HighLight News

            စားသုံးသူရေးရာဦးစီးဌာန၊ ရှမ်းပြည်နယ်(မြောက်ပိုင်း)၊ ဒုတိယပြည်နယ်ဦးစီးမှူးရုံးမှ ဝန်ထမ်းများ၊ ကျောက်မဲ ခရိုင်ဦးစီးမှူးရုံး၊ မူဆယ်ခရိုင်ဦးစီးမှူးရုံးတို့မှဝန်ထမ်းများသည် ကမ္ဘာ့စားသုံးသူအခွင့်အရေးများနေ့ အခမ်းအနား အထိမ်းအမှတ်(World Consumer Right Day)လှုပ်ရှားမှုအနေဖြင့် ၁၅.၃.၂၀၂၂ရက်နေ့ နံနက်(၁၀)နာရီ အချိန်တွင် ဈေးများအတွင်းရှိ လမ်းသွားလမ်းလာ ဈေးဝယ်ပြည်သူများ၊ ကားဂိတ်များရှိခရီးသွားပြည်သူများနှင့် စတိုးဆိုင် ဈေးဝယ်ပြည်သူများနှင့် အခြားလမ်းသွားလမ်းလာ ပြည်သူများအား မတ်လ ၁၅ ရက်နေ့ သည် ကမ္ဘာ့စားသုံးသူအခွင့်အရေးများနေ့ဖြစ်ကြောင်းနှင့် မိမိတို့၏ အခွင့်အရေးများ၊ စားသုံးသူများအနေဖြင့် မိမိတို့၏ လိုအပ်သည့်ကုန်စည်နှင့် ဝန်ဆောင်မှုများက်ု ဝယ်ယူသုံးစွဲရာတွင် နစ်နာဆုံးရှုံးမှုများရှိပြီး အခွင့်အရေးများ ချိုးဖောက်ခံရပါက လားရှိုးမြို့၊ ဒုတိယပြည်နယ်ဦးစီးမှုးရုံး၊ စားသုံးသူရေးရာဦးစီးဌာနရှိ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ(CICC)တွင်လည်းကောင်း၊ စားသုံးသူရေးရာဦးစီးဌာန၏ website ဖြစ်သော www.doca.gov.mm တွင် လည်းကောင်း၊ ဌာန၏ Facebook Page တွင်လည်းကောင်း သွားရောက်တိုင်ကြားနိုင်ကြောင်း အသိပညာပေးဆွေးနွေးပြီး လက်ကမ်းစာစောင်များနှင့် ပို့စကဒ်များကို လိုက်လံဖြန့်ဝေခဲ့ကြောင်းသိရှိရပါသည်။

            ၎င်းနောက် ဈေးတွင်းရှိ ဈေးသည်များနှင့် စီးပွားရေးလုပ်ငန်းရှင်များကိုလည်း စီးပွားရေးလုပ်ငန်းရှင်များ လိုက်နာရမည့်အချက်အလက်နှင့် ကုန်စည်များတွင်လည်း ကုန်အညွှန်းအမှတ်သားများပြည့်စုံစွာထည့်သွင်းရန်လည်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ရှမ်း)

         စားသုံးသူရေးရာဦးစီးဌာနအနေဖြင့် စားသုံးသူအခွင့်အရေးများ အပြည့်အဝရရှိစေရန်နှင့် အကျိုး စီးပွားများကို ကာကွယ်ပေးရန်အတွက် စားသုံးသူကာကွယ်ရေးဆိုင်ရာ အသိပညာပေးလုပ်ငန်းများကို ကျယ်ကျယ်ပြန့်ပြန့် ဆောင်ရွက်လျှက်ရှိသည့်အပြင် စားသုံးသူများ၏ နစ်နာဆုံးရှုံးမှုများအား အချိန်တိုအတွင်း ကုစားဖြေရှင်းပေးနိုင်ရေးအတွက် ပြည်ထောင်စုနယ်မြေ၊ တိုင်းဒေသကြီး/ ပြည်နယ်/ ခရိုင်တို့၌ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)များ ဖွင့်လှစ်၍ တိုင်ကြားမှုများကို အချိန်နှင့်တစ်ပြေးညီ ဖြေရှင်းပေးခြင်း၊ စားသုံးသူရေးရာကိစ္စရပ်များနှင့် စပ်လျဉ်း၍ မေးမြန်းစုံစမ်းနိုင်ရန်အတွက် Consumer Call Centerများဖွင့်လှစ်၍ ဝန်ဆောင်မှုများပေးလျက်ရှိပါသည်။ ထို့အပြင် ၂၀၁၅ခုနှစ်မှစ၍ စားသုံးသူအခွင့်အရေးများနေ့ အထိမ်းအမှတ်အခမ်းအနားများကိုလည်း ရန်ကုန်၊ မန္တလေး၊ မုံရွာ၊ နေပြည်တော်၊ ပုသိမ်မြို့ကြီးများတွင် ကျင်းပလျှက်ရှိရာ ယခု၂၀၂၂ ခုနှစ်တွင် Covid-19 ကူးစက်ရောဂါဖြစ်ပွားနေသည့်အတွက် မြန်မာနိုင်ငံတဝှမ်းလူစုလူဝေးဖြင့် စည်ကားသိုက်မြိုက်စွာ ကျင်းပနိုင်ခြင်းမရှိခဲ့သော်လည်း တိုင်းဒေသကြီးပြည်နယ်အလိုက် အခြေအနေပေးမှုပေါ်မူတည်၍ ကမ္ဘာ့ စားသုံးသူအခွင့်အရေးများနေ့ အထိမ်းအမှတ်အခမ်းအနားများ ဆောင်ရွက်ခဲ့ကြပါသည်။

        ၂၀၂၂ခုနှစ်၊ မတ်လ(၁၅)ရက်နေ့တွင်ကျရောက်သော ကမ္ဘာ့စားသုံးသူအခွင့်အရေးများနေ့ အထိမ်းအမှတ်ဆောင်ပုဒ်ကို ကမ္ဘာ့တဝှမ်းရှိ စားသုံးသူများက“ညီညွတ်မျှတ ဒီဂျစ်တယ်ငွေကြေးကဏ္ဍ” (Fair Digital Finance)ဟု သတ်မှတ်ထုတ်ပြန်ထားမှုအပေါ် မကွေးတိုင်းဒေသကြီး၊ စားသုံးသူရေးရာဦးစီးဌာနမှလည်း (၁၅.၃.၂၀၂၂)ရက်နေ့ နံနက်(၀၉:၀၀) နာရီမှစ၍ မကွေးတိုင်းအတွင်းရှိ ပုဂ္ဂလိကဘဏ်များ၊ ငွေကြေးဝန်ဆောင်မှုပေးနေသည့် Agent ဆိုင်များသို့ စားသုံးသူများအား မျှတမှုရှိသည့် ဒီဂျစ်တယ်ငွေကြေးဝန်ဆောင်မှုကို ရယူအသုံးပြုနိုင်စေရန်နှင့် စားသုံးသူများ၏ ပုဂ္ဂိုလ်ရေးဆိုင်ရာ အချက်အလက်များအား လုံခြုံစိတ်ချမှုရှိစေရန်တို့အတွက် ဒီဂျစ်တယ်ငွေကြေးဝန်ဆောင်မှုနှင့် စပ်လျဉ်းသည့်အသိပညာပေးမှုများကို ဆောင်ရွက်ခဲ့ကြပါသည်။ ထိုသို့ အသိပေးဆောင်ရွက်ရာတွင် စားသုံးသူများ၏ ဘဏ်အကောင့်အချက်အလက်များ၊  Debit/ Credit Card၊ ဘဏ်ကဒ်နံပါတ်များနှင့် ဒီဂျစ်တယ်ငွေလွှဲ ဝန်ဆောင်မှုလုပ်ငန်းများ၏ ငွေလွှဲအချက်အလက်များဖြစ်သော လုပ်ငန်းစဉ်နံပါတ်၊ လျှို့ဝှက်နံပါတ်၊ OTP နှင့်PIN တို့ကို မည်သူတစ်ဦး တစ်ယောက်ကိုမှ မျှဝေခြင်းမပြုရန်၊ စားသုံးသူရေးရာဦးစီးဌာနသို့ ငွေကြေးဝန်ဆောင်မှုနှင့်ပတ်သက်သည့် တိုင်ကြားမှုအများစုတွင် ငွေလွှဲသူမှ ငွေလက်ခံသူသို့ ငွေကြေးလွှဲပြောင်းပေးပြီးနောက် ငွေလက်ခံမည့်သူက ထုတ်ယူခြင်းမပြုမီ လိမ်လည်သူများက ထုတ်ယူခဲ့သည့်အတွက် နစ်နာဆုံးရှုံးမှုများအပေါ် တိုင်ကြားလာမှုများအား ဖြေရှင်းပေးခဲ့ရသည့်ဖြစ်စဉ်များရှိသည့်အတွက် စားသုံးသူများအနေဖြင့် ငွေလွှဲသည့်အခါ လျှို့ဝှက်နံပါတ်(၆)လုံးကို ခန့်မှန်းရလွယ်ကူသည့် နံပါတ်များ အသုံးမပြုစေရေး အသိပေးတိုက်တွန်းပြောဆိုပေးပါရန်၊ ကိုယ်ရေးအချက်အလက်များ၊ ငွေလွှဲအချက်အလက်ဖြစ်သော လုပ်ငန်းစဉ်နံပါတ်၊ လျှို့ဝှက်နံပါတ်၊ OTP နှင့် PIN တို့ကို လိမ်လည်သူများက အသုံးချနိုင်သည့်အတွက် လူမှုကွန်ယက်များပေါ်တွင် အသိပေးတင်ပြခြင်းမပြုရန်၊ ဒီဂျစ်တယ်စနစ်ဖြင့် အသုံးပြုသော ဘဏ်လုပ်ငန်း၊ ငွေလွှဲဝန်ဆောင်မှု လုပ်ငန်းတို့၏ Call Centerနှင့် အပြာရောင်အမှန်ခြစ် Blue Mark ရရှိထားသည့် Facebook Page တို့တွင်သာ မိမိသိရှိလိုသည့် အကြောင်းအရာများကိုမေးမြန်းရန်နှင့်၊ ဘဏ်လုပ်ငန်း သို့မဟုတ် ငွေလွှဲဝန်ဆောင်မှုလုပ်ငန်းတို့၏ ဝန်ထမ်းအဖြစ် ဟန်ဆောင်၍ အခြားဖုန်းနံပါတ်များဖြင့် ခေါ်ဆိုလာပါက ကိုယ်ရေးအချက်အလက်များ၊ ငွေလွှဲအချက်အလက်များကိုအသိပေးပြောကြား ခြင်းမပြုရန်စသည့် အချက်အလက်များအား လုပ်ငန်းရှင်များသို့ချပြဆွေးနွေးပြီး မိမိတို့အနေဖြင့် စားသုံးသူတစ်ဦးချင်း အသိပေးဆွေးနွေးရန် စိန်ခေါ်မှုများရှိသည့်အတွက် လုပ်ငန်းရှင်များမှ ငွေကြေး ဝန်ဆောင်မှုရယူမည့် စားသုံးသူပြည်သူများသို့ တဆင့်ပြန်လည်မျှဝေပေးနိုင်ရန်လာရောက် အသိပေး ဆွေးနွေးခြင်းဖြစ်ပါကြောင်း၊ စားသုံးသူကာကွယ်ရေးဥပဒေပါ စားသုံသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်တို့လိုက်နာရမည့် တာဝန်နှင့် တားမြစ်ချက်များ၊ ကုန်စည်နှင့်စပ်လျဉ်း၍ ကုန်ညွှန်းအမှတ်အသားဖော်ပြမှုတွင် မြန်မာဘာသာဖြင့် ဖော်ပြပါရှိသည့် ကုန်စည်များကိုသာ ဖြန့်ဖြူးရောင်းချရန် အသိပေးရှင်းလင်းဆွေးနွေးခြင်းများ ဆောင်ရွက်ခဲ့ကြပါသည်။

     ထိုသို့ အသိပညာပေးဆွေးနွေးရာတွင် မကွေးတိုင်းဒေသကြီး၊ စားသုံးသူရေးရာဦးစီးဌာနမှ ဒုတိယတိုင်းဒေသကြီးဦးစီးမှူး  ဒေါ်အေးအေးမိုး ဦးဆောင်သော မကွေးခရိုင်အဖွဲ့နှင့် ဦးစီးအရာရှိ ဒေါ်အေးမဥ္ဇူခိုင် ဦးဆောင်သောအဖွဲ့တို့ဖြင့် အဖွဲ့(၂)ဖွဲ့ခွဲ၍ မကွေးမြို့ပေါ်ရှိ ပုဂ္ဂလိကဘဏ်များ၊ ငွေကြေးဝန်ဆောင်မှုပေးနေသည့် Agent ဆိုင်များ၊ Shooping Mall များ၊ ကုန်စုံဆိုင်၊ စတိုးဆိုင်ကြီးများသို့ အသိပညာပေးဆွေးနွေးခြင်း၊ ပို့စကဒ်များဝေငှခြင်းနှင့် လက်ကမ်းစာစောင်ဖြန့်ဝေခြင်းများ ဆောင်ရွက်ခဲ့ကြပါသည်။ အလားတူ မကွေးတိုင်းဒေသကြီးအတွင်းရှိ မကွေးခရိုင်၊ မင်းဘူးခရိုင်၊ သရက်ခရိုင်၊ ပခုက္ကူ ခရိုင်များမှ ဝန်ထမ်းများကလည်း  ကမ္ဘာ့စားသုံးသူအခွင့်အရေးများနေ့အထိမ်းအမှတ် အသိပညာပေး ဆွေးနွေးခြင်းများ၊ ပို့စကဒ်များ၊ လက်ကမ်းစာစောင်များ ဝေငှခြင်းများ ဆောင်ရွက်ခဲ့ကြပါကြောင်း သတင်းရရှိပါသည်။

DOCA(မကွေး)

            စစ်တွေမြို့ရှိ ဒေသတွင်းစီးပွားရေးလုပ်ငန်းရှင်(၂)ဦးမှ ၎င်းတို့ထုတ်လုပ်မည့် ကုန်ပစ္စည်းနှင့်ပတ်သက်၍ စားသုံးသူရေးရာဦးစီးဌာန၏ ဥပဒေနှင့်အညီလိုက်နာဆောင်ရွက်လိုပါ၍ ၁၀-၃-၂၀၂၂ရက်နေ့ နေ့လည် (၂:၀၀)ခန့်အချိန်တွင် ရခိုင်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးသို့ လာရောက်တွေ့ဆုံမေးမြန်းဆွေးနွေးလာခဲ့ပါသည်။

           လုပ်ငန်းရှင်များအား ပြည်နယ်ဦးစီးမှူး ဦးတင်ဇော်ထွန်းမှ  လက်ခံတွေ့ဆုံခဲ့ပြီး လုပ်ငန်းရှင်များ သိရှိလိုသည်များကို ဆွေးနွေးဖြေကြားခဲ့ပါသည်။ စီးပွားရေးလုပ်ငန်းရှင်များမှ မိမိသည် ယိုမျိုးစုံ နှင့် ငရုပ်ဆီကို ဒေသတွင်းထုတ်လုပ်ဖြန့်ဖြူးရောင်းချရန်စီစဉ်ဆောင်ရွက်ထားရှိပြီး သက်ဆိုင်ရာဌာနဆိုင်ရာများ၏ ဥပဒေနှင့်အညီထုတ်လုပ်ဖြန့်ဖြူးရောင်းချလိုသည့်အတွက် လာရောက်တွေ့ဆုံ ဆွေးနွေးရခြင်းဖြစ်ပါကြောင်းနှင့် ထုတ်လုပ်မည့် ကုန်ပစ္စည်းများနှင့်ပတ်သက်၍ ညွှန်ကြားမှုခံယူလိုပါကြောင်း ပြောကြားခဲ့ပါသည်။

           ပြည်နယ်ဦးစီးမှူး ဦးတင်ဇော်ထွန်းမှ မိမိတို့ စားသုံးသူရေးရာဦးစီးဌာနသည် စားသုံးသူများကိုအကာကွယ်ပေးနိုင်မည့် စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ (၁၅)ရက်နေ့တွင် ပြဌါန်းခဲ့ပြီး စားသုံးသူကာကွယ်ရေးလုပ်ငန်းများကို ဆောင်ရွက်လျက်ရှိပြီးပါကြောင်း၊ ၎င်းဥပဒေအရ စီးပွားရေးလုပ်ငန်းရှင်များထုတ်လုပ်မည့် ကုန်ပစ္စည်းများတွင် ဖော်ပြရမည့် ကုန်အညွှန်းအမှတ်အသားများနှင့်ပတ်သက်၍ အခန်း(၁၈) ပုဒ်မ (၄၁) (၄၂) အရ ကုန်စည်များပေါ်တွင် ဖော်ပြရမည့် အချက်အလက်များကို ဖော်ပြရန်လိုအပ်ပြီး ပုဒ်မ (၄၃)အရ ကုန်စည်များတွင် မြန်မာဘာသာဖြင့် မဖြစ်မနေဖော်ပြရန်လိုအပ်ပါကြောင်း၊ ညွန်ကြားချက်အမှတ် (၂/၂၀၁၉)အရ မြန်မာဘာသာဖြင့် ဖော်ပြရမည့် ကုန်အညွှန်းအမှတ်အသားများကို ကုန်စည်အုပ်စုအလိုက်၊ ကုန်စည်အမျိုးအစားအလိုက် ခွဲခြားသတ်မှတ်ထားရှိပြီးဖြစ်၍ ညွှန်ကြားချက်အား လိုက်နာဆောင်ရွက်ရန်လိုအပ်ပါကြောင်းနှင့် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များ လိုက်နာဆောင်ရွက်ရန်အချက်များနှင့် တားမြစ်ချက်များအား ရှင်းလင်းပြောကြားခဲ့ပါကြောင်း၊  ထို့နောက် ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်နှင်းအေးခိုင်မှ ကုန်စည်ပေါ်တွင် ဖော်ပြရမည့်ကုန်အညွှန်းအမှတ်အသားများနှင့်စပ်လျဉ်း၍ အသေးစိတ်ရှင်းလင်းပြောကြားပြီး  ပြည်နယ်ဦးစီးမှူးရုံးသို့ တင်ပြလျှောက်ထားရာတွင် လိုအပ်သည့်အချက်အလက်များနှင့် လက်ကမ်းစာစောင်များ ပေးအပ်ခြင်းတို့ကို ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

         ကယားပြည်နယ်တွင်နယ်စပ်ဒေသမှ တရားမဝင်ကုန်ပစ္စည်းများ ဝင်ရောက်လာမှု ကြောင့် ပြည်နယ်တွင်း အသေးစားအလတ်စား စီးပွားရေးလုပ်ငန်းများ ရပ်တည်ရန် ခက်ခဲလာပြီး တရားမဝင်ကုန်ပစ္စည်းများအခွန်ပေးဆောင်မှု မရှိသည့်အတွက် ပြည်တွင်း ရင်းနှီးမြုပ်နှံသူများမှာနည်းပညာနှင့် ဈေးကွက်ယှဉ်ပြိုင်နှိုင်မှု အခက်အခဲများဖြစ်ပေါ်နေ ခြင်းကြောင့် ပြည်နယ်အတွင်းသို့တရားမဝင်ကုန်သွယ်မှုများ ဝင်ရောက်မှုကို စစ်ဆေး ကြီးကြပ်နိုင်ရေးအတွက် ပြည်နယ်အစိုးရမှ “တရားမဝင်ကုန်သွယ်မှုတိုက်ဖျက်ရေး အထူးအဖွဲ့”ကိုဖွဲ့စည်းပြီး လွိုင်ကော်မြို့၊ နွားလဝိုးပူးပေါင်းစစ်ဆေးရေးဂိတ်တွင် အလှည့် ကျစစ်ဆေးကြီးကြပ်နိုင်ရန် ပြည်နယ်အဆင့်ဌာနဆိုင်ရာများကိုအဖွဲ့ခွဲ၍ တာဝန်ချထား လျက်ရှိပြီး ၎င်းအဖွဲ့များမှပြည်နယ်အတွင်း ကုန်စည်စီးဆင်းမှုများတွင် တရားမဝင် ကုန်ပစ္စည်းများဝင်ရောက်မှု ရှိ/မရှိ စစ်ဆေးကြပ်မတ်ကာ တရားမဝင်ကုန်ပစ္စည်း များနှင့်စပ်လျဉ်း၍ ထူးခြားမှုများရှိပါက အချိန်နှင့်တပြေးညီ ပြည်နယ်တရားမဝင် တိုက်ဖျက်ရေးအထူးအဖွဲ့သို့တင်ပြဆောင်ရွက်လျက်ရှိကြောင်းသိရှိရပါတယ်။

DOCA(ကယား)

           စားသုံးသူရေးရာဦးစီးဌာန၊ မိုးညှင်းခရိုင်ဦးစီးဌာနရုံးမှ ဦးကျော်မိုးလွင်(ဌာနခွဲစာရေး)နှင့် ဝန်ထမ်း များသည် စားသုံးသူများလုံခြုံစိတ်ချရမှုရှိစေရန်နှင့် စီးပွားရေးလုပ်ငန်းရှင်များအား စားသုံးသူကာကွယ် ရေးဥပဒေအရ ကုန်အညွှန်းအမှတ်အသားပြည့်စုံစွာ ဖော်ပြနိုင်ရေးအတွက် ၈.၃.၂၀၂၂ ရက်နေ့တွင် မိုညှင်းမြို့၊ အရှေ့စုရပ်ကွက်ရှိ ဒဂုံရှင်ခေါက်ဆွဲစက်လုပ်ငန်းရှင်အား သွားရောက်တွေ့ဆုံ ဆွေးနွေးခဲ့ ပါသည်။

      ထိုသို့ဆွေးနွေးရာတွင် ဦးကျော်မိုးလွင်(ဌာနခွဲစာရေး)မှ စီးပွားရေးလုပ်ငန်းရှင်များ၏ တာဝန်များ၊ ကုန်စည်/ဝန်ဆောင်မှုနှင့်စပ်လျဉ်း၍ အာမခံချက်ပေးခြင်း၊ ကုန်စည် သို့မဟုတ် ဝန်ဆောင်မှုများအပေါ် တာဝန်ရှိမှု၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက်သတ်မှတ်ချက်များ၊ တားမြစ်ချက်များ၊ တားမြစ်ချက်တစ်ရပ် ရပ်ကိုဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင်ချမှတ်နိုင်သည့် ပြစ်မှုပြစ်ဒဏ်များ၊ စီးပွားရေးလုပ်ငန်းရှင်များသည် ကောင်းမွန်သောစီးပွားရေးလုပ်ငန်းကျင့်စဉ်၊ စည်းကမ်းချက်များနှင့် အညီတာဝန်ယူမှု၊ တာဝန်ခံမှုအပြည့်အဝ ဆောင်ရွက်သွားရမည်ဖြစ်ကြောင်း ရှင်းလင်းဆွေးနွေးခဲ့ပါ သည်။

စားသုံးသူရေးရာဦးစီးဌာန

ကချင်ပြည်နယ်