HighLight News

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ မင်းဘူးမြို့နယ်တာဝန်ခံ ဦးမြင့်ကြည်နှင့်ဝန်ထမ်းများသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဦးဖြိုးမောင်မောင်ကျော်၊ မြို့နယ်မီးသတ်ဦးစီးမှူး ဦးစိန်ထွန်းတို့နှင့်ပူးပေါင်း၍  (၁၄-၁၁-၂၀၂၃) ရက်နေ့၊ နံနက်(၀၉:၃၀)နာရီအချိန်တွင် ရေတွင်းကုန်းကျေးရွာရှိ အခြေခံပညာအထက်တန်းကျောင်း(ခွဲ)၌ ဆရာ/ ဆရာမ(၁၂)ဦး၊ ကျောင်းသား/ ကျောင်းသူ(၁၂၀)ဦးအားလည်းကောင်း၊ နေ့လယ် (၁၃:၀၀)နာရီအချိန်တွင် မောင်းမကန်ကျေးရွာရှိ အခြေခံပညာအထက်တန်းကျောင်း(ခွဲ)၌ ဆရာ/ ဆရာမ(၆)ဦး၊ ကျောင်းသား/ ကျောင်းသူ(၁၃၅)ဦးအားလည်းကောင်း စားသုံးသူကာကွယ်ရေး အသိပညာပေးဟောပြောဆွေးနွေးပွဲကျင်းပပြုလုပ်ခဲ့ပါသည်။

    ပထမဦးစွာ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူးက ကလေးသူငယ်များ အသိပညာတိုးတက်စေရန်အတွက် သုတ၊ ရသ၊ ရွှေသွေး အစရှိသော စာအုပ်စာပေများဖတ်ရှုသင့်သည့်အကြောင်းကိုလည်းကောင်း၊ မြို့နယ်မီးသတ်ဦးစီးမှူးမှ မီးလောင်နိုင်သောအကြောင်းအရာများနှင့် မီးသတ်ဆေးဘူးသုံးစွဲနည်းလက်တွေ့သရုပ်ပြခြင်းအကြောင်းကိုလည်းကောင်း၊ စားသုံးသူရေးရာဦးစီးဌာန မြို့နယ်တာဝန်ခံက   စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြချက် (၈)ချက်နှင့်ပြည့်စုံမှသာ ဝယ်ယူစားသုံးရေး၊ စားသုံးသူနစ်နာဆုံးရှုံးမှုများပေါ်ပေါက်လာပါက တိုင်ကြာနိုင်ရန်နည်းလမ်းများ အစရှိသည်ဖြင့် စားသုံးသူကာကွယ်ရေးဥပဒေအကြောင်းကိုလည်းကောင်း အသိပညာပေးဆွေးနွေးခဲ့ကြပြီး သိရှိလိုသည်များကိုမေးမြန်းကြရာ ဌာနအလိုက် သက်ဆိုင်ရာတာဝန်ရှိသူများက ပြန်လည်ဖြေကြားပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီး၊ ကုန်စည်ဒိုင်အစည်းအဝေးခန်းမ၌ ၂၀၂၃ခုနှစ်၊ နိုဝင်ဘာလ(၁၄)ရက်နေ့၊ နေ့လယ်(၁၄:၀၀)နာရီအချိန်တွင် ကိုဗစ်-၁၉ရန်ပုံငွေမှ ချေးငွေရယူထားခဲ့ပြီး ၂၀၂၃ခုနှစ်၊ နိုဝင်ဘာလတွင် ချေးငွေသက်တမ်း (၃)နှစ်ပြည့်မြောက်သည့် မကွေးမြို့ရှိ လုပ်ငန်းရှင်(၃၀)ဦးအား မကွေးတိုင်းဒေသကြီး၊ ကိုဗစ်ချေးငွေစိစစ်ကြပ်မတ်ရေးအဖွဲ့၏ တာဝန်ရှိသူများက ခေါ်ယူတွေ့ဆုံပြီး ချေးငွေအတိုးနှင့်အရင်းများပေးဆပ်ရန် တိုက်တွန်းသည့်အစည်းအဝေးဆောင်ရွက်ခဲ့ကြောင်းသိရှိရပါသည်။

    ပထမဦးစွာ မကွေးတိုင်းဒေသကြီး၊ ကိုဗစ်-၁၉သက်ရောက်မှုကြောင့် ထိခိုက်မှုရှိသော စီးပွားရေးလုပ်ငန်းများအား ကိုဗစ်-၁၉ရန်ပုံငွေမှထုတ်ပေးထားသည့်ချေးငွေများ အကျိုးရှိစွာအသုံးချမှုအပေါ်  စိစစ်ကြပ်မတ်ရေးအဖွဲ့ဥက္ကဋ္ဌက ချေးငွေများချေးရန် စတင်စာချုပ်ချုပ်ဆိုခဲ့စဉ်က ချေးငွေသက်တမ်းမှာ (၁) နှစ်ဖြစ်သော်လည်း ယခုအခါ (၃)နှစ်ပြည့်မြောက်ပြီဖြစ်သည့်အပြင် ကိုဗစ်-၁၉ရောဂါများလည်းမရှိတော့သည့်အတွက် နိုင်ငံတော်က ကိုဗစ်-၁၉ရန်ပုံငွေချေးငွေများအား စာရင်းပိတ်သိမ်းလိုက်ပြီဖြစ်၍ အမြန်ဆုံးချေးငွေအတိုးနှင့်အရင်းများပေးဆပ်ကြရန် တိုက်တွန်းလိုကြောင်း၊ ပေးဆပ်ခြင်းမရှိပါက သတိပေးစာများထုတ်၍  Blacklist စာရင်းသွင်းကာ ဘဏ်လုပ်ထုံးလုပ်နည်းနှင့်အညီ အရေးယူဆောင်ရွက်သွားမည်ဖြစ်ကြောင်း ဆွေးနွေးပြောကြားခဲ့ကြောင်းသိရှိရပါသည်။

       ဆက်လက်၍ အတွင်းရေးမှူးက စီးပွားရေးလုပ်ငန်းရှင်များအနေဖြင့် ကတိသစ္စာမှာ အရေးကြီးကြောင်း၊ ချေးငွေအတိုးနှင့်အရင်းများကို သတ်မှတ်ကာလအတွင်း ပေးဆပ်လိုက်ခြင်းအားဖြင့် ယုံကြည်မှုတည်ဆောင်ပြီးသားဖြစ်ပါကြောင်း၊ သတ်မှတ်ကာလအတွင်း ပေးဆပ်သည့်အတွက် နောက်ထပ် ချေးငွေများပြန်လည်လျှောက်ထားသည့်အခါ ယုံယုံကြည်ကြည်ဖြင့် ထောက်ခံပေး၍ရမည်ဖြစ်ကြောင်း ဆွေးနွေးပြောကြားခဲ့ပါသည်။

      ထို့နောက် စီးပွားရေးဘဏ်မန်နေဂျာက အဖွဲ့ဝင်တစ်ဦးဖြစ်သည့်လုပ်ငန်းရှင်များအနေဖြင့် မိမိတို့ချေးယူထားသည့်ငွေများကို သတ်မှတ်ကာလအတွင်း အချိန်မီအမြန်ဆုံးပေးဆပ်ကြစေလိုကြောင်း၊ ဘဏ်မှသတိပေးစာများထုတ်၍ အကြောင်းကြားရလျှင် မိမိတို့လုပ်ငန်းနာမည်ထိခိုက်နစ်နာမည်ဖြစ်ပါကြောင်း တိုက်တွန်းပြောကြားခဲ့ပါသည်။ ဆက်လက်၍ ကုန်သည်များနှင့် စက်မှုလက်မှုလုပ်ငန်းရှင်များအသင်းဥက္ကဋ္ဌ ဦးဖိုနီက  ကျွန်တော်တို့အသင်းအဖွဲ့ဝင်များကို သတိပေးစာများထုတ်၍ အကြောင်းကြားခံရခြင်း၊ Blacklist စာရင်းသွင်းခြင်းခံရသည်ကိုမမြင်လိုကြောင်း၊ ကိုဗစ်-၁၉ ချေးငွေများကို အချိန်မီ အတိုးနှင့်အရင်းပေးဆပ်ခြင်းဖြင့် မိမိတို့အသင်းပုံရိပ်နှင့် လုပ်ငန်းပုံရိပ်မြင့်တက်လာမည်ဖြစ်ကြောင်း တိုက်တွန်းပြောကြားခဲ့ပြီး အစည်းအဝေးကို နေ့လယ်(၁၆း၀၀)နာရီအချိန်တွင် ရုပ်သိမ်းခဲ့ပါသည်။  အဆိုပါအစည်းအဝေးသို့ မကွေးတိုင်းဒေသကြီး၊  စိစစ်ကြပ်မတ်ရေးအဖွဲ့ဝင်များ၊ ကုန်သည်/စက်မှုဥက္ကဋ္ဌနှင့် လုပ်ငန်းရှင်(၂၇)ဦးတက်ရောက်ခဲ့ကြောင်းသိရှိရပါသည်။

DOCA(မကွေး)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ လပွတ္တာမြို့နယ်တာဝန်ခံ ဦးမြင့်ဌေးသည် (၁၄-၁၁-၂၀၂၃)ရက်နေ့၊ နံနက်(၁၀:၀၀)နာရီအချိန်တွင်  မြို့နယ်စည်ပင်သာယာရေးအဖွဲ့နှင့်ပူးပေါင်း၍ ဝါးခယ်မမြို့၊ အမှတ်(၆/၉)ရပ်ကွက်အတွင််း ရေသန့်ရောင်းချသောဆိုင်များရှိ ရေသန့်ဘူးများ၌ ကုန်အညွှန်းအမှတ်အသားပြည့်စုံမှုရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

     ထိုသို့ကွင်းဆင်းစိစစ်ရာ မြို့နယ်တာဝန်ခံက လပွတ္တာမြို့နယ်၊ အမှတ်(၆/၉)ရပ်ကွက်အတွင်း ရေသန့်ဘူးရောင်းချသောဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးမှထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များအနက် စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊  ပြစ်မှုပြစ်ဒဏ်များ၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ပြီး စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များနှင့်အညီ လိုက်နာဆောင်ရွက်ကြရန် ဈေးကွက်၌ရောင်းချနေသော ကုန်စည်များတွင်လည်း ကုန်အညွှန်းအမှတ်အသားပြည့်စုံစွာဖော်ပြထားမှုရှိ/မရှိကို ဌာနမှဈေးကွက်စောင့်ကြည့်စစ်ဆေးမှုများ စဉ်ဆက်မပြတ်ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ချင်းပြည်နယ်ဦးစီးမှူးရုံးမှ ဒေါ်သူဇာမြင့်(ဦးစီးမှူး)၊ ဦးသိန်းထိုက်အောင်(ဒု-ဦးစီးမှူး)၊ ပြည်နယ်အထူးစုံစမ်းစစ်ဆေးရေးဦးစီးဌာနမှ ဦးတင်မောင်သိန်း(ဦးစီးအရာရှိ)၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ ဦးနန်ဆွင်မာန်(အငယ်တန်းစာရေး)၊ ပြည်မြို့နယ်၊ အထွေအထွအုပ်ချုပ်ရေးဦးစီးဌာနမှ ဦးကျော်ဝင်းထွဋ်(ဒု-ဦးစီးမှူး)နှင့် မြို့နယ်စည်ပင်သာယာရေးအဖွဲ့မှ ဦးဟုန်းကီးထွန်း(အငယ်တန်းအင်ဂျင်နီယာ-၄)တို့သည် ၂၀၂၃ခုနှစ်၊ နိုဝင်ဘာလ ၁၄ရက်နေ့၊ နံနက်(၁၀:၃၀)နာရီအချိန်တွင် ဟားခါးမြို့၊ ဈေးသစ်ရပ်ကွက်ရှိ ကုန်စုံဆိုင်များအား ကွင်းဆင်းစစ်ဆေးခဲ့ကြောင်းသိရသည်။

   ထိုသို့ကွင်းဆင်းစစ်ဆေးရာတွင် စားသုံးသူပြည်သူများအတွက် ကျန်းမာရေးဆိုင်ရာ ဘေးအန္တရာယ်ဖြစ်စေသော စားသောက်ကုန်ပစ္စည်းများ အဈေးကွက်အတွင်း ရှိ/မရှိစစ်ဆေးခြင်း၊ ကုန်ပစ္စည်းများတွင် ကုန်အညွှန်းအမှတ်အသားပြည့်စုံမှုရှိ/မရှိစစ်ဆေးခြင်းနှင့် သက်ဆိုင်ရာဌာနများမှ တရားမဝင်ကုန်စည်အဖြစ်သတ်မှတ်ထားသည့်ကုန်ပစ္စည်းများ ဈေးကွက်အတွင်း ဝင်ရောက်မှုရှိ/မရှိ စစ်ဆေးခြင်းလုပ်ငန်းများဆောင်ရွက်ခဲ့ကြောင်းသိရသည်။ ထို့နောက် သက်ဆိုင်ရာဌာနများမှ တာဝန်ရှိသူများက ကုန်စုံဆိုင်ရောင်းချနေသူများအနေဖြင့် မည်သည့်ကုန်ပစ္စည်းမဆို  သက်ဆိုင်ရာဌာနများမှ တရားဝင်ကုန်ပစ္စည်းများအဖြစ်သတ်မှတ်ထားသည့် ကုန်ပစ္စည်းများကိုသာ မှာယူဖြန့်ဖြူးရောင်းချရမည်ဖြစ်ကြောင်း၊ မိမိတို့ဦးစီးဌာနများအနေဖြင့်  လစဉ်လတိုင်း ဈေးကွက်အတွင်းရှိ ကုန်ပစ္စည်းအားလုံးကို စားသုံးသူပြည်သူများအပေါ် ဘေးအန္တရာယ်ဖြစ်ပေါ်မှုမရှိစေရန် ကွင်းဆင်းစိစစ်ဆောင်ရွက်ပေးလျက်ရှိကြောင်းနှင့် ကုန်စုံဆိုင်ရောင်းချသူများအနေဖြင့်လည်း သက်ဆိုင်ရာဌာနများ၏လမ်းညွှန်ချက်များကို ပူးပေါင်းလိုက်နာဆောင်ရွက်ပေးကြရန် ရှင်းလင်းမှာကြားခဲ့ကြောင်း သတင်းရရှိပါသည်။

DOCA(ချင်း)

    ရန်ကုန်တိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးရုံး၏ ညွှန်ကြားချက်အရ ကော့မှူးမြို့နယ်အတွင်းရှိ ဒေသခံပြည်သူများအနေဖြင့် စားသုံးဆီအမျိုးမျိုးဝယ်ယူစားသုံးရာ၌ ဘေးအန္တရာယ်ကင်းရှင်းစေရေးနှင့် စနစ်တကျဝယ်ယူစားသုံးတတ်စေရန်ရည်ရွယ်၍ ၂၀၂၃ခုနှစ်၊ နိုဝင်ဘာလ ၆ရက်နေ့၊ နံနက်(၁၀:၃၀)နာရီအချိန်တွင် စည်ပင်သာယာမြို့မဈေးအတွင်း/ အပြင်နှင့် ရပ်ကွက်များရှိ ကုန်ခြောက်ဆိုင်များသို့သွားရောက်ကာ လုပ်ငန်းရှင်များနှင့်တွေ့ဆုံ၍ ကုန်အညွှန်းအမှတ်အသားပြည့်စုံစွာဖော်ပြပါရှိခြင်းမရှိသော စားသုံးဆီအမျိုးမျိုးဖြန့်ဖြူးရောင်းချခြင်းမရှိစေရေး ဈေးကွက်စောင့်ကြည့်စစ်ဆေးခဲ့ကြပါသည်။

   ထိုသို့ဈေးကွက်စောင့်ကြည့်ကွင်းဆင်းစစ်ဆေးရာ မြို့နယ်စည်ပင်သာယာရေးဦးစီးဌာနမှ ဈေးတာဝန်ခံနှင့်ဝန်ထမ်းများ၊ မြို့နယ်ကျန်းမာရေးဦးစီးဌာနမှ တာဝန်ရှိသူများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ပူးပေါင်းအဖွဲ့က ကော့မှူးမြို့နယ်၊ စည်ပင်သာယာမြို့မဈေးအတွင်း/အပြင်နှင့် ရပ်ကွက်များရှိ ကုန်ခြောက်ဆိုင်များသို့သွားရောက်၍ လုပ်ငန်းရှင်များနှင့်တွေ့ဆုံကာ စားသုံးသူပြည်သူများ၏ အဓိကစားသောက်ကုန်အနက် တစ်ခုဖြစ်သော စားသုံးဆီအမျိုးမျိုးရောင်းချရာတွင် ထုတ်ကုန်လုံခြုံစိတ်ချရမှုရှိစေရေးနှင့် စားသုံးသူများဘေးအန္တရာယ်ကင်းရှင်းစေရေးအတွက် စံချိန်စံညွှန်းများနှင့်ကိုက်ညီမှုမရှိသောစားသုံးဆီများ၊ ကုန်အညွှန်းအမှတ်အသားပြည့်စုံစွာဖော်ပြပါရှိမှုမရှိသောစားသုံးဆီများ ဈေးကွက်အတွင်း ဖြန့်ဖြူးရောင်းခြင်း၊ စားသုံးဆီမပြတ်လပ်စေရေး စသည့် စားသုံးသူကာကွယ်ရေးဆိုင်ရာ သိကောင်းစရာများကို ရှင်းလင်းဆွေးနွေးခဲ့ပြီး ပြည်ပမှ တရားမဝင်လမ်းကြောင်းဖြင့် တင်သွင်းဖြန့်ဖြူးနေသောစားသုံးဆီများကို မိမိတို့၏ဆိုင်များတွင် ဝယ်ယူဖြန့်ဖြူးရောင်းချခြင်းများမပြုလုပ်ကြရန်လည်းကောင်း၊ စားသုံးဆီများဖြန့်ဖြူးရောင်းချခြင်းကို စစ်ဆေးတွေ့ရှိပါက သက်ဆိုင်ရာဥပဒေလုပ်ထုံးလုပ်နည်းများနှင့်အညီ ထိရောက်စွာအရေးယူဆောင်ရွက်သွားမည်ဖြစ်သောကြောင့် မိမိတို့၏ဆိုင်များတွင် ဝယ်ယူဖြန့်ဖြူးရောင်းချခြင်းများလုံးဝမပြုလုပ်ကြရန် စားသုံးဆီနှင့်အခြားစားသောက်ကုန်ပစ္စည်းများကို ဖြန့်ဖြူးရောင်းချရာတွင်လည်း ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ပါရှိသော စားသောက်ကုန်ပစ္စည်းများကိုသာ ဖြန့်ဖြူးရောင်းချကြရန် ရှင်းလင်းဆွေးနွေးပြောကြားခဲ့ကြောင်း သတင်းရရှိပါသည်။

DOCA(ရန်ကုန်)