စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးသည် မန္တလေးတိုင်းဒေသကြီးမှ စီးပွားရေးလုပ်ငန်းများအား လှည့်လည်ကြည့်ရှုစစ်ဆေး
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးသည် ကုန်သွယ်ရေးဦးစီးဌာန၊ ညွှန်ကြားရေးမှူးချုပ်လိုက်ပါလျက် (၁၁-၁၁-၂၀၂၃) ရက်နေ့၊ နံနက်ပိုင်းအချိန်တွင် ပွဲစား၊ ကုန်သည်၊ စက်ပိုင်များ၊ မဟာကထိန်တော်အသင်းဝင်များနှင့်တွေ့ဆုံဆွေးနွေး၍ ကုန်စည်ဒိုင်အတွင်း ရောင်းဝယ်နေမှုများကို ကြည့်ရှုအားပေးခဲ့ပြီး နေ့လယ်ပိုင်းအချိန်တွင် မြစ်ငယ်ရှိ Kerry Mother Logistics နှင့် Resource Group Logistics Dry Port များမှ တာဝန်ရှိသူများနှင့်တွေ့ဆုံ၍ လုပ်ငန်းဆောင်ရွက်နေမှုများအား လှည့်လည်ကြည့်ရှုစစ်ဆေးခဲ့ပါသည်။ ဆက်လက်၍ အမရပူရမြို့နယ်ရှိ မဟာစံပြနွယ်ဆန်စက်၊ စိန်လမင်းဆီစက်တို့သို့သွားရောက်ကြည့်ရှုစစ်ဆေးခဲ့ပြီး လုပ်ငန်းဆောင်ရွက်နေမှုများကိုဆွေးနွေးခဲ့ပါသည်။ (၁၂-၁၁-၂၀၂၃) ရက်နေ့၊ နံနက်ပိုင်းအချိန်တွင် ကုန်သွယ်မှုနှင့် ကုန်စည်စီးဆင်းမှုများမှန်ကန်မြန်ဆန်ရေးလုပ်ငန်းကော်မတီ(မန္တလေးရုံးခွဲ)၌ တာဝန်ထမ်းဆောင်နေသော ဌာနများမှတာဝန်ရှိသူများနှင့်တွေ့ဆုံခဲ့ပြီး လိုအပ်သည်များကို လမ်းညွှန်မှာကြားခဲ့ပြီးနောက် နံနက် (၁၁:၂၀) နာရီအချိန်တွင် ပြည်ကြီးတံခွန်မြို့နယ်ရှိ အာရှတိုင်းကျော်ပဲခွဲစက်သို့သွားရောက်ကြည့်ရှုစစ်ဆေးခဲ့ပါသည်။
ဆက်လက်၍ (၁၂-၁၁-၂၀၂၃) ရက်နေ့၊ နေ့လယ် (၁၂:၃၀) နာရီအချိန်တွင် စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးအစည်းအဝေးခန်းမ၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးနှင့် မန္တလေးတိုင်းဒေသကြီးရှိ ကုန်သွယ်မှုနှင့်ကုန်စည်စီးဆင်းမှုများမှန်ကန်မြန်ဆန်ရေးလုပ်ငန်းကော်မတီ (မန္တလေး) ရုံးခွဲ၌ တာဝန်ထမ်းဆောင်နေသော စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှဝန်ထမ်းများ၊ ကုန်သွယ်ရေးဦးစီးဌာန၊ စားသုံးသူရေးရာဦးစီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့် မူပိုင်ခွင့်ဦးစီးဌာနတို့မှဝန်ထမ်းများနှင့် တစ်ဦးချင်းမိတ်ဆက်တွေ့ဆုံ၍ ဝန်ထမ်းများနှင့်အတူ ချစ်ကြည်ရင်းနှီးစွာ နှုတ်ဆက်အမှာစကားများမှာကြားခဲ့ကြောင်း သတင်းရရှိပါသည်။
DOCA(မန္တလေး)
