HighLight News

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံး၊ ညောင်တုန်းမြို့နယ်ဦးစီးမှူးရုံးနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးရုံးတို့ပူးပေါင်းဆောင်ရွက်မှုဖြင့် (၂၀.၆.၂၀၂၃) ရက်နေ့၊ နေ့လယ် (၁၄:၀၀) နာရီအချိန်တွင် စားသုံးသူကာကွယ်ရေးနှင့်ပတ်သက်၍ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ စီးပွားရေးလုပ်ငန်းရှင်၏ အာမခံချက်ပေးခြင်းနှင့်ပတ်သက်သော အသိပညာပေး Talk Show ကို ကျင်းပပြုလုပ်ခဲ့ပါသည်။

     အဆိုပါအခမ်းအနားတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးက စားသုံးသူအခွင့်အရေးနှင့် တောင်းဆိုနိုင်သည့်အခွင့်အရေးများရှိပါက သိရှိလို၍ ရှင်းလင်းဆွေးနွေးပေးကြပါရန် မေးမြန်းရာ ညောင်တုန်းမြို့နယ်ဦးစီးမှူး ဦးအောင်လွင်က ယခင်အပတ်တွင် Online Shoping ရောင်းချမှုနှင့်ပတ်သက်၍ ပြည်သူများသိရှိနိုင်ရန်အလို့ငှာ ရှင်းလင်းပြောကြားခဲ့ပြီး ယခုအပတ်တွင် စီးပွားရေးလုပ်ငန်းရှင်သည် ရောင်းချသည့်ကုန်စည် (သို့မဟုတ်) ဝန်ဆောင်မှုဖြစ်သည့် ကုန်စည်များတွင် သာမန်အားဖြင့် မမြင်နိုင်သော သဘာဝပြောင်းလဲနိုင်မှုနှင့်စပ်လျဉ်းသည့် အချက်အလက်များကို စားသုံးသူအား ထင်ရှားစွာဖော်ပြ၍ အသိပေးရမည်ဖြစ်ပြီး ကုန်စည်နှင့်စပ်လျဉ်း၍ ဖော်ပြရမည့်အာမခံချက်များတွင် ပါဝင်ရမည့်အချက်အလက်များကို အကျယ်တဝင့်ရှင်းလင်းဆွေးနွေးပြီးနောက် စီးပွားရေးလုပ်ငန်းရှင်သည် ပုဒ်မ၂၃၊ ၂၆အရ စားသုံးသူအပေါ် အာမခံချက်ပေးထားသည့်ကာလ သို့မဟုတ် အသုံးပြုနိုင်မည့်ကာလအတွင်း အသုံးပြုနိုင်ရန် ကုန်စည်ကို အရည်အသွေးပြည်မီအောင် ထုတ်လုပ်ခြင်းမပြုလျှင်ဖြစ်စေ၊ သတင်းအချက်အလက်ပြည်စုံစွာဖော်ပြခြင်းမရှိလျှင်ဖြစ်စေ စားသုံးသူသည် အချက်အလက်တစ်ရပ်ရပ်ကို တောင်းဆိုပိုင်ခွင့်ရှိသည့်အကြောင်းကို စားသုံးသူပြည်သူများသိရှိနားလည်စေရန် ရှင်းလင်းဆွေးနွေးကာ စားသုံးသူကာကွယ်ရေးလုပ်ငန်းများ၊ စားသုံးသူအခွင့်အရေးများ၊ စီးပွားရေးလုပ်ငန်းရှင်များ ကုန်အညွှန်းနှင့်ပတ်သက်၍ သိရှိလိုသည်များ၊ စားသုံးသူအခွင့်အ‌ရေးနစ်နာဆုံးရှုံးမှုရှိလာပါက တိုင်ကြားနိုင်ရန်အတွက် စားသုံးသူရေးရာဦးစီးဌာန၏ Consumer Call Center No. (1535) သို့ ဆက်သွယ်မေးမြန်းနိုင်ကြောင်းကိုပါ စားသုံးသူပြည်သူများအသေးစိတ်သိရှိနိုင်ရန် အကျယ်တဝင့်ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

    ပုသိမ်ခရိုင်၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့က ပုသိမ်မြို့နယ်အတွင်း Shopping Mall , Mini Mart များနှင့် ဓာတ်မြေသြဇာ၊ ပိုးသတ်ဆေးအရောင်းဆိုင်၊ စက်သုံးဆီအရောင်းဆိုင်၊ ဆိုင်ကယ်အရောင်းဆိုင်၊ ယစ်မျိုး (အရက်ဆိုင်) များ၊ မိုဘိုင်းဖုန်းဆိုင်များ၊ လူသုံးကုန်ပစ္စည်းဆိုင်များ၊ စားသောက်ကုန်ဆိုင်များ၊ စက်ဆီ/ချောဆီဆိုင်များ၊ လျှပ်စစ်ပစ္စည်းအရောင်းဆိုင်များ၊ ဆေးဝါးနှင့်အလှကုန်အရောင်းဆိုင်များတွင် ရောင်းချနေသောလုပ်ငန်းရှင်များအား တရားမဝင်ဝင်ရောက်လာသည့်ကုန်စည်များအား ရောင်းချခြင်းမပြုလုပ်စေရေးအတွက် အသိပညာပေးဆွေးနွေးပွဲကို (၂၀-၆-၂၀၂၃) ရက်နေ့၊ မွန်းလွဲ (၁၄:၀၀) နာရီအချိန်တွင် ပုသိမ်မြို့နယ်၊ မြို့နယ်အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ကျင်းပပြုလုပ်ခဲ့ပါသည်။

   ခရိုင်တရားမဝင်ကုန်သွယ်မှုတိုက်ဖျက်ရေးအဖွဲ့ဥက္ကဋ္ဌ၊ ဦးလင်းကိုကိုက တိုင်းနှင့်ပြည်နယ်များတွင် တရားမဝင်ကုန်သွယ်မှုများကျဆင်းပြီး ဒေသတွင်းလုပ်ငန်းများရေရှည်ရပ်တည်နိုင်ရေး၊ ယှဉ်ပြိုင်နိုင်စွမ်းရှိစေရေး၊ ကုန်သည်များ တရားဝင်ကုန်သွယ်မှုလမ်းကြောင်းပေါ်သို့ရောက်ရှိပြီး နယ်စပ်ကုန်သွယ်မှုပမာဏတိုးတက်လာရေး၊ နိုင်ငံတော်အတွက် ရသင့်ရထိုက်သည့်အခွန်အခများရရှိပြီး တရားမဝင်ကုန်စည်နှင့် ကုန်သွယ်မှုများကို ထိရောက်စွာတားဆီးနိုင်ရေးတို့အတွက် စီးပွားရေးလုပ်ငန်းရှင်များအား ယခုကဲ့သို့အသိပညာပေးဟောပြောပွဲကျင်းပရခြင်းဖြစ်ကြောင်း အဖွင့်အမှာစကားပြောကြားခဲ့ပါသည်။

   ဆက်လက်၍ စားသုံးသူရေးရာဦးစီးဌာနမှ ခရိုင်ဦးစီးမှူး၊ ခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့မှ အတွင်းရေးမှူး ဦးတင်စိုးလှိုင်က တရားမဝင်တင်သွင်းလာသော ကုန်စည်များနှင့်စပ်လျဉ်း၍ Power Point ဖြင့် အသိပညာပေးရှင်းလင်းခဲ့ပြီး အဆိုပါအခမ်းအနားသို့ ခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင် ဌာနဆိုင်ရာ (၈) ဦးနှင့် မြို့ပေါ်ရှိ စီးပွားရေးလုပ်ငန်းရှင် (၅၅) ဦး၊ စုစုပေါင်း (၆၃) ဦးတက်ရောက်ခဲ့ကြောင်းသိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ တာဝန်ရှိသူများသည် (၂၂-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့၊ ထေးသမရပ်ကွက်ရှိ “ရွှေသဇင်မိုး” စက်သုံးဆီအရောင်းဆိုင်နှင့် ဒေါတမရပ်ကွက်ရှိ အောင်မြတ်(၂)စက်သုံးဆီအရောင်းဆိုင်များသို့သွားရောက်၍ သတ်မှတ်ရည်ညွှန်းဈေးနှုန်းဖြင့် ရောင်းချခြင်းရှိ/မရှိနှင့် အချင်အတွယ်၊ ဂါလံ၊ လီတာပြည်မီမှုရှိ/မရှိတို့ကို ပြည်နယ် ရေနံနှင့်ရေနံထွက်ပစ္စည်းဆိုင်ရာလုပ်ငန်းများထိန်းသိမ်းကြီးကြပ်ရေးကော်မတီအဖွဲ့ဖြင့် ကွင်း ဆင်းစစ်ဆေးဆောင်ရွက်ခဲ့ပါသည်။

    ထိုသို့ကွင်းဆင်းစစ်ဆေးရာတွင်  အရောင်းဆိုင်များ၌ စက်သုံးဆီတင်သွင်း/ သိုလှောင်/ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ သတ်မှတ်ထားသောနှုန်းထားများအတိုင်း ရောင်းချလျက်ရှိကြောင်း၊း အချင်အတွယ်၊ ဂါလံ၊ လီတာများကိုလည်း ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၏ (၂၀)လီတာစံခွက်များဖြင့် တိုက်ဆိုင်စစ်ဆေးခဲ့ရာ ပြည့်မီမှုရှိကြောင်းစစ်ဆေးတွေ့ရှိရပါသည်။

  စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး၊ အချင်အတွယ်ပမာဏနှင့် အလေးချိန်မှန်ကန်မှုရှိရမည်ဖြစ်ကြောင်း၊ သတ်မှတ်ရည်ညွှန်းဈေးနှုန်းများအတိုင်း ရောင်းချရန်လိုအပ်ကြောင်း၊ စက်သုံးဆီလက်ကျန်ပမာဏအပေါ်  စောင့်ကြည့်ကြပ်မတ်၍ ပြတ်လပ်မူမရှိစေရေး စနစ်တကျဆောင်ရွက်ရန်လိုအပ်ကြောင်း၊ ဈေးကစားလိုသည်ရည်ရွယ်ချက်ဖြင့် သိုလှောင်ခြင်း၊ ကုန်စည်ထိန်းညှိရောင်းချခြင်းနှင့် ကုန်စည်တင်သွင်း/ဖြန်ဖြူးရောင်းချရာ၌ မသမာသောရည်ရွယ်ချက်ဖြင့် ရောနှောရောင်းချခြင်းများမပြုလုပ်ကြရန်နှင့် သတ်မှတ်ချက်များနှင့်မကိုက်ညီသောစက်သုံးဆီများ ဈေးကွက်အတွင်း တွေ့ရှိရပါက ရေနံထွက်ပစ္စည်းဆိုင်ရာဥပဒေအရသော်လည်းကောင်း၊ စားသုံးသူကာကွယ်ရေးဥပဒေ ၂၀၁၉အရသော်လည်းကောင်း အရေးယူခံရနိုင်ကြောင်း အသိပညာပေးဆောင်ရွက်ခဲ့ပါသည်။

DOCA(ကယား)

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးဘောမ်ဇုန်း(ရုံးအုပ်)နှင့် ဝန်ထမ်းများသည် (၂၁-၆-၂၀၂၃) ရက်နေ့၊ နေ့လယ် (၁၃:၀၀) နာရီအချိန်မှ နေ့လယ် (၁၅:၀၀) နာရီအချိန်ထိ ဝိုင်းမော်မြို့၊ အ-ထ-က(ခွဲ)အောင်မြေသစ်စာသင်ကျောင်းတွင် ဆရာ/ဆရာမ (၁၃) ဦးအား စားသုံးသူကာကွယ်ပေးရေးအသိပညာပေးလုပ်ငန်းဆောင်ရွက်ခဲ့ပါသည်။

    ထိုသို့ ဟောပြောရာတွင် ရုံးအုပ်က စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန်မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကိုဆိုလိုကြောင်း၊ စားသုံးသူ၏အခွင့်အရေးဖြစ်သည့် စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့်နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်း၊ နစ်နာဆုံးရှုံးမှုများဖြစ်ပေါ်လာပါက စားသုံးသူသတင်းပြန်ကြားရေးနှင့်လက်ခံ‌ဆောင်ရွက်ရေးစင်တာ (CICC) ဖွင့်လှစ်ထားရှိမှုနှင့် တိုင်ကြားပုံနည်းလမ်းတို့အပြင် ကုန်စည်များကိုဝယ်ယူသုံးစွဲရာတွင် ကုန်အညွှန်းအမှတ်အသားပြည့်စုံမှန်ကန်မှုရှိသော ကုန်စည်များကိုသာဝယ်ယူသုံးစွဲရန် အသိပညာပေးဟောပြောခဲ့ပါသည်။ ဟောပြောပွဲသို့ ဆရာ/ဆရာမ (၁၃) ဦးတက်ရောက်ခဲ့ပြီး စားသုံးသူကာကွယ်ရေးဆိုင်ရာအသိပညာပေးလက်ကမ်းစာစောင်များဖြန့်ဝေခဲ့ပါသည်။

DOCA(ကချင်)

 စားသုံးသူရေးရာဦးစီးဌာန၊ ပြည်သူ့ကျန်းမာရေးဦးစီးဌာနနှင့် အစားအသောက်နှင့်ဆေးဝါးကွပ်ကဲရေးဦးစီးဌာနတို့ပူးပေါင်းပြီး (၂၂-၆-၂၀၂၃) ရက်နေ့၊ နံနက် (၁၀:၃၀) နာရီအချိန်တွင် ဟားခါးမြို့၊ ဈေးသစ်ရပ်ကွက်ရှိ “Glory” မုန့်ဖုတ်ဆိုင်အား ကွင်းဆင်းစစ်ဆေးခဲ့ပါသည်။

  ထိုသို့စစ်ဆေးရာတွင် သက်ဆိုင်ရာဌာနများက မုန့်ဖုတ်လုပ်ငန်းလုပ်ကိုင်ရာတွင် လိုက်နာဆောင်ရွက်ရမည့်စည်းကမ်းချက်များကို ရှင်းလင်းဆွေးနွေးခြင်း၊ စားသုံးသူရေးရာဦးစီးဌာနမှ တာဝန်ရှိသူက  မုန့်ထုတ်လုပ်ရောင်းချရာတွင် စားသုံးသူပြည်သူများဘေးအန္တရာယ်မရှိစေရန်အတွက် (expire date) သက်တမ်းကုန်ဆုံးမည့်ရက်၊ ကုန်အညွှန်းအမှတ်အသား စသည့်အချက်များကို မဖြစ်မနေထည့်သွင်းရမည်ဖြစ်ကြောင်း ရှင်းလင်းမှာကြားခဲ့ပါသည်။ ထို့နောက် အဆိုပါ မုန့်ဖုတ်လုပ်ငန်းလုပ်ကိုင်သူ ဒေါ်ပပက သက်ဆိုင်ရာဌာနများ၏ လမ်းညွှန်ချက်များကို လိုက်နာဆောင်ရွက်သွားမည်ဖြစ်ကြောင်း ပြန်လည်ရှင်းလင်းဖြေကြားခဲ့ပါသည်။

DOCA(ချင်း)