HighLight News

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့် စားသုံးရေးရာဦးစီးဌာန၏လုပ်ငန်းညှိနှိုင်းအစည်းအဝေးသို့ တက်ရောက်အမှာစကားပြောကြား

နေပြည်တော်၊ စက်တင်ဘာ ၁၂ ၂၀၂၀ ပြည့်နှစ်၊ စက်တင်ဘာလ ၁၂ ရက်နေ့၊ (၁၀:၀၀)နာရီ အချိန်တွင် ရုံးအမှတ်(၅၂)၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စုပေါင်းအစည်းအဝေး ခန်းမ၌ Zoom Application ဖြင့် ကျင်းပပြုလုပ်သော စားသုံးသူရေးရာဦးစီးဌာန၏ လုပ်ငန်းညှိနှိုင်း အစည်းအဝေးသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့် တက်ရောက်အမှာစကားပြောသည်။

ပြည်ထောင်စုဝန်ကြီးကအမှာစကားပြောကြားရာတွင် COVID-19 ကြောင့် မိမိတို့၏ လုပ်ငန်းများဆောင်ရွက်ရာတွင် ကျန်းမာရေးနှင့်အားကစားဝန်ကြီးဌာန၏ ညွှန်ကြားချက်နှင့်အညီ လိုက်နာဆောင်ရွက်ရမှာဖြစ်သည့်အပြင် တစ်ဦးချင်းအနေနဲ့လည်းလိုက်နာဆောင်ရွက်ရမှာဖြစ်ကြောင်း၊ မလိုအပ်ဘဲအပြင်မထွက်ရန်လိုအပ်ကြောင်း၊ တာဝန်အရထွက်ရပါကလည်း ကျန်းမာရေး နှင့် အားကစားဝန်ကြီးဌာနလမ်းညွှန်ချက်များနှင့် အညီလိုက်နာဆောင်ရွက်ရန်ဖြစ်ကြောင်း၊ စားသုံးသူရေးရာဦးစီးဌာနအနေဖြင့် မိမိဌာန၏ လုပ်ငန်းတာဝန်များအပြင် တိုင်းဒေသကြီးအစိုးရအဖွဲ့များ၏ လုပ်ငန်းများတွင်လည်းပူးပေါင်းဆောင်ရွက်ပေးသွားရန်ဖြစ်ကြောင်း၊ COVID-19 ရောဂါ ကူးစက်မှုနှုန်းမြင့်မားလာတဲ့အတွက် လူဝင်/ထွက်မှုအား ကန့်သတ်တားဆီးမှုများရှိသည့်အတွက် ကုန်ပစ္စည်းပြတ်လပ်မှု၊ ကုန်ဈေးနှုန်းကြီးမြင့်မှုများဖြစ်လာနိုင်ကြောင်း၊ စားသုံးသူရေးရာဦးစီးဌာန အနေနှင့် အခြေခံစားသောက်ကုန်များ၊ ဆေးဝါးနှင့်ကျန်းမာရေးသုံးပစ္စည်းများအား ဖြစ်သင့်သည့် ဈေးထက်မြင့်တက်ရောင်းချမှုများကိုလည်း စစ်ဆေးဆောင်ရွက်ရမှာဖြစ်ကြောင်းနှင့် စစ်ဆေးဆောင်ရွက်ရာတွင် သက်ဆိုင်ရာဌာနများနှင့် ပူးပေါင်းဆေင်ရွက်သွားရမှာဖြစ်ကြောင်း၊

ဝန်ကြီးဌာနအနေဖြင့် အရေးပေါ်ရိက္ခာ၊ ဆန်နှင့်ဆီ ဝယ်ယူသိုလှောင်ခြင်းလုပ်ငန်းများကို ဆောင်ရွက်ခဲ့ကြောင်း၊ ဝန်ထမ်းများအနေဖြင့် ဌာန၏လုပ်ငန်းတာဝန်များအပြင် တိုင်းဒေသကြီး/ ပြည်နယ်အစိုးရအဖွဲ့များ၏ လုပ်ငန်းများတွင်ပူးပေါင်းဆောင်ရွက်ရာတွင် ကျန်းမာရေးနှင့်အားကစားဝန်ကြီးဌာန၏ လမ်းညွှန်ချက်များနှင့်အညီလိုက်နာဆောင်ရွက်ရန်လိုအပ်ပါကြောင်း၊

ရုံးချုပ်အနေနဲ့လည်းလုပ်ငန်းများကိုပုံမှန်ဆောင်ရွက်လျက်ရှိကြောင်း၊ ဆွေးနွေးပွဲများကို Online မှ ဆောင်ရွက်လျက်ရှိကြောင်း၊ Online မှ ညှိနှိုင်းဆောင်ရွက်မှု့များသည် COVID-19 ကပေးတဲ့ New Normal အခြေအနေဖြစ်ပါကြောင်း၊ လုပ်ငန်းများကို New Normal အရ အရှိန် အဟုန်မပျက်ဆောင်ရွက်ရမှာဖြစ်ကြောင်းလမ်းညွှန်မှာကြားခဲ့ပါသည်။

ယင်းနောက် ဒုတိယဝန်ကြီးက စားသုံးသူအကာအကွယ်ပေးရေးလုပ်ငန်းများ၊ စားသုံးသူ သက်သာချောင်ချိရေးလုပ်ငန်းများ၊ အရေးပေါ်ရိက္ခာဆန်နှင့် ဆီသိုလှောင်မှုအခြေအနေများ၊ တောင်သူ လယ်သမားအခွင့်အရေးကာကွယ်ရေးနှင့် အကျိုးစီးပွားမြှင့်တင်ရေးဥပဒေအရ လယ်ယာထွက်ကုန် စီမံခန့်ခွဲရေးအဖွဲ့မှ ဆန်စပါးဝယ်ယူသိုလှောင်မှုအခြေအနေများ၊ ကုန်အညွှန်းအမှတ်အသားနှင့် ပတ် သက်ဆောင်ရွက်ရမည့်ကိစ္စရပ်များ၊ ပြည်တွင်းကုန်သွယ်မှုအတွက် ဆောင်ရွက်ရမည့်ကိစ္စရပ်များ၊ ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်းအဖွဲ့များ၊ ကဏ္ဍအလိုက်ဇုန်များ၊ အစုအဖွဲ့များ ဖွဲ့စည်းဆောင်ရွက်သည့်လုပ်ငန်းများ၊ COVID-19 အလွန်တွင် ဆောင်ရွက်ရမည့် လုပ်ငန်းများနှင့် ပတ်သက်၍ ရှင်းလင်းဆွေးနွေးခဲ့ပါသည်။

ထို့နောက် တိုင်းဒေသကြီး/ ပြည်နယ်ဦးစီးမှူးများက မိမိတို့တိုင်းဒေသကြီး/ ပြည်နယ်များတွင် လုပ်ငန်းများဆောင်ရွက်နေမှုများအား အသီးသီးရှင်းလင်းတင်ပြကြပြီး တင်ပြချက်များအပေါ် စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်လွင်မှ ပြန်လည်ဖြည့်စွက်ရှင်းလင်းတင်ပြသည်။

ထို့နောက် ရှင်းလင်းတင်ပြမှုများအပေါ် ဒုတိယဝန်ကြီးက ထပ်မံဖြည့်စွက်ရှင်းလင်းပြီး ပြည်ထောင်စုဝန်ကြီးက နိဂုံးချုပ်စကားပြောကြားကာ အခမ်းအနားကို ရုပ်သိမ်းလိုက်ကြောင်း သတင်းရရှိပါသည်။

ITQM(DOCA)

COVID-19 ကာလအတွင်း Mask များ ရောင်းချခြင်း နှင့် ပတ်သက်၍ လုပ်ငန်းရှင်များ သို့ တိုက်တွန်းနှိုးဆော်ခြင်း

သတင်းနှင့် လှုပ်ရှားမှုများ

စီးပွားရေးလုပ်ငန်းရှင်များသည် COVID-19 ကာလအတွင်း ရောဂါကာကွယ်ရေးအတွက် လိုအပ်သော ပစ္စည်းများ ရောင်းချခြင်းနှင့် ပတ်သက်၍ သက်ဆိုင်ရာဌာနများက ထုတ်ပြန်ထားသည့် ဉပဒေ၊ စည်မျဉ်း၊ စည်းကမ်း၊ အမိန့်၊ ညွှန်ကြားချက်များနှင့်အညီ လိုက်နာ ဆောင်ရွက်ကြရမည် ဖြစ်သည့်အတွက် အရေးကြီး အသုံးများသော Mask များဈေးနှုန်းမြှင့်တင် ရောင်းချခြင်း မပြုရန်နှင့် ပစ္စည်း ပြတ်လပ်မှု မရှိစေ ရေး စီမံဆောင်ရွက်ရန် လိုအပ်ပါသည်။

တစ်ဖက်တွင်လည်း စားသုံးသူရေးရာဦးစီးဌာန အနေဖြင့် ဈေးကွက်အတွင်း အရည်အသွေးမီ Mask များအား သင့်တင့်သည့် ဈေးနှုန်းဖြင့် ဖြန့်ဖြူးပေးနိုင်ရေးအတွက် လုပ်ငန်းရှင်များ၊ အသင်း အဖွဲ့များနှင့် ဆွေးနွေးညှိနှိုင်း၍ တရုတ်နိုင်ငံ FDA အသိအမှတ်ပြု Mask များစွာ ဝယ်ယူတင်သွင်း ဖြန့်ဖြူးနိုင်ရန် စီစဉ်ဆောင်ရွက်လျက် ရှိပါသည်။ လုပ်ငန်းရှင်များအနေဖြင့် မိမိတို့နိုင်ငံ အရေးကြုံ လိုအပ်နေသော အချိန် တွင် တည်ငြိမ်သော ဈေးနှုန်းများဖြင့် တင်သွင်း၊ ထုတ်လုပ်၊ ဖြန့်ဖြူးရန် လိုအပ်ပါသဖြင့် အောက် ဖော်ပြပါ အချက်များကို လိုက်နာ ဆောင်ရွက်ကြရန် တိုက်တွန်း နှိုးဆော်အပ်ပါသည်-

(က) ဈေးကွက်အတွင်း ကုန်စည် ဝယ်လိုအား များပြားလာမှုကို အခွင့်ကောင်းယူ၍ မလျော်ကန် သော ဈေးနှုန်းများဖြင့် မြှင့်တင်ရောင်းချခြင်း မပြုရန်၊

(ခ) စံချိန်၊ စံညွှန်းနှင့် အရည်အသွေး မမီသော၊ လုံခြုံစိတ်ချရမှု မရှိသော Mask များကို ဈေးကွက် အတွင်း ဖြန့်ဖြူးရောင်းချခြင်း မပြုရန်၊

(ဂ) ဈေးနှုန်းမြှင့်တင် ဖြန့်ဖြူးရန် သို့မဟုတ် ဈေးကစားရန် ရည်ရွယ်ချက်ဖြင့် ကုန်စည် သိုလှောင် ခြင်းများ မပြုလုပ်ရန်၊

(ဃ) ကုန်စည် ပြတ်လပ်မှု မရှိစေရန်အတွက် ပုံမှန်တင်သွင်းခြင်း၊ ပုံမှန်ထုတ်လုပ်ခြင်း နှင့် ဖြန့်ဖြူး ရောင်းချခြင်းများ ဆောင်ရွက်ရန်၊

(င) Mask များအား လက်ကားဖြန့်ချိရာတွင် ဈေးနှုန်းနှင့်အရည်အသွေး မှန်ကန်စွာဖြင့် ဖြန့်ဖြူး ရောင်းချရန်၊

(စ) လုပ်ငန်းရှင်များအနေဖြင့် Mask များ ထုတ်လုပ်၊ ဖြန့်ဖြူး၊ ရောင်းချ၊ သိုလှောင်မှုများ နှင့်ပတ်သက်၍ ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ လိုက်နာဆောင်ရွက် မှုမရှိပါက အရေးကြီးကုန်စည်နှင့် ဝန်ဆောင်မှု ဉပေဒ ပုဒ်မ ၁၁၊ ပုဒ်မခွဲ (ခ) အရ အရေးယူ သွားမည်ဖြစ်ပါကြောင်း နှင့် စားသုံးသူများ နစ်နာမှု မရှိစေရေး၊ မိမိတို့၏ လုပ်ငန်းများ ရေရှည် လည်ပတ်ဆောင်ရွက်သွားနိုင်ရေးတို့အတွက် စားသုံးသူ ကာကွယ်ရေး ဉပဒေ အခန်း (၁၀)၊ ပုဒ်မ ၂၁ နှင့်အညီ လုပ်ငန်းများအား မှန်မှန်ကန်ကန် ဆောင်ရွက်ကြရန်။

စားသုံးသူရေးရာဦးစီးဌာန

စားသုံးသူပြည်သူများသို့ အစီရင်ခံ တင်ပြချက်

သတင်းနှင့် လှုပ်ရှားမှုများ

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများ ကုန်စည်နှင့်ဝန်ဆောင်မှုများ ဝယ်ယူအသုံးပြုရာတွင် စားသုံးသူအခွင့်အရေးများ နစ်နာဆုံးရှုံးမှုများနှင့်ပတ်သက်၍ တိုင်ကြားမှုများကို လက်ခံဆောင်ရွက် ဖြေရှင်းပေးလျှက် ရှိပါသည်။စားသုံးသူရေးရာဦးစီးဌာန အနေဖြင့် ၂၀၁၉ ခုနှစ် အောက်တိုဘာ လ မှ ၂၀၂၀ ခုနှစ် ဇူလိုင် လ ထိ ငွေကြေးဝန်ဆောင်မှုများနှင့်ပါတ်သက်သည့် နစ်နာဆုံးရှုံးမှုများအပေါ် တိုင်ကြားမှု ( ၁၀၀ ) မှုကို လက်ခံဖြေရှင်း ဆောင်ရွက်ပေးနိုင်ခဲ့ပါသည်။

ထို့ပြင် နစ်နာဆုံးရှုံးမှုဖြစ်ပွားရသည့် အကြောင်းအရင်းများကို စုစည်းသုံးသပ်၍ ငွေကြေး ဝန်ဆောင်မှုဆိုင်ရာ နစ်နာဆုံးရှုံးမှုများ မဖြစ်ပွားစေရေး ငွေကြေးဝန်ဆောင်မှုများ ဆောင် ရွက်လျှက်ရှိသည့် လုပ်ငန်းများအပေါ် စစ်ဆေးကြီးကြပ်နိုင်ရေး သက်ဆိုင်ရာဌာန အဖွဲ့ အစည်းများနှင့် ညှိနှိုင်းဆောင်ရွက်လျှက် ရှိပါသည်။

ထိုသို့ ညှိနှိုင်းဆောင်ရွက်မှုအရ Digital Online စနစ်ဖြင့် ငွေကြေးဝန်ဆောင်မှု ဆောင်ရွက်နေသည့် လုပ်ငန်းများအား အောက်ပါအတိုင်း လိုက်နာ ဆောင်ရွက်သွားရန် နှင့် အဆိုပါ လုပ်ငန်းစဉ်များကို လိုက်နာဆောင်ရွက်မှု မရှိကြောင်း တွေ့ရှိပါက စားသုံးသူ ပြည်သူများအနေဖြင့် စားသုံးသူရေးရာ ဦးစီးဌာနသို့ သတင်းပေး တိုင်ကြားမှု များ ဆောင်ရွက်နိုင်ပါကြောင်း သိရှိနိုင်ပါရန် လေးစားစွာ အစီရင်ခံ တင်ပြအပ်ပါသည်-

(က) မှတ်ပုံတင်ထားသည့် ဖုန်း Sim Card ဖြင့်သာ Digital Online Pay Account ဖွင့်လှစ် ခွင့်ပြုရန်၊

(ခ) Account ဖွင့်ရာတွင် နိုင်ငံသားစိစစ်ရေးကတ် သို့မဟုတ် အခြားသက်သေခံ အ ထောက်အထားများအား မဖြစ်မနေ တောင်းခံရန်နှင့် လိုင်စင်ဓါတ်ပုံ တောင်းခံရန်၊

(ဂ) နိုင်ငံသားစိစစ်ရေးကတ်ပါ အမည်ရင်းဖြင့်သာ Account ဖွင့်လှစ်ခွင့်ပြုရန်၊

(ဃ) ငွေလွှဲသူနှင့် ငွေလွှဲလက်ခံမည့်သူတို့ထံမှ မှတ်ပုံတင်ရယူ၍ အချက်အလက်များ တိုက်ဆိုင်စစ်ဆေးရန်နှင့် ငွေလက်ခံရရှိမည့်သူသည် ငွေထုတ်ပေးမည့် Agent ထံ နိုင်ငံသားစိစစ်ရေးကတ် မူရင်း၊ လျှို့ဝှက်ကုဒ်နံပါတ်နှင့် Transaction ID နံပါတ် တို့ကို ပြသစေရန်၊

(င) ငွေလွှဲသူကိုယ်တိုင် လျှို့ဝှက်ဂဏန်း (၆) လုံး (Password 6 digits) အား ရိုက်နှိပ်စေရန်၊

(စ) လိုက်နာရမည့်စည်းကမ်းသတ်မှတ်ချက်များ၊ အသုံးပြုရမည့်နည်းလမ်းများအား Facebook Page တွင်သာမက အများပြည်သူ အလွယ်တကူ သိရှိနိုင်မည့် Channel များဖြစ်သည့် ရေဒီယို၊ ရုပ်မြင်သံကြားများတွင် ထည့်သွင်းကြော်ငြာ ခြင်း၊ Agent ဆိုင်များတွင် ဗီနိုင်းများ ချိတ်ဆွဲခြင်းနှင့် Agent ကိုယ်တိုင်မှ အများ ပြည်သူသို့ မကြာခဏ အသိပေးခြင်းများ ဆောင်ရွက်ရန်၊

(ဆ) ကိုယ်စားလှယ်များ၏ အားနည်းချို့ယွင်းမှုကြောင့် ဖြစ်ပေါ်လာသည့် ကိစ္စရပ်များ နှင့်ပတ်သက်၍ အရေးယူဆောင်ရွက်မည့် လုပ်ငန်းစဉ်များအား ငွေလွှဲခြင်း၊ လက်ခံခြင်း နှင့် ထုတ်ပေးခြင်း လုပ်ငန်းများ ဆောင်ရွက်နေသည့် လုပ်ငန်းရှင် ကိုယ်စားလှယ် အားလုံး တရားဝင် သိရှိရေး ဆောင်ရွက်ရန် နှင့် လိုက်နာ ဆောင်ရွက်ခြင်းမရှိသည့် ကိုယ်စားလှယ် လုပ်ငန်းရှင်များကိုလည်း အမှန်တကယ် အရေးယူဆောင်ရွက်ရန်။

(ဇ) စားသုံးသူတိုင်ကြားမှုများအား ထိရောက်စွာ ဖြေရှင်းဆောင်ရွက်ပေးနိုင်ရေး လုံလောက်သော ဝန်ထမ်းများ ခန့်ထားရန် နှင့် သင့်လျော်သည့် သင်တန်းများ ပေးရန်။

(ဈ) System Auto Generated Password/ One Time Password (OTP) တစ်ခါသုံး လျှို့ဝှက်နံပါတ် စနစ် အသုံးပြုနိုင်ရေး ဆောင်ရွက်ရန်၊

(ည) စားသုံးသူ တိုင်ကြားမှု များကို အမြန်ဆုံး ဖြေရှင်းဆောင်ရွက်ပေးရန်။

ConsumerAffairs

စားသုံးသူတိုင်ကြားမှုလက်ခံဆောင်ရွက်ရေးစနစ်(consumer complaint system)အသစ်နှင့်ပတ်သက်၍ ပြည်သူများသို့ အသိပေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၏ www.doca.gov.mm Wesite တွင်ပါဝင်သော စားသုံးသူတိုင်ကြားမှုလက်ခံဆောင်ရွက်ရေးစနစ် (consumer complaint system) အသစ်အား ၂၀၂၀ ပြည့်နှစ် စက်တင်ဘာလ ၁ရက်နေ့ မှစတင်၍ အသုံးပြုလျှက် ရှိပါသည်။ အဆိုပါစနစ်တွင် တိုင်ကြားသူများအနေဖြင့် မိမိတို့၏တိုင်ကြားမှုအပေါ် အရေးယူဆောင်ရွက်နေမှုအခြေအနေများအား အွန်လိုင်းအသုံးပြု၍ website မှတဆင့် စောင့်ကြည့်နိုင်မည်ဖြစ်ပါသည်။

ပြည်သူများအနေဖြင့် အဆိုပါစနစ်အသုံးပြုခြင်းနှင့်ပတ်သက်၍ အသေးစိတ်သိရှိလိုပါက အောက်ဖော်ပြပါ pdf ဖိုင်တွင် လေ့လာနိုင်ပါကြောင်း လေးစားစွာ အသိပေးအပ်ပါသည်-

ITQM

complaint system book.pdf

COVID-19 ရောဂါကာကွယ်ရေးအထောက်အကူပြုပစ္စည်းနှင့် ဆေးဝါးများ ဈေးနှုန်း မြှင့်တင်ရောင်းချခြင်း ရှိ/မရှိ ကွင်းဆင်းစစ်ဆေး

သတင်းနှင့် လှုပ်ရှားမှုများ

၂၃.၈.၂၀၂၀ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာနမှ တာဝန်ရှိသူများ သည် မော်လမြိုင်မြို့ရှိ ဆေးဝါးလက်လီလက်ကားအရောင်းဆိုင်များ၌ လည်းကောင်း၊ ၂၄.၈.၂၀၂၀ ရက်နေ့တွင် သထုံခရိုင်မှ တာဝန်ရှိသူများသည် သထုံမြို့ရှိ ဆေးပစ္စည်း အရောင်းဆိုင်များ၌ လည်းကောင်း၊ ၂၆.၈.၂၀၂၀ ရက်နေ့တွင် ကျိုက်မရောမြို့နယ်ရှိ ဆေးပစ္စည်းအရောင်းဆိုင် များ၌လည်းကောင်း COVID-19 ရောဂါကာကွယ်ရေး အထောက်အကူပြုပစ္စည်းနှင့်ဆေးဝါးများအား ဈေးနှုန်းမြှင့်တင် ရောင်းချခြင်း ရှိ/မရှိ ကွင်းဆင်းစစ်ဆေး ဆောင်ရွက်ခဲ့ပါသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ၃၀.၃.၂၀၂၀ ရက်နေ့တွင် ထုတ်ပြန်ခဲ့သော အမိန့်ကြော်ငြာစာအမှတ် ၂၁/၂၀၂၀ ဖြင့် COVID-19 ရောဂါ ကာကွယ် ထိန်းချုပ်ကုသရေးဆိုင်ရာ အထောက်အကူပြုပစ္စည်းများ၊ ဆေးဝါးများနှင့် စားသုံးကုန်ပစ္စည်းများကို အရေးကြီးကုန်စည်များအဖြစ် ကြေငြာထားပြီးဖြစ်ရာ အဆိုပါကုန်ပစ္စည်းများအား ဈေးနှုန်းမြှင့်တင်ရောင်းချဖြန့်ဖြူးခြင်း၊ ဈေးကစားရန် ရည်ရွယ်၍ သိုလှောင်ထားရှိခြင်းများ ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ ဖော်ထုတ် အရေးယူဆောင်ရွက်သွားမည်ဖြစ်ကြောင်း လုပ်ငန်းရှင်များက သိရှိလိုက်နာကြစေရေး အသိပညာပေးမှုများဆောင်ရွက်လျက်ရှိပါသည်။

စားသုံးသူရေးရာဦးစီးဌာန

မွန်ပြည်နယ်

ကုန်အမှတ်တံဆိပ်မူပိုင်ခွင့်ဥပဒေနှင့်အညီ မှတ်ပုံတင်လျှောက်ထားရန်အမိန့်

သတင်းနှင့် လှုပ်ရှားမှုများ

ဦးစွာအသုံးပြုသူကို အခွင့်အရေးပေးသော စနစ် (First to Use System) မှ ဦးစွာလျှောက်ထားသူကို အခွင့်အရေးပေးသောစနစ် (First to File System) သို့ ကူးပြောင်းရာတွင် အဆင်ပြေချောမွေ့စေရန်အလို့ငှာ ကုန်အမှတ်တံဆိပ်မူပိုင်ခွင့်ဥပဒေ ပုဒ်မ ၉၃၊ ပုဒ်မခွဲ (က) ပါ အမှတ်တံဆိပ်ပိုင်ရှင်များအတွက် ကုန်အမှတ်တံဆိပ်မူပိုင်ခွင့်ဥပဒေနှင့်အညီ မှတ်ပုံတင်လျှောက်ထားရန် အမိန့် ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်လိုက်ပါသည်။ အောက်ပါ (.pdf) file မှတဆင့် ဝင်ရောက်ဖတ်ရှုနိုင်ပါသည်-

IP Directive.pdf

ကချင်ပြည်နယ် စားသုံးသူရေးရာဦးစီးဌာန ၊ မြစ်ကြီးနားခရိုင်ခရိုင်ရုံး (၅၀'×၃၅'×၂၄') RC (၂)ထပ်(ရေ၊ မီး၊ မိလ္လာ)ဆောက်လုပ်ခြင်း

သတင်းနှင့် လှုပ်ရှားမှုများ

၂၀၁၉ -၂၀၂၀ ဘဏ္ဍာနှစ်၊ ပြည်ထောင်စုငွေလုံးငွေရင်း(မူလ)ခွင့်ပြုရန်ပုံငွေဖြင့် ကချင်ပြည်နယ် စားသုံးသူရေးရာဦးစီးဌာန၊ မြစ်ကြီးနားခရိုင် ခရိုင်ဦးစီးမှူးရုံး (၅၀'×၃၅'×၂၄') RC (၂)ထပ် (အတွင်း ရေ၊ မီး၊ မိလ္လာ) (Apron& Drain)အပါ အဆောက်အဉီ ဆောက်လုပ်ခြင်း လုပ်ငန်းအား လုပ်ထုံးလုပ်နည်းနှင့်အညီ ဆောင်ရွက်ခဲ့ရာ ၁၄.၅.၂၀၂၀ရက်နေ့တွင် အပေါ်ထပ်အမိုးနှင့်ဘင်းများ ကွန်ကရစ်လောင်းရန် ပုံဆင်ခြင်းလုပ်ငန်း များကို ဆောင်ရွက်လျက်ရှိပြီး ၂၉.၅.၂၀၂၀ ရက်နေ့အထိ စုစုပေါင်းလုပ်ငန်းပမာဏ၏ ၅၅% ခန့် ပြီးစီးပြီး ဖြစ်ပါသည်။

စားသုံးသူရေးရာဦးစီးဌာန

ကချင်ပြည်နယ်

ဝါသီးနှံစိုက်ပျိုးရေးမှသည် ရက်ကန်းလုပ်ငန်းဖွံ့ဖြိုးတိုးတက်ရေးဆီသို့

သတင်းနှင့် လှုပ်ရှားမှုများ

စစ်ကိုင်းဒေသကြီး ရွှေဘိုခရိုင် ရွှေဘိုမြို့နယ် ဆိပ်ခွန်ကျေးရွာ မြမြင့်မိုရ် မင်္ဂလာခန်းမ၌ ၂၀၂၀ ပြည့်နှစ် မတ်လ (၅) ရက်နေ့တွင် စီးပွားရေးနှင့်ကူးသန်းရောင်းဝယ်ရေးဌာန၊ ရွှေဘိုခရိုင် စားသုံးသူရေးရာဦးစီးဌာန မှ ဦးစီးကျင်းပသော ဝါသီးနှံစိုက်ပျိုးရေးမှသည် ရက်ကန်းလုပ်ငန်းဖွံ့ဖြိုးတိုးတက်ရေးဆီသို့ အလုပ်ရုံ ဆွေးနွေးပွဲကို ကျင်းပခဲ့ပါသည်။ ရှေးဦးစွာ စားသုံးသူရေးရာဦးစီးဌာန ဒုတိယညွှန်ကြားရေးမှူးချုပ် ဦးအောင်မောင်းက အလုပ်ရုံဆွေးနွေးပွဲကျင်းပရခြင်း ရည်ရွယ်ချက်များကို ရှင်းလင်းပြောကြားခဲ့ပါသည်။ ထိုနောက် တီတွင်ဆန်းသစ်မှုနှင့်သုတေသနဦးစီးဌာန ဒုတိယညွှန်ကြားရေးမှူးချုပ် ဒေါက်တာမိုးမိုးသွယ်က ဆိပ်ခွန်လုံချည် မူပိုင်ခွင့်ပြုနိုင်ရေးဆိုင်ရာ ကြိုတင်ပြင်ဆင်ရသည့်လုပ်ငန်းမည့်လုပ်ငန်းများအပေါ် သုံးသပ် အကြံပြုချက်များကို ဆွေးနွေးခဲ့ပါသည်။ ယင်းနောက် ကုန်သွယ်ရေးဦးစီးဌာနမှ ဒုတိယညွှန်ကြားရေးမှူး ဒေါက်တာစိုးဝင်းက ဝါနှင့်ချည်ထည်ပစ္စည်း ပြင်ပတင်ပို့ဆိုင်ရာနှင့် တင်သွင်းမှုအပေါ် ညှိနှိုင်းသုံးသပ် ချက်များ ကို ရှင်းလင်းဆွေးနွေးခဲ့ပါသည်။ ဆက်လက်ပြီး စိုက်ပျိုးရေးဦးစီးဌာနမှ လက်ထောက်ညွှန်ကြား ရေးမှူး ဒေါ်သန်းသန်းနုက မျိုးစေ့နှင့်စိုက်နည်းစနစ် ပညာပေးရေးစာတမ်းကို ဖတ်ကြားခဲ့ပါသည်။ ယင်းနောက် စက်မှု ကြီးကြပ်ရေးနှင့် စစ်ဆေးရေးဦးစီးဌာန ရွှေဘိုခရိုင်ဦးစီးမှူး ဦးမြင့်မိုးက ပြည်သူအတွက် SMEs ဆိုင်ရာ သိကောင်းစရာများကို ဆွေးနွေးပြောကြားပြီး ရွှေဘိုမြို့ မြန်မာ့စီးပွားရေးဘဏ် မန်နေဂျာ ဦးမြင့်အောင်က SMEs လုပ်ငန်းနှင့်မြန်မာ့စီးပွားရေးဘဏ်ကဏ္ဍအကြောင်းများကို လည်းကောင်း၊ ရွှေဘိုမြို့ မြန်မာနိုင်ငံသားများ ဘဏ်မန်နေဂျာ ဒေါ်ရီရီသင်းက SMEs လုပ်ငန်း ပုဂ္ဂိုလ်က ကဏ္ဍအကြောင်းများကို ရှင်းလင်းဆွေးနွေးခဲ့ ပါသည်။ ဆက်လက်၍ မုံရွာမြို့ ရက်ကန်းနှင့် အသက်မွေး ပညာသင်တန်းကျောင်း ကျောင်းအုပ်ဆရာမကြီး ဒေါ်သိန်းဌေးက သဘာဝရက်ကန်းမှသည် Organic အဝတ်အထည်များဆီသို့ ခေါင်းစဉ်ဖြင့်ဆွေးနွေးခဲ့ ပါသည်။အဆိုပါအလုပ်ရုံဆွေးနွေးပွဲတွင် ပလိပ်မြို့ ပန်တာ ချည်မျှင်အထည်နှင့် အချောကိုင်စက်ရုံ အထည်လိပ် လုပ်ငန်းရှင် ဒေါ်တင်တင်ရွှေက အထည်လိပ် လုပ်ငန်းဖွံ့ဖြိုးတိုးတက်ရေးဆီသို့ ခေါင်းစဉ်ဖြင့် ဆွေးနွေးပြောကြား ခဲ့ပါသည်။ထို့နောက် စားသုံးသူ ရေးရာဦးစီးဌာန စစ်ကိုင်းတိုင်းဒေသကြီးဦးစီးမှူး ဦးခင်မောင်လှိုင်က ကန့်ဘလူ ခရိုင် တောက္ကရှပ် ကျေးရွာတွင် ကျင်းပခဲ့သည့် ဝါသီးနှံစိုက်ပျိုးရေးမှသည် ရက်ကန်းလုပ်ငန်းဖွံ့ဖြိုးတိုးတက်ရေး ဆီသို့ အလုပ်ရုံ ဆွေးနွေးပွဲမှ ဖော်ထုတ်ချက်များကို ရှင်းလင်း ပြောကြားခဲ့ပြီး တက်ရောက်လာသောရက်ကန်း လုပ်ငန်းရှင် များက အုပ်စုစားပွဲဝိုင်း ဆွေးနွေး ခြင်းနှင့် ဖော်ထုတ်ချက်များကို လုပ်ဆောင်ခဲ့ပြီး ၄င်းဖော်ထုတ်ချက် လုပ်ငန်းများကို ပြန်လည်ဆွေး နွေးခဲ့ကြ ပါသည်။ယင်းနောက် စားသုံးသူရေးရာဦးစီးဌာန စစ်ကိုင်းတိုင်း ဒေသကြီး ဦးစီးမှူး ဦးခင်မောင်လှိုင်မှ နိဂုံးချုပ် အမှာစကားပြောကြားပြီး အခမ်းအနားကို အောင်မြင်စွာ ကျင်းပခဲ့ပါသည်။

မြစ်ကြီးနားခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ) ဆောက်လုပ်ခြင်း

သတင်းနှင့် လှုပ်ရှားမှုများ

၂၀၁၉-၂၀၂၀ဘဏ္ဍာနှစ်၊ ငွေလုံးငွေရင်းခွင့်ပြုရန်ပုံငွေ ၁၀၈.၅၀၀သန်းဖြင့်ကချင်ပြည်နယ်၊ မြစ်ကြီးနားခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ)ဆောက်လုပ်ခြင်းလုပ်ငန်းကို တင်ဒါခေါ်ယူဆောင်ရွက်ခဲ့ရာ Asia C.M.I Co.,Ltd မှ ၁၀၇.၄၁၅ သန်းဖြင့် တင်ဒါ အောင်မြင်ခဲ့ပြီး ၂၃.၁.၂၀၂၀ ရက်နေ့တွင် လုပ်ငန်းစတင် ဆောင်ရွက်၍ ၃.၃.၂၀၂၀ ရက်နေ့အထိ လုပ်ငန်း၏ ၁၇ % ဆောင်ရွက်ပြီး ဖြစ်ပါသည်။

ကချင်ပြည်နယ်

စားသုံးသူရေးရာဦးစီးဌာန

ဂန့်ဂေါခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ) ဆောက်လုပ်ခြင်း

သတင်းနှင့် လှုပ်ရှားမှုများ

၂၀၁၉-၂၀၂၀ ဘဏ္ဍာနှစ်၊ ငွေလုံးငွေရင်းခွင့်ပြုရန်ပုံငွေ ၉၅.၀၀၀ သန်းဖြင့် မကွေးတိုင်း ဒေသကြီး၊ ဂန့်ဂေါခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ)ဆောက်လုပ်ခြင်း လုပ်ငန်းကို တင်ဒါခေါ်ယူဆောင်ရွက်ခဲ့ရာ ယောညီကိုကုမ္ပဏီမှ ၉၂.၄၀၀ သန်းဖြင့် တင်ဒါ အောင်မြင် ခဲ့ပြီး ၂၀.၂.၂၀၂၀ရက်နေ့တွင် လုပ်ငန်းစတင်ဆောင်ရွက်၍ ၃.၃.၂၀၂၀ရက်နေ့အထိလုပ်ငန်း၏ ၁၀ % ဆောင်ရွက်ပြီး ဖြစ်ပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန

Languages

Main menu

COVID-19 ကာလအတွင်း Mask များ ရောင်းချခြင်း နှင့် ပတ်သက်၍ လုပ်ငန်းရှင်များ သို့ တိုက်တွန်းနှိုးဆော်ခြင်း

စားသုံးသူပြည်သူများသို့ အစီရင်ခံ တင်ပြချက်

စားသုံးသူတိုင်ကြားမှုလက်ခံဆောင်ရွက်ရေးစနစ်(consumer complaint system)အသစ်နှင့်ပတ်သက်၍ ပြည်သူများသို့ အသိပေးခြင်း

ကုန်အမှတ်တံဆိပ်မူပိုင်ခွင့်ဥပဒေနှင့်အညီ မှတ်ပုံတင်လျှောက်ထားရန်အမိန့်

ဝါသီးနှံစိုက်ပျိုးရေးမှသည် ရက်ကန်းလုပ်ငန်းဖွံ့ဖြိုးတိုးတက်ရေးဆီသို့

မြစ်ကြီးနားခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ) ဆောက်လုပ်ခြင်း

ဂန့်ဂေါခရိုင်ရုံး (၅၀’ x ၃၅ x ၂၄’) RC (၂)ထပ် (ရေ၊ မီး၊ မိလ္လာ) ဆောက်လုပ်ခြင်း

Pages

You are here

HighLight News

Pages