သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည် (၃.၁၂.၂၀၂၄) ရက်နေ့ နံနက်(၀၉:၀၀) အချိန်တွင် ကြံခင်းမြို့နယ် စိုက်တိုးမြှင့်အဖွဲ့ ဥက္ကဌ၊ မြို့နယ်စိုက်တိုးမြှင့် အဖွဲ့ဝင်များ၊ ရပ်ကွက်/ ကျေးရွာ အုပ်ချုပ်ရေးမှူးများနှင့်အတူ ကြံခင်းမြို့နယ်၊ ရွှေတောင်စုရပ်ကွက်၌ ကျင်းပပြုလုပ်သော ဆီထွက်သီးနှံ ဆောင်းနေကြာ စံကွက်တွင် မျိုးစေ့ချ စိုက်ပျိုးမှု အခြေအနေအား ကွင်းဆင်းခြင်း ဆောင်ရွက်ခဲ့ပါသည်။

     အဆိုပါ ဆောင်းနေကြာ မျိုးစေ့ချ စိုက်ပျိုးမှုကို ကြံခင်းမြို့နယ် ၊ ရွှေတောင်စုရပ်ကွက်ရှိ တောင်သူ ဦးကျော်မင်းသူ၏ လယ်မြေပေါ်တွင် Supersun 41 အမျိုးအစား ဆောင်းသီးနှံနေကြာ စိုက်ခင်း(၁) ဧက၌ မျိုးစေ့ချ စိုက်ပျိုးနေမှုကို ကြည့်ရှု့အားပေးခဲ့ကြပြီး နံနက်(၁၀:၃၀) နာရီအချိန်တွင် စိုက်ပျိုးပြီးစီးခဲ့ကြောင်း သိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ဇလွန်မြို့နယ်တာဝန်ခံသည်(၂.၁၂.၂၀၂၄)ရက်နေ့၊ နံနက် (၁၀:၀၀) နာရီ အချိန်တွင် မြို့နယ်တရားမဝင်ကုန်သွယ်မှု တိုက်ဖျက်ရေးအဖွဲ့ဝင်များနှင့်ပူးပေါင်း၍ အဒါးလမ်း၊ လမ်းမတော်(မ)ရပ်ကွက်နှင့် ဗျည်းညားရပ်ကွက်ရှိ ဆန်စက်များနှင့် ဆန်သိုလှောင်ရုံများအား တရားမဝင် သိုလှောင်ထားခြင်းရှိ/မရှိနှင့်  ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းရာတွင် ဆန်စက်များရှိ သိုလှောင်ရုံများအား မြို့နယ်တရားမဝင်ကုန်သွယ်မှု တိုက်ဖျက်ရေးအဖွဲ့မှ စစ်ဆေးခဲ့ရာ သိုလှောင်ရုံအတွင်း စပါး/ဆန်တည်ရှိမှုအခြေအနေအရ ရာသီချိန်တွင် ပုံမှန်ဝယ်ယူ ကြိတ်ခွဲထုတ်လုပ်လျက်ရှိကြောင်း တွေ့ရှိရပါသည်။ ဆန်တင်ပို့မှုအနေဖြင့် ရန်ကုန်သို့ တင်ပို့ရကြောင်းနှင့် တားမြစ်ဒေသများသို့ တင်ပို့ရောင်းချခြင်းမရှိကြောင်း စစ်ဆေးတွေ့ရှိရပါသည်။  စားသုံးသူရေးရာဦးစီးဌာန၊ ဇလွန်မြို့နယ်ဦးစီးမှူး ဦးသန့်ဇင်ဦးက မြန်မာနိုင်ငံဆန်စပါးအသင်းချုပ် MRFမှလအလိုက်ထုတ်ပြန်ပေးသော သင့်တင့်မျှတသောဈေးကွက်ဈေးနှုန်းဖြင့် ဆန်များဖြန့်ဖြူးရောင်းချနိုင်ရေးကို ကြော်ငြာချက်ပါ ဆန်ဈေးနှုန်းများအလိုက် ရောင်းချနိုင်စေရေး၊ သတ်မှတ်ရည်ညွှန်းဈေးထက် အမြတ် ၈% ထက်ကျော်လွန် ရောင်းချခြင်း မဖြစ်စေရေး၊ ဈေးကွက်အတွင်း ကုန်စည်များ ပြတ်လပ်မှုမရှိစေရေးတို့ကို စစ်ဆေးခဲ့ပြီး၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန် ကြော်ငြာထားသော ညွှန်ကြားချက်အမှတ် (၂/၂၀၁၉)နှင့်အညီ မြန်မာဘာသာဖြင့် ပြည်စုံစွာ ဖော်ပြထားသော ကုန်စည်များကိုသာ ရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊   ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာ ရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်းစသည့်တို့ကို အသိပညာပေး ဆွေးနွေးခဲ့ပြီး၊ ဆန်အရောင်း ဆိုင်(၄)ဆိုင်အား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ ဖျာပုံခရိုင်၊ ဖျာပုံမြို့တွင် အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊မွေးမြူရေးနှင့်ကုသရေးဦးစီးဌာနနှင့် စည်ပင်သာယာရေးအဖွဲ့တို့ပါဝင်သော ဌာနဆိုင်ရာပူးပေါင်းအဖွဲ့ဖြင့် ၂၀၂၄ ခုနှစ်၊ ဒီဇင်ဘာလ (၂) ရက်နေ့၊ နံနက် (၁၀:၀၀) နာရီအချိန်၊  ဖျာပုံမြို့၊ အပြောင်ဈေးတွင် ကြက်သား၊ငါး၊ ကြက်ဥ၊ဘဲဥ များကို သက်သာသောဈေးနှုန်းဖြင့် ရောင်းချပေးခဲ့ပါသည်။

     အဆိုပါ ရောင်းချမှုတွင် အများပြည်သူများ သက်သာသော ဈေးနှုန်းဖြင့် ဝယ်ယူစားသုံးနိုင်ရန် အတွက် ကြက်ဥ အလုံး(၈၀၀) တစ်လုံးလျှင် (၃၈၀) ကျပ်၊ ဘဲဥ အလုံး(၈၀၀) တစ်လုံးလျှင် (၅၀၀) ကျပ်၊ ကြက်သား (၁၀)ပိဿာ တစ်ဆယ်သားလျှင် (၁၅၀၀) ကျပ်၊တီလားဗီယားငါး (၂၀) ပိဿာ တစ်ဆယ်ကျပ်သားလျှင် (၄၀၀၀) ကျပ် နှုန်းဖြင့် ဌာနဆိုင်ရာ ပူးပေါင်းအဖွဲ့များဖြင့် ရောင်းချခဲ့ကြောင်း သတင်းရရှိပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်၊ စားသုံးသူရေးရာဦးစီးဌာန၊ ဒု-ခရိုင်ဦးစီးမှူးနှင့်မှ ဝန်ထမ်းများသည် (၄.၁၂.၂၀၂၄) ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မအူပင်မြို့၊ ၁ရပ်ကွက်ရှိ မင်္ဂလာဈေး၊ အခွန်လွတ်ဈေး၊ မြို့မဈေးတို့တွင် ရောင်းချလျက်ရှိသော အသင့်စားမုန်အမျိုးမျိုးတို့အား ဈေးကွက် စောင့်ကြည့်စစ်ဆေးခဲ့ပါသည်။

    စစ်ဆေးရာတွင် ဈေးကွက်တွင်ရောင်းချနေသော အသင့်စားမုန့်အမျိုးမျိုး၌ ကုန်အညွှန်းအမှတ်အသား ပြည့်စုံစွာ ဖော်ပြခြင်း ရှိ/မရှိ စစ်ဆေးခြင်း၊ အစားအသောက်နှင့် ဆေးဝါးကွပ်ကဲရေးဦးစီးဌာန၏ ကန့်သတ်တားမြစ်ထားသည့် မုန့်များရောင်းချခြင်း ရှိ/မရှိ စစ်ဆေးခြင်း၊ စားသုံးသူ ဘေးအန္တရာယ်ဖြစ်စေနိုင်သောထုတ်ကုန်လုံခြုံစိတ်ချရမှုမရှိသော မုန့်များရောင်းချခြင်း ရှိ/မရှိ တို့အား စစ်ဆေးခဲ့ပြီး ဈေးကွက်အတွင်းရောင်းချနေသော မုန့်များသည် သတ်မှတ်ညွှန်ကြားချက်များ၊ ထုတ်ကုန်လုံခြုံစိတ်ချရမှုရှိသော စံနှုန်းနှင့် ကိုက်ညီ၍ သက်ဆိုင်ရာဌာနများမှ ခွင့်ပြုထားသော ထောက်ခံချက်၊ ကုန်အညွှန်းအမှတ်အသားပြည့်စုံစွာဖော်ပြထားသော အသင့်စားမုန့်များကိုသာ ဈေးကွက်အတွင်း ရောင်းချလျက်ရှိကြောင်း စစ်ဆေးတွေ့ရှိရသည်။

   ထို့နောက် အသင့်စားမုန့်အမျိုးမျိုးရောင်းချသော ဆိုင်ရှင်များအား စားသုံးသူများ ဘေးအန္တရာယ် ကင်းစေရန်အတွက် ကုန်အညွှန်းအမှတ်အသားပြည့်စုံစွာ ဖော်ပြထားသော ကုန်စည်များအား ဈေးကွက်အတွင်း တင်သွင်းဖြန့်ဖြူးရောင်းချစေရန်နှင့် သက်တမ်းလွန် မုန့်များရှိပါက ပြန်လည်းလဲလှယ်စေပြီး ရောင်းချခြင်း မပြုရန်ကို အသိပညာပေးဆောင်ရွက်ခဲ့ပါကြောင်း သတင်းရရှိပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင် ပန်းတနော်မြို့နယ်တွင် အထွေထွေအုပ်ချုပ်ရေးဦးစီးဌာနမှ ဦးဆောင် ကြီးကြပ်မှုဖြင့် ပန်းတနော်မြို့နယ်တွင်း  ပြည်သူများ အခြေခံစားသောက်ကုန် ဆီနှင့် ဘဲဥ၊ ကြက်ဥများ သက်သာ သော ဈေးဖြင့် ဝယ်ယူနိုင်ရန် ကြက်ခြံ ၊ ဘဲမွေးမြူရေးခြံ လုပ်ငန်းရှင်နှင့် ဌာနဆိုင်ရာများ ပူးပေါင်း၍ သက်သာသောဈေးဖြင့် ရောင်းချပေးနေကြောင်းသိရသည်။

   ပန်းတနော်မြို့နယ် အထွေထွေအုပ်ချုပ်ရေးဦးစီးမှူးရုံးအရှေ့မှ စတင်၍ လှည့်လည်ရေးကားဖြင့် ပန်းတနော်မြို့နယ်အတွင်း ရောင်းချပေးရာ မြို့နယ်ရပ်ကွက်အုပ်ချုပ်ရေးမှူးများ၊ စားသုံးသူရေးရာဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ် မွေးမြူရေးနှင့် ကုသရေးဦးစီးဌာနတို့ပါဝင်ပြီး (၂၈.၁၁.၂၀၂၄)ရက်မှ (၃၀.၁၁.၂၀၂၄) ရက်နေ့အထိ ကြက်ဥ ၇၅၀၀လုံး၊ ဈေးနှုန်း ၁လုံးကို ၃၅၀/-၊ ဘဲဥအလုံး ၅၀၀လုံး ဈေးနှုန်း ၁လုံး ၅၀၀/-ကျပ်၊ ဆီပိဿာချိန် ၁၀ ကိုရည်ညွှန်းဈေးဖြင့် ရောင်းချပေးခဲ့ကြောင်း သိရသည်။

    ဆက်လက်၍ (၁.၁၂.၂၀၂၄)ရက်နေ့မှ (၄.၁၂.၂၀၂၄) ရက်နေ့ အထိ ကြက်ဥ တစ်နေ့ကို အလုံး ၃၀၀၀၊ ဈေးနှုန်း တစ်လုံးကို ၃၅၀/-ဖြင့် အလုံးရေ (၁၂၀၀၀)လုံးကိုလည်းကောင်း၊ ကြက်သား တစ်နေ့ကို ပိဿာချိန် ၁၀ဖြင့် ပိသာချိန် ၄၀ကို ကြက်သားဈေးနှုန်း ၁၀ဆယ်သား ၁၄၀၀ကျပ်ဖြင့်လည်းကောင်း မြို့နယ် အထွေထွေအုပ်ချုပ်ရေးမှူးရုံးရှေ့မှ စတင်၍ ရောင်းချပေးပြီး ဈေးကားဖြင့် မြို့နယ်တွင်း လှည့်လည်ရောင်းချခဲ့ကြောင်း သတင်းရရှိပါသည်။

DOCA(ဧရာဝတီ)