HighLight News

           ရှမ်းပြည်နယ်(မြောက်ပိုင်း) ၊ စားသုံးသူရေးရာဦးစီးဌာန၊ ကျောက်မဲခရိုင်မှ ဝန်ထမ်းများသည် (၂၁.၃.၂၀၂၂)ရက်နေ့တွင် စက်ဆီ/ချောဆီများရောင်းချလျက်ရှိသည့်ဆိုင်များသို့ ကျောက်မဲမြို့၊ စားသုံးသူရေးရာဦးစီးဌာနမှ ဝန်ထမ်းများကသွားရောက် ဈေးကွက်စောင့်ကြည့်စစ်ဆေးခဲ့ကြကြောင်း သိရှိရပါသည်။ ထိုသို့စစ်ဆေးရာ၌(၂)ရပ်ကွက်၊ စိတ္တသုခလမ်းရှိ သစ်ဆန်းပိုင်နှင့် အောင်ချမ်းသာ(၁)၊ (၂)ရပ်ကွက်၊ အောင်ဆန်းလမ်းမပေါ်ရှိဝင်းစတိုးနှင့် အောင်ချမ်းသာ(၂)၊ (၆)ရပ်ကွက်၊ပဥ္စသီလမ်းရှိ မိတ်သစ်နှင့် (၈)ရပ်ကွက်၊ အောင်ဆန်းလမ်းရှိ ပင်လယ်ပြာစသည့်ထော်လာဂျီ/ ဆိုင်ကယ်နှင့် ကားပစ္စည်းအပိုအရောင်းဆိုင်များအား ဈေးကွက်အတွင်း ဖြန့်ဖြူးရောင်းချနေသည့်  Falcom အမှတ်တံဆိပ်၊ Traneအမှတ်တံဆိပ် နှင့် Crocoidle အမှတ်တံဆိပ်တို့နှင့်စပ်လျဉ်းပြီး ဈေးကွက်အတွင်း အတုအပများ/ဆင်တူယိုးမှားများ  ထုတ်လုပ်ရောင်းချလျက်ရှိသည့်အပေါ် စီးပွားရေးလုပ်ငန်းရှင်များနှင့် သုံးစွဲသူများအနေဖြင့် နစ်နာဆုံးရှုံးမှုများ ဖြစ်ပေါ်နိုင်ခြင်းအားရှေးရှု၍ အတု/အစစ်များ ခွဲခြားဝယ်ယူ/ရောင်းချ/သုံးစွဲနိုင်ရေးနှင့် စားသုံးသူကာကွယ်ရေးအသိပညာပေးမှုများ ပြုလုပ်ခဲ့ကြကြောင်း သိရှိရပါသည်။

          စစ်ဆေးခဲ့သည့်ဆိုင်များတွင် အဆိုပါတံဆိပ်များနှင့် ပတ်သက်၍ အတုအပများ/ဆင်တူယိုးမှားများ ရောင်းချခြင်းမရှိသည်ကို စစ်ဆေးတွေ့ရှိခဲ့ကြောင်းနှင့် စီးပွားရေးလုပ်ငန်းရှင်များအနေဖြင့် ကုန်စည်များကို ဝယ်ယူ၍ ပြန်လည်ဖြန့်ဖြူးရောင်းချရာ၌ ကုန်စည်၏ အရည်အသွေးအာမခံချက်အပြည့်အဝရရှိနိုင်မည့် ကုမ္ပဏီများမှသာ သေချာစွာစိစစ်ဝယ်ယူရောင်းချကြရန်(အသိပေး/သတိပေး) ဈေးကွက်စောင့်ကြည့် ကွင်းဆင်းစစ်ဆေးခဲ့ကြကြောင်း သိရှိရပါသည်။

DOCA(ရှမ်း)

         ရှမ်းပြည်နယ်(မြောက်ပိုင်း)၊ စားသုံးသူရေးရာဦးစီးဌာန၊သီပေါမြို့နယ်တာဝန်ခံသည် ယခုကာလတွင် အများဆုံး အသုံးပြုလျက် ရှိသော Digital onlineစနစ်ဖြင့် ငွေကြေးဝန်ဆောင်မှုလုပ်ငန်းနှင့် ပတ်သက်၍ စားသုံးသူပြည်သူများနှင့် Digital onlineစနစ်ဖြင့် ငွေကြေးဝန်ဆောင်မှုလုပ်ငန်းများဆောင်ရွက်နေသည့် စီးပွားရေးလုပ်ငန်းရှင် များသိရှိစေရန် အသိပညာပေး Talk Showအား(၂၁.၃.၂၀၂၂) ရက်၊နံနက်(၉း၀၀)နာရီမှ (၉း၃၀)နာရီ အထိသီပေါမြို့ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ၎င်းဌာနရှိလူထုအခြေ ပြုဗဟိုခန်းမတွင် Olineမှတဆင့် အသိပညာပေးပြုလုပ်ခဲ့ကြောင်းသိရှိရပါသည်။

          ထိုအသိပညာပေးTalk Showမှတဆင့် Digital onlineစနစ်ဖြင့်စီးပွားရေးလုပ်ငန်းရှင်များအား ငွေကြေးဝန်ဆောင်မှုနှင့်ပတ်သက်၍ လိုက်နာဆောင်ရွက်ရမည့် အချက်များဖြစ်သော-မှတ်ပုံတင်ထားရှိသည့် ဖုန်းဆင်းကဒ်ဖြင့်သာ Digital online pay   account ဖွင့်လှစ်ခွင့်ပြုရန်၊ Accountဖွင့်လှစ်ရာတွင် နိုင်ငံသားစိစစ်ရေးကတ်(သို့) အခြားသက်သေခံ အထောက်အထားများအား မဖြစ်မနေတောင်းခံရန်နှင့် လိုင်စင်ဓာတ်ပုံတောင်းခံရန်၊ နိုင်ငံသားစိစစ်ရေးကတ်ပါအမည်အရင်းဖြင့်သာ  Accountဖွင့်လှစ်ခွင့်ပြုရန်၊ ငွေလွဲသူနှင့် ငွေလက်ခံမည့်သူတို့ထံမှ မှတ်ပုံတင်ရယူ၍ အချက်အလက်များတိုက်ဆိုင်စစ်ဆေးရန်နှင့် ငွေလက်ခံရရှိမည့်သူသည် ငွေထုတ်ပေးမည့် Agentထံ နိုင်သားစိစစ် ရေးကတ်မူရင်း၊ လျှို့ဝှက်ကုဒ်နံပါတ်နှင့် Transaction IDနံပါတ်တို့ကိုပြသစေရန်၊ ငွေလွဲသူကိုယ်တိုင် လျှို့ဝှက်ဂဏန်း(၆)လုံးအား ရိုက်နှိပ်စေရန်၊ လိုက်နာရမည့် စည်းကမ်းချက်များ၊ အသုံးပြုရမည့် နည်းလမ်းများအား Facebook page တွင်သာမက အများပြည်သူအလွယ်တကူသိရှိနိုင်မည့် Channelများဖြစ်သည့် ရေဒီယို၊ ရုပ်မြင်သံကြားများတွင် ထည့်သွင်းကြေညာခြင်း Agentဆိုင်များတွင် ဗီနိုင်းများ ချိတ်ဆွဲခြင်းနှင့် Agentကိုယ်တိုင်မှ အများပြည်သူသို့မကြာခဏ အသိပေးခြင်းများ ဆောင်ရွက်ရန်၊ ကိုယ်စားလှယ်၏ အားနည်းချို့ယွင်းမှုကြောင့် ဖြစ်ပေါ်လာသည့် ကိစ္စရပ်များနှင့်ပတ် သက်၍ အရေးယူဆောင်ရွက်မည့် လုပ်ငန်းစဉ်များအား ငွေလွှဲခြင်း၊ လက်ခံခြင်းနှင့် ထုတ်ပေးခြင်းလုပ်ငန်းများ ဆောင်ရွက်နေသည့် လုပ်ငန်းရှင်ကိုယ်စားလှယ်အားလုံး တရားဝင်သိရှိရေးဆောင်ရွက်ရန်နှင့် လိုက်နာဆောင်ရွက်ခြင်းမရှိသည့် ကိုယ်စားလှယ် လုပ်ငန်းရှင်မျာကို အမှန်တကယ်အရေးယူဆောင်ရွက်ရန်၊ စားသုံးသူတိုင်ကြားမှုများအား ထိရောက်စွာဖြေရှင်းဆောင်ရွက်ပေးနိုင်ရေး လုံလောက်သောဝန်ထမ်းများခန့်ထားရန်နှင့် သင့်လျော်သည့်သင်တန်းများပေးရန်၊ System Auto Generated Password/ One Time Password (OPT) တစ်ခါသုံး လျှို့ဝှက်နံပါတ်စနစ် အသုံးပြုနိုင်ရေးဆောင်ရွက်ရန်၊ စားသုံးသူတိုင်ကြားမှုများကို အမြန်ဆုံးဖြေရှင်းဆောင်ရွက်ရန် အစရှိသော Digital Online ငွေကြေးဝန်ဆောင်မှုလုပ်ငန်းရှင်များသိရှိစေရန်နှင့် လိုက်နာဆောင်ရွက်ရန်အတွက် ပြန်ကြားရေးဦးစီးဌာနနှင့်ပူးပေါင်း၍ Talk Showအစီအစဉ်ဖြင့် Onlineမှတဆင့် အသိပညာ ပေးပြောကြားခဲ့ကြောင်း သိရှိရပါသည်။

DOCA(ရှမ်း)

          စားသုံးသူရေးရာဦးစီးဌာန၊ ကယားပြည်နယ်ဦးစီးမှုးရုံးမှ ၂၀၂၂ ခုနှစ်၊ မတ်လ (၂၁) ရက်နေ့ တွင် လွိုင်ကော်မြို့ ထေးသမရပ်ကွက်ရှိ ထေးသမ ဆီစက်နှင့် မိုင်းလုံးရပ်ကွက်ရှိရွှေမင်းဆီစက်လုပ်ငန်းများထံသို့ သွားရောက်၍ ပြည်တွင်းကုန်သွယ်မှုနှင့် စပ်လျဉ်း၍ ဆီထွက်သီးနှံထွက်ရှိမှု၊ ဆီလိုအပ်မှုအခြေအနေများ၊ ကုန်အညွှန်းအမှတ်အသားနှင့် စပ်လျဉ်း၍ လုပ်ငန်းရှင်များသိရှိလိုက်နာနိုင်စေရေး ကွင်းဆင်းစစ်ဆေးဆောင်ရွက်ခဲ့ပါသည်။ 

          ထိုသို့ကွင်းဆင်းစစ်ဆေးဆောင်ရွက်ခဲ့ရာတွင် ပြည်နယ်အတွင်း ဆီထွက်သီးနှံထွက်ရှိမှု နှင့် ဆီလိုအပ်မှုအခြေအနေများအားလည်းကောင်း၊ မြန်မာနိုင်ငံအစားအသောက် နှင့် ဆေးဝါး အာဏာပိုင် အဖွဲ့၏ အမျိုးသားအစားအသောက် ဥပဒေပုဒ်မ၃၈(ခ)အရ အပ်နှင်းထားသော လုပ်ပိုင် ခွင့်ကိုကျင့်သုံး၍ ယင်းဥပဒေပုဒ်မ၆(င)အရ အမှတ်တံဆိပ်ပါ ဘူးသွင်းသောက်ရေသန့်နှင့် အမှတ် တံဆိပ်ပါ စားသုံးဆီတို့အား ထိန်းချုပ်အစားအသောက်အဖြစ်သတ်မှတ်ထားပါကြောင်း ၊ ဆီစက် လုပ်ငန်းရှင်များအနေဖြင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန် ထားသော ၂၀၂၁ ခုနှစ်၊ ဒီဇင်ဘာလ  ( ၂၀ )ရက်နေ့တွင် ထုတ်ပြန်ထားသော စီးပွားရေး လုပ်ငန်းရှင်များ လိုက်နာဆောင်ရွက်ရန် ညွှန်ကြားချက်အမှတ် (၁/၂၀၂၁ )အား သိရှိ လိုက်နာဆောင်ရွက်ရန်နှင့် ကုန်အညွှန်းအမှတ်အသားဖော်ပြရာတွင် ပင်ရင်းပါဝင်ပစ္စည်းကို အခြေခံသောကုန်စည်၏ အမျိုး အမည်၊ အသားတင်ပမာဏနှင့်အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ ကျပ်သားတို့ကို တိကျစွာမြန်မာဘာသာဖြင့်ဖော်ပြရမည်ဖြစ်ပါကြောင်း အသိပေးရှင်းလင်းဆွေး နွေးခဲ့ကြောင်း သိရှိရပါသည်။

DOCA(ကယား)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စားသုံးသူများ ဘေးအန္တရာယ်ကင်းသော ထုတ်ကုန်များကိုရွေးချယ်ဝယ်ယူနိုင်သည့် အခွင့်အရေးများပိုမိုရရှိလာစေရေး၊  မိမိတို့အခွင့်အရေးကိုသိရှိပြီး မိမိကိုယ်မိမိကာကွယ်နိုင်ရန်နှင့် လုပ်ငန်းရှင်များအနေဖြင့် ဘေးကင်း လုံခြုံသည့် ကုန်စည်များထုတ်လုပ်လာစေရန် ရည်ရွယ်၍  တိုင်းဒေသကြီးဦးစီးမှူး၏ လမ်းညွှန်မှုဖြင့် ခရိုင်ဦးစီးမှူး ဦးဝေဠုအောင် ဦးဆောင်သောအဖွဲ့သည် ၂၀၂၂ ခုနှစ်၊ မတ်လ(၁၇)ရက်နေ့၊ နံနက်(၁၀:၃၀)အချိန် တွင် ပခုက္ကူမြို့၊ ရွှေချောင်းကွက်သစ်ရပ်ကွက်ရှိ ဒေသတွင်းစားသောက် ကုန်ထုတ်လုပ်ဖြန့်ဖြူး ရောင်းချလျက်ရှိသော "ဆင်ချောင်း အရီးချို" စားသောက်ကုန်လုပ်ငန်း၏ အမယ်သစ်ဖြစ်သော နှမ်းဖတ်ချဉ်ကြော်ထုတ်လုပ်မှုလုပ်ငန်းအား သွားရောက်လေ့လာမှုနှင့်အတူ စားသုံးသူကာကွယ်ရေး ဆိုင်ရာအသိပညာပေး ဆွေးနွေးခြင်းများဆောင်ရွက်ခဲ့ကြပါသည်။

          ထိုသို့အသိပညာပေးဆွေးနွေးရာတွင် ခရိုင်ဦးစီးမှူးမှ လုပ်ငန်းရှင်အနေဖြင့် စားသုံးသူကာ ကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ ကုန်စည်များနှင့်စပ်လျဉ်း၍ အာမခံချက် ပေးခြင်း၊ ကုန်စည် (သို့) ဝန်ဆောင်မှုအပေါ် တာဝန်ရှိမှုများ ကုန်အညွှန်းအမှတ်အသားဖော်ပြခြင်း နှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရအရေးယူပိုင်ခွင့်များ၊  တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်းသိရှိစေရန် အသေးစိတ်ဆွေးနွေးခဲ့ပါသည်။

          ဒု-ခရိုင်ဦးစီးမှူးမှ အသိပညာပေးဆွေးနွေးရာတွင် ကုန်အမှတ်တံဆိပ်များအား ဈေးကွက် အတွင်းဖြန့်ဖြူးရောင်းချရာတွင် စိစစ်ခွင့်ပြုချက်ရရှိထားသည့်အတိုင်း ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြ၍ ရောင်းချရမည်ဖြစ်ကြောင်း၊ စစ်ဆေးရေးအရာရှိများမှ ဈေးကွက် အတွင်းကွင်းဆင်းရာတွင် စိစစ်ခွင့်ပြုချက်ရရှိပြီးဖြစ်သော အမှတ်တံဆိပ်များမှာ သတ်မှတ်ချက်များ နှင့်အညီ ရောင်းချမှုမရှိပါက ကုန်အမှတ်တံဆိပ်စိစစ်ခွင့်ပြုချက်များ ပြန်လည်ရုပ်သိမ်းသွားမည်ဖြစ် ကြောင်း၊ လုပ်ငန်းရှင်များအနေဖြင့် ထပ်မံထုတ်လုပ်မည့် စားသောက်ကုန်အမျိုးအမည်များတွင် လည်း ယခုစိစစ်ခွင့်ပြုချက်ရယူထားသည့်အတိုင်း ကုန်အညွှန်းအမှတ်အသားများ ပြည့်စုံစွာထည့် သွင်း၍ ထုတ်လုပ်ဖြန့်ဖြူးရောင်းချရမည်ဖြစ်ကြောင်း၊ စားသုံးသူများအနေဖြင့် ကုန်စည်(သို့) ဝန်ဆောင်မှုနှင့်စပ်လျဉ်း၍ ဝယ်ယူသုံးစွဲရာတွင် ထိခိုက်နစ်နာမှုများ ဖြစ်ပေါ်လာပါက စားသုံးသူ ရေးရာဦးစီးဌာန၊ ခရိုင်ဦးစီးမှူးရုံးသို့ တိုင်ကြားနိုင်မည့်နည်းလမ်းများအား အသိပေးရှင်းလင်း ဆွေးနွေးခဲ့ပါသည်။

စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ အသိပညာပေးဆွေးနွေးရာတွင် ကုန်အညွှန်းအမှတ်တံဆိပ် စိစစ်ခွင့်ပြုချက်ရရှိခြင်းအတွက် ဝမ်းသာဂုဏ်ယူပါကြောင်း၊ လုပ်ငန်းရှင်နှင့် လုပ်သားများလည်းရှေ့ဆက်လက်၍ ယခုလိုပဲ အရည်အသွေးကိုထိန်း၍ စိတ်တူကိုယ်တူ လုပ်ဆောင် စေလိုကြောင်း၊ စားသုံးသူအခွင့်အရေးနှင့် တာဝန်များအကြောင်း ဆွေးနွေးပြောကြားခဲ့ပြီး "ဆင်ချောင်း အရီးချို"စားသောက်ကုန်လုပ်ငန်းမှ အမယ်သစ်ထုတ်လုပ်လိုက်သည့် နှမ်းဖတ်ချဉ်ကြော် ထုတ်လုပ်မှုအား လေ့လာရာတွင် ကုန်ကြမ်းဖြစ်သော ပဲဖတ်ခွေ တစ်ပိဿာကို (၁၅၀၀)ကျပ်ဖြင့်ဝယ်ယူရကြောင်း၊ မြေပဲဆုံဆီကြိတ်ပြီးသား ပဲဖတ်အခွေကို အမှုန့်ဖြစ်အောင်ပြုလုပ်ပြီး တစ်ညတာ အချဉ်ဓာတ်ရရှိရန် ရေစိမ်ထားရပါကြောင်း၊ ပဲဖတ်ခွေ တစ်ပိဿာလျှင် ယခင်အချဉ်ခံပြီးသား အနှစ်(၅)ကျပ်သားနှုန်း ထည့်ရကြောင်း၊ နောက်တစ်နေ့မိုးလင်းလျှင်အကြမ်းဖတ်များဖယ်၍  အနုဖတ်များကို  ပိတ်စဖြင့်ဖိ၍ ရေစစ်ထားရပါကြောင်း၊ (၃)နာရီကြာရေစစ်ထားပြီးလျှင် အသင့်စား နှမ်းဖတ်ချဉ် အစိမ်းရရှိပါကြောင်း၊  နှမ်းဖတ်ချဉ်အစိမ်းကို ကြက်သွန်ဖြူ၊ ကြက်သွန်နီ၊ ရှောက်ရွက်၊ ဆီးစိမ်းဖြင့် အစိမ်းသုတ်စားကြကြောင်း၊ မိမိတို့လုပ်ငန်းမှနှမ်းဖတ်ချဉ်အစိမ်းကို မြေပဲဆုံဆီ၊ ကြက်သွန်ဖြူ၊ ဆားတို့နှင့်ရော၍ လိုအပ်သော အချိုးအဆ အတိုင်းထည့်ပြီး (၄)နာရီခန့် မီးအေးအေးဖြင့်ကြော်၍  နှမ်းဖတ်ချဉ်ကြော်ကို စမ်းသပ် ထုတ်လုပ်ထားပါကြောင်း၊ မိမိတို့လိုချင်သော အနေအထားရပါကအအေးခံ၍ ထုပ်ပိုးပါကြောင်း၊ ဈေးနှုန်းအနေဖြင့် (၂၅)ကျပ်သား တစ်ဗူးလျှင် (၁၅၀၀)ကျပ်၊ (၃၀)ကျပ်သား တစ်ဗူးလျှင် (၂၀၀၀)ကျပ် ရောင်းချကြောင်း၊ ဈေးကွက်အနေဖြင့် ပခုက္ကူဒေသတွင်း နှင့်ရန်ကုန်တိုင်း၊ ဧရာဝတီတိုင်း၊ ပုသိမ်၊ မြန်အောင်မြို့များသို့ ဖြန့်ဖြူးတင်ပို့ရောင်းချပါကြောင်း၊ အလုပ်သမား(၂၀)ဦးခန့်ရှိပါကြောင်း၊ လုပ်အားခမှာတစ်ဦးလျှင် (၄၀၀၀/၅၀၀၀/၆၀၀၀) ကျပ်ခန့်ပေးပါကြောင်း လုပ်ငန်းရှင်ဦးသိန်းနိုင်၏‌ ပြောကြားချက်အရသိရှိရပါသည်။

          ပခုက္ကူဒေသထွက် နှမ်းဖတ်ချဉ်မှာ အညာဒေသ၏နာမည်ကြီး အစားအစာတစ်ခု ဖြစ်ပြီး ပခုက္ကူအညာဒေသတွင်သာမက မြန်မာပြည်အနှံအပြားသို့ တင်ပို့နိုင်ရန် နှမ်းဖတ်ချဉ်အစိမ်းအား ကာလရှည်ကြာစွာထားသိုနိုင်ရန်ကြော်၍ ဈေးကွက်ထိုးဖောက်လာသည့် တန်ဖိုးမြင့် ထုတ်ကုန်တစ်ခု အဖြစ် ဂုဏ်ယူစွာရေးသားဖော်ပြလိုက်ရပါသည်။

DOCA(မကွေး)

          စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ လပွတ္တာခရိုင်၊ မော်လမြိုင်ကျွန်း မြို့နယ်စားသုံးသူရေးရာဌာနမှဦးဆောင်၍ ဈေးကွက်စောင့်ကြည့်စစ်ဆေးရေးအဖွဲ့သည် မတ်လ (၁၄) ရက်နေ့၊ နံနက် (၁၀:၃၀) အချိန်တွင် မြို့ပေါ်ရှိမုန့်မျိုးစုံဆိုင်များ၌ ရောင်းချလျက်ရှိသော ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားခြင်းရှိ/မရှိ ကွင်းဆင်းစစ်ဆေးဆောင်ရွက်ခြင်းကို ပူးပေါင်းအဖွဲ့ဖြင့် ဆောင်ရွက်ခဲ့ကြောင်း သိရှိရသည်။

          အဆိုပါ ဈေးကွက်စောင့်ကြည့်စစ်ဆေးရေးအဖွဲ့တွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံဦးမင်းဇော်လတ်၊ တိုင်းရင်းဆေးရုံအုပ် ဦးခိုင်ဇော်ထွန်းနှင့် စည်ပင်သာယာရေး အဖွဲ့မှ ဈေးတာဝန်ခံဦးစိုင်းဘိုဘိုထွန်းတို့ပါဝင်ပြီး မြို့ပေါ်ရှိမုန့်မျိုးစုံဆိုင်များတွင် ရောင်းချနေသော ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖော်ပြထားခြင်း ရှိ/မရှိနှင့် ကုန်စည်ရောင်းချနေသူများအား စားသုံးသူကာကွယ်ရေး ဥပဒေအခန်း(၁၈) ကုန်အညွှန်း အမှတ်အသားဖော်ပြထားခြင်းနှင့် ပတ်သက်၍ ပုဒ်မ ၄၁၊၄၂၊၄၃ပါ ပြဌာန်းချက်များနှင့်အညီ ကုန်စည်များကို ထုတ်လုပ်ရောင်းချရန် အသိပေးဆောင်ရွက်ခဲ့ကြောင်း သိရှိရသည်။

DOCA(ဧရာဝတီ)