သတင်းနှင့် လှုပ်ရှားမှုများ

      မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်တာဝန်ခံသည် (၂၄.၁၀.၂၀၂၄) ရက်နေ့၊ နံနက်(၁၀:၃၀)အချိန်တွင် မိုးလေဝသနှင့်ဇလဗေဒ ညွှန်ကြားမှုဦးစီးဌာန၊ အားကစားနှင့်ကာယပညာဦးစီးဌာနနှင့်အတူ ငမင်ကျေးရွာ၊ အခြေခံပညာအထက်တန်းကျောင်း(ခွဲ)၌ စားသုံးသူကာကွယ်ပေးရေး အသိပညာပေးဟောပြောပွဲပြုလုပ်ခဲ့ကြောင်း သိရသည်။

     မြို့နယ်တာဝန်ခံက ကျောင်းသား၊ ကျောင်းသူများကို စားသုံးသူအခွင့်အ‌ရေး(၈)ချက်အကြောင်း ကိုလည်းကောင်း၊ မိုးလေဝသနှင့် ဇလဗေဒညွှန်ကြားမှုဦးစီးဌာနမှ စခန်းမှူး က မိုးလေဝသအကြောင်း သိကောင်းစရာများအကြောင်းကိုလည်းကောင်း၊ အားကစားနှင့် ကာယပညာဦးစီးဌာနမှ ဝန်ထမ်းက အားကစားအကြောင်းနှင့် လူငယ်ရဲ့စည်းကမ်းများအကြောင်းကိုလည်းကောင်း အသိပညာပေး ဟောပြောဆွေးနွေးခဲ့ကြောင်း သိရှိရပါသည်။

DOCA(မကွေး)

          ရွှေဘိုခရိုင်စားသုံးသူရေးရာဦးစီးဌာနမှ ဒု-ခရိုင်ဦးစီးမှူးဦးဆောင်၍ ရွှေဘိုမြို့နယ်တာဝန်ခံ၊ စားသုံးသူရေးရာဌာနခွဲတာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည်(၁၄.၁၀.၂၀၂၄) ရက်နေ့၊ နံနက်(၁၀:၃၀)နာရီအချိန်တွင် ရွှေဘိုမြို့၊ အမှတ်(၇)ရပ်ကွက်ရှိ ရွှေမြင်းပျံအာလူးကြော်လုပ်ငန်းအား ကွင်းဆင်းလေ့လာစစ်ဆေးခဲ့ပါသည်။

         မြန်မာလူမျိုးများသည် ပရိုတင်းဓါတ်အပြည့်ပါသည့်အာလူးကို မုန့်ပဲသရေစာအဖြစ်သော်လည်းကောင်း၊ သက်သက်လွတ်ဟင်းအဖြစ်သော်လည်းကောင်း၊ အသားအမျိုးမျိုးနှင့်ရောနှော၍သော်လည်းကောင်း ချက်ပြုတ်၊ ကြော်‌လှော် စားသုံးလျက်ရှိပါသည်။

           အသင့်စားမုန့်တစ်မျိုးဖြစ်သည့် အာလူးကြော်လုပ်ဆောင်ရာတွင် ကုန်ကြမ်းဖြစ်သည့်အာလူးကို ရှမ်းပြည်နယ်၊ အောင်ပန်းဘက်မှဝယ်ယူရကြောင်း၊  အာလူးကြော်ကြော်ရာတွင် အာလူးကို အချောင်း၊ အပြားနှင့် ဇကာဟူ၍ (၃)မျိုးကြော်ကြောင်း၊  တစ်ရက်လျှင်အာလူးပိဿာချိန် (၂၂၀-၂၄၀-၂၆၀)ကြော်ရကြောင်း၊ ယခုအာလူးပေါက်ဈေးဈေးနှုန်းမှာ (၁)ပိဿာလျှင် (၆၇၀ဝိ/-) ကျပ်ပေးဝယ်ရကြောင်း၊ အာလူးကြော်ရတွင် ဆီသုံးစွဲရမှုမှာ တစ်ရက်လျှင် ဆီပိဿာချိန် (၃၀ မှ ၄၀ ) ထိ သုံးစွဲရကြောင်း၊ အာလူးကြော်ရာတွင် သုံးသည့်လောင်စာမှာ မြေပဲခွံဖြစ်ကြောင်း၊ မြေပဲခွံများကို ကျယ်သည့်အခန်းထဲတွင် စုဆောင်းထားရကြောင်း၊ မီးဖိုမှာ(၂)ဒယ်တွဲ (၃)ဖိုကြော်ရကြောင်း၊ အာလူးကြော်ရာတွင် အလုပ်သမား(၃)ယောက်ဌားရကြောင်း၊  (၁)ရက်လျှင် လုပ်သားဌားရမ်းခမှာ (၅၀၀ဝိ/-)ကျပ်ပေးရကြောင်း သိရှိရပါသည်။

       အာလူးကြော်အပြားနှင့်အာလူးကြော်ဇကာ ရောင်းချသည့်ဈေးနှုန်းမှာ ဗူးကြီး(၁)ဘူးလျှင် (၁၅၀၀ဝိ/-)ကျပ်နှင့် (၁၀)ဘူးလျှင်(၁၄၀၀ဝိ/-)ကျပ်ဈေးနှုန်းရှိကြောင်း၊  အာလူးကြော်အချောင်းဈေးနှုန်းမှာ ဘူးကြီး(၁)ဘူးလျှင်(၁၀၀၀ဝိ/-)ကျပ်ဈေးနှုန်းရှိကြောင်း၊ အာလူးကြော်ဘူးကြီး (၁)ဘူး လျှင် (၅၅၀)ဂရမ် ပါရှိကြောင်း၊ အာလူးကြော်အပြားကို အထုတ်ဖြင့်လည်းရောင်းချကြောင်း၊ (၁)ထုပ် လျှင်(၁၀၀ဝိ/-)ကျပ်နှင့်(၁၀)ထုပ်ဈေးနှုန်းမှာ(၉၀၀ဝိ/-) ကျပ်ဖြင့် ရောင်းချကြောင်း သိရှိရပါသည်။  အချိန်မရွေး၊ နေရာဒေသမရွေး၊ လူမျိုးဘာသာမရွေး စားသုံးနိုင်အောင် သေချာစွာထုပ်ပိုးထားရှိကြောင်း၊ ဈေးကွက်အနေဖြင့် ရွှေဘိုမြို့ပေါ်နှင့် ရွာနီးချုပ်စပ်များမှ လာရောက်ဝယ်ယူကြောင်း၊ Online မှလည်းရောင်းချကြောင်း သိရှိရပါသည်။

            အာလူးကြော်လုပ်ငန်းလုပ်ကိုင်ခြင်းဖြင့် အလုပ်အကိုင်အခွင့်အလမ်းများပေးနိုင်ခြင်း၊ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်လာခြင်း စသည့် အကျိုးကျေးဇူးများရရှိလာနိုင်မည်ဟု သိရှိရပါသည်။

DOCA(စစ်ကိုင်း)

              စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ မျှော်မှန်းချက်ဖြစ်သည့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့် ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးရေးလုပ်ငန်းများအပြင် စားသုံးသူကာကွယ်ရေးအသိပညာပေးလုပ်ငန်းများကို ဆောင်ရွက်လျက်ရှိရာ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူး ဦးဆောင်၍ ၂၀၂၄ခုနှစ်၊ အောက်တိုဘာလအတွင်း စီးပွားရေးလုပ်ငန်းရှင်များနှင့် တွေ့ဆုံခြင်းအား (၅)  ကြိမ် ဆောင်ရွက်ခဲ့ပါသည်။

            ရွှေဘိုခရိုင်အနေဖြင့် ၂၀၂၄ခုနှစ်၊ အောက်တိုဘာလအတွင်း စီးပွားရေးလုပ်ငန်းရှင်အားတွေ့ဆုံခြင်း (၅) ကြိမ် ဆောင်ရွက်ခဲ့ရာ ခရိုင်ဦးစီးမှူးဦးဆောင်သော ဝန်ထမ်းများအဖွဲ့သည် (၄.၁၀.၂၀၂၄)ရက်နေ့တွင် မုန့်မျိုးစုံလုပ်ငန်းရှင်၊ စားသောက်ဆိုင်လုပ်ငန်းရှင်(၂)ဆိုင်၊ စားသောက်ကုန်လုပ်ငန်းရှင်နှင့် မုန့်မျိုးစုံလုပ်ငန်းရှင်တို့နှင့် တွေ့ဆုံပြီး စားသုံးသူကာကွယ်ရေး ဥပဒေ၊  အမိန့် ၊  ညွှန်ကြားချက်များကို  ဌာနမှဆောင်ရွက်လျက်ရှိသော လုပ်ငန်းများအား အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန ၊  ကျန်းမာရေးဦးစီးဌာန၊ ကျောင်းကျန်းမာရေးအဖွဲ့တို့နှင့်ပူးပေါင်း၍ (၂၃-၁၀-၂၀၂၄) ရက် ၊ နံနက်(၀၈:၃၀) နာရီအချိန်တွင် ဘားအံမြို့ရှိ  အ.ထ.က.၅ အခြေခံပညာအထက်တန်းကျောင်း၌ ကျောင်းမုန့်ဈေးတန်း (၄)ဆိုင်တွင် ရောင်းချနေသော စားသောက်ကုန်များကို ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်ညွှန်ကြားချက် အမှတ်၊ ၂/၂၀၁၉ နှင့်အညီ ကိုက်ညီမှု ရှိ / မရှိ ‌ဈေးကွက် စောင့်ကြည့်စစ်ဆေးခဲ့ကြောင်း သိရသည်။

     ထိုသို့ဈေးကွက်စောင့်ကြည့်စစ်ဆေးရာတွင် ကရင်ပြည်နယ်စားသုံးသူရေးရာကော်မတီက  သတ်မှတ်ထားသော ဦးစားပေးဆောင်ရွက်မည့်  ကုန်စည် (၁၀) မျိုးထဲမှ အသင့်စားခေါက်ဆွဲခြောက် အမျိုးမျိုးဖြစ်သည့် MAMA အမှတ်တံဆိပ်တွင် ကုန်အညွှန်းအမှတ်အသား ပြည်စုံစွာ ဖော်ပြထားမှု ရှိ/ မရှိ စစ်ဆေးဆောင်ရွက်ခဲ့သည့်အပြင်  စစ်ဆေးရေးအရာရှိ ဦးဇင်မင်းကိုကိုက ကျောင်းမုန့်ဈေးတန်းတွင် စားသောက်ကုန်များရောင်းချရာ၌ FDA မှ ထောက်ခံချက်ရရှိသော စားသောက်ကုန်များနှင့် စားသုံးသူရေးရာဦးစီးဌာနမှ ဥပဒေနှင့်အညီ ပြဌာန်းသတ်မှတ်ထားသော ကုန်အညွှန်းအမှတ်အသား ပြည့်စုံစွာဖော်ပြထားသည့် စားသောက်ကုန်များကိုသာရောင်းချကြရန်နှင့် ကုန်အညွှန်းအမှတ်အသား ပြည့်စုံစွာဖော်ပြထားခြင်းမရှိသော စားသောက်ကုန်များကို မရောင်းချရန် စစ်ဆေးပြောကြားခဲ့ကြောင်း သတင်းရရှိသည်။

DOCA(ကရင်)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများ၊  စီးပွားရေးလုပ်ငန်းရှင်များနှင့် တွေ့ဆုံပြီး ဥပဒေ၊ အမိန့်နှင့် ညွှန်ကြားချက်များအား ရှင်းလင်းဆွေးနွေးခြင်းများ ဆောင်ရွက်လျက်ရှိသည့်အပြင် ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိရာ ရွှေဘိုခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူးဦးဆောင်၍  ရွှေဘိုမြို့နယ်တာဝန်ခံ၊  စားသုံးသူရေးရာဌာနခွဲတာဝန်ခံ၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲတာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် (၁၄.၁၀.၂၀၂၄)ရက်နေ့၊ နံနက်(၁၁:၃၀)နာရီအချိန်တွင် ရွှေဘိုမြို့၊ အမှတ်(၂)အခြေခံပညာအထက်တန်းကျောင်းရှိ မုန့်‌ဈေးတန်းအား ဈေးကွက်စောင့်ကြည့် စစ်ဆေးခဲ့ပါသည်။

            ထိုသို့ဈေးကွက်စောင့်ကြည့်စစ်ဆေးရာ၌ ကျောင်းမုန့်ဈေးတန်းတွင် အသင့်စားမုန့်အမျိုးမျိုးရောင်းချသည့်ဆိုင်(၃)ဆိုင်၊ မြန်မာရိုးရာမုန့်ပဲသရေစာရောင်းချသည့်ဆိုင်(၅)ဆိုင် ရောင်းချသည်ကို တွေ့ရှိရဖြင့် ဒု-ခရိုင်ဦးစီးမှူးက ဌာနအနေဖြင့် ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်မရောက်မီကုန်စည်နှင့် ဈေးကွက်ရောက်ပြီးကုန်စည်များကို ဈေးကွက်စောင့်ကြည့် စစ်ဆေးခြင်းများ ဆောင်ရွက်လျက်ရှိကြောင်း၊  ကုန်အညွှန်းအမှတ်အသားဖော်ပြခြင်းအကြောင်းများ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူ ကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါအကြောင်းများနှင့် မြန်မာ့ရိုးရာမုန့်ပဲသရေစာများ ရောင်းချသူများအနေဖြင့် အရောင်၊ အနံ့၊ အရသာကောင်းသော သန့်ရှင်းလတ်ဆတ်သော စားသောက်ကုန်များကိုသာ ပြုလုပ်ရောင်းချကြရန် အသိပညာပေးဆွေးနွေးခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေခဲ့ကြောင်းသတင်းရရှိပါသည်။

DOCA(စစ်ကိုင်း)