HighLight News

    မကွေးတိုင်းဒေသကြီး၊ မကွေးခရိုင်၊ နတ်မောက်မြို့၌ (၁၆-၁၀-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် နတ်မောက်မြို့၊ မြို့မစျေး၊ စျေးရပ်ကွက်၊ ရန်အောင်မြင်ရပ်ကွက်တို့၌ ရောင်းချလျက်ရှိသော မုန့်မျိုးစုံဆိုင်များသို့သွားရောက်၍ ကွင်းဆင်းစစ်ဆေးဆောင်ရွက်ခဲ့ကြပါသည်။

   အဆိုပါကွင်းဆင်းစစ်ဆေးရာတွင် စားသုံးသူပြည်သူများဘေးဥပဒ်ကင်းရှင်းစွာသုံးစွဲနိုင်ရေး၊ သတင်းအချက်အလက်များပြည့်စုံမှန်ကန်စွာဖော်ပြထားသော ကုန်စည်များကိုသာဝယ်ယူသုံးစွဲနိုင်စေရေးအတွက်ရည်ရွယ်၍ ဆောင်ရွက်ခဲ့ကြပြီး အစားအသောက်နှင့်ဆေးဝါးကွပ်ကဲရေးဦးစီးဌာန (FDA)မှ စားသုံးရန်မသင့်ဟုထုတ်ပြန်ထားသော အစားအသောက်များကိုလည်းစစ်ဆေးခဲ့ကြောင်း၊ ကွင်းဆင်းစစ်ဆေးခြင်းကို အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ မြို့နယ်မီးသတ်တပ်ဖွဲ့၊ မြို့နယ်ကျန်းမာရေးဦးစီးဌာန၊ မြို့နယ်စားသုံးသူရေးရာဦးစီးဌာနတာဝန်ခံတို့ပါဝင်သော ပူးပေါင်းအဖွဲ့ဖြင့် စစ်ဆေးခဲ့ကြောင်းသိရသည်။

      ထိုသို့ ကွင်းဆင်းစစ်ဆေးရာတွင် မုန့်မျိုးစုံရောင်းချသော စျေးဆိုင်(၈)ဆိုင်အား စစ်ဆေးခဲ့ပြီးနောက် မြို့မစျေးတွင်ရောင်းချသော စျေးဆိုင်(၂)ဆိုင်တွင်လည်း (FDA)မှ စားသုံးရန်မသင့်ဟုထုတ်ပြန်ထားသော လျှာရင်းမြက်အမှတ်တံဆိပ် (ဆီးစပ်လုံး)များအားတွေ့ရှိခဲ့ရပြီး (၁)ထုပ်လျှင် ကျပ်(၁၀၀)ဖြင့်ရောင်းချလျက်ရှိ၍ အထုပ်ရေ (၃၀၅)ထုတ်၊ စုစုပေါင်းတန်ဖိုးငွေ ကျပ်(၃၀၅၀၀)အား အဖွဲ့စုံရှေ့တွင် မြေမြှုပ်ဖျက်ဆီးခဲ့ကြောင်းသိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဝန်ထမ်းများသည် အထက်ဌာနအကြီးအကဲများ၏ လမ်းညွှန်မှုဖြစ်သော Green Office & Clean Office ဖြစ်စေရေးအတွက် အပတ်စဉ် သောကြာနေ့တိုင်း မိမိရုံးပတ်ဝန်းကျင်သန့်ရှင်းသာယာလှပရေး/ စိမ်းလန်းစိုပြေရေး ရုံးတွင်း/ ရုံးပြင်သန့်ရှင်းရေးနှင့် ပန်းအလှပင်များ၊ သီးပင်စားပင်များ စိုက်ပျိုးပြုစုခြင်းတို့ဆောင်ရွက်လျက်ရှိပါသည်။

     ထိုသို့ စိုက်ပျိုးရာတွင် နှစ်ရှည်စားပင်များဖြစ်သော ကြောင်လျှာပင်၊ ဒန့်ဒလွန်ပင်၊ သရက်ပင်၊ မာလကာပင်များ၊ ရာသီသီးနှံများဖြစ်သော ဘူးပင်၊ ချဉ်ပေါင်ပင်၊ သင်္ဘောပင်၊ ကန်စွန်းပင်၊ ငရုတ်နှင့် ပင်စိမ်းပင်တို့အား ဝန်ထမ်းများစုပေါင်း၍ စိုက်ပျိုးခဲ့ကြပါသည်။

    မကွေးခရိုင်ဦးစီးမှူးရုံးအရှေ့ ဝရန်တာ၌ မျက်စိပသာဒဖြစ်စေရန် စိုက်ပျိုးထားသောပန်းအလှပင်များမှာ ကတ္တီပါရွက်လှ (Coleus)၊ လဝန်းဂမုန်း (Plantain Lilier)၊ ကျောက်စိမ်းဂမုန်း  (Zamioculcar Zamiiolia)၊ ဂန္တရားနှင်းဆီ (Aelemium Obesum)၊ ဂျပန်စပယ် (Arabian Jasmine)၊ ရွက်လှ (Garden Crotan)၊ ယုဇန (Java Cola)၊ ရှင်သီဝလိ (Spathiphyllam Wallisii)၊ စီးပွားဂမုန်း (Chinese Evergreen)၊ တောထန်း (Livistona)၊ နွယ်လိမ်ဂမုန်း (Spider Plant)၊ အနက်ဆင်ဂမုန်း (Pin- Stripe Calathea)၊ နဂါးဆက်ဂမုန်း (Dracaena Thifasciata Snake Plant) နှင့် အိမ်တော်မင်္ဂလာ (Aglaonema Crete) ပင်တို့ဖြစ်ကြပြီး ရုံးဝန်းမြောက်ဘက်ရှိ မြေလွတ်နေရာများ၌ ဝန်ထမ်းများစုပေါင်း၍ သီးပင်စားပင်များစိုက်ပျိုးခြင်းဖြင့် ဝန်ထမ်းများစုပေါင်းလုပ်ကိုင်လိုစိတ် (Team Work) ဖြစ်စေခြင်း၊ ထွက်ရှိလာသောအသီးအရွက်တို့ကို အလွယ်တကူခူးဆွတ်စားနိုင်ပြီး ကုန်စျေးနှုန်းကြီးမြင့်မှုအပေါ် နေ့စဉ် စားသောက်စရိတ်အတွက် စျေးဖိုးကာမိသည့်အပြင် မိမိတို့စိုက်ပျိုးသည့်အပင်များမှ လတ်လတ်ဆတ်ဆတ်ခူးစားရသောကြောင့် ပိုးသတ်ဆေးအန္တရာယ်ကင်းရှင်းခြင်း၊ ကျန်းမာခြင်း၊ ဝန်ထမ်းသက်သာထောက်ပံ့ရေးအတွက်လည်း အထောက်အကူပြုနိုင်မည်ဖြစ်ကြောင်း ရေးသားတင်ပြလိုက်ရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၊ ခရိုင်ဦးစီးမှူးတို့၏ လမ်းညွှန်မှုဖြင့်  ကန့်ဘလူမြို့နယ်တာဝန်ခံ ဦးမျိုးဝင်းသန်း(ဒု-ဦးစီးမှူး) နှင့် ဒေါ်ဝေဝေအောင်(အကြီးတန်းစာရေး)တို့သည် (၁၉-၁၀-၂၀၂၃)ရက်နေ့၊ နံနက် (၁၀:၀၀)နာရီအချိန်တွင်  ကန့်ဘလူမြို့၊ အမှတ်(၂)ရပ်ကွက်ရှိ စားသုံးသူပြည်သူများအား စားသုံးသူအကာအကွယ်ရေးအသိပညာပေးဟောပြောခဲ့ပါသည်။

 အဆိုပါ အမှတ်(၂)ရပ်ကွက်အတွင်းရှိ စားသုံးသူပြည်သူများအား ကန့်ဘလူမြို့နယ်တာဝန်ခံ ဦးမျိုးဝင်းသန်းက စာသုံးသူရေးရာဦးစီးဌာနဖြစ်ပေါ်လာပုံ၊ စားသုံးသူရေးရာဦးစီးဌာန၏မျှော်မှန်းချက်၊ ရည်မှန်းချက်၊ စားသုံးသူအကာကွယ်ပေးရေးဥပဒေပါ စားသုံးသူ၏အဓိပ္ပါယ်ဖွင့်ဆိုချက်များအကြောင်းကိုရှင်းလင်းခဲ့ပြီး ဒေါ်ဝေဝေအောင်က စားသုံးသူအခွင့်အရေး(၈)ချက်နှင့် စားသုံးသူတို့၏တာဝန်များ၊  ဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြ၍  ထုတ်လုပ်ဖြန့်ဖြူးသည့် ကုန်ပစ္စည်းများကိုသာ ဝယ်ယူသုံးစွဲကြရန်နှင့်  စားသုံးသူနစ်နာဆုံးရှုံးမှုရှိလျှင် တိုင်ကြားနိုင်ပါကြောင်း၊ တိုင်ကြားနိုင်သည့်နေရာများဖြစ်သည့် Facebook Page တွင်လည်းကောင်း၊ DOCA Myanmar Page တွင်လည်းကောင်း၊ မိမိတို့ဌာနခရိုင်ဦးစီးမှူးရုံး၊ စားသုံးသူသတင်းပြန်ကြားရေးနှင့်စားသုံးသူတိုင်ကြားမှုလက်ခံဆောင်ရွက်ရေးစင်တာ (CICC) တွင်လည်းကောင်း၊ မိမိတို့ဌာန၏ Website  ဖြစ်သည့် www. doca. gov. mm တွင်လည်းကောင်း၊ MPT ; mytel ;  Telenor ;  Oredoo  ; SIM Card များဖြင့်လည်း Call Center No. (1535) တို့တွင် တိုင်ကြားနိုင်ပါကြောင်းတို့ကို ကန့်ဘလူမြို့၊ အမှတ်(၂)ရပ်ကွက်အတွင်းရှိ စားသုံးသူပြည်သူ(၅)ဦးတို့အား အကျယ်တဝင့်ရှင်းလင်းပြောကြားခဲ့ပြီးနောက် စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ တောင်ငူခရိုင်၊ တောင်ငူမြို့နယ်တာဝန်ခံ ဦးမြင့်သူသည် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ စိုက်ပျိုးရေးဦးစီးဌာနတို့မှ တာဝန်ရှိသူများနှင့် ပူးပေါင်း၍ ၂၀၂၃ခုနှစ်၊ အောက်တိုဘာလ ၁၇ရက်နေ့၊ နေ့လယ်ပိုင်းတွင် တောင်ငူမြို့နယ်၊ ပဲချက်ကုန်းကျေးရွာ၊ ဘုန်းတော်ကြီးကျောင်း၌ ပဲချက်ကုန်းကျေးရွာရှိ တောင်သူလယ်သမားများနှင့် မိသားစုဝင်များအားတွေ့ဆုံ၍ အသိပညာပေးဟောပြောခဲ့ပါသည်။

    အဆိုပါဟောပြောပွဲတွင် မြို့နယ်တာဝန်ခံက စားသုံးသူအခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုမဖြစ်စေရေးအတွက် စစ်ဆေးရေးအရာရှိများခန့်အပ်၍ ဈေးကွက်စောင့် ကြည့်ဆောင်ရွက်နေမှုများ၊ စားသုံးသူနစ်နာဆုံးရှုံးမှုများအတွက် တိုင်ကြားလာမှုများကို ဖြေရှင်းဆောင်ရွက်ပေးနေမှုများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်ပုံနှင့် ကုန်အညွန်းအမှတ်အသားအတိုင်း လိုက်နာသုံးစွဲသင့်ပုံများကို ဟောပြောဆွေးနွေးခဲ့ပါသည်။

    ထို့အတူ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ မြို့နယ်ဦးစီးမှူး ဦးမျိုးသန့်နှင့် စိုက်ပျိုးရေးဦးစီးဌာန၊ ဒုတိယဦးစီးမှူး ဦးခန့်ထည်တို့ကလည်း သက်ဆိုင်ရာဌာနများအလိုက် ကျေးရွာနေပြည်သူများသိသင့်သိထိုက်သည်များကို အသိပညာပေးဟောပြောခဲ့ကြောင်းနှင့် ဟောပြောပွဲသို့ ကျေးရွာနေတောင်သူလယ်သမားကြီးများနှင့် မိသားစုဝင် ၂၄ဦးတက်ရောက်ခဲ့ကြကြောင်းသိရပါသည်။      

DOCA(ပဲခူး)            

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် (၁၂-၁၀-၂၀၂၃) ရက်နေ့၊ နံနက်(၁၀:၀၀)နာရီအချိန်တွင် ပခုက္ကူခရိုင်၊ ပခုက္ကူမြို့၊ အထွေထွေအုပ်ချုပ်ရေးဦးစီးဌာနရှိ အစည်းအဝေးခန်းမ၌ ခရိုင်စီမံအုပ်ချုပ်ရေးအဖွဲ့ဥက္ကဋ္ဌဦးဆောင်၍ ဌာနဆိုင်ရာများ၊ ဆီကုန်သည်နှင့်ဆီလုပ်ငန်းရှင်(၂၀)ဦးတက်ရောက်ခဲ့ပြီး ခရိုင်ဆီကုန်သည်နှင့်ဆီလုပ်ငန်းရှင်အသင်းပြန်လည်ဖွဲ့စည်းနိုင်ရေး ညှိနှိုင်းဆွေးနွေးခဲ့ကြပါသည်။

    ခရိုင်စီမံအုပ်ချုပ်ရေးမှူးက အဖွင့်အမှာစကားပြောကြားပြီးနောက် ယခင်ဖွဲ့စည်းထားသော ခရိုင်ဆီလုပ်ငန်းရှင်အသင်းအဖွဲ့မှာ ကျန်းမာရေးမကောင်းသဖြင့် နှုတ်ထွက်သွားသူများနှင့် ယခင်ခရိုင်ဥက္ကဋ္ဌမှာလည်း သေဆုံးသွားခြင်း၊ အသင်းဝင်တချို့မှာလည်း မြို့ပေါ်တွင်မရှိခြင်းတို့ကြောင့် ခရိုင်အသင်းတို့ကိုပြန်လည်ဖွဲ့စည်းရန်လိုကြောင်း၊ ယခုတက်ရောက်လာသော ဆီလုပ်ငန်းရှင်များအနေဖြင့် ခိုင်မာသောဆီလုပ်ငန်းရှင်များအသင်းပြန်လည်ဖွဲ့စည်းရာတွင် အမှန်တကယ်ဦးဆောင်ဦးရွက်ပြုလုပ်နိုင်မည့် ဆီကုန်သည်များကိုရွေးထုတ်၍ ခိုင်မာအားကောင်းသော ဆီလုပ်ငန်းရှင်များအသင်းတစ်ခုဖြစ်ပေါ်စေရန် ဝိုင်းဝန်းပူပေါင်းဆောင်ရွက်ပေးကြပါရန် ပြောကြားခဲ့ပါသည်။

      ဆက်လက်၍ စားသုံးသူရေးရားဦးစီးဌာန၊ ပခုက္ကူခရိုင်ဦးစီးမှူးက အသင်းအဖွဲ့များ အားကောင်းလာစေရန်အတွက် စနစ်တကျရွေးချယ်ဖွဲ့စည်းလိုကြောင်း၊ မိမိမြို့နယ်ဖွံ့ဖြိုးတိုးတက်စေရန် ဒေသခံများဖြစ်သည့် လုပ်ငန်းရှင်များအနေဖြင့် ဝိုင်းဝန်းပူးပေါင်းဆောင်ရွက်စေလိုကြောင်းနှင့် စီးပွား‌ရေးကျင့်ဝတ်နှင့်အညီ ဆောင်ရွက်ကြရန်လိုအပ်ကြောင်း၊ တစ်ဦးတစ်ယောက်ချင်းဆောင်ရွက်သည်ထက် အသင်းအဖွဲ့နှင့်ပူးပေါင်းဆောင်ရွက်ပါက ပိုမိုထိရောက်အောင်မြင်ပါကြောင်းပြောကြားခဲ့ပြီး ခရိုင်ဆီကုန်သည်နှင့်ဆီလုပ်ငန်းရှင်များအသင်းကို ယာယီပြန်လည်ဖွဲ့စည်းနိုင်ရေး တက်ရောက်လာသည့် ဆီလုပ်ငန်းရှင်များက ညှိနှိုင်းပေါင်းစပ်ဆောင်ရွက်ခဲ့ကြောင်းသိရှိရပါသည်။

DOCA(မကွေး)