HighLight News

   (၂၅-၄-၂၀၂၃) ရက်နေ့တွင် စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံနှင့် ဝန်ထမ်းများသည် သူနာပြုသင်တန်းကျောင်းမှ ကျောင်းသား၊ ကျောင်းသူများနှင့်ပူးပေါင်း၍ မော်လမြိုင်မြို့၊ ဈေးကြိုရပ်ကွက်ရှိ ခေတ်ဦးရေသန့်စက်ရုံသို့သွားရောက်၍ ကွင်းဆင်းလေ့လာဆောင်ရွက်ခဲ့ပါသည်။

       ထိုသို့ဆောင်ရွက်ရာတွင် ရေသန့်ထုတ်လုပ်မှုအခြေအနေ၊ လုပ်ငန်းခွင်ဘေးအန္တရာယ်ကင်းရှင်းမှုရှိ/မရှိ၊ သန့်ရှင်းမှုရှိ/မရှိ၊ ကျန်းမာရေးနှင့်ညီညွတ်မှုရှိ/မရှိ၊ သက်ဆိုင်ရာဌာနများ၏ထောက်ခံချက်ရှိ/မရှိ၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်နှင့်ကိုက်ညီမှုရှိ/မရှိတို့ကိုစစ်ဆေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ၂/၂၀၁၉ ပါ လက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(မွန်)

   (၂၄-၄-၂၀၂၃) ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ အသစ်ခန့်အပ်သောဝန်ထမ်းများအား ရပ်ကွက်၊ ကျေးရွာ၊ စာသင်ကျောင်းများ၌ စားသုံးသူကာကွယ်ရေးအသိပညာပေးဟောပြောခြင်းတွင် ကိုယ်တိုင်ဟောပြောနိုင်ရေးအတွက် လေ့ကျင့်သင်ကြားပေးခဲ့ပါသည်။

       ပြည်နယ်ဦးစီးမှူးက ဝန်ထမ်းများ၏စွမ်းဆောင်ရည်မြှင့်တင်ရေးအတွက် ယခုကဲ့သို့ လေ့ကျင့်ရခြင်းဖြစ်ကြောင်း၊ ဝန်ထမ်းအဟောင်းများနှင့်အတူ ဝန်ထမ်းအသစ်များပါ မိမိတို့၏စွမ်းဆောင်ရည်မြှင့်မားရေးအတွက် အမြဲတမ်းလေ့ကျင့်နေကြရန်၊ လုပ်ငန်းခွင်၌ ကြိုးစားကြရန်၊ အင်္ဂလိပ်စာ၊ ကွန်ပျူတာဘာသာရပ်များကိုလည်း ကျွမ်းကျင်စွာအသုံးပြုနိုင်ရေးအတွက် ကြိုးစားကြရန်၊ သင်တန်းများတက်ရောက်ရာတွင်လည်း ထူးချွန်အောင် ကြိုးစားကြရန်၊ မိမိတို့ဘာသာရပ်အလိုက် ကျွမ်းကျင်အောင် လေ့ကျင့်ထားကြရန် ပြောကြားခဲ့ပါသည်။     

      ထို့နောက် စားသုံးသူကာကွယ်ရေးအသိပညာပေး Power Point များအား ဒုဦးစီးမှူး ဒေါ်ခင်ကြည်နှင့် အငယ်တန်စာရေး ဒေါ်သဇင်ဖြိုးမြတ်တို့က ပဏာမဟောပြောဆွေးနွေးပြီး အသစ်ခန့်အပ်သောဝန်ထမ်း(၄)ဦးအား အလှည့်ကျလေ့ကျင့်သင်ကြားပေးခဲ့ကြောင်း သိရှိရပါသည်။    

DOCA(မွန်)  

      (၂၄-၄-၂၀၂၃) ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံနှင့်ဝန်ထမ်းများသည် မော်လမြိုင်မြို့၊ ဈေးကြိုရပ်ကွက်ရှိ  "ထွန်းတောက်ကြယ်" ဆီစက်လုပ်ငန်းရှင်အား တွေ့ဆုံဆွေးနွေးခဲ့ပါသည်။

      ထို့သို့တွေ့ဆုံဆွေးနွေးခဲ့ရာ ဆီစက်လည်ပတ်မှုအခြေအနေ၊ ကုန်ကြမ်းရရှိမှုအခြေအနေ၊ ကုန်ချောဖြန့်ဖြူးမှုအခြေအနေ၊ ဈေးနှုန်းဈေးကွက်အခြေအနေများ၊ စွန့်ပစ်ပစ္စည်းများအသုံးပြုမှုအခြေအနေတို့အားမေးမြန်းရာ ၎င်းတို့အနေဖြင့် ကုန်ကြမ်း(မြေပဲ)များကို ကရင်ပြည်နယ်၊ မန္တလေး၊ ပုဂံ၊ မကွေးတို့မှ မှာယူရရှိပြီး ကုန်ချောများအား မော်လမြိုင်၊ ဘားအံတို့တွင် ရောင်းချဖြန့်ဖြူးကြောင်း၊ ဈေးနှုန်းအနေဖြင့် မြေပဲဆီ(၁)ပိသာလျှင် (၁၄၀၀၀) ကျပ်ဖြင့်ရောင်းချကြောင်း၊ ထွက်ရှိလာသောစွန့်ပစ်ပစ္စည်းများ၊ မြေပဲဖတ်များအား တိရိစ္ဆာန်အစားအစာအရောင်းဆိုင်များမှ တစ်ပိဿာလျှင် (၃၀၀၀) ကျပ်ဖြင့် လာရောက်ဝယ်ယူကြောင်း သိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ပြည်နယ်ဦးစီးမှူး ဦးဝင်းထွန်းနှင့် ဝန်ထမ်းများသည် (၂၄-၄-၂၀၂၃) ရက်နေ့၊ နေ့လယ် (၁၅:၀၀) နာရီအချိန်တွင် မော်လမြိုင်မြို့၊ သူနာပြုသင်တန်းကျောင်းရှိ သင်တန်းသား/သင်တန်းသူများအား စားသုံးသူကာကွယ်ရေးအသိပညာပေးဟောပြောဆွေးနွေးခဲ့ကြောင်း သိရသည်။

          အဆိုပါဟောပြောပွဲ၌ စားသုံးသူရေးရာဦးစီးဌာန၊ ပြည်နယ်ဦးစီးမှူးက စားသုံးသူကာကွယ်ရေးဥပဒေနှင့်ပတ်သက်၍ သိကောင်းစရာများဆွေးနွေးရာတွင်   စားသုံးသူအခွင့်အရေးများနှင့် စားသုံးသူတို့လိုက်လက်နာရမည့်တာဝန်များ၊ စားသုံးသူတို့အခွင့်အရေးအပြည့်အဝရရှိစေရေး အသိပညာများ၊ ဥပမာများဖြင့် ပြောကြားခဲ့ကြောင်း၊ ဆက်လက်၍ ဒုတိယဦးစီးမှူး ဒေါ်ခင်ကြည်က တိုင်ကြားမှုနှင့်ပတ်သက်၍ ရှင်းလင်းဆွေးနွေးကြောင်း၊ အဆိုပါတွင် စားသုံးသူများသည်နစ်နာဆုံးရှုံးမှုများရှိလာလျှင် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ဖွင့်လှစ်ထားမှုနှင့် လက်ခံသည့်ပုံစံများပြောကြားကြောင်း၊ (CICC) လုပ်ငန်းဆောင်ရွက်ချက်များ၊ တိုင်ကြားနိုင်သူများနှင့်တိုင်ကြားမည့်နည်းလမ်းတို့အားဆွေးနွေး၍ ယခင်တိုင်ကြားမှုဖြစ်စဉ်တို့အား အသိပညာရရှိစေရေး ထည့်သွင်းဟောပြောဆွေးနွေးခဲ့ကြောင်း၊ ထို့နောက်တွင် ကျောင်းအုပ်ဆရာမကြီးက သိလိုသည်များအားမေးမြန်းခြင်း၊ တက်ရောက်သည့် သင်တန်းသားက မေးမြန်းခြင်းတို့အား စားသုံးသူရေးရာဦးစီးဌာနမှ ပြည်နယ်ဦးစီးမှူး ဦးဝင်းထွန်းက ပြန်လည်ဖြေကြားပေးခဲ့ကြောင်းနှင့် ကျောင်းအုပ်ဆရာမကြီးထံသို့ လက်ကမ်းစာစောင်ပေးအပ်ခြင်းတို့ဆောင်ရွက်ခဲ့ကြောင်းနှင့် ၎င်းဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူစုစုပေါင်း ၂၀၀ဦးတက်ရောက်ခဲ့ကြောင်း သတင်းရရှိပါသည်။

DOCA(မွန်)

  စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးဝင်းသိန်းဦး(ရုံးအုပ်)သည် (၂၅-၄-၂၀၂၃) ရက်နေ့၊ နံနက် (၁၀:၃၀) နာရီအချိန်တွင် မိုးညှင်းမြို့၊ အုတ်ကျင်းရပ်ကွက်အတွင်းရှိ စားသုံးသူများအား စားသုံးသူကာကွယ်ရေးအသိပညာပေးဟောပြောပွဲပြုလုပ်ဆောင်ရွက်ခဲ့ပါသည်။

 စားသုံးသူကာကွယ်ရေးအသိပညာပေးဟောပြောရာတွင် စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏ အခွင့်အရေးနှင့်အကျိုးစီးပွားကိုကာကွယ်ပေးခြင်း၊ စားသုံးသူနှင့်စီးပွား‌ရေးလုပ်ငန်းရှင်တို့အကြား ကော်မရှင်နှင့်ကော်မတီအဆင့်ဆင့်တို့က သတ်မှတ်ဆောင်ရွက်ပေးသည့် မျှတမှုရှိသောလုပ်ငန်းစဉ်ကိုဆိုလိုကြောင်း၊ စားသုံးသူများအတွက် စားသုံးသူအခွင့်အရေးများဖြစ်သည့် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊ ကုန်စည် သို့မဟုတ် ဝန်ဆောင်မှုကိုရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက်အထားရယူခွင့်ရှိခြင်း၊ စားသုံးသူနစ်နာဆုံးရှုံးမှုနှင့်စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်စေခြင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့်ဖြစ်ပေါ်လာသည့် နစ်နာဆုံးရှုံးများနှင့်စပ်လျဉ်း၍ ကုစားခွင့်ရရှိခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့်လိုအပ်သော သတင်းအချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသောလူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့်ရရှိစေခြင်းတို့ကို အသိပညာပေးဟောပြောခဲ့ပြီး စားသုံးသူကာကွယ်ရေးဆိုင်ရာလက်ကမ်းစာစောင်များဖြန့်‌ဝေခဲ့ပါသည်။

DOCA(ကချင်)