှင်းလင်းပြောကြားခဲ့ပါသည်။ ဆက်လက်၍ ပန်းတနော်စားဆီရောင်းချနေမှု၊ ဆီဈေးကွက်အတွင်း ပဲရောဆီ၊ ပဲလတ်ဆီများကို ရောင်းချခြင်းမပြုရန်၊ ဆီဈေးနှုန်းမြင့်မားစွာရောင်းချခြင်းမပြုရန်၊ သတ်မှတ်ရည်ညွှန်းဈေးထက် အမြတ် ၂ရာခိုင်နှုန်းတင်၍သာရောင်းချရန်၊ အလေးချိန်မှန်ကန်စေရေး၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများအား ဈေးနှုန်းတည်ငြိမ်စွာဝယ်ယူစားသုံးနိုင်စေရေးအတွက် ကြီးကြပ်ထိန်းကျောင်း ဆောင်ရွက်လျက်ရှိပြီး အပတ်စဉ်ဈေးကွက်စောင့်ကြည့်စစ်ဆေးခြင်းများလုပ်ဆောင်လျက်ရှိကြောင်း လုပ်ငန်းရှင်များအား အသိပေးပြောကြားခဲ့ကြောင်း သတင်းရရှိပါသည်။

DOCA(ဧရာဝတီ)

     ၂၀၂၄ခုနှစ်၊ ဇွန်လ ၁၃ရက်နေ့၊ နေ့လယ် (၁၅း၃၀) နာရီအချိန်တွင် တနင်္သာရီတိုင်းဒေသကြီး၊ တိုင်းဒေသကြီးပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ထားဝယ်မြို့မှ ဝန်ထမ်းများအား တိုင်းဒေကြီးစားသုံးသူရေးရာဦးစီးဌာနမှ ဦးစီးအရာရှိ ဒေါ်အေးအေးလွင်က  စားသုံးသူကာကွယ်ရေးဆိုင်ရာ ဥပဒေအကြောင်းသိကောင်းစရာများဟောပြောဆွေးနွေးခဲ့ပါသည်။ ဟောပြောဆွေးနွေးရာတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူများ၏အခွင့်အရေးနှင့် လိုက်နာရမည့်တာဝန်များအကြောင်း၊ စီးပွားရေးလုပ်ငန်းရှင်များ၏တာဝန်များကြောင်း၊ ကုန်စည်နှင့်ဝန်‌ဆောင်မှုများကို ဘေးအန္တရာယ်ကင်းရှင်းစွာအသုံးပြုနိုင်စေရန်နှင့် ကုန်စည်များ၏ ကုန်အညွှန်းအမှတ်အသားဆိုင်ရာ ဖော်ပြရမည့်အချက်များအား ရှင်းလင်းဟောပြောဆွေးနွေးခြင်း၊ စားသုံးသူနစ်နာဆုံးရှုံးမှုရှိသည့် ကိစ္စရပ်များနှင့်ပတ်သက်၍ မိမိတို့ဌာနသို့တိုင်ကြားနိုင်ကြောင်း၊  Call Center (1535) သို့ခေါ်ဆို၍လည်း မေးမြန်းတိုင်ကြားနိုင်ကြောင်း ဟောပြောဆွေးနွေးခဲ့ပြီး ဟောပြောပွဲအား နေ့လယ်(၁၆း၁၅)နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(တနင်္သာရီ)