သတင်းနှင့် လှုပ်ရှားမှုများ

    ဓနုဖြူမြို့နယ်ကုန်ဈေးနှုန်းတည်ငြိမ်ကျဆင်းရေးအဖွဲ့တိူ့နှင့် စားသုံးသူရေးရာဦးစီးဌာနတို့ ပူးပေါင်းပါဝင်လျက် ၅-၁၂-၂၀၂၄ ရက်နေ့၊ နံနက် (၁၁:၃၀)နာရီအချိန်မှစ၍ ဓနုဖြူမြို့နယ် လက်လီဆန်အရောင်းဆိုင်(၇)ဆိုင်သို့ သွားရောက်ကာ ကွင်းဆင်းစစ်ဆေးခြင်း လုပ်ငန်းများ ဆောင်ရွက်ခဲ့ကြပါသည်။

   ထိုသို့ဆောင်ရွက်ခဲ့ရာတွင် ဓနုဖြူမြို့နယ်၊ အတွင်းရှိ ဆန်ဆိုင်များတွင် ဆန်အိတ်သိုလှောင် ထားရှိမှုကို စစ်ဆေးခြင်း၊ ဆန်များ ဝယ်ယူမှုကိုစုံစမ်းမေးမြန်းခြင်း၊ အခြားဒေသ ပေါ်ဆန်းစပါး ဝယ်ယူမှု အခြေအနေများကို မေးမြန်းခြင်း ဆန်တစ်ပြည်ဈေးနှုန်း၊ ဆန် ၁အိတ်ဈေးနှုန်းများကို မေးမြန်းခြင်း၊ နေ့စဉ်ရောင်းချမှု ဆန်၊ လစဉ်ဝယ်ယူစားသုံးမှု ဆန်အိတ်ရေတို့ကို ကြည်ရှုစစ်ဆေးခဲ့ပြီး ဆန်ဈေးနှုန်းများကို ဈေးနှုန်းဖော်ပြရောင်းချနေပြီး သတ်မှတ်ရည်ညွှန်ဈေးဖြင့် ရောင်းချနေကြောင်း စစ်ဆေးတွေ့ရှိရပါသည်။ ဆန်ဆိုင်များတွင် တစ်နေ့ရောင်းချ ဆန်အိတ်ရေ၊ လက်ကျန်ဆန်အိတ်နှင့် ဆန်များဈေးမြင့်တင်ရောင်းချရန်ရည်ရွယ်၍ သိုလှောင်ထားခြင်း မပြုလုပ်ရန်၊ ဆန်အိတ်ရေ ၁၀၀၀နှင့် အထက်သိုလှောင်ထားပါက MyRoတွင် အွန်းလိုင်း မှတ်ပုံတင်ဆောင်ရွက်ပြီးမှ ရောင်းချရန်၊ စစ်ဆေးရေးအဖွဲ့မှ စစ်ဆေးသည့်အခါ မှတ်ပုံတင်ခြင်းမရှိပဲ ရောင်းချနေပါကြောင်း စစ်ဆေးတွေ့ ရှိပါက အရေးကြီး ကုန်စည်ဝန်ဆောင်မှု ဥပဒေအရ အရေးယူ‌ဆောင်ရွက်သွားမည်ဖြစ်ကြောင်း ဆန်ဆိုင်လုပ်ငန်းရှင်များအား အသိပေး ပြောကြားခဲ့ကြောင်း သိရသည်။

DOCA(ဧရာဝတီ)

    ဧရာဝတီတိုင်းဒေသကြီး၊ မအူပင်ခရိုင်၊ စားသုံးသူရေးရာဦးစီးဌာနများမှ တာဝန်ရှိသူဝန်ထမ်းများသည် မြို့နယ်တွင် အခြေခံစားသောက်ကုန်ဈေးနှုန်းများ အခြေအနေကို အပါတ်စဉ် နှိုင်းယှဉ်ချက် စာရင်းကောက်ယူရန်အတွက် မြို့မဈေး၊ မင်္ဂလာဈေး၊ အခွန်လွန်ဈေးတို့မှ အခြေခံစားသောက်ကုန်အမျိုးမျိုးဈေးနှုန်းကို ကွင်းဆင်းစုံစမ်းမေးမြန်း ဆောင်ရွက်ခဲ့ကြသည်။

      ကွင်းဆင်းစစ်ဆေးဆောင်ရွက်ရာတွင် ဒေသ ငရုတ်ခြောက်အရှည် ၁ပိဿာလက်ကားဈေး ၆၅၀၀ကျပ်၊ လက်လီ ဈေး ၇၀၀၀ကျပ်၊  ငရုတ်ပွ လက်ကား၁ပိဿာဈေး၊ ၁၅၀၀၀ကျပ်၊လက်လီ ၇၀၀၀ကျပ်၊  ကြက်သွန်နီ ၁ပိဿာ လက်ကား ဈေး ၃၇၀၀ကျပ်၊ လက်လီဈေး ၄၂၀၀ကျပ်၊  ကြက်သွန်ဖြူကြုကုတ် လက်ကားဈေး ၁ပိဿာ၊ ၂၁၀၀၀ကျပ်၊ လက်လီဈေး ၂၁၆၀၀ကျပ်၊ ကြက်သွန်ဖြူ ရှမ်းစ ၁ပိဿာ လက်ကားဈေး ၁၅၃၀၀ကျပ်၊ လက်လီဈေး ၁၅၆၀၀ကျပ်၊ အာလူးအလတ် ၁ပိဿာ လက်ကားဈေး ၈၈၀၀ကျပ်၊ လက်လီဈေး ၉၁၀၀ကျပ် ဖြင့် (၃.၁၂.၂၀၂၄) ရက်နေ့ဈေးဖြင့် ရောင်းချပြီး ယခုအပါတ် (၆.၁၂.၂၀၂၄) ရက်နေ့ဈေးဖြင့်ယှဉ်ကြည့်လျှင် ကုန်ဈေးနှုန်း အတက်မရှိပဲ ဈေးနှုန်း တည်ငြိမ် လျက်ရှိသည်။

      သားငါးဈေးအနေဖြင့် ကြက်သား ဗမာ၁ပိဿာ လက်ကား ၂၅၀၀၀ကျပ်၊ လက်လီ၂၇၀၀၀ကျပ်၊  စီပီကြက်သား ၁ပိဿာ လက်ကား ၁၄၀၀၀ကျပ်၊ လက်လီ ၁၅၀၀၀ကျပ်၊ ဘဲသား ၁ပိဿာ လက်ကားဈေး ၁၂၅၀၀ကျပ်၊ လက်လီဈေး ၁၃၀၀၀ကျပ်၊ အမဲသား ၁ပိဿာ လက်ကားဈေး ၁၉၀၀၀ကျပ်၊ လက်လီဈေး ၂၀၀၀၀ကျပ်၊ ဆိတ်သား ၁ပိဿာ လက်ကားဈေး ၂၄၀၀၀ကျပ်၊ လက်လီ ၂၅၀၀၀ကျပ်၊ ငါးခူ ၁ပိဿာ လက်ကားဈေး ၁၇၀၀၀ကျပ်၊ လက်ကား ၁၉၀၀၀ကျပ်၊ ငါးကြင်း ၁ပိဿာ လက်ကားဈေး ၁၅၀၀၀ကျပ်၊ လက်လီ ၁၇၀၀၀ကျပ်၊ ငါးမြစ်ချင်း ၁ပိဿာ လက်ကားဈေး ၉၀၀၀ကျပ်၊ လက်လီဈေး ၁၁၀၀၀ကျပ်၊ ယခင်အပါတ်ထက် ငါးမြစ်ချင်း ငါးဈေး ၄၀၀၀ကျပ် ဈေးကျကြောင်း၊  ငါးရံ့ဈေး ၁ပိဿာ လက်ကားဈေး ၁၂၀၀၀ကျပ်၊ လက်ကားဈေး ၁၄၀၀၀ကျပ်၊ ကျော့ပုစွန် ၁ပိဿာ လက်ကားဈေး ၁၇၀၀၀ကျပ်၊ လက်လီဈေး ၂၀၀၀၀ကျပ်၊ ကြက်ဥဈေး လက်ကား ၃၈၀၊ လက်လီ ၄၀၀ကျပ်၊ ယခင်အပတ်ထက် ၂၀ကျပ် ဈေးတက်လာသည်။ ဘဲဥ လက်ကား ၅၂၀ကျပ်၊ လက်လီ ၅၅၀ကျပ် ယခင်အပတ်ထက် ၃၀ကျပ် ဈေးတက်ကြောင်း တွေ့ရှိ၊ ဆား ၁ပိဿာ လက်ကားဈေး ၃၀၀ကျပ်၊ လက်လီဈေး ၄၀၀ကျပ် ဈေးဖြင့် မအူပင်မြို့နယ်အတွင်း ရောင်းချနေကြောင်း သိရှိရပြီး ကုန်ဈေးနှုန်းတည်ငြိမ်လျက်ရှိကြောင်း ကွင်းဆင်းစုံစမ်းခြင်း များအရ သိရှိရပါသည်။

DOCA(ဧရာဝတီ)

            ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့မှ စားသုံးသူရေးရာဦးစီဌာနမှ ဝန်ထမ်းများသည် ပေါင်းတည်မြို့ သဖန်းပင်ဆိပ်အုပ်စု သပြေကုန်းရွာ အခြေခံပညာမူလတန်းကျောင်း၌ (၆-၁၂-၂၀၂၄)ရက် နံနက် (၁၀:၀၀)နာရီအချိန်တွင် မိတ်ဖက်ဌာနဖြစ်သော မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့် ပူးပေါင်း၍ ကျောင်းသား၊ ကျောင်းသူများကို စားသုံးသူရေးရာနှင့် ပတ်သက်သော အကြောင်းအရာများကို အသိပညာပေးခြင်းများ ဆောင်ရွက်ခဲ့ကြောင်းသိရသည်။

               ထိုသို့သွားရောက် အသိပညာပေးရာတွင် အစားအသောက်များကို ကျောင်းသား/ ကျောင်းသူများအနေဖြင့် ဝယ်ယူစားသောက်ရာတွင် ရွေးချယ်ဝယ်ယူစားသောက်တတ်စေရန်၊ အရောင်တောက်တောက်နှင့် အထူးအဆန်း သဘာဝဆိုးဆေးမဟုတ်သော အစားအစာများကို ဝယ်ယူမစားသုံးသင့်ဘဲ အရည်အသွေးစစ်မှန်ကောင်းမွန်ပြီး ဘေးအန္တရာယ်ကင်းရှင်းသော အစားအသောက်များကိုသာ ဝယ်ယူစားသုံးသင့်ကြောင်း၊ ဝယ်ယူစားသောက်ရာတွင်လည်း ပစ္စည်း၏အရည်အသွေးနှင့် ပါဝင်ပစ္စည်း၊ ထုတ်လုပ်ရက်စွဲ၊ သက်တမ်းကုန်ဆုံးမည့်ရက်စွဲတို့ကိုကြည့်ရှု့၍ ဝယ်ယူစားသောက်သင့်ကြောင်း စားသုံးသူကာကွယ်ရေး ဥပဒေအခန်း(၁၈) ပုဒ်မ (၄၁)ပါအကြောင်းအရာများကို ကျောင်းသား/ ကျောင်းသူများကို အသိပညာ‌ပေးခြင်း ဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

           နတ်တလင်းခရိုင်၊ ပေါင်းတည်မြို့နယ်တွင် မြို့နယ်စားသုံးသူရေးရာဦးစီးဌာနနှင့် ပြန်ဆက်ဦးစီးဌာနတို့ ပူးပေါင်း၍ (၆.၁၂.၂၀၂၄)ရက်နေ့ နံနက်(၀၉:၀၀)နာရီအချိန်တွင် ပေါင်းတည်မြို့နယ် ၃၇လမ်း မူလတန်းကျောင်းသို့ သွားရောက်၍ အသိပညာပေးဟောပြောပွဲ ပြုလုပ်ခဲ့ကြောင်းသိရသည်။

           ထိုသို့ပြုလုပ်ရာတွင်  စားသုံးသူရေးရာဦးစီးဌာန၊  မြိုနယ်တာဝန်ခံ ဦးနိုင်ဝင်းသိန်းက ကျောင်းသား/ ကျောင်းသူများအား သတ်မှတ်ထားသော ကုန်အညွှန်းအမှတ်အသား ပြည့်စုံစွာ ပါဝင်သော မုန့်များဝယ်ယူ စားသောက်ကြရန် အသိပညာပေး ဟောပြောခဲ့ပါသည်။ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဒုဦးစီးမှူး ဒေါ်ဝင်းမြသန်းမှလည်း ကလေးသူငယ်များအား စက္ကူ ပြဇာတ်သရုပ်ဖော်များ ပြသခဲ့ပြီး ပုံပြင်များ၊ ပုံပြင်စာအုပ်များဝေ၍ ဖတ်ခိုင်းကာ စာဖတ်ခြင်း မှရရှိသော အကျိုးကျေးဇူးများ အကြောင်းအသိပညာပေး ဟောပြောခဲ့ကြောင်း သိရပါသည်။

DOCA(ပဲခူး)

              စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာ အသိပညာများ ကျယ်ကျယ် ပြန့်ပြန့်သိရှိနိုင်စေရေး ရည်ရွယ်၍ ခရိုင်အတွင်း မြို့နယ်များရှိ ရပ်ကွက်/ ကျေးရွာများနှင့် အခြေခံပညာ ကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက် လုပ်ဆောင်လျက်ရှိရာ ပြည်ခရိုင်အတွင်း ၂၀၂၄ ခုနှစ်၊ ဒီဇင်ဘာလ (၁)ရက်မှ(၆)ရက် အတွင်း ပြည်မြို့တွင် မူလွန်(မြတ်လေးရုံ)ကျောင်းသို့လည်းကောင်း၊ ရွှေတောင်မြို့တွင် အ.မ.သ(ဖားအိုင့်) ကျောင်း၊ အ.မ.က(ကိုးတွင်းစဉ်)ကျောင်း နှင့် အ.မ.က(မင်းတဲကျွန်း)ကျောင်း များသို့လည်းကောင်း၊ ပေါက်ခေါင်းမြို့တွင် မြို့နယ်ပြန်ဆက်ရုံး နှင့်ပူးပေါင်း၍ စားသုံးသူအသိပညာပေး (Talk Show) ပွဲပြုလုပ်ခြင်းကိုလည်းကောင်း၊ မြို့နယ်တာဝန်ခံများနှင့် ဝန်ထမ်းများသည် မြို့နယ်ပြန် ဆက်ရုံးနှင့် ပူးပေါင်း၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများ ဆောင်ရွက်ခဲ့ကြောင်းသိရသည်။

             အဆိုပါ အသိပညာပေး ဟောပြောခြင်းများ ဆောင်ရွက်ရာတွင် သက်ဆိုင်ရာမြို့နယ် တာဝန်ခံများမှ စားသုံးသူ အခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖေါ်ပြခြင်းဆိုင်ရာ အချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေးဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ်ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန် ကုန်အညွှန်းအမှတ်အသားပြည့်စုံစွာ ပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)