ကွမ်းခြံကုန်းမြို့နယ်၌ မိုးစပါးစံကွက် ရိတ်သိမ်းပွဲအခမ်းအနားကျင်းပ
ရန်ကုန်တိုင်းဒေသကြီး၊ တောင်ပိုင်းခရိုင်ဦးစီးမှူးရုံးလက်အောက်ရှိ ကော့မှူးမြို့နယ်တာဝန်ခံ ဦးတင်မင်းသည် ကွမ်းခြံကုန်းမြို့နယ်၊ စိုက်ပျိုးရေးဦးစီးဌာန၏ (၂၀၂၃-၂၀၂၄) ခုနှစ်၊ မိုးစပါးတစ်ဧက တင်း(၁၀၀)ကျော်အထွက်နှုန်းရရှိနိုင်ရေး ရည်မှန်းချက်နှင့်အညီ မိုးစပါးမျိုးသန့်မျိုးစေ့ထုတ်စံပြကွက်၏ စံကွက်ရိတ်သိမ်းမှုအခမ်းအနားသို့ တက်ရောက်ခဲ့ပါသည်။ ယင်း အခမ်းအနားကို မြို့နယ်စိုက်ပျိုးရေးဦးစီးဌာနကဦးစီး၍ ၂၀၂၃ခုနှစ်၊ နိုဝင်ဘာလ(၇)ရက်နေ့၊ နံနက်(၉:၀၀)နာရီအချိန်တွင် အင်္ဂလုံကျေးရွာ၊ အမတရန်ကြီးအောင်၊ ကွင်းအမှတ် ၃၈၁၊ ဦးပိုင်အမှတ် ၅၆/၁ ဦးမြင့်ဦး၏လယ်၌ ပြုလုပ်ခဲ့ကြောင်းသိရပါသည်။
ထိုသို့မိုးစပါးစံကွက်ရိတ်သိမ်းရာတွင် ဆင်းသုခမျိုး (၀.၁၀) ဧကရိတ်သိမ်းခဲ့ရာတွင် တစ်ဧကပျမ်းမျှအထွက်နှုန်း (၁၀၆.၅၂)တင်းထွက်ရှိခဲ့ကြောင်းသိရပါသည်။ မိုးစပါးစံကွက်ရိတ်သိမ်း ခဲ့ရာတွင် စပါးရိတ်သိမ်းခြွေလှေ့စက်ဖြင့် အသုံးပြုရိတ်သိမ်းသဖြင့် အချိန်ကုန်သက်သာခြင်း၊ လုပ်သားရှားပါးမှုအတွက် ပူပန်စရာမလိုခြင်း၊ စပါးအလေအလွင့်နည်းပါးခြင်း၊ ဆောင်းသီးနှံ စိုက်ပျိုးထုတ်လုပ်နိုင်ရန် အချိန်မီရိတ်သိမ်းနိုင်ခြင်း၊ တလင်းပျောက်စနစ်ဖြင့် ရိတ်သိမ်းခြွေလှေ့နိုင်ခြင်း၊ ဈေးကွက်အတွင်း စပါးများချက်ချင်းရောင်းချနိုင်ခြင်း၏ အကျိုးကျေးဇူးများကို စက်မှု လယ်ယာဦးစီးဌာနမှ မြို့နယ်ဦးစီးမှူးက ရှင်းလင်းဆွေးနွေးခဲပါသည်။
အဆိုပါမိုးစပါးစံကွက်ရိတ်သိမ်းပွဲအခမ်းအနားသို့ မြို့နယ်စီမံအုပ်ချုပ်ရေးအဖွဲ့မှ အဖွဲ့ဝင်များ၊ မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူးနှင့်ဝန်ထမ်းများ၊ စိုက်ပျိုးရေးဦးစီးဌာနမှ မြို့နယ်ဦးစီးမှူးနှင့်ဝန်ထမ်းများ၊ စက်မှုလယ်ယာဦးစီးဌာနမှ မြို့နယ်ဦးစီးမှူး၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနမှ မြို့နယ်ဦးစီးမှူးနှင့် ဝန်ထမ်းများ၊ မြို့နယ် စိုက်၊ ကြပ်အဖွဲ့မှ တာဝန်ရှိသူများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဒေသခံတောင်သူဦးရေ ၁၅၀ဦးတို့တက်ရောက်ခဲ့ကြောင်းသိရပါသည်။
DOCA(ရန်ကုန်)
