HighLight News

    ရခိုင်ပြည်နယ်၊ စားသုံးသူရေးရာဦးစီးဌာနမှ အမ်းမြို့နယ်တာဝန်ခံ ဦးအောင်မင်းခိုင်(ဒု-ဦးစီးမှူး)နှင့် ဝန်ထမ်းများသည် (၁၇-၃-၂၀၂၃) ရက်နေ့၊ နံနက် (၁၁:၀၀) နာရီအချိန်တွင် အမ်းမြို့နယ်၊ ဒိုင်ကြီးကျေးရွာရှိ “ဧဒင်” အမှတ်တံဆိပ်ဖြင့် ဆပ်ပြာထုတ်လုပ်သည့်လုပ်ငန်းနေရာသို့သွားရောက်၍ လုပ်ငန်းရှင်နှင့်တွေ့ဆုံဆွေးနွေးခြင်း ဆောင်ရွက်ခဲ့ပါသည်။

      မြို့နယ်တာဝန်ခံ ဦးအောင်မင်းခိုင်က လုပ်ငန်းရှင်အားတွေ့ဆုံရာ ဆပ်ပြာလုပ်ငန်းအခြေအနေကိုမေးမြန်းရာ လုပ်ငန်းရှင်က “ဧဒင်” အမှတ်တံဆိပ်ဖြင့် ဆပ်ပြာရည်၊ ဆပ်ပြာ Cream လုပ်ငန်းအား တစ်နိုင်တစ်ပိုင်လုပ်ကိုင်ခြင်းဖြစ်ကြောင်း၊ ဆပ်ပြာရည် (၁) မျိုးနှင့် ဆပ်ပြာ Cream (၁) မျိုးထုတ်လုပ်ပါကြောင်း၊ တစ်ရက်ထုတ်လုပ်နိုင်မှုမှာ ဆပ်ပြာရည် (၁) လီတာနှင့် (၀.၅) လီတာ၊ ပေါင်း (၁၀၀) လီတာမှ (၁၅၀) လီတာထိ ထုတ်လုပ်ပါကြောင်း၊ ဆပ်ပြာရည် (၁) လီတာတစ်ဘူးလျှင် လက်လီ (၁၀၀၀) ကျပ်နှင့် လက်ကား (၉၀၀) ကျပ်ဖြင့် ရောင်းချပါကြောင်း၊ ဆပ်ပြာရည် (၀.၅) လီတာအတွက် ဘူးခွံထုပ်ပိုးမှုသည် Tube Press ပုံစံဖြစ်၍ ကုန်ကြမ်းဘူးခွံတန်ဖိုးကြီးမြင့်သဖြင့် လက်လီ(၁)ဘူးလျှင် (၁၂၀၀) ကျပ်နှင့် လက်ကား(၁)ဘူးလျှင် (၁၀၀၀) ကျပ်ဖြင့် ရောင်းချပါကြောင်း၊ ဆပ်ပြာ Cream တစ်ရက်ထုတ်လုပ်မှုမှာ (၂၀) ဘူးမှ (၂၅) ဘူးထိထုတ်လုပ်ပြီး လက်လီတစ်ဘူးလျှင် (၁၅၀၀) ကျပ်၊ လက်ကားတစ်ဘူးလျှင် (၁၃၀၀) ကျပ်ဖြင့် ရောင်းချပါကြောင်းနှင့် လက်ရှိအချိန်တွင် အမ်းမြို့ပေါ်ရှိ ရပ်ကွက်၊ ကျေးရွာများတွင်သာ ရောင်းချဖြန့်ဖြူးနိုင်ပါကြောင်း သိရှိရပါသည်။

      မြို့နယ်တာဝန်ခံ ဦးအောင်မင်းခိုင်က  စားသုံးသူကာကွယ်ရေးဥပဒေ ၂၀၁၉ အရ မည်သည့်စီးပွားရေးလုပ်ငန်းရှင်မဆို ထုတ်လုပ်သည့်ကုန်ပစ္စည်းများပေါ်တွင် ကုန်စည်အမျိုးအစားအလိုက် ဖော်ပြရမည့်ကုန်အညွှန်းအမှတ်အသားများနှင့်စပ်လျဉ်း၍ လိုက်နာဆောင်ရွက်ရမည့်အချက်များအား အသိပညာပေးမှုများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

    မန္တလေးတိုင်းဒေသကြီး၊ မိတ္ထီလာခရိုင်၊  ‌ဇောင်ချမ်းကုန်းတိုးချဲ့(၅)လမ်း၊ မိတ္ထီလာမြို့၌ “Shwe Nadi” အမှတ်တံဆိပ်ဆပ်ပြာလုပ်ငန်းထုတ်လုပ်ရောင်းချနေသောလုပ်ငန်းရှင်သည် ၎င်းတို့၏အမှတ်တံဆိပ်တွင် ထည့်သွင်းဖော်ပြထားသည့် ကုန်အညွှန်းအမှတ်အသားများ၌ စားသုံးသူကာကွယ်‌ရေးဥပဒေ ၂၀၁၉ ပြဋ္ဌာန်းချက်များနှင့် ကိုက်ညီမှုရှိ/မရှိ၊ လိုအပ်ချက်များပြင်ဆင်ပြုပြင်နိုင်ရန်အတွက် စိစစ်ဆောင်ရွက်ပေးပါရန် (၉-၃-၂၀၂၃) ရက်နေ့တွင်စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးသို့ လာရောက်တွေ့ဆုံဆွေးနွေးခဲ့ပါသည်။

       အဆိုပါတွေ့ဆုံမှုအရ “တောင်ဇလပ်” အမှတ်တံဆိပ်ဆပ်ပြာလုပ်ငန်းတွင် ဆပ်ပြာခဲအမျိုးစား(၆)မျိုးနှင့် သဘာဝခေါင်းလျှော်ရည် စသည့်ကုန်စည်များကို မိသားစုကထုတ်လုပ်ကြောင်းနှင့် မိတ္ထီလာမြို့အတွင်း ဖြန့်ဖြူးရောင်းချလျက်ရှိကြောင်းသိရှိရပါသည်။ ထို့နောက်ခရိုင်ဦးစီးမှူးက လူသုံးကုန်ပစ္စည်းအမျိုးမျိုးတွင် ကုန်စည်အမျိုးစားအလိုက် ကုန်အညွှန်းအမှတ်သားများအား ပြည့်စုံစွာဖော်ပြရန်အတွက် မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားရှိသည့် ကုန်အညွှန်းအမှတ်အသား‌ဖော်ပြခြင်းဆိုင်ရာ အမိန့်ကြော်ငြာစာအမှတ် (၂/၂၀၁၉) အား ထုတ်ပြန်ထားရှိကြောင်းကိုလည်းကောင်း၊ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတွဲလျက်ဖြစ်စေ ဖော်ပြရမည့်အချက်အလက်များကိုလည်းကောင်း ရှင်းလင်းဆွေးနွေးပြောကြားခဲ့ပြီး ဌာနသို့စိစစ်ဆောင်ရွက်ပေးပါရန် တင်ပြလာမှုအပေါ်  ကူညီဆောင်ရွက်ပေးမှုများပြုလုပ်ခဲ့ပါသည်။

DOCA(မန္တလေး)

      မွန်ပြည်နယ်၊ စားသုံးသူရေးရာဦးစီးဌာနမှ ဝန်ထမ်းများသည် ကုမ္ပဏီများက ဖြန့်ဖြူးရောင်းချသည့် စားအုန်းဆီများအား ဈေးကွက်အတွင်း လက်လီ/လက်ကား ဖြန့်ဖြူးရောင်းချခြင်းလုပ်ငန်းများကို (၇-၃-၂၀၂၃)  ရက်နေ့တွင် မုဒုံမြို့နယ်၊ ဗျိုင်းနှစ်ကောင်နှင့် မော်လမြိုင်မြို့နယ်ရှိ လှိုင် (မြသီတာ) ရပ်ကွက်တို့တွင်လည်းကောင်း၊ ၈-၃-၂၀၂၃ ရက်နေ့တွင် မုဒုံမြို့နယ်၊ ကော့ခိုင်ကျေးရွာနှင့် မော်လမြိုင်မြို့နယ်၊ မုပွန်ရပ်ကွက်၊ ဖက်ခင်းရပ်ကွက်တို့တွင်လည်းကောင်း၊ ၉-၃-၂၀၂၃ ရက်နေ့တွင် မုဒုံမြို့နယ်၊ နှီးပတောကျေးရွာနှင့် မော်လမြိုင်မြို့နယ်၊ ညောင်လမ်းရပ်ကွက်၊ မာလာဝင်းရပ်ကွက်တို့တွင်လည်းကောင်း၊ ၁၀-၃-၂၀၂၃ ရက်နေ့တွင် မော်လမြိုင်မြို့နယ်၊ မရမ်းကုန်းရပ်ကွက်၊ မောင်ငံဈေး၊ ကျောက်တန်းရပ်ကွက်တို့တွင်လည်းကောင်း၊ ၁၁-၃-၂၀၂၃ ရက်နေ့တွင် မုဒုံမြို့နယ်၊ သာယာကုန်းကျေးရွာ၊ ပေါင်မြို့နယ်၊ နတ်ကြီးချောင်ကျေးရွာ၊ မော်လမြိုင်မြို့နယ်၊ ဘဲကုန်းဈေးတို့တွင်လည်းကောင်း အသီးသီးဆောင်ရွက်ခဲ့ပါသည်။

     ထိုသို့ဆောင်ရွက်ရာတွင် စားသုံးဆီတင်သွင်းသည့် ကုမ္ပဏီများက လက်ကားကုန်သည်များသို့ ဖြန့်ဖြူးထုတ်ပေးခဲ့သည့်စားအုန်းဆီများကို ရန်ကုန်အထိုင်ဈေးနှင့် ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂%အမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချရမည်ဖြစ်ရာ လက်လီဈေးကွက်အတွင်း သင့်တင့်မျှတသောဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းမရှိစေရေးတို့အတွက် ကွင်းဆင်းကြပ်မတ်ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ ပန်းတောင်းမြို့နယ်၊ မင်းရပ်ရပ်ကွက်တွင် ကုလားပဲစိုက်ပျိုးထားသဖြင့် တစ်ဧကကုန်ကျစရိတ်များ၊ ဈေးနှုန်းဈေးကွက်အခြေအနေများအား သိရှိနိုင်ပါရန် (၈-၃-၂၀၂၃) ရက်နေ့ နေ့လယ်(၂:၀၀)နာရီအချိန်တွင် စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့် ဝန်ထမ်းများသည် စိုက်ခင်းများဆီသို့ သွားရောက်၍  ကွင်းဆင်းဆောင်ရွက်ခဲ့ပါသည်။

      ပန်းတောင်းမြို့နယ်၊ မင်းရပ်ရပ်ကွက်တွင် ကုလားပဲစိုက်ပျိုးသောတောင်သူ ဦးအောင်ကျော်သိန်းနှင့်တွေ့ဆုံ၍ မေးမြန်းရာ ၎င်းမှာ ကွင်းအမှတ်(၈၅)တွင် ကုလားပဲ (၇)ဧကစိုက်ပျိုးထားရှိကြောင်း၊ ကုလားပဲကို အောက်တိုဘာလနှင့်  နိုဝင်ဘာလတို့တွင် စိုက်ပျိုးရကြောင်း၊ စိုက်ပျိုးရာတွင် မြေဆီလွှာတွင် အစိုဓာတ်လက်ကျန်ဖြင့် စိုက်ပျိုးရသဖြင့် အစိုဓာတ်ရရှိသောမြေတွင် အောင်မြင်ဖြစ်ထွန်းကြပါကြောင်း၊ စနစ်တကျရေကို တင်သွင်းပေးခြင်းဖြင့်လည်း ကုလားပဲသီးနှံကို အောင်မြင်စွာစိုက်ပျိုးနိုင်ပါကြောင်း၊ စပါးအပြီး သီးထပ်အဖြစ်စိုက်ပျိုးကြောင်း သိရှိရပါသည်။

      ကုလားပဲကိုစိုက်ပျိုးရာတွင် မျိုး(၂)တင်းခန့်ကုန်ကျပြီး မျိုးမှာ ဟော်လန်မျိုးဖြစ်ပါသည်။ ကုန်ကျစရိတ်အနေဖြင့် ကုလားပဲမျိုးတစ်တင်းလျှင် (၇၀၀၀၀) ကျပ်ဖြင့် (၁၄၀၀၀၀) ကျပ်ခန့်ကုန်ကျပါသည်။ စက်ထွန်ယက်ခမှာ (၁)စပ်လျှင် (၅၀၀၀၀) ကျပ်၊ ကုလားပဲစိုက်ပျိုးလျှင် ကြဲပက်၍စိုက်ပျိုးရသဖြင့် အလုပ်သမားတစ်ဦးလျှင် (၆၀၀၀) ကျပ်နှင့် (၂) ရက်ကြဲပက်ရ၍ (၁၂၀၀၀) ကျပ်ခန့်ကုန်ကျပါသည်။ သွင်းအားစုအနေဖြင့် အသီးအပွင့်အားဆေး၊ အပင်အားဆေးနှင့် ပိုးသတ်ဆေးအတွက်ကုန်ကျစရိတ်မှာ (၉၀၀၀၀)ကျပ်ခန့်ကုန်ကျသည်ဟု သိရှိရပါသည်။ ထို့ကြောင့် ကုလားပဲစိုက်ပျိုးမှုတစ်ဧကလျှင် စုစုပေါင်းစိုက်ပျိုးထုတ်လုပ်ကုန်ကျစရိတ်မှာ (၂၉၂၀၀၀) ကျပ်ခန့်ကုန်ကျသည်ဟု သိရပါသည်။ အထွက်နှုန်းအနေဖြင့် တစ်ဧကလျှင် ပျမ်းမျှ (၁၂) တင်းခန့်ထွက်ရှိသည်ဟု သိရပါသည်။ ယခုအချိန်တွင် ရိတ်သိမ်းမှုမရှိသေးဘဲ မကြာမီကာလတွင် ရိတ်သိမ်းနိုင်မည်ဟုသိရပါသည်။ ကုလားပဲဈေးအနေဖြင့် ယခုအချိန်တွင် တစ်တင်းလျှင် (၆၃၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်းသိရပါသည်။ တောင်သူအကျိုးအမြတ်အနေဖြင့် တစ်ဧကလျှင် (၄) သိန်းကျော်ခန့်ရရှိနိုင်သည်ဟု ခန့်မှန်းသိရှိရပါသည်။ ကုလားပဲအထွက်နှုန်းကောင်းလျှင်ကောင်းသလို အမြတ်အစွန်းများရရှိပြီး အထွက်နှုန်းမကောင်းလျှင် အကျိုးအမြတ်နည်းနိုင်သည်ဟု သိရှိရပါသည်။

     ကုလားပဲစိုက်ပျိုးသူတောင်သူများအနေဖြင့် တစ်ဧကစိုက်ပျိုးလျှင် ကျပ် (၄) သိန်းကျော်ရရှိ၍ (၇) ဧကစိုက်ပျိုးလျှင် (၂၈) သိန်းကျပ်ခန့်ရရှိနိုင်သဖြင့် တောင်သူများအနေဖြင့် စပါးပြီးလျှင် ကုလားပဲကို စိုက်ပျိုးသင့်သောသီးနှံဖြစ်ပါသည်။ ကုလားပဲမျိုးကောင်းကိုရွေးချယ်၍ စိုက်ပျိုးပြီး ရေမြေဒေသရာသီဥတုကောင်းလျှင်ကောင်းသလို အထွက်များ၍ အကျိုးအမြတ်ဖြစ်ထွန်းနိုင်မည်ဖြစ်ပြီး ရေမြေဒေသရာသီဥတုမကောင်းလျှင် အထွက်နှုန်းလျော့နည်းနိုင်မည်ဖြစ် ကြောင်း သိရှိရပါသည်။

DOCA(ပဲခူး)

     တောင်ငူခရိုင်၊ ရေတာရှည်မြို့နယ်၊ ရေတာရှည်မြို့၊ ဆွာမြို့၊ သာဂရမြို့နှင့် မြို့လှမြို့များ၏ လမ်းဘေးဝဲယာကျေးရွာများတွင် တောင်သူဦးကြီးများက သဘာဝမြေဩဇာများပြုလုပ်၍ မိမိတို့စိုက်ခင်းများတွင် စတင်အသုံးပြုနေပြီဖြစ်ပါသည်။

       သဘာဝမြေဩဇာပြုလုပ်ရာတွင် (၁၀)ပေပတ်လည်၊ အနက်(၄)ပေ မြေကျင်းများတူး၍ ၎င်းကျင်းထဲသို့ မြို့နယ်စည်ပင်သာယာရေးအဖွဲ့က စွန့်ပစ်အမှိုက်များတွင် သံတိုသံစနှင့် ပလတ်စတစ်ကဲ့သို့ အသုံးပြု၍မရနိုင်သောအမှိုက်များအား သန့်စင်ပြီး သစ်ပင်များမှထွက်သော သစ်ရွက်၊ သစ်ခက်များနှင့်ပေါင်းစပ်ကာ မြေကျင်းထဲသို့ ၁ပေခန့်ထည့်ပါသည်။ ထို့နောက် EM (Effective Microorganism) အကျိုးပြု အဏုဇီဝသက်ရှိအရည်နှင့် နွားချေး၊ ကြက်ချေး ၆လက်မခန့် တစ်ထပ်တင်ပေးရပါသည်။ ထိုနည်းအတိုင်း စွန့်ပစ်အမှိုက်၁ပေနှင့် EM အရည်အသင့်အတင့်အသုံးပြု၍ နွားချေး၊ ကြက်ချေးများနှင့်ရောစပ်ကာ ၆လက်မခန့် ၁ထပ်၊ စုစုပေါင်း ၃ထပ်ပြုလုပ်၍ မြေကျင်းအပေါ်တွင် ပလတ်စတစ်နှင့် လုံအောင်ဖုံးဖိကာ တစ်လခန့်ထားရကြောင်း သိရှိရပါသည်။

      သဘာဝမြေဩဇာပြုလုပ်ရာတွင် လိုအပ်သော EM အရည်အား မြို့နယ်စိုက်ပျိုးရေးဦးစီးဌာနက အခမဲ့ပေးဝေလျက်ရှိပါသည်။ သဘာဝမြေဩဇာပြုလုပ်ရာတွင် စနစ်တကျပြုလုပ်ပါက ၁လ ပြည့်လျှင် အသုံးပြု၍ရပါသည်။ တောင်သူဦးကြီးများအနေဖြင့် မိမိအသုံးပြုလိုသောစိုက်ခင်းများအား ဓာတ်မြေဩဇာ ၁ဆနှင့် သဘာဝမြေဩဇာ ၃ဆရောနှော၍ အသုံးပြုနိုင်ပါသည်။

     တောင်သူဦးကြီးများအနေဖြင့် မိမိစိုက်ခင်းများအား သွင်းအားစုထည့်သွင်းချိန်တွင် သဘာဝမြေဩဇာများအသုံးပြုခြင်းဖြင့် စိုက်ပျိုးရေးကုန်ကျစရိတ်များသက်သာစေပြီး သီးနှံများလည်း ယခင်ထက် အထွက်နှုန်းများတိုးလာပါကြောင်းနှင့် ဓာတ်မြေဩဇာတစ်မျိုးတည်းသာ အသုံးပြုထားသော စိုက်ပျိုးသောမြေများ၏အချဉ်ဓာတ်၊ အငံဓာတ်များလည်း ပြန်လည်သင့်တင့်မျှတစေသော အကျိုးကျေးဇူးများရရှိပါကြောင်း လေ့လာသိရှိခဲ့ခြင်းအား တင်ပြလိုက်ရပါသည်။

DOCA(ပဲခူး)