HighLight News

          ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ လုပ်ငန်းဆောင်တာများ ထိရောက်စွာဆောင်ရွက်သွားနိုင်ရန်နှင့် တရားမဝင်ကုန်သွယ်မှုတိုက်ဖျက်ရေးဆိုင်ရာ လုပ်ငန်းကျွမ်းကျင်မှု စွမ်းဆောင်ရည်မြှင့်တင်ရေးသင်တန်းများတွင် ဌာနဆိုင်ရာကိုယ်စားပြု သင်တန်းသားများ တက်ရောက်နိုင်ရေးအတွက် ရည်ရွယ်၍ ‌ဧပြီလ (၂၂)ရက် နေ့လည်(၁၅:၀၀) နာရီအချိန်တွင် ပဲခူးတိုင်းဒေသကြီး အစိုးရအဖွဲ့ရုံး၊ တော်ဝင်ဟံသာ အစည်းအဝေးခန်းမ၌ တရားမဝင်ကုန်သွယ်မှု တိုက်ဖျက်ရေးအထူးအဖွဲ့ တွေ့ဆုံ ဆွေးနွေးပွဲ ကျင်းပပြုလုပ်ခဲ့ပါသည်။

         အဆိုပါ အစည်းအဝေးသို့  ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေး အထူးအဖွဲ့၊ ဉက္ကဌ ၊ ဒုဥက္ကဌ  ၊ တွဲဖက်အတွင်းရေးမှူးများနှင့် အဖွဲ့ဝင်များတက်ရောက်ခဲ့ကြပါသည်။   အစည်းအဝေးတွင် ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအစီအစဉ်များနှင့် ‌ရှေ့ဆက်လက်ဆောင်ရွက်မည့် အစီအမံများနှင့်ပတ်သက်၍ ဆွေးနွေးခြင်း ၊ တရားမဝင် ကုန်သွယ်မှုတိုက်ဖျက်ရေးဆိုင်ရာ လုပ်ငန်းကျွမ်းကျင်မှု စွမ်းဆောင်ရည်မြှင့်တင်ရေးသင်တန်းများတွင် ဌာနဆိုင်ရာကိုယ်စားပြု သင်တန်းသားများ ရွေးချယ်နိုင်‌ရေးအတွက် ဆွေးနွေးခဲ့ကြပါသည်။

     ပဲခူးတိုင်းဒေသကြီးအနေဖြင့် ၂၀၂၂ခုနှစ်၊ ဇန်နဝါရီလတွင် စိုက်ပျိုးရေးဆေးပစ္စည်း၊ စားသောက်ကုန် ၊ လူသုံးကုန်ပစ္စည်းအား တန်ဖိုးကျပ် (၉၄၄၇၄၀၆၀) ကိုလည်းကောင်း ၊ ဖေဖော်ဝါရီလတွင် အင်ဂျင်ဝိုင်ဖာ၊ စားသောက်ကုန်၊ လူသုံးကုန်ပစ္စည်းများအားတန်ဖိုးကျပ် (၆၄၃၀၂၄၃၄) ကိုလည်းကောင်း၊ မတ်လတွင် မော်တော်ယာဉ်နှင့်စားသောက်ကုန်များအားတန်ဖိုးကျပ် (၂၂၁၅၂၈၇၇၇) ကိုလည်းကောင်း၊ ဧပြီလ ၁ရက်နေ့မှ ၂၁ရက်နေ့ထိ မော်တော်ယာဉ်နှင့်စားသောက်ကုန်များအား တန်ဖိုးကျပ် (၉၅၇၂၆၈၅၂) ကိုလည်းကောင်း၊ စုစုပေါင်း တန်ဖိုးကျပ် (၄၇၆၀၃၂၁၂၃)ကို တရားမဝင်ကုန်သွယ်မှုတိုက်ဖျက်ရေး အထူးအဖွဲ့မှ ဖမ်းဆီးရမိခဲ့ပြီး ဖြစ်ပါကြောင်း သတင်းရရှိပါသည်။

DOCA(ပဲခူး)

            ပဲခူးတိုင်းဒေသကြီးအတွင်း စားသုံးသူကာကွယ်ရေးလုပ်ငန်းများနှင့် ပြည်တွင်းကုန်သွယ်ရေးဖွံ့ဖြိုးမှုလုပ်ငန်းများ ဆောင်ရွက်ရာတွင် ပုဂ္ဂလိက ကဏ္ဍဖွံ့ဖြိုးတိုးတက်‌ရေးနှင့် ကုန်သွယ်မှုကဏ္ဍဖွံ့ဖြိုးတိုးတက်ရေးတို့အတွက် အရှိန်အဟုန်မြှင့် တွန်းအားပေးဆောင်ရွက်လျက်ရှိပါသည်။ ယင်းသို့ဆောင်ရွက်ရာတွင် သက်ဆိုင်ရာ ကဏ္ဍအလိုက် အသင်းအဖွဲ့များနှင့် ချိတ်ဆက်ဆောင်ရွက်လျက်ရှိရာ အသင်းအဖွဲ့များစုစည်းမှု ခိုင်မာအားကောင်းရန် လိုအပ်လျက်ရှိကြောင်း သိရှိရပါသည်။

          မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် ( UMFCCI) အသင်းခွဲများ ဖြစ်သော  ပဲခူးတိုင်းဒေသကြီး ကုန်သည်များနှင့်  စက်မှုလုပ်မှုလုပ်ငန်းရှင်အသင်းအား ၁၉၉၈ ခုနှစ်တွင် ပဲခူး(အရှေ့) အား စတင်ဖွဲ့စည်းခဲ့ပြီး ၂၀၀၀ ပြည့်နှစ်တွင် ပဲခူး(အနောက်) ကိုဖွဲ့စည်းခဲ့ပါသည်။ ပဲခူးတိုင်း ဒေသကြီး ကုန်သည်များနှင့်  စက်မှုလုပ်မှုလုပ်ငန်းရှင်အသင်းတွင် ၃နှစ် ၁ကြိမ် အသင်းသားပုံမှန် အစည်း အဝေး နှင့် နှစ်ပတ်လည်အစည်းအဝေးများ ကျင်းပပြုလုပ်လျက်ရှိပြီး ယခုအချိန်တွင် ပဲခူးတိုင်း‌ဒေသကြီး ကုန်သည်များနှင့်စက်မှုလက်မှု လုပ်ငန်းရှင်များအသင်း (အရှေ့ ၊ အနောက်) အလုပ်အမှုဆောင်အဖွဲ့တွင် ကွယ်လွန်သွားသူများ ၊ အသက်အရွယ်အရ ကျန်းမာရေး ချို့ယွင်းလာသူများရှိသည့်အတွက် သက်ဆိုင်ရာဌာနများ ၊ ညီနောင်အသင်းတို့နှင့် ပူးပေါင်းပါဝင်ဆောင်ရွက်ရာတွင် အားနည်းလျက်ရှိကြောင်းသိရှိရပါသည်။ အသင်းအဖွဲ့များ၏ ဆက်သွယ်မှုအားကောင်းစေရေး၊ ကုန်သွယ်မှုဆိုင်ရာအခက်အခဲများနှင့် လိုအပ်ချက်များကို ဖြည့်ဆည်းပေးနိုင်‌ရေးအတွက် ပဲခူးတိုင်းဒေသကြီး ကုန်သည်များနှင့်  စက်မှုလုပ်မှုလုပ်ငန်းရှင်အသင်းကို ပြန်လည်ပြင်ဆင်ဖွဲ့စည်းနိုင်‌ရေး ပဲခူးတိုင်းဒေသကြီး စားသုံးသူရေးရာဦးစီးဌာနမှ ကြိုးပမ်းဆောင်ရွက်လျက်ရှိကြောင်း သိရှိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုအရ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍  ဒု-ခရိုင်ဦးစီးမှူး ဒေါ်မွန်မွန်စိုးနှင့် ဝန်ထမ်းများအဖွဲ့သည် ဧပြီလ (၂၂)ရက်နေ့၊ နံနက်(၁၀:၀၀)အချိန်တွင် ပခုက္ကူမြို့ပေါ်ရှိ စားသုံးဆီ ရောင်းချနေသော လုပ်ငန်းရှင်များနှင့် တွေ့ဆုံ၍ ဟင်းသီးဟင်းရွက်ဆီများတွင် ကုန်အညွှန်အမှတ် အသားပြည့်စုံစွာ ဖော်ပြလာရေးအသိပညာပေး ဆွေးနွေးခဲ့ပါသည်။

ခရိုင်ဦးစီးမှူးမှ လုပ်ငန်းရှင်များအား ဆွေးနွေးရာတွင် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနမှ ညွှန်ကြားချက်အမှတ် (၁/၂၀၂၁)အရ ဟင်းသီးဟင်းရွက်ဆီ(Vegetable Oil, Cooking Oil )နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် ပင်ရင်းပါဝင်ပစ္စည်းကို အခြေခံသော ကုန်စည်၏ အမျိုးအစားကို တိကျစွာမြန်မာဘာသာဖြင့်ဖော်ပြရန် (ဥပမာ-ဟင်းသီးဟင်းရွက်ဆီ၊ စားအုန်းဆီ)၊ ဟင်းသီးဟင်းရွက်ဆီ (အဆင့်မြင့်စားအုန်းဆီ)အပြင် ကုန်စည်၏ အသားတင်ပမာဏ နှင့်အရွယ်အစားတို့အား မြန်မာအလေးချိန်ယူနစ်ဖြစ်သော ပိဿာ၊ ကျပ်သားဖြင့်ဖော်ပြရန်၊ ညွှန်ကြားချက်ကို (၂၀.၁၂.၂၀၂၁)တွင် ထုတ်ပြန်ခဲ့ပြီးဖြစ်ရာ (၆)လပြည့်မြောက်သည့်နေ့မှစ၍ အရေးယူဆောင်ရွက်တော့မည်ဖြစ်သောကြောင့် ပြည့်စုံစွာဆောင်ရွက်ထားရန် လိုအပ်ကြောင်း၊ အချင်အတွယ်ဖြင့် ရောင်းချသော ဆီဆိုင်များအနေဖြင့်လည်း အလေးချိန်များ မှန်ကန်စွာ ရောင်းချ စေလိုကြောင်း၊ စားအုန်းဆီနှင့်အခြားဆီများ ရောစပ်ရောင်းချနေလျှင်လည်း ရောနှောမှုအချိုးအဆ ကို ပွင့်လင်းမြင်သာစွာ ရောင်းချစေလိုကြောင်း အသေးစိတ်ဆွေးနွေးခဲ့ပါသည်။

ဒု-ခရိုင်ဦးစီးမှူးမှ ဆွေးနွေးရာတွင် စားသုံးသူကာကွယ်ရေးဥပဒေပါ စီးပွားရေးလုပ်ငန်း ရှင်၏တာဝန်များ၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်(၂/၂၀၁၉)ပါ ကုန်စည် အုပ်စု(က)ရှိ စားသုံးဆီအမျိုးမျိုးတွင် မြန်မာဘာသာဖြင့် ထည့်သွင်းရမည့် အချက်များ၊ ကုန်အညွှန်းအမှတ် အသားဖော်ပြခြင်းနှင့် ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေး နည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များ အကြောင်းသိရှိလိုက်နာ စေရန် ဆွေးနွေးခဲ့ပါသည်။

စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ ဆွေးနွေးရာတွင်  လုပ်ငန်းရှင်များ အနေဖြင့် ကုန်စည်၏ အရည်အသွေးအချင်အတွယ်ပမာဏနှင့် အလေးချိန်မှန်ကန်မှုရှိစေရန် လိုအပ်ကြောင်း၊ စားသုံးသူပြည်သူများအနေဖြင့် စားသုံးဆီမှာ အခြေခံစားသောက်ကုန်ဖြစ်၍ မိမိတို့ထုတ်လုပ်ဖြန့်ဖြူးရောင်းချသော စားသုံးဆီများအား အရည်အသွေးကိုအဓိကထား၍ ထင်ယောင်ထင်မှားမဖြစ်စေရန် ရောင်းချစေလိုကြောင်း ဆွေးနွေးခဲ့ပြီး လုပ်ငန်းရှင်များအား (၂၀.၁၂.၂၀၂၁)ရက်နေ့တွင် ထုတ်ပြန်ခဲ့သည့် ညွှန်ကြားချက်အမှတ်(၁/၂၀၂၁)နှင့် မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်သည့် ညွှန်ကြားချက်အမှတ် (၂/၂၀၁၉) လက်ကမ်း စာစောင်များအား ဖြန့်ဝေခဲ့ပါသည်။

DOCA(မကွေး)

            စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် မကွေးခရိုင်၊ ချောက်မြို့နယ်ဦးစီးမှူး ဒေါ်မြတ်မြတ်မိုးနှင့် ဒေါ်ချိုဝေလွင်(ဒု-ဦးစီးမှူး)တို့သည် စားသုံးသူများ ဈေးကွက်အတွင်း အရည်အသွေး အာမခံချက်ရှိသည့် ကုန်ပစ္စည်းများ ရွေးချယ်ဝယ်ယူနိုင်ရေးနှင့် ကုန်ပစ္စည်း အတုအပကင်းစင်ရေး ဘေးကင်းလုံခြုံစွာသုံးစွဲနိုင်ရေးရည်ရွယ်၍ (၂၀.၄.၂၀၂၂)ရက်နေ့ နံနက်(၁၀:၀၀)နာရီမှ (၁၁:၀၀)နာရီထိ ချောက်မြို့ပေါ်ရှိ စက်ဆီ/ချောဆီ လက်လီ/လက်ကားဖြန့်ဖြူးရောင်းချသော အရောင်းဆိုင် (၈)ဆိုင်အား စျေးကွက်စောင့်ကြည့်စစ်ဆေးခဲ့ပါသည်။

            ထိုသို့ဆောင်ရွက်ရာတွင် စက်ဆီ/ချောဆီဖြန့်ဖြူးရောင်းချသော လုပ်ငန်းရှင်များအနေဖြင့် အရည်အသွေးအာမခံချက်ရှိသော ကုန်ပစ္စည်းများ၊ လျှပ်စစ်နှင့်စွမ်းအင်ဝန်ကြီးဌာန၊ ရေနံထွက်ပစ္စည်း ကြီးကြပ်စစ်ဆေးရေးဦးစီးဌာန(PPRD)မှ တရားဝင်ခွင့်ပြုထားသော ကုန်ပစ္စည်းများကိုသာ ဖြန့်ဖြူးရောင်းချ ရန်၊ တရားမဝင်လုပ်ငန်းလိုင်စင်မရှိဘဲ စျေးကွက်အတွင်း အရည်အသွေးနိမ့် စက်ဆီ/ ချောဆီများ ရောင်းချခြင်းဖြင့် နိုင်ငံတော်အတွက်  အခွန်အခများနစ်နာခြင်း၊ စားသုံးသူများ၏ စက်ပစ္စည်းများ၊ အချိန်မတိုင်မှီ ပျက်စီးမှုများဖြစ်ပေါ်စေသောကြောင့် စက်ဆီ/ချောဆီအတုအပများအား ဆိုင်တင်ရောင်းချခြင်း မပြုလုပ်ကြရန်နှင့် တရားမဝင်စက်ဆီ/ချောဆီစျေးကွက်အတွင်း ဖြန့်ဖြူးရောင်းချနေခြင်းအား စစ်ဆေးတွေ့ရှိပါက ဥပဒေအရ အရေးယူဆောင်ရွက်သွားမည်ဖြစ်ကြောင်းကို အသိပညာပေးဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ပါသည်။

            ယခုကဲ့သို့ဈေးကွက်စောင့်ကြည့်စစ်ဆေးခြင်းလုပ်ငန်းများကို စဉ်ဆက်မပြတ်ဆောင်ရွက်ပေးခြင်းဖြင့် စားသုံးသူပြည်သူများ အရည်အသွေးပြည့်မှီ၍ ဘေးကင်းလုံခြုံမှုရှိသော ကုန်စည်များအား ရွေးချယ်ဝယ်ယူနိုင်သည့် အခွင့်အလမ်းများ ပိုမိုရရှိလာစေမည့်ဖြစ်ပါသည်။

DOCA(မကွေး)

             ပဲခူးတိုင်းဒေသကြီးအတွင်းရှိ ဆီလုပ်ငန်းရှင်များမှ စားအုန်းဆီများ ဖြန့်ဖြူးရောင်းချပေးလျှက်ရှိပြီး စားအုန်းဆီများအား စားသုံးသူများ ၊ စားသောက်ဆိုင်များ ၊ ပဲကြော် ၊ အာလူးကြော်စသည့် အကြော်မျိုးစုံ လုပ်ငန်းများနှင့် မုန့်ဖုတ်လုပ်ငန်းများမှ ဝယ်ယူအသုံးပြုလျက်ရှိပါသည်။ စားအုန်းဆီ သုံးစွဲမှုအနေဖြင့် စားသုံးသူများ နေ့စဉ်ကြော်လှော်ချက်ပြုတ်ခြင်းနှင့် စားသောက်ဆိုင်များတွင် အသုံးပြုခြင်း ဖြင့် ပိဿာချိန် (၁၄၅၂၀၀၀) ခန့် ၊ စုစုပေါင်းသုံးစွဲမှု၏ ၅၀ % ရှိပြီး ပဲကြော် ၊ အာလူးကြော်၊ အကြော်မျိုးစုံ လုပ်ငန်းများတွင် ပိဿာချိန် (၄၃၅၆၀၀) ခန့် ၊ စုစုပေါင်း သုံးစွဲမှု၏ ၁၅ %ရှိပြီး မွန်ပြည်နယ်နှင့် ကရင်ပြည်နယ်များသို့လည်း ထပ်ဆင့်ရောင်းချမှုများ ပြုလုပ်ကြောင်း သိရှိရပါသည်။  

          စားအုန်းဆီသည် ကြော်လှော်ချက်ပြုတ် စားသောက်ရာတွင် အသုံးခံသည့် အခြေအနေများကြောင့် အခြေခံလူတန်းစားလူဦးရေ၏ ၄၀ %ခန့်မှာ စားအုန်းဆီသုံးစွဲပြီး အကြော်စုံလုပ်ငန်းများမှ အသုံးပြုပြီး ထွက်ရှိလာသော ဆီပမာဏ၏ ၅၀ % မှ ၇၀ %ခန့်ကို ဆပ်ပြာထုတ်လုပ်ရန်အတွက် ဒေသတွင်းနှင့် အခြားပြည်နယ်/ တိုင်းရှိ ဆပ်ပြာစက်ရုံများသို့  ရောင်းချလျှက်ရှိကြောင်း သိရှိရပါသည်။

DOCA(ပဲခူး)