HighLight News

ပဲခူးတိုင်းဒေသကြီး အတွင်းရှိ ပြည်တွင်းကုန်သွယ်ရေးဖွံ့ဖြိုးတိုးတက်မှုလုပ်ငန်းများ အကောင်အထည်ဖော်ဆောင်ရွက်နိုင်ရေးအတွက် သီးနှံဆိုင်ရာ အရည်အသွေးစမ်းသပ်ခြင်းလုပ်ငန်းစဉ်များ လေ့လာနိုင်‌ရေး လှည်းကူးမြို့ရှိ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲရေး ဌာနစု ( CTQM) သို့ ၁၅.၁၁.၂၀၂၁ ရက်နေ့ ၊ နံနက် ၈ : ၀၀ နာရီအချိန်တွင် စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးမှ ဦးဆောင်၍ အရာထမ်း (၃)ဦးနှင့် အမှုထမ်း (၁၂)ဦး ၊ စုစုပေါင်း (၁၅)ဦးဖြင့် (၁) ရက်တာလေ့လာရေးခရီးစဉ် သွားရောက်ခဲ့ပါသည်။
အဆိုပါ လေ့လာရေးခရီးစဉ်တွင် ပထမဦးစွာ ကုန်ပစ္စည်းစမ်းသပ်စစ်ဆေးရေးနှင့် အရည်အသွေး စီမံခန့်ခွဲမှု ဌာနစု ၊ဌာနမှူး ဦးသန့်စင်မှ ဌာန၏ နောက်ခံသမိုင်းအကျဉ်းနှင့် ကုန်ပစ္စည်း အရည်အသွေး ဓာတ်ခွဲစမ်းသပ်စစ်ဆေးခြင်းများနှင့် ပတ်သက်၍ ရှင်းလင်းဆွေးနွေးခြင်း၊ ဆီနှင့် ဆီထွက်သီးနှံ ဓာတ်ခွဲခန်းတွင် စမ်းသပ်နိုင်သောအမျိုးအစားများ ၊ သီးနှံ (ဓာတု) ဓာတ်ခွဲခန်းတွင် စမ်းသပ် နိုင်သော အမျိုးအစားများ၊ ပိုးသတ်ဆေးကြွင်းဓာတ်ခွဲခန်းတွင် စမ်းသပ်နိုင်သော အမျိုးအစားများ၊ ပိုးမွှား ဓာတ်ခွဲခန်းတွင် စမ်းသပ်နိုင်သော အမျိုးအစားများ၊ ၊ CTQM တွင် ပို့ချပေးလျှက်ရှိသော သင်တန်းများ၊ မြန်မာ့ သဘာဝရော်ဘာ အရည်အသွေးစစ်ဆေးရေး ဓာတ်ခွဲခန်းနှင့်ပတ်သက်၍ လက်ရှိ လုပ်ဆောင်နေသည့် လုပ်ငန်းစဉ်များနှင့် ရှေ့ဆက်လက်ဆောင်ရွက်မည့် လုပ်ငန်းစဉ်များကို အကျယ်တဝင့် ရှင်းလင်းပြောကြားခဲ့ပါသည်။ ဆက်လက်၍ ဆီနှင့် ဆီထွက် သီးနှံဓာတ်ခွဲခန်းမှူး ၊ ဒေါ်အိအိချောမှ ဆီထွက်သီးနှံများနှင့်ပတ်သက်၍ သိသင့်သိထိုက်သည့် အချက်အလက်များ ၊ ဆီနှင့် ဆီထွက်သီးနှံ ဓာတ်ခွဲခန်းတွင် စမ်းသပ်စစ်ဆေးပေးနေသည့် အခြေအနေများကို ရှင်းလင်းပြောကြားခဲ့ပြီး သီးနှံ (ရူပဓာတ်ခွဲခန်း) တွင် စမ်းသပ်နိုင်သော အမျိုးအစားများနှင့်ပတ်သက်၍ ဓာတ်ခွဲခန်းမှူး ဦးအောင်ကျော်မိုးမှ ရှင်းလင်းဆွေးနွေးခဲ့ပါသည်။ ထို့နောက် လေ့လာရေးအဖွဲ့မှ ဓာတ်ခွဲခန်း (၇)ခုအား အဖွဲ့ (၂)ဖွဲ့ခွဲ၍ လိုက်လံလေ့လာခဲ့ကြောင်းသတင်းရရှိပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးသည် စားသုံးသူကာကွယ်ရေးလုပ်ငန်းများကို ကျယ်ကျယ်ပြန့်ပြန့်ဆောင်ရွက်နေသကဲ့သို့ တစ်ဖက်တွင်လည်း ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ဒေသတွင်းမှ စိုက်ပျိုးထွက်ရှိသည့် သီးနှံများ၏ စိုက်ပျိုးထုတ်လုပ်မှု၊ ဈေးကွက်ဈေးနှုန်းနှင့် ရောင်းဝယ်ဖောက်ကားမှုအခြေအနေများ၊ ပြည်ပပို့ကုန်အလားအလာရှိသော လယ်ယာထွက်ကုန်များကို ရှာဖွေဖော်ထုတ်၍ ဈေးကွက်ဝေစုရရှိရေး အထက်ဌာန အဆင့်ဆင့်သို့ တင်ပြဆောင်ရွက်လျှက်ရှိပါသည်။ စစ်ကိုင်းတိုင်းဒေသကြီး၏ စက်မှုကုန်ကြမ်းသီးနှံဖြစ်သော ဝါသီးနှံသည် ပြည်တွင်းတွင်သာမက ပြည်ပဈေးကွက်အထိ တင်ပို့နေသည့် သီးနှံဖြစ်ပါသည်။ ဈေးကွက် ဝေစု ခိုင်မာမှုရရှိပါက တောင်သူများ ပိုမိုစိတ်ဝင်စားမှုရှိလာပြီး စိုက်ဧကများ နှစ်စဉ်တိုးတက်လာမည် ဖြစ်သလို ဝါစိုက်ပျိုးထုတ်လုပ်မှုကဏ္ဍ ဝါနှင့်ဝါထွက်ပစ္စည်း Supply Chain တစ်ခုလုံးရေရှည်ဖွံ့ဖြိုး တိုးတက်လာမည် ဖြစ်ပါသည်။
စစ်ကိုင်းတိုင်းဒေသကြီးသည် ဝါကြီး၊ မလှိုင်နှင့် ချည်မျှင်ရှည်ဝါများစိုက်ပျိုးကြပြီး အဓိကစိုက်ပျိုး ထုတ်လုပ်သည်မှာ ချည်မျှင်ရှည်ဝါ ဖြစ်ပါသည်။ ဝါသီးနှံကို မိုးဦးကာလ မေ၊ ဇွန်၊ ဇူလိုင်လများတွင် စိုက်ပျိုးပြီး စက်တင်ဘာ၊ အောက်တိုဘာ၊ နိုဝင်ဘာ၊ ဒီဇင်ဘာလများတွင် ထွက်ပေါ်ပါသည်။ ၂၀၂၁ခုနှစ် ဝါသီးနှံ စတင်ထွက် ပေါ်ချိန်တွင် တစ်ပိဿာလျှင် (၁၇၀၀)ကျပ် ပေါက်ဈေးရှိပြီး ယခုအောက်တိုဘာလ နောက်ဆုံးပတ်တွင် ၁၃၀၀-၁၄၀၀ ကျပ်ထိ ဈေးကျသွားကြောင်း၊ ဝါသီးနှံ၏ ပေါက်ဈေးနှုန်းသည် မူဆယ် (တရုတ်)ဈေးကွက်ပေါ်တွင် မူတည်နေကြောင်း၊ ကျေးရွာများမှ ထွက်ရှိသော ဝါသီးနှံများကို ဒေသတွင်း ရှိဝါကြိတ်စက်များ သို့သွားရောက်ရောင်းချခြင်း၊ ဒေသပွဲစားများမှလာရောက်ဝယ်ယူခြင်းများ ရှိပါသည်။ ဒေသတွင်းထွက်ရှိ သောဝါများကို ဝယ်ယူသန့်စင်ပြီး ဝါဂွမ်းကို စစ်ကိုင်း၊ မန္တလေးသို့ တင်ပို့ ရောင်းချခြင်း၊ တရုတ်ကုန်သည်များမှ ပစ္စည်းလာရောက်ကြည့်ရှု့ပြီး စာချုပ်ချုပ်ဆို ဝယ်ယူကြပါသည်။ ဝါစက်များအနေဖြင့် ဝါသီးနှံကို ရာသီချိန် (၅)လခန့်သာ ဝယ်ယူပြီး ဝါစေ့များကို သိုလှောင်ထား၍ တစ်နှစ်ပတ်လုံး ဝါစေ့ဆီကြိတ်ခွဲကြောင်း၊ ဝါသီးနှံကို ဒေသတွင်းသုံးစွဲမှု အနည်းငယ်သာရှိပြီး မုံရွာ၊ မန္တလေးဈေးကွက်မှတစ်ဆင့် တရုတ်နိုင်ငံသို့ တင်ပို့ကြကြောင်း၊ ဆားလင်းကြီး၊ အရာတော်၊ ယင်းမာပင်၊ မုံရွာမှ ငွေချည်-၆ အမျိုးအစားအားဝယ်၍ ဂွမ်းကြိတ်ပါသည်။ မုံရွာမြို့တွင် ငွေချည်-၆ ကို Aအဆင့် ၁၄၀၀ကျပ် Bအဆင့် ၁၂၀၀ကျပ် ပေးဝယ်ရပြီး ရောင်းဈေးအနေဖြင့် ဂွမ်းကို ၄၀၀၀ ကျပ် ဝန်းကျင် ရရှိပါသည်။ ဂွမ်းကို ယခင်နှစ် များက ဆားလင်းကြီး ချည်မျှင်နှင့်အထည်စက်ရုံမှ အများဆုံးဝယ်ယူပြီး ယခုနှစ်တွင် အရောင်းအဝယ် မဖြစ်ကြောင်း လေ့လာသိရှိရပါသည်။
စစ်ကိုင်းတိုင်းဒေသကြီးတွင် ဝါသီးနှံမှထွက်ရှိသည့်ဝါဂွမ်းကို တစ်နိုင်တစ်ပိုင် ရိုးရာလက်ရက်ကန်း ဖြင့် ဖျင်လုံချည်၊ ဖျင်စောင်၊ ဖျင်တဘက်နှင့် ဖျင်လက်သုတ်ပုဝါများကို ဒေသတွင်းသုံးစွဲရန်နှင့် ဒေသ ထွက် ချည်ထည်များရိုးရာမပျက် ဝတ်ဆင်ရန်အတွက် အနည်းငယ်သာ လုပ်ကိုင်ဆောင်ရွက်ကြကြောင်း၊ မုံရွာစောင်များ ထုတ်လုပ်နိုင်သော်လည်း ယခုအချိန်တွင် ထုတ်လုပ်မှုကျဆင်း၍ အနည်းငယ်သာ ထုတ်လုပ်နိုင်ကြောင်း၊ ဝါသီးနှံတန်ဖိုးမြှင့်ထုတ်ကုန်အဖြစ် ဝါဂွမ်း၊ ဝါစေ့၊ ဝါစေ့ဆီနှင့်ဆီကြိတ်ဖတ်များ ထုတ်လုပ်ကြကြောင်း၊ ဝါချည်စစ်စစ်မှ ဆေးရုံသုံးဂွမ်းများလည်း ထုတ်လုပ်ရောင်းချကြကြောင်း၊ ထိုအပြင် အဆင့်မြင့်ဝါကို မန္တလေးရှိ ချည်မျှင်စက်ရုံများသို့ ပို့၍ ၁/၂၀ ချည်ထုပ်နှင့် ၁/၄၀ချည်ထုပ်များလည်း ထုတ်လုပ်ကြကြောင်း၊ ဆိပ်ခွန်မှ ကချင်ပုဆိုး၊ ကချင်ထမိန်များကို တရုတ်ပြည်မှလာသော (ယူကို)ချည်နှင့် ရောယှက်ထုတ်လုပ်ကြကြောင်းနှင့် ကလေးမြို့မှလည်း ချင်းရိုးရာဝတ်စုံများ ထုတ်လုပ်ကြကြောင်း လေ့လာသိရှိရပါသည်။ ဝါဂွမ်းတစ်ပိဿာ ပေါက်ဈေးနှုန်းမှာ ၄၅၀၀ကျပ်၊ ဝါစေ့ တစ်ပိသာ ၁၄၀၀ ကျပ်၊ ဝါစေ့ဆီတစ်ပိဿာ ၄၃၀၀ကျပ်၊ ဝါစေ့ဖတ် တစ်ပိဿာလျှင် ၆၀၀ကျပ် ပေါက်ဈေး များရှိကြောင်း သိရှိရပါသည်။
စစ်ကိုင်းတိုင်းဒေသကြီးအတွင်းတွင် ဝါသီးနှံအစုအဖွဲ့ (၁၅)ဖွဲ့ ဖွဲ့စည်းထားရှိပြီး ရက်ကန်း လုပ်ငန်းရှင်များ အသင်းအဖွဲ့/အစုအဖွဲ့များအနေဖြင့် တိုင်းအသင်း(၁)သင်း၊ မြို့နယ်အသင်း (၁၁)သင်းနှင့် အစုအဖွဲ့ (၂၂)ဖွဲ့ ဖွဲ့စည်းထားရှိကြောင်း သိရှိရပါသည်။ စစ်ကိုင်းတိုင်းဒေသကြီးအတွင်းရှိ ဝါစိုက်တောင်သူများ အနေဖြင့် ဘဏ်မှစိုက်ပျိုးစရိတ်ချေးငွေများ ချေးပေးစေလိုကြောင်း၊ မျိုးစေ့နှင့် ဓါတ်မြေဩဇာများ ထုတ်ပေးစေလိုကြောင်း၊ ဝါဈေးကွက်ကို ပြင်ပဈေးကွက်နှင့် ချိတ်ဆက်ဆောင်ရွက်ပေးစေလိုကြောင်း၊ ယခင်နှစ်တွင် ဝါတစ်ပိဿာပေါက်ဈေးမှာ ၇၀၀-၈၀၀ကျပ် ခန့်သာ ရရှိ၍ ဝါစိုက်တောင်သူများနည်းသွားကြောင်း၊ အချို့မြို့နယ်များတွင် မိုးများ၍ ဝါစိုက်ခင်းများ ပျက်စီးကြောင်း၊ ယခုနှစ်တွင် ဝါတစ်ပိဿာ ၁၄၀၀ကျပ် ရရှိ၍ စိုက်ပျိုးသူတောင်သူများ ပိုမို စိတ်ဝင်စားလာကြောင်း၊ ဈေးကွက်တည်ငြိမ်ရေး ထိန်းသိမ်းပေးစေလိုပါကြောင်း၊ ဈေးကွက်ခိုင်မာမှု နည်းသည့်အတွက် ဝယ်လက်ရှာဖွေစောင့်ဆိုင်းရခြင်း၊ လက်ရှိစိုက်ပျိုးနေသော မျိုးများမှာ အရည်အသွေး နိမ့်ကျလာခြင်း၊ တစ်ဧက စိုက်ပျိုးထုတ်လုပ်မှု ကုန်ကျစရိတ်မှာ တစ်နှစ်ထက်တစ်နှစ် ပိုမိုမြင့်မားလာခြင်း၊ သွင်းအားစု ပစ္စည်းများ ဈေးနှုန်းမြင့်တက်လာသည့်အတွက် အရင်းအနှီးများပြီး အကျိုးအမြတ်ရရှိမှု အခွင့်အလမ်း နည်းပါးလာခြင်း၊ ပြည်တွင်းမှ စိုက်ပျိုးထွက်ရှိသည့် ဝါနှင့်ဝါ ထွက်ပစ္စည်းများမှာ အရည်အသွေး နိမ့်ကျလာခြင်း၊ ကုန်ကြမ်းမှ ကုန်ချောအဖြစ် ထုတ်လုပ် နိုင်မှုနည်းပါးခြင်း၊ ပြည်တွင်းမှဝါနှင့် ဆက်စပ်သည့် ချည်မျှင်နှင့်အထည်စက်ရုံများ ပုံမှန် လည်ပတ် နိုင်မှုမရှိခြင်း၊ ပြည်ပမှစားသုံးသူများအကြိုက် အရောင်အသွေးစုံချည်ထည်များ အစားထိုး ဝင်ရောက် နေခြင်းစသည့်အချက်များကလည်း ဝါနှင့်ဝါထွက် ပစ္စည်း ကဏ္ဍများတွင် ကြုံတွေ့နေရသည့် အခက်အခဲများ ဖြစ်ကြောင်း လေ့လာသိရှိရပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန

စစ်ကိုင်းတိုင်းဒေသကြီး၊ မုံရွာခရိုင်ရှိ ဆီစက်လုပ်ငန်းရှင်များသည် ယခင် (၂၀၂၀-၂၀၂၁)ဘဏ္ဍာနှစ်တွင် စုစုပေါင်းဆီစက်၏ ၁၀% သာလည်ပတ်နိုင်ကြသော်လည်း ယခု(၂၀၂၁-၂၀၂၂) ဘဏ္ဍာနှစ်တွင် ဆီဈေးကွက်အခွင့်အလမ်းပေါ်ပေါက်လာ၍ ဆီစက်စုစုပေါင်း၏ ၅၀% အထိလည်ပတ်လာနိုင်ကြောင်း ဆီစက်လုပ်ငန်းရှင်များထံမှ သိရပါသည်။
မုံရွာခရိုင်တွင် ဆီထွက်သီးနှံ မိုး၊ ဆောင်း (မြေပဲ၊ နှမ်း၊ နေကြာ) စိုက်ဧက (၃၀၀၀၀၀) ကျော်ခန့် စိုက်ပျိုးပြီး ဆီစက်အရေအတွက် (၁၄၅)စက် ရှိကြောင်း သက်ဆိုင်ရာဌာနများ၏ စာရင်းများအရသိရပါသည်။
ခရိုင်အတွင်း ဆီထွက်သီးနှံကုန်ကြမ်းထွက်ရှိမှု၊ ဆီစက်များကြိတ်ခွဲထုတ်လုပ်မှုအရ မုံရွာခရိုင်သည် ဆီလိုအပ်ချက်ပြည့်မီပြီး စားသုံးမှုပိုလျှံသည့် ခရိုင်ဖြစ်ကြောင်းသိရသည်။ သို့ရာတွင်လည်း ဆီထွက်သီးနှံများကို ဝယ်လိုအား မြင့်မားမှုကြောင့် တရုတ်ဝယ်လက်များနှင့် ဈေးနှုန်းယှဉ်ပြိုင်ဝယ်ယူပြီး သိုလှောင်ကြိတ်ခွဲ ထုတ်လုပ်ရောင်းချသည့်အတွက် မြေပဲဆီ၊ နှမ်းဆီနှင့် နေကြာဆီများ၏ ဈေးနှုန်းကြီးမြင့်လာပြီး ပြည်ပမှတင်သွင်းလာသည့် စားအုန်းဆီဈေးကွက်ကို ယှဉ်ပြိုင်ရောင်းချရန် အခက်အခဲများ ကြုံတွေ့ခဲ့ရပါသည်။ ၂၀၂၁ခုနှစ် စက်တင်ဘာလနောက်ပိုင်း စားအုန်းဆီဈေးနှုန်းမြင့်မားလာပြီး ဒေသထွက် မြေပဲဆီ၊ နှမ်းဆီနှင့် နေကြာဆီများ၏ ဈေးနှုန်းနှင့် ကွာဟမှုအနည်းငယ်သာရှိသောကြောင့် အခြေခံလူတန်းစား များသည် ကျန်းမာရေးနှင့် ညီညွတ်သော ဒေသထွက်ဆီများကို ဝယ်ယူစားသုံးလာကြသည်။
အောက်တိုဘာနှင့် နိုဝင်ဘာလများတွင် ဆောင်းမြေပဲထွက်ရှိပြီး ယခုနှစ်တွင် တရုတ်ဈေး ကွက်သို့ မြေပဲဆံတင်ပို့မှုမရှိသည့်အတွက် ဆီစက်လုပ်ငန်းရှင်များအနေဖြင့် ကုန်ကြမ်းလုံ လောက်စွာရရှိခြင်း၊ ဒေသထွက်ဆီများစားသုံးမှု မြင့်မားလာခြင်း၊ စားအုန်းဆီဈေးနှုန်းနှင့် ဒေသထွက်ဆီများ၏ဈေးနှုန်းကွာခြားမှု ကျဉ်းမြောင်းလာခြင်း၊ ဝယ်ယူစားသုံးမှုများပြားလာခြင်းစသည့်တို့ကြောင့် ဆီစက်လုပ်ငန်းရှင်များအနေဖြင့် ယခင်နှစ်ထက် ပိုမိုကြိတ်ခွဲ ထုတ်လုပ် ရောင်းချလျက် ရှိကြောင်းသိရပါသည်။
၂၀၂၁-ခုနှစ် နိုဝင်ဘာလ တတိယပတ်တွင် လူသုံးများသည့် စားအုန်းဆီ ၁၀ ပိဿာ တစ်ပုံး ၄၈၀၀၀ကျပ်၊ မြေပဲဆီသန့် ၁၀ ပိဿာတစ်ပုံး ၆၀၀၀၀ ကျပ်ဖြစ်သည်။ ကုန်ကြမ်း မြေပဲဆံတစ်ပိဿာ ၂၃၀၀ ကျပ် ဒေသတွင်း ပေါက်ဈေးရှိပြီး ပိဿာ ၁၀၀ ကြိတ်ခဲ့ပါက ဆီသန့် ၄၀ ပိဿာရပြီး ပဲဖတ် ၅၅ ပိဿာထွက်ရှိပါသည်။ ဆီသန့်ပဲဖတ်များကို ‌ဒေသတွင်းနှင့် ရန်ကုန်၊ မန္တလေး၊ ပုသိမ်၊ တွံ့တေးမြို့များအဓိက‌ရောင်းချရပြီး ယနေ့ ပဲဖတ်တစ်ပိဿာ ၁၃၂၀ ကျပ်ခန့် ရှိကြောင်း သိရှိရပါသည်။
မြန်မာနိုင်ငံတွင် ဆီစားသုံးမှုမြင့်မားသည့် အတွက် ပြည်ပမှ စားအုန်းဆီများကို ဘီလီယံနှင့် ချီ၍ ဝယ်ယူတင်သွင်းနေရကြောင်း ကျန်းမာရေးနှင့် မညီညွတ်သည့် စားအုန်း ဆီများကို လျော့ချစားသုံးခြင်းဖြင့် ကျန်းမာရေးအတွက် အထောက်အပံ့ဖြစ်သကဲ့သို့ ပြည်ပထွက်ငွေလည်း ချွေတာရာရောက်စေကြောင်း နိုင်ငံတော်အကြီးအကဲများက အသိပညာပေးလျက်ရှိသည်။
ပြည်ပသို့ မြေပဲဆံတင်ပို့မှု ပိုလျှံမှသာ ရောင်းချသင့်ကြောင်း၊ သို့မှသာ အခြေခံလူတန်းစားများ ဝယ်ယူစားသုံးနိုင်သည့် ဈေးနှုန်းဖြစ်ပေါ်လာ နိုင်ပြီး စားအုန်းဆီစားသုံးမှုကိုလည်း လျှော့ချသွားနိုင်ကြောင်း၊ ပြည်သူများအနေဖြင့် ပြည်ပမှတင်သွင်းလာသည့် စားအုန်းဆီအား ဈေးနှုန်းသက်သာသဖြင့် စားသုံးနေရသော်လည်း ကျန်းမာရေးနှင့် ညီညွတ်ပြီး ပြည်တွင်းမှထွက်ရှိသည့်မြေပဲဆီ၊ နှမ်းဆီနှင့် နေကြာဆီများကိုသာ ဝယ်ယူစားသုံးရန် ဆန္ဒရှိကြောင်း စားသုံးသူ မိဘပြည်သူများထံမှ သိရပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)

အနာဂတ်နယ်စပ်ကုန်သွယ်ရေးအခြေအနေစိုးရိမ်ဖွယ်ဖြစ်ကြောင်းကုမ္ပဏီများကပြောကြားလျှက်ရှိခြင်း
ကမ္ဘာ့ကပ်ရောဂါ ကိုဗစ်-၁၉ ကြောင့် ဟောင်ကောင်ဒေသ၏ နယ်စပ်ဖြတ်ကျော် စီးပွားရေး လုပ်ငန်းများ၏အလားအလာမှာ စိုးရိမ်ဖွယ်ဖြစ်ပြီး ကောင်းမွန်မှုမရှိနိုင်ဟု ဟောင်ကောင်ဒေသရှိ ကုမ္ပဏီများမှ ပြောကြားလျှက်ရှိကြောင်းကို South China Morning Post သတင်းစာတွင် ရေးသား ဖော်ပြထားကြောင်း၊ဟောင်ကောင်အခြေစိုက် အမေရိကန်ကုန်သည်ကြီးများအသင်းမှလည်း ငွေ ကြေးအချက်အချာကျသည့် ဟောင်ကောင်ဒေသအနေဖြင့် နိုင်ငံတကာခရီးသွားလုပ်ငန်းများ မကြာမီ ပြန်လည်ဆောင်ရွက်နိုင်ရန် ဖြစ်နိုင်ချေနည်းပါးကြောင်း၊ ပေကျင်းမှ တရုတ်ပြည်မကြီးနှင့် နယ်စပ်မှ ခရီးသွားလာမှုများ ပြန်လည်ဖွင့်လှစ်နိုင်ရန် နေ့စဉ်အရေးကြီးလုပ်ငန်းများ ဆောင်ရွက် မည့်သူစာရင်းတွင် သတ်မှတ်ပါဝင်သူအများစုအား ကန့်သတ်စောင့်ကြည့်ရေး ကင်းလွတ်ခွင့်ပေး ထားမှုအား ရပ်ဆိုင်းမည်ဟု ဟောင်ကောင်‌ဒေသအုပ်ချုပ်ရေးမှူးချုပ်၏ကြေငြာချက်အား စီးပွားရေး လုပ်ငန်းအဖွဲ့များမှ တုံ့ပြန်ပြောကြားမှုများရှိခဲ့ကြောင်း၊ယခုနှစ်အစောပိုင်း ပထမ(၇)လအတွင်းတွင် လစဉ်လူဉီးရေ(၃၈၀၀၀)ဉီးအား ကန့်သတ်စောင့်ကြည့်ရေး ကင်းလွတ်ခွင့်ပေးခဲ့ကြောင်း၊ နေ့စဉ် လုပ်ငန်းများဆောင်ရွက်ရန် အရေးကြီးသူများနှင့် စီပွားရေးလုပ်ငန်းများအတွက် အရေးကြီးသူများ အား အုပ်စု(၃၆)ခုခွဲ၍ ယခုလက်ရှိတွင် ကန့်သတ်စောင့်ကြည့်ရေး ကင်းလွတ်ခွင့်ပေးထားကြောင်း၊ ဟောင်ကောင်ဒေသအနေဖြင့် ကိုဗစ် -၁၉ ကူးစက်မှုနှင့် သေဆုံးမှု အနည်းဆုံးအခြေအနေတွင် ထိန်းထားနိုင်သော်လည်း တရုတ်ပြည်မကြီး၏ တင်းကြပ်သည့်သတ်မှတ်ချက်ဖြစ်သည့် ကိုဗစ်-၁၉ ကူးစက်မှုနှုန်းသုညဖြစ်စေရန် ဟောင်ကောင်အနေဖြင့်လိုက်ပါဆောင်ရွက်ရမည်ဖြစ်ရာ နိုင်ငံတကာ ခရီးသွားလုပ်ငန်းများ ပြန်လည်စတင်ရန် ရုန်းကန်ဆောင်ရွက်လျှက်ရှိကြောင်း၊ နယ်စပ်ဖြတ်ကေျာ် စီးပွားရေးလုပ်ငန်းများမှာ Online မှ ဆောင်ရွက်နိုင်သော်လည်း လုပ်ငန်းမိတ်ဖက်အသစ်များ ရှာဖွေရန် အခွင့်အလမ်းများနှင့် ပူးပေါင်းဆောင်ရွက်ရန် ပိုမိုခက်ခဲလာပြီး တိုးတက်မှုများ ရပ်တန့် သွားနိုင်ကြောင်း၊ဟောင်ကောင်ဒေသရှိ အသေးစားနှင့်အလတ်စားလုပ်ငန်းများမှာ ကမ္ဘာ့ကပ်ရောဂါ ကိုဗစ်-၁၉ ကြောင့် ထိခိုက်လျှက်ရှိသောကြောင့် ၎င်းတို့၏ စိုးရိမ်ပူပန်မှုများနှင့်ပတ်သက်၍ အထူး အလေးထားဆောင်ရွက်ရမည်ဖြစ်ကြောင်းသိရှိရပါသည်။
နည်းပညာအချက်အချာကျသည့်ရှန်းကျန့်မြို့၌ ကျင်းပပြုလုပ်မည့် ကုန်စည်ပြပွဲများ ပယ်ဖျက်ခြင်း
တရုတ်နိုင်ငံ၏ အခြားသောဒေသများတွင် ကိုဗစ်-၁၉ ကူးစက်ပျံ့နှံ့မှု မြင့်တက်လျှက်ရှိသော ကြောင့် ယခုနှစ် စတုတ္ထသုံးလပတ်အတွင်း တရုတ်နိုင်ငံ၏ဆီလီကွန်တောင်ကြားဖြစ်သည့် တရုတ် နိုင်ငံတောင်ပိုင်းရှိ နည်းပညာအချက်အချာကျသည့် ရှန်းကျန့်မြို့၌ကျင်းပပြုလုပ်မည့် ကုန်စည်ပြပွဲ များကို ယာယီရပ်ဆိုင်းခြင်းနှင့် ပယ်ဖျက်ခြင်းများပြုလုပ်ခဲ့သည်ဟု South China Morning Post သတင်းစာတွင် ရေးသားဖော်ပြထားကြောင်း၊ ကိုဗစ်-၁၉ ကူးစက်ပျံ့နှံ့မှုနည်းပါးစေရန် စီးပွားရေး လုပ်ငန်းများနယ်မြေဖြစ်သည့် ဖူရှင်းခရိုင်ရှိ Shenzhen Convention & Exhibition Centre- SZCEC)၌ ကျင်းပပြုလုပ်မည့်ပြပွဲများကို ပယ်ဖျက်ခဲ့ကြောင်း၊ လူဉီးရေ(၂၀၀၀၀)ခန့် လာရောက်ရန် ခန့်မှန်းထားသော China Public Security Expo အား ယခုနှစ် ဒီဇင်ဘာလကုန်(သို့)လာမည့်နှစ် ဇန်နဝါရီလအစောပိုင်းသို့ရွှေ့ဆိုင်းမည်ဖြစ်ကြောင်း၊ကိုဗစ်-၁၉ ကူးစက်မှုမြင့်တက်လာသောကြောင့် ပြပွဲများအားလုံးကို ယာယီရပ်ဆိုင်းရန် SZCEC မှ ဆုံးဖြတ်ခဲ့ပြီး ကျင်းပပြုလုပ်လျှက်ရှိသည့်ပြပွဲများ ကိုလည်း ၂၅-၁၀-၂၀၂၁ ရက်နေ့က နောက်ဆုံးရက်သတ်မှတ်ဆောင်ရွက်ခဲ့ကြောင်း၊ရှန်းကျန့်မြို့ရှိ ပြပွဲကြီးမှူးကျင်းပပြုလုပ်သည့် အဖွဲ့အစည်း(၁၀)ခုမှလည်း အောက်တိုဘာလနောက်ဆုံးပတ်နှင့် နိုဝင်ဘာလအတွင်း ကျင်းပပြုလုပ်ရန်စီစဉ်ထားသော ပြပွဲများကိုလည်း ယာယီရပ်ဆိုင်းခဲ့သော် လည်း တရုတ်နိုင်ငံ၏ အကြီးဆုံးသိပ္ပံနှင့်နည်းပညာပြပွဲများမှ တစ်ခုဖြစ်သည့် China Hi-Tech Fair အား SZCEC ၌ အစီအစဉ်ရေးဆွဲထားသည့်အတိုင်း ၂၀၂၁ ခုနှစ်၊ နိုဝင်ဘာလ(၁၇)ရက်နေ့မှ (၂၁) ရက်နေ့အတွင်း ကျင်းပပြုလုပ်ရန်မျှော်မှန်းထားကြောင်းသိရှိရပါသည်။
(ရင်းမြစ်- ကူမင်းမြို့စီးပွားရေးသံမှူးပေးပို့သည့်သတင်း)

ဖျာပုံမြို့နယ်သည်စိုက်ပျိုးရေးနှင့်ရေလုပ်ငန်းကို အဓိကထား၍ လုပ်ကိုင်လျက်ရှိသော မြို့ တစ်မြို့ဖြစ်ပြီး ယခုအခါတွင် ထိုင်းမျိုးဖြစ်သည့် အုန်းချိုမွှေး(အရေသောက်အုန်းပင်)များကို စိုက်ပျိုး လာကြသည်။ ၂၀၂၁ ခုနှစ် နိုဝင်ဘာလ (၉) ရက်နေ့တွင် စားသုံးသူရေးရာဦးစီးဌာနမှ ခရိုင်ဦးစီးမှူးနှင့် တာဝန်ရှိသူများသည် အုန်းချိုမွှေးများ စိုက်ပျိုးထားသည့် ကျုံတာကျေးရွာသို့ သွားရောက်၍ စိုက်ခင်းတာဝန်ခံ ဦးမောင်အေးနှင့် တွေ့ဆုံပြီး စိုက်ခင်းနှင့်ပတ်သက်၍ မေးမြန်းဆွေးနွေးခဲ့ပါသည်။
စိုက်ခင်းတာဝန်ခံက အုန်းချိုမွှေး စိုက်ဧက(၄)ဧကစိုက်ပျိုးထားရှိကြောင်း၊ တစ်ဧကလျှင် အပင်(၈၀)နှင့် တစ်ပင်နှင့်တစ်ပင်အကြား (၁၅)ပေ ခြား၍ တစ်ဘောင်နှင့် တစ်ဘောင်ကြား (၁၀)ပေအကွာအဝေးဖြင့် စိုက်ပျိုးထားရှိပါကြောင်း၊ ပျိုးပင်များကို ရန်ကုန်မြို့တိုက်ကြီးမှဝယ်ယူပြီး တစ်ပင်လျှင်(၇၀၀၀)ကျပ် ဈေးဖြင့်ဝယ်ယူရကြောင်း၊ ခြံလုပ်သားများအား ကိုယ့်စားရိတ်ကိုယ်စားစနစ်ဖြင့် တစ်နေ့လျှင် လုပ်ခကျပ်(၇၀၀၀ မှ ၁၀၀၀၀) ထိပေးချေရကြောင်း၊ စိုက်ခင်းဘောင်ပေါ်တွင် စက်ဖွဲပြာ၊ သဘာဝ ကြက်ချေး၊ တီစူပါအနက်၊ ပုလဲဓါတ်မြေဩဇာ နွာချေးတို့အား အချိုးအစားအတိုင်း ထည့်ပေးကြောင်း၊ အုန်းချိုမွှေး သီးချိန်ကတော့(၂)နှစ်ဆိုလျှင် သီးကင်း လိုက်ပြီး (၃) နှစ်တွင် ဈေးကွက် တင်ရောင်းလို့ရပြီဖြစ်ကြောင်း၊ အုန်းပင် တစ်ပင်လျှင် ၃/၄ခိုင် သီးပြီး အုန်းသီး တစ်ခိုင်လျှင် (၂၅-၃၀) လုံးခန့်သီးကာ ဈေးကွက်အနေဖြင့် တစ်လုံးလျှင် ကျပ်(၄၀၀-၅၀၀) ကျပ်ရရှိကြောင်း သိရှိရပါသည်။
အုန်းချိုမွှေး (၁) ဧကစိုက်ပျိုးကုန်ကျစရိတ်မှာ ကျပ် (၇၅) သိန်းခန့်ရှိပြီး အုန်းပင်ကြားတွင် မျိုး ကောင်းသော ကွမ်းသီးပင်များ အပင် (၁၀၀၀) ကြားညှပ်စိုက်ပျိုးထားရှိပါသည်။ ကျုံတာ ကျေးရွာတွင်လည်း အုန်းချိုမွှေးစိုက်ပျိုးသူ နောက်တစ်ဦးရှိပြီး ဒေးဒရဲမြို့နယ်တွင်လည်း အုန်းချိုမွှေး စိုက်ပျိုးသူများရှိကြောင်း ခြံတာဝန်ခံထံမှ သိရှိခဲ့ရပါသည်။
စားသုံးသူရေးရာဦးစီးဌာန(ဧရာဝတီတိုင်းဒေသကြီး)