HighLight News

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ တာဝန်ရှိသူများသည် ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူ (၁၀.၅.၂၀၂၂) ရက်နေ့၊နံနက် (၁၁:၃၀)အချိန်တွင် မော်လမြိုင်ကျွန်းမြို့နယ်၊ မြို့မဈေး၊ အောင်သာယာဈေး၊ ဆိပ်ကမ်းသာဈေးများအတွင်း ရောင်းချနေသော ဆေးဝါးအရောင်းဆိုင်များအား ကွင်းဆင်းစစ်ဆေးခဲ့ပါသည်။

          ထိုသို့စစ်ဆေးရာတွင် ဆေးဝါးအရောင်းဆိုင်များ၌ Bella Plus Plaster များ ဆိုင်တင်ရောင်းချမှု ရှိ/မရှိ ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့်ကုမ္ပဏီ၊ ဆေးဝါးမှတ်ပုံတင် အမှတ်နှင့်Import Registration NO.  (IR) များ ဖော်ပြခြင်းမရှိဘဲ ဈေးကွက်အတွင်း ရောင်းချမှုရှိ/မရှိ ကွင်းဆင်းစစ်ဆေးခဲ့ပြီး သက်ဆိုင်ရာဆိုင်ရှင်များအား Bella Plus Plaster သတ်မှတ် ညွှန်ကြားချက်များနှင့် ကိုက်ညီမှုမရှိသောဆေးဝါးများ၊ သက်တမ်းလွန်ပစ္စည်းများ၊ ဆေးဝါးမှတ်ပုံတင်ခြင်းမရှိသော ဆေးဝါးများအား ရောင်းချခြင်းမပြုရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

             စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကလေးခရိုင်ဦးစီးမှူးရုံးမှ ခရိုင်ဦးစီးမှူး ဒေါ်သန်းသန်းဝင်းဦးဆောင်၍ ဒေါ်စန္ဒာမွန်(ဒု-ဦးစီးမှူး)နှင့် ဒေါ်ဇင်မိုးဝါ(အကြီးတန်းစာရေး) ဝန်ထမ်းများအဖွဲ့သည် တပ်ဦးသီတာရပ်ကွက်ရှိ ပေါင်မုန့်၊ ကိတ်မုန့်လုပ်ငန်းရှင် ဉီးဗန်ဇမှုန်အား စားသုံးသူ၏ အခွင့်အရေးများ၊ စီးပွားရေးလုပ်ငန်းရှင်များ၏တာဝန်များ၊ မြန်မာဘာသာဖြင့် ထည့်သွင်းဖော်ပြရမည့်အချက်အလက်များအား သိရှိစေရန်တွေ့ဆုံဆွေးနွေး အသိပညာပေးခဲ့ပါသည်။

            မုန့်လုပ်ငန်းရှင် ဦးဗန်ဇမုန်နှင့်တွေ့ဆုံဆွေးနွေးရာတွင် ခရိုင်ဦးစီးမှူးမှ စားသုံးသူကာကွယ်ရေးဥပဒေ ( ၂၀၁၉ ) အခန်း ( ၁၈ ) တွင် ပြဌာန်းထားသည့် ကုန်အညွှန်းအမှတ်အသားတွင်ပါဝင်သော ကုန်စည်၏ တံဆိပ်အမှတ်အသား၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ တင်သွင်းသူ၏ အမည်နှင့်လိပ်စာ၊ လုပ်ငန်းအမည်နှင့်လိပ်စာ၊ ထုတ်လုပ်သည့်နေရာ၊ ပြန်လည်ထုပ်ပိုးသည့်နေရာ၊ ပါဝင်ပစ္စည်း၊ ဘေးထွက်ဆိုးကျိုး၊ ဓါတ်မတည့်ကြောင်းဖော်ပြချက်၊ ကြိုတင်သတိပေးချက်၊ အစိုးရဌာနများက သတ်မှတ်ထားသော အချက်အလက်များအား အသေးစိတ်ရှင်းလင်းပြောကြားခဲ့ပါသည်။

           မုန့်လုပ်ငန်းရှင် ဉီးဗန်ဇမုန်အား ကုန်အမှတ်တံဆိပ်တွင် ပြည့်စုံစွာထည့်သွင်း ဖော်ပြပါက အခြားမုန့်လုပ်ငန်းရှင်များနှင့်နှိုင်းယှဉ်လျှင် မိမိတို့ကုန်ပစ္စည်းသည် လုံခြုံစိတ်ချရမည်ဖြစ်ပြီး စားသုံးသူမှကုန်အမှတ်တံဆိပ် ပြည်စုံမှုရှိသောမုန့်များကိုသာ ရွှေးချယ်ဝယ်ယူစားသုံးမည်ဖြစ်ပြီး ကုန်အမှတ်တံဆိပ်မပြည့်စုံသည့် ကုန်စည်နှင့်နှိုင်းယှဉ်ပါက ပြည်သူများအနေဖြင့် လုံခြုံစိတ်ချမှုရှိသော ကုန်စည်ကိုသာရွှေးချယ်ဝယ်ယူ စားသုံးကြမည်ဖြစ်ကြောင်း၊ ကုန်အမှတ်တံဆိပ်များကို ပြည့်စုံစွာထည့်သွင်းပြီးလျှင် စားသုံးသူရေးရာဉီးစီးဌာနသို့ လာရောက်၍ လျှောက်ထားနိုင်ကြောင်းနှင့် လုပ်ငန်းရှင်များ၏လျှောက်ထားချက်များကို တိုင်းဒေသကြီးဉီးစီးမှူးရုံးသို့ ဆက်လက်တင်ပြပေးသွားမည်ဖြစ်ကြောင်း  ဆွေးနွေးခဲ့ပါသည်။ လုပ်ငန်းရှင် ဉီးဗန်ဇမုန်မှလည်း ညွှန်ကြားချက်များကို လိုက်နာဆောင်ရွက်သွားမည်ဖြစ်ကြောင်း ဆွေးနွေးပြောကြားခဲ့ပါသည်။

DOCA(စစ်ကိုင်း)

              ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ၆.၅.၂၀၂၂ ရက်နေ့တွင် ကြည့်မြင်တိုင်မြို့နယ်ရှိ စားသုံးဆီကန်များသို့သွားရောက်၍ ပြည့်ပမှ တင်သွင်းလာသည့် စားသုံးဆီများအရည်အသွေးပြည့်မီရေး၊ ပြည်သူများ ကျန်းမာရေးနှင့် ညီညွှတ်ပြီး ဘေးအန္တရာယ်ကင်းရှင်းသည့် စားသုံးဆီများကို သုံးစွဲနိုင်ရေး၊ စားသုံးဆီတင်သွင်းခြင်း၊ သိုလှောင်ခြင်း၊ ဖြန့်ဖြူးခြင်းလုပ်ငန်းများ ထိန်းကျောင်းကြပ်မတ်ဆောင်ရွက်လျက်ရှိရာ ဈေးကွက်အတွင်းဖြန့်ဖြူးမည့် စားသုံးဆီ ထည့်သွင်းသည့်ပေပါများပေါ်တွင် စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်‌ရေးကော်မတီမှ ခွင့်ပြုပေးထားသည့် သက်ဆိုင်ရာကုမ္ပဏီ၏ ကုန်အမှတ်တံဆိပ် (Logo)ပါ Cap Seal များ ချိတ်ပိတ်ထားခြင်း ရှိ/မရှိ ၊ သန့်စင်သော ပေပါ (Food Grade Clean Drum) များဖြင့်လည်းကောင်း၊ Food Grade Bowser Truck  ဖြင့်လည်း‌ကောင်း၊ ဆီလုပ်ငန်းရှင်များမှလည်း ဆီလာရောက်ထုတ်ယူရာတွင် သတ်မှတ်ထားသည့် အဝါရောင်ပေပါအသစ် (သို့မဟုတ်) သန့်စင်ဆေးပြောပြီး အဝါရောင် ပေပါများဖြင့်သာ သယ်ယူ/ထုတ်ယူခွင့်ပြုထားကြောင်း၊ အသိပညာပေးခြင်းနှင့် ကွင်းဆင်းစစ်ဆေး ကြပ်မတ်ဆောင်ရွက်ခြင်းများကို နေ့စဉ်ဆောင်ရွက်လျက်ရှိကြောင်း သိရှိရပါသည်။

DOCA(ရန်ကုန်)

             နိုင်ငံတစ်နိုင်ငံ၏ စီးပွားရေးဖွံ့ဖြိုးတိုးတက်ရန် စက်မှုကုန်ထုတ်လုပ်ငန်းများ၊ စိုက်ပျိုးရေးလုပ်ငန်းများ၊ မွေးမြူရေးလုပ်ငန်းများ၊ သယ်ယူပို့ဆောင်ရေးလုပ်ငန်းများသည် အဓိကအခန်းကဏ္ဍတွင် ပါဝင်သကဲ့သို့ ဒေသတွင်းစီးပွားရေးဖွံ့ဖြိုးတိုးတက်ရန် တပိုင်တနိုင်အသေးစားစီးပွားရေး လုပ်ငန်းများ တွင်တွင်ကျယ်ကျယ်လုပ်ကိုင်ခြင်းသည်လည်း ပြည်တွင်းကုန်သွယ်မှုဖွံ့ဖြိုးရေးအတွက် အရေးကြီးသောကဏ္ဍတစ်ခု ဖြစ်ပါသည်။

          သို့ဖြစ်ရာ (၁၁.၅.၂၀၂၂)ရက်နေ့ နံနက်(၁၀:၃၀)နာရီအချိန် စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးနှင့် ဝန်ထမ်းများသည် SMEs လုပ်ငန်းဖွံ့ဖြိုးတိုးတက်ရေးအတွက် ကျိုင်းတုံမြို့အမှတ်(၃) ရပ်ကွက်ရှိ ရွှေကျန်းမာ တံဆိပ် ဝက်/အမဲခေါက်လုပ်ငန်းရှင်အား လုပ်ငန်း လိုင်စင်သက်တမ်းတိုး ချိတ်ဆက်ဆောင်ရွက်ပေးခြင်း၊ အမှတ်(၅)ရပ်ကွက်ရှိ Honey အမှတ်တံဆိပ် ပေါင်မုန့်/ကိတ်မုန့် လုပ်ငန်းရှင်အား သက်ဆိုင်ရာဌာန၏ ထောက်ခံချက် လက်မှတ်ရရှိရန် ကူညီချိတ်ဆက် ဆောင်ရွက်ပေးခဲ့ပါသည်။

          ဆက်လက်၍ ဒုတိယပြည်နယ်ဦးစီးမှူးရုံးခန်းတွင် စီးပွားရေးလုပ်ငန်းရှင်များအား အသေးစားစက်မှုလက်မှုလုပ်ငန်းဦးစီးဌာန၏ အသိအမှတ်ပြုထောက်ခံချက်လက်မှတ် ပေးအပ်ခြင်းနှင့် ဒုတိယပြည်နယ်ဦးစီးမှူးမှ စားသုံးသူကာကွယ်ရေးဥပဒေ အခန်း (၁၈)ပါကုန်အညွှန်းအမှတ် အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာရမည့်ဆောင်ရွက်ရန်အချက်များအား ဆွေးနွေးပြောကြားခဲ့ပါသည်။

          စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံး၊ ကျိုင်းတုံသည် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ယခင်ကဒေသအတွင်း တပိုင်တနိုင်မိရိုးဖလာလုပ်ကိုင်ကြသော အသေးစားလုပ်ငန်းများဖြစ်သည့် ခေါက်စိန်ခြောက်(ခေါက်ဆွဲခြောက်) လုပ်ငန်း၊ အာလူးကြော်လုပ်ငန်း၊ ဝက်/အမဲခေါက်ကြော်လုပ်ငန်း၊ ပေါင်မုန့်/ကိတ်မုန့်လုပ်ငန်း၊ ယိုမျိုးစုံလုပ်ငန်းတို့ကိုလည်း သက်ဆိုင်ရာ အသေးစားစက်မှုလက်မှုလုပ်ငန်းဦးစီးဌာန၏ အသိအမှတ်ပြုထောက်ခံချက်လက်မှတ်ရရှိရန် ကူညီချိတ်ဆက်ဆောင်ရွက်ပေးခဲ့ပြီး ဖြစ်ပါသည်။

DOCA(ရှမ်း)

               ဧရာဝတီတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ် ကင်းရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ စားသုံးသူများအတွက် ဘေးအန္တရာယ်ဖြစ်စေနိုင်သော ကုန်စည်များဈေးကွက်အတွင်းမှ ပပျောက်သွားစေရေးရည်ရွယ်၍ ဈေးကွက်စောင့်ကြည့် စစ်ဆေးခြင်းလုပ်ငန်းများအား တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ်ဆောင်ရွက်လျက်ရှိပါသည်။

             ထိုသို့ ဈေးကွက်စောင့်ကြည့်စစ်ဆေးခြင်းများပြုလုပ်ခဲ့ရာ မေလ ၁၀ ရက်နေ့၊ နံနက် ၁၀ နာရီတွင် ပုသိမ်ခရိုင်၊ သာပေါင်းမြို့နယ်အတွင်းရှိ ကံ့ကော်သောက်ရေသန့်စက်ရုံသို့သွားရောက်၍ ထုတ်ကုန်လုံခြုံ စိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခဲ့ပါသည်။လုပ်ငန်းရှင်နှင့် တွေ့ဆုံ၍  စားသုံးသူကာကွယ်ရေးဥပဒေ (၂၀၁၉)၊  အခန်း(၁၈)ပါ ကုန်အညွှန်းအမှတ်အသားဆိုင်ရာ ပြဌာန်းချက်များနှင့် ပတ်သက်၍ ကုန်စည်များပေါ်တွင်  မြန်မာဘာသာဖြင့် ကုန်အညွှန်းအမှတ်အသား ပြည့်စုံစွာဖော်ပြထားမှု အခြေအနေတို့ကို စီးပွားရေးလုပ်ငန်းရှင်များ သိရှိလိုက်နာဆောင်ရွက်နိုင်စေရန်အတွက် အသိပညာပေး ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)