HighLight News

          ကရင်ပြည်နယ်၊ မြဝတီမြို့ ၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံးသည် ၂၀၂၂ခုနှစ် ဇန်နဝါရီလ ၂၁ ရက်နေ့တွင် မြဝတီခရိုင် နယ်စပ်ရေးရာဝန်ကြီးဌာန၊ ပညာရေးနှင့် လေ့ကျင့်ရေးဦးစီး ဌာန၊ အမျိုးသမီးအိမ်တွင်းမှုသက်မွေးလုပ်ငန်း ပညာသင်တန်းကျောင်း၊ အဆင့်မြင့်အိမ်တွင်းမှု  စက် ချုပ်သင်တန်း အမှတ်စဉ်(၂) သင်တန်းခန်းမတွင် ခရိုင်ဦးစီးမှူး ဦးနိုင်မိုးကိုနှင့် ဝန်ထမ်း များသည် စားသုံးသူကာကွယ်ရေး အသိပညာပေးဟော ပြောဆွေးနွေးခဲ့ကြပါသည်။ အဆိုပါ သင်တန်း တွင် ခရိုင်မီးသတ်ဦးစီးဌာန၊ ခရိုင်ပတ်ဝန်းကျင်ထိန်းသိမ်းရေးဦးစီးဌာနတို့ ကလည်း အသိပညာပေး ဟောပြောခြင်း၊ လက်တွေ့သရုပ်ပြခြင်းများပြုလုပ်ခဲ့ကြပါသည်။  

         မြဝတီခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးမှ စားသုံးသူကာကွယ်ရေးသိကောင်း စရာများအကြောင်း၊ စားသုံးသူအခွင့်အရေးများအကြောင်း၊ ကုန်အညွှန်းအမှတ်အသားများအကြောင်း၊ စားသုံးသူကာကွယ်ရေးဥပဒေများအကြောင်း၊ ကုန်စည်ဝန်ဆောင်မှုနှင့် စပ်လျဉ်း၍ နစ်နာဆုံးရှုံးမှု ဖြစ်ပေါ်လာပါက နစ်နာမှုနှင့်စပ်လျဉ်း၍ အရေးဆိုတိုင်ကြားနိုင်သည့် ကိစ္စရပ်များကို အသိပညာပေး ဟောပြောခဲ့ပါသည်။

အဆိုပါသင်တန်းတွင် သင်တန်းသူ ၄၀ ဦး တက်ရောက်ခဲ့ပြီး၊ သင်တန်းသူများမှလည်း သိလို သည်များကိုမေးမြန်းခဲ့၍ ပြန်လည်ဖြေကြားဆွေးနွေးခဲ့ပြီး ဟောပြောပွဲကို ၁၅း၃၀ နာရီအချိန်တွင် အောင်မြင်စွာ ပြီးစီးခဲ့ကြောင်းသိရှိရပါသည်။

DOCA(ကရင်)

          စားသုံးသူများ ဘေးအန္တရာယ်ကင်းရှင်းစေရေး၊ ထုတ်ကုန်လုံခြုံ စိတ်ချရမှုရှိစေရေးအတွက် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေ(၂၀၁၉) အခန်း(၁၈)ပါ ကုန်အညွှန်းအမှတ်အသားဖော်ပြရာတွင် သတ်မှတ်ချက်များနှင့်အညီ ပြည့်စုံမှန်ကန် စွာထည့်သွင်း ဖော်ပြလာခြင်းဖြင့် လုပ်ငန်းများပိုမိုအောင်မြင်စွာ အကျိုးစီးပွားဖြစ်ထွန်းလာနိုင်စေရန် ရည်ရွယ်၍ ၂၀၂၂ခုနှစ် ဇန်နဝါရီလ(၂၀)ရက်နေ့၊ နံနက်(၁၀:၀၀)အချိန်တွင် တိုင်းဒေသကြီး/ခရိုင် ဦးစီးမှူးတို့၏ လမ်းညွှန်ချက်ဖြင့်  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး ဒေါ်မွန်မွန်စိုးနှင့်ဝန်ထမ်းများသည် ပခုက္ကူမြို့၊ အမှတ်(၁၅) ရပ်ကွက် (၁၁)လမ်းရှိ မုန့်လုပ်ငန်းများအား ကွင်းဆင်း၍ လုပ်ငန်းရှင်များနှင့် တွေ့ဆုံဆွေးနွေးခဲ့ပါသည်။    

        ဒု-ခရိုင်ဦးစီးမှူးမှ လုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေး လုပ်ငန်းရှင်၏တာဝန်များ၊ ကုန်အညွှန်းအမှတ် အသားဖော်ပြခြင်းနှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များ အကြောင်းသိရှိလိုက်နာစေရန် ရှင်းလင်းဆွေးနွေးခဲ့ပြီး ပေါင်မုန့်လုပ်ငန်းများ၏ ကုန်အမှတ် တံဆိပ်များအား လေ့လာရာတွင် အနည်းငယ်သာလိုအပ်ချက်ရှိ၍ ပြင်ဆင်ဖြည့်စွက်ရန် လိုအပ်ပါကြောင်းနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ် အသားဖော်ပြချက်များနှင့် ကိုက်ညီမှုရှိပါက စားသုံးသူရေးရာဦးစီးဌာနသို့ ကုန်အမှတ်တံဆိပ် စိစစ်ခွင့်ပြုချက်ရရှိရန် နမူနာပုံစံများနှင့်တကွ လျှောက်ထားနိုင်ပြီး စိစစ်ပြန်ကြားပေးလျက်ရှိကြောင်း အသေးစိတ်ရှင်းလင်းခဲ့ပြီး စားသုံးသူကာကွယ်ရေးဥပဒေစာအုပ်နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြော်ငြာချက် အမှတ်(၂/၂၀၁၉)ပါ လက်ကမ်းစာစောင်များ ဖြန့်ဝေခဲ့ပါသည်။

          ဆက်လက်၍ ပဲပေါင်မုန့်လုပ်ငန်းတစ်ခုအား လေ့လာရာတွင် အသုံးပြုသော ကုန်ကြမ်း ပစ္စည်းများအား ရန်ကုန်မှ မှာယူကြောင်း၊ ဂျုံ၊ ကြက်ဥ၊သကြား၊ ပဲ၊ ရေသန့် ၊ပွဆေး၊ မာဂျရင်း၊ ဆား၊ ပေါင်မုန့်တဆေးများကို လိုအပ်သည့် အချိုးအဆအတိုင်းရောမွှေ၍ (၄)နာရီခန့် ကြာအောင် နှပ်ထားပြီး မုန့်ဖုတ်စက်သို့ (၁၅)မိနစ်ခန့်ဖုတ်ရကြောင်း၊ ရရှိလာသောမုန့်များကို အအေးခံ၍ပါကင် ထုတ်ပိုးကြောင်း၊ ဈေးကွက်အနေဖြင့် ပခုက္ကူဒေသတွင်း၊ ကမ္မ၊ မြစ်ခြေနှင့် ညောင်ဦးဒေသများသို့ ဖြန့်ဖြူးရောင်းချကြောင်း၊ ဈေးနှုန်းအနေဖြင့် (၅၅)ဂရမ်တစ်ထုတ်လျှင် လက်လီဈေး(၁၀၀) ကျပ်နှင့် လက်ကားဈေး (၈၆)ကျပ်ရောင်းချကြောင်း၊ အလုပ်သမားဦးရေ(၂၀)ဦးခန့်ရှိပြီး လုပ်အားခ အနေဖြင့် (၅၀၀၀/၆၀၀၀)ကျပ်ပေးကြောင်း၊ ရပ်ကွက်အတွင်းရှိ ပြည်သူများအား အလုပ်အကိုင် အခွင့်အလမ်း များလည်းဖန်တီးပေးနိုင်ပါကြောင်း လုပ်ငန်းရှင်၏ ပြောကြားချက်အရသိရှိရပါသည်။

DOCA(မကွေး)

             စစ်ကိုင်းတိုင်းဒေသကြီး၊ ရွှေဘိုခရိုင် ဝက်လက်မြို့နယ်၌ ဇန်နဝါရီလ (၂၁)ရက်နေ့ နံနက် (၁၀:၀၀)နာရီအချိန်တွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးမျိုးအောင်နှင့် မိတ်ဖက်ဌာနများဖြစ်သော မြို့နယ်အထွေထွေအုပ်ချုပ်ရေးဦးစီးဌာန၊ ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးကော်မတီနှင့် ရပ်ကွက်အုပ်ချုပ်ရေးမှူးများ ပါဝင်သောအဖွဲ့ဖြင့် ဝက်လက်မြို့ အမှတ်(၁)ရပ်ကွက်ရှိ သောက်ရေသန့်လုပ်ငန်းများတွင် ကုန်ညွှန်းအမှတ်အသားများပြည့်စုံစွာ ဖော်ပြပါရှိခြင်း ရှိ/မရှိနှင့် အမှတ်(၂)ရပ်ကွက်ရှိ ဆေးဝါးအရောင်းဆိုင်များတွင် စံမမီဆေးဝါးများရောင်းချခြင်း ရှိ၊မရှိအား ဈေးကွက်စောင့်ကြည့် စစ်ဆေးခဲ့ပါသည်။

       စစ်ဆေးရာတွင် အမှတ်(၁)ရပ်ကွက်ရှိ သောက်ရေသန့်လုပ်ငန်းရှင်ထံသို့ ကွင်းဆင်း၍ ထုတ်ကုန်များတွင် ဖော်ပြပါရှိရမည့် ကုန်ညွှန်းအမှတ်အသားများ ပြည့်စုံစွာဖော်ပြထုတ်လုပ်ရောင်းချမှုရှိ/မရှိ သတ်မှတ် လိုင်စင်များရှိ/မရှိ စစ်ဆေးဆောင်ရွက်ရာ လိုအပ်ချက်များအပေါ်ဖြည့်စွက် လုပ်ဆောင်နိုင်ရေး လမ်းညွှန်မှာကြား၍ စားသုံးသူကာကွယ်ရေးဥပဒေနှင့်  စားသုံးသူများဘေးဥပါဒ်အန္တရာယ်ကင်းရှင်းရေးဆိုင်ရာများကို  ဆွေးနွေးခဲ့ပါသည်။

          ဆက်လက်၍ အဆိုပါပူးပေါင်းအဖွဲ့အနေဖြင့် အမှတ်(၂)ရပ်ကွက်ရှိ ဆေးနှင့်ဆေးပစ္စည်း အရောင်းဆိုင်များသို့ FDA မှတားမြစ်ထားသော စံမမီ ဆေးဝါးများ ဈေးကွက်အတွင်း ရောင်းချနေမှု ရှိ/မရှိ စစ်ဆေးဆောင်ရွက်ရာ တားမြစ်ထားသော စံမမီ ဆေးဝါးများ ရောင်းချနေမှုမရှိပါကြောင်း စစ်ဆေးတွေ့ရှိခဲ့ပြီး အဆိုပါဆေးဝါးများသည် သုံးစွဲရန်မသင့်သော စံမမီဆေးဝါးများဖြစ်၍ စားသုံးသူများ ဘေးဥပါဒ်အန္တရာယ်များ ဖြစ်ပေါ်စေနိုင်ခြင်းကြောင့် ဈေးကွက်အတွင်းသို့ မှာယူရောင်းချမှုမပြုရန် အသိပညာပေး ဆောင်ရွက်ခဲ့ကြောင်းနှင့် ဆက်လက်၍လည်း မိတ်ဖက်ဌာနများနှင့် ပူးပေါင်း၍ စစ်ဆေးခြင်းများ ဆောင်ရွက်သွားမည်ဟု သတင်းရရှိပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

          စားသုံးသူရေးရာဦးစီးဌာနသည် စားသုံးသူများလုံခြုံစိတ်ချရမှုရှိစေရေး၊စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေး၊ထုတ်ကုန်များလုံခြုံစိတ်ရမှုရှိစေရေး၊ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့်သုတေသနလုပ်ငန်းမျာ ဆောင်ရွက်ရန်နှင့် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ပြည်တွင်း၌လယ်ယာထွက်ကုန်နှင့်ဆိုင်သည့်ကုန်ပစ္စည်းများအား ပြည်ပပို့ကုန်မြှင့်တင်ရန်အတွက် စျေးကွက်အလားအလာရှိသော သီးနှံများအားဖော်ထုတ်ပြီး တန်ဖိုးမြှင့်ထုတ်ကုန်များထုတ်လုပ်၍ စျေးကွက်ရရှိရေးအတွက်ဆောင်ရွက်လျှက်ရှိပါသည်။ (၂၀-၁-၂၀၂၂)ရက် နေ့တွင် ကျောက်ဆည်ခရိုင်၊စားသုံးသူရေးရာဦးစီးဌာနမှဦးဆောင်ပြီး မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့များနှင့်ပူးပေါင်းပြီး ကျောက်ဆည်မြို့ရှိ Shopping Mall, Minimartနှင့် စားသုံးဆီအရောင်းဆိုင်လုပ်ငန်းရှင်များအား ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များအား ကွင်းဆင်းအသိပေး ဆောင်ရွက်ခဲ့ပါသည်။ကွင်းဆင်းရာတွင် ကျောက်ဆည်ခရိုင်၊စားသုံးသူရေးရာဦးစီးဌာန၊ခရိုင်ဦးစီးမှူးက မြန်မာနိုင်ငံစားသုံးသူကာကွယ်ရေးကော်မရှင်မှ ၂၀၁၉ခုနှစ်၊ ဒီဇင်ဘာလ ၃ ရက်စွဲပါညွှန်ကြားချက် အမှတ်၂/၂၀၁၉ဖြင့် “ကုန်စည်များတွင် မြန်မာ ဘာသာဖြင့်ဖြစ်စေ၊မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍တွဲလျှက်ဖြစ်စေဖော်ပြရာ၌ “စီးပွားရေးလုပ်ငန်းရှင်များ”လိုက်နာဆောင်ရွက်ရန်ညွှန်ကြားချက်”အား ကုန်စည်အုပ်စုအလိုက် ထုတ်ပြန်ပေးခဲ့ပြီးဖြစ်ကြောင်း ၊ ယင်း ကုန်စည်အုပ်စု(၈)ခုနက် အစားအသောက်ကုန်စည်အုပ်စုတွင်ပါဝင်သည့် စားသုံးဆီအမျိုးမျိုးနှင့် စပ်လျဉ်း၍ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှု အညွှန်းတို့ကိုမဖြစ်မနေဖော်ပြရန်လိုအပ်သည့်အတွက် ညွှန်ကြားချက်အားထုတ်ပြန်ပြီးဖြစ်ကြောင်း ၊ ယခုအခါတွင် စျေးကွက်အတွင်း၌ စားသုံးဆီများအနက် အချို့သောစားသုံးဆီများကို ဟင်းသီးဟင်းရွက်ဆီ(Vegetable Oil, Cooking Oil)ဟု ဖော်ပြချက်သည် ကုန်စည်တစ်ခု၏ အမျိုးအမည် မဟုတ်သည့်အပြင် စားသုံးသူများအားထင်ယောင်ထင်မှားဖြစ်စေသည့်အတွက် မိမိတို့ဝန်ကြီးဌာနမှ (၂၂-၁၂-၂၀၂၁)ရက်နေ့တွင် ညွှန်ကြားချက်အမှတ် (၁/၂၀၂၁) ဖြင့်စီးပွားရေးလုပ်ငန်းရှင်များအနေဖြင့် စျေးကွက်အတွင်း ဖြန့်ဖြူးရောင်းချသည့် ဟင်းသီးဟင်းရွက်ဆီ (Vegetable Oil, Cooking Oil) အမျိုးအစားနှင့်စပ်လျဉ်း၍ ကုန်အညွန်းအမှတ်အသားများ ဖော်ပြရာတွင် ပင်ရင်းပါဝင်ပစ္စည်းကို အခြေခံသောကုန်စည်အမျိုးအမည်ကိုတိကျစွာ မြန်မာဘာသာဖြင့် ဖော်ပြရမည်ဖြစ်ကြောင်း၊ ဥပမာအနေဖြင့် ဟင်းသီးဟင်းရွက်ဆီ (စားအုန်းဆီ/အဆင့်မြင့်စားအုန်းဆီ)ဟု ဖော်ပြရမည်ဖြစ်ကြောင်း ၊ ကုန်စည်၏ အသားတင်ပမာဏ နှင့်အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ပြီး ၄င်းညွှန်ကြားချက် စတင်ထုတ်ပြန်ပြီး (၆)လပြည့်မြောက်သည့်နေ့မှစ၍ အာဏာသက်ရောက်မည်ဖြစ်ကြောင်း စားသုံးဆီရောင်းချသည့်  အရောင်းဆိုင်(၂၂)ဆိုင်အား အသေးစိတ်ရှင်းလင်းပြောကြားခဲ့ပြီး ဟင်းသီးဟင်းရွက်ဆီနှင့်ပတ်သက်သည့်လက်ကမ်းစာစောင်များ ဖြန့်ဝေခဲ့ပါသည် ။ ကျောက်ဆည်မြို့ရှိ စျေးကွက်အတွင်းတွင် (Vegetable Oil, Cooking Oil)ဖော်ပြချက်များဖြင့် အမှတ်တံဆိပ်(၁၄)မျိုးအား ရောင်းချနေကြောင်း သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

၂၅.၁.၂၀၂၂ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်-