HighLight News

    စားသုံးသူရေးရာဦးစီးဌာန၊ ရန်ကုန်တိုင်းဒသကြီးဦစီးမှူးရုံး၏ ကြီးကြပ်ကွပ်ကဲမှုအောက်ရှိ  အရှေ့ပိုင်းခရိုင်ဦးစီးမှူးရုံးဝန်ထမ်းများသည် (၁၃-၁၁-၂၀၂၃) ရက်နေ့၊ နေ့လယ် (၁၂:၃၀) နာရီအချိန်တွင်  ရန်ကုန်မြို့မှ စက်သုံးဆီဆိုင်များမှာ ဆိုရှယ်မီဒီယာပေါ်တွင် ဓာတ်ဆီ၊ ဒီဇယ်ဆီများကို အကန့်အသတ်ဖြင့် ဝယ်ယူနေရကြောင်း ရေးသားဖော်ပြမှုနှင့်ပတ်သက်၍ အရှေ့ပိုင်းခရိုင်၊ မင်္ဂလာတောင်ညွန့်မြို့နယ်၊ မြောက်ဥက္ကလာပမြို့နယ်၊ တောင်ဥက္ကလာပမြို့နယ်၊ သာကေတမြို့နယ်တို့ရှိ စက်သုံးဆီအရောင်းဆိုင်များသို့သွားရောက်ကာ မြေပြင်အခြေအနေကိုသိရှိနိုင်ရန်အတွက် စက်သုံးဆီပြတ်လပ်မှုနှင့် စက်သုံးဆီများ အကန့်အသတ်ဖြင့်ရောင်းချနေခြင်းရှိ/မရှိနှင့် စက်သုံးဆီလိုသလောက် ရောင်းချခြင်းရှိ/မရှိတို့ကို သက်ဆိုင်ရာဆိုင်မန်နေဂျာများနှင့်တွေ့ဆုံမေးမြန်းခဲ့ရာ ဆီများပြတ်လပ်ခြင်းမရှိကြောင်း၊း အကန့်အသတ်ဖြင့်လည်းရောင်းချခြင်းမရှိကြောင်းနှင့် ခွဲတမ်းရရှိမှုအပေါ်  လိုသလောက်ရောင်းချပေးလျက်ရှိကြောင်း သတင်းရရှိပါသည်။

DOCA(ရန်ကုန်)

  မွန်ပြည်နယ်၊ စားသုံးသူရေးရာဦးစီးဌာနမှ မုဒုံမြို့နယ်တာဝန်ခံနှင့်ဝန်ထမ်းများသည် (၁၄-၁၁-၂၀၂၃) ရက်နေ့တွင် မိတ်ဖက်ဌာနများဖြစ်သော မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ကျန်းမာရေးဦးစီးဌာနတို့နှင့်ပူးပေါင်းကာ  မုဒုံမြို့ပေါ်ရှိ ကုန်မျိုးစုံဆိုင်နှင့်စတိုးဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြပါသည်။

    ထိုသို့ ဈေးကွက်စောင့်ကြည့်စစ်ဆေးရာ မုဒုံမြို့နယ်ရှိ ကုန်မျိုးစုံဆိုင်နှင့်စတိုးဆိုင်များ၌ ရောင်းချလျက်ရှိသော အသင့်သောက်ကော်ဖီအမျိုးမျိုးတွင် မြန်မာစာ ကုန်အညွှန်းအမှတ်အသားပြည့်စုံစွာဖော်ပြပါရှိမှုရှိ/မရှိကို ဈေးကွက်စောင့်ကြည့်စစ်ဆေးခဲ့ရာ  မြန်မာဘာသာဖြင့် ကုန်အညွှန်းအမှတ်အသားပြည့်စုံစွာပါရှိသော အသင့်သောက်ကော်ဖီအမျိုးမျိုးကိုသာ ရောင်းချလျက်ရှိကြောင်းသိရှိရပါသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူး၊ မော်လမြိုင်ခရိုင်ဦးစီးမှူးနှင့် ဝန်ထမ်းများသည် (၁၃-၁၁-၂၀၂၃) ရက်နေ့တွင် မွန်ပြည်နယ်၊ အသေးစားစက်မှုလက်မှုလုပ်ငန်းဦးစီးဌာနရှိ ဝန်ထမ်းများအား စားသုံးသူကာကွယ်ရေးအသိပညာပေးဟောပြောဆွေးနွေးခဲ့ပါသည်။

    အဆိုပါ ဆွေးနွေးပွဲတွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူး ဒေါ်မိရင်စနိုင်းမွန်က ဟောပြောပွဲပြုလုပ်ရခြင်းရည်ရွယ်ချက်ကိုလည်းကောင်း၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူကာကွယ်ရေးဥပဒေပြဋ္ဌာန်းချက်များ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဆိုင်ရာဖော်ပြချက်များ၊ တိုင်ကြားနိုင်သည့်လူပုဂ္ဂိုလ်၊ တိုင်ကြားနိုင်သည့်နေရာများ၊ စီမံခန့်ခွဲရေးနည်းလမ်းအရ အရေးယူဆောင်ရွက်မှုအဆင့်ဆင့်နှင့် ဥပဒေ၏တားမြစ်ချက်များ၊ ပြစ်မှု၊ ပြစ်ဒဏ်များ၊ ဌာနဆိုင်ရာများနှင့် ပေါင်းစပ်ညှိနှိုင်းဆောင်ရွက်နေမှုများကိုလည်းကောင်း အသေးစိတ်ဆွေးနွေးခဲ့ကြကြောင်း သတင်းရရှိပါသည်။

DOCA(မွန်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မန္တလေးတိုင်းဒေသကြီးအစိုးရအဖွဲ့နှင့် မြန်မာနိုင်ငံဆန်စပါးအသင်းချုပ်တို့ပူးပေါင်းကျင်းပသည့် ဆန်စပါး၊ MSME လုပ်ငန်းဖွံ့ဖြိုးတိုးတက်စေရေးနှင့် ဆန်စပါးဈေးကွက်နှင့် ဈေးနှုန်းများတည်ငြိမ်မှန်ကန်ရေးဆိုင်ရာ လုပ်ငန်းညှိနှိုင်းဆွေးနွေးပွဲကို (၁၁-၁၁-၂၀၂၃) ရက်နေ့၊ နံနက် (၉း၀၀) နာရီအချိန်တွင် မန္တလေးမြို့၊ မြို့တော်ခန်းမ၌ကျင်းပခဲ့ရာ ဆွေးနွေးပွဲကို  မန္တလေးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီး မန္တလေးတိုင်းဒေသကြီး၊ စိုက်ပျိုးရေးဦးစီးဌာန၊ ဒုတိယတိုင်းဒေသကြီးဦးစီးမှူးနှင့် မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ ဒုတိယတိုင်းဒေသကြီးဦးစီးမှူး၊ မြန်မာနိုင်ငံဆန်စပါးအသင်းချုပ်၊ မန္တလေးတိုင်းဒေသကြီး၊ ဆန်ကုန်သည်များအသင်း၊ စစ်ကိုင်းတိုင်းဒေသကြီး၊ ရှမ်းပြည်နယ်၊ မန္တလေးတိုင်းဒေသကြီး၊ ဆန်စက်လုပ်ငန်းရှင်များအသင်း၊ ဆန်စပါးစိုက်ပျိုးထုတ်လုပ်တင်ပို့ရောင်းချသူများအသင်း၊ ဆန်ကုန်စည်ဒိုင်များအသင်း၊ ဆန်ပွဲရုံလုပ်ငန်းရှင်များအသင်းမှ တာဝန်ရှိသူများနှင့် ဖိတ်ကြားထားသော ဧည့်သည်တော်များတက်ရောက်ခဲ့ကြပါသည်။

   ဆွေးနွေးပွဲတွင် စီးပွားရေးရာဝန်ကြီးက  မန္တလေးတိုင်းဒေသကြီးအတွင်းရှိ ဆန်စပါးဆိုင်ရာ MSME လုပ်ငန်းများဖွံ့ဖြိုးတိုးတက်စေရေး၊ ဆန်စက်အလတ်စား၊ အငယ်စားများ ဖွံ့ဖြိုးတိုးတက်စေရေးအတွက် စပါးဝယ်ယူမှုချေးငွေများရရှိရေး၊ ဆန်စက်များအဆင့်မြှင့်တင်နိုင်ရေးနှင့် ချေးငွေရရှိရေးတို့ပါ စီစဉ်ဆောင်ရွက်သွားမည်ဖြစ်ကြောင်းသိရှိရသည့်အပြင် ယခုကဲ့သို့ မြန်မာနိုင်ငံဆန်စပါးအသင်းချုပ်က မန္တလေးတိုင်းဒေသကြီး၏ ဆန်စပါးကဏ္ဍပိုမိုဖွံ့ဖြိုးတိုးတက်လာစေရေး ဆန်လောကသားများနှင့်အတူ ဆွေးနွေးပူးပေါင်းဆောင်ရွက်ပေးသည့်အတွက် များစွာကြိုဆိုပါကြောင်းပြောကြားခဲ့ပါသည်။ ဆက်လက်၍ မြန်မာနိုင်ငံဆန်စပါးအသင်းချုပ်ဥက္ကဋ္ဌက မြန်မာ့ဆန်စပါးကဏ္ဍဖွံ့ဖြိုးတိုးတက်စေရေးနှင့်   ဆန်စပါးညီလာခံ (၂၀၂၂) တွင် ဖော်ထုတ်ခဲ့သောအချက်များအရ  ဆန်အိတ်ရေ (၁၀၀၀)အိတ်၊ ဆန်တန်ချိန် (၅၀) တန်အထက် သိုလှောင်ထားသောသိုလှောင်ရုံများ မဖြစ်မနေမှတ်ပုံတင်ရန်နှင့် ဆန်စပါးဥပဒေလည်း မကြာခင်ထွက်ပေါ်လာတော့မည်ဖြစ်ကြောင်း၊ ပြည်တွင်းစားသုံးမှုဖူလုံရေးအတွက်  ပြည်တွင်းတွင် ထုတ်လုပ်မှုများရန်လိုအပ်ကြောင်း၊ ထုတ်လုပ်မှုများမှ  လူသုံးကုန်များနိုင်မည်ဖြစ်ကြောင်း၊ ထုတ်လုပ်မှုများဖို့အတွက် အဓိကဆောင်ရွက်သွားကြရန်လိုအပ်ကြောင်း၊ တောင်သူကြီးများအနေဖြင့် အထွက်နှုန်းမြင့်မားသောမျိုးစိတ် (high yield variety) နှင့် (high brid variety) (၂) မျိုးကို အဓိကကိုင်တွယ်ဆောင်ရွက်သွားကြရန်လိုအပ်ကြောင်း ပြောကြားခဲ့ပြီး မြန်မာနိုင်ငံဆန်စပါးအသင်းချုပ်၊ အတွင်းရေးမှူး ဦးလူမော်မြင့်မောင်က Myanmar Rice Online (MyRO) Website တွင် ဆန်စပါးသိုလှောင်မှုမှတ်ပုံတင်ရာ၌ လုပ်ဆောင်ရမည့်အဆင့်များကို အသေးစိတ်ရှင်းလင်းဆွေးနွေးခဲ့ပါသည်။ ဆက်လက်၍ မြန်မာနိုင်ငံဆန်စပါးအသင်းချုပ် တွဲဖက်အထွေထွေအတွင်းရေးမှူး၊ ဦးသောင်းထိုက်စိုးက နိုင်ငံတကာဆန်ဈေးကွက်နှင့် ဆန်ဈေးနှုန်းအခြေအနေများကိုဆွေးနွေးပြောကြားခဲ့ပါသည်။ ၎င်းနောက် လူငယ်ဆန်စပါးလုပ်ငန်းရှင်များအသင်းဥက္ကဋ္ဌ ဒေါ်ယမင်းနိုင်က  သိုလှောင်ရုံနှင့်ကုန်အပ်လက်မှတ်ကိုအခြေပြုသည့် ငွေကြေးထောက်ပံ့မှုစနစ်အကြောင်းများကိုရှင်းလင်းဆွေးနွေးခဲ့ပါသည်။ ထို့နောက် တက်ရောက်လာကြသည့် စစ်ကိုင်းတိုင်းဒေသကြီး၊ ရှမ်းပြည်နယ်နှင့် မန္တလေးတိုင်းဒေသကြီးမှ ဆန်စပါးလုပ်ငန်းရှင်များမှ ဆန်စပါးကြိတ်ခွဲ၊ ထုတ်လုပ်သယ်ယူပို့ဆောင်ရသည့် လုပ်ငန်းစဉ်တလျှောက် ကြုံတွေ့ရသည့်အခက်ခဲများကိုမေးမြန်းဆွေးနွေးခဲ့ပြီး ဆွေးနွေးပွဲကို နေ့လယ်(၁၂:၃၀)နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(မန္တလေး)

  စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးနှင့်အဖွဲ့သည် (၉-၁၁-၂၀၂၃) ရက်နေ့၊ နေ့လယ် (၁၃:၂၀) နာရီအချိန်တွင် မြန်အောင်မြို့နယ်၊ အမှတ်(၁)ရပ်ကွက်၊ အုပ်ချုပ်ရေးမှူးရုံးခန်းမ၌ စားသုံးသူပြည်သူ(၃၀)ဦးအား စားသုံးသူကာကွယ်ရေးအသိပညာပေးဟောပြောခဲ့ပါသည်။

    ဟောပြောပွဲတွင် မြို့နယ်ဦးစီးမှူး ဦးမြင့်အောင်က စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စားသုံးသူများသည် ကုန်စည်ကိုရွေးချယ်ဝယ်ယူတတ်စေရန် ကုန်အညွှန်းအမှတ်အသားနှင့်စပ်လျဉ်း၍ ဖော်ပြပါရှိသည့်အချက်အလက်များကို သေချာစွာစိစစ်ဝယ်ယူနိုင်ရန်၊ အစားအသောက်နှင့်ကုန်စည်များပေါ်တွင်ဖော်ပြရမည့် ကုန်အညွှန်းအမှတ်အသားများအကြောင်း၊ ဝယ်ယူအသုံးပြုခဲ့သောကုန်စည်နှင့်ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက ပြောဆိုတင်ပြတိုင်ကြားခွင့်နှင့် ပြန်လည်ကုစားနိုင်ခွင့်များအကြောင်း၊  ပြစ်မှုနှင့်ပြစ်ဒဏ်များအကြောင်းနှင့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (Consumer Information and Complaint Center) CICC ဖွင့်လှစ်ထားရှိမှအခြေအနေကိုလည်ကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်းကိုသိရှိလိုပါက www. doca.  gov. mm  Website တွင် ဝင်ရောက်လေ့လာနိုင်ကြောင်းနှင့် Consumer Call Center No. (1535) သို့ ဆက်သွယ်မေးမြန်းနိုင်ကြောင်းကိုလည်းကောင်း အသိပညာပေးဟောပြောဆွေးနွေးခဲ့ကြောင်းသိရှိရပါသည်။

DOCA( ဧရာဝတီ)