သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ  ခရိုင်ဦးစီးမှူးနှင့် ဝန်ထမ်းများသည် (၂၆.၁၁.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် အရေးကြီးကုန်စည်နှင့် ဝန်ဆောင်မှုဥပဒေအရ အွန်လိုင်းစနစ်ဖြင့် ရောင်းချခြင်းလုပ်ငန်းများကို အရေးကြီးကုန်စည်နှင့် ဝန်ဆောင်မှုလုပ်ငန်းအဖြစ် သတ်မှတ်ထားပြီးဖြစ်သည့်အတွက် ပခုက္ကူမြို့ပေါ်ရှိ အွန်လိုင်းစနစ်ဖြင့် ရောင်းချနေသောလုပ်ငန်းရှင်များအား မှတ်ပုံတင်လျှောက်ထားရန်အတွက် လျှောက်ထားရန် အခြေခံလိုအပ်ချက်များအပါအဝင် ရောင်းချခြင်း၊ ဝယ်ယူခြင်းဆိုင်ရာ အခြားသိကောင်းစရာများအား သိရှိစေရန်ရည်ရွယ်၍ လုပ်ငန်းရှင်များအား ပခုက္ကူမြို့ခရိုင်ဦးစီးမှူးရုံး၌ တွေ့ဆုံ၍ အသိပညာပေးဆွေးနွေး ခဲ့ကြောင်း သိရသည်။

    ခရိုင်ဦးစီးမှူးက အွန်လိုင်းစနစ်ဖြင့် ရောင်းချသည့် မည်သူမဆို Online Registration မှတ်ပုံတင်ထားရန်လိုအပ်ကြောင်း၊ အွန်လိုင်းစနစ်ဖြင့်ရောင်းချသည့် လုပ်ငန်းရှင်များအား မိမိတို့ရောင်းချသည့် အလှကုန်ပစ္စည်းများ၊ လူသုံးကုန်ပစ္စည်းများ၊ ဖက်ရှင်အသုံးအဆောင်၊ ဖန်စီပစ္စည်းများ ရောင်းချနေမှုအပေါ် မှတ်ပုံတင်လျှောက်ထားရန်အတွက် လျှောက်ထားရန် အခြေခံလိုအပ်ချက်များ အပါအဝင်အခြားသိကောင်းစရာများ၊ Online Sale ရောင်းချနေသော  လုပ်ငန်းများမှ မှတ်ပုံတင်ထားသည့် အွန်လိုင်းရောင်းချမှုလုပ်ငန်းများမှ ဈေးဝယ်ယူခြင်းဖြင့် ရရှိလာမည့် အကျိုးကျေးဇူးများနှင့် စားသုံးသူများအနေဖြင့်လည်း မှတ်ပုံတင်ထားသည့် အွန်လိုင်းရောင်းချမှုမှ ကုန်စည်အမျိုးမျိုးကို ဝယ်ယူသုံးစွဲရာတွင် ဘေးအန္တရာယ်ကင်းရှင်းပြီး အာမခံချက်များရရှိမည်ဖြစ်ပြီး စားသုံးသူအခွင့်အရေးများလည်း ရရှိမည်ဖြစ်ကြောင်း၊ တိုင်ကြားနိုင်သည့်နေရာများနှင့် တိုင်ကြားသူများအကြောင်းကိုလည်း ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

              ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လမ်းညွှန်ချက်အရ မှော်ဘီခရိုင်တရားမဝင်ကုန်သွယ်မှု တိုက်ဖျက်ရေးအထူးအဖွဲ့ခေါင်းဆောင် ဒုရဲမှူးကြီးငွေတင် ဦးဆောင်၍ မှော်ဘီခရိုင်၊ အထွေထွေအုပ်ချုပ်ရေးဦးစီးဌာန၊ ဦးစီးအရာရှိ ဦးရဲဝဏ္ဏ ၊ အမှတ်(၄) လမ်းဆုံ စစ်ဆေးရေးဂိတ်၊ ဗိုလ်မှူးဇော်ဇော်အောင်၊ အမှတ်(၆၄)ယာဉ်ထိန်းတပ်ဖွဲ့ရုံး ဒုရဲမှူး ဝင်းအောင်၊ စားသုံးသူရေးရာဦးစီးဌာနမှ ဦးစီးအရာရှိ ဦးမျိုးအေးတို့သည် ၂၂.၁၁.၂၀၂၄ ရက်နေ့ နံနက်(၀၈:၀၀)နာရီအချိန်မှ (၀၉:၂၅)နာရီအချိန်ထိ အမှတ်(၄)လမ်းဆုံစစ်ဆေးရေးဂိတ်တွင် ဖြတ်သန်းသွားလာနေသောမော်တော်ယာဉ်များအား တရားမဝင်ကုန်သွယ်မှုတိုက်ဖျက်ရေးလုပ်ငန်းများ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ပါသည်။

             အဆိုပါ အမှတ်(၄)လမ်းဆုံစစ်ဆေးရေးဂိတ်တွင် သုံးဆယ်၊ မြောင်းတကာ၊ ပေါင်းတည်၊ တိုက်ကြီး၊ ဇီးကုန်း၊ အောင်လံ၊ တောင်ငူ၊ သရက်တို့မှ ဝင်ရောက်လာသော ကုန်တင်ယာဉ်များတွင် ခရီးသည်၊ ကျောက်မီးသွေး၊ ကြက်စာ၊ ကြက်သွန်၊ ဆန်ကွဲ၊ အထည်၊ ပုလင်းခွံ၊ မုန့်မျိုးစုံ၊ ကုန်မဲ့ကားများ အများဆုံးတွေ့ရှိရပြီး တရားမဝင်ကုန်စည်များ တင်ဆောင်လာခြင်းမရှိကြောင်း သိရှိရပါသည်။

DOCA(ရန်ကုန်)

           ၂၁.၁၁.၂၀၂၄ ရက်နေ့ နေ့လယ် (၁၅:၄၀)နာရီအချိန်တွင် မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် လှိုင်သာယာ(အရှေ့ပိုင်း)မြို့နယ်ရှိ အမှတ်(၂၄၆)၊ မက္ခရာမင်းသားကြီး မောင်ပျိုးလမ်းပေါ်ရှိ Ocean Supercenter မှ အချိုရည်အမျိုးမျိုးအား ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့‌ကြောင်းသိရသည်။

            ထိုသို့ ဆောင်ရွက်ခဲ့ရာတွင် အချိုရည်အမျိုးမျိုးဖြစ်သော Royal-D (သီးစုံဓါတ်ဆား အားပြည့်အချိုရည်)၊ Hikar (အားဖြည့်အချိုရည်)၊ Sunkist (လိမ္မော်အချိုရည်)၊ Max+ (လိမ္မော်အရသာအချိုရည်)၊ Shark (အားဖြည့်အချိုရည်၊ ဂျင်ဆင်းပျားရည်)၊ Speed (အားဖြည့် အချိုရည်)၊ M-150 ( အားဖြည့်အချိုရည်)၊ Honey Gold (ရွှေပျားအားဖြည့်အချိုရည်) များတွင် ကုန်အညွှန်းအမှတ်အသားဖော်ပြရမည့်အချက်များနှင့် ပြည့်စုံခြင်းရှိ/ မရှိ စစ်ဆေးခဲ့ရာ ကုန်အညွှန်းအမှတ်အသားပြည့်စုံပြီး မိမိတို့ဌာနမှလည်း ဈေးဝယ်စင်တာသို့ လာရောက်ပစ္စည်း တင်သွင်းသူများကိုလည်း ကုန်အညွှန်းအမှတ်အသားပြည့်စုံသော ပစ္စည်းများကိုသာ လာရောက်တင်သွင်းခွင့်ပြုပါရန်ပြောကြားခဲ့ပါသည်။

DOCA(ရန်ကုန်)

     ၂၀၂၄ ခုနှစ်၊ နိုဝင်ဘာလ ၂၂ ရက်နေ့၊ နေ့လယ် (၁၄:၀၀) နာရီအချိန်တွင် စားသုံးသူရေးရာ ဦးစီးဌာန၊ ရှမ်းပြည်နယ်(အရှေ့ပိုင်း)၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် FDA၊ ကျန်းမာရေး၊ မြို့နယ်စည်ပင်သာယာရေးဌာနနှင့် အထွေထွေအုပ်ချုပ်ရေးဦးစီးဌာနတို့မှ ဝန်ထမ်းများနှင့်ပူးပေါင်း၍ ကျိုင်းတုံမြို့နယ်၊ အာခါဈေးအတွင်းရှိ သွားတိုက်ဆေးအမျိုးမျိုး ရောင်းချသော ကုန်စုံဆိုင်(၆)ဆိုင်အား  ကုန်အညွှန်းအမှတ်အသားနှင့် စပ်လျဉ်း၍  ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

     ထိုသို့ကွင်းဆင်းစစ်ဆေးရာတွင် အာခါဈေးအတွင်းရှိ သွားတိုက်ဆေးအမျိုးမျိုးရောင်းချသော ကုန်စုံဆိုင် (၆) ဆိုင်တို့သည် ကုန်အညွှန်းအမှတ်အသားနှင့်စပ်လျဉ်း၍ ဖော်ပြရန်သတ်မှတ်ထားသော အချက်အလက်များကို ပြည်စုံစွာဖော်ပြထားသည်ကို စစ်ဆေးတွေ့ရှိရပါသည်။ ထို့နောက် စစ်ဆေးရေးမှူးနှင့် ဌာနဆိုင်ရာဝန်ထမ်းများသည် သွားတိုက်ဆေးအရောင်းဆိုင်များအား စားသုံးသူကာကွယ်ရေးဥပဒေအခန်း (၁၈) ပါ “ကုန်အညွှန်းအမှတ်အသားဖော်ပြခြင်း”နှင့် အခန်း (၁၀)  ပါ “စီးပွားရေးလုပ်ငန်းရှင်၏တာဝန်များ”ကို လိုက်နာဆောင်ရွက်ရန် ဆွေးနွေးခဲ့ပါသည်။

DOCA(ရှမ်း)

      ၂၀၂၄ခုနှစ်၊နိုဝင်ဘာလ(၂၂) ရက်နေ့တွင် ရှမ်းပြည်နယ် (တောင်ပိုင်း)၊ စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ခရိုင်ဦးစီးမှူးနှင့်ဝန်ထမ်းများသည် မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ နမ့်စန်မြို့ပေါ်ရှိ ရောနှောဆီ အပါအဝင် စားသုံးဆီအမျိုးမျိုးရောင်းချသည့် ကုန်စုံဆိုင်များသို့ သွားရောက်၍ ဈေးကွက် စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

   ထိုသို့ ဈေးကွက်စောင့်ကြည့် စစ်ဆေးရာတွင် စားသုံးသူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချနေသော စားသုံးဆီများတွင် ကုန်အညွှန်းအမှတ်အသား ဖော်ပြချက်များပါဝင်မှု ရှိ/မရှိတို့ကို ကွင်းဆင်းစစ်ဆေးခဲ့ပါသည်။ ဈေးကွက်အတွင်းတွင်  Goody၊ သိန်းရတနာ၊ Duck ၊ အမေထွား အစရှိသည့် ရောနှောဆီအပါအဝင် စားသုံးဆီအမျိုးမျိုးတို့ကို ရောင်းချလျက်ရှိကြောင်း စစ်ဆေးတွေ့ရှိရပါသည်။

DOCA(ရှမ်း)